ᠬᠣᠶᠠᠳᠤᠭᠠᠷ ᠶᠣᠬᠠᠨ
1 ᠠᠬᠠᠯᠠᠭᠴᠢ ᠪᠢ ᠰᠣᠩ᠋ᠭᠣᠭᠳᠠᠭᠰᠠᠨ ᠬᠠᠲᠤᠭᠲᠠᠢ ᠪᠠ ᠲᠡᠭᠦᠨ ᠦ ᠬᠡᠦᠬᠡᠳ ᠤᠳ ᠲᠤ᠄ ᠪᠢ ᠲᠠ ᠨᠠᠷ ᠲᠤ ᠦᠨᠡᠨ ᠦ ᠳᠣᠲᠣᠷᠠ ᠬᠠᠢᠷᠠᠲᠠᠢ᠂ ᠵᠥᠪᠬᠡᠨ ᠪᠢ ᠪᠢᠰᠢ᠂ ᠦᠨᠡᠨ ᠢ ᠮᠡᠳᠡᠭᠰᠡᠨ ᠬᠥᠮᠦᠨ ᠪᠣᠯᠭᠠᠨ ᠬᠠᠢᠷᠠᠲᠠᠢ᠂ 2 ᠪᠢᠳᠡᠨ ᠦ ᠳᠣᠲᠣᠷᠠ ᠪᠠᠢᠭᠰᠠᠭᠠᠷ ᠪᠥᠭᠡᠳ ᠪᠢᠳᠡᠨ ᠲᠡᠢ ᠥᠨᠢ ᠡᠭᠦᠷᠢᠳᠡ ᠬᠠᠮᠲᠤ ᠪᠠᠢᠬᠤ ᠦᠨᠡᠨ ᠡᠴᠡ ᠪᠣᠯᠵᠤ ᠬᠠᠢᠷᠠᠲᠠᠢ᠃
3 ᠡᠴᠢᠭᠡ ᠪᠤᠷᠬᠠᠨ ᠪᠠ ᠡᠴᠢᠭᠡ ᠶᠢᠨ ᠬᠦᠦ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠤᠨ ᠢᠪᠡᠭᠡᠯ᠂ ᠡᠨᠡᠷᠢᠯ᠂ ᠠᠮᠤᠭᠤᠯᠠᠩ ᠨᠢ ᠦᠨᠡᠨ ᠪᠠ ᠬᠠᠢᠷᠠ ᠳᠣᠲᠣᠷᠠ ᠪᠢᠳᠡᠨ ᠳᠦ ᠪᠠᠢᠬᠤ ᠪᠣᠯᠣᠨᠠ᠃
ᠦᠨᠡᠨ ᠪᠠ ᠬᠠᠢᠷᠠ ᠶᠢᠨ ᠳᠣᠲᠣᠷᠠᠬᠢ ᠠᠮᠢᠳᠤᠷᠠᠯ
4 ᠡᠴᠢᠭᠡ ᠶᠢᠨ ᠪᠢᠳᠡᠨ ᠳᠦ ᠵᠠᠬᠢᠭᠰᠠᠨ ᠶᠣᠰᠣᠭᠠᠷ ᠦᠨᠡᠨ ᠢ ᠳᠠᠭᠠᠵᠤ ᠶᠠᠪᠤᠭᠠ ᠲᠠᠨ ᠤ ᠵᠠᠷᠢᠮ ᠬᠡᠦᠬᠡᠳ ᠤᠳ ᠲᠠᠢ ᠠᠭᠤᠯᠵᠠᠭᠠᠳ ᠪᠢ ᠮᠠᠰᠢᠳᠠ ᠪᠠᠶᠠᠷᠯᠠᠪᠠ᠃ 5 ᠬᠠᠲᠤᠨ ᠡ᠂ ᠪᠢᠳᠡ ᠨᠢᠭᠡ ᠨᠢᠭᠡ ᠪᠡᠨ ᠬᠠᠢᠷᠠᠯᠠᠶᠠ ᠭᠡᠵᠦ ᠪᠢ ᠲᠠᠨ ᠳᠤ ᠵᠠᠬᠢᠵᠤ ᠪᠠᠢᠨᠠ᠃ ᠰᠢᠨᠡ ᠵᠠᠷᠯᠢᠭ ᠪᠢᠰᠢ᠂ ᠬᠠᠷᠢᠨ ᠪᠢᠳᠡᠨ ᠳᠦ ᠠᠩ᠋ᠬᠠᠨ ᠠᠴᠠ ᠪᠠᠨ ᠪᠠᠢᠭᠰᠠᠨ ᠲᠡᠷᠡ ᠵᠠᠷᠯᠢᠭ ᠢ ᠪᠢᠴᠢᠵᠦ ᠪᠠᠢᠨᠠ᠃ 6 ᠬᠠᠢᠷᠠ ᠭᠡᠳᠡᠭ ᠨᠢ ᠲᠡᠭᠦᠨ ᠦ ᠵᠠᠷᠯᠢᠭ ᠤᠳ ᠢ ᠳᠠᠭᠠᠬᠤ ᠶᠠᠪᠤᠳᠠᠯ ᠪᠥᠭᠡᠳ ᠵᠠᠷᠯᠢᠭ ᠭᠡᠳᠡᠭ ᠨᠢ ᠠᠩ᠋ᠬᠠᠨ ᠠᠴᠠ ᠪᠠᠨ ᠲᠠ ᠨᠠᠷ ᠤᠨ ᠰᠣᠨᠣᠰᠣᠭᠰᠠᠨᠴᠢᠯᠠᠨ ᠬᠠᠢᠷᠠ ᠶᠢᠨ ᠳᠣᠲᠣᠷᠠ ᠶᠠᠪᠤ ᠭᠡᠰᠡᠨ ᠦᠭᠡ ᠶᠤᠮ᠃
ᠬᠠᠭᠤᠷᠮᠠᠭ ᠪᠠᠭᠰᠢ ᠨᠠᠷ ᠠᠴᠠ ᠪᠣᠯᠭᠣᠮᠵᠢᠯᠠ
7 ᠶᠢᠷᠲᠢᠨᠴᠦ ᠳᠦ ᠣᠯᠠᠨ ᠪᠠᠴᠢᠯᠠᠭᠴᠢ ᠭᠠᠷᠤᠭᠰᠠᠨ᠂ ᠲᠡᠳᠡ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠤᠨ ᠮᠢᠬᠠᠨ ᠪᠡᠶᠡ ᠪᠡᠷ ᠢᠷᠡᠭᠰᠡᠨ ᠢ ᠬᠦᠯᠢᠶᠡᠨ ᠵᠥᠪᠰᠢᠶᠡᠷᠡᠳᠡᠭ᠌ ᠦᠭᠡᠢ᠃ ᠡᠳᠡᠭᠡᠷ ᠬᠥᠮᠦᠨ ᠪᠣᠯ ᠪᠠᠴᠢᠯᠠᠭᠴᠢ ᠪᠥᠭᠡᠳ ᠾᠷᠢᠰᠲ᠋ᠣᠰ ᠢ ᠡᠰᠡᠷᠭᠦᠴᠡᠭᠴᠢ ᠶᠤᠮ᠃ 8 ᠲᠠ ᠨᠠᠷ ᠬᠢᠴᠢᠶᠡᠭᠲᠦᠨ᠂ ᠪᠢᠳᠡᠨ ᠦ ᠬᠢᠭᠰᠡᠨ ᠠᠵᠢᠯ ᠢ ᠪᠠᠯᠠᠯᠬᠤ ᠦᠭᠡᠢ ᠪᠠᠷ ᠲᠡᠭᠦᠰ ᠱᠠᠩᠨᠠᠯ ᠬᠦᠷᠲᠡᠬᠦ ᠪᠣᠯᠲᠤᠭᠠᠢ᠃ 9 ᠾᠷᠢᠰᠲ᠋ᠣᠰ ᠤᠨ ᠰᠤᠷᠭᠠᠯ ᠤᠨ ᠳᠣᠲᠣᠷᠠ ᠦᠯᠡᠳᠡᠯ ᠦᠭᠡᠢ ᠭᠠᠵᠢᠭᠰᠠᠨ ᠪᠣᠯᠭᠠᠨ ᠳᠤ ᠪᠤᠷᠬᠠᠨ ᠪᠠᠢᠳᠠᠭ ᠦᠭᠡᠢ᠃ ᠡᠨᠡ ᠰᠤᠷᠭᠠᠯ ᠤᠨ ᠳᠣᠲᠣᠷᠠ ᠦᠯᠡᠳᠡᠭᠴᠢ ᠳᠤ ᠡᠴᠢᠭᠡ ᠬᠦᠦ ᠬᠣᠶᠠᠭᠤᠯᠠ ᠪᠠᠨ ᠪᠠᠢᠳᠠᠭ᠃ 10 ᠬᠡᠨ ᠨᠢᠭᠡᠨ ᠨᠢ ᠲᠠᠨ ᠤ ᠳᠤ ᠣᠴᠢᠭᠠᠳ ᠡᠨᠡ ᠰᠤᠷᠭᠠᠯ ᠢ ᠤᠯᠠᠮᠵᠢᠯᠠᠬᠤ ᠦᠭᠡᠢ ᠪᠣᠯ ᠲᠡᠭᠦᠨ ᠢ ᠭᠡᠷ ᠲᠡᠭᠡᠨ ᠪᠦᠦ ᠣᠷᠣᠭᠤᠯ᠂ ᠠᠮᠤᠷ ᠢ ᠨᠢ ᠴᠤ ᠪᠦᠦ ᠠᠰᠠᠭᠤ᠃ 11 ᠲᠡᠭᠦᠨ ᠡᠴᠡ ᠠᠮᠤᠷ ᠠᠰᠠᠭᠤᠭᠴᠢ ᠪᠣᠯᠭᠠᠨ ᠲᠡᠭᠦᠨ ᠦ ᠮᠠᠭᠤ ᠠᠵᠢᠯᠠᠯᠭᠠ ᠳᠤ ᠣᠷᠣᠯᠴᠠᠭᠴᠢ ᠮᠥᠨ᠃
12 ᠲᠠ ᠨᠠᠷ ᠲᠤ ᠪᠢᠴᠢᠬᠦ ᠵᠦᠢᠯ ᠣᠯᠠᠨ ᠪᠠᠢᠪᠠᠴᠤ ᠴᠠᠭᠠᠰᠤ ᠪᠡᠬᠡ ᠵᠠᠷᠤᠴᠠᠭᠤᠯᠬᠤ ᠰᠠᠨᠠᠭᠠ ᠦᠭᠡᠢ᠂ ᠲᠠ ᠨᠠᠷ ᠲᠠᠢ ᠨᠢᠭᠤᠷᠲᠠᠨ ᠶᠠᠷᠢᠯᠴᠠᠬᠤ ᠶᠢ ᠬᠦᠰᠡᠵᠦ ᠪᠠᠢᠨᠠ᠃ ᠲᠡᠭᠡᠪᠡᠯ ᠪᠢᠳᠡᠨ ᠦ ᠪᠠᠶᠠᠰᠤᠯ ᠲᠡᠭᠦᠯᠳᠡᠷ ᠪᠣᠯᠣᠨᠠ᠃
13 ᠰᠣᠩ᠋ᠭᠣᠭᠳᠠᠭᠰᠠᠨ ᠡᠭᠡᠴᠢ ᠥᠬᠢᠨ ᠳᠡᠭᠦᠦ ᠶᠢᠨ ᠴᠢᠨᠢ ᠬᠡᠦᠬᠡᠳ ᠤᠳ ᠲᠠᠨ ᠳᠤ ᠮᠡᠨᠳᠦ ᠬᠦᠷᠭᠡᠵᠦ ᠪᠠᠢᠨᠠ᠃