ᠲᠣᠭᠠᠯᠠᠯᠭᠠ ᠨᠢᠭᠡ
ᠬᠥᠮᠦᠨ ᠠᠮᠠ ᠶᠢᠨ ᠪᠦᠷᠢᠳᠬᠡᠯ
1 ᠢᠰᠷᠧᠯᠴᠦᠳ ᠶᠧᠵᠢᠫᠲ ᠡᠴᠡ ᠭᠠᠷᠤᠭᠰᠠᠨ ᠤ ᠳᠠᠷᠠᠭᠠ᠂ ᠬᠣᠶᠠᠳᠠᠬᠢ ᠵᠢᠯ ᠤᠨ ᠬᠣᠶᠠᠳᠤᠭᠠᠷ ᠰᠠᠷᠠ ᠶᠢᠨ ᠨᠢᠭᠡᠨ ᠳᠦ ᠶᠣᠬᠣᠸᠠ ᠰᠢᠨᠠᠢ ᠶᠢᠨ ᠴᠥᠯ ᠳᠤ ᠠᠭᠤᠯᠵᠠᠯᠲᠠ ᠶᠢᠨ ᠴᠠᠴᠠᠷ ᠳᠣᠲᠣᠷᠠ ᠮᠣᠰᠧ ᠳᠤ ᠠᠢᠯᠠᠳᠤᠨ᠄ 2 《ᠲᠠ ᠨᠠᠷ ᠪᠦᠬᠦ ᠢᠰᠷᠧᠯᠴᠦᠳ ᠦᠨ ᠠᠢᠮᠠᠭ ᠤᠳ ᠢᠶᠠᠷ᠂ ᠮᠥᠨ ᠭᠡᠷ ᠪᠦᠯᠢ ᠨᠦᠭᠦᠳ ᠢᠶᠡᠷ ᠬᠠᠮᠤᠭ ᠡᠷᠡ ᠬᠥᠮᠦᠨ ᠦ ᠨᠡᠷᠡ ᠶᠢ ᠨᠢᠭᠡ ᠨᠢᠭᠡ ᠪᠡᠷ ᠨᠢ ᠪᠦᠷᠢᠳᠬᠡᠵᠦ ᠨᠡᠢᠲᠡ ᠴᠢᠭᠤᠯᠭᠠᠨ ᠤ ᠲᠣᠭᠠᠯᠠᠯᠭᠠ ᠶᠢ ᠬᠢᠵᠡᠭᠡ᠂ 3 ᠬᠣᠷᠢ ᠪᠠ ᠲᠡᠭᠦᠨ ᠡᠴᠡ ᠳᠡᠭᠡᠭᠰᠢ ᠨᠠᠰᠤᠨ ᠤ ᠳᠠᠢᠨ ᠳᠤ ᠮᠣᠷᠳᠠᠬᠤ ᠢᠰᠷᠧᠯ ᠤᠨ ᠡᠷᠡ ᠬᠥᠮᠦᠨ ᠪᠣᠯᠭᠠᠨ ᠢ ᠠᠷᠣᠨ ᠲᠠ ᠬᠣᠶᠠᠭᠤᠯᠠ ᠴᠡᠷᠢᠭ ᠤᠨ ᠪᠠᠭ ᠤᠳ ᠢᠶᠠᠷ ᠲᠣᠭᠠᠯᠠ᠃ 4 ᠡᠭᠦᠨ ᠦ ᠲᠥᠯᠥᠭᠡ ᠣᠪᠣᠭ ᠪᠦᠷᠢ ᠡᠴᠡ ᠨᠢᠭᠡ ᠭᠡᠷ ᠪᠦᠯᠢ ᠶᠢᠨ ᠲᠡᠷᠢᠭᠦᠨ ᠢ ᠠᠪᠴᠤ ᠥᠪᠡᠷᠰᠡᠳ ᠲᠡᠢ ᠪᠡᠨ ᠬᠠᠮᠲᠤ ᠪᠠᠢᠯᠭᠠ᠃ 5 ᠲᠠ ᠨᠠᠷ ᠲᠠᠢ ᠬᠠᠮᠲᠤ ᠪᠠᠢᠬᠤ ᠬᠥᠮᠦᠰ ᠦᠨ ᠨᠡᠷᠡᠰ ᠭᠡᠪᠡᠯ᠂ ᠷᠧᠣᠪᠧᠨ ᠤ ᠬᠢ ᠡᠴᠡ ᠱᠧᠳᠧᠣᠷ ᠤᠨ ᠬᠦᠦ ᠡᠯᠢᠽᠦ᠋ᠷ᠂
6 ᠰᠢᠮᠧᠶᠣᠨ ᠤ ᠬᠢ ᠡᠴᠡ ᠽᠦᠷᠢᠱᠠᠳᠠᠢ ᠶᠢᠨ ᠬᠦᠦ ᠱᠧᠯᠦ᠋ᠮᠢᠶᠧᠯ᠂
7 ᠶᠦᠳᠠ ᠶᠢᠨ ᠬᠢ ᠡᠴᠡ ᠠᠮᠢᠨᠠᠳᠠᠪ ᠤᠨ ᠬᠦᠦ ᠨᠠᠾᠱᠣᠨ᠂
8 ᠢᠰᠠᠺᠠᠷ ᠤᠨ ᠬᠢ ᠡᠴᠡ ᠽᠦᠶᠠᠷ ᠤᠨ ᠬᠦᠦ ᠨᠧᠲ᠋ᠠᠨᠧᠯ᠂
9 ᠽᠧᠪᠦ᠋ᠯᠣᠨ ᠤ ᠬᠢ ᠡᠴᠡ ᠾᠧᠯᠣᠨ ᠤ ᠬᠦᠦ ᠡᠯᠢᠶᠠᠪ᠂
10 ᠶᠣᠰᠧᠹ ᠤᠨ ᠬᠥᠪᠡᠭᠦᠳ ᠦᠨ ᠬᠤᠪᠢ ᠳᠤ᠂ ᠡᠹᠷᠠᠢᠮ ᠤᠨ ᠬᠢ ᠡᠴᠡ ᠠᠮᠢᠾᠦ᠋ᠳ᠋ ᠤᠨ ᠬᠦᠦ ᠡᠯᠢᠱᠠᠮᠠ᠂ ᠮᠠᠨᠠᠰᠧ ᠶᠢᠨ ᠬᠢ ᠡᠴᠡ ᠫᠧᠳᠠᠽᠦ᠋ᠷ ᠤᠨ ᠬᠦᠦ ᠭᠠᠮᠠᠯᠢᠶᠧᠯ᠂
11 ᠪᠢᠨᠶᠠᠮᠢᠨ ᠤ ᠬᠢ ᠡᠴᠡ ᠭᠢᠳᠧᠶᠣᠨᠢ ᠶᠢᠨ ᠬᠦᠦ ᠠᠪᠢᠳᠠᠨ᠂
12 ᠳ᠋ᠠᠨ ᠤ ᠬᠢ ᠡᠴᠡ ᠠᠮᠢᠱᠠᠳᠠᠢ ᠶᠢᠨ ᠬᠦᠦ ᠠᠾᠢᠶᠧᠽᠧᠷ᠂
13 ᠠᠱᠧᠷ ᠤᠨ ᠬᠢ ᠡᠴᠡ ᠣᠺᠷᠠᠨ ᠤ ᠬᠦᠦ ᠫᠠᠭᠢᠶᠧᠯ᠂
14 ᠭᠠᠳ᠋ ᠤᠨ ᠬᠢ ᠡᠴᠡ ᠳ᠋ᠧᠣᠶᠧᠯ ᠤᠨ ᠬᠦᠦ ᠡᠯᠢᠶᠠᠰᠠᠹ᠂
15 ᠨᠠᠹᠲ᠋ᠠᠯᠢ ᠶᠢᠨ ᠬᠢ ᠡᠴᠡ ᠡᠨᠠᠨ ᠤ ᠬᠦᠦ ᠠᠾᠢᠷᠠ ᠶᠤᠮ》 ᠭᠡᠯᠡ᠃
16 ᠡᠳᠡ ᠨᠠᠷ ᠪᠣᠯ ᠨᠡᠢᠲᠡ ᠴᠢᠭᠤᠯᠭᠠᠨ ᠠᠴᠠ ᠳᠠᠭᠤᠳᠠᠭᠳᠠᠭᠰᠠᠨ ᠬᠥᠮᠦᠰ ᠪᠥᠭᠡᠳ ᠡᠴᠢᠭᠡ ᠡᠪᠦᠭᠡᠳ ᠦᠨ ᠢᠶᠠᠨ ᠣᠪᠣᠭ ᠤᠨ ᠤᠳᠤᠷᠢᠳᠤᠭᠴᠢᠳ᠂ ᠮᠥᠨ ᠢᠰᠷᠧᠯ ᠤᠨ ᠣᠪᠣᠭ ᠤᠳ ᠤᠨ ᠠᠬᠠᠯᠠᠭᠴᠢᠳ ᠪᠢᠯᠡ᠃
17 ᠲᠡᠢᠨ ᠬᠦ ᠮᠣᠰᠧ᠂ ᠠᠷᠣᠨ ᠬᠣᠶᠠᠷ ᠨᠡᠷᠡ ᠳᠤᠷᠠᠳᠤᠭᠳᠠᠭᠰᠠᠨ ᠡᠨᠡ ᠬᠥᠮᠦᠰ ᠲᠡᠢ ᠬᠠᠮᠲᠤ 18 ᠬᠣᠶᠠᠳᠤᠭᠠᠷ ᠰᠠᠷᠠ ᠶᠢᠨ ᠨᠢᠭᠡᠨ ᠳᠦ ᠨᠡᠢᠲᠡ ᠴᠢᠭᠤᠯᠭᠠᠨ ᠢ ᠪᠦᠬᠦᠯᠢ ᠳᠦᠨᠢ ᠴᠤᠭᠯᠠᠭᠤᠯᠪᠠ᠃ ᠬᠥᠮᠦᠰ ᠣᠪᠣᠭ᠂ ᠭᠡᠷ ᠪᠦᠯᠢ ᠶᠢᠨ ᠢᠶᠠᠨ ᠳᠠᠭᠠᠤ᠂ ᠬᠣᠷᠢ ᠪᠠ ᠲᠡᠭᠦᠨ ᠡᠴᠡ ᠳᠡᠭᠡᠭᠰᠢ ᠨᠠᠰᠤᠨ ᠤ ᠡᠷᠡᠴᠦᠳ ᠨᠡᠷᠡ ᠨᠡᠷᠡ ᠪᠡᠷ ᠢᠶᠠᠨ ᠪᠦᠷᠢᠳᠬᠡᠭᠦᠯᠪᠡ᠃ 19 ᠲᠡᠢᠨ ᠬᠦ ᠮᠣᠰᠧ ᠶᠣᠬᠣᠸᠠ ᠶᠢᠨ ᠲᠤᠰᠢᠶᠠᠭᠰᠠᠨ ᠶᠣᠰᠣᠭᠠᠷ ᠲᠡᠳᠡᠨ ᠢ ᠰᠢᠨᠠᠢ ᠶᠢᠨ ᠴᠥᠯ ᠳᠤ ᠲᠣᠭᠠᠯᠠᠭᠰᠠᠨ ᠪᠠᠢᠨᠠ᠃
20 ᠢᠰᠷᠧᠯ ᠤᠨ ᠤᠤᠭᠠᠨ ᠬᠦᠦ ᠷᠧᠣᠪᠧᠨ ᠤ ᠬᠣᠢᠴᠢ ᠦᠶᠡ ᠶᠢᠨ ᠦᠷᠡ ᠤᠳᠤᠮ ᠠᠴᠠ ᠬᠣᠷᠢ ᠪᠠ ᠲᠡᠭᠦᠨ ᠡᠴᠡ ᠳᠡᠭᠡᠭᠰᠢ ᠨᠠᠰᠤᠨ ᠤ ᠳᠠᠢᠨ ᠳᠤ ᠮᠣᠷᠳᠠᠬᠤ ᠡᠷᠡ ᠬᠥᠮᠦᠨ ᠪᠦᠷᠢ ᠲᠤᠰ ᠲᠤᠰ ᠤᠨ ᠠᠢᠮᠠᠭ ᠪᠣᠯᠣᠨ ᠭᠡᠷ ᠪᠦᠯᠢ ᠶᠢᠨ ᠢᠶᠠᠨ ᠳᠠᠭᠠᠤ ᠨᠡᠷᠡ ᠪᠡᠨ ᠪᠦᠷᠢᠳᠬᠡᠭᠦᠯᠦᠭᠰᠡᠨ ᠳᠦ᠂ 21 ᠷᠧᠣᠪᠧᠨ ᠣᠪᠣᠭ ᠠᠴᠠ ᠲᠣᠭᠠᠯᠠᠭᠤᠯᠤᠭᠰᠠᠨ ᠡᠷᠡᠴᠦᠳ ᠳᠥᠷᠪᠡᠨ ᠲᠦᠮᠡ ᠵᠢᠷᠭᠤᠭᠠᠨ ᠮᠢᠩ᠋ᠭᠠ ᠲᠠᠪᠤᠨ ᠵᠠᠭᠤ ᠪᠠᠢᠯᠠ᠃
22 ᠰᠢᠮᠧᠶᠣᠨ ᠤ ᠬᠣᠢᠴᠢ ᠦᠶᠡ ᠶᠢᠨ ᠦᠷᠡ ᠤᠳᠤᠮ ᠠᠴᠠ ᠬᠣᠷᠢ ᠪᠠ ᠲᠡᠭᠦᠨ ᠡᠴᠡ ᠳᠡᠭᠡᠭᠰᠢ ᠨᠠᠰᠤᠨ ᠤ ᠳᠠᠢᠨ ᠳᠤ ᠮᠣᠷᠳᠠᠬᠤ ᠡᠷᠡ ᠬᠥᠮᠦᠨ ᠪᠦᠷᠢ ᠲᠤᠰ ᠲᠤᠰ ᠤᠨ ᠠᠢᠮᠠᠭ ᠪᠣᠯᠣᠨ ᠭᠡᠷ ᠪᠦᠯᠢ ᠶᠢᠨ ᠢᠶᠠᠨ ᠳᠠᠭᠠᠤ ᠨᠡᠷᠡ ᠪᠡᠨ ᠪᠦᠷᠢᠳᠬᠡᠭᠦᠯᠦᠭᠰᠡᠨ ᠳᠦ᠂ 23 ᠰᠢᠮᠧᠶᠣᠨ ᠣᠪᠣᠭ ᠠᠴᠠ ᠲᠣᠭᠠᠯᠠᠭᠤᠯᠤᠭᠰᠠᠨ ᠡᠷᠡᠴᠦᠳ ᠲᠠᠪᠤᠨ ᠲᠦᠮᠡ ᠶᠢᠰᠦᠨ ᠮᠢᠩ᠋ᠭᠠ ᠭᠤᠷᠪᠠᠨ ᠵᠠᠭᠤ ᠪᠠᠢᠯᠠ᠃
24 ᠭᠠᠳ᠋ ᠤᠨ ᠬᠣᠢᠴᠢ ᠦᠶᠡ ᠶᠢᠨ ᠦᠷᠡ ᠤᠳᠤᠮ ᠠᠴᠠ ᠬᠣᠷᠢ ᠪᠠ ᠲᠡᠭᠦᠨ ᠡᠴᠡ ᠳᠡᠭᠡᠭᠰᠢ ᠨᠠᠰᠤᠨ ᠤ ᠳᠠᠢᠨ ᠳᠤ ᠮᠣᠷᠳᠠᠬᠤ ᠡᠷᠡ ᠬᠥᠮᠦᠨ ᠪᠦᠷᠢ ᠲᠤᠰ ᠲᠤᠰ ᠤᠨ ᠠᠢᠮᠠᠭ ᠪᠣᠯᠣᠨ ᠭᠡᠷ ᠪᠦᠯᠢ ᠶᠢᠨ ᠢᠶᠠᠨ ᠳᠠᠭᠠᠤ ᠨᠡᠷᠡ ᠪᠡᠨ ᠪᠦᠷᠢᠳᠬᠡᠭᠦᠯᠦᠭᠰᠡᠨ ᠳᠦ᠂ 25 ᠭᠠᠳ᠋ ᠣᠪᠣᠭ ᠠᠴᠠ ᠲᠣᠭᠠᠯᠠᠭᠤᠯᠤᠭᠰᠠᠨ ᠡᠷᠡᠴᠦᠳ ᠳᠥᠷᠪᠡᠨ ᠲᠦᠮᠡ ᠲᠠᠪᠤᠨ ᠮᠢᠩ᠋ᠭᠠ ᠵᠢᠷᠭᠤᠭᠠᠨ ᠵᠠᠭᠤ ᠲᠠᠪᠢ ᠪᠠᠢᠯᠠ᠃
26 ᠶᠦᠳᠠ ᠶᠢᠨ ᠬᠣᠢᠴᠢ ᠦᠶᠡ ᠶᠢᠨ ᠦᠷᠡ ᠤᠳᠤᠮ ᠠᠴᠠ ᠬᠣᠷᠢ ᠪᠠ ᠲᠡᠭᠦᠨ ᠡᠴᠡ ᠳᠡᠭᠡᠭᠰᠢ ᠨᠠᠰᠤᠨ ᠤ ᠳᠠᠢᠨ ᠳᠤ ᠮᠣᠷᠳᠠᠬᠤ ᠡᠷᠡ ᠬᠥᠮᠦᠨ ᠪᠦᠷᠢ ᠲᠤᠰ ᠲᠤᠰ ᠤᠨ ᠠᠢᠮᠠᠭ ᠪᠣᠯᠣᠨ ᠭᠡᠷ ᠪᠦᠯᠢ ᠶᠢᠨ ᠢᠶᠠᠨ ᠳᠠᠭᠠᠤ ᠨᠡᠷᠡ ᠪᠡᠨ ᠪᠦᠷᠢᠳᠬᠡᠭᠦᠯᠦᠭᠰᠡᠨ ᠳᠦ᠂ 27 ᠶᠦᠳᠠ ᠣᠪᠣᠭ ᠠᠴᠠ ᠲᠣᠭᠠᠯᠠᠭᠤᠯᠤᠭᠰᠠᠨ ᠡᠷᠡᠴᠦᠳ ᠳᠣᠯᠣᠭᠠᠨ ᠲᠦᠮᠡ ᠳᠥᠷᠪᠡᠨ ᠮᠢᠩ᠋ᠭᠠ ᠵᠢᠷᠭᠤᠭᠠᠨ ᠵᠠᠭᠤ ᠪᠠᠢᠯᠠ᠃
28 ᠢᠰᠠᠺᠠᠷ ᠤᠨ ᠬᠣᠢᠴᠢ ᠦᠶᠡ ᠶᠢᠨ ᠦᠷᠡ ᠤᠳᠤᠮ ᠠᠴᠠ ᠬᠣᠷᠢ ᠪᠠ ᠲᠡᠭᠦᠨ ᠡᠴᠡ ᠳᠡᠭᠡᠭᠰᠢ ᠨᠠᠰᠤᠨ ᠤ ᠳᠠᠢᠨ ᠳᠤ ᠮᠣᠷᠳᠠᠬᠤ ᠡᠷᠡ ᠬᠥᠮᠦᠨ ᠪᠦᠷᠢ ᠲᠤᠰ ᠲᠤᠰ ᠤᠨ ᠠᠢᠮᠠᠭ ᠪᠣᠯᠣᠨ ᠭᠡᠷ ᠪᠦᠯᠢ ᠶᠢᠨ ᠢᠶᠠᠨ ᠳᠠᠭᠠᠤ ᠨᠡᠷᠡ ᠪᠡᠨ ᠪᠦᠷᠢᠳᠬᠡᠭᠦᠯᠦᠭᠰᠡᠨ ᠳᠦ᠂ 29 ᠢᠰᠠᠺᠠᠷ ᠣᠪᠣᠭ ᠠᠴᠠ ᠲᠣᠭᠠᠯᠠᠭᠤᠯᠤᠭᠰᠠᠨ ᠡᠷᠡᠴᠦᠳ ᠲᠠᠪᠤᠨ ᠲᠦᠮᠡ ᠳᠥᠷᠪᠡᠨ ᠮᠢᠩ᠋ᠭᠠ ᠳᠥᠷᠪᠡᠨ ᠵᠠᠭᠤ ᠪᠠᠢᠯᠠ᠃
30 ᠽᠧᠪᠦ᠋ᠯᠣᠨ ᠤ ᠬᠣᠢᠴᠢ ᠦᠶᠡ ᠶᠢᠨ ᠦᠷᠡ ᠤᠳᠤᠮ ᠠᠴᠠ ᠬᠣᠷᠢ ᠪᠠ ᠲᠡᠭᠦᠨ ᠡᠴᠡ ᠳᠡᠭᠡᠭᠰᠢ ᠨᠠᠰᠤᠨ ᠤ ᠳᠠᠢᠨ ᠳᠤ ᠮᠣᠷᠳᠠᠬᠤ ᠡᠷᠡ ᠬᠥᠮᠦᠨ ᠪᠦᠷᠢ ᠲᠤᠰ ᠲᠤᠰ ᠤᠨ ᠠᠢᠮᠠᠭ ᠪᠣᠯᠣᠨ ᠭᠡᠷ ᠪᠦᠯᠢ ᠶᠢᠨ ᠢᠶᠠᠨ ᠳᠠᠭᠠᠤ ᠨᠡᠷᠡ ᠪᠡᠨ ᠪᠦᠷᠢᠳᠬᠡᠭᠦᠯᠦᠭᠰᠡᠨ ᠳᠦ᠂ 31 ᠽᠧᠪᠦ᠋ᠯᠣᠨ ᠣᠪᠣᠭ ᠠᠴᠠ ᠲᠣᠭᠠᠯᠠᠭᠤᠯᠤᠭᠰᠠᠨ ᠡᠷᠡᠴᠦᠳ ᠲᠠᠪᠤᠨ ᠲᠦᠮᠡ ᠳᠣᠯᠣᠭᠠᠨ ᠮᠢᠩ᠋ᠭᠠ ᠳᠥᠷᠪᠡᠨ ᠵᠠᠭᠤ ᠪᠠᠢᠯᠠ᠃
32 ᠶᠣᠰᠧᠹ ᠤᠨ ᠬᠥᠪᠡᠭᠦᠳ ᠦᠨ ᠬᠤᠪᠢ ᠳᠤ᠂ ᠡᠹᠷᠠᠢᠮ ᠤᠨ ᠬᠣᠢᠴᠢ ᠦᠶᠡ ᠶᠢᠨ ᠦᠷᠡ ᠤᠳᠤᠮ ᠠᠴᠠ ᠬᠣᠷᠢ ᠪᠠ ᠲᠡᠭᠦᠨ ᠡᠴᠡ ᠳᠡᠭᠡᠭᠰᠢ ᠨᠠᠰᠤᠨ ᠤ ᠳᠠᠢᠨ ᠳᠤ ᠮᠣᠷᠳᠠᠬᠤ ᠡᠷᠡ ᠬᠥᠮᠦᠨ ᠪᠦᠷᠢ ᠲᠤᠰ ᠲᠤᠰ ᠤᠨ ᠠᠢᠮᠠᠭ ᠪᠣᠯᠣᠨ ᠭᠡᠷ ᠪᠦᠯᠢ ᠶᠢᠨ ᠢᠶᠠᠨ ᠳᠠᠭᠠᠤ ᠨᠡᠷᠡ ᠪᠡᠨ ᠪᠦᠷᠢᠳᠬᠡᠭᠦᠯᠦᠭᠰᠡᠨ ᠳᠦ᠂ 33 ᠡᠹᠷᠠᠢᠮ ᠣᠪᠣᠭ ᠠᠴᠠ ᠲᠣᠭᠠᠯᠠᠭᠤᠯᠤᠭᠰᠠᠨ ᠡᠷᠡᠴᠦᠳ ᠳᠥᠷᠪᠡᠨ ᠲᠦᠮᠡ ᠲᠠᠪᠤᠨ ᠵᠠᠭᠤ ᠪᠠᠢᠭᠰᠠᠨ ᠪᠥᠭᠡᠳ 34 ᠮᠥᠨ ᠮᠠᠨᠠᠰᠧ ᠶᠢᠨ ᠬᠣᠢᠴᠢ ᠦᠶᠡ ᠶᠢᠨ ᠦᠷᠡ ᠤᠳᠤᠮ ᠠᠴᠠ ᠬᠣᠷᠢ ᠪᠠ ᠲᠡᠭᠦᠨ ᠡᠴᠡ ᠳᠡᠭᠡᠭᠰᠢ ᠨᠠᠰᠤᠨ ᠤ ᠳᠠᠢᠨ ᠳᠤ ᠮᠣᠷᠳᠠᠬᠤ ᠡᠷᠡ ᠬᠥᠮᠦᠨ ᠪᠦᠷᠢ ᠲᠤᠰ ᠲᠤᠰ ᠤᠨ ᠠᠢᠮᠠᠭ ᠪᠣᠯᠣᠨ ᠭᠡᠷ ᠪᠦᠯᠢ ᠶᠢᠨ ᠢᠶᠠᠨ ᠳᠠᠭᠠᠤ ᠨᠡᠷᠡ ᠪᠡᠨ ᠪᠦᠷᠢᠳᠬᠡᠭᠦᠯᠦᠭᠰᠡᠨ ᠳᠦ᠂ 35 ᠮᠠᠨᠠᠰᠧ ᠣᠪᠣᠭ ᠠᠴᠠ ᠲᠣᠭᠠᠯᠠᠭᠤᠯᠤᠭᠰᠠᠨ ᠡᠷᠡᠴᠦᠳ ᠭᠤᠷᠪᠠᠨ ᠲᠦᠮᠡ ᠬᠣᠶᠠᠷ ᠮᠢᠩ᠋ᠭᠠ ᠬᠣᠶᠠᠷ ᠵᠠᠭᠤ ᠪᠠᠢᠯᠠ᠃
36 ᠪᠢᠨᠶᠠᠮᠢᠨ ᠤ ᠬᠣᠢᠴᠢ ᠦᠶᠡ ᠶᠢᠨ ᠦᠷᠡ ᠤᠳᠤᠮ ᠠᠴᠠ ᠬᠣᠷᠢ ᠪᠠ ᠲᠡᠭᠦᠨ ᠡᠴᠡ ᠳᠡᠭᠡᠭᠰᠢ ᠨᠠᠰᠤᠨ ᠤ ᠳᠠᠢᠨ ᠳᠤ ᠮᠣᠷᠳᠠᠬᠤ ᠡᠷᠡ ᠬᠥᠮᠦᠨ ᠪᠦᠷᠢ ᠲᠤᠰ ᠲᠤᠰ ᠤᠨ ᠠᠢᠮᠠᠭ ᠪᠣᠯᠣᠨ ᠭᠡᠷ ᠪᠦᠯᠢ ᠶᠢᠨ ᠢᠶᠠᠨ ᠳᠠᠭᠠᠤ ᠨᠡᠷᠡ ᠪᠡᠨ ᠪᠦᠷᠢᠳᠬᠡᠭᠦᠯᠦᠭᠰᠡᠨ ᠳᠦ᠂ 37 ᠪᠢᠨᠶᠠᠮᠢᠨ ᠣᠪᠣᠭ ᠠᠴᠠ ᠲᠣᠭᠠᠯᠠᠭᠤᠯᠤᠭᠰᠠᠨ ᠡᠷᠡᠴᠦᠳ ᠭᠤᠷᠪᠠᠨ ᠲᠦᠮᠡ ᠲᠠᠪᠤᠨ ᠮᠢᠩ᠋ᠭᠠ ᠳᠥᠷᠪᠡᠨ ᠵᠠᠭᠤ ᠪᠠᠢᠯᠠ᠃
38 ᠳ᠋ᠠᠨ ᠤ ᠬᠣᠢᠴᠢ ᠦᠶᠡ ᠶᠢᠨ ᠦᠷᠡ ᠤᠳᠤᠮ ᠠᠴᠠ ᠬᠣᠷᠢ ᠪᠠ ᠲᠡᠭᠦᠨ ᠡᠴᠡ ᠳᠡᠭᠡᠭᠰᠢ ᠨᠠᠰᠤᠨ ᠤ ᠳᠠᠢᠨ ᠳᠤ ᠮᠣᠷᠳᠠᠬᠤ ᠡᠷᠡ ᠬᠥᠮᠦᠨ ᠪᠦᠷᠢ ᠲᠤᠰ ᠲᠤᠰ ᠤᠨ ᠠᠢᠮᠠᠭ ᠪᠣᠯᠣᠨ ᠭᠡᠷ ᠪᠦᠯᠢ ᠶᠢᠨ ᠢᠶᠠᠨ ᠳᠠᠭᠠᠤ ᠨᠡᠷᠡ ᠪᠡᠨ ᠪᠦᠷᠢᠳᠬᠡᠭᠦᠯᠦᠭᠰᠡᠨ ᠳᠦ᠂ 39 ᠳ᠋ᠠᠨ ᠣᠪᠣᠭ ᠠᠴᠠ ᠲᠣᠭᠠᠯᠠᠭᠤᠯᠤᠭᠰᠠᠨ ᠡᠷᠡᠴᠦᠳ ᠵᠢᠷᠭᠤᠭᠠᠨ ᠲᠦᠮᠡ ᠬᠣᠶᠠᠷ ᠮᠢᠩ᠋ᠭᠠ ᠳᠣᠯᠣᠭᠠᠨ ᠵᠠᠭᠤ ᠪᠠᠢᠯᠠ᠃
40 ᠠᠱᠧᠷ ᠤᠨ ᠬᠣᠢᠴᠢ ᠦᠶᠡ ᠶᠢᠨ ᠦᠷᠡ ᠤᠳᠤᠮ ᠠᠴᠠ ᠬᠣᠷᠢ ᠪᠠ ᠲᠡᠭᠦᠨ ᠡᠴᠡ ᠳᠡᠭᠡᠭᠰᠢ ᠨᠠᠰᠤᠨ ᠤ ᠳᠠᠢᠨ ᠳᠤ ᠮᠣᠷᠳᠠᠬᠤ ᠡᠷᠡ ᠬᠥᠮᠦᠨ ᠪᠦᠷᠢ ᠲᠤᠰ ᠲᠤᠰ ᠤᠨ ᠠᠢᠮᠠᠭ ᠪᠣᠯᠣᠨ ᠭᠡᠷ ᠪᠦᠯᠢ ᠶᠢᠨ ᠢᠶᠠᠨ ᠳᠠᠭᠠᠤ ᠨᠡᠷᠡ ᠪᠡᠨ ᠪᠦᠷᠢᠳᠬᠡᠭᠦᠯᠦᠭᠰᠡᠨ ᠳᠦ᠂ 41 ᠠᠱᠧᠷ ᠣᠪᠣᠭ ᠠᠴᠠ ᠲᠣᠭᠠᠯᠠᠭᠤᠯᠤᠭᠰᠠᠨ ᠡᠷᠡᠴᠦᠳ ᠳᠥᠷᠪᠡᠨ ᠲᠦᠮᠡ ᠨᠢᠭᠡᠨ ᠮᠢᠩ᠋ᠭᠠ ᠲᠠᠪᠤᠨ ᠵᠠᠭᠤ ᠪᠠᠢᠯᠠ᠃
42 ᠨᠠᠹᠲ᠋ᠠᠯᠢ ᠶᠢᠨ ᠬᠣᠢᠴᠢ ᠦᠶᠡ ᠶᠢᠨ ᠦᠷᠡ ᠤᠳᠤᠮ ᠠᠴᠠ ᠬᠣᠷᠢ ᠪᠠ ᠲᠡᠭᠦᠨ ᠡᠴᠡ ᠳᠡᠭᠡᠭᠰᠢ ᠨᠠᠰᠤᠨ ᠤ ᠳᠠᠢᠨ ᠳᠤ ᠮᠣᠷᠳᠠᠬᠤ ᠡᠷᠡ ᠬᠥᠮᠦᠨ ᠪᠦᠷᠢ ᠲᠤᠰ ᠲᠤᠰ ᠤᠨ ᠠᠢᠮᠠᠭ ᠪᠣᠯᠣᠨ ᠭᠡᠷ ᠪᠦᠯᠢ ᠶᠢᠨ ᠢᠶᠠᠨ ᠳᠠᠭᠠᠤ ᠨᠡᠷᠡ ᠪᠡᠨ ᠪᠦᠷᠢᠳᠬᠡᠭᠦᠯᠦᠭᠰᠡᠨ ᠳᠦ᠂ 43 ᠨᠠᠹᠲ᠋ᠠᠯᠢ ᠣᠪᠣᠭ ᠠᠴᠠ ᠲᠣᠭᠠᠯᠠᠭᠤᠯᠤᠭᠰᠠᠨ ᠡᠷᠡᠴᠦᠳ ᠲᠠᠪᠤᠨ ᠲᠦᠮᠡ ᠭᠤᠷᠪᠠᠨ ᠮᠢᠩ᠋ᠭᠠ ᠳᠥᠷᠪᠡᠨ ᠵᠠᠭᠤ ᠪᠠᠢᠯᠠ᠃
44 ᠮᠣᠰᠧ ᠠᠷᠣᠨ ᠬᠣᠶᠠᠷ ᠢᠰᠷᠧᠯ ᠤᠨ ᠤᠳᠤᠷᠢᠳᠤᠭᠴᠢᠳ ᠪᠣᠯᠬᠤ ᠥᠪᠡᠷ ᠥᠪᠡᠷ ᠦᠨ ᠢᠶᠠᠨ ᠭᠡᠷ ᠪᠦᠯᠢ ᠶᠢ ᠲᠥᠯᠥᠭᠡᠯᠡᠭᠰᠡᠨ ᠠᠷᠪᠠᠨ ᠬᠣᠶᠠᠷ ᠬᠥᠮᠦᠨ ᠲᠡᠢ ᠬᠠᠮᠲᠤ ᠡᠳᠡᠭᠡᠷ ᠬᠥᠮᠦᠰ ᠢ ᠲᠣᠭᠠᠯᠠᠭᠰᠠᠨ ᠳᠤ᠂ 45 ᠭᠡᠷ ᠪᠦᠯᠢ ᠶᠢᠨ ᠢᠶᠠᠨ ᠳᠠᠭᠠᠤ ᠪᠦᠷᠢᠳᠬᠡᠭᠦᠯᠦᠭᠰᠡᠨ ᠪᠦᠬᠦ ᠢᠰᠷᠧᠯᠴᠦᠳ ᠦᠨ ᠳᠤᠮᠳᠠ ᠠᠴᠠ ᠬᠣᠷᠢ ᠪᠠ ᠲᠡᠭᠦᠨ ᠡᠴᠡ ᠳᠡᠭᠡᠭᠰᠢ ᠨᠠᠰᠤᠨ ᠤ ᠳᠠᠢᠨ ᠳᠤ ᠮᠣᠷᠳᠠᠬᠤ 46 ᠡᠷᠡ ᠬᠥᠮᠦᠨ ᠪᠦᠭᠦᠳᠡ ᠵᠢᠷᠠᠨ ᠲᠦᠮᠡ ᠭᠤᠷᠪᠠᠨ ᠮᠢᠩ᠋ᠭᠠ ᠲᠠᠪᠤᠨ ᠵᠠᠭᠤ ᠲᠠᠪᠢ ᠪᠠᠢᠯᠠ᠃ 47 ᠬᠠᠷᠢᠨ ᠲᠡᠳᠡᠨ ᠦ ᠳᠤᠮᠳᠠ ᠯᠧᠸᠢᠴᠦᠳ ᠦᠨ ᠭᠡᠷ ᠪᠦᠯᠢ ᠨᠦᠭᠦᠳ ᠲᠣᠭᠠᠯᠠᠭᠤᠯᠤᠭᠰᠠᠨ ᠦᠭᠡᠢ᠃
48 ᠤᠴᠢᠷ ᠨᠢ ᠶᠣᠬᠣᠸᠠ ᠮᠣᠰᠧ ᠳᠤ ᠠᠢᠯᠠᠳᠤᠨ᠄ 49 《ᠴᠢ ᠢᠰᠷᠧᠯᠴᠦᠳ ᠢ ᠲᠣᠭᠠᠯᠠᠬᠤ ᠳᠠᠭᠠᠨ ᠯᠧᠸᠢ ᠣᠪᠣᠭ ᠢ ᠪᠦᠦ ᠲᠣᠭᠠᠯᠠ᠂ ᠲᠡᠳᠡᠨ ᠦ ᠲᠣᠭᠠ ᠶᠢ ᠪᠦᠦ ᠣᠷᠣᠭᠤᠯ᠃ 50 ᠬᠠᠷᠢᠨ ᠯᠧᠸᠢᠴᠦᠳ ᠲᠦ ᠭᠡᠷᠡᠴᠢᠯᠡᠯ ᠦᠨ ᠴᠠᠴᠠᠷ ᠪᠣᠯᠣᠨ ᠲᠡᠭᠦᠨ ᠦ ᠠᠯᠢᠪᠠ ᠬᠡᠷᠡᠭᠰᠡᠯ᠂ ᠡᠭᠦᠨ ᠳᠦ ᠬᠠᠮᠢᠶᠠ ᠲᠠᠢ ᠪᠦᠬᠦᠨ ᠢ ᠬᠠᠷᠢᠭᠤᠴᠠᠭᠤᠯ᠃ ᠲᠡᠳᠡ ᠴᠠᠴᠠᠷ ᠪᠣᠯᠣᠨ ᠲᠡᠭᠦᠨ ᠦ ᠪᠦᠬᠦ ᠬᠡᠷᠡᠭᠰᠡᠯ ᠢ ᠠᠪᠴᠤ ᠶᠠᠪᠤᠨ᠂ ᠴᠠᠴᠠᠷ ᠤᠨ ᠲᠥᠯᠥᠭᠡ ᠦᠢᠯᠡᠴᠢᠯᠡᠬᠦ ᠪᠥᠭᠡᠳ ᠴᠠᠴᠠᠷ ᠢ ᠲᠣᠭᠣᠷᠢᠨ ᠪᠠᠭᠤᠳᠠᠯᠯᠠᠬᠤ ᠪᠣᠯᠣᠨᠠ᠃ 51 ᠴᠠᠴᠠᠷ ᠢ ᠨᠡᠭᠦᠯᠭᠡᠬᠦ ᠪᠣᠯᠭᠠᠨ ᠳᠤ ᠯᠧᠸᠢᠴᠦᠳ ᠲᠡᠭᠦᠨ ᠢ ᠪᠠᠭᠤᠯᠭᠠᠨᠠ᠂ ᠴᠠᠴᠠᠷ ᠢ ᠪᠠᠭᠤᠳᠠᠯᠯᠠᠭᠤᠯᠬᠤ ᠦᠶᠡ ᠳᠦ ᠴᠤ ᠯᠧᠸᠢᠴᠦᠳ ᠲᠡᠭᠦᠨ ᠢ ᠪᠣᠰᠬᠠᠨ ᠪᠠᠷᠢᠨᠠ᠃ ᠬᠡᠷᠪᠡ ᠭᠠᠳᠠᠨᠠ ᠶᠢᠨ ᠬᠥᠮᠦᠨ ᠣᠢᠷᠠᠲᠤᠵᠤ ᠣᠴᠢᠪᠠᠯ ᠴᠠᠭᠠᠵᠠᠯᠠᠭᠤᠯᠬᠤ ᠪᠣᠯᠣᠨᠠ᠃ 52 ᠢᠰᠷᠧᠯᠴᠦᠳ ᠳᠠᠢᠴᠢᠳ ᠤᠨ ᠪᠠᠭ ᠢᠶᠠᠷ ᠢᠶᠠᠨ ᠮᠠᠢᠬᠠᠨ ᠢᠶᠠᠨ ᠪᠣᠰᠬᠠᠵᠤ ᠥᠪᠡᠷ ᠦᠨ ᠢᠶᠠᠨ ᠲᠤᠭ ᠤᠨ ᠳᠣᠣᠷᠠ ᠥᠪᠡᠷ ᠦᠨ ᠢᠶᠠᠨ ᠬᠤᠸᠠᠷᠠᠨ ᠳᠤ ᠪᠠᠭᠤᠳᠠᠯᠯᠠᠬᠤ ᠪᠣᠯᠣᠨᠠ᠃ 53 ᠬᠠᠷᠢᠨ ᠯᠧᠸᠢᠴᠦᠳ ᠯᠠ ᠭᠡᠷᠡᠴᠢᠯᠡᠯ ᠦᠨ ᠴᠠᠴᠠᠷ ᠢ ᠲᠣᠭᠣᠷᠢᠨ ᠪᠠᠭᠤᠳᠠᠯᠯᠠᠬᠤ ᠪᠣᠯᠣᠨᠠ᠂ ᠡᠨᠡ ᠨᠢ ᠢᠰᠷᠧᠯᠴᠦᠳ ᠦᠨ ᠨᠡᠢᠲᠡ ᠴᠢᠭᠤᠯᠭᠠᠨ ᠳᠡᠭᠡᠷᠡ ᠠᠭᠤᠷ ᠬᠢᠯᠢᠩ ᠪᠠᠢᠯᠭᠠᠬᠤ ᠦᠭᠡᠢ ᠶᠢᠨ ᠲᠤᠯᠠᠳᠠ ᠶᠤᠮ᠃ ᠡᠢᠨ ᠬᠦ ᠯᠧᠸᠢᠴᠦᠳ ᠭᠡᠷᠡᠴᠢᠯᠡᠯ ᠦᠨ ᠴᠠᠴᠠᠷ ᠢ ᠰᠠᠬᠢᠬᠤ ᠡᠭᠦᠷᠭᠡ ᠪᠡᠨ ᠪᠡᠶᠡᠯᠡᠭᠦᠯᠬᠦ ᠪᠣᠯᠣᠨᠠ》 ᠭᠡᠪᠡ᠃ 54 ᠲᠡᠢᠨ ᠬᠦ ᠢᠰᠷᠧᠯᠴᠦᠳ ᠶᠣᠬᠣᠸᠠ ᠶᠢᠨ ᠮᠣᠰᠧ ᠳᠤ ᠲᠤᠰᠢᠶᠠᠭᠰᠠᠨ ᠪᠦᠬᠦᠨ ᠦ ᠶᠣᠰᠣᠭᠠᠷ ᠬᠢᠵᠡᠢ᠃