ᠬᠣᠰᠧᠶᠠ ᠨᠢᠭᠡ
1 ᠶᠦᠳᠠ ᠶᠢᠨ ᠬᠠᠭᠠᠳ ᠦᠽᠢᠶᠠ᠂ ᠶᠣᠲ᠋ᠠᠮ᠂ ᠠᠬᠠᠽ ᠪᠠ ᠾᠧᠽᠧᠺᠢᠶᠠ ᠨᠠᠷ ᠤᠨ ᠡᠳᠦᠷ ᠤᠳ ᠲᠤ᠂ ᠲᠤᠬᠠᠢᠯᠠᠪᠠᠯ ᠢᠰᠷᠧᠯ ᠤᠨ ᠬᠠᠭᠠᠨ᠂ ᠶᠣᠶᠠᠱ ᠤᠨ ᠬᠦᠦ ᠶᠧᠷᠣᠪᠣᠶᠠᠮ ᠤᠨ ᠡᠳᠦᠷ ᠤᠳ ᠲᠤ ᠪᠧᠷᠢ ᠶᠢᠨ ᠬᠦᠦ ᠬᠣᠰᠧᠶᠠ ᠳᠤ ᠢᠷᠡᠭᠰᠡᠨ ᠶᠣᠬᠣᠸᠠ ᠶᠢᠨ ᠦᠭᠡ᠄
ᠬᠣᠰᠧᠶᠠ ᠶᠢᠨ ᠡᠬᠡᠨᠡᠷ ᠬᠡᠦᠬᠡᠳ ᠤᠳ
2 ᠶᠣᠬᠣᠸᠠ ᠠᠩᠬᠠ ᠬᠣᠰᠧᠶᠠ ᠪᠠᠷ ᠳᠠᠮᠵᠢᠭᠤᠯᠤᠨ ᠠᠢᠯᠠᠳᠬᠤ ᠳᠠᠭᠠᠨ ᠲᠡᠭᠦᠨ ᠳᠦ᠄ 《ᠡᠨᠡ ᠨᠤᠲᠤᠭ ᠤᠨ ᠬᠢᠨ ᠶᠣᠬᠣᠸᠠ ᠶᠢ ᠣᠷᠬᠢᠨ ᠵᠠᠪᠬᠠᠢᠷᠠᠭᠰᠠᠨ ᠳᠡᠭᠡᠷᠡ ᠪᠡᠨ ᠵᠠᠪᠬᠠᠢᠷᠠᠭᠰᠠᠭᠠᠷ ᠪᠠᠢᠨᠠ᠃ ᠴᠢ ᠵᠠᠪᠬᠠᠢ ᠡᠮᠡᠭᠲᠡᠢ ᠤᠷᠤᠭᠤ ᠣᠴᠢᠵᠤ᠂ ᠲᠡᠭᠦᠨ ᠢ ᠡᠬᠡᠨᠡᠷ ᠢᠶᠡᠨ ᠪᠣᠯᠭᠠᠨ ᠠᠪᠤᠭᠠᠳ ᠵᠠᠪᠬᠠᠢᠷᠠᠯ ᠤᠨ ᠦᠷᠡ ᠬᠡᠦᠬᠡᠳ ᠲᠥᠷᠥᠭᠦᠯ》 ᠭᠡᠰᠡᠨ ᠳᠦ᠂ 3 ᠲᠡᠷᠡ ᠶᠠᠪᠤᠵᠤ᠂ ᠳ᠋ᠢᠪᠯᠠᠢᠮ ᠤᠨ ᠥᠬᠢᠨ ᠭᠣᠮᠧᠷ ᠢ ᠠᠪᠤᠯᠠ᠃ ᠭᠣᠮᠧᠷ ᠵᠢᠷᠮᠦᠰᠦᠯᠡᠨ᠂ ᠲᠡᠭᠦᠨ ᠳᠦ ᠬᠦᠦ ᠲᠥᠷᠥᠭᠦᠯᠵᠦ ᠥᠭᠴᠡᠢ᠃
4 ᠶᠣᠬᠣᠸᠠ ᠬᠣᠰᠧᠶᠠ ᠳᠤ᠄ 《ᠲᠡᠭᠦᠨ ᠢ ᠶᠧᠽᠷᠧᠯ ᠭᠡᠵᠦ ᠨᠡᠷᠡᠯᠡ᠃ ᠤᠴᠢᠷ ᠨᠢ ᠪᠢ ᠶᠧᠽᠷᠧᠯ ᠳᠤ ᠤᠷᠤᠰᠬᠠᠭᠰᠠᠨ ᠴᠢᠰᠤᠨ ᠤ ᠤᠯᠠᠮ ᠢᠶᠠᠷ ᠶᠧᠾᠦ᠋ ᠶᠢᠨ ᠭᠡᠷ ᠢ ᠤᠳᠠᠯ ᠦᠭᠡᠢ ᠰᠢᠳᠬᠡᠨ᠂ ᠢᠰᠷᠧᠯ ᠤᠨ ᠭᠡᠷ ᠦᠨ ᠬᠠᠭᠠᠨᠴᠢᠯᠠᠯ ᠢ ᠡᠴᠦᠰᠯᠡᠭᠦᠯᠦᠨᠡ᠂ 5 ᠲᠡᠷᠡ ᠡᠳᠦᠷ ᠶᠧᠽᠷᠧᠯ ᠤᠨ ᠬᠥᠨᠳᠡᠢ ᠳᠦ ᠢᠰᠷᠧᠯ ᠤᠨ ᠨᠤᠮᠤ ᠶᠢ ᠬᠤᠭᠤᠯᠬᠤ ᠪᠣᠯᠣᠨᠠ》 ᠭᠡᠵᠡᠢ᠃
6 ᠭᠣᠮᠧᠷ ᠳᠠᠬᠢᠨ ᠵᠢᠷᠮᠦᠰᠦᠯᠡᠨ ᠥᠬᠢᠨ ᠲᠥᠷᠥᠭᠦᠯᠵᠡᠢ᠃ ᠶᠣᠬᠣᠸᠠ ᠬᠣᠰᠧᠶᠠ ᠳᠤ᠄ 《ᠲᠡᠷᠡ ᠥᠬᠢᠨ ᠢ ᠯᠣ ᠷᠦᠬᠠᠮᠠ 1 ᠭᠡᠵᠦ ᠨᠡᠷᠡᠯᠡ᠂ ᠤᠴᠢᠷ ᠨᠢ ᠪᠢ ᠢᠰᠷᠧᠯ ᠤᠨ ᠭᠡᠷ ᠢ ᠥᠷᠥᠰᠢᠶᠡᠬᠦ ᠪᠡᠨ ᠪᠣᠯᠢᠨᠠ᠂ ᠪᠢ ᠲᠡᠳᠡᠨ ᠢ ᠣᠭᠲᠣᠬᠠᠨ ᠴᠤ ᠠᠭᠤᠴᠢᠯᠠᠬᠤ ᠦᠭᠡᠢ᠃ 7 ᠬᠠᠷᠢᠨ ᠪᠢ ᠶᠦᠳᠠ ᠶᠢᠨ ᠭᠡᠷ ᠢ ᠥᠷᠥᠰᠢᠶᠡᠵᠦ ᠠᠪᠤᠷᠠᠨᠠ᠃ ᠨᠤᠮᠤ᠂ ᠢᠯᠳᠦ᠂ ᠲᠤᠯᠤᠯᠳᠤᠭᠠᠨ᠂ ᠮᠣᠷᠢ ᠪᠤᠶᠤ ᠮᠣᠷᠢᠲᠠᠨ ᠢᠶᠠᠷ ᠪᠤᠰᠤ᠂ ᠬᠠᠷᠢᠨ ᠲᠡᠳᠡᠨ ᠦ ᠪᠤᠷᠬᠠᠨ ᠶᠣᠬᠣᠸᠠ ᠪᠠᠷ ᠠᠪᠤᠷᠠᠨᠠ》 ᠭᠡᠪᠡ᠃
8 ᠯᠣ ᠷᠦᠬᠠᠮᠠ ᠬᠥᠬᠥᠨ ᠡᠴᠡ ᠭᠠᠷᠤᠭᠰᠠᠨ ᠤ ᠳᠠᠷᠠᠭᠠ᠂ ᠭᠣᠮᠧᠷ ᠳᠠᠬᠢᠨ ᠵᠢᠷᠮᠦᠰᠦᠯᠡᠨ ᠬᠦᠦ ᠲᠥᠷᠥᠭᠦᠯᠦᠭᠰᠡᠨ ᠳᠦ᠂ 9 ᠶᠣᠬᠣᠸᠠ ᠠᠢᠯᠠᠳᠴᠤ᠄ 《ᠲᠡᠭᠦᠨ ᠢ ᠯᠣ ᠠᠮᠢ 2 ᠭᠡᠵᠦ ᠨᠡᠷᠡᠯᠡ᠃ ᠤᠴᠢᠷ ᠨᠢ ᠲᠠ ᠨᠠᠷ ᠮᠢᠨᠦ ᠠᠷᠠᠳ ᠲᠦᠮᠡᠨ ᠪᠢᠰᠢ᠂ ᠪᠢ ᠴᠤ ᠲᠠ ᠨᠠᠷ ᠤᠨ ᠪᠤᠷᠬᠠᠨ ᠪᠢᠰᠢ》 ᠭᠡᠪᠡ᠃
ᠢᠰᠷᠧᠯ ᠤᠨ ᠰᠡᠷᠭᠦᠯᠲᠡ
10 ᠭᠡᠪᠡᠴᠦ ᠢᠰᠷᠧᠯᠴᠦᠳ ᠦᠨ ᠲᠣᠭᠠ ᠳᠠᠯᠠᠢ ᠶᠢᠨ ᠡᠯᠡᠰᠦ ᠮᠡᠲᠦ ᠬᠡᠮᠵᠢᠵᠦ ᠲᠣᠭᠠᠯᠠᠰᠢ ᠦᠭᠡᠢ ᠪᠣᠯᠣᠨᠠ᠂ ᠲᠡᠳᠡ 《ᠲᠠ ᠨᠠᠷ ᠮᠢᠨᠦ ᠠᠷᠠᠳ ᠲᠦᠮᠡᠨ ᠪᠢᠰᠢ》 ᠭᠡᠭᠳᠡᠭᠰᠡᠨ ᠭᠠᠵᠠᠷ ᠳᠡᠭᠡᠷᠡ ᠪᠡᠨ 《ᠠᠮᠢᠳᠤ ᠪᠤᠷᠬᠠᠨ ᠤ ᠬᠡᠦᠬᠡᠳ ᠤᠳ》 ᠭᠡᠭᠳᠡᠬᠦ ᠪᠣᠯᠣᠨᠠ᠃ 11 ᠶᠦᠳᠠᠴᠤᠳ ᠪᠣᠯᠣᠨ ᠢᠰᠷᠧᠯᠴᠦᠳ ᠬᠠᠮᠲᠤ ᠳᠠᠭᠠᠨ ᠴᠤᠭᠯᠠᠷᠠᠵᠤ᠂ ᠨᠢᠭᠡᠨ ᠲᠡᠷᠢᠭᠦᠨ ᠢ ᠲᠣᠮᠢᠯᠠᠨ᠂ ᠲᠡᠷᠡ ᠭᠠᠵᠠᠷ ᠠᠴᠠ ᠭᠠᠷᠴᠤ ᠢᠷᠡᠨᠡ᠂ ᠶᠧᠽᠷᠧᠯ ᠤᠨ ᠲᠡᠷᠡ ᠡᠳᠦᠷ ᠠᠭᠤᠤ ᠶᠤᠮ᠃