ᠬᠣᠶᠠᠳᠤᠭᠠᠷ ᠲᠧᠰᠠᠯᠦ᠋ᠨᠢᠺ ᠨᠢᠭᠡ
1 ᠫᠠᠦ᠋ᠯ᠂ ᠰᠢᠯᠦ᠋ᠶᠠᠨ ᠪᠠ ᠲᠢᠮᠣᠲ ᠠᠴᠠ ᠪᠢᠳᠡᠨ ᠦ ᠡᠴᠢᠭᠡ ᠪᠤᠷᠬᠠᠨ ᠪᠠ ᠡᠵᠡᠨ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠤᠨ ᠳᠣᠲᠣᠷᠠᠬᠢ ᠲᠧᠰᠠᠯᠦ᠋ᠨᠢᠺᠴᠤᠳ ᠤᠨ ᠴᠢᠭᠤᠯᠭᠠᠨ ᠳᠤ᠄
2 〔ᠪᠢᠳᠡᠨ ᠦ〕 ᠡᠴᠢᠭᠡ ᠪᠤᠷᠬᠠᠨ ᠪᠠ ᠡᠵᠡᠨ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠤᠨ ᠢᠪᠡᠭᠡᠯ᠂ ᠠᠮᠤᠭᠤᠯᠠᠩ ᠲᠠ ᠨᠠᠷ ᠲᠤ ᠪᠠᠢᠬᠤ ᠪᠣᠯᠲᠤᠭᠠᠢ᠃
ᠵᠣᠪᠠᠯᠠᠩ ᠳᠤᠭᠤᠯᠤᠭᠰᠠᠨ ᠲᠡᠪᠴᠢᠶᠡᠷᠢ ᠪᠠ ᠢᠲᠡᠭᠡᠯ
3 ᠠᠬᠠ ᠳᠡᠭᠦᠦ ᠨᠠᠷ ᠡ᠂ ᠲᠠ ᠨᠠᠷ ᠤᠨ ᠤᠴᠢᠷ ᠢᠶᠠᠷ ᠪᠢᠳᠡ ᠦᠷᠭᠦᠯᠵᠢ ᠪᠤᠷᠬᠠᠨ ᠳᠤ ᠲᠠᠯᠠᠷᠬᠠᠬᠤ ᠦᠭᠡᠢ ᠪᠠᠢᠬᠤ ᠶᠢᠨ ᠠᠷᠭᠠ ᠦᠭᠡᠢ ᠪᠥᠭᠡᠳ ᠲᠡᠭᠡᠬᠦ ᠨᠢ ᠵᠦᠢᠲᠡᠢ᠃ ᠤᠴᠢᠷ ᠨᠢ᠂ ᠲᠠ ᠨᠠᠷ ᠤᠨ ᠢᠲᠡᠭᠡᠯ ᠠᠰᠤᠷᠤ ᠶᠡᠬᠡ ᠥᠰᠴᠦ᠂ ᠬᠥᠮᠦᠨ ᠪᠦᠷᠢ ᠶᠢᠨ ᠴᠢᠨᠢ ᠪᠡᠶᠡ ᠪᠡᠶᠡ ᠳᠡᠭᠡᠨ ᠬᠠᠨᠳᠤᠭᠰᠠᠨ ᠬᠠᠢᠷᠠ ᠵᠤᠵᠠᠭᠠᠷᠠᠵᠤ ᠪᠠᠢᠨᠠ᠃ 4 ᠡᠢᠮᠦ ᠡᠴᠡ ᠠᠯᠢᠪᠠ ᠬᠠᠪᠴᠢᠯᠭᠠ ᠪᠠ ᠵᠣᠪᠠᠯᠠᠩ ᠢ ᠳᠤᠭᠤᠯᠵᠤ ᠶᠠᠪᠤᠭᠠ ᠲᠠ ᠨᠠᠷ ᠤᠨ ᠲᠡᠪᠴᠢᠶᠡᠷᠢ ᠪᠠ ᠢᠲᠡᠭᠡᠯ ᠢ ᠪᠢᠳᠡ ᠪᠤᠷᠬᠠᠨ ᠤ ᠴᠢᠭᠤᠯᠭᠠᠨ ᠨᠤᠭᠤᠳ ᠲᠤ ᠪᠠᠬᠠᠷᠬᠠᠨ ᠶᠠᠷᠢᠵᠤ ᠪᠠᠢᠨᠠ᠃
5 ᠡᠢᠨ ᠬᠦ ᠪᠤᠷᠬᠠᠨ ᠤ ᠰᠢᠭᠦᠯᠲᠡ ᠪᠣᠯ ᠵᠥᠪ ᠭᠡᠳᠡᠭ ᠨᠢ ᠭᠡᠷᠡᠴᠢᠯᠡᠭᠳᠡᠵᠦ᠂ ᠲᠠ ᠨᠠᠷ ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠳᠤ ᠲᠡᠩᠴᠡᠬᠦ ᠪᠣᠯᠣᠨᠠ᠃ ᠲᠡᠷᠡ ᠬᠠᠭᠠᠨᠴᠢᠯᠠᠯ ᠤᠨ ᠲᠥᠯᠥᠭᠡ ᠲᠠ ᠨᠠᠷ ᠵᠣᠪᠠᠯᠠᠩ ᠠᠮᠰᠠᠵᠤ ᠪᠠᠢᠨᠠ᠃ 6 ᠲᠠ ᠨᠠᠷ ᠢ ᠵᠣᠪᠠᠭᠠᠭᠴᠢᠳ ᠢ ᠵᠣᠪᠠᠯᠠᠩ ᠢᠶᠠᠷ ᠬᠠᠷᠢᠭᠤᠯᠵᠤ᠂ 7 ᠵᠣᠪᠠᠭᠴᠢ ᠲᠠ ᠨᠠᠷ ᠢ ᠠᠮᠠᠷᠠᠯ ᠢᠶᠠᠷ ᠬᠠᠷᠢᠭᠤᠯᠬᠤ ᠨᠢ ᠦᠨᠡᠨ ᠳᠡᠭᠡᠨ ᠪᠤᠷᠬᠠᠨ ᠤ ᠵᠥᠪ ᠪᠣᠯᠠᠢ᠃ ᠡᠵᠡᠨ ᠢᠰᠦ᠋ᠰ ᠲᠩᠷᠢ ᠡᠴᠡ ᠭᠠᠷᠴᠤ᠂ ᠲᠩᠷᠢ ᠶᠢᠨ ᠬᠦᠴᠦᠷᠬᠡᠭ ᠡᠯᠴᠢᠳ ᠤᠨ ᠢᠶᠠᠨ ᠬᠠᠮᠲᠤ ᠭᠠᠯ ᠤᠨ ᠳᠥᠯᠥ ᠳᠣᠲᠣᠷᠠ ᠢᠯᠡᠷᠡᠭᠦᠯᠦᠭᠳᠡᠬᠦ ᠳᠡᠭᠡᠨ 8 ᠪᠤᠷᠬᠠᠨ ᠢ ᠲᠠᠨᠢᠳᠠᠭ ᠦᠭᠡᠢ ᠬᠥᠮᠦᠰ ᠪᠠ ᠪᠢᠳᠡᠨ ᠦ ᠡᠵᠡᠨ ᠢᠰᠦ᠋ᠰ ᠤᠨ ᠪᠠᠶᠠᠷ ᠤᠨ ᠮᠡᠳᠡᠭᠡᠨ ᠳᠦ ᠵᠠᠬᠢᠷᠤᠭᠳᠠᠳᠠᠭ ᠦᠭᠡᠢ ᠬᠥᠮᠦᠰ ᠲᠦ ᠰᠢᠳᠬᠡᠯ ᠥᠭᠭᠥᠨᠡ᠃ 9 ᠲᠡᠳᠡ ᠡᠵᠡᠨ ᠦ ᠣᠷᠣᠰᠢᠬᠤᠢ ᠪᠠ ᠲᠡᠭᠦᠨ ᠦ ᠬᠦᠴᠦᠲᠦ ᠠᠯᠳᠠᠷ ᠠᠴᠠ ᠰᠠᠯᠵᠤ᠂ ᠮᠥᠩᠬᠡ ᠰᠦᠢᠷᠡᠯ ᠦᠨ ᠶᠠᠯᠠ ᠳᠤ ᠣᠷᠣᠬᠤ 10 ᠲᠡᠷᠡ ᠡᠳᠦᠷ ᠡᠵᠡᠨ ᠢᠷᠡᠭᠡᠳ ᠠᠷᠢᠭᠤᠨ ᠬᠥᠮᠦᠰ ᠦᠨ ᠳᠤᠮᠳᠠ ᠠᠯᠳᠠᠷᠰᠢᠭᠤᠯᠤᠭᠳᠠᠬᠤ ᠪᠥᠭᠡᠳ ᠢᠲᠡᠭᠡᠭᠰᠡᠨ ᠠᠯᠢᠪᠠ ᠬᠥᠮᠦᠨ ᠦ ᠳᠤᠮᠳᠠ ᠭᠠᠢᠬᠠᠭᠳᠠᠨᠠ᠃ ᠲᠠ ᠨᠠᠷ ᠴᠤ ᠪᠢᠳᠡᠨ ᠦ ᠭᠡᠷᠡᠴᠢᠯᠡᠯ ᠢ ᠢᠲᠡᠭᠡᠭᠰᠡᠨ ᠤᠴᠢᠷ ᠠᠴᠠ ᠲᠡᠳᠡᠨ ᠦ ᠳᠤᠮᠳᠠ ᠪᠠᠢᠬᠤ ᠪᠣᠯᠣᠨᠠ᠃ 11 ᠪᠢᠳᠡ ᠲᠠ ᠨᠠᠷ ᠤᠨ ᠲᠥᠯᠥᠭᠡ ᠦᠷᠭᠦᠯᠵᠢ ᠳᠠᠭᠠᠳᠬᠠᠬᠤ ᠳᠠᠭᠠᠨ᠂ ᠪᠢᠳᠡᠨ ᠦ ᠪᠤᠷᠬᠠᠨ ᠲᠠ ᠨᠠᠷ ᠢ ᠳᠠᠭᠤᠳᠠᠯᠭᠠ ᠳᠠᠭᠠᠨ ᠲᠡᠩᠴᠡᠭᠦᠯᠬᠦ ᠪᠣᠯᠲᠤᠭᠠᠢ᠂ ᠬᠠᠮᠤᠭ ᠰᠠᠢᠨ ᠰᠠᠨᠠᠭᠠ ᠪᠠ ᠢᠲᠡᠭᠡᠯ ᠦᠨ ᠦᠢᠯᠡ ᠶᠢ ᠴᠢᠨᠢ ᠥᠪᠡᠷ ᠦᠨ ᠢᠶᠠᠨ ᠬᠦᠴᠦ ᠪᠡᠷ ᠪᠡᠶᠡᠯᠡᠭᠦᠯᠬᠦ ᠪᠣᠯᠲᠤᠭᠠᠢ ᠭᠡᠵᠦ᠂ 12 ᠡᠢᠨ ᠬᠦ ᠪᠢᠳᠡᠨ ᠦ ᠪᠤᠷᠬᠠᠨ ᠪᠠ ᠡᠵᠡᠨ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠤᠨ ᠢᠪᠡᠭᠡᠯ ᠢᠶᠡᠷ ᠪᠢᠳᠡᠨ ᠦ ᠡᠵᠡᠨ ᠢᠰᠦ᠋ᠰ ᠤᠨ ᠨᠡᠷᠡ ᠲᠠ ᠨᠠᠷ ᠤᠨ ᠳᠤᠮᠳᠠ ᠠᠯᠳᠠᠷᠰᠢᠵᠤ᠂ ᠲᠠ ᠨᠠᠷ ᠴᠤ ᠲᠡᠭᠦᠨ ᠦ ᠳᠣᠲᠣᠷᠠ ᠠᠯᠳᠠᠷᠰᠢᠭᠠᠰᠠᠢ ᠭᠡᠵᠦ ᠭᠤᠶᠤᠳᠠᠭ᠃