ᠶᠧᠷᠧᠮᠢᠶᠠ ᠶᠢᠨ ᠭᠠᠰᠢᠭᠤᠳᠠᠯ ᠨᠢᠭᠡ
ᠰᠦᠢᠷᠡᠭᠰᠡᠨ ᠶᠧᠷᠦ᠋ᠰᠠᠯᠧᠮ
1 ᠥ᠂ ᠦᠢ ᠣᠯᠠᠨ ᠬᠥᠮᠦᠨ ᠲᠡᠢ ᠪᠠᠢᠭᠰᠠᠨ ᠡᠨᠡ ᠬᠣᠲᠠ ᠭᠠᠭᠴᠠᠭᠠᠷᠳᠠᠨ ᠰᠠᠭᠤᠵᠠᠢ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠳᠤᠮᠳᠠ ᠠᠭᠤᠤ ᠪᠠᠢᠭᠰᠠᠨ ᠲᠡᠷᠡ ᠪᠡᠯᠪᠡᠰᠦᠨ ᠡᠮᠡ ᠮᠡᠲᠦ ᠪᠣᠯᠵᠠᠢ ᠭᠦᠷᠦᠨ ᠨᠦᠭᠦᠳ ᠦᠨ ᠳᠤᠮᠳᠠ ᠭᠦᠩᠵᠦ ᠪᠠᠢᠭᠰᠠᠨ ᠲᠡᠷᠡ ᠰᠢᠪᠡᠭᠴᠢᠨ ᠪᠣᠯᠵᠠᠢ︕
2 ᠬᠠᠴᠠᠷ ᠳᠡᠭᠡᠷᠡ ᠪᠡᠨ ᠨᠢᠯᠪᠤᠰᠤ ᠲᠠᠢ᠂ ᠰᠥᠨᠢᠵᠢᠨ ᠤᠬᠢᠯᠠᠨ ᠬᠠᠢᠯᠠᠭᠰᠠᠨ ᠴᠤ ᠬᠠᠢᠷᠠᠯᠠᠭᠰᠠᠨ ᠪᠦᠬᠦᠨ ᠦ ᠬᠢᠨᠢ ᠳᠤᠮᠳᠠ ᠠᠴᠠ ᠲᠠᠢᠳᠬᠤᠷᠠᠭᠤᠯᠬᠤ ᠨᠢᠭᠡᠨ ᠨᠢ ᠠᠯᠠᠭᠠ ᠬᠠᠮᠤᠭ ᠨᠠᠢᠵᠢ ᠨᠢ ᠤᠷᠪᠠᠵᠤ᠂ ᠳᠠᠢᠰᠤᠨ ᠪᠣᠯᠵᠠᠢ᠃
3 ᠶᠦᠳᠠ ᠵᠣᠪᠠᠯᠠᠩ ᠵᠦᠳᠡᠭᠦᠷᠢ ᠶᠢ ᠶᠡᠬᠡᠳᠡ ᠠᠮᠰᠠᠭᠠᠳ ᠴᠥᠯᠡᠭᠳᠡᠪᠡ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠳᠤᠮᠳᠠ ᠠᠮᠠᠷᠠᠯ ᠡᠰᠡ ᠣᠯᠣᠨ ᠰᠠᠭᠤᠵᠤ ᠪᠠᠢᠬᠤ ᠳᠤᠨᠢ ᠮᠥᠷᠳᠡᠭᠴᠢᠳ ᠨᠢ ᠪᠦᠭᠦᠳᠡᠭᠡᠷ ᠵᠣᠪᠠᠯᠠᠩ ᠳᠤᠮᠳᠠ ᠨᠢ ᠲᠡᠭᠦᠨ ᠢ ᠪᠠᠷᠢᠵᠠᠢ᠃
4 ᠽᠢᠶᠣᠨ ᠤ ᠵᠠᠮ ᠭᠠᠰᠢᠭᠤᠳᠠᠯ ᠲᠠᠢ ᠪᠠᠶᠠᠷ ᠤᠨ ᠦᠶᠡ ᠪᠡᠷ ᠴᠤ ᠢᠷᠡᠬᠦ ᠬᠥᠮᠦᠨ ᠠᠯᠠᠭᠠ ᠬᠣᠲᠠ ᠶᠢᠨ ᠬᠠᠭᠠᠯᠭᠠ ᠡᠵᠡᠭᠦᠢᠷᠡᠵᠦ ᠲᠠᠬᠢᠯᠴᠢᠳ ᠭᠠᠰᠠᠯᠵᠤ ᠪᠠᠢᠨᠠ ᠥᠬᠢᠳ ᠰᠢᠨᠠᠯᠵᠤ ᠪᠠᠢᠨᠠ ᠽᠢᠶᠣᠨ ᠭᠠᠰᠢᠭᠤᠨ ᠢᠶᠠᠷ ᠳᠦᠭᠦᠷᠡᠩ᠃
5 ᠥᠰᠲᠡᠨ ᠨᠦᠭᠦᠳ ᠨᠢ ᠲᠣᠯᠣᠭᠠᠢ ᠪᠣᠯᠵᠤ᠂ ᠳᠠᠢᠰᠤᠨ ᠨᠤᠭᠤᠳ ᠨᠢ ᠳᠡᠭᠵᠢᠷᠡᠪᠡ ᠲᠡᠭᠦᠨ ᠦ ᠨᠢᠭᠦᠯ ᠶᠡᠬᠡ ᠪᠣᠯᠬᠣᠷ ᠶᠣᠬᠣᠸᠠ ᠲᠡᠭᠦᠨ ᠢ ᠤᠢ ᠭᠠᠰᠢᠭᠤ ᠲᠠᠢ ᠪᠣᠯᠭᠠᠵᠠᠢ ᠲᠡᠭᠦᠨ ᠦ ᠬᠡᠦᠬᠡᠳ ᠤᠳ ᠴᠤ ᠳᠠᠢᠰᠤᠨ ᠳᠤ ᠪᠠᠷᠢᠭᠳᠠᠨ ᠴᠥᠯᠡᠭᠳᠡᠪᠡ᠃
6 ᠥᠬᠢᠨ ᠽᠢᠶᠣᠨ ᠠᠴᠠ ᠪᠦᠬᠦ ᠠᠯᠳᠠᠷ ᠰᠤᠤ ᠨᠢ ᠬᠣᠯᠠᠳᠠᠵᠠᠢ ᠤᠳᠤᠷᠢᠳᠤᠭᠴᠢᠳ ᠨᠢ ᠪᠡᠯᠴᠢᠭᠡᠷ ᠢᠶᠡᠨ ᠣᠯᠬᠤ ᠦᠭᠡᠢ ᠪᠤᠭᠤ ᠮᠡᠲᠦ ᠥᠪᠡᠷᠰᠡᠳ ᠢ ᠨᠢ ᠮᠥᠰᠬᠢᠭ᠍ᠴᠢ ᠶᠢᠨ ᠡᠮᠦᠨᠡ ᠵᠢᠭᠤᠲᠠᠬᠤ ᠬᠦᠴᠦ ᠦᠭᠡᠢ ᠪᠣᠯᠪᠠ᠃
7 ᠠᠮᠠᠷᠠᠯ ᠦᠭᠡᠢ ᠵᠣᠪᠠᠯᠠᠩ ᠤᠨ ᠡᠳᠦᠷ ᠤᠳ ᠲᠤ ᠶᠧᠷᠦ᠋ᠰᠠᠯᠧᠮ ᠡᠷᠲᠡᠨ ᠦ ᠡᠳᠦᠷ ᠤᠳ ᠤᠨ ᠬᠠᠮᠤᠭ ᠵᠢᠷᠭᠠᠯ ᠢ ᠰᠠᠨᠠᠪᠠ ᠠᠷᠠᠳ ᠲᠦᠮᠡᠨ ᠥᠰᠲᠡᠨ ᠦ ᠭᠠᠷ ᠲᠤ ᠣᠷᠣᠬᠤ ᠳᠤ ᠲᠤᠰᠠᠯᠠᠬᠤ ᠬᠥᠮᠦᠨ ᠦᠭᠡᠢ ᠪᠠᠢᠪᠠ ᠥᠰᠲᠡᠨ ᠨᠦᠭᠦᠳ ᠰᠦᠢᠷᠡᠯ ᠢ ᠨᠢ ᠬᠠᠷᠠᠭᠠᠳ ᠡᠯᠡᠭᠯᠡᠪᠡ᠃
8 ᠨᠢᠭᠦᠯ ᠦᠢᠯᠡᠳᠦᠨ ᠦᠢᠯᠡᠳᠦᠭᠰᠡᠭᠡᠷ ᠶᠧᠷᠦ᠋ᠰᠠᠯᠧᠮ ᠪᠤᠵᠠᠷ ᠪᠣᠯᠪᠠ ᠲᠡᠭᠦᠨ ᠢ ᠬᠦᠨᠳᠦᠳᠬᠡᠭᠴᠢ ᠪᠦᠭᠦᠳᠡ ᠨᠢ ᠨᠢᠴᠦᠭᠦᠨ ᠢ ᠨᠢ ᠬᠠᠷᠠᠭᠠᠳ ᠪᠠᠰᠤᠮᠵᠢᠯᠠᠪᠠ ᠲᠡᠷᠡ ᠥᠪᠡᠷ ᠢᠶᠡᠨ ᠴᠤ ᠵᠣᠪᠠᠵᠤ᠂ ᠬᠣᠢᠰᠢ ᠪᠠᠨ ᠡᠷᠭᠢᠪᠡ᠃
9 ᠪᠤᠵᠠᠷ ᠨᠢ ᠬᠣᠷᠮᠣᠢ ᠳᠤᠨᠢ ᠨᠠᠭᠠᠯᠳᠤᠵᠤ ᠪᠠᠢᠬᠤ ᠳᠤ ᠬᠣᠵᠢᠮ ᠢᠶᠠᠨ ᠲᠡᠷᠡ ᠪᠣᠳᠣᠭᠰᠠᠨ ᠦᠭᠡᠢ ᠠᠶᠤᠮᠰᠢᠭᠲᠠᠢ ᠪᠠᠷ ᠤᠷᠤᠭᠤᠳᠠᠵᠤ ᠪᠠᠢᠭᠰᠠᠨ ᠴᠤ ᠲᠠᠢᠳᠬᠤᠷᠠᠭᠤᠯᠤᠭᠴᠢ ᠠᠯᠠᠭᠠ ᠪᠠᠢᠯᠠ ᠳᠠᠢᠰᠤᠨ ᠲᠣᠮᠣᠷᠠᠭᠰᠠᠨ᠂ ᠵᠣᠪᠠᠯᠠᠩ ᠢ ᠮᠢᠨᠢ ᠬᠠᠷᠠᠭᠠᠴᠢ᠂ ᠶᠣᠬᠣᠸᠠ︕
10 ᠦᠨᠡ ᠲᠠᠢ ᠪᠦᠬᠦᠨ ᠤᠷᠤᠭᠤ ᠨᠢ ᠥᠰᠲᠡᠨ ᠭᠠᠷ ᠢᠶᠠᠨ ᠰᠠᠷᠪᠠᠢᠪᠠ ᠥᠪᠡᠷ ᠦᠨ ᠲᠠᠨᠢ ᠴᠢᠭᠤᠯᠭᠠᠨ ᠳᠤ ᠬᠠᠷᠢᠴᠤᠳ ᠣᠷᠣᠬᠤ ᠶᠢ ᠲᠠ ᠬᠣᠷᠢᠭᠯᠠᠭᠰᠠᠨ ᠠᠲᠠᠯᠠ ᠠᠷᠢᠭᠤᠨ ᠭᠠᠵᠠᠷ ᠲᠤ ᠲᠡᠳᠡ ᠣᠷᠣᠯᠠ ᠲᠡᠷᠡ ᠡᠭᠦᠨ ᠢ ᠬᠠᠷᠠᠯᠠ᠃
11 ᠠᠷᠠᠳ ᠲᠦᠮᠡᠨ ᠪᠦᠭᠦᠳᠡ ᠬᠦᠨᠡᠰᠦ ᠬᠠᠢᠨ ᠶᠣᠣᠯᠠᠨᠠ ᠠᠮᠢ ᠵᠢᠭᠤᠬᠤ ᠪᠠᠷ ᠲᠡᠳᠡ ᠦᠨᠡᠲᠦ ᠵᠦᠢᠯᠡᠰ ᠢᠶᠡᠷ ᠢᠶᠠᠨ ᠢᠳᠡᠭᠡᠨ ᠠᠪᠤᠨᠠ 《ᠬᠠᠷᠠᠭᠠᠴᠢ᠂ ᠶᠣᠬᠣᠸᠠ᠂ ᠥᠴᠦᠬᠡᠨ ᠪᠣᠯᠣᠭᠰᠠᠨ ᠢ ᠮᠢᠨᠢ ᠠᠩ᠋ᠬᠠᠷᠤᠭᠠᠴᠢ᠃
12 ᠵᠠᠮ ᠬᠥᠭᠡᠭᠡᠭᠴᠢᠳ ᠡ᠂ ᠡᠳᠡᠭᠡᠷ ᠵᠦᠢᠯ ᠲᠠ ᠪᠦᠬᠦᠨ ᠳᠦ ᠬᠠᠮᠢᠶᠠ ᠦᠭᠡᠢ ᠤᠤ︖ ᠬᠠᠷᠠᠵᠤ ᠦᠵᠡ᠂ ᠳᠣᠭᠰᠢᠨ ᠬᠢᠯᠢᠩ ᠤᠨ ᠢᠶᠠᠨ ᠡᠳᠦᠷ ᠶᠣᠬᠣᠸᠠ ᠶᠢᠨ ᠨᠠᠳᠠ ᠳᠤ ᠠᠪᠴᠢᠷᠠᠵᠤ ᠠᠮᠰᠠᠭᠤᠯᠤᠭᠰᠠᠨ ᠡᠨᠡ ᠵᠣᠪᠠᠯᠠᠩ ᠲᠠᠢ ᠠᠳᠠᠯᠢ ᠵᠣᠪᠠᠯᠠᠩ ᠪᠠᠢᠨᠠ ᠤᠤ︖
13 ᠲᠡᠷᠡ ᠥᠨᠳᠥᠷ ᠡᠴᠡ ᠭᠠᠯ ᠪᠠᠭᠤᠯᠭᠠᠨ ᠶᠠᠰᠤᠨ ᠳᠤ ᠮᠢᠨᠢ ᠣᠷᠣᠭᠤᠯᠪᠠ ᠬᠥᠯ ᠦᠨ ᠮᠢᠨᠢ ᠡᠮᠦᠨᠡ ᠲᠣᠣᠷ ᠲᠠᠯᠪᠢᠨ ᠨᠠᠮᠠᠶᠢ ᠪᠤᠴᠠᠭᠠᠪᠠ ᠡᠳᠦᠷᠵᠢᠨ ᠨᠠᠮᠠᠶᠢ ᠭᠠᠭᠴᠠᠭᠠᠷᠳᠠᠮᠠᠯ᠂ ᠳᠣᠷᠣᠢ ᠪᠠᠢᠯᠭᠠᠪᠠ᠃
14 ᠲᠡᠷᠡ ᠪᠡᠷ ᠨᠢᠭᠦᠯ ᠤᠳ ᠢ ᠮᠢᠨᠢ ᠮᠤᠲᠤᠷ ᠢᠶᠠᠷ ᠢᠶᠠᠨ ᠤᠶᠠᠵᠤ ᠰᠦᠯᠵᠢᠨ ᠪᠤᠭᠤᠯᠠᠭᠠ ᠪᠣᠯᠭᠠᠵᠤ ᠬᠦᠵᠦᠭᠦᠨ ᠳᠡᠭᠡᠷᠡ ᠮᠢᠨᠢ ᠳᠤᠬᠤᠨ ᠬᠦᠴᠦ ᠶᠢ ᠮᠢᠨᠢ ᠮᠣᠬᠣᠭᠠᠪᠠ᠃ ᠲᠡᠢᠨ ᠬᠦ ᠡᠵᠡᠨ ᠮᠢᠨᠦ ᠳᠡᠢᠯᠵᠦ ᠦᠯᠦ ᠴᠢᠳᠠᠬᠤ ᠬᠥᠮᠦᠰ ᠦᠨ ᠭᠠᠷ ᠲᠤ ᠨᠠᠮᠠᠶᠢ ᠲᠤᠰᠢᠶᠠᠵᠠᠢ᠃
15 ᠡᠵᠡᠨ ᠮᠢᠨᠦ ᠳᠣᠲᠣᠷᠠᠬᠢ ᠬᠠᠮᠤᠭ ᠪᠠᠭᠠᠲᠤᠷ ᠢ ᠮᠢᠨᠢ ᠲᠠᠯᠬᠢᠯᠠᠵᠤ ᠮᠢᠨᠦ ᠡᠰᠡᠷᠭᠦ ᠴᠡᠷᠢᠭ ᠳᠠᠭᠤᠳᠠᠨ ᠬᠠᠮᠤᠭ ᠵᠠᠯᠠᠭᠤᠰ ᠢ ᠮᠢᠨᠢ ᠪᠢᠴᠠᠯᠵᠤ ᠣᠩ᠋ᠭᠣᠨ ᠪᠦᠰᠡᠭᠦᠢ ᠶᠦᠳᠠ ᠶᠢ ᠦᠵᠦᠮ ᠦᠨ ᠰᠢᠬᠠᠭᠤᠷᠭᠠ ᠳᠣᠣᠷᠠ ᠳᠡᠪᠰᠡᠯᠡᠪᠡ᠃
16 ᠡᠢᠮᠦ ᠡᠴᠡ ᠪᠢ ᠤᠬᠢᠯᠠᠭᠰᠠᠭᠠᠷ᠂ ᠨᠢᠳᠦ ᠮᠢᠨᠢ ᠨᠢᠯᠪᠤᠰᠤ ᠪᠥᠮᠪᠥᠷᠢᠭᠦᠯᠦᠭᠰᠡᠭᠡᠷ᠂ ᠥᠪᠡᠷ ᠢ ᠮᠢᠨᠢ ᠲᠠᠢᠳᠬᠤᠷᠠᠭᠤᠯᠤᠭᠴᠢ᠂ ᠠᠮᠢ ᠶᠢ ᠮᠢᠨᠢ ᠰᠡᠷᠭᠦᠭᠡᠭᠴᠢ ᠨᠢ ᠨᠠᠳᠠ ᠠᠴᠠ ᠬᠣᠯᠠ ᠳᠠᠢᠰᠤᠨ ᠨᠤᠭᠤᠳ ᠳᠡᠢᠯᠦᠭᠰᠡᠨ᠂ ᠮᠢᠨᠦ ᠬᠡᠦᠬᠡᠳ ᠤᠳ ᠪᠠᠯᠠᠮᠠᠭᠳᠠᠭᠰᠠᠨ᠃》
17 ᠽᠢᠶᠣᠨ ᠭᠠᠷ ᠢᠶᠠᠨ ᠰᠤᠩ᠋ᠭᠠᠨᠠ ᠬᠠᠷᠢᠨ ᠬᠡᠨ ᠴᠤ ᠲᠠᠢᠳᠬᠤᠷᠠᠭᠤᠯᠬᠤ ᠦᠭᠡᠢ ᠶᠣᠬᠣᠸᠠ ᠶᠠᠺᠣᠪ ᠤᠨ ᠲᠤᠬᠠᠢ ᠲᠤᠰᠢᠶᠠᠬᠤ ᠳᠤ᠂ ᠡᠷᠭᠢᠨ ᠲᠣᠭᠣᠷᠢᠨ ᠤ ᠬᠢᠨ ᠨᠢ ᠲᠡᠭᠦᠨ ᠦ ᠥᠰᠲᠡᠨ ᠪᠣᠯᠪᠠ᠂ ᠶᠧᠷᠦ᠋ᠰᠠᠯᠧᠮ ᠲᠡᠳᠡᠨ ᠦ ᠳᠤᠮᠳᠠᠬᠢ ᠪᠤᠵᠠᠷ ᠵᠦᠢᠯ ᠪᠣᠯᠵᠠᠢ᠃
18 《ᠶᠣᠬᠣᠸᠠ ᠵᠥᠪ ᠰᠢᠳᠤᠷᠭᠤ ᠪᠠᠢᠬᠤ ᠳᠤ ᠪᠢ ᠲᠡᠭᠦᠨ ᠦ ᠲᠤᠰᠢᠶᠠᠯ ᠢ ᠵᠥᠷᠢᠴᠡᠪᠡ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠡ᠂ ᠲᠠ ᠪᠦᠭᠦᠳᠡ ᠰᠣᠨᠣᠰ᠂ ᠵᠣᠪᠠᠯᠠᠩ ᠢ ᠮᠢᠨᠢ ᠬᠠᠷᠠ ᠮᠠᠨ ᠤ ᠥᠬᠢᠳ ᠪᠣᠯᠣᠨ ᠵᠠᠯᠠᠭᠤᠰ ᠣᠯᠵᠠᠯᠠᠭᠳᠠᠨ ᠣᠳᠪᠠ᠃
19 ᠪᠢ ᠬᠠᠢᠷᠠᠲᠤ ᠨᠤᠭᠤᠳ ᠢᠶᠠᠨ ᠳᠠᠭᠤᠳᠠᠭᠰᠠᠨ ᠴᠤ ᠲᠡᠳᠡ ᠨᠠᠮᠠᠶᠢ ᠮᠡᠬᠡᠯᠡᠪᠡ ᠮᠠᠨ ᠤ ᠲᠠᠬᠢᠯᠴᠢᠳ ᠪᠠ ᠠᠬᠠᠯᠠᠭᠴᠢᠳ ᠠᠮᠢ ᠵᠢᠭᠤᠬᠤ ᠪᠠᠷ ᠬᠦᠨᠡᠰᠦ ᠬᠠᠢᠭᠰᠠᠭᠠᠷ ᠬᠣᠲᠠ ᠳᠣᠲᠣᠷᠠ ᠡ᠊ᠨᠳᠡᠪᠡ᠃
20 ᠵᠣᠪᠠᠯᠠᠩ ᠢ ᠮᠢᠨᠢ ᠬᠠᠷᠠᠭᠠᠴᠢ᠂ ᠶᠣᠬᠣᠸᠠ︕ ᠵᠢᠷᠦᠬᠡ ᠮᠢᠨᠢ ᠰᠢᠮᠰᠢᠷᠡᠵᠦ᠂ ᠰᠡᠳᠬᠢᠯ ᠮᠢᠨᠢ ᠰᠢᠨᠠᠯᠵᠤ ᠪᠠᠢᠨᠠ ᠦᠨᠡᠬᠡᠷ ᠪᠢ ᠮᠠᠰᠢ ᠲᠡᠷᠰᠯᠡᠭᠦᠦ ᠪᠠᠢᠵᠠᠢ᠃ ᠭᠠᠳᠠᠨᠠ ᠨᠢ ᠢᠯᠳᠦᠨ ᠦ ᠬᠢᠳᠤᠯᠭᠠ ᠭᠡᠷ ᠳᠣᠲᠣᠷᠠ ᠨᠢ ᠦᠬᠦᠯ ᠪᠤᠢ᠃
21 ᠭᠠᠰᠠᠯᠬᠤ ᠶᠢ ᠮᠢᠨᠢ ᠬᠥᠮᠦᠰ ᠰᠣᠨᠣᠰᠪᠠ ᠭᠡᠪᠡᠴᠦ ᠲᠠᠢᠳᠬᠤᠷᠠᠭᠤᠯᠤᠭᠴᠢ ᠠᠯᠠᠭᠠ ᠭᠠᠮᠰᠢᠭ ᠤᠨ ᠮᠢᠨᠢ ᠲᠤᠬᠠᠢ ᠳᠠᠢᠰᠤᠨ ᠨᠤᠭᠤᠳ ᠮᠢᠨᠢ ᠰᠣᠨᠣᠰᠪᠠ ᠲᠡᠭᠦᠨ ᠢ ᠲᠠ ᠦᠢᠯᠡᠳᠦᠭᠰᠡᠨ ᠳᠦ ᠲᠡᠳᠡ ᠪᠦᠭᠦᠳᠡ ᠪᠠᠶᠠᠷᠯᠠᠳᠠᠭ ᠬᠠᠷᠢᠨ ᠲᠠ ᠲᠣᠪᠯᠠᠭᠰᠠᠨ ᠡᠳᠦᠷ ᠢᠶᠡᠨ ᠢᠷᠡᠭᠦᠯᠦᠭᠡᠴᠢ ᠲᠡᠳᠡ ᠨᠠᠳᠠ ᠲᠠᠢ ᠠᠳᠠᠯᠢ ᠪᠣᠯᠣᠭ᠃
22 ᠲᠡᠳᠡᠨ ᠦ ᠬᠣᠷᠣᠨ ᠮᠠᠭᠤ ᠶᠠᠪᠤᠳᠠᠯ ᠪᠦᠭᠦᠳᠡ ᠲᠠᠨ ᠤ ᠡᠮᠦᠨᠡ ᠢᠯᠡ ᠪᠣᠯᠣᠭ ᠮᠢᠨᠦ ᠪᠦᠬᠦ ᠨᠢᠭᠦᠯ ᠦᠨ ᠮᠢᠨᠢ ᠤᠯᠠᠮ ᠠᠴᠠ ᠨᠠᠳᠠ ᠳᠤ ᠦᠢᠯᠡᠳᠦᠭᠰᠡᠨ ᠰᠢᠭ ᠢᠶᠠᠨ ᠲᠡᠳᠡᠨ ᠳᠦ ᠦᠢᠯᠡᠳᠦᠭᠡᠴᠢ ᠪᠢ ᠶᠡᠬᠡ ᠰᠢᠨᠠᠯᠵᠤ ᠪᠠᠢᠨᠠ᠂ ᠵᠢᠷᠦᠬᠡ ᠮᠢᠨᠢ ᠰᠢᠨᠲᠠᠷᠠᠵᠤ ᠪᠠᠢᠨᠠ᠃》