ᠰᠢᠭᠦᠭᠴᠢᠳ ᠨᠢᠭᠡ
ᠺᠠᠨᠠᠨᠴᠤᠳ ᠤᠨ ᠦᠯᠡᠳᠡᠭᠳᠡᠯ ᠲᠡᠢ ᠳᠠᠢᠲᠤᠪᠠ
1 ᠶᠣᠱᠦ᠋ᠶᠠ ᠨᠠᠰᠤ ᠪᠠᠷᠠᠭᠰᠠᠨ ᠤ ᠳᠠᠷᠠᠭᠠ᠂ ᠢᠰᠷᠧᠯᠴᠦᠳ ᠶᠣᠬᠣᠸᠠ ᠠᠴᠠ ᠠᠰᠠᠭᠤᠨ᠄ 《ᠺᠠᠨᠠᠨᠴᠤᠳ ᠲᠠᠢ ᠲᠤᠯᠤᠯᠳᠤᠬᠤ ᠳᠤ ᠬᠡᠨ ᠪᠢᠳᠡᠨ ᠦ ᠲᠡᠷᠢᠭᠦᠨ ᠳᠦ ᠶᠠᠪᠤᠬᠤ ᠪᠤᠢ︖》 ᠭᠡᠬᠦ ᠳᠦ᠂ 2 ᠶᠣᠬᠣᠸᠠ᠄ 《ᠶᠦᠳᠠ ᠶᠠᠪᠤᠬᠤ ᠪᠣᠯᠣᠨᠠ᠃ ᠬᠠᠷᠠ᠂ ᠪᠢ ᠡᠨᠡ ᠭᠠᠵᠠᠷ ᠢ ᠲᠡᠭᠦᠨ ᠦ ᠭᠠᠷ ᠲᠤ ᠲᠤᠰᠢᠶᠠᠭᠰᠠᠨ︕》 ᠭᠡᠯᠡ᠃ 3 ᠶᠦᠳᠠᠴᠤᠳ ᠠᠬᠠ ᠳᠡᠭᠦᠦ ᠰᠢᠮᠧᠶᠣᠨᠴᠤᠳ ᠲᠠᠭᠠᠨ᠄ 《ᠮᠠᠨ ᠤ ᠬᠢᠨ ᠳᠤ ᠣᠨᠣᠭᠳᠠᠭᠰᠠᠨ ᠨᠤᠲᠤᠭ ᠤᠷᠤᠭᠤ ᠪᠢᠳᠡ ᠬᠠᠮᠲᠤ ᠳᠠᠭᠠᠨ ᠣᠴᠢᠵᠤ ᠺᠠᠨᠠᠨᠴᠤᠳ ᠲᠠᠢ ᠲᠤᠯᠤᠯᠳᠤᠶᠠ᠃ ᠲᠡᠭᠡᠪᠡᠯ ᠲᠠᠨ ᠤ ᠬᠢᠨ ᠳᠤ ᠣᠨᠣᠭᠳᠠᠭᠰᠠᠨ ᠭᠠᠵᠠᠷ ᠤᠷᠤᠭᠤ ᠮᠠᠨ ᠤ ᠬᠢᠨ ᠴᠤ ᠶᠠᠪᠤᠬᠤ ᠪᠣᠯᠣᠨᠠ》 ᠭᠡᠬᠦ ᠳᠦ᠂ ᠰᠢᠮᠧᠶᠣᠨᠴᠤᠳ ᠲᠡᠳᠡᠨ ᠲᠡᠢ ᠬᠠᠮᠲᠤ ᠶᠠᠪᠤᠯᠠ᠃ 4 ᠶᠦᠳᠠᠴᠤᠳ ᠶᠠᠪᠤᠭᠰᠠᠨ ᠪᠥᠭᠡᠳ ᠶᠣᠬᠣᠸᠠ ᠺᠠᠨᠠᠨᠴᠤᠳ ᠪᠣᠯᠣᠨ ᠫᠧᠷᠢᠽᠴᠦᠳ ᠢ ᠲᠡᠳᠡᠨ ᠦ ᠭᠠᠷ ᠲᠤ ᠲᠤᠰᠢᠶᠠᠭᠰᠠᠨ ᠳᠤ᠂ ᠲᠡᠳᠡ ᠪᠧᠽᠧᠺ ᠲᠤ ᠲᠦᠮᠡᠨ ᠬᠥᠮᠦᠨ ᠢ ᠪᠤᠲᠠ ᠴᠣᠬᠢᠵᠠᠢ᠃ 5 ᠲᠡᠳᠡ ᠪᠧᠽᠧᠺ ᠲᠤ ᠠᠳᠣᠨᠢ ᠪᠧᠽᠧᠺ ᠲᠠᠢ ᠬᠠᠯᠵᠠ ᠲᠤᠯᠭᠠᠷᠠᠨ ᠲᠡᠭᠦᠨ ᠲᠡᠢ ᠪᠠᠢᠯᠳᠤᠵᠤ᠂ ᠺᠠᠨᠠᠨᠴᠤᠳ ᠪᠣᠯᠣᠨ ᠫᠧᠷᠢᠽᠴᠦᠳ ᠢ ᠴᠣᠬᠢᠪᠠ᠃ 6 ᠠᠳᠣᠨᠢ ᠪᠧᠽᠧᠺ ᠵᠢᠭᠤᠲᠠᠭᠰᠠᠨ ᠪᠣᠯᠪᠠᠴᠤ ᠲᠡᠳᠡ ᠠᠷᠤ ᠠᠴᠠ ᠨᠢ ᠨᠡᠬᠡᠵᠦ ᠪᠠᠷᠢᠭᠠᠳ᠂ ᠭᠠᠷ ᠬᠥᠯ ᠦᠨ ᠬᠢᠨᠢ ᠡᠷᠡᠬᠡᠢ ᠬᠤᠷᠤᠭᠤ ᠨᠤᠭᠤᠳ ᠢ ᠲᠠᠰᠤᠯᠤᠭᠰᠠᠨ ᠳᠤ᠂ 7 ᠠᠳᠣᠨᠢ ᠪᠧᠽᠧᠺ᠄ 《ᠳᠠᠯᠠᠨ ᠬᠠᠭᠠᠨ ᠤ ᠭᠠᠷ ᠬᠥᠯ ᠦᠨ ᠬᠢᠨᠢ ᠡᠷᠡᠬᠡᠢ ᠬᠤᠷᠤᠭᠤ ᠶᠢ ᠲᠠᠰᠤᠳᠠᠭᠤᠯᠵᠤ᠂ ᠬᠣᠭᠣᠯᠠᠨ ᠰᠢᠷᠡᠭᠡᠨ ᠦ ᠪᠠᠨ ᠳᠣᠣᠷᠠ ᠠᠴᠠ ᠰᠢᠪᠬᠠᠷᠤᠤ ᠲᠡᠭᠦᠯᠭᠡᠳᠡᠭ ᠪᠠᠢᠭᠰᠠᠨ ᠤ ᠮᠢᠨᠢ ᠶᠣᠰᠣᠭᠠᠷ ᠪᠤᠷᠬᠠᠨ ᠨᠠᠳᠠ ᠳᠤ ᠬᠠᠷᠢᠭᠤ ᠥᠭᠭᠥᠯᠡ》 ᠭᠡᠪᠡ᠃ ᠲᠡᠭᠦᠨ ᠢ ᠶᠧᠷᠦ᠋ᠰᠠᠯᠧᠮ ᠳᠤ ᠠᠪᠴᠢᠷᠠᠭᠰᠠᠨ ᠳᠤ᠂ ᠲᠡᠷᠡ ᠲᠡᠨᠳᠡ ᠦᠬᠦᠭᠰᠡᠨ ᠪᠠᠢᠨᠠ᠃
8 ᠶᠦᠳᠠᠴᠤᠳ ᠶᠧᠷᠦ᠋ᠰᠠᠯᠧᠮ ᠢ ᠴᠤ ᠳᠠᠭᠠᠷᠢᠵᠤ᠂ ᠡᠵᠡᠯᠡᠨ ᠠᠪᠤᠭᠠᠳ ᠢᠯᠳᠦᠨ ᠦ ᠢᠷ ᠢᠶᠠᠷ ᠴᠣᠬᠢᠵᠤ ᠬᠣᠲᠠ ᠶᠢ ᠭᠠᠯᠳᠠᠨ ᠰᠢᠲᠠᠭᠠᠪᠠ᠃ 9 ᠳᠠᠷᠠᠭᠠ ᠨᠢ ᠶᠦᠳᠠᠴᠤᠳ ᠠᠭᠤᠯᠠᠷᠬᠠᠭ ᠨᠤᠲᠤᠭ ᠪᠣᠯᠣᠨ ᠡᠮᠦᠨᠡ ᠪᠦᠰᠡ ᠨᠤᠲᠤᠭ᠂ ᠪᠠᠰᠠ ᠥᠷᠥᠨᠡ ᠶᠢᠨ ᠳᠣᠪᠣ ᠲᠣᠯᠣᠭᠠᠳ ᠵᠦᠭ ᠶᠠᠪᠤᠵᠤ ᠲᠡᠨᠳᠡ ᠰᠠᠭᠤᠵᠤ ᠪᠠᠢᠭᠰᠠᠨ ᠺᠠᠨᠠᠨᠴᠤᠳ ᠲᠠᠢ ᠳᠠᠢᠲᠤᠵᠠᠢ᠃ 10 ᠲᠡᠢᠨ ᠬᠦ ᠶᠦᠳᠠᠴᠤᠳ ᠾᠧᠪᠷᠣᠨ ᠤ ᠰᠠᠭᠤᠭᠠᠯᠢᠴᠢᠳ ᠺᠠᠨᠠᠨᠴᠤᠳ ᠤᠷᠤᠭᠤ ᠳᠣᠪᠲᠣᠯᠵᠤ᠂ ᠲᠡᠨᠳᠡ ᠱᠧᠱᠠᠢ᠂ ᠠᠾᠢᠮᠠᠨ ᠪᠣᠯᠣᠨ ᠲᠠᠯᠮᠠᠢ ᠨᠠᠷ ᠢ ᠴᠣᠬᠢᠪᠠ᠃ ᠤᠷᠢᠳᠤ ᠨᠢ ᠾᠧᠪᠷᠣᠨ ᠢ ᠠᠷᠪᠠ ᠬᠣᠲᠠ ᠭᠡᠳᠡᠭ ᠪᠠᠢᠵᠠᠢ᠃
11 ᠲᠡᠭᠡᠭᠡᠳ ᠶᠦᠳᠠᠴᠤᠳ ᠲᠡᠨᠳᠡ ᠡᠴᠡ ᠳ᠋ᠧᠪᠢᠷ ᠤᠨ ᠰᠠᠭᠤᠭᠠᠯᠢᠴᠢᠳ ᠤᠷᠤᠭᠤ ᠳᠣᠪᠲᠣᠯᠪᠠ᠃ ᠤᠷᠢᠳᠤ ᠨᠢ ᠳ᠋ᠧᠪᠢᠷ ᠢ ᠰᠧᠹᠧᠷ ᠬᠣᠲᠠ 1 ᠭᠡᠳᠡᠭ ᠪᠠᠢᠵᠠᠢ᠃ 12 ᠲᠡᠷᠡ ᠦᠶᠡ ᠳᠦ ᠺᠠᠯᠧᠪ᠄ 《ᠰᠧᠹᠧᠷ ᠬᠣᠲᠠ ᠶᠢ ᠳᠠᠭᠠᠷᠢᠨ ᠡᠵᠡᠯᠡᠭᠰᠡᠨ ᠬᠥᠮᠦᠨ ᠳᠦ ᠪᠢ ᠥᠬᠢᠨ ᠠᠺᠰᠠ ᠪᠠᠨ ᠡᠬᠡᠨᠡᠷ ᠪᠣᠯᠭᠠᠨ ᠥᠭᠭᠥᠶᠡ》 ᠭᠡᠵᠦ ᠬᠡᠯᠡᠭᠰᠡᠨ ᠪᠠᠢᠯᠠ᠃ 13 ᠳᠡᠭᠦᠦ ᠺᠧᠨᠠᠽ ᠤᠨ ᠬᠢᠨᠢ ᠬᠦᠦ ᠣᠲ᠋ᠠᠨᠢᠶᠧᠯ ᠲᠡᠷᠡ ᠬᠣᠲᠠ ᠶᠢ ᠡᠵᠡᠯᠡᠭᠰᠡᠨ ᠲᠤᠯᠠ ᠺᠠᠯᠧᠹ ᠲᠡᠭᠦᠨ ᠳᠦ ᠥᠬᠢᠨ ᠠᠺᠰᠠ ᠪᠠᠨ ᠡᠬᠡᠨᠡᠷ ᠪᠣᠯᠭᠠᠨ ᠥᠭᠴᠡᠢ᠃ 14 ᠨᠢᠭᠡᠨ ᠡᠳᠦᠷ ᠠᠺᠰᠠ ᠢᠷᠡᠵᠦ᠂ ᠡᠴᠢᠭᠡ ᠪᠡᠨ ᠢᠳᠬᠠᠨ ᠲᠠᠯᠠ ᠭᠠᠵᠠᠷ ᠢ ᠭᠤᠶᠤᠭᠰᠠᠨ ᠪᠠᠢᠵᠠᠢ᠃ ᠡᠯᠵᠢᠭᠡᠨ ᠡᠴᠡ ᠪᠡᠨ ᠪᠠᠭᠤᠬᠤ ᠳᠤᠨᠢ ᠺᠠᠯᠧᠪ᠄ 《ᠴᠢᠮᠠ ᠳᠤ ᠶᠠᠭᠤ ᠬᠡᠷᠡᠭ ᠲᠡᠢ ᠪᠤᠢ︖》 ᠭᠡᠵᠦ ᠠᠰᠠᠭᠤᠪᠠ᠃ 15 ᠠᠺᠰᠠ᠄ 《ᠨᠠᠳᠠ ᠳᠤ ᠪᠡᠯᠡᠭ ᠬᠠᠢᠷᠠᠯᠠᠨᠠ ᠤᠤ︖ ᠲᠠ ᠨᠠᠳᠠ ᠳᠤ ᠡᠮᠦᠨᠡ ᠬᠡᠰᠡᠭ ᠦᠨ ᠬᠠᠭᠤᠷᠠᠢ ᠭᠠᠵᠠᠷ ᠢ ᠥᠭᠭᠥᠭᠰᠡᠨ᠂ ᠤᠰᠤ ᠶᠡᠬᠡ ᠲᠠᠢ ᠪᠤᠯᠠᠭ ᠤᠳ ᠢ ᠴᠤ ᠥᠭᠭᠥᠭᠡᠴᠢ》 ᠭᠡᠰᠡᠨ ᠳᠦ᠂ ᠺᠠᠯᠧᠪ ᠲᠡᠭᠦᠨ ᠳᠦ ᠳᠡᠭᠡᠷᠡ ᠳᠣᠣᠷᠠ ᠪᠤᠯᠠᠭ ᠤᠳ ᠢ ᠥᠭᠪᠡ᠃
16 ᠮᠣᠰᠧ ᠶᠢᠨ ᠬᠠᠳᠠᠮ ᠡᠴᠢᠭᠡ ᠪᠣᠯ ᠺᠧᠨ ᠬᠥᠮᠦᠨ ᠪᠠᠢᠪᠠ᠃ ᠲᠡᠭᠦᠨ ᠦ ᠦᠷᠡ ᠤᠳᠤᠮ ᠶᠦᠳᠠᠴᠤᠳ ᠲᠠᠢ ᠬᠠᠮᠲᠤ ᠳᠠᠯᠳᠠᠤ ᠬᠣᠲᠠ ᠠᠴᠠ ᠶᠦᠳᠠ ᠶᠢᠨ ᠴᠥᠯ ᠤᠷᠤᠭᠤ ᠭᠠᠷᠤᠨ᠂ ᠡᠮᠦᠨᠡ ᠪᠦᠰᠡ ᠶᠢᠨ ᠠᠷᠠᠳ᠋ ᠤᠨ ᠣᠢᠷᠠ ᠬᠦᠷᠴᠦ ᠲᠡᠨᠳᠡᠬᠢ ᠶᠢᠨ ᠬᠥᠮᠦᠰ ᠲᠡᠢ ᠬᠠᠮᠲᠤ ᠠᠮᠢᠳᠤᠷᠠᠨ ᠰᠠᠭᠤᠵᠠᠢ᠃ 17 ᠶᠦᠳᠠᠴᠤᠳ ᠠᠬᠠ ᠳᠡᠭᠦᠦ ᠰᠢᠮᠧᠶᠣᠨᠴᠤᠳ ᠲᠠᠢ ᠪᠠᠨ ᠬᠠᠮᠲᠤ ᠽᠧᠹᠠᠲ ᠤᠷᠤᠭᠤ ᠳᠣᠪᠲᠣᠯᠵᠤ᠂ ᠲᠡᠨᠳᠡᠬᠢ ᠶᠢᠨ ᠰᠠᠭᠤᠭᠠᠯᠢ ᠺᠠᠨᠠᠨᠴᠤᠳ ᠢ ᠴᠣᠬᠢᠭᠠᠳ ᠬᠦᠢᠰᠦ ᠲᠡᠮᠲᠡᠷᠢᠨ ᠲᠡᠷᠡ ᠬᠣᠲᠠ ᠶᠢ ᠬᠣᠷᠮᠠ 2 ᠭᠡᠵᠦ ᠨᠡᠷᠡᠯᠡᠪᠡ᠃ 18 ᠲᠡᠳᠡ ᠭᠠᠽᠠ᠂ ᠠᠱᠺᠧᠯᠣᠨ᠂ ᠡᠺᠷᠣᠨ ᠢ ᠡᠷᠭᠢᠨ ᠲᠣᠭᠣᠷᠢᠨ ᠤ ᠨᠤᠲᠤᠭ ᠲᠠᠢ ᠨᠢ ᠬᠠᠮᠲᠤ ᠡᠵᠡᠯᠡᠨ ᠠᠪᠤᠯᠠ 3 ᠃ 19 ᠶᠣᠬᠣᠸᠠ ᠶᠦᠳᠠ ᠲᠠᠢ ᠬᠠᠮᠲᠤ ᠪᠠᠢᠵᠤ᠂ ᠲᠡᠳᠡ ᠠᠭᠤᠯᠠᠷᠬᠠᠭ ᠨᠤᠲᠤᠭ ᠢ ᠡᠵᠡᠮᠰᠢᠪᠡ᠃ ᠬᠠᠷᠢᠨ ᠲᠠᠯᠠ ᠬᠥᠨᠳᠡᠢ ᠶᠢᠨ ᠰᠠᠭᠤᠭᠠᠯᠢᠴᠢᠳ ᠨᠢ ᠲᠡᠮᠦᠷ ᠲᠡᠷᠭᠡ ᠲᠠᠢ ᠪᠣᠯᠬᠣᠷ ᠶᠦᠳᠠ ᠲᠡᠳᠡᠨ ᠢ ᠬᠥᠭᠡᠭᠡᠨ ᠵᠠᠢᠯᠠᠭᠤᠯᠵᠤ ᠴᠢᠳᠠᠭᠠ ᠦᠭᠡᠢ᠃ 20 ᠮᠣᠰᠧ ᠶᠢᠨ ᠠᠮᠠᠯᠠᠭᠰᠠᠨ ᠶᠣᠰᠣᠭᠠᠷ ᠶᠦᠳᠠᠴᠤᠳ ᠾᠧᠪᠷᠣᠨ ᠢ ᠺᠠᠯᠧᠪ ᠲᠤ ᠥᠭᠭᠥᠭᠰᠡᠨ ᠳᠦ᠂ ᠲᠡᠷᠡ ᠠᠨᠠᠺ ᠤᠨ ᠭᠤᠷᠪᠠᠨ ᠬᠥᠪᠡᠭᠦᠨ ᠢ ᠲᠡᠨᠳᠡ ᠡᠴᠡ ᠬᠥᠭᠡᠭᠡᠨ ᠵᠠᠢᠯᠠᠭᠤᠯᠪᠠ᠃ 21 ᠬᠠᠷᠢᠨ ᠪᠢᠨᠶᠠᠮᠢᠨᠴᠤᠳ ᠶᠧᠷᠦ᠋ᠰᠠᠯᠧᠮ ᠤᠨ ᠰᠠᠭᠤᠭᠠᠯᠢ ᠶᠧᠪᠦ᠋ᠰᠴᠦᠳ ᠢ ᠵᠠᠢᠯᠠᠭᠤᠯᠵᠤ ᠴᠢᠳᠠᠭᠠ ᠦᠭᠡᠢ᠃ ᠡᠢᠮᠦ ᠡᠴᠡ ᠶᠧᠪᠦ᠋ᠰᠴᠦᠳ ᠥᠨᠥᠳᠥᠷ ᠬᠦᠷᠲᠡᠯᠡ ᠪᠢᠨᠶᠠᠮᠢᠨᠴᠤᠳ ᠲᠠᠢ ᠬᠠᠮᠲᠤ ᠶᠧᠷᠦ᠋ᠰᠠᠯᠧᠮ ᠳᠤ ᠠᠮᠢᠳᠤᠷᠠᠵᠤ ᠪᠠᠢᠨᠠ᠃
22 ᠡᠭᠦᠨ ᠲᠡᠢ ᠠᠳᠠᠯᠢ ᠶᠣᠰᠧᠹ ᠤᠨ ᠭᠡᠷ ᠦᠨ ᠬᠢᠨ ᠴᠤ ᠪᠧᠲ᠋ᠧᠯ ᠤᠷᠤᠭᠤ ᠳᠣᠪᠲᠣᠯᠣᠭᠰᠠᠨ ᠪᠠ ᠶᠣᠬᠣᠸᠠ ᠲᠡᠳᠡᠨ ᠲᠡᠢ ᠬᠠᠮᠲᠤ ᠪᠠᠢᠪᠠ᠃ 23 ᠶᠣᠰᠧᠹ ᠤᠨ ᠭᠡᠷ ᠦᠨ ᠬᠢᠨ ᠪᠧᠲ᠋ᠧᠯ ᠢ ᠲᠠᠩᠨᠠᠭᠤᠯᠬᠤ ᠪᠠᠷ ᠬᠥᠮᠦᠨ ᠶᠠᠪᠤᠭᠤᠯᠪᠠ᠃ ᠤᠷᠢᠳᠤ ᠨᠢ ᠡᠨᠡ ᠬᠣᠲᠠ ᠶᠢ ᠯᠦᠽ ᠭᠡᠳᠡᠭ ᠪᠠᠢᠪᠠ᠃ 24 ᠲᠤᠷᠰᠢᠭᠤᠯ ᠤᠳ ᠬᠣᠲᠠ ᠠᠴᠠ ᠨᠢᠭᠡᠨ ᠬᠥᠮᠦᠨ ᠦ ᠭᠠᠷᠴᠤ ᠢᠷᠡᠬᠦ ᠶᠢ ᠬᠠᠷᠠᠭᠠᠳ᠂ ᠲᠡᠭᠦᠨ ᠡᠴᠡ᠄ 《ᠬᠣᠲᠠ ᠳᠤ ᠣᠷᠣᠬᠤ ᠵᠠᠮ ᠢ ᠵᠢᠭᠠᠵᠤ ᠥᠭᠭᠥᠭᠡᠴᠢ᠂ ᠲᠡᠭᠡᠪᠡᠯ ᠪᠢᠳᠡ ᠲᠠᠨ ᠳᠤ ᠥᠷᠥᠰᠢᠶᠡᠯ ᠲᠡᠢ ᠬᠠᠨᠳᠤᠬᠤ ᠪᠣᠯᠣᠨᠠ》 ᠭᠡᠬᠦ ᠳᠦ᠂ 25 ᠲᠡᠷᠡ ᠬᠥᠮᠦᠨ ᠬᠣᠲᠠ ᠳᠤ ᠣᠷᠣᠬᠤ ᠵᠠᠮ ᠢ ᠵᠢᠭᠠᠵᠤ ᠥᠭᠭᠥᠭᠰᠡᠨ ᠪᠠᠢᠯᠠ᠃ ᠢᠩᠭᠢᠭᠡᠳ ᠲᠡᠳᠡ ᠢᠯᠳᠦᠨ ᠦ ᠢᠷ ᠢᠶᠠᠷ ᠲᠡᠷᠡ ᠬᠣᠲᠠ ᠶᠢ ᠴᠣᠬᠢᠪᠠ᠃ ᠬᠠᠷᠢᠨ ᠥᠨᠥᠬᠢ ᠬᠥᠮᠦᠨ ᠢ ᠪᠦᠬᠦ ᠭᠡᠷ ᠪᠦᠯᠢ ᠶᠢᠨ ᠬᠢᠨ ᠲᠠᠢ ᠨᠢ ᠬᠠᠮᠲᠤ ᠬᠡᠯᠲᠦᠷᠢᠭᠦᠯᠦᠭᠰᠡᠨ ᠪᠠᠢᠯᠠ᠃ 26 ᠲᠡᠷᠡ ᠬᠥᠮᠦᠨ ᠾᠢᠲ᠋ᠴᠦᠳ ᠦᠨ ᠨᠤᠲᠤᠭ ᠤᠷᠤᠭᠤ ᠶᠠᠪᠤᠵᠤ᠂ ᠨᠢᠭᠡᠨ ᠬᠣᠲᠠ ᠪᠠᠷᠢᠭᠠᠳ ᠯᠦᠽ ᠭᠡᠵᠦ ᠨᠡᠷᠡᠯᠡᠭᠰᠡᠨ ᠢᠶᠡᠷ᠂ ᠲᠡᠷᠡ ᠬᠣᠲᠠ ᠥᠨᠥᠳᠥᠷ ᠬᠦᠷᠲᠡᠯᠡ ᠲᠡᠢᠨ ᠬᠦ ᠨᠡᠷᠡᠯᠡᠭᠳᠡᠭᠰᠡᠭᠡᠷ ᠪᠠᠢᠨᠠ᠃
27 ᠬᠠᠷᠢᠨ ᠮᠠᠨᠠᠰᠧ ᠪᠧᠲ ᠱᠠᠨ᠂ ᠲᠠᠨᠠᠺ᠂ ᠳ᠋ᠣᠷ᠂ ᠢᠪᠯᠧᠶᠠᠮ᠂ ᠮᠧᠭᠢᠳᠣ᠋ ᠪᠣᠯᠣᠨ ᠲᠡᠳᠡᠭᠡᠷ ᠦᠨ ᠡᠷᠭᠢᠨ ᠲᠣᠭᠣᠷᠢᠨ ᠤ ᠲᠣᠰᠬᠣᠳ ᠤᠨ ᠰᠠᠭᠤᠭᠠᠯᠢᠴᠢᠳ ᠢ ᠬᠥᠭᠡᠭᠡᠨ ᠭᠠᠷᠭᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠺᠠᠨᠠᠨᠴᠤᠳ ᠲᠡᠷᠡ ᠨᠤᠲᠤᠭ ᠲᠤ ᠰᠠᠭᠤᠵᠤ ᠪᠠᠢᠬᠤ ᠪᠠᠷ ᠰᠢᠢᠳᠦᠭᠰᠡᠨ ᠪᠠᠢᠵᠠᠢ᠃ 28 ᠢᠰᠷᠧᠯ ᠬᠦᠴᠦᠷᠬᠡᠭ ᠪᠣᠯᠣᠭᠰᠠᠨ ᠤ ᠳᠠᠷᠠᠭᠠ᠂ ᠺᠠᠨᠠᠨᠴᠤᠳ ᠢᠶᠠᠷ ᠬᠦᠨᠳᠦ ᠠᠵᠢᠯ ᠬᠢᠯᠭᠡᠭᠰᠡᠨ ᠪᠣᠯᠪᠠᠴᠤ ᠲᠡᠳᠡᠨ ᠢ ᠪᠦᠷᠢᠮᠦᠰᠦᠨ ᠬᠥᠭᠡᠭᠡᠨ ᠭᠠᠷᠭᠠᠭᠠ ᠦᠭᠡᠢ᠃
29 ᠡᠹᠷᠠᠢᠮ ᠭᠧᠽᠧᠷ ᠤᠨ ᠰᠠᠭᠤᠭᠠᠯᠢ ᠺᠠᠨᠠᠨᠴᠤᠳ ᠢ ᠬᠥᠭᠡᠭᠡᠨ ᠭᠠᠷᠭᠠᠭᠠ ᠦᠭᠡᠢ᠃ ᠺᠠᠨᠠᠨᠴᠤᠳ ᠭᠧᠽᠧᠷ ᠲᠤ ᠲᠡᠳᠡᠨ ᠦ ᠳᠤᠮᠳᠠ ᠠᠮᠢᠳᠤᠷᠠᠭᠰᠠᠭᠠᠷ ᠪᠠᠢᠨᠠ᠃
30 ᠽᠧᠪᠦ᠋ᠯᠣᠨ ᠬᠢᠲ᠋ᠷᠣᠨ ᠪᠣᠯᠣᠨ ᠨᠠᠬᠠᠯᠣᠯ ᠤᠨ ᠰᠠᠭᠤᠭᠠᠯᠢᠴᠢᠳ ᠢ ᠬᠥᠭᠡᠭᠡᠨ ᠭᠠᠷᠭᠠᠭᠠ ᠦᠭᠡᠢ᠃ ᠺᠠᠨᠠᠨᠴᠤᠳ ᠬᠦᠨᠳᠦ ᠠᠵᠢᠯ ᠬᠢᠵᠦ ᠲᠡᠳᠡᠨ ᠦ ᠳᠤᠮᠳᠠ ᠠᠮᠢᠳᠤᠷᠠᠳᠠᠭ ᠪᠣᠯᠪᠠ᠃
31 ᠠᠱᠧᠷ ᠠᠺᠦ᠂ ᠰᠢᠢᠳᠣᠨ᠂ ᠠᠯᠠᠪ᠂ ᠠᠺᠠᠽᠢᠪ᠂ ᠾᠧᠯᠪᠠ᠂ ᠠᠹᠧᠺ ᠪᠣᠯᠣᠨ ᠷᠧᠬᠣᠪ ᠤᠨ ᠰᠠᠭᠤᠭᠠᠯᠢᠴᠢᠳ ᠢ ᠬᠥᠭᠡᠭᠡᠨ ᠭᠠᠷᠭᠠᠭᠠ ᠦᠭᠡᠢ᠂ 32 ᠬᠥᠭᠡᠭᠡᠨ ᠭᠠᠷᠭᠠᠭᠠ ᠦᠭᠡᠢ ᠤᠴᠢᠷ ᠠᠴᠠ ᠠᠱᠧᠷᠴᠤᠳ ᠲᠡᠷᠡ ᠨᠤᠲᠤᠭ ᠤᠨ ᠰᠠᠭᠤᠭᠠᠯᠢ ᠺᠠᠨᠠᠨᠴᠤᠳ ᠤᠨ ᠳᠤᠮᠳᠠ ᠠᠮᠢᠳᠤᠷᠠᠬᠤ ᠪᠣᠯᠪᠠ᠃
33 ᠨᠠᠹᠲ᠋ᠠᠯᠢ ᠪᠧᠲ ᠱᠧᠮᠧᠱ ᠪᠣᠯᠣᠨ ᠪᠧᠲ ᠠᠨᠠᠲ ᠤᠨ ᠰᠠᠭᠤᠭᠠᠯᠢᠴᠢᠳ ᠢ ᠬᠥᠭᠡᠭᠡᠨ ᠭᠠᠷᠭᠠᠭᠠ ᠦᠭᠡᠢ᠂ ᠨᠠᠹᠲ᠋ᠠᠯᠢᠴᠤᠳ ᠴᠤ ᠲᠡᠷᠡ ᠨᠤᠲᠤᠭ ᠤᠨ ᠰᠠᠭᠤᠭᠠᠯᠢ ᠺᠠᠨᠠᠨᠴᠤᠳ ᠤᠨ ᠳᠤᠮᠳᠠ ᠠᠮᠢᠳᠤᠷᠠᠵᠤ᠂ ᠪᠧᠲ ᠱᠧᠮᠧᠱ ᠪᠣᠯᠣᠨ ᠪᠧᠲ ᠠᠨᠠᠲ ᠤᠨ ᠰᠠᠭᠤᠭᠠᠯᠢᠴᠢᠳ ᠢᠶᠠᠷ ᠬᠦᠨᠳᠦ ᠠᠵᠢᠯ ᠢᠶᠠᠨ ᠬᠢᠯᠭᠡᠬᠦ ᠪᠣᠯᠪᠠ᠃
34 ᠲᠡᠭᠡᠲᠡᠯᠡ ᠠᠮᠣᠷᠢᠴᠤᠳ ᠳ᠋ᠠᠨᠴᠤᠳ ᠢ ᠠᠭᠤᠯᠠᠷᠬᠠᠭ ᠭᠠᠵᠠᠷ ᠤᠷᠤᠭᠤ ᠰᠢᠬᠠᠵᠤ᠂ ᠬᠥᠨᠳᠡᠢ ᠲᠠᠯᠠ ᠤᠷᠤᠭᠤ ᠪᠠᠭᠤᠵᠤ ᠢᠷᠡᠬᠦ ᠪᠣᠯᠣᠮᠵᠢ ᠶᠢ ᠥᠭᠭᠥᠭᠰᠡᠨ ᠦᠭᠡᠢ᠃ 35 ᠠᠮᠣᠷᠢᠴᠤᠳ ᠾᠧᠷᠧᠰ ᠠᠭᠤᠯᠠ᠂ ᠠᠶᠠᠯᠣᠨ ᠪᠣᠯᠣᠨ ᠱᠠᠯᠪᠢᠮ ᠳᠤ ᠰᠠᠭᠤᠬᠤ ᠪᠠᠷ ᠰᠢᠢᠳᠦᠭᠰᠡᠨ ᠪᠣᠯᠪᠠᠴᠤ ᠶᠣᠰᠧᠹ ᠤᠨ ᠭᠡᠷ ᠦᠨ ᠬᠢᠨ ᠬᠦᠴᠦᠷᠬᠡᠭ ᠪᠣᠯᠣᠭᠰᠠᠨ ᠤ ᠳᠠᠷᠠᠭᠠ ᠲᠡᠳᠡᠨ ᠢᠶᠡᠷ ᠬᠦᠨᠳᠦ ᠠᠵᠢᠯ ᠬᠢᠯᠭᠡᠪᠡ᠃ 36 ᠠᠮᠣᠷᠢᠴᠤᠳ ᠤᠨ ᠨᠤᠲᠤᠭ ᠤᠨ ᠬᠢᠵᠠᠭᠠᠷ ᠨᠢ ᠬᠢᠯᠢᠨᠴᠡᠲᠦ ᠶᠢᠨ ᠳᠠᠪᠠᠭᠠ ᠠᠴᠠ ᠡᠬᠢᠯᠡᠨ᠂ ᠰᠧᠯᠠ ᠪᠠᠷ ᠳᠠᠭᠠᠷᠢᠵᠤ ᠲᠡᠭᠦᠨ ᠡᠴᠡ ᠴᠠᠰᠢ ᠦᠷᠭᠦᠯᠵᠢᠯᠡᠨᠡ᠃