ᠰᠢᠭᠦᠭᠴᠢᠳ ᠠᠷᠪᠠᠨ ᠳᠥᠷᠪᠡ
ᠰᠠᠮᠰᠣᠨ ᠤ ᠣᠨᠢᠰᠣᠭᠠ
1 ᠰᠠᠮᠰᠣᠨ ᠲᠢᠮᠨᠠ ᠤᠷᠤᠭᠤ ᠪᠠᠭᠤᠨ ᠣᠴᠢᠭᠠᠳ᠂ ᠲᠡᠨᠳᠡ ᠪᠠᠢᠭᠰᠠᠨ ᠨᠢᠭᠡᠨ ᠹᠢᠯᠢᠰᠲ ᠪᠦᠰᠡᠭᠦᠢ ᠳᠦ ᠨᠢᠳᠦ ᠲᠤᠰᠪᠠ᠃ 2 ᠰᠠᠮᠰᠣᠨ ᠡᠴᠢᠭᠡ ᠡᠬᠡ ᠥᠭᠡᠳᠡ ᠪᠡᠨ ᠪᠤᠴᠠᠵᠤ ᠢᠷᠡᠭᠡᠳ᠄ 《ᠲᠢᠮᠨᠠ ᠳᠠᠬᠢ ᠨᠢᠭᠡᠨ ᠪᠦᠰᠡᠭᠦᠢ ᠳᠦ ᠮᠢᠨᠦ ᠨᠢᠳᠦ ᠲᠤᠰᠤᠯᠠ᠃ ᠣᠳᠣ ᠲᠡᠭᠦᠨ ᠢ ᠨᠠᠳᠠ ᠳᠤ ᠡᠬᠡᠨᠡᠷ ᠪᠣᠯᠭᠠᠨ ᠠᠪᠴᠤ ᠥᠭᠭᠥᠭᠡᠴᠢ》 ᠭᠡᠪᠡ᠃ 3 ᠡᠴᠢᠭᠡ ᠡᠬᠡ ᠨᠢ ᠲᠡᠭᠦᠨ ᠳᠦ᠄ 《ᠠᠬᠠ ᠳᠡᠭᠦᠦᠰ ᠪᠤᠶᠤ ᠮᠠᠨ ᠤ ᠠᠷᠠᠳ ᠲᠦᠮᠡᠨ ᠦ ᠴᠢᠨᠢ ᠳᠤᠮᠳᠠ ᠡᠮᠡᠭᠲᠡᠢ ᠬᠥᠮᠦᠨ ᠠᠯᠠᠭᠠ ᠪᠣᠯᠴᠢᠬᠠᠭᠠᠳ ᠴᠢ ᠬᠥᠪᠴᠢᠷᠬᠡᠢ ᠬᠥᠨᠳᠡᠭᠦᠯᠦᠭᠡ ᠦᠭᠡᠢ ᠹᠢᠯᠢᠰᠲ᠋ᠴᠦᠳ ᠡᠴᠡ ᠡᠬᠡᠨᠡᠷ ᠠᠪᠬᠤ ᠪᠠᠷ ᠶᠠᠪᠤᠬᠤ ᠭᠡᠵᠦ ᠪᠠᠢᠨᠠ ᠤᠤ︖》 ᠭᠡᠰᠡᠨ ᠪᠣᠯᠪᠠᠴᠤ ᠰᠠᠮᠰᠣᠨ ᠡᠴᠢᠭᠡ ᠳᠡᠭᠡᠨ᠄ 《ᠲᠡᠭᠦᠨ ᠢ ᠨᠠᠳᠠ ᠳᠤ ᠠᠪᠴᠤ ᠥᠭᠭᠥᠭᠡᠴᠢ᠃ ᠲᠡᠷᠡ ᠯᠠ ᠮᠢᠨᠦ ᠨᠢᠳᠦᠨ ᠳᠦ ᠦᠵᠡᠰᠬᠦᠯᠡᠩ ᠲᠡᠢ ᠬᠠᠷᠠᠭᠳᠠᠵᠤ ᠪᠠᠢᠨᠠ》 ᠭᠡᠯᠡ᠃ 4 ᠭᠡᠪᠡᠴᠦ ᠡᠴᠢᠭᠡ ᠡᠬᠡ ᠨᠢ ᠡᠨᠡ ᠶᠠᠪᠤᠳᠠᠯ ᠶᠣᠬᠣᠸᠠ ᠠᠴᠠ ᠪᠣᠯᠵᠤ ᠪᠠᠢᠨᠠ ᠭᠡᠳᠡᠭ ᠢ ᠮᠡᠳᠡᠭᠰᠡᠨ ᠦᠭᠡᠢ᠃ ᠲᠡᠷᠡ ᠦᠶᠡ ᠳᠦ ᠹᠢᠯᠢᠰᠲ᠋ᠴᠦᠳ ᠢᠰᠷᠧᠯ ᠢ ᠵᠠᠬᠢᠷᠴᠤ ᠪᠠᠢᠭᠰᠠᠨ ᠪᠣᠯᠬᠣᠷ ᠶᠣᠬᠣᠸᠠ ᠹᠢᠯᠢᠰᠲ᠋ᠴᠦᠳ ᠡᠴᠡ ᠰᠢᠯᠲᠠᠭ ᠬᠠᠢᠵᠤ ᠪᠠᠢᠪᠠ᠃
5 ᠰᠠᠮᠰᠣᠨ ᠡᠴᠢᠭᠡ ᠡᠬᠡ ᠲᠠᠢ ᠪᠠᠨ ᠬᠠᠮᠲᠤ ᠲᠢᠮᠨᠠ ᠤᠷᠤᠭᠤ ᠶᠠᠪᠤᠵᠤ᠂ ᠲᠢᠮᠨᠠ ᠳᠠᠬᠢ ᠦᠵᠦᠮ ᠦᠨ ᠲᠠᠯᠠᠪᠠᠢ ᠳᠤ ᠣᠴᠢᠬᠤ ᠳᠤ᠂ ᠭᠡᠨᠡᠳᠲᠡ ᠨᠢᠭᠡᠨ ᠵᠠᠯᠠᠭᠤ ᠠᠷᠰᠯᠠᠨ ᠥᠭᠡᠳᠡ ᠡᠴᠡ ᠨᠢ ᠭᠠᠷᠴᠤ ᠢᠷᠡᠭᠡᠳ ᠠᠷᠬᠢᠷᠠᠪᠠ᠃ 6 ᠶᠣᠬᠣᠸᠠ ᠶᠢᠨ ᠰᠦᠨᠡᠰᠦ ᠲᠡᠭᠦᠨ ᠦ ᠳᠡᠭᠡᠷᠡ ᠬᠦᠴᠦᠲᠡᠢ ᠪᠠᠭᠤᠭᠰᠠᠨ ᠢᠶᠠᠷ ᠲᠡᠷᠡ ᠢᠰᠢᠭᠡ ᠲᠠᠰᠤᠳᠠᠬᠤ ᠮᠡᠲᠦ ᠬᠣᠭᠣᠰᠣᠨ ᠭᠠᠷ ᠢᠶᠠᠷ ᠠᠷᠰᠯᠠᠨ ᠢ ᠲᠠᠰᠤᠳᠠᠪᠠ᠃ ᠬᠠᠷᠢᠨ ᠲᠡᠷᠡ ᠬᠢᠭᠰᠡᠨ ᠬᠡᠷᠡᠭ ᠢᠶᠡᠨ ᠡᠴᠢᠭᠡ ᠡᠬᠡ ᠳᠡᠭᠡᠨ ᠳᠤᠭᠤᠯᠭᠠᠭᠰᠠᠨ ᠦᠭᠡᠢ᠃ 7 ᠳᠠᠷᠠᠭᠠ ᠨᠢ ᠪᠠᠭᠤᠨ ᠣᠴᠢᠵᠤ᠂ ᠨᠥᠭᠥᠭᠡ ᠪᠦᠰᠡᠭᠦᠢ ᠲᠡᠢ ᠶᠠᠷᠢᠯᠴᠠᠪᠠ᠃ ᠲᠡᠷᠡ ᠰᠠᠮᠰᠣᠨ ᠤ ᠨᠢᠳᠦᠨ ᠳᠦ ᠦᠵᠡᠰᠬᠦᠯᠡᠩ ᠲᠡᠢ ᠬᠠᠷᠠᠭᠳᠠᠵᠠᠢ᠃ 8 ᠬᠡᠰᠡᠭ ᠬᠤᠭᠤᠴᠠᠭᠠᠨ ᠤ ᠳᠠᠷᠠᠭᠠ᠂ ᠰᠠᠮᠰᠣᠨ ᠲᠡᠷᠡ ᠪᠦᠰᠡᠭᠦᠢ ᠶᠢ ᠪᠠᠭᠤᠯᠭᠠᠵᠤ ᠠᠪᠬᠤ ᠪᠠᠷ ᠪᠤᠴᠠᠵᠤ ᠢᠷᠡᠬᠦ ᠳᠡᠭᠡᠨ ᠵᠠᠮ ᠠᠴᠠ ᠪᠠᠨ ᠮᠤᠷᠤᠢᠨ ᠣᠴᠢᠵᠤ ᠨᠥᠭᠥᠭᠡ ᠠᠷᠰᠯᠠᠨ ᠤ ᠰᠡᠭ ᠢ ᠦᠵᠡᠬᠦ ᠳᠦ᠂ ᠲᠡᠭᠦᠨ ᠦ ᠳᠣᠲᠣᠷᠠ ᠵᠥᠭᠡᠢ ᠶᠢᠨ ᠰᠦᠷᠦᠭ ᠪᠠ ᠪᠠᠯ ᠪᠠᠢᠪᠠ︕ 9 ᠲᠡᠷᠡ ᠪᠠᠯ ᠢ ᠭᠠᠷ ᠢᠶᠠᠷ ᠢᠶᠠᠨ ᠬᠠᠮᠤᠵᠤ ᠠᠪᠤᠭᠠᠳ ᠢᠳᠡᠭᠰᠡᠭᠡᠷ ᠶᠠᠪᠤᠪᠠ᠃ ᠲᠡᠷᠡ ᠡᠴᠢᠭᠡ ᠡᠬᠡ ᠳᠡᠭᠡᠨ ᠬᠦᠷᠴᠦ ᠢᠷᠡᠭᠡᠳ ᠪᠠᠯ ᠠᠴᠠ ᠪᠠᠨ ᠢᠳᠡᠭᠦᠯᠦᠭᠰᠡᠨ ᠪᠣᠯᠪᠠᠴᠤ ᠪᠠᠯ ᠢ ᠠᠷᠰᠯᠠᠨ ᠤ ᠰᠡᠭ ᠡᠴᠡ ᠠᠪᠤᠭᠰᠠᠨ ᠢᠶᠠᠨ ᠲᠡᠳᠡᠨ ᠳᠦ ᠬᠡᠯᠡᠭᠰᠡᠨ ᠦᠭᠡᠢ᠃ 10 ᠡᠴᠢᠭᠡ ᠡᠬᠡ ᠨᠢ ᠨᠥᠭᠥᠭᠡ ᠪᠦᠰᠡᠭᠦᠢ ᠲᠡᠢ ᠠᠭᠤᠯᠵᠠᠬᠤ ᠪᠠᠷ ᠪᠠᠭᠤᠨ ᠣᠴᠢᠪᠠ᠃ ᠲᠡᠨᠳᠡ ᠰᠠᠮᠰᠣᠨ ᠬᠦᠷᠭᠡᠳ ᠦᠨ ᠬᠢᠳᠡᠭ ᠳᠠᠢᠯᠠᠯᠭᠠ ᠶᠢ ᠬᠢᠪᠡ᠃ 11 ᠲᠡᠨᠳᠡᠬᠢ ᠶᠢᠨ ᠬᠢᠨ ᠰᠠᠮᠰᠣᠨ ᠢ ᠬᠠᠷᠠᠭᠠᠳ᠂ ᠭᠤᠴᠢᠨ ᠬᠥᠮᠦᠨ ᠠᠪᠴᠢᠷᠠᠵᠤ ᠬᠦᠷᠭᠡᠨ ᠦ ᠳᠠᠭᠠᠭᠤᠯ ᠪᠣᠯᠭᠠᠵᠤ ᠲᠡᠭᠦᠨ ᠲᠡᠢ ᠬᠠᠮᠲᠤ ᠪᠠᠢᠯᠭᠠᠵᠠᠢ᠃ 12 ᠰᠠᠮᠰᠣᠨ ᠲᠡᠳᠡᠨ ᠳᠦ᠄ 《ᠪᠢ ᠲᠠ ᠨᠠᠷ ᠢᠶᠠᠷ ᠣᠨᠢᠰᠣᠭᠠ ᠲᠠᠭᠠᠯᠭᠠᠶᠠ᠃ ᠬᠡᠷᠪᠡ ᠲᠠ ᠨᠠᠷ ᠨᠠᠢᠷ ᠤᠨ ᠳᠣᠯᠣᠭᠠᠨ ᠬᠣᠨᠣᠭ ᠤᠨ ᠳᠣᠲᠣᠷᠠ ᠵᠥᠪ ᠳᠠᠭᠠᠵᠤ᠂ ᠨᠠᠳᠠ ᠳᠤ ᠲᠠᠢᠯᠵᠤ ᠥᠭᠪᠡᠯ᠂ ᠪᠢ ᠲᠠ ᠨᠠᠷ ᠲᠤ ᠭᠤᠴᠢᠨ ᠮᠠᠭᠠᠯᠢᠩ᠋ᠭᠤᠨ ᠴᠠᠮᠴᠠ᠂ ᠭᠤᠴᠢᠨ ᠳᠡᠪᠡᠯ ᠥᠭᠭᠥᠨᠡ᠂ 13 ᠲᠠᠢᠯᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯ ᠲᠠ ᠨᠠᠷ ᠨᠠᠳᠠ ᠳᠤ ᠭᠤᠴᠢᠨ ᠮᠠᠭᠠᠯᠢᠩ᠋ᠭᠤᠨ ᠴᠠᠮᠴᠠ᠂ ᠭᠤᠴᠢᠨ ᠳᠡᠪᠡᠯ ᠥᠭᠬᠦ ᠶᠣᠰᠣᠲᠠᠢ》 ᠭᠡᠬᠦ ᠳᠦ᠂ ᠲᠡᠳᠡ᠄ 《ᠣᠨᠢᠰᠣᠭᠠ ᠪᠠᠨ ᠬᠡᠯᠡ᠂ ᠪᠢᠳᠡ ᠰᠣᠨᠣᠰᠣᠶᠠ》 ᠭᠡᠵᠡᠭᠡᠪᠡ᠃ 14 ᠰᠠᠮᠰᠣᠨ ᠲᠡᠳᠡᠨ ᠳᠦ᠄ 《ᠢᠳᠡᠭᠴᠢ ᠡᠴᠡ ᠢᠳᠡᠭᠡᠨ ᠭᠠᠷᠪᠠ ᠢᠳᠡᠳᠡᠨ ᠡᠴᠡ ᠠᠮᠲᠠᠲᠠᠨ ᠭᠠᠷᠪᠠ》 ᠭᠡᠯᠡ᠃
ᠭᠤᠷᠪᠠ ᠬᠣᠨᠣᠭᠰᠠᠨ ᠪᠣᠯᠪᠠᠴᠤ ᠲᠡᠳᠡ ᠣᠨᠢᠰᠣᠭᠠ ᠶᠢ ᠲᠠᠢᠯᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃
15 ᠳᠥᠷᠪᠡᠳᠡᠬᠢ ᠡᠳᠦᠷ ᠨᠢ ᠲᠡᠳᠡ ᠰᠠᠮᠰᠣᠨ ᠤ ᠡᠬᠡᠨᠡᠷ ᠲᠦ᠄ 《ᠴᠢ ᠨᠥᠬᠥᠷ ᠢᠶᠡᠨ ᠢᠳᠬᠠᠵᠤ ᠲᠡᠷᠡ ᠣᠨᠢᠰᠣᠭᠠ ᠶᠢᠨ ᠲᠠᠢᠯᠤᠯ ᠢ ᠪᠢᠳᠡᠨ ᠳᠦ ᠬᠡᠯᠡᠭᠦᠯ᠃ ᠡᠰᠡ ᠲᠡᠭᠡᠪᠡᠰᠦ ᠪᠢᠳᠡ ᠴᠢᠮᠠᠶᠢ ᠡᠴᠢᠭᠡ ᠶᠢᠨ ᠴᠢᠨᠢ ᠭᠡᠷ ᠦᠨ ᠬᠢᠨ ᠲᠠᠢ ᠬᠠᠮᠲᠤ ᠭᠠᠯᠳᠠᠨ ᠰᠢᠲᠠᠭᠠᠨᠠ᠃ ᠲᠠ ᠨᠠᠷ ᠳᠡᠭᠡᠷᠡᠮᠳᠡᠬᠦ ᠭᠡᠵᠦ ᠪᠢᠳᠡᠨ ᠢ ᠤᠷᠢᠭᠰᠠᠨ ᠶᠤᠮ ᠤᠤ︖ ᠲᠡᠢᠮᠦ ᠪᠢᠰᠢ ᠭᠡᠵᠢ ᠤᠤ︖》 ᠭᠡᠯᠴᠡᠪᠡ᠃ 16 ᠡᠬᠡᠨᠡᠷ ᠨᠢ ᠰᠠᠮᠰᠣᠨ ᠤ ᠡᠮᠦᠨᠡ ᠤᠬᠢᠯᠠᠨ᠄ 《ᠴᠢ ᠨᠠᠳᠠ ᠳᠤ ᠬᠠᠢᠷᠠ ᠦᠭᠡᠢ ᠶᠤᠮ ᠪᠠᠢᠨᠠ᠂ ᠨᠠᠮᠠᠶᠢ ᠦᠵᠡᠨ ᠶᠠᠳᠠᠳᠠᠭ᠃ ᠴᠢ ᠮᠠᠨ ᠤ ᠡᠯᠢᠭᠡ ᠨᠢᠭᠡᠲᠡᠳ ᠢᠶᠡᠷ ᠣᠨᠢᠰᠣᠭᠠ ᠲᠠᠭᠠᠯᠭᠠᠵᠤ ᠪᠠᠢᠨᠠ ᠭᠡᠳ ᠨᠠᠳᠠ ᠳᠤ ᠲᠠᠢᠯᠤᠯ ᠢ ᠨᠢ ᠬᠡᠯᠡᠬᠦ ᠦᠭᠡᠢ ᠪᠠᠢᠨᠠ》 ᠭᠡᠬᠦ ᠳᠦ᠂ ᠰᠠᠮᠰᠣᠨ ᠲᠡᠭᠦᠨ ᠳᠦ᠄ 《ᠬᠠᠷᠠ᠂ ᠪᠢ ᠡᠭᠦᠨ ᠢ ᠡᠴᠢᠭᠡ ᠡᠬᠡ ᠳᠡᠭᠡᠨ ᠴᠤ ᠲᠠᠢᠯᠵᠤ ᠥᠭᠭᠥᠭᠡ ᠦᠭᠡᠢ ᠠᠲᠠᠯᠠ ᠴᠢᠮᠠ ᠳᠤ ᠲᠠᠢᠯᠵᠤ ᠥᠭᠬᠦ ᠪᠣᠯᠵᠤ ᠪᠠᠢᠨᠠ ᠤᠤ︖》 ᠭᠡᠪᠡ᠃ 17 ᠡᠬᠡᠨᠡᠷ ᠨᠢ ᠨᠠᠢᠷ ᠤᠨ ᠳᠣᠯᠣᠭᠠᠨ ᠬᠣᠨᠣᠭ ᠤᠨ ᠲᠤᠷᠰᠢᠳᠠ ᠰᠠᠮᠰᠣᠨ ᠤ ᠡᠮᠦᠨᠡ ᠤᠬᠢᠯᠠᠵᠤ ᠶᠠᠩᠰᠢᠭᠠᠳ ᠪᠠᠢᠭᠰᠠᠨ ᠪᠣᠯᠬᠣᠷ ᠰᠠᠮᠰᠣᠨ ᠳᠣᠯᠣᠳᠠᠬᠢ ᠡᠳᠦᠷ ᠲᠤᠨᠢ ᠬᠡᠯᠡᠭᠡᠳ ᠥᠭᠴᠢᠬᠡᠪᠡ᠃ ᠲᠡᠭᠡᠬᠦ ᠳᠦ ᠲᠡᠷᠡ ᠪᠦᠰᠡᠭᠦᠢ ᠡᠯᠢᠭᠡ ᠨᠢᠭᠡᠲᠡᠳ ᠲᠡᠭᠡᠨ ᠲᠠᠢᠯᠤᠯ ᠢ ᠨᠢ ᠬᠡᠯᠡᠵᠦ ᠥᠭᠴᠡᠢ᠃ 18 ᠳᠣᠯᠣᠳᠠᠬᠢ ᠡᠳᠦᠷ ᠦᠨ ᠬᠢᠨᠢ ᠨᠠᠷᠠ ᠵᠢᠷᠭᠠᠬᠤ ᠠᠴᠠ ᠡᠮᠦᠨᠡ ᠬᠣᠲᠠ ᠶᠢᠨ ᠬᠢᠨ ᠰᠠᠮᠰᠣᠨ ᠳᠤ ᠢᠷᠡᠵᠦ᠄ 《ᠵᠥᠭᠡᠢ ᠶᠢᠨ ᠪᠠᠯ ᠠᠴᠠ ᠠᠮᠲᠠᠲᠠᠢ ᠨᠢ ᠶᠠᠭᠤ ᠪᠤᠢ︖ ᠠᠷᠰᠯᠠᠨ ᠠᠴᠠ ᠬᠦᠴᠦᠲᠡᠢ ᠨᠢ ᠶᠠᠭᠤ ᠪᠤᠢ︖》 ᠭᠡᠬᠦ ᠳᠦ᠂ ᠰᠠᠮᠰᠣᠨ ᠲᠡᠳᠡᠨ ᠳᠦ᠄ 《ᠲᠠ ᠨᠠᠷ ᠮᠢᠨᠦ ᠥᠬᠢᠨ ᠲᠤᠭᠤᠯ ᠲᠠᠢ ᠬᠠᠮᠲᠤ ᠭᠠᠵᠠᠷ ᠬᠠᠭᠠᠯᠤᠭᠠ ᠦᠭᠡᠢ ᠪᠣᠯ ᠮᠢᠨᠦ ᠣᠨᠢᠰᠣᠭᠠ ᠶᠢ ᠳᠠᠭᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠬᠤ ᠰᠠᠨ》 ᠭᠡᠪᠡ᠃
19 ᠲᠡᠭᠡᠲᠡᠯᠡ ᠶᠣᠬᠣᠸᠠ ᠶᠢᠨ ᠰᠦᠨᠡᠰᠦ ᠰᠠᠮᠰᠣᠨ ᠤ ᠳᠡᠭᠡᠷᠡ ᠬᠦᠴᠦᠲᠡᠢ ᠪᠠᠭᠤᠭᠰᠠᠨ ᠢᠶᠠᠷ ᠲᠡᠷᠡ ᠠᠱᠺᠧᠯᠣᠨ ᠤᠷᠤᠭᠤ ᠣᠴᠢᠭᠠᠳ ᠲᠡᠨᠳᠡᠬᠢ ᠶᠢᠨ ᠭᠤᠴᠢᠨ ᠡᠷᠡ ᠶᠢ ᠨᠠᠮ ᠴᠣᠬᠢᠵᠤ᠂ ᠣᠯᠵᠠᠯᠠᠭᠰᠠᠨ ᠳᠡᠪᠡᠯ ᠢᠶᠡᠨ ᠣᠨᠢᠰᠣᠭᠠ ᠳᠠᠭᠠᠭᠰᠠᠨ ᠬᠥᠮᠦᠰ ᠲᠦ ᠥᠭᠪᠡ᠃ ᠲᠡᠷᠡ ᠶᠡᠬᠡᠳᠡ ᠠᠭᠤᠷᠯᠠᠭᠠᠳ ᠡᠴᠢᠭᠡ ᠶᠢᠨ ᠢᠶᠠᠨ ᠭᠡᠷ ᠥᠭᠡᠳᠡ ᠬᠠᠷᠢᠪᠠ᠃ 20 ᠬᠠᠷᠢᠨ ᠰᠠᠮᠰᠣᠨ ᠤ ᠡᠬᠡᠨᠡᠷ ᠬᠦᠷᠭᠡᠨ ᠦ ᠳᠠᠭᠠᠭᠤᠯ ᠤᠨ ᠨᠢᠭᠡᠨ ᠦ ᠬᠢᠨᠢ ᠡᠬᠡᠨᠡᠷ ᠪᠣᠯᠣᠭᠰᠠᠨ ᠪᠠᠢᠨᠠ᠃