ᠰᠢᠭᠦᠭᠴᠢᠳ ᠳᠣᠯᠣᠭᠠ
ᠶᠣᠬᠣᠸᠠ ᠭᠢᠳᠧᠶᠣᠨ ᠤ ᠴᠡᠷᠢᠭ ᠢ ᠰᠢᠭᠰᠢᠪᠡ
1 ᠥᠷᠯᠥᠭᠡ ᠡᠷᠲᠡ ᠶᠧᠷᠦ᠋ᠪᠠᠯ ᠭᠡᠭᠳᠡᠳᠡᠭ ᠭᠢᠳᠧᠶᠣᠨ ᠪᠣᠯᠣᠨ ᠲᠡᠭᠦᠨ ᠲᠡᠢ ᠬᠠᠮᠲᠤ ᠪᠤᠢ ᠠᠷᠠᠳ ᠣᠯᠠᠨ ᠬᠠᠷᠣᠳ᠋ ᠤᠨ ᠪᠤᠯᠠᠭ ᠤᠨ ᠳᠡᠷᠭᠡᠳᠡ ᠬᠤᠸᠠᠷᠠᠩᠨᠠᠨ ᠪᠠᠭᠤᠪᠠ᠃ ᠮᠢᠳᠢᠶᠠᠨᠴᠤᠳ ᠲᠡᠳᠡᠨ ᠡᠴᠡ ᠬᠣᠢᠲᠤ ᠲᠠᠯᠠ ᠳᠤ᠂ ᠮᠣᠷᠧ ᠶᠢᠨ ᠲᠣᠯᠣᠭᠠᠳ ᠤᠨ ᠬᠠᠵᠠᠭᠤ ᠳᠠᠬᠢ ᠬᠥᠨᠳᠡᠢ ᠲᠠᠯᠠ ᠳᠤ ᠬᠤᠸᠠᠷᠠᠩᠨᠠᠵᠤ ᠪᠠᠢᠯᠠ᠃
2 ᠶᠣᠬᠣᠸᠠ ᠭᠢᠳᠧᠶᠣᠨ ᠳᠤ ᠠᠢᠯᠠᠳᠤᠨ᠄ 《ᠴᠢᠮᠠ ᠲᠠᠢ ᠪᠠᠢᠭᠠ ᠠᠷᠠᠳ ᠬᠡᠲᠦᠷᠬᠡᠢ ᠣᠯᠠᠨ ᠪᠣᠯᠬᠣᠷ ᠪᠢ ᠮᠢᠳᠢᠶᠠᠨᠴᠤᠳ ᠢ ᠲᠡᠳᠡᠨ ᠦ ᠭᠠᠷ ᠲᠤ ᠲᠤᠰᠢᠶᠠᠬᠤ ᠦᠭᠡᠢ᠂ ᠢᠰᠷᠧᠯ᠄ 〈ᠮᠢᠨᠦ ᠭᠠᠷ ᠨᠠᠮᠠᠶᠢ ᠠᠪᠤᠷᠠᠭᠰᠠᠨ〉 ᠭᠡᠵᠦ ᠨᠠᠳᠠ ᠳᠤ ᠪᠠᠷᠳᠠᠮ ᠵᠠᠩ ᠭᠠᠷᠭᠠᠬᠤ ᠪᠤᠢ᠃ 3 ᠣᠳᠣ ᠠᠷᠠᠳ ᠣᠯᠠᠨ ᠳᠤ ᠵᠠᠷᠯᠠᠨ᠄ 〈ᠠᠶᠤᠵᠤ ᠰᠦᠷᠳᠡᠵᠦ ᠪᠠᠢᠭᠠ ᠬᠥᠮᠦᠨ ᠪᠣᠯᠭᠠᠨ ᠪᠤᠴᠠᠵᠤ ᠪᠣᠯᠣᠨᠠ᠂ ᠡᠨᠡ ᠭᠢᠯᠧᠶᠠᠳ᠋ ᠠᠭᠤᠯᠠ ᠠᠴᠠ ᠬᠤᠷᠳᠤᠨ ᠶᠠᠪᠤ〉 ᠭᠡᠵᠦ ᠬᠡᠯᠡ》 ᠭᠡᠪᠡ᠃ ᠢᠩᠭᠢᠭᠰᠡᠨ ᠳᠦ ᠬᠣᠶᠠᠷ ᠲᠦᠮᠡ ᠬᠣᠶᠠᠷ ᠮᠢᠩ᠋ᠭᠠᠨ ᠬᠥᠮᠦᠨ ᠪᠤᠴᠠᠵᠤ᠂ ᠲᠦᠮᠡᠨ ᠬᠥᠮᠦᠨ ᠦᠯᠡᠳᠡᠪᠡ᠃
4 ᠶᠣᠬᠣᠸᠠ ᠭᠢᠳᠧᠶᠣᠨ ᠳᠤ ᠠᠢᠯᠠᠳᠤᠨ᠄ 《ᠮᠥᠨ ᠯᠠ ᠳᠡᠩᠳᠡᠭᠦᠦ ᠣᠯᠠᠨ ᠪᠠᠢᠨᠠ᠃ ᠲᠡᠳᠡᠨ ᠢ ᠤᠰᠤ ᠤᠷᠤᠭᠤ ᠠᠪᠠᠴᠢᠭᠠᠴᠢ᠃ ᠲᠡᠨᠳᠡ ᠪᠢ ᠲᠡᠳᠡᠨ ᠢ ᠴᠢᠮᠠ ᠳᠤ ᠰᠢᠭᠰᠢᠵᠦ ᠥᠭᠭᠥᠶᠡ᠃ ᠬᠡᠷᠪᠡ ᠪᠢ᠄ 〈ᠡᠨᠡ ᠬᠥᠮᠦᠨ ᠴᠢᠮᠠ ᠲᠠᠢ ᠬᠠᠮᠲᠤ ᠶᠠᠪᠤᠨᠠ〉 ᠭᠡᠵᠦ ᠬᠡᠯᠡᠪᠡᠯ ᠲᠡᠷᠡ ᠴᠢᠮᠠ ᠲᠠᠢ ᠬᠠᠮᠲᠤ ᠶᠠᠪᠤᠨᠠ᠃ ᠬᠡᠷᠪᠡ᠄ 〈ᠡᠨᠡ ᠬᠥᠮᠦᠨ ᠴᠢᠮᠠ ᠲᠠᠢ ᠬᠠᠮᠲᠤ ᠶᠠᠪᠤᠬᠤ ᠦᠭᠡᠢ〉 ᠭᠡᠵᠦ ᠬᠡᠯᠡᠪᠡᠯ ᠲᠡᠷᠡ ᠶᠠᠪᠤᠬᠤ ᠦᠭᠡᠢ》 ᠭᠡᠰᠡᠨ ᠳᠦ᠂ 5 ᠭᠢᠳᠧᠶᠣᠨ ᠠᠷᠠᠳ ᠣᠯᠠᠨ ᠢ ᠤᠰᠤ ᠤᠷᠤᠭᠤ ᠠᠪᠠᠴᠢᠪᠠ᠃ ᠶᠣᠬᠣᠸᠠ ᠭᠢᠳᠧᠶᠣᠨ ᠳᠤ᠄ 《ᠨᠣᠬᠠᠢ ᠰᠢᠭ᠋ ᠬᠡᠯᠡ ᠪᠡᠷ ᠢᠶᠠᠨ ᠤᠰᠤ ᠳᠣᠯᠢᠶᠠᠬᠤ ᠬᠥᠮᠦᠰ ᠢ ᠰᠥᠭᠥᠳᠥᠭᠡᠳ ᠤᠰᠤ ᠤᠤᠭᠤᠵᠤ ᠪᠤᠢ ᠬᠥᠮᠦᠰ ᠡᠴᠡ ᠰᠠᠯᠭᠠᠵᠤ ᠵᠣᠭᠰᠣᠭᠠ》 ᠭᠡᠪᠡ᠃ 6 ᠤᠰᠤ ᠶᠢ ᠠᠯᠠᠭᠠ ᠪᠠᠷ ᠢᠶᠠᠨ ᠪᠢᠲᠡᠭᠦᠯᠡᠵᠦ ᠠᠮᠠᠨ ᠳᠠᠭᠠᠨ ᠬᠦᠷᠭᠡᠨ ᠳᠣᠯᠢᠶᠠᠵᠤ ᠤᠤᠭᠤᠭᠤ ᠬᠥᠮᠦᠨ ᠦ ᠲᠣᠭᠠ ᠭᠤᠷᠪᠠᠨ ᠵᠠᠭᠤ ᠪᠠᠢᠪᠠ᠃ ᠬᠠᠷᠢᠨ ᠪᠤᠰᠤᠳ ᠨᠢ ᠪᠦᠭᠦᠳᠡᠭᠡᠷ ᠰᠥᠭᠥᠳᠥᠭᠡᠳ ᠤᠰᠤ ᠤᠤᠭᠤᠵᠤ ᠪᠠᠢᠯᠠ᠃ 7 ᠶᠣᠬᠣᠸᠠ ᠭᠢᠳᠧᠶᠣᠨ ᠳᠤ ᠠᠢᠯᠠᠳᠤᠨ᠄ 《ᠤᠰᠤ ᠳᠣᠯᠢᠶᠠᠭᠴᠢ ᠭᠤᠷᠪᠠᠨ ᠵᠠᠭᠤᠨ ᠬᠥᠮᠦᠨ ᠢᠶᠡᠷ ᠳᠠᠮᠵᠢᠭᠤᠯᠤᠨ ᠪᠢ ᠲᠠ ᠨᠠᠷ ᠢ ᠠᠪᠤᠷᠠᠵᠤ᠂ ᠮᠢᠳᠢᠶᠠᠨᠴᠤᠳ ᠢ ᠴᠢᠨᠦ ᠭᠠᠷ ᠲᠤ ᠲᠤᠰᠢᠶᠠᠶᠠ᠃ ᠪᠤᠰᠤᠳ ᠬᠥᠮᠦᠰ ᠢ ᠭᠡᠷ ᠤᠷᠤᠭᠤ ᠨᠢ ᠪᠤᠴᠠᠭᠠ》 ᠭᠡᠰᠡᠨ ᠳᠦ᠂ 8 ᠭᠢᠳᠧᠶᠣᠨ ᠪᠤᠰᠤᠳ ᠢᠰᠷᠧᠯ ᠬᠥᠮᠦᠰ ᠢ ᠭᠡᠷ ᠤᠷᠤᠭᠤ ᠨᠢ ᠪᠤᠴᠠᠭᠠᠵᠤ ᠨᠥᠭᠥᠭᠡ ᠭᠤᠷᠪᠠᠨ ᠵᠠᠭᠤᠨ ᠬᠥᠮᠦᠨ ᠢ ᠦᠯᠡᠳᠡᠭᠡᠪᠡ᠃ ᠲᠡᠳᠡ ᠪᠤᠰᠤᠳ ᠤᠨ ᠢᠶᠠᠨ ᠭᠠᠷ ᠠᠴᠠ ᠵᠠᠮ ᠤᠨ ᠬᠦᠨᠡᠰᠦ ᠪᠣᠯᠣᠨ ᠡᠪᠡᠷ ᠪᠦᠷᠢᠶᠡ ᠶᠢ ᠨᠢ ᠠᠪᠴᠠᠢ᠃ ᠮᠢᠳᠢᠶᠠᠨ ᠤ ᠬᠤᠸᠠᠷᠠᠨ ᠲᠡᠳᠡᠨ ᠦ ᠬᠢᠨ ᠡᠴᠡ ᠳᠣᠣᠷᠠᠬᠢ ᠬᠥᠨᠳᠡᠢ ᠲᠠᠯᠠ ᠳᠤ ᠪᠠᠢᠯᠠ᠃
ᠭᠢᠳᠧᠶᠣᠨ ᠮᠢᠳᠢᠶᠠᠨ ᠤ ᠬᠤᠸᠠᠷᠠᠨ ᠢ ᠲᠠᠩᠨᠠᠪᠠ
9 ᠲᠡᠷᠡ ᠰᠥᠨᠢ ᠳᠡᠭᠡᠨ ᠶᠣᠬᠣᠸᠠ ᠭᠢᠳᠧᠶᠣᠨ ᠳᠤ ᠠᠢᠯᠠᠳᠤᠨ᠄ 《ᠪᠣᠰ᠂ ᠨᠥᠭᠥᠭᠡ ᠬᠤᠸᠠᠷᠠᠨ ᠤᠷᠤᠭᠤ ᠳᠣᠪᠲᠣᠯ᠃ ᠪᠢ ᠲᠡᠭᠦᠨ ᠢ ᠴᠢᠨᠦ ᠭᠠᠷ ᠲᠤ ᠲᠤᠰᠢᠶᠠᠭᠰᠠᠨ᠃ 10 ᠬᠡᠷᠪᠡ ᠴᠢ ᠳᠣᠪᠲᠣᠯᠬᠤ ᠠᠴᠠ ᠠᠶᠤᠵᠤ ᠪᠠᠢᠪᠠᠯ ᠵᠠᠷᠤᠴᠠ ᠫᠦᠷᠠ ᠲᠠᠢ ᠪᠠᠨ ᠬᠠᠮᠲᠤ ᠬᠤᠸᠠᠷᠠᠨ ᠤᠷᠤᠭᠤ ᠣᠴᠢᠵᠤ᠂ 11 ᠲᠡᠳᠡᠨ ᠦ ᠶᠠᠭᠤ ᠶᠠᠷᠢᠯᠴᠠᠵᠤ ᠪᠠᠢᠭᠠ ᠶᠢ ᠰᠣᠨᠣᠰ᠃ ᠢᠩᠭᠢᠭᠰᠡᠨ ᠦ ᠳᠠᠷᠠᠭᠠ ᠴᠢ ᠵᠣᠷᠢᠭᠲᠠᠢ ᠪᠣᠯᠵᠤ ᠬᠤᠸᠠᠷᠠᠨ ᠤᠷᠤᠭᠤ ᠳᠠᠭᠠᠷᠢᠵᠤ ᠴᠢᠳᠠᠬᠤ ᠪᠣᠯᠣᠨᠠ》 ᠭᠡᠰᠡᠨ ᠳᠦ᠂ ᠭᠢᠳᠧᠶᠣᠨ ᠵᠠᠷᠤᠴᠠ ᠫᠦᠷᠠ ᠲᠠᠢ ᠪᠠᠨ ᠬᠠᠮᠲᠤ ᠬᠤᠸᠠᠷᠠᠨ ᠤ ᠵᠠᠬᠠ ᠳᠠᠬᠢ ᠬᠠᠷᠠᠭᠤᠯ ᠤᠨ ᠪᠠᠢᠷᠢ ᠤᠷᠤᠭᠤ ᠣᠴᠢᠵᠠᠢ᠃ 12 ᠮᠢᠳᠢᠶᠠᠨᠴᠤᠳ᠂ ᠠᠮᠠᠯᠧᠺᠴᠤᠳ ᠪᠣᠯᠣᠨ ᠳᠣᠷᠣᠨᠠ ᠶᠢᠨ ᠪᠦᠬᠦ ᠦᠨᠳᠦᠰᠦᠲᠡᠨ ᠴᠠᠷᠴᠠᠬᠠᠢ ᠮᠡᠲᠦ ᠣᠯᠠᠨ ᠢᠶᠠᠷ ᠢᠶᠠᠨ ᠬᠥᠨᠳᠡᠢ ᠲᠠᠯᠠ ᠪᠠᠷ ᠲᠠᠷᠬᠠᠵᠤ᠂ ᠲᠡᠳᠡᠨ ᠦ ᠲᠡᠮᠡᠭᠡᠳ ᠴᠤ ᠳᠠᠯᠠᠢ ᠶᠢᠨ ᠬᠥᠪᠡᠭᠡᠨ ᠦ ᠡᠯᠡᠰᠦ ᠮᠡᠲᠦ ᠲᠣᠭᠠ ᠲᠣᠮᠰᠢ ᠦᠭᠡᠢ ᠣᠯᠠᠨ ᠪᠠᠢᠪᠠ᠃ 13 ᠭᠢᠳᠧᠶᠣᠨ ᠲᠡᠨᠳᠡ ᠬᠦᠷᠴᠦ ᠦᠵᠡᠬᠦ ᠳᠦ᠂ ᠨᠢᠭᠡᠨ ᠬᠥᠮᠦᠨ ᠨᠠᠢᠵᠠ ᠳᠠᠭᠠᠨ ᠵᠡᠭᠦᠳᠦ ᠪᠡᠨ ᠶᠠᠷᠢᠵᠤ ᠪᠠᠢᠪᠠ︕ ᠲᠡᠷᠡ ᠬᠥᠮᠦᠨ᠄ 《ᠬᠥᠶᠶ᠂ ᠪᠢ ᠵᠡᠭᠦᠳᠦ ᠵᠡᠭᠦᠳᠦᠯᠡᠯᠡ᠃ ᠭᠡᠨᠡᠳᠲᠡ ᠨᠢᠭᠡ ᠠᠷᠪᠠᠢ ᠶᠢᠨ ᠪᠣᠣᠪᠣ ᠮᠢᠳᠢᠶᠠᠨᠴᠤᠳ ᠤᠨ ᠬᠤᠸᠠᠷᠠᠨ ᠳᠤ ᠥᠩᠬᠥᠷᠢᠵᠦ ᠢᠷᠡᠯᠡ᠂ ᠲᠡᠷᠡ ᠮᠠᠢᠬᠠᠨ ᠢ ᠮᠥᠷᠭᠥᠵᠦ ᠳᠠᠢᠪᠢᠭᠤᠯᠤᠭᠰᠠᠨ ᠳᠤ ᠮᠠᠢᠬᠠᠨ ᠨᠤᠷᠠᠵᠤ ᠤᠨᠠᠭᠰᠠᠨ ᠰᠢᠦ》 ᠭᠡᠬᠦ ᠳᠦ᠂ 14 ᠨᠠᠢᠵᠠ ᠨᠢ ᠬᠠᠷᠢᠭᠤ ᠳᠤᠨᠢ᠄ 《ᠡᠨᠡ ᠴᠢᠨᠢ ᠢᠰᠷᠧᠯ ᠬᠥᠮᠦᠨ ᠶᠣᠶᠠᠱ ᠤᠨ ᠬᠥᠪᠡᠭᠦᠨ ᠭᠢᠳᠧᠶᠣᠨ ᠤ ᠢᠯᠳᠦ ᠪᠣᠯᠬᠤ ᠨᠢ ᠭᠠᠷᠴᠠᠭᠠ ᠦᠭᠡᠢ᠃ ᠪᠤᠷᠬᠠᠨ ᠮᠢᠳᠢᠶᠠᠨᠴᠤᠳ ᠢ ᠪᠦᠬᠦ ᠬᠤᠸᠠᠷᠠᠨ ᠲᠠᠢ ᠨᠢ ᠬᠠᠮᠲᠤ ᠲᠡᠭᠦᠨ ᠦ ᠭᠠᠷ ᠲᠤ ᠲᠤᠰᠢᠶᠠᠭᠰᠠᠨ ᠪᠠᠢᠨᠠ》 ᠭᠡᠵᠡᠢ᠃
ᠭᠢᠳᠧᠶᠣᠨ ᠮᠢᠳᠢᠶᠠᠨᠴᠤᠳ ᠢ ᠪᠤᠲᠠ ᠴᠣᠬᠢᠪᠠ
15 ᠭᠢᠳᠧᠶᠣᠨ ᠵᠡᠭᠦᠳᠦ ᠪᠣᠯᠣᠨ ᠲᠠᠢᠯᠤᠯ ᠢ ᠨᠢ ᠰᠣᠨᠣᠰᠣᠭᠠᠳ ᠪᠥᠬᠥᠢᠨ ᠮᠥᠷᠭᠥᠪᠡ᠃ ᠲᠡᠭᠡᠭᠡᠳ ᠢᠰᠷᠧᠯ ᠤᠨ ᠬᠤᠸᠠᠷᠠᠨ ᠳᠤ ᠪᠤᠴᠠᠵᠤ ᠢᠷᠡᠭᠡᠳ᠄ 《ᠪᠣᠰᠴᠠᠭᠠ᠂ ᠶᠣᠬᠣᠸᠠ ᠮᠢᠳᠢᠶᠠᠨ ᠤ ᠬᠤᠸᠠᠷᠠᠨ ᠢ ᠲᠠ ᠨᠠᠷ ᠤᠨ ᠭᠠᠷ ᠲᠤ ᠲᠤᠰᠢᠶᠠᠵᠠᠢ》 ᠭᠡᠪᠡ᠃ 16 ᠲᠡᠷᠡ ᠭᠤᠷᠪᠠᠨ ᠵᠠᠭᠤᠨ ᠬᠥᠮᠦᠨ ᠢᠶᠡᠨ ᠭᠤᠷᠪᠠᠨ ᠪᠦᠯᠦᠭ ᠲᠦ ᠬᠤᠪᠢᠶᠠᠨ᠂ ᠬᠥᠮᠦᠨ ᠪᠦᠷᠢ ᠳᠤ ᠡᠪᠡᠷ ᠪᠦᠷᠢᠶᠡ ᠪᠣᠯᠣᠨ ᠬᠣᠭᠣᠰᠣᠨ ᠰᠠᠪᠠ ᠭᠠᠷᠳᠠᠭᠤᠯᠵᠤ᠂ ᠰᠠᠪᠠᠨ ᠤ ᠳᠣᠲᠣᠷᠠ ᠪᠠᠮᠪᠠᠷ ᠬᠢᠯᠭᠡᠭᠰᠡᠨ ᠦ ᠳᠠᠷᠠᠭᠠ᠂ 17 ᠲᠡᠳᠡᠨ ᠳᠦ᠄ 《ᠨᠠᠮᠠᠶᠢ ᠬᠠᠷᠠᠵᠤ᠂ ᠳᠠᠭᠤᠷᠢᠶᠠᠨ ᠦᠢᠯᠡᠳᠦᠭᠲᠦᠨ᠃ ᠪᠢ ᠬᠤᠸᠠᠷᠠᠨ ᠤ ᠵᠠᠬᠠ ᠳᠤ ᠬᠦᠷᠦᠭᠡᠳ ᠶᠠᠭᠤ ᠬᠢᠪᠡᠯ᠂ ᠲᠠ ᠨᠠᠷ ᠴᠤ ᠲᠡᠭᠡᠵᠦ ᠬᠢᠭᠲᠦᠨ᠃ 18 ᠪᠢ ᠪᠣᠯᠣᠨ ᠨᠠᠳᠠ ᠲᠠᠢ ᠬᠠᠮᠲᠤ ᠪᠠᠢᠭᠴᠢᠳ ᠪᠦᠭᠦᠳᠡᠭᠡᠷ ᠡᠪᠡᠷ ᠪᠦᠷᠢᠶᠡ ᠦᠯᠢᠶᠡᠬᠦ ᠳᠦ᠂ ᠲᠠ ᠨᠠᠷ ᠴᠤ ᠬᠤᠸᠠᠷᠠᠨ ᠤ ᠪᠦᠬᠦ ᠲᠠᠯᠠ ᠠᠴᠠ ᠡᠪᠡᠷ ᠪᠦᠷᠢᠶᠡ ᠦᠯᠢᠶᠡᠵᠦ᠄ 〈ᠶᠣᠬᠣᠸᠠ ᠶᠢᠨ ᠲᠥᠯᠥᠭᠡ᠂ ᠭᠢᠳᠧᠶᠣᠨ ᠤ ᠲᠥᠯᠥᠭᠡ〉 ᠭᠡᠵᠦ ᠬᠠᠰᠬᠢᠷᠤᠯᠳᠤ》 ᠭᠡᠪᠡ᠃
19 ᠰᠥᠨᠢ ᠳᠤᠮᠳᠠ ᠶᠢᠨ ᠬᠠᠷᠠᠭᠤᠯ ᠡᠬᠢᠯᠡᠬᠦ ᠴᠠᠭ ᠲᠤ᠂ ᠬᠠᠷᠠᠭᠤᠯ ᠳᠥᠩᠭᠡᠵᠢ ᠰᠣᠯᠢᠭᠳᠠᠭᠰᠠᠨ ᠪᠠᠢᠬᠤ ᠳᠤ᠂ ᠭᠢᠳᠧᠶᠣᠨ ᠪᠣᠯᠣᠨ ᠲᠡᠭᠦᠨ ᠲᠡᠢ ᠬᠠᠮᠲᠤ ᠪᠠᠢᠭᠠ ᠵᠠᠭᠤᠨ ᠬᠥᠮᠦᠨ ᠬᠤᠸᠠᠷᠠᠨ ᠤ ᠵᠠᠬᠠ ᠳᠤ ᠬᠦᠷᠦᠭᠡᠳ ᠡᠪᠡᠷ ᠪᠦᠷᠢᠶᠡ ᠪᠡᠨ ᠦᠯᠢᠶᠡᠵᠦ᠂ ᠭᠠᠷ ᠲᠠᠭᠠᠨ ᠪᠠᠢᠭᠠ ᠰᠠᠪᠠ ᠶᠢ ᠬᠠᠭᠠᠯᠪᠠ᠃ 20 ᠢᠩᠭᠢᠵᠦ ᠭᠤᠷᠪᠠᠨ ᠪᠦᠯᠦᠭ ᠪᠦᠷᠢᠶᠡ ᠪᠡᠨ ᠦᠯᠢᠶᠡᠨ ᠰᠠᠪᠠ ᠪᠠᠨ ᠬᠠᠭᠠᠯᠪᠠ᠃ ᠲᠡᠭᠡᠭᠡᠳ ᠵᠡᠭᠦᠨ ᠭᠠᠷ ᠲᠠᠭᠠᠨ ᠪᠠᠮᠪᠠᠷ ᠢᠶᠠᠨ ᠪᠠᠷᠢᠵᠤ᠂ ᠪᠠᠷᠠᠭᠤᠨ ᠭᠠᠷ ᠲᠠᠭᠠᠨ ᠪᠦᠷᠢᠶᠡ ᠪᠡᠨ ᠪᠠᠷᠢᠨ ᠦᠯᠢᠶᠡᠵᠦ᠄ 《ᠶᠣᠬᠣᠸᠠ ᠶᠢᠨ ᠢᠯᠳᠦ᠂ ᠭᠢᠳᠧᠶᠣᠨ ᠤ ᠢᠯᠳᠦ》 ᠭᠡᠵᠦ ᠬᠠᠰᠬᠢᠷᠤᠯᠳᠤᠪᠠ᠃ 21 ᠲᠡᠳᠡ ᠬᠤᠸᠠᠷᠠᠨ ᠢ ᠪᠦᠰᠡᠯᠡᠭᠰᠡᠨ ᠬᠡᠪ ᠢᠶᠡᠷ ᠢᠶᠠᠨ ᠬᠥᠮᠦᠨ ᠪᠦᠷᠢ ᠪᠠᠢᠷᠢᠨ ᠳᠠᠭᠠᠨ ᠵᠣᠭᠰᠣᠵᠤ ᠪᠠᠢᠲᠠᠯᠠ ᠮᠢᠳᠢᠶᠠᠨᠴᠤᠳ ᠪᠦᠭᠦᠳᠡᠭᠡᠷ ᠭᠦᠶᠦᠯᠳᠦᠨ᠂ ᠪᠠᠷᠬᠢᠷᠠᠯᠳᠤᠨ ᠵᠢᠭᠤᠲᠠᠪᠠ᠃ 22 ᠭᠤᠷᠪᠠᠨ ᠵᠠᠭᠤᠨ ᠬᠥᠮᠦᠨ ᠡᠪᠡᠷ ᠪᠦᠷᠢᠶᠡ ᠦᠯᠢᠶᠡᠬᠦ ᠳᠦ᠂ ᠶᠣᠬᠣᠸᠠ ᠪᠦᠬᠦᠯᠢ ᠬᠤᠸᠠᠷᠠᠨ ᠳᠠᠶᠠᠭᠠᠷ ᠨᠢᠭᠡᠨ ᠦ ᠬᠢᠨᠢ ᠢᠯᠳᠦ ᠶᠢ ᠨᠥᠭᠥᠭᠡ ᠶᠢᠨ ᠬᠢᠨᠢ ᠡᠰᠡᠷᠭᠦ ᠵᠥᠷᠢᠯᠳᠦᠭᠦᠯᠦᠭᠰᠡᠨ ᠳᠦ᠂ ᠳᠠᠢᠰᠤᠨ ᠽᠧᠷᠧᠷᠠ ᠶᠢᠨ ᠪᠧᠲ ᠱᠢᠲ᠋ᠠ ᠬᠦᠷᠲᠡᠯᠡ᠂ ᠴᠠᠰᠢ ᠨᠢ ᠲᠠᠪᠠᠲ ᠤᠨ ᠣᠢᠷᠠᠯᠴᠠᠭᠠᠬᠢ ᠠᠪᠧᠯ ᠮᠧᠬᠣᠯᠠ ᠶᠢᠨ ᠬᠢᠵᠠᠭᠠᠷ ᠬᠦᠷᠲᠡᠯᠡ ᠵᠢᠭᠤᠲᠠᠵᠠᠭᠠᠪᠠ᠃ 23 ᠬᠠᠷᠢᠨ ᠢᠰᠷᠧᠯᠴᠦᠳ ᠨᠠᠹᠲ᠋ᠠᠯᠢ᠂ ᠠᠱᠧᠷ ᠪᠣᠯᠣᠨ ᠪᠦᠬᠦ ᠮᠠᠨᠠᠰᠧ ᠡᠴᠡ ᠪᠥᠭᠡᠮ ᠢᠶᠡᠷ ᠢᠶᠠᠨ ᠬᠥᠳᠡᠯᠵᠡᠭᠡᠨ᠂ ᠮᠢᠳᠢᠶᠠᠨ ᠤ ᠠᠷᠤ ᠠᠴᠠ ᠨᠡᠬᠡᠭᠰᠡᠨ ᠪᠠᠢᠨᠠ᠃
24 ᠭᠢᠳᠧᠶᠣᠨ ᠡᠹᠷᠠᠢᠮ ᠤᠨ ᠠᠭᠤᠯᠠᠷᠬᠠᠭ ᠨᠤᠲᠤᠭ ᠳᠠᠶᠠᠭᠠᠷ ᠡᠯᠴᠢᠳ ᠢᠯᠡᠭᠡᠨ᠄ 《ᠪᠠᠭᠤᠨ ᠢᠷᠡᠵᠦ᠂ ᠮᠢᠳᠢᠶᠠᠨᠴᠤᠳ ᠤᠨ ᠵᠠᠮ ᠢ ᠲᠣᠰᠣᠭᠠᠷᠠᠢ᠂ ᠲᠡᠳᠡᠨ ᠡᠴᠡ ᠤᠷᠢᠳᠠᠪᠠᠷ ᠪᠧᠲ᠋ᠪᠠᠷᠠ ᠬᠦᠷᠲᠡᠯᠡᠬᠢ ᠶᠣᠷᠳᠠᠨ ᠤ ᠭᠠᠷᠠᠮ ᠢ ᠡᠵᠡᠯᠡ》 ᠭᠡᠰᠡᠨ ᠳᠦ᠂ ᠡᠹᠷᠠᠢᠮᠴᠤᠳ ᠪᠦᠭᠦᠳᠡᠭᠡᠷ ᠢᠶᠡᠨ ᠢᠷᠡᠵᠦ ᠪᠧᠲ᠋ᠪᠠᠷᠠ ᠬᠦᠷᠲᠡᠯᠡᠬᠢ ᠶᠣᠷᠳᠠᠨ ᠤ ᠭᠠᠷᠠᠮ ᠢ ᠡᠵᠡᠯᠡᠨ ᠠᠪᠤᠪᠠ᠃ 25 ᠲᠡᠳᠡ ᠮᠢᠳᠢᠶᠠᠨ ᠤ ᠬᠣᠶᠠᠷ ᠵᠠᠩᠵᠤᠨ ᠣᠷᠧᠪ ᠪᠣᠯᠣᠨ ᠽᠧᠪ ᠢ ᠣᠯᠵᠠᠯᠠᠵᠤ᠂ ᠣᠷᠧᠪ ᠢ ᠣᠷᠧᠪ ᠤᠨ ᠬᠠᠳᠠᠨ ᠳᠡᠭᠡᠷᠡ᠂ ᠽᠧᠪ ᠢ ᠽᠧᠪ ᠤᠨ ᠦᠵᠦᠮ ᠦᠨ ᠰᠢᠬᠠᠭᠤᠷᠭᠠ ᠳᠡᠭᠡᠷᠡ ᠠᠯᠠᠪᠠ᠃ ᠲᠡᠳᠡ ᠮᠢᠳᠢᠶᠠᠨᠴᠤᠳ ᠢ ᠨᠡᠬᠡᠭᠰᠡᠭᠡᠷ᠂ ᠣᠷᠧᠪ ᠪᠣᠯᠣᠨ ᠽᠧᠪ ᠤᠨ ᠲᠣᠯᠣᠭᠠᠢ ᠶᠢ ᠶᠣᠷᠳᠠᠨ ᠤ ᠴᠢᠨᠠᠳᠤ ᠠᠴᠠ ᠭᠢᠳᠧᠶᠣᠨ ᠳᠤ ᠠᠪᠴᠢᠷᠠᠪᠠ᠃