ᠡᠽᠧᠺᠢᠶᠧᠯ ᠨᠢᠭᠡ
ᠶᠣᠬᠣᠸᠠ ᠶᠢᠨ ᠵᠢᠪᠬᠤᠯᠠᠩ ᠢ ᠬᠠᠷᠠᠪᠠ
1 ᠭᠤᠴᠢᠳᠤᠭᠠᠷ ᠣᠨ ᠤ ᠳᠥᠷᠪᠡᠳᠦᠭᠡᠷ ᠰᠠᠷᠠ ᠶᠢᠨ ᠲᠠᠪᠤᠨ ᠤ ᠡᠳᠦᠷ᠂ ᠺᠧᠪᠠᠷ ᠭᠣᠣᠯ ᠤᠨ ᠳᠡᠷᠭᠡᠳᠡ ᠴᠥᠯᠡᠭᠳᠡᠭᠰᠡᠳ ᠦᠨ ᠳᠤᠮᠳᠠ ᠪᠠᠢᠬᠤ ᠳᠤ ᠮᠢᠨᠢ᠂ ᠲᠩᠷᠢ ᠨᠡᠭᠡᠭᠡᠭᠳᠡᠵᠦ ᠪᠢ ᠪᠤᠷᠬᠠᠨ ᠤ ᠦᠵᠡᠭᠳᠡᠯ ᠤᠳ ᠢ ᠦᠵᠡᠪᠡ᠃ 2 ᠶᠧᠬᠣᠢᠶᠠᠺᠢᠨ ᠬᠠᠭᠠᠨ ᠴᠥᠯᠡᠭᠳᠡᠵᠦ ᠲᠠᠪᠤᠨ ᠵᠢᠯ ᠪᠣᠯᠣᠭᠰᠠᠨ᠃ ᠲᠡᠷᠡ ᠰᠠᠷᠠ ᠶᠢᠨ ᠲᠠᠪᠤᠨ ᠳᠤ᠂ 3 ᠺᠠᠯᠳᠧᠶᠠᠴᠤᠳ ᠤᠨ ᠨᠤᠲᠤᠭ ᠳᠠᠬᠢ ᠺᠧᠪᠠᠷ ᠭᠣᠣᠯ ᠤᠨ ᠳᠡᠷᠭᠡᠳᠡ ᠶᠣᠬᠣᠸᠠ ᠶᠢᠨ ᠦᠭᠡ ᠪᠦᠽᠢ ᠶᠢᠨ ᠬᠥᠪᠡᠭᠦᠨ ᠲᠠᠬᠢᠯᠴᠢ ᠡᠽᠧᠺᠢᠶᠧᠯ ᠳᠤ ᠲᠣᠳᠣᠷᠬᠠᠢ ᠢᠷᠡᠵᠦ᠂ ᠶᠣᠬᠣᠸᠠ ᠶᠢᠨ ᠮᠤᠲᠤᠷ ᠲᠡᠭᠦᠨ ᠦ ᠳᠡᠭᠡᠷᠡ ᠪᠠᠢᠯᠠ᠃
4 ᠪᠢ ᠬᠠᠷᠠᠬᠤ ᠳᠤ᠂ ᠤᠮᠠᠷᠠᠲᠤ ᠠᠴᠠ ᠬᠤᠢ ᠰᠠᠯᠬᠢ᠂ ᠭᠡᠭᠡ ᠳᠦ ᠬᠦᠷᠢᠶᠡᠯᠡᠭᠳᠡᠭᠰᠡᠨ ᠤᠯᠠᠯᠵᠠᠬᠤ ᠭᠠᠯ ᠲᠠᠢ ᠲᠣᠮᠣ ᠡᠭᠦᠯᠡ ᠢᠷᠡᠵᠦ ᠪᠠᠢᠭᠰᠠᠨ᠃ ᠭᠠᠯ ᠤᠨ ᠳᠤᠮᠳᠠ ᠨᠢ ᠤᠯᠠᠢᠰᠤᠭᠰᠠᠨ ᠲᠡᠮᠦᠷ ᠮᠡᠲᠦ ᠪᠠᠢᠪᠠ᠃ 5 ᠭᠠᠯ ᠳᠣᠲᠣᠷᠠ ᠳᠥᠷᠪᠡᠨ ᠠᠮᠢᠳᠤ ᠪᠡᠶᠡᠲᠡᠨ ᠦ ᠳᠦᠷᠰᠦ ᠦᠵᠡᠭᠳᠡᠪᠡ᠃ ᠲᠥᠷᠬᠥ ᠨᠢ ᠬᠥᠮᠦᠨ ᠮᠡᠲᠦ ᠪᠣᠯᠪᠠᠴᠤ 6 ᠲᠤᠰ ᠪᠦᠷᠢ ᠳᠥᠷᠪᠡᠨ ᠨᠢᠭᠤᠷ᠂ ᠳᠥᠷᠪᠡᠨ ᠳᠠᠯᠠᠪᠴᠢ ᠲᠠᠢ ᠪᠠᠢᠪᠠ᠃ 7 ᠲᠡᠳᠡᠨ ᠦ ᠬᠥᠯ ᠲᠡᠭᠰᠢᠬᠡᠨ᠂ ᠬᠥᠯ ᠦᠨ ᠤᠯᠠ ᠨᠢ ᠲᠤᠭᠤᠯ ᠤᠨ ᠲᠤᠭᠤᠷᠠᠢ ᠮᠡᠲᠦ᠂ ᠬᠥᠯ ᠨᠢ ᠥᠩᠭᠡᠯᠡᠭᠰᠡᠨ ᠬᠦᠷᠡᠯ ᠠᠳᠠᠯᠢ ᠭᠢᠯᠠᠯᠵᠠᠵᠤ ᠪᠠᠢᠪᠠ᠃ 8 ᠳᠥᠷᠪᠡᠨ ᠲᠠᠯᠠ ᠶᠢᠨ ᠳᠠᠯᠠᠪᠴᠢ ᠨᠤᠭᠤᠳ ᠤᠨ ᠬᠢᠨᠢ ᠳᠣᠣᠷᠠ ᠬᠥᠮᠦᠨ ᠦ ᠭᠠᠷ ᠪᠠᠢᠪᠠ᠃ ᠲᠡᠷᠡ ᠳᠥᠷᠪᠡᠨ ᠠᠮᠢᠳᠤ ᠪᠡᠶᠡᠲᠡᠨ ᠨᠢᠭᠤᠷ ᠤᠳ ᠪᠣᠯᠣᠨ ᠳᠠᠯᠠᠪᠴᠢ ᠨᠤᠭᠤᠳ ᠲᠠᠢ ᠪᠥᠭᠡᠳ 9 ᠳᠠᠯᠠᠪᠴᠢ ᠨᠤᠭᠤᠳ ᠨᠢ ᠬᠣᠭᠣᠷᠣᠨᠳᠣ ᠪᠠᠨ ᠱᠦᠷᠭᠦᠨ ᠪᠠᠢᠯᠠ᠂ ᠲᠡᠳᠡ ᠶᠠᠪᠤᠬᠤ ᠳᠠᠭᠠᠨ ᠡᠷᠭᠢᠬᠦ ᠦᠭᠡᠢ᠂ ᠲᠤᠰ ᠪᠦᠷᠢ ᠴᠢᠭ ᠢᠶᠠᠷ ᠢᠶᠠᠨ ᠶᠠᠪᠤᠵᠤ ᠪᠠᠢᠯᠠ᠃ 10 ᠨᠢᠭᠤᠷ ᠤᠳ ᠤᠨ ᠬᠢᠨᠢ ᠳᠦᠷᠰᠦ ᠭᠡᠪᠡᠯ᠄ ᠲᠡᠷᠡ ᠳᠥᠷᠪᠡ ᠲᠤᠰ ᠪᠦᠷᠢ ᠬᠥᠮᠦᠨ ᠦ ᠨᠢᠭᠤᠷ ᠲᠠᠢ᠂ ᠪᠠᠷᠠᠭᠤᠨ ᠲᠠᠯᠠ ᠳᠠᠭᠠᠨ ᠠᠷᠰᠯᠠᠨ ᠤ ᠨᠢᠭᠤᠷ ᠲᠠᠢ᠂ ᠵᠡᠭᠦᠨ ᠲᠠᠯᠠ ᠳᠠᠭᠠᠨ ᠪᠤᠬᠠ ᠶᠢᠨ ᠨᠢᠭᠤᠷ ᠲᠠᠢ᠂ ᠪᠠᠰᠠ ᠪᠦᠷᠭᠦᠳ ᠦᠨ ᠨᠢᠭᠤᠷ ᠲᠠᠢ᠃ 11 ᠨᠢᠭᠤᠷ ᠤᠳ ᠨᠢ ᠡᠢᠮᠦ᠃ ᠳᠠᠯᠠᠪᠴᠢ ᠨᠤᠭᠤᠳ ᠨᠢ ᠳᠡᠭᠡᠭᠰᠢ ᠪᠠᠨ ᠳᠡᠯᠭᠡᠭᠳᠡᠨ᠂ ᠬᠣᠶᠠᠷ ᠳᠠᠯᠠᠪᠴᠢ ᠨᠢ ᠨᠥᠭᠥᠭᠡ ᠶᠢᠨ ᠢᠶᠠᠨ ᠳᠠᠯᠠᠪᠴᠢᠨ ᠳᠤ ᠬᠦᠷᠴᠦ᠂ ᠨᠥᠭᠥᠭᠡ ᠬᠣᠶᠠᠷ ᠳᠠᠯᠠᠪᠴᠢ ᠨᠢ ᠪᠡᠶᠡ ᠪᠡᠨ ᠪᠦᠷᠬᠦᠭᠰᠡᠨ ᠪᠠᠢᠪᠠ᠃ 12 ᠲᠡᠳᠡ ᠲᠤᠰ ᠪᠦᠷᠢ ᠴᠢᠭ ᠢᠶᠠᠷ ᠢᠶᠠᠨ ᠶᠠᠪᠤᠵᠤ ᠪᠠᠢᠯᠠ᠃ ᠰᠦᠨᠡᠰᠦ ᠬᠠᠮᠢᠭᠠᠰᠢ ᠶᠠᠪᠤᠬᠤ ᠭᠡᠪᠡᠯ᠂ ᠲᠡᠳᠡ ᠲᠡᠰᠢ ᠶᠠᠪᠤᠵᠤ᠂ ᠡᠷᠭᠢᠯ ᠦᠭᠡᠢ ᠶᠠᠪᠤᠵᠤ ᠪᠠᠢᠯᠠ᠃ 13 ᠲᠡᠳᠡᠭᠡᠷ ᠠᠮᠢᠳᠤ ᠪᠡᠶᠡᠲᠡᠨ ᠦ ᠳᠦᠷᠰᠦ ᠨᠢ ᠰᠢᠲᠠᠵᠤ ᠪᠤᠢ ᠭᠠᠯᠲᠤ ᠨᠡᠭᠦᠷᠡᠰᠦ ᠪᠤᠶᠤ ᠪᠠᠮᠪᠠᠷ ᠮᠡᠲᠦ ᠪᠠᠢᠵᠤ᠂ ᠠᠮᠢᠳᠤ ᠪᠡᠶᠡᠲᠡᠳ ᠦᠨ ᠬᠣᠭᠣᠷᠣᠨᠳᠣ ᠭᠠᠯ ᠨᠠᠰᠢ ᠴᠠᠰᠢ ᠬᠥᠳᠡᠯᠵᠦ ᠪᠠᠢᠯᠠ᠃ ᠲᠡᠷᠡ ᠭᠠᠯ ᠭᠡᠷᠡᠯ ᠲᠡᠢ ᠪᠥᠭᠡᠳ ᠲᠡᠭᠦᠨ ᠡᠴᠡ ᠭᠢᠯᠪᠢᠭᠡᠨ ᠭᠢᠯᠪᠠᠵᠤ ᠪᠠᠢᠪᠠ᠃ 14 ᠠᠮᠢᠳᠤ ᠪᠡᠶᠡᠲᠡᠳ ᠭᠢᠯᠪᠡᠭᠡᠨ ᠦ ᠭᠢᠯᠪᠠᠭᠠ ᠮᠡᠲᠦ ᠨᠠᠰᠢ ᠴᠠᠰᠢ ᠭᠦᠶᠦᠯᠳᠦᠵᠦ ᠪᠠᠢᠪᠠ᠃
15 ᠪᠢ ᠲᠡᠳᠡᠭᠡᠷ ᠠᠮᠢᠳᠤ ᠪᠡᠶᠡᠲᠡᠨ ᠢ ᠦᠵᠡᠬᠦ ᠳᠦ᠂ ᠬᠠᠷᠠᠭᠲᠤᠨ᠂ ᠳᠥᠷᠪᠡᠨ ᠨᠢᠭᠤᠷ ᠲᠠᠢ ᠠᠮᠢᠳᠤ ᠪᠡᠶᠡᠲᠡᠨ ᠲᠤᠰ ᠪᠦᠷᠢ ᠶᠢᠨ ᠳᠡᠷᠭᠡᠳᠡ ᠭᠠᠵᠠᠷ ᠳᠡᠭᠡᠷᠡ ᠨᠢᠭᠡ ᠬᠦᠷᠳᠦ ᠪᠠᠢᠪᠠ᠃ 16 ᠬᠦᠷᠳᠦ ᠨᠦᠭᠦᠳ ᠦᠨ ᠳᠦᠷᠰᠦ ᠪᠣᠯᠣᠨ ᠬᠢᠴᠡ ᠨᠢ᠂ ᠳᠥᠷᠪᠡᠭᠦᠯᠡ ᠠᠳᠠᠯᠢ ᠬᠡᠯᠪᠡᠷᠢ ᠲᠠᠢ ᠪᠥᠭᠡᠳ ᠭᠢᠯᠠᠯᠵᠠᠭᠰᠠᠨ ᠪᠢᠳᠦᠷᠶᠡ ᠮᠡᠲᠦ᠃ ᠳᠦᠷᠰᠦ ᠪᠣᠯᠣᠨ ᠬᠢᠴᠡ ᠨᠢ ᠬᠦᠷᠳᠦ ᠨᠢ ᠬᠦᠷᠳᠦ ᠶᠢᠨ ᠳᠣᠲᠣᠷᠠ ᠪᠠᠢᠭᠠ ᠮᠡᠲᠦ ᠪᠠᠢᠪᠠ᠃ 17 ᠲᠡᠳᠡ ᠬᠥᠳᠡᠯᠬᠦ ᠪᠦᠷᠢ ᠳᠡᠭᠡᠨ ᠳᠥᠷᠪᠡᠨ ᠲᠠᠯᠠ ᠶᠢᠨ ᠢᠶᠠᠨ ᠠᠯᠢ ᠴᠤ ᠵᠦᠭ ᠤᠷᠤᠭᠤ ᠶᠠᠪᠤᠳᠠᠭ ᠪᠥᠭᠡᠳ ᠡᠷᠭᠢᠯᠲᠡ ᠦᠭᠡᠢ ᠶᠠᠪᠤᠵᠤ ᠪᠠᠢᠯᠠ᠃ 18 ᠮᠥᠭᠡᠷ ᠨᠦᠭᠦᠳ ᠨᠢ ᠰᠦᠷᠯᠢᠭ ᠪᠥᠭᠡᠳ ᠠᠶᠤᠮᠰᠢᠭᠲᠠᠢ᠃ ᠲᠡᠷᠡ ᠳᠥᠷᠪᠡᠨ ᠮᠥᠭᠡᠷ ᠲᠤᠰ ᠪᠦᠷᠢ ᠶᠢ ᠲᠣᠭᠣᠷᠢᠨ ᠳᠦᠭᠦᠷᠡᠩ ᠨᠢᠳᠦ ᠪᠠᠢᠪᠠ᠃ 19 ᠠᠮᠢᠳᠤ ᠪᠡᠶᠡᠲᠡᠳ ᠬᠥᠳᠡᠯᠬᠦ ᠪᠦᠷᠢ ᠳᠤ ᠬᠦᠷᠳᠦ ᠨᠦᠭᠦᠳ ᠲᠡᠳᠡᠨ ᠦ ᠳᠡᠷᠭᠡᠳᠡ ᠬᠠᠮᠲᠤ ᠬᠥᠳᠡᠯᠵᠦ᠂ ᠠᠮᠢᠲᠠᠳ ᠭᠠᠵᠠᠷ ᠠᠴᠠ ᠡᠷᠭᠦᠭᠳᠡᠬᠦ ᠪᠦᠷᠢ ᠳᠤ ᠬᠦᠷᠳᠦ ᠨᠦᠭᠦᠳ ᠴᠤ ᠡᠷᠭᠦᠭᠳᠡᠳᠡᠭ ᠪᠠᠢᠪᠠ᠃ 20 ᠠᠮᠢᠳᠤ ᠪᠡᠶᠡᠲᠡᠳ ᠦᠨ ᠰᠦᠨᠡᠰᠦ ᠨᠢ ᠬᠦᠷᠳᠦ ᠨᠦᠭᠦᠳ ᠦᠨ ᠳᠣᠲᠣᠷᠠ ᠪᠤᠢ᠃ ᠡᠢᠮᠦ ᠡᠴᠡ ᠰᠦᠨᠡᠰᠦ ᠬᠠᠮᠢᠭᠠᠰᠢ ᠶᠠᠪᠤᠬᠤ ᠭᠡᠪᠡᠯ᠂ ᠠᠮᠢᠳᠤ ᠪᠡᠶᠡᠲᠡᠳ ᠲᠡᠰᠢ ᠶᠠᠪᠤᠨᠠ᠃ ᠬᠦᠷᠳᠦ ᠨᠦᠭᠦᠳ ᠨᠢ ᠲᠡᠳᠡᠨ ᠦ ᠳᠡᠷᠭᠡᠳᠡ ᠬᠠᠮᠲᠤ ᠡᠷᠭᠦᠭᠳᠡᠨᠡ᠃ 21 ᠠᠮᠢᠳᠤ ᠪᠡᠶᠡᠲᠡᠳ ᠦᠨ ᠰᠦᠨᠡᠰᠦ ᠨᠢ ᠬᠦᠷᠳᠦ ᠨᠦᠭᠦᠳ ᠦᠨ ᠳᠣᠲᠣᠷᠠ ᠪᠤᠢ᠃ ᠡᠢᠮᠦ ᠡᠴᠡ ᠠᠮᠢᠳᠤ ᠪᠡᠶᠡᠲᠡᠳ ᠬᠥᠳᠡᠯᠬᠦ ᠳᠦ᠂ ᠬᠦᠷᠳᠦ ᠨᠦᠭᠦᠳ ᠬᠥᠳᠡᠯᠦᠨᠡ᠂ ᠵᠣᠭᠰᠣᠬᠤ ᠳᠤᠨᠢ ᠬᠦᠷᠳᠦ ᠨᠦᠭᠦᠳ ᠴᠤ ᠵᠣᠭᠰᠣᠨᠠ᠃ ᠠᠮᠢᠳᠤ ᠪᠡᠶᠡᠲᠡᠳ ᠭᠠᠵᠠᠷ ᠠᠴᠠ ᠡᠷᠭᠦᠭᠳᠡᠬᠦ ᠳᠦ᠂ ᠬᠦᠷᠳᠦ ᠨᠦᠭᠦᠳ ᠬᠠᠮᠲᠤ ᠡᠷᠭᠦᠭᠳᠡᠨᠡ᠃
22 ᠠᠮᠢᠳᠤ ᠪᠡᠶᠡᠲᠡᠳ ᠦᠨ ᠲᠣᠯᠣᠭᠠᠢ ᠳᠡᠭᠡᠭᠦᠷ ᠠᠶᠤᠮᠰᠢᠭ ᠲᠠᠢ᠂ ᠮᠥᠰᠥ ᠮᠡᠲᠦ᠂ ᠭᠢᠯᠠᠯᠵᠠᠭᠰᠠᠨ ᠲᠣᠭᠣᠷᠠᠭ ᠣᠷᠣᠢ ᠮᠡᠲᠦ ᠬᠠᠷᠠᠭᠳᠠᠬᠤ ᠨᠢᠭᠡᠨ ᠵᠦᠢᠯ ᠳᠡᠯᠭᠡᠭᠳᠡᠭᠰᠡᠨ ᠪᠠᠢᠪᠠ᠃ 23 ᠲᠣᠭᠣᠷᠠᠭ ᠣᠷᠣᠢ ᠶᠢᠨ ᠳᠣᠣᠷᠠ ᠠᠮᠢᠳᠤ ᠪᠡᠶᠡᠲᠡᠳ ᠪᠡᠶᠡ ᠪᠡᠶᠡ ᠤᠷᠤᠭᠤ ᠪᠠᠨ ᠳᠠᠯᠠᠪᠴᠢ ᠪᠠᠨ ᠰᠤᠩ᠋ᠭᠠᠵᠤ᠂ ᠲᠤᠰ ᠪᠦᠷᠢ ᠬᠣᠶᠠᠷ ᠳᠠᠯᠠᠪᠴᠢ ᠪᠠᠷ ᠢᠶᠠᠨ ᠪᠡᠶᠡ ᠪᠡᠨ ᠪᠦᠲᠡᠭᠡᠭᠰᠡᠨ ᠪᠠᠢᠪᠠ᠃ 24 ᠲᠡᠳᠡ ᠬᠥᠳᠡᠯᠬᠦ ᠳᠦ᠂ ᠪᠢ ᠳᠠᠯᠠᠪᠴᠢ ᠨᠤᠭᠤᠳ ᠤᠨ ᠬᠢᠨᠢ ᠴᠢᠮᠡᠭᠡ ᠶᠢ ᠰᠣᠨᠣᠰᠪᠠ᠃ ᠲᠡᠷᠡ ᠴᠢᠮᠡᠭᠡ ᠶᠡᠬᠡ ᠤᠰᠤᠨ ᠤ ᠴᠢᠮᠡᠭᠡ᠂ ᠲᠡᠭᠦᠰ ᠬᠦᠴᠦᠲᠡᠨ ᠦ ᠴᠢᠮᠡᠭᠡ᠂ ᠴᠡᠷᠢᠭ ᠤᠨ ᠦᠢᠮᠡᠭᠡᠨ ᠦ ᠴᠢᠮᠡᠭᠡ ᠮᠡᠲᠦ ᠪᠠᠢᠯᠠ᠃ ᠠᠮᠢᠳᠤ ᠪᠡᠶᠡᠲᠡᠳ ᠵᠣᠭᠰᠣᠬᠤ ᠳᠠᠭᠠᠨ ᠳᠠᠯᠠᠪᠴᠢ ᠨᠤᠭᠤᠳ ᠢᠶᠠᠨ ᠪᠠᠭᠤᠯᠭᠠᠵᠤ ᠪᠠᠢᠪᠠ᠃ 25 ᠲᠡᠳᠡ ᠳᠠᠯᠠᠪᠴᠢ ᠨᠤᠭᠤᠳ ᠢᠶᠠᠨ ᠪᠠᠭᠤᠯᠭᠠᠨ ᠵᠣᠭᠰᠣᠬᠤ ᠳᠤ᠂ ᠲᠡᠳᠡᠨ ᠦ ᠲᠣᠯᠣᠭᠠᠢ ᠳᠡᠭᠡᠷᠡᠬᠢ ᠲᠣᠭᠣᠷᠠᠭ ᠣᠷᠣᠢ ᠳᠡᠭᠡᠷᠡ ᠡᠴᠡ ᠳᠠᠭᠤ ᠭᠠᠷᠴᠤ ᠪᠠᠢᠪᠠ᠃
26 ᠲᠡᠳᠡᠨ ᠦ ᠲᠣᠯᠣᠭᠠᠢ ᠳᠡᠭᠡᠷᠡᠬᠢ ᠲᠣᠭᠣᠷᠠᠭ ᠣᠷᠣᠢ ᠶᠢᠨ ᠳᠡᠭᠡᠳᠦ ᠲᠠᠯᠠ ᠳᠤ ᠢᠨᠳᠠᠷᠨᠢᠯᠠ ᠴᠢᠯᠠᠭᠤᠨ ᠰᠡᠨᠲᠢ ᠮᠡᠲᠦ ᠵᠦᠢᠯ᠂ ᠮᠥᠨ ᠰᠡᠨᠲᠢ ᠶᠢᠨ ᠳᠡᠭᠡᠭᠦᠷ ᠬᠥᠮᠦᠨ ᠦ ᠲᠥᠷᠬᠥ ᠦᠵᠡᠭᠳᠡᠪᠡ᠃ 27 ᠪᠢ ᠬᠠᠷᠠᠬᠤ ᠳᠤ᠂ ᠲᠡᠭᠦᠨ ᠦ ᠪᠡᠯᠬᠡᠭᠦᠰᠦᠨ ᠡᠴᠡ ᠳᠡᠭᠡᠭᠰᠢᠬᠢ ᠨᠢ ᠤᠯᠠᠢᠰᠤᠭᠰᠠᠨ ᠲᠡᠮᠦᠷ ᠮᠡᠲᠦ᠂ ᠡᠷᠭᠢᠨ ᠲᠣᠭᠣᠷᠢᠨ ᠳᠤᠨᠢ ᠭᠠᠯ ᠲᠠᠢ ᠪᠥᠭᠡᠳ ᠪᠡᠯᠬᠡᠭᠦᠰᠦᠨ ᠡᠴᠡ ᠳᠣᠭᠣᠭᠰᠢᠬᠢ ᠨᠢ ᠭᠠᠯ ᠮᠡᠲᠦ᠂ ᠡᠷᠭᠢᠨ ᠲᠣᠭᠣᠷᠢᠨ ᠳᠤᠨᠢ ᠲᠤᠶᠠᠭᠠ ᠲᠠᠢ ᠪᠠᠢᠪᠠ᠃ 28 ᠡᠷᠭᠢᠨ ᠲᠣᠭᠣᠷᠢᠨ ᠤ ᠬᠢᠨᠢ ᠲᠤᠶᠠᠭᠠ ᠨᠢ ᠪᠣᠷᠣᠭᠠᠨ ᠲᠠᠢ ᠡᠳᠦᠷ ᠦᠨ ᠡᠭᠦᠯᠡᠨ ᠳᠤᠮᠳᠠᠬᠢ ᠰᠣᠯᠣᠩ᠋ᠭᠠ ᠮᠡᠲᠦ᠃ ᠶᠣᠬᠣᠸᠠ ᠶᠢᠨ ᠴᠣᠭ ᠵᠢᠪᠬᠤᠯᠠᠩ ᠶᠠᠭ ᠲᠡᠢᠮᠦ ᠪᠠᠢᠪᠠ᠃