ᠡᠽᠧᠺᠢᠶᠧᠯ ᠬᠣᠷᠢᠨ ᠬᠣᠶᠠᠷ
ᠶᠧᠷᠦ᠋ᠰᠠᠯᠧᠮ ᠤᠨ ᠨᠢᠭᠦᠯ ᠤᠳ
1 ᠶᠣᠬᠣᠸᠠ ᠶᠢᠨ ᠦᠭᠡ ᠨᠠᠳᠠ ᠳᠤ ᠢᠷᠡᠪᠡ᠄ 2 《ᠬᠥᠮᠦᠨ ᠦ ᠬᠦᠦ ᠴᠢ ᠰᠢᠭᠦᠬᠦ ᠦᠭᠡᠢ ᠤᠤ︖ ᠴᠢᠰᠤᠲᠤ ᠬᠣᠲᠠ ᠶᠢ ᠰᠢᠭᠦᠬᠦ ᠦᠭᠡᠢ ᠤᠤ︖ ᠲᠡᠭᠦᠨ ᠳᠦ ᠪᠦᠬᠦ ᠵᠢᠭᠰᠢᠭᠦᠷᠢᠲᠦ ᠦᠢᠯᠡᠰ ᠢ ᠨᠢ ᠮᠡᠳᠡᠭᠦᠯᠦᠨ 3 ᠢᠩᠭᠢᠵᠦ ᠬᠡᠯᠡ᠄ 〈ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠂ ᠥᠪᠡᠷ ᠦᠨ ᠢᠶᠠᠨ ᠳᠣᠲᠣᠷᠠ ᠴᠢᠰᠤ ᠤᠷᠤᠰᠬᠠᠳᠠᠭ ᠢᠶᠠᠷ ᠢᠶᠠᠨ ᠰᠢᠳᠬᠡᠯ ᠦᠨ ᠴᠠᠭ ᠢ ᠥᠪᠡᠷ ᠲᠡᠭᠡᠨ ᠠᠪᠴᠢᠷᠠᠨ᠂ ᠰᠢᠲᠦᠭᠡᠨ ᠬᠢᠵᠦ ᠥᠪᠡᠷ ᠢ ᠪᠠᠨ ᠪᠤᠵᠠᠷᠯᠠᠳᠠᠭ ᠬᠣᠲᠠ ᠡ︕ 4 ᠴᠢ ᠤᠷᠤᠰᠬᠠᠭᠰᠠᠨ ᠴᠢᠰᠤ ᠪᠠᠷ ᠢᠶᠠᠨ ᠭᠡᠮ ᠲᠡᠢ ᠪᠣᠯᠵᠤ᠂ ᠬᠢᠭᠰᠡᠨ ᠰᠢᠲᠦᠭᠡᠨ ᠨᠦᠭᠦᠳ ᠢᠶᠡᠷ ᠢᠶᠠᠨ ᠥᠪᠡᠷ ᠢ ᠪᠠᠨ ᠪᠤᠵᠠᠷᠯᠠᠭᠰᠠᠨ᠃ ᠲᠡᠢᠨ ᠬᠦ ᠴᠢ ᠰᠢᠳᠬᠡᠯ ᠦᠨ ᠡᠳᠦᠷ ᠢᠶᠡᠨ ᠣᠢᠷᠠᠲᠤᠭᠤᠯᠵᠤ᠂ ᠰᠢᠳᠬᠡᠯ ᠦᠨ ᠵᠢᠯ ᠢᠶᠠᠨ ᠢᠷᠡᠭᠦᠯᠦᠭᠰᠡᠨ᠃ ᠡᠢᠮᠦ ᠡᠴᠡ ᠪᠢ ᠴᠢᠮᠠᠶᠢ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠳᠣᠭᠣᠭᠢ᠂ ᠬᠠᠮᠤᠭ ᠭᠦᠷᠦᠨ ᠦ ᠡᠯᠡᠭ ᠪᠣᠯᠭᠠᠨᠠ᠃ 5 ᠣᠢᠷᠠ ᠶᠢᠨ ᠬᠢᠨ ᠴᠤ᠂ ᠬᠣᠯᠠ ᠶᠢᠨ ᠬᠢᠨ ᠴᠤ ᠴᠢᠮᠠᠶᠢ ᠳᠣᠷᠣᠮᠵᠢᠯᠠᠨᠠ᠂ ᠮᠠᠭᠤ ᠨᠡᠷᠡ ᠮᠤᠨᠳᠠᠭ ᠦᠢᠮᠡᠭᠡᠨ ᠲᠡᠢ ᠬᠣᠲᠠ ᠡ᠃
6 ᠬᠠᠷᠠ᠂ ᠴᠢᠨᠦ ᠳᠣᠲᠣᠷᠠᠬᠢ ᠢᠰᠷᠧᠯ ᠤᠨ ᠪᠦᠬᠦ ᠨᠣᠶᠠᠨ ᠡᠷᠬᠡ ᠪᠡᠨ ᠠᠰᠢᠭᠯᠠᠨ ᠴᠢᠰᠤ ᠤᠷᠤᠰᠬᠠᠭᠰᠠᠨ ᠪᠢᠯᠡ︕ 7 ᠴᠢᠨᠦ ᠳᠣᠲᠣᠷᠠ ᠬᠥᠮᠦᠰ ᠡᠴᠢᠭᠡ ᠡᠬᠡ ᠪᠡᠨ ᠪᠠᠰᠤᠮᠵᠢᠯᠠᠭᠰᠠᠨ᠂ ᠴᠢᠨᠦ ᠳᠣᠲᠣᠷᠠ ᠬᠥᠮᠦᠰ ᠬᠠᠷᠢ ᠬᠥᠮᠦᠰ ᠢ ᠳᠠᠷᠤᠯᠠᠭᠰᠠᠨ᠂ ᠴᠢᠨᠦ ᠳᠣᠲᠣᠷᠠ ᠬᠥᠮᠦᠰ ᠥᠨᠥᠴᠢᠨ ᠪᠡᠯᠪᠡᠰᠦᠨ ᠢ ᠵᠣᠪᠠᠭᠠᠭᠰᠠᠨ᠃ 8 ᠴᠢ ᠠᠷᠢᠭᠤᠨ ᠶᠠᠭᠤᠮᠠᠰ ᠢ ᠮᠢᠨᠢ ᠪᠠᠰᠤᠮᠵᠢᠯᠠᠵᠤ᠂ ᠠᠮᠠᠷᠠᠯ ᠤᠨ ᠡᠳᠦᠷ ᠢ ᠮᠢᠨᠢ ᠪᠤᠵᠠᠷᠯᠠᠪᠠ᠃ 9 ᠴᠢᠨᠦ ᠳᠣᠲᠣᠷᠠ ᠭᠦᠳᠬᠡᠯ ᠢᠶᠡᠷ ᠴᠢᠰᠤ ᠤᠷᠤᠰᠬᠠᠳᠠᠭ ᠬᠥᠮᠦᠰ ᠪᠤᠢ᠂ ᠴᠢᠨᠦ ᠳᠣᠲᠣᠷᠠ ᠠᠭᠤᠯᠠ ᠶᠢᠨ ᠳᠤᠭᠠᠩ ᠲᠤ ᠢᠳᠡᠵᠦ ᠵᠠᠪᠬᠠᠢᠷᠠᠳᠠᠭ ᠬᠥᠮᠦᠰ ᠪᠤᠢ᠃ 10 ᠴᠢᠨᠦ ᠳᠣᠲᠣᠷᠠ ᠡᠴᠢᠭᠡ ᠶᠢᠨ ᠢᠶᠠᠨ ᠨᠢᠴᠦᠭᠦᠨ ᠢ ᠢᠯᠡᠴᠢᠯᠡᠳᠡᠭ ᠬᠥᠮᠦᠰ᠂ ᠴᠢᠨᠦ ᠳᠣᠲᠣᠷᠠ ᠰᠠᠷᠠ ᠶᠢᠨ ᠲᠡᠮᠳᠡᠭ ᠲᠡᠢ ᠡᠮᠡ ᠶᠢ ᠬᠦᠴᠦᠷᠬᠡᠭᠯᠡᠳᠡᠭ᠌ ᠬᠥᠮᠦᠰ ᠴᠤ ᠪᠤᠢ᠃ 11 ᠴᠢᠨᠦ ᠳᠣᠲᠣᠷᠠ ᠵᠠᠷᠢᠮ ᠨᠢ ᠬᠥᠷᠰᠢ ᠶᠢᠨ ᠢᠶᠠᠨ ᠡᠬᠡᠨᠡᠷ ᠲᠡᠢ ᠵᠢᠭᠰᠢᠭᠦᠷᠢᠲᠦ ᠬᠡᠷᠡᠭ ᠢ ᠦᠢᠯᠡᠳᠴᠦ᠂ ᠵᠠᠷᠢᠮ ᠨᠢ ᠵᠠᠪᠬᠠᠢᠷᠠᠨ ᠪᠡᠷᠢ ᠪᠠᠨ ᠪᠤᠵᠠᠷᠯᠠᠳᠠᠭ᠂ ᠵᠠᠷᠢᠮ ᠨᠢ ᠡᠴᠢᠭᠡ ᠶᠢᠨ ᠢᠶᠠᠨ ᠥᠬᠢᠨ ᠪᠣᠯᠬᠤ ᠡᠭᠡᠴᠢ ᠳᠡᠭᠦᠦ ᠪᠡᠨ ᠬᠦᠴᠦᠷᠬᠡᠭᠯᠡᠳᠡᠭ᠌᠃ 12 ᠴᠢᠨᠦ ᠳᠣᠲᠣᠷᠠ ᠬᠥᠮᠦᠰ ᠬᠠᠬᠤᠤᠯᠢ ᠠᠪᠴᠤ ᠴᠢᠰᠤ ᠤᠷᠤᠰᠬᠠᠳᠠᠭ᠂ ᠵᠢᠭᠡᠯᠡᠯᠭᠡ ᠲᠠᠯᠪᠢᠵᠤ ᠬᠦᠦ ᠪᠠ ᠠᠰᠢᠭ ᠣᠯᠵᠤ᠂ ᠬᠥᠷᠰᠢ ᠪᠠᠨ ᠮᠥᠯᠵᠢᠳᠡᠭ᠃ ᠲᠡᠢᠨ ᠬᠦ ᠴᠢ ᠨᠠᠮᠠᠶᠢ ᠮᠠᠷᠲᠠᠭᠰᠠᠨ᠃〉 ᠡᠵᠡᠨ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃
13 〈ᠬᠠᠷᠠ᠂ ᠴᠢᠨᠦ ᠣᠯᠵᠤ ᠠᠪᠤᠭᠰᠠᠨ ᠰᠢᠳᠤᠷᠭᠤ ᠪᠤᠰᠤ ᠠᠰᠢᠭ᠂ ᠴᠢᠨᠦ ᠳᠤᠮᠳᠠ ᠤᠷᠤᠰᠤᠭᠰᠠᠨ ᠴᠢᠰᠤᠨ ᠠᠴᠠ ᠪᠣᠯᠵᠤ ᠪᠢ ᠨᠢᠳᠤᠷᠭᠠ ᠪᠠᠨ ᠵᠠᠩᠭᠢᠳᠤᠨᠠ᠃ 14 ᠪᠢ ᠴᠢᠮᠠ ᠳᠤ ᠬᠠᠷᠢᠭᠤᠯᠬᠤ ᠡᠳᠦᠷ ᠤᠳ ᠲᠤ ᠵᠢᠷᠦᠬᠡ ᠴᠢᠨᠢ ᠲᠡᠰᠬᠦ ᠤᠤ︖ ᠭᠠᠷ ᠴᠢᠨᠢ ᠬᠦᠴᠦᠲᠡᠢ ᠪᠠᠢᠵᠤ ᠴᠢᠳᠠᠬᠤ ᠤᠤ︖ ᠶᠣᠬᠣᠸᠠ ᠪᠢ ᠶᠠᠷᠢᠭᠰᠠᠨ᠂ ᠪᠢ ᠪᠡᠶᠡᠯᠡᠭᠦᠯᠦᠨᠡ᠃ 15 ᠪᠢ ᠴᠢᠮᠠᠶᠢ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠳᠤᠮᠳᠠ ᠪᠤᠲᠠᠷᠠᠭᠠᠵᠤ᠂ ᠭᠦᠷᠦᠨ ᠨᠦᠭᠦᠳ ᠢᠶᠡᠷ ᠲᠠᠷᠬᠠᠭᠠᠵᠤ᠂ ᠪᠤᠵᠠᠷ ᠢ ᠴᠢᠨᠢ ᠠᠷᠢᠯᠭᠠᠨᠠ᠃ 16 ᠴᠢ ᠥᠪᠡᠷ ᠦᠨ ᠢᠶᠠᠨ ᠳᠣᠲᠣᠷᠠ᠂ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠨᠢᠳᠦᠨ ᠦ ᠡᠮᠦᠨᠡ ᠪᠤᠵᠠᠷ ᠪᠣᠯᠣᠭᠰᠠᠨ ᠤ ᠳᠠᠷᠠᠭᠠ᠂ ᠨᠠᠮᠠᠶᠢ ᠶᠣᠬᠣᠸᠠ ᠭᠡᠳᠡᠭ ᠢ ᠮᠡᠳᠡᠬᠦ ᠪᠣᠯᠣᠨᠠ᠃〉》
17 ᠶᠣᠬᠣᠸᠠ ᠶᠢᠨ ᠦᠭᠡ ᠨᠠᠳᠠ ᠳᠤ ᠢᠷᠡᠪᠡ᠄ 18 《ᠬᠥᠮᠦᠨ ᠦ ᠬᠦᠦ ᠡ᠂ ᠢᠰᠷᠧᠯ ᠤᠨ ᠭᠡᠷ ᠨᠠᠳᠠ ᠳᠤ ᠰᠢᠭᠠᠷᠤ ᠪᠣᠯᠣᠭᠰᠠᠨ᠃ ᠲᠡᠳᠡ ᠪᠦᠭᠦᠳᠡᠭᠡᠷ ᠢᠶᠡᠨ ᠵᠤᠤᠬᠠᠨ ᠳᠠᠬᠢ ᠬᠦᠷᠡᠯ᠂ ᠲᠤᠭᠤᠯᠭᠠ᠂ ᠲᠡᠮᠦᠷ᠂ ᠬᠠᠷᠠ ᠲᠤᠭᠤᠯᠭᠠ ᠵᠡᠷᠭᠡ ᠮᠥᠩᠭᠥᠨ ᠦ ᠰᠢᠭᠠᠷᠤ ᠶᠤᠮ᠃ 19 ᠲᠡᠢᠮᠦ ᠡᠴᠡ ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠲᠠ ᠨᠠᠷ ᠪᠦᠭᠦᠳᠡ ᠰᠢᠭᠠᠷᠤ ᠪᠣᠯᠣᠭᠰᠠᠨ ᠤᠴᠢᠷ ᠪᠢ ᠥᠪᠡᠷ ᠢᠶᠡᠨ ᠲᠠ ᠨᠠᠷ ᠢ ᠶᠧᠷᠦ᠋ᠰᠠᠯᠧᠮ ᠤᠨ ᠳᠣᠲᠣᠷᠠ ᠴᠤᠭᠯᠠᠭᠤᠯᠤᠨᠠ᠃ 20 ᠬᠥᠮᠦᠨ ᠮᠥᠩᠭᠥ᠂ ᠬᠦᠷᠡᠯ᠂ ᠲᠡᠮᠦᠷ᠂ ᠬᠠᠷᠠ ᠲᠤᠭᠤᠯᠭᠠ᠂ ᠲᠤᠭᠤᠯᠭᠠ ᠶᠢ ᠴᠤᠭᠯᠠᠭᠤᠯᠤᠨ ᠵᠤᠤᠬᠠᠨ ᠳᠤ ᠬᠢᠵᠦ᠂ ᠭᠠᠯ ᠢᠶᠠᠷ ᠬᠥᠭᠡᠷᠭᠡᠳᠡᠨ ᠬᠠᠢᠯᠤᠭᠤᠯᠳᠠᠭ ᠤᠨ ᠠᠳᠠᠯᠢ ᠪᠢ ᠠᠭᠤᠷ ᠬᠢᠯᠢᠩ ᠢᠶᠠᠷ ᠢᠶᠠᠨ ᠲᠠ ᠨᠠᠷ ᠢ ᠴᠤᠭᠯᠠᠭᠤᠯᠵᠤ᠂ ᠲᠡᠨᠳᠡ ᠲᠠᠯᠪᠢᠨ ᠬᠠᠢᠯᠤᠭᠤᠯᠤᠨᠠ᠃ 21 ᠪᠢ ᠲᠠ ᠨᠠᠷ ᠢ ᠴᠤᠭᠯᠠᠭᠤᠯᠵᠤ᠂ ᠬᠢᠯᠢᠩ ᠤᠨ ᠭᠠᠯ ᠢᠶᠠᠷ ᠢᠶᠠᠨ ᠬᠥᠭᠡᠷᠭᠡᠳᠡᠬᠦ ᠳᠦ᠂ ᠲᠠ ᠨᠠᠷ ᠲᠡᠭᠦᠨ ᠳᠣᠲᠣᠷᠠ ᠬᠠᠢᠯᠤᠨᠠ᠃ 22 ᠮᠥᠩᠭᠥ ᠵᠤᠤᠬᠠᠨ ᠳᠣᠲᠣᠷᠠ ᠬᠠᠢᠯᠳᠠᠭ ᠤᠨ ᠠᠳᠠᠯᠢ ᠲᠠ ᠨᠠᠷ ᠲᠡᠭᠦᠨ ᠳᠣᠲᠣᠷᠠ ᠬᠠᠢᠯᠤᠨᠠ᠃ ᠲᠡᠭᠡᠬᠦ ᠳᠦ ᠶᠣᠬᠣᠸᠠ ᠪᠢ ᠲᠠ ᠨᠠᠷ ᠤᠨ ᠳᠡᠭᠡᠷᠡ ᠡᠴᠡ ᠬᠢᠯᠢᠩ ᠢᠶᠠᠨ ᠠᠰᠬᠠᠭᠰᠠᠨ ᠭᠡᠳᠡᠭ ᠢ ᠲᠠ ᠨᠠᠷ ᠮᠡᠳᠡᠬᠦ ᠪᠣᠯᠣᠨᠠ᠃〉》
23 ᠶᠣᠬᠣᠸᠠ ᠶᠢᠨ ᠦᠭᠡ ᠨᠠᠳᠠ ᠳᠤ ᠢᠷᠡᠪᠡ᠄ 24 《ᠬᠥᠮᠦᠨ ᠦ ᠬᠦᠦ ᠨᠤᠲᠤᠭ ᠲᠠᠭᠠᠨ᠄ 〈ᠴᠢ ᠪᠣᠯ ᠬᠢᠯᠢᠩ ᠤᠨ ᠡᠳᠦᠷ ᠲᠦ ᠬᠤᠷᠠ ᠪᠣᠷᠣᠭᠠ ᠣᠷᠣᠬᠤ ᠦᠭᠡᠢ ᠭᠠᠵᠠᠷ ᠶᠤᠮ〉 ᠭᠡᠵᠦ ᠬᠡᠯᠡ᠃ 25 ᠲᠡᠭᠦᠨ ᠳᠣᠲᠣᠷᠠ ᠣᠯᠵᠠ ᠪᠠᠨ ᠵᠤᠯᠭᠠᠭᠠᠬᠤ ᠠᠷᠬᠢᠷᠠᠭᠴᠢ ᠠᠷᠰᠯᠠᠨ ᠠᠳᠠᠯᠢ ᠬᠣᠲᠠ ᠶᠢᠨ ᠨᠣᠶᠠᠳ ᠤᠨ ᠬᠤᠤᠪᠢᠯᠳᠤᠭᠠᠨ ᠪᠣᠯᠵᠤ ᠪᠠᠢᠨᠠ᠃ ᠲᠡᠳᠡ ᠬᠥᠮᠦᠨ ᠦ ᠠᠮᠢ ᠶᠢ ᠵᠠᠯᠭᠢᠭᠰᠠᠨ᠂ ᠡᠷᠳᠡᠨᠢᠰ ᠪᠣᠯᠣᠨ ᠦᠨᠡᠲᠦ ᠵᠦᠢᠯᠡᠰ ᠢ ᠨᠢ ᠪᠤᠯᠢᠶᠠᠭᠰᠠᠨ᠂ ᠲᠡᠭᠦᠨ ᠦ ᠳᠣᠲᠣᠷᠠᠬᠢ ᠪᠡᠯᠪᠡᠰᠦᠨ ᠡᠬᠡᠨᠡᠷ ᠤᠳ ᠢ ᠣᠯᠠᠰᠢᠷᠠᠭᠤᠯᠤᠭᠰᠠᠨ᠃ 26 ᠲᠠᠬᠢᠯᠴᠢᠳ ᠨᠢ ᠮᠢᠨᠦ ᠬᠠᠤᠯᠢ ᠶᠢ ᠵᠥᠷᠢᠴᠡᠵᠦ᠂ ᠮᠢᠨᠦ ᠠᠷᠢᠭᠤᠨ ᠶᠠᠭᠤᠮᠠᠰ ᠢ ᠪᠤᠵᠠᠷᠯᠠᠪᠠ᠃ ᠲᠡᠳᠡ ᠠᠷᠢᠭᠤᠨ ᠪᠠ ᠠᠷᠢᠭᠤᠨ ᠪᠤᠰᠤ ᠶᠢ ᠡᠰᠡ ᠢᠯᠭᠠᠨ᠂ ᠴᠡᠪᠡᠷ ᠪᠠ ᠴᠡᠪᠡᠷ ᠪᠤᠰᠤ ᠶᠢᠨ ᠢᠯᠭᠠᠭᠠ ᠶᠢ ᠵᠢᠭᠠᠭᠰᠠᠨ ᠦᠭᠡᠢ᠃ ᠲᠡᠳᠡ ᠠᠮᠠᠷᠠᠯ ᠤᠨ ᠡᠳᠦᠷ ᠮᠢᠨᠢ ᠨᠢᠳᠦ ᠪᠡᠨ ᠠᠨᠢᠪᠠ᠂ ᠲᠡᠳᠡᠨ ᠦ ᠳᠤᠮᠳᠠ ᠪᠢ ᠲᠡᠢᠨ ᠬᠦ ᠵᠢᠭ᠍ᠰᠢᠭᠳᠡᠵᠡᠢ᠃ 27 ᠲᠡᠭᠦᠨ ᠦ ᠳᠣᠲᠣᠷᠠ ᠨᠣᠶᠠᠳ ᠨᠢ ᠣᠯᠵᠠ ᠪᠠᠨ ᠵᠤᠯᠭᠠᠭᠠᠵᠤ ᠪᠤᠢ ᠴᠢᠨᠣᠠ ᠠᠳᠠᠯᠢ ᠰᠢᠳᠤᠷᠭᠤ ᠪᠤᠰᠤ ᠠᠰᠢᠭ ᠣᠯᠬᠤ ᠪᠠᠷ ᠴᠢᠰᠤ ᠤᠷᠤᠰᠬᠠᠨ᠂ ᠠᠮᠢ ᠬᠣᠷᠣᠭᠠᠳᠠᠭ᠃ 28 ᠡᠰᠢ ᠦᠵᠡᠭᠦᠯᠦᠭᠴᠢᠳ ᠨᠢ ᠬᠣᠭᠣᠰᠣᠨ ᠦᠵᠡᠭᠳᠡᠯ᠂ ᠬᠠᠭᠤᠷᠮᠠᠭ ᠲᠥᠯᠭᠡ ᠪᠡᠷ ᠢᠶᠠᠨ ᠲᠡᠳᠡᠭᠡᠷ ᠶᠠᠪᠤᠳᠠᠯ ᠤᠨ ᠳᠡᠭᠡᠷᠡ ᠴᠣᠬᠣᠢ ᠲᠦᠷᠬᠢᠨ᠂ ᠶᠣᠬᠣᠸᠠ ᠠᠢᠯᠠᠳᠤᠭᠠ ᠦᠭᠡᠢ ᠠᠲᠠᠯᠠ᠄ 〈ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ〉 ᠭᠡᠳᠡᠭ᠃ 29 ᠲᠡᠷᠡ ᠨᠤᠲᠤᠭ ᠤᠨ ᠠᠷᠠᠳ ᠲᠦᠮᠡᠨ ᠮᠥᠯᠵᠢᠨ ᠲᠣᠨᠣᠵᠤ᠂ ᠦᠭᠡᠭᠦᠦ ᠶᠠᠳᠠᠭᠤᠰ ᠢ ᠳᠠᠷᠤᠯᠠᠨ᠂ ᠬᠠᠷᠢ ᠬᠥᠮᠦᠨ ᠢ ᠰᠢᠳᠤᠷᠭᠤ ᠪᠤᠰᠤ ᠪᠠᠷ ᠵᠣᠪᠠᠭᠠᠳᠠᠭ᠃ 30 ᠨᠠᠳᠠ ᠪᠠᠷ ᠲᠡᠷᠡ ᠨᠤᠲᠤᠭ ᠢ ᠤᠰᠠᠳᠬᠠᠭᠤᠯᠬᠤ ᠦᠭᠡᠢ ᠶᠢᠨ ᠲᠤᠯᠠᠳᠠ ᠲᠡᠭᠦᠨ ᠦ ᠲᠥᠯᠥᠭᠡ ᠬᠡᠷᠡᠮ ᠪᠠᠷᠢᠵᠤ᠂ ᠮᠢᠨᠦ ᠡᠮᠦᠨᠡ ᠴᠣᠭᠣᠷᠣᠬᠠᠢ ᠳᠤᠨᠢ ᠵᠣᠭᠰᠣᠬᠤ ᠬᠥᠮᠦᠨ ᠢ ᠪᠢ ᠲᠡᠳᠡᠨ ᠦ ᠳᠤᠮᠳᠠ ᠠᠴᠠ ᠬᠠᠢᠭᠰᠠᠨ ᠪᠣᠯᠪᠠᠴᠤ ᠣᠯᠣᠭᠰᠠᠨ ᠦᠭᠡᠢ᠃ 31 ᠲᠡᠢᠮᠦ ᠡᠴᠡ ᠪᠢ ᠠᠭᠤᠷ ᠢᠶᠠᠨ ᠲᠡᠳᠡᠨ ᠦ ᠳᠡᠭᠡᠷᠡ ᠠᠰᠬᠠᠨ᠂ ᠬᠢᠯᠢᠩ ᠤᠨ ᠭᠠᠯ ᠢᠶᠠᠷ ᠢᠶᠠᠨ ᠲᠡᠳᠡᠨ ᠢ ᠰᠢᠲᠠᠭᠠᠨᠠ᠃ ᠦᠢᠯᠡᠰ ᠦᠨ ᠬᠢᠨᠢ ᠦᠷᠡ ᠳᠠᠭᠠᠪᠤᠷᠢ ᠶᠢ ᠪᠢ ᠲᠡᠳᠡᠨ ᠦ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠠᠭᠤᠯᠭᠠᠨᠠ᠃ ᠡᠵᠡᠨ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃》