ᠡᠽᠧᠺᠢᠶᠧᠯ ᠭᠤᠴᠢ ᠶᠢᠰᠦ
1 ᠬᠥᠮᠦᠨ ᠦ ᠬᠦᠦ ᠡ᠂ ᠭᠣᠭ ᠤᠨ ᠡᠰᠡᠷᠭᠦ ᠡᠰᠢ ᠦᠵᠡᠭᠦᠯᠦᠨ ᠶᠠᠷᠢ᠄ 《ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠬᠠᠷᠠ᠂ ᠮᠧᠱᠧᠺ ᠪᠣᠯᠣᠨ ᠲᠦᠪᠠᠯ ᠤᠨ ᠲᠡᠷᠢᠭᠦᠨ ᠨᠣᠶᠠᠨ ᠭᠣᠭ ᠡ᠂ ᠪᠢ ᠴᠢᠨᠦ ᠡᠰᠡᠷᠭᠦ ᠪᠠᠢᠨᠠ᠃ 2 ᠪᠢ ᠴᠢᠮᠠᠶᠢ ᠡᠷᠭᠢᠭᠦᠯᠵᠦ᠂ ᠤᠮᠠᠷᠠᠲᠤ ᠶᠢᠨ ᠬᠢᠵᠠᠭᠠᠷ ᠠᠴᠠ ᠳᠠᠭᠠᠭᠤᠯᠤᠨ ᠠᠪᠴᠢᠷᠠᠵᠤ᠂ ᠢᠰᠷᠧᠯ ᠤᠨ ᠠᠭᠤᠯᠠᠰ ᠤᠨ ᠳᠡᠭᠡᠷᠡ ᠠᠪᠴᠢᠷᠠᠨᠠ᠃ 3 ᠪᠢ ᠴᠢᠨᠦ ᠵᠡᠭᠦᠨ ᠭᠠᠷ ᠳᠠᠬᠢ ᠨᠤᠮᠤ ᠶᠢ ᠴᠣᠬᠢᠵᠤ᠂ ᠴᠢᠨᠦ ᠪᠠᠷᠠᠭᠤᠨ ᠭᠠᠷ ᠠᠴᠠ ᠰᠤᠮᠤ ᠶᠢ ᠴᠢᠨᠢ ᠤᠨᠠᠭᠠᠨᠠ᠃ 4 ᠴᠢ ᠬᠠᠮᠤᠭ ᠴᠡᠷᠢᠭ ᠲᠠᠢ ᠪᠠᠨ᠂ ᠮᠥᠨ ᠬᠠᠮᠲᠤᠷᠠᠭᠴᠢ ᠦᠨᠳᠦᠰᠦᠲᠡᠨ ᠲᠡᠢ ᠪᠡᠨ ᠢᠰᠷᠧᠯ ᠤᠨ ᠠᠭᠤᠯᠠᠰ ᠤᠨ ᠳᠡᠭᠡᠷᠡ ᠤᠨᠠᠬᠤ ᠪᠣᠯᠣᠨᠠ᠃ ᠪᠢ ᠴᠢᠮᠠᠶᠢ ᠪᠦᠬᠦ ᠲᠥᠷᠥᠯ ᠦᠨ ᠮᠢᠬᠠᠴᠢᠨ ᠰᠢᠪᠠᠭᠤ᠂ ᠬᠡᠭᠡᠷᠡ ᠶᠢᠨ ᠠᠷᠢᠶᠠᠲᠠᠨ ᠤ ᠢᠳᠡᠰᠢ ᠪᠣᠯᠭᠠᠨᠠ᠃ 5 ᠴᠢ ᠵᠠᠳᠠᠭᠠᠢ ᠲᠠᠯᠠ ᠳᠤ ᠤᠨᠠᠨᠠ᠃ ᠪᠢ ᠥᠪᠡᠷ ᠢᠶᠡᠨ ᠡᠭᠦᠨ ᠢ ᠶᠠᠷᠢᠯᠠ᠃〉》 ᠡᠵᠡᠨ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃ 6 《ᠪᠢ ᠮᠠᠭᠣᠭ ᠳᠡᠭᠡᠷᠡ᠂ ᠮᠥᠨ ᠡᠷᠭᠢ ᠳᠠᠭᠠᠤ ᠠᠶᠤᠯ ᠦᠭᠡᠢ ᠠᠮᠢᠳᠤᠷᠠᠵᠤ ᠪᠤᠢ ᠬᠥᠮᠦᠰ ᠦᠨ ᠳᠡᠭᠡᠷᠡ ᠭᠠᠯ ᠢᠯᠡᠭᠡᠨᠡ᠃ ᠲᠡᠢᠨ ᠬᠦ ᠲᠡᠳᠡ ᠨᠠᠮᠠᠶᠢ ᠶᠣᠬᠣᠸᠠ ᠭᠡᠳᠡᠭ ᠢ ᠮᠡᠳᠡᠬᠦ ᠪᠣᠯᠣᠨᠠ᠃
7 ᠪᠢ ᠠᠷᠢᠭᠤᠨ ᠨᠡᠷᠡ ᠪᠡᠨ ᠥᠪᠡᠷ ᠦᠨ ᠠᠷᠠᠳ ᠲᠦᠮᠡᠨ ᠢᠰᠷᠧᠯ ᠤᠨ ᠳᠤᠮᠳᠠ ᠮᠡᠳᠡᠭᠦᠯᠵᠦ᠂ ᠮᠢᠨᠦ ᠠᠷᠢᠭᠤᠨ ᠨᠡᠷᠡ ᠳᠠᠬᠢᠨ ᠭᠤᠲᠤᠭᠠᠭᠳᠠᠬᠤ ᠶᠢ ᠵᠥᠪᠰᠢᠶᠡᠷᠡᠬᠦ ᠦᠭᠡᠢ᠃ ᠲᠡᠭᠡᠬᠦ ᠳᠦ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠨᠠᠮᠠᠶᠢ ᠢᠰᠷᠧᠯ ᠤᠨ ᠠᠷᠢᠭᠤᠨ ᠨᠢᠭᠡᠨ᠂ ᠶᠣᠬᠣᠸᠠ ᠭᠡᠳᠡᠭ ᠢ ᠮᠡᠳᠡᠬᠦ ᠪᠣᠯᠣᠨᠠ᠃ 8 ᠬᠠᠷᠠ᠂ ᠲᠡᠷᠡ ᠨᠢ ᠢᠷᠡᠵᠦ ᠪᠠᠢᠭᠠ ᠪᠥᠭᠡᠳ ᠪᠡᠶᠡᠯᠡᠭᠳᠡᠨᠡ᠂ ᠡᠵᠡᠨ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠂ ᠲᠡᠷᠡ ᠨᠢ ᠮᠢᠨᠦ ᠶᠠᠷᠢᠭᠰᠠᠨ ᠨᠥᠭᠥᠭᠡ ᠡᠳᠦᠷ ᠪᠢᠯᠡ᠃》
9 ᠲᠡᠭᠡᠬᠦ ᠳᠦ ᠢᠰᠷᠧᠯ ᠤᠨ ᠬᠣᠲᠠ ᠲᠣᠰᠬᠣᠳ ᠤᠨ ᠰᠠᠭᠤᠭᠠᠯᠢᠴᠢᠳ ᠭᠠᠳᠠᠭᠰᠢ ᠭᠠᠷᠴᠤ᠂ ᠵᠡᠪᠰᠡᠭ ᠤᠳ ᠢᠶᠠᠷ ᠭᠠᠯ ᠠᠰᠠᠭᠠᠵᠤ᠂ ᠪᠠᠮᠪᠠᠢ ᠬᠠᠯᠬᠠᠪᠴᠢ᠂ ᠨᠤᠮᠤ ᠰᠤᠮᠤ᠂ ᠪᠣᠷᠣᠣᠬᠠᠢ ᠪᠠ ᠵᠢᠳᠠ ᠶᠢ ᠲᠦᠯᠡᠨᠡ᠂ ᠡᠢᠨ ᠬᠦ ᠲᠡᠳᠡ ᠳᠣᠯᠣᠭᠠᠨ ᠵᠢᠯ ᠤᠨ ᠲᠤᠷᠰᠢ ᠲᠡᠳᠡᠭᠡᠷ ᠢᠶᠡᠷ ᠭᠠᠯ ᠲᠦᠯᠡᠬᠦ ᠪᠣᠯᠣᠨᠠ᠃ 10 ᠲᠡᠳᠡ ᠵᠡᠪᠰᠡᠭ ᠢᠶᠡᠷ ᠭᠠᠯ ᠲᠦᠯᠡᠳᠡᠭ ᠲᠤᠯᠠ ᠬᠡᠭᠡᠷᠡ ᠡᠴᠡ ᠲᠦᠯᠡᠭᠡ ᠡᠭᠦᠷᠬᠦ ᠦᠭᠡᠢ᠂ ᠣᠢ ᠠᠴᠠ ᠮᠣᠳᠣ ᠣᠭᠲᠣᠯᠬᠤ ᠦᠭᠡᠢ᠃ ᠬᠠᠷᠢᠨ ᠥᠪᠡᠷᠰᠡᠳ ᠢ ᠨᠢ ᠲᠣᠨᠣᠭᠴᠢ ᠶᠢᠨ ᠶᠠᠭᠤᠮᠠᠰ ᠢ ᠲᠣᠨᠣᠵᠤ᠂ ᠥᠪᠡᠷᠰᠡᠳ ᠢ ᠨᠢ ᠳᠡᠭᠡᠷᠡᠮᠳᠡᠭᠴᠢ ᠶᠢᠨ ᠶᠠᠭᠤᠮᠠᠰ ᠢ ᠳᠡᠭᠡᠷᠡᠮᠳᠡᠬᠦ ᠪᠣᠯᠣᠨᠠ᠃》 ᠡᠵᠡᠨ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃
11 《ᠲᠡᠷᠡ ᠡᠳᠦᠷ ᠪᠢ ᠢᠰᠷᠧᠯ ᠤᠨ ᠬᠡᠰᠡᠭ ᠭᠠᠵᠠᠷ᠂ ᠲᠠᠩᠭᠢᠰ ᠤᠨ ᠵᠡᠭᠦᠨ ᠲᠠᠯᠠ ᠲᠡᠰᠢ ᠥᠩᠭᠡᠷᠡᠬᠦ ᠵᠠᠮ ᠳᠠᠬᠢ ᠬᠥᠨᠳᠡᠢ ᠶᠢ ᠭᠣᠭ ᠤᠨ ᠪᠤᠯᠠᠰᠢᠨ ᠤ ᠭᠠᠵᠠᠷ ᠪᠣᠯᠭᠠᠨᠠ᠃ ᠭᠣᠭ ᠪᠣᠯᠣᠨ ᠲᠡᠭᠦᠨ ᠦ ᠣᠯᠠᠨ ᠲᠦᠮᠡᠨ ᠪᠦᠭᠦᠳᠡ ᠲᠡᠨᠳᠡ ᠪᠤᠯᠠᠰᠢᠯᠠᠭᠳᠠᠬᠤ ᠲᠤᠯᠠ ᠲᠡᠷᠡᠭᠦᠷ ᠠᠶᠠᠯᠠᠭᠴᠢ ᠶᠢᠨ ᠵᠠᠮ ᠪᠥᠭᠯᠡᠷᠡᠬᠦ ᠪᠣᠯᠣᠨᠠ᠃ ᠡᠢᠮᠦ ᠡᠴᠡ ᠲᠡᠷᠡ ᠭᠠᠵᠠᠷ ᠢ ᠬᠠᠮᠣᠨ ᠭᠣᠭ 18 ᠤᠨ ᠬᠥᠨᠳᠡᠢ ᠭᠡᠵᠦ ᠨᠡᠷᠡᠯᠡᠬᠦ ᠪᠣᠯᠣᠨᠠ᠃ 12 ᠢᠰᠷᠧᠯ ᠤᠨ ᠭᠡᠷ ᠦᠨ ᠬᠢᠨ ᠲᠡᠷᠡ ᠭᠠᠵᠠᠷ ᠢ ᠴᠡᠪᠡᠷᠯᠡᠬᠦ ᠶᠢᠨ ᠲᠤᠯᠠᠳᠠ ᠳᠣᠯᠣᠭᠠᠨ ᠰᠠᠷᠠ ᠶᠢᠨ ᠲᠤᠷᠰᠢ ᠲᠡᠳᠡᠨ ᠢ ᠪᠤᠯᠠᠰᠢᠯᠠᠭᠰᠠᠭᠠᠷ ᠪᠠᠢᠬᠤ ᠪᠣᠯᠣᠨᠠ᠃ 13 ᠲᠡᠢᠨ ᠬᠦ ᠲᠡᠷᠡ ᠨᠤᠲᠤᠭ ᠤᠨ ᠠᠷᠠᠳ ᠲᠦᠮᠡᠨ ᠪᠦᠭᠦᠳᠡ ᠲᠡᠳᠡᠨ ᠢ ᠪᠤᠯᠠᠰᠢᠯᠠᠬᠤ ᠪᠥᠭᠡᠳ ᠪᠢ ᠰᠦᠷ ᠵᠢᠪᠬᠤᠯᠠᠩ ᠢᠶᠠᠨ ᠢᠯᠡᠷᠬᠡᠶᠢᠯᠡᠬᠦ ᠡᠳᠦᠷ ᠲᠦ ᠲᠡᠳᠡ ᠨᠡᠷᠡ ᠠᠯᠳᠠᠷ ᠲᠠᠢ ᠪᠣᠯᠣᠨᠠ᠃》 ᠡᠵᠡᠨ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃ 14 《ᠲᠡᠳᠡ ᠲᠡᠷᠡ ᠨᠤᠲᠤᠭ ᠢ ᠴᠡᠪᠡᠷᠯᠡᠬᠦ ᠶᠢᠨ ᠲᠤᠯᠠᠳᠠ ᠲᠡᠷᠡᠭᠦᠷ ᠬᠠᠢᠭᠤᠯᠴᠢᠳ ᠬᠢᠭᠡᠳ ᠭᠠᠵᠠᠷ ᠳᠡᠭᠡᠷᠡ ᠦᠯᠡᠳᠡᠭᠰᠡᠨ ᠬᠡᠭᠦᠷ ᠤᠳ ᠢ ᠪᠤᠯᠠᠬᠤ ᠬᠥᠮᠦᠰ ᠢ ᠲᠣᠮᠢᠯᠠᠵᠤ᠂ ᠳᠣᠯᠣᠭᠠᠨ ᠰᠠᠷᠠ ᠶᠢᠨ ᠳᠠᠷᠠᠭᠠ ᠬᠠᠢᠭᠤᠯ ᠬᠢᠨᠡ᠃ 15 ᠡᠢᠨ ᠬᠦ ᠬᠠᠢᠭᠤᠯᠴᠢᠳ ᠡᠨᠡ ᠨᠤᠲᠤᠭ ᠢᠶᠠᠷ ᠥᠩᠭᠡᠷᠡᠨ ᠶᠠᠪᠤᠬᠤ ᠳᠠᠭᠠᠨ᠂ ᠬᠥᠮᠦᠨ ᠦ ᠶᠠᠰᠤ ᠦᠵᠡᠪᠡᠯ ᠬᠠᠵᠠᠭᠤ ᠳᠤᠨᠢ ᠲᠡᠮᠳᠡᠭ ᠲᠠᠯᠪᠢᠵᠤ᠂ ᠳᠠᠷᠠᠭᠠ ᠨᠢ ᠪᠤᠯᠠᠬᠤ ᠬᠥᠮᠦᠰ ᠢᠷᠡᠭᠡᠳ᠂ ᠲᠡᠭᠦᠨ ᠢ ᠨᠢ ᠬᠠᠮᠣᠨ ᠭᠣᠭ ᠤᠨ ᠬᠥᠨᠳᠡᠢ ᠳᠦ ᠪᠤᠯᠠᠨᠠ᠃ 16 ᠲᠡᠨᠳᠡᠬᠢ ᠬᠣᠲᠠ ᠨᠢ ᠴᠤ ᠬᠠᠮᠣᠨᠠ 19 ᠭᠡᠭᠳᠡᠬᠦ ᠪᠣᠯᠣᠨᠠ᠃ ᠡᠢᠨ ᠬᠦ ᠲᠡᠳᠡ ᠲᠡᠷᠡ ᠭᠠᠵᠠᠷ ᠢ ᠴᠡᠪᠡᠷᠯᠡᠨᠡ᠃》
17 ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠬᠥᠮᠦᠨ ᠦ ᠬᠦᠦ ᠡ᠂ ᠴᠢ ᠲᠥᠷᠥᠯ ᠪᠦᠷᠢ ᠶᠢᠨ ᠰᠢᠪᠠᠭᠤ᠂ ᠬᠡᠭᠡᠷᠡ ᠶᠢᠨ ᠪᠦᠬᠦ ᠠᠷᠢᠶᠠᠲᠠᠨ ᠳᠤ ᠢᠩᠭᠢᠵᠦ ᠶᠠᠷᠢ᠄ 〈ᠴᠤᠭᠯᠠᠷᠠᠨ ᠢᠷᠡᠵᠡᠭᠡ︕ ᠢᠰᠷᠧᠯ ᠤᠨ ᠠᠭᠤᠯᠠᠰ ᠤᠨ ᠳᠡᠭᠡᠷᠡ ᠮᠢᠨᠦ ᠲᠠ ᠨᠠᠷ ᠲᠤ ᠪᠡᠯᠡᠳᠴᠦ ᠪᠤᠢ ᠲᠠᠬᠢᠯ᠂ ᠦᠯᠡᠮᠵᠢ ᠶᠡᠬᠡ ᠲᠠᠬᠢᠯ ᠤᠷᠤᠭᠤ ᠲᠠᠯᠠ ᠪᠦᠷᠢ ᠡᠴᠡ ᠴᠤᠭᠯᠠᠷᠠᠵᠠᠭᠠ᠃ ᠲᠠ ᠨᠠᠷ ᠲᠡᠨᠳᠡ ᠮᠢᠬᠠ ᠢᠳᠡᠵᠦ᠂ ᠴᠢᠰᠤ ᠤᠤᠭᠤᠨᠠ᠃ 18 ᠲᠠ ᠨᠠᠷ ᠬᠦᠴᠦᠲᠡᠳ ᠦᠨ ᠮᠢᠬᠠ ᠶᠢ ᠢᠳᠡᠵᠦ᠂ ᠳᠡᠯᠡᠬᠡᠢ ᠶᠢᠨ ᠨᠣᠶᠠᠳ ᠤᠨ ᠴᠢᠰᠤ ᠶᠢ ᠤᠤᠭᠤᠬᠤ ᠪᠣᠯᠣᠨᠠ᠃ ᠲᠡᠳᠡ ᠪᠦᠭᠦᠳᠡᠭᠡᠷ ᠪᠠᠱᠠᠨ ᠤ ᠬᠤᠴᠠ᠂ ᠬᠤᠷᠠᠭᠠ᠂ ᠤᠬᠤᠨᠠ ᠪᠠ ᠪᠤᠬᠠ ᠶᠢᠨ ᠲᠠᠷᠭᠤᠨ ᠮᠢᠬᠠ ᠮᠡᠲᠦ ᠪᠣᠯᠣᠨᠠ᠃ 19 ᠲᠡᠢᠨ ᠬᠦ ᠲᠠ ᠨᠠᠷ ᠮᠢᠨᠦ ᠲᠠ ᠨᠠᠷ ᠲᠤ ᠪᠡᠯᠡᠳᠴᠦ ᠪᠤᠢ ᠲᠠᠬᠢᠯ ᠠᠴᠠ ᠴᠠᠳᠲᠠᠯᠠ ᠪᠠᠨ ᠥᠭᠡᠬᠦ ᠢᠳᠡᠵᠦ᠂ ᠰᠣᠭᠲᠣᠲᠠᠯᠠ ᠪᠠᠨ ᠴᠢᠰᠤ ᠤᠤᠭᠤᠨ᠂ 20 ᠮᠢᠨᠦ ᠰᠢᠷᠡᠭᠡᠨ ᠳᠡᠭᠡᠷᠡ ᠮᠣᠷᠢᠳ᠂ ᠲᠡᠷᠭᠡᠴᠢᠳ᠂ ᠬᠦᠴᠦᠲᠡᠳ ᠬᠢᠭᠡᠳ ᠪᠦᠬᠦ ᠳᠠᠢᠴᠢᠨ ᠢᠶᠠᠷ ᠴᠠᠳᠬᠤ ᠪᠣᠯᠣᠨᠠ᠃〉》 ᠡᠵᠡᠨ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃
21 《ᠲᠡᠢᠨ ᠬᠦ ᠪᠢ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠳᠤᠮᠳᠠ ᠰᠦᠷ ᠵᠢᠪᠬᠤᠯᠠᠩ ᠢᠶᠠᠨ ᠢᠯᠡᠷᠡᠭᠦᠯᠵᠦ᠂ ᠪᠦᠬᠦ ᠦᠨᠳᠦᠰᠦᠲᠡᠨ ᠮᠢᠨᠦ ᠭᠦᠢᠴᠡᠯᠳᠦᠭᠦᠯᠦᠭᠰᠡᠨ ᠰᠢᠳᠬᠡᠯ ᠪᠣᠯᠣᠨ ᠲᠡᠳᠡᠨ ᠦ ᠳᠡᠭᠡᠷᠡ ᠲᠠᠯᠪᠢᠭᠰᠠᠨ ᠮᠢᠨᠦ ᠭᠠᠷ ᠢ ᠬᠠᠷᠠᠬᠤ ᠪᠣᠯᠣᠨᠠ᠃ 22 ᠲᠡᠷᠡ ᠡᠳᠦᠷ ᠡᠴᠡ ᠬᠣᠢᠰᠢ ᠢᠰᠷᠧᠯ ᠤᠨ ᠭᠡᠷ ᠦᠨ ᠬᠢᠨ ᠥᠪᠡᠷᠰᠡᠳ ᠦᠨ ᠬᠢᠨᠢ ᠪᠤᠷᠬᠠᠨ ᠪᠣᠯ ᠶᠣᠬᠣᠸᠠ ᠪᠢ ᠭᠡᠳᠡᠭ ᠢ ᠮᠡᠳᠡᠬᠦ ᠪᠥᠭᠡᠳ 23 ᠢᠰᠷᠧᠯ ᠤᠨ ᠭᠡᠷ ᠦᠨ ᠬᠢᠨ ᠥᠪᠡᠷᠰᠡᠳ ᠦᠨ ᠢᠶᠠᠨ ᠨᠢᠭᠦᠯ ᠡᠴᠡ ᠪᠣᠯᠵᠤ ᠴᠥᠯᠡᠭᠳᠡᠭᠰᠡᠨ ᠢ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠮᠡᠳᠡᠬᠦ ᠪᠣᠯᠣᠨᠠ᠃ ᠲᠡᠳᠡ ᠨᠠᠳᠠ ᠠᠴᠠ ᠤᠷᠪᠠᠭᠰᠠᠨ ᠤᠴᠢᠷ ᠠᠴᠠ ᠪᠢ ᠲᠡᠳᠡᠨ ᠡᠴᠡ ᠨᠢᠭᠤᠷ ᠢᠶᠠᠨ ᠨᠢᠭᠤᠨ᠂ ᠲᠡᠳᠡᠨ ᠢ ᠳᠠᠢᠰᠤᠨ ᠨᠤᠭᠤᠳ ᠤᠨ ᠬᠢᠨᠢ ᠭᠠᠷ ᠲᠤ ᠥᠭᠴᠦ᠂ ᠲᠡᠳᠡ ᠪᠦᠭᠦᠳᠡ ᠢᠯᠳᠦᠨ ᠳᠦ ᠤᠨᠠᠭᠰᠠᠨ ᠪᠢᠯᠡ᠃ 24 ᠪᠢ ᠲᠡᠳᠡᠨ ᠳᠦ ᠪᠤᠵᠠᠷ ᠤᠨ ᠬᠢᠨᠢ ᠳᠠᠭᠠᠤ᠂ ᠨᠢᠭᠦᠯ ᠦᠨ ᠬᠢᠨᠢ ᠳᠠᠭᠠᠤ ᠬᠠᠷᠢᠭᠤᠯᠤᠨ᠂ ᠨᠢᠭᠤᠷ ᠢᠶᠠᠨ ᠲᠡᠳᠡᠨ ᠡᠴᠡ ᠨᠢᠭᠤᠭᠰᠠᠨ᠃》
25 ᠲᠡᠢᠮᠦ ᠡᠴᠡ ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠡᠳᠦᠭᠡ ᠪᠢ ᠶᠠᠺᠣᠪ ᠤᠨ ᠴᠥᠯᠡᠭᠳᠡᠭᠰᠡᠳ ᠢ ᠪᠤᠴᠠᠭᠠᠵᠤ᠂ ᠢᠰᠷᠧᠯ ᠤᠨ ᠬᠠᠮᠤᠭ ᠭᠡᠷ ᠦᠨ ᠬᠢᠨ ᠢ ᠥᠷᠥᠪᠳᠥᠨ᠂ ᠠᠷᠢᠭᠤᠨ ᠨᠡᠷᠡ ᠶᠢᠨ ᠢᠶᠠᠨ ᠲᠥᠯᠥᠭᠡ ᠬᠠᠷᠠᠳᠠᠬᠤ ᠪᠣᠯᠣᠨᠠ᠃ 26 ᠲᠡᠳᠡ ᠨᠤᠲᠤᠭ ᠲᠠᠭᠠᠨ ᠠᠶᠤᠯᠭᠠᠬᠤ ᠬᠥᠮᠦᠨ ᠦᠭᠡᠢ ᠲᠠᠢᠪᠤᠩ ᠠᠮᠢᠳᠤᠷᠠᠵᠤ ᠪᠠᠢᠬᠤ ᠳᠠᠭᠠᠨ ᠮᠢᠨᠦ ᠡᠰᠡᠷᠭᠦ ᠦᠢᠯᠡᠳᠦᠭᠰᠡᠨ ᠬᠠᠮᠤᠭ ᠭᠡᠮ ᠦᠨ ᠢᠶᠠᠨ ᠢᠴᠢᠭᠦᠷᠢ ᠶᠢ ᠮᠠᠷᠲᠠᠨᠠ᠃ 27 ᠪᠢ ᠲᠡᠳᠡᠨ ᠢ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠳᠤᠮᠳᠠ ᠠᠴᠠ ᠪᠤᠴᠠᠭᠠᠨ᠂ ᠳᠠᠢᠰᠤᠨ ᠨᠤᠭᠤᠳ ᠤᠨ ᠬᠢᠨᠢ ᠨᠤᠲᠤᠭ ᠠᠴᠠ ᠴᠤᠭᠯᠠᠭᠤᠯᠵᠤ᠂ ᠲᠡᠳᠡᠨ ᠢᠶᠡᠷ ᠳᠠᠮᠵᠢᠭᠤᠯᠤᠨ ᠣᠯᠠᠨ ᠦᠨᠳᠦᠰᠦᠲᠡᠨ ᠦ ᠨᠢᠳᠦᠨ ᠡᠮᠦᠨᠡ ᠠᠷᠢᠭᠤᠨ ᠪᠠᠢᠳᠠᠯ ᠢᠶᠠᠨ ᠢᠯᠡᠷᠡᠭᠦᠯᠬᠦ ᠳᠦ᠂ 28 ᠲᠡᠳᠡ ᠨᠠᠮᠠᠶᠢ ᠥᠪᠡᠷᠰᠡᠳ ᠦᠨ ᠬᠢᠨᠢ ᠪᠤᠷᠬᠠᠨ ᠶᠣᠬᠣᠸᠠ ᠭᠡᠳᠡᠭ ᠢ ᠮᠡᠳᠡᠬᠦ ᠪᠣᠯᠣᠨᠠ᠃ ᠪᠢ ᠲᠡᠳᠡᠨ ᠢ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠳᠤᠮᠳᠠ ᠴᠥᠯᠡᠭᠰᠡᠨ ᠪᠣᠯᠪᠠᠴᠤ ᠲᠡᠨᠳᠡ ᠨᠢᠭᠡ ᠶᠢ ᠨᠢ ᠴᠤ ᠦᠯᠡᠳᠡᠭᠡᠯ ᠦᠭᠡᠢ ᠥᠪᠡᠷᠰᠡᠳ ᠦᠨ ᠬᠢᠨᠢ ᠨᠤᠲᠤᠭ ᠤᠷᠤᠭᠤ ᠴᠤᠭᠯᠠᠭᠤᠯᠤᠭᠰᠠᠨ᠃ 29 ᠪᠢ ᠢᠰᠷᠧᠯ ᠤᠨ ᠭᠡᠷ ᠳᠡᠭᠡᠷᠡ ᠰᠦᠨᠡᠰᠦ ᠪᠡᠨ ᠴᠢᠳᠬᠤᠭᠰᠠᠨ᠂ ᠪᠢ ᠳᠠᠬᠢᠨ ᠨᠢᠭᠤᠷ ᠢᠶᠠᠨ ᠲᠡᠳᠡᠨ ᠡᠴᠡ ᠨᠢᠭᠤᠬᠤ ᠦᠭᠡᠢ᠃》 ᠡᠵᠡᠨ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃