ᠷᠣᠮᠠ ᠨᠢᠭᠡ
ᠪᠤᠷᠬᠠᠨ ᠤ ᠪᠠᠶᠠᠷ ᠤᠨ ᠮᠡᠳᠡᠭᠡ
1 ᠾᠷᠢᠰᠲ᠋ᠣᠰ ᠢᠰᠦ᠋ᠰ ᠤᠨ ᠵᠠᠷᠤᠴᠠ ᠫᠠᠦ᠋ᠯ ᠪᠢ ᠰᠢᠳᠠᠷ ᠱᠠᠪᠢ ᠪᠠᠷ ᠳᠠᠭᠤᠳᠠᠭᠳᠠᠨ᠂ ᠪᠤᠷᠬᠠᠨ ᠤ ᠪᠠᠶᠠᠷ ᠤᠨ ᠮᠡᠳᠡᠭᠡᠨ ᠦ ᠲᠥᠯᠥᠭᠡ ᠲᠣᠮᠢᠯᠠᠭᠳᠠᠭᠰᠠᠨ᠃ 2 ᠪᠤᠷᠬᠠᠨ ᠤ ᠬᠦᠦ ᠶᠢᠨ ᠲᠤᠬᠠᠢ ᠡᠨᠡ ᠪᠠᠶᠠᠷ ᠤᠨ ᠮᠡᠳᠡᠭᠡ ᠶᠢ ᠪᠤᠷᠬᠠᠨ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠢᠶᠠᠷ ᠢᠶᠠᠨ ᠳᠠᠮᠵᠢᠭᠤᠯᠤᠨ ᠠᠷᠢᠭᠤᠨ ᠨᠣᠮ ᠳᠤ ᠠᠮᠠᠯᠠᠭᠰᠠᠨ ᠶᠤᠮ᠃ 3 ᠬᠦᠦ ᠨᠢ ᠮᠢᠬᠠᠨ ᠪᠡᠶᠡᠲᠦ ᠬᠥᠮᠦᠨ ᠦ ᠬᠤᠪᠢ ᠳᠤ᠂ ᠳ᠋ᠠᠸᠢᠳ᠋ ᠤᠨ ᠦᠷᠡ ᠡᠴᠡ ᠲᠥᠷᠥᠭᠰᠡᠨ ᠪᠥᠭᠡᠳ 4 ᠠᠷᠢᠭᠤᠨ ᠰᠦᠨᠡᠰᠦᠨ ᠦ ᠬᠤᠪᠢ ᠳᠤ᠂ ᠦᠬᠦᠭᠰᠡᠳ ᠦᠨ ᠳᠤᠮᠳᠠ ᠠᠴᠠ ᠠᠮᠢᠯᠠᠭᠰᠠᠨ ᠢᠶᠠᠷ ᠢᠶᠠᠨ ᠬᠦᠴᠦ ᠴᠢᠳᠠᠯᠲᠤ ᠪᠤᠷᠬᠠᠨ ᠤ ᠬᠦᠦ ᠭᠡᠵᠦ ᠲᠤᠩ᠋ᠬᠠᠭᠯᠠᠭᠳᠠᠭᠰᠠᠨ ᠪᠢᠳᠡᠨ ᠦ ᠡᠵᠡᠨ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠮᠥᠨ᠃ 5 ᠪᠢᠳᠡ ᠰᠢᠳᠠᠷ ᠱᠠᠪᠢ ᠶᠢᠨ ᠡᠭᠦᠷᠭᠡ ᠶᠢ ᠲᠡᠭᠦᠨ ᠢᠶᠡᠷ ᠳᠠᠮᠵᠢᠨ᠂ ᠢᠪᠡᠭᠡᠯ ᠦᠨ ᠬᠠᠮᠲᠤ ᠬᠦᠯᠢᠶᠡᠨ ᠠᠪᠤᠭᠰᠠᠨ᠃ ᠤᠴᠢᠷ ᠨᠢ ᠲᠡᠭᠦᠨ ᠦ ᠨᠡᠷᠡ ᠶᠢᠨ ᠲᠥᠯᠥᠭᠡ᠂ ᠢᠲᠡᠭᠡᠵᠦ ᠵᠠᠬᠢᠷᠤᠭᠳᠠᠭᠰᠠᠳ ᠦᠨᠳᠦᠰᠦᠲᠡᠨ ᠪᠣᠯᠭᠠᠨ ᠤ ᠳᠤᠮᠳᠠ ᠪᠠᠢᠬᠤ ᠶᠣᠰᠣᠲᠠᠢ᠃ 6 ᠲᠠ ᠨᠠᠷ ᠴᠤ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠤᠨ ᠬᠢ ᠪᠣᠯᠬᠣᠷ ᠳᠠᠭᠤᠳᠠᠭᠳᠠᠭᠰᠠᠨ ᠬᠥᠮᠦᠰ ᠦᠨ ᠳᠤᠮᠳᠠ ᠪᠤᠢ᠃
7 ᠪᠤᠷᠬᠠᠨ ᠤ ᠬᠠᠢᠷᠠᠲᠠᠢ ᠪᠥᠭᠡᠳ ᠠᠷᠢᠭᠤᠨ ᠪᠣᠯᠬᠤ ᠪᠠᠷ ᠳᠠᠭᠤᠳᠠᠭᠳᠠᠭᠰᠠᠨ ᠷᠣᠮᠠ ᠳᠤ ᠪᠠᠢᠭᠠ ᠬᠥᠮᠦᠨ ᠪᠦᠬᠦᠨ ᠳᠦ ᠪᠢᠳᠡᠨ ᠦ ᠡᠴᠢᠭᠡ ᠪᠤᠷᠬᠠᠨ ᠪᠠ ᠡᠵᠡᠨ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠤᠨ ᠢᠪᠡᠭᠡᠯ᠂ ᠠᠮᠤᠭᠤᠯᠠᠩ ᠪᠠᠢᠬᠤ ᠪᠣᠯᠲᠤᠭᠠᠢ᠃
8 ᠶᠠᠭᠤᠨ ᠤ ᠡᠮᠦᠨᠡ᠂ ᠲᠠ ᠪᠦᠭᠦᠳᠡ ᠶᠢᠨ ᠤᠴᠢᠷ ᠲᠤ ᠪᠢ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠢᠶᠠᠷ ᠳᠠᠮᠵᠢᠭᠤᠯᠤᠨ ᠪᠤᠷᠬᠠᠨ ᠳᠠᠭᠠᠨ ᠲᠠᠯᠠᠷᠬᠠᠵᠤ ᠪᠠᠢᠨᠠ᠃ ᠤᠴᠢᠷ ᠨᠢ᠂ ᠲᠠ ᠨᠠᠷ ᠤᠨ ᠢᠲᠡᠭᠡᠯ ᠳᠡᠯᠡᠬᠡᠢ ᠳᠠᠶᠠᠭᠠᠷ ᠳᠠᠭᠤᠷᠢᠰᠴᠤ ᠪᠠᠢᠨᠠ᠃ 9 ᠲᠡᠭᠦᠨ ᠦ ᠬᠦᠦ ᠶᠢᠨ ᠪᠠᠶᠠᠷ ᠤᠨ ᠮᠡᠳᠡᠭᠡ ᠶᠢ ᠳᠡᠯᠭᠡᠷᠡᠭᠦᠯᠦᠨ ᠰᠦᠨᠡᠰᠦ ᠪᠡᠷ ᠢᠶᠠᠨ ᠦᠢᠯᠡᠴᠢᠯᠡᠳᠡᠭ᠌ ᠢ ᠮᠢᠨᠢ ᠪᠤᠷᠬᠠᠨ ᠭᠡᠷᠡᠴᠢᠯᠡᠨᠡ᠂ ᠪᠢ ᠲᠠ ᠨᠠᠷ ᠢ ᠲᠠᠰᠤᠷᠠᠯᠲᠠ ᠦᠭᠡᠢ ᠳᠤᠷᠠᠰᠴᠤ 10 ᠳᠠᠭᠠᠳᠬᠠᠬᠤ ᠳᠠᠭᠠᠨ᠂ ᠬᠡᠷᠪᠡ ᠪᠤᠷᠬᠠᠨ ᠤ ᠲᠠᠭᠠᠯᠠᠯ ᠮᠥᠨ ᠶᠤᠮ ᠪᠣᠯ ᠲᠠ ᠨᠠᠷ ᠲᠤ ᠣᠴᠢᠬᠤ ᠰᠠᠢᠨ ᠵᠠᠮ ᠢ ᠣᠳᠣ ᠶᠠᠭᠠᠬᠢᠭᠰᠠᠨ ᠴᠤ ᠰᠣᠶᠣᠷᠬᠠᠭᠠᠴᠢ ᠬᠡᠮᠡᠨ ᠭᠤᠶᠤᠭᠰᠠᠭᠠᠷ ᠪᠠᠢᠨᠠ᠃ 11 ᠲᠠ ᠨᠠᠷ ᠲᠠᠢ ᠠᠭᠤᠯᠵᠠᠬᠤ ᠶᠢ ᠶᠡᠬᠡᠳᠡ ᠬᠦᠰᠡᠳᠡᠭ ᠮᠢᠨᠢ ᠵᠠᠷᠢᠮ ᠰᠦᠨᠡᠰᠦᠯᠢᠭ ᠰᠣᠶᠣᠷᠬᠠᠯ ᠢ ᠲᠠ ᠨᠠᠷ ᠲᠠᠢ ᠬᠤᠪᠢᠶᠠᠯᠴᠠᠵᠤ᠂ ᠲᠠ ᠨᠠᠷ ᠢ ᠪᠠᠲᠤᠵᠢᠭᠤᠯᠬᠤ᠂ 12 ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ᠂ ᠪᠢᠳᠡ ᠥᠪᠡᠷ ᠥᠪᠡᠷ ᠦᠨ ᠢᠶᠠᠨ ᠢᠲᠡᠭᠡᠯ ᠢᠶᠡᠷ ᠬᠠᠮᠲᠤ ᠳᠠᠭᠠᠨ ᠵᠣᠷᠢᠭᠵᠢᠬᠤ ᠶᠢᠨ ᠲᠥᠯᠥᠭᠡ ᠶᠤᠮ᠃ 13 ᠠᠬᠠ ᠳᠡᠭᠦᠦ ᠨᠠᠷ ᠡ᠂ ᠪᠤᠰᠤᠳ ᠬᠠᠷᠢᠴᠤᠳ ᠤᠨ ᠳᠤᠮᠳᠠ ᠠᠴᠠ ᠣᠯᠣᠭᠰᠠᠨ ᠲᠠᠢ ᠠᠳᠠᠯᠢ ᠵᠠᠷᠢᠮ ᠦᠷᠡ ᠳ᠋ᠦᠩ ᠢ ᠲᠠ ᠨᠠᠷ ᠤᠨ ᠳᠤᠮᠳᠠ ᠠᠴᠠ ᠣᠯᠬᠤ ᠪᠠᠷ ᠲᠠ ᠨᠠᠷ ᠤᠷᠤᠭᠤ ᠣᠴᠢᠬᠤ ᠶᠢ ᠪᠢ ᠣᠯᠠᠨᠲᠠ ᠵᠣᠷᠢᠭᠰᠠᠨ ᠪᠣᠯᠪᠠᠴᠤ ᠣᠳᠣ ᠬᠦᠷᠲᠡᠯᠡ ᠰᠠᠭᠠᠳ ᠲᠣᠳᠬᠠᠷ ᠲᠠᠢ ᠪᠠᠢᠭᠰᠠᠭᠠᠷ᠃ ᠡᠭᠦᠨ ᠢ ᠮᠡᠳᠡᠬᠦ ᠦᠭᠡᠢ ᠪᠠᠢᠬᠤ ᠶᠢ ᠴᠢᠨᠢ ᠪᠢ ᠬᠦᠰᠡᠬᠦ ᠦᠭᠡᠢ ᠪᠠᠢᠨᠠ᠃ 14 ᠭᠷᠧᠭᠴᠦᠳ ᠪᠠ ᠪᠤᠰᠤᠳ ᠦᠨᠳᠦᠰᠦᠲᠡᠨ᠂ ᠮᠡᠷᠭᠡᠨ ᠪᠠ ᠮᠤᠩ᠋ᠬᠠᠭ ᠬᠥᠮᠦᠰ ᠦᠨ ᠬᠡᠨ ᠳᠦᠨᠢ ᠴᠤ ᠪᠢ ᠥᠷᠢ ᠲᠠᠢ᠃ 15 ᠲᠡᠢᠮᠦ ᠡᠴᠡ ᠷᠣᠮᠠ ᠳᠤ ᠪᠠᠢᠭᠠ ᠲᠠ ᠨᠠᠷ ᠲᠤ ᠴᠤ ᠪᠠᠶᠠᠷ ᠤᠨ ᠮᠡᠳᠡᠭᠡ ᠤᠯᠠᠮᠵᠢᠯᠠᠬᠤ ᠶᠢ ᠪᠢ ᠶᠡᠬᠡᠳᠡ ᠬᠦᠰᠡᠵᠦ ᠪᠠᠢᠨᠠ᠃
16 ᠪᠢ ᠪᠠᠶᠠᠷ ᠤᠨ ᠮᠡᠳᠡᠭᠡ ᠡᠴᠡ ᠢᠴᠢᠬᠦ ᠦᠭᠡᠢ ᠪᠠᠢᠳᠠᠭ᠃ ᠲᠡᠷᠡ ᠨᠢ ᠡᠬᠢᠯᠡᠭᠡᠳ ᠶᠦᠳᠠᠢᠴᠤᠳ᠂ ᠳᠠᠷᠠᠭᠠ ᠨᠢ ᠭᠷᠧᠭᠴᠦᠳ᠂ ᠢᠲᠡᠭᠡᠭᠴᠢ ᠪᠦᠬᠦᠨ ᠢ ᠠᠪᠤᠷᠠᠬᠤ ᠪᠤᠷᠬᠠᠨ ᠤ ᠬᠦᠴᠦ ᠮᠥᠨ᠃ 17 《ᠵᠥᠪᠲᠦ ᠬᠥᠮᠦᠨ ᠢᠲᠡᠭᠡᠯ ᠢᠶᠡᠷ ᠠᠮᠢᠳᠤᠷᠠᠨᠠ》 ᠭᠡᠵᠦ ᠪᠢᠴᠢᠭᠳᠡᠭᠰᠡᠨ ᠲᠡᠢ ᠠᠳᠠᠯᠢ ᠪᠠᠷ᠂ ᠵᠥᠪᠲᠦ ᠪᠠᠢᠳᠠᠯ ᠢ ᠡᠬᠢᠨ ᠡᠴᠡ ᠨᠢ ᠳᠠᠭᠤᠰᠲᠠᠯᠠ ᠪᠤᠷᠬᠠᠨ ᠠᠴᠠ ᠢᠲᠡᠭᠡᠯ ᠢᠶᠡᠷ ᠬᠦᠷᠲᠡᠳᠡᠭ ᠭᠡᠳᠡᠭ ᠨᠢ ᠪᠠᠶᠠᠷ ᠤᠨ ᠮᠡᠳᠡᠭᠡᠨ ᠦ ᠳᠣᠲᠣᠷᠠ ᠢᠯᠡᠷᠬᠡᠶᠢᠯᠡᠭᠳᠡᠭᠰᠡᠨ ᠪᠠᠢᠳᠠᠭ᠃
ᠪᠤᠷᠬᠠᠨ ᠤ ᠠᠭᠤᠷ ᠬᠢᠯᠢᠩ
18 ᠵᠥᠪᠲᠦ ᠪᠤᠰᠤ ᠪᠠᠷ ᠦᠨᠡᠨ ᠢ ᠬᠣᠷᠢᠭᠯᠠᠳᠠᠭ ᠬᠥᠮᠦᠰ ᠦᠨ ᠪᠤᠷᠬᠠᠨ ᠠᠴᠠ ᠦᠯᠦ ᠡᠮᠢᠶᠡᠬᠦ ᠪᠠ ᠵᠥᠪᠲᠦ ᠪᠤᠰᠤ ᠬᠠᠮᠤᠭ ᠶᠠᠪᠤᠳᠠᠯ ᠳᠡᠭᠡᠷᠡ ᠲᠩᠷᠢ ᠡᠴᠡ ᠪᠤᠷᠬᠠᠨ ᠤ ᠠᠭᠤᠷ ᠬᠢᠯᠢᠩ ᠢᠯᠡᠷᠡᠳᠡᠭ᠃ 19 ᠤᠴᠢᠷ ᠨᠢ᠂ ᠪᠤᠷᠬᠠᠨ ᠤ ᠲᠤᠬᠠᠢ ᠮᠡᠳᠡᠬᠦ ᠵᠦᠢᠯ ᠲᠡᠳᠡᠨ ᠦ ᠳᠣᠲᠣᠷᠠ ᠢᠯᠡ ᠪᠠᠢᠳᠠᠭ᠃ ᠪᠤᠷᠬᠠᠨ ᠡᠭᠦᠨ ᠢ ᠲᠡᠳᠡᠨ ᠳᠦ ᠢᠯᠡᠷᠡᠭᠦᠯᠦᠭᠰᠡᠨ ᠶᠤᠮ᠃ 20 ᠲᠡᠭᠦᠨ ᠦ ᠮᠥᠩᠬᠡ ᠬᠦᠴᠦ ᠪᠠ ᠪᠤᠷᠬᠠᠨᠯᠢᠭ ᠴᠢᠨᠠᠷ ᠨᠢ ᠬᠠᠷᠠᠭᠳᠠᠰᠢ ᠦᠭᠡᠢ ᠪᠣᠯᠪᠠᠴᠤ ᠶᠢᠷᠲᠢᠨᠴᠦ ᠪᠦᠲᠦᠭᠡᠭᠳᠡᠭᠰᠡᠨ ᠡᠴᠡ ᠨᠠᠰᠢ ᠪᠦᠲᠦᠭᠡᠯ ᠤᠳ ᠤᠨ ᠳᠣᠲᠣᠷᠠ ᠣᠢᠯᠠᠭᠠᠮᠵᠢᠲᠠᠢ᠂ ᠲᠣᠳᠣᠷᠬᠠᠢ ᠪᠠᠷ ᠬᠠᠷᠠᠭᠳᠠᠵᠤ ᠪᠠᠢᠳᠠᠭ᠃ ᠡᠢᠮᠦ ᠡᠴᠡ ᠬᠥᠮᠦᠨ ᠳᠦ ᠲᠦᠯᠬᠢᠬᠦ ᠰᠢᠯᠲᠠᠭ ᠭᠡᠵᠦ ᠦᠭᠡᠢ᠃ 21 ᠲᠡᠳᠡ ᠪᠤᠷᠬᠠᠨ ᠢ ᠮᠡᠳᠡᠳᠡᠭ ᠠᠲᠠᠯᠠ ᠲᠡᠭᠦᠨ ᠢ ᠪᠤᠷᠬᠠᠨ ᠬᠡᠮᠡᠨ ᠠᠯᠳᠠᠷᠰᠢᠭᠤᠯᠤᠭᠰᠠᠨ ᠦᠭᠡᠢ᠂ ᠲᠡᠭᠦᠨ ᠳᠦ ᠲᠠᠯᠠᠷᠬᠠᠭᠰᠠᠨ ᠴᠤ ᠦᠭᠡᠢ᠂ ᠬᠠᠷᠢᠨ ᠪᠣᠳᠣᠯ ᠰᠠᠨᠠᠭᠠ ᠨᠢ ᠬᠣᠭᠣᠰᠣᠷᠠᠵᠤ ᠤᠬᠠᠭᠠᠨ ᠦᠭᠡᠢ ᠵᠢᠷᠦᠬᠡ ᠰᠡᠳᠬᠢᠯ ᠨᠢ ᠬᠠᠷᠠᠩ᠋ᠭᠤᠢᠯᠠᠵᠠᠢ᠃ 22 ᠲᠡᠳᠡ ᠥᠪᠡᠷᠰᠡᠳ ᠢ ᠪᠠᠨ ᠮᠡᠷᠭᠡᠨ ᠭᠡᠵᠦ ᠦᠵᠡᠳᠡᠭ ᠠᠲᠠᠯᠠ ᠪᠠᠨ ᠮᠤᠩ᠋ᠬᠠᠷᠠᠵᠤ᠂ 23 ᠦᠯᠦ ᠢᠯᠵᠢᠷᠡᠬᠦ ᠪᠤᠷᠬᠠᠨ ᠤ ᠠᠯᠳᠠᠷ ᠰᠤᠤ ᠶᠢ ᠢᠯᠵᠢᠷᠡᠬᠦ ᠬᠥᠮᠦᠨ᠂ ᠵᠢᠭᠦᠷᠲᠡᠨ᠂ ᠳᠥᠷᠪᠡᠨ ᠬᠥᠯᠲᠡᠨ ᠪᠠ ᠮᠥᠯᠬᠥᠭᠴᠢᠳ ᠤᠨ ᠳᠦᠷᠰᠦ ᠲᠠᠢ ᠰᠢᠲᠦᠭᠡᠨ ᠢᠶᠡᠷ ᠰᠣᠯᠢᠵᠠᠢ᠃
24 ᠲᠡᠢᠮᠦ ᠡᠴᠡ ᠪᠤᠷᠬᠠᠨ ᠲᠡᠳᠡᠨ ᠢ ᠲᠠᠴᠢᠶᠠᠩ᠋ᠭᠤᠢ ᠰᠡᠳᠬᠢᠯ ᠲᠠᠢ ᠪᠠᠷ ᠨᠢ ᠪᠣᠬᠢᠷ ᠪᠠᠢᠳᠠᠯ ᠳᠤ ᠲᠤᠰᠢᠶᠠᠭᠰᠠᠨ ᠠᠴᠠ ᠲᠡᠳᠡ ᠨᠢᠭᠡ ᠨᠢᠭᠡᠨ ᠦ ᠪᠠᠨ ᠪᠡᠶᠡ ᠶᠢ ᠭᠤᠲᠤᠭᠠᠪᠠ᠃ 25 ᠲᠡᠳᠡ ᠪᠤᠷᠬᠠᠨ ᠤ ᠦᠨᠡᠨ ᠢ ᠬᠤᠳᠠᠯ ᠢᠶᠠᠷ ᠰᠣᠯᠢᠵᠤ ᠪᠦᠲᠦᠭᠡᠭᠴᠢ ᠳᠦᠨᠢ ᠪᠢᠰᠢ᠂ ᠪᠦᠲᠦᠭᠡᠯ ᠤᠳ ᠲᠤᠨᠢ ᠮᠥᠷᠭᠥᠵᠦ ᠦᠢᠯᠡᠴᠢᠯᠡᠵᠡᠢ᠃ ᠬᠠᠷᠢᠨ ᠮᠥᠩᠬᠡᠳᠡ ᠮᠠᠭᠲᠠᠭᠳᠠᠭᠤᠰᠢᠲᠠᠢ ᠨᠢ ᠪᠦᠲᠦᠭᠡᠭᠴᠢ ᠪᠢᠯᠡ᠃ ᠠᠮᠧᠨ︕
26 ᠡᠢᠮᠦ ᠤᠴᠢᠷ ᠠᠴᠠ ᠪᠤᠷᠬᠠᠨ ᠲᠡᠳᠡᠨ ᠢ ᠭᠤᠲᠤᠮᠰᠢᠭᠲᠤ ᠲᠠᠴᠢᠶᠠᠯ ᠳᠤᠨᠢ ᠲᠤᠰᠢᠶᠠᠭᠰᠠᠨ ᠠᠴᠠ ᠡᠮᠡᠭᠲᠡᠢᠴᠦᠳ ᠨᠢ ᠵᠦᠢ ᠶᠣᠰᠣᠨ ᠤ ᠬᠠᠷᠢᠴᠠᠭᠠ ᠶᠢ ᠵᠦᠢ ᠪᠤᠰᠤ ᠶᠢᠨ ᠬᠠᠷᠢᠴᠠᠭᠠ ᠪᠠᠷ ᠰᠣᠯᠢᠵᠤ 27 ᠡᠷᠡᠭᠲᠡᠢᠴᠦᠳ ᠨᠢ ᠡᠮᠡᠭᠲᠡᠢᠴᠦᠳ ᠲᠡᠢ ᠵᠦᠢ ᠶᠣᠰᠣᠭᠠᠷ ᠬᠠᠷᠢᠴᠠᠬᠤ ᠪᠠᠨ ᠪᠣᠯᠢᠵᠤ᠂ ᠬᠣᠭᠣᠷᠣᠨᠳᠣ ᠪᠠᠨ ᠲᠠᠴᠢᠶᠠᠯ ᠢᠶᠠᠷ ᠰᠢᠲᠠᠭᠰᠠᠨ ᠪᠥᠭᠡᠳ ᠡᠷᠡᠴᠦᠳ ᠡᠷᠡᠴᠦᠳ ᠲᠡᠢ ᠪᠡᠨ ᠰᠢᠪᠰᠢᠭ ᠲᠠᠷᠢᠭᠠᠳ ᠭᠠᠵᠢᠭᠤᠳᠠᠯ ᠳᠠᠭᠠᠨ ᠲᠣᠬᠢᠷᠠᠬᠤ ᠬᠠᠷᠢᠭᠤ ᠶᠢ ᠪᠡᠶᠡ ᠳᠡᠭᠡᠨ ᠬᠦᠯᠢᠶᠡᠵᠡᠢ᠃
28 ᠲᠡᠳᠡ ᠪᠠᠰᠠ ᠪᠤᠷᠬᠠᠨ ᠢ ᠥᠪᠡᠷᠰᠡᠳ ᠦᠨ ᠤᠬᠠᠭᠠᠨ ᠳᠠᠭᠠᠨ ᠪᠠᠢᠯᠭᠠᠬᠤ ᠶᠢ ᠵᠣᠬᠢᠰ ᠦᠭᠡᠢ ᠭᠡᠵᠦ ᠪᠣᠳᠣᠭᠰᠠᠨ ᠪᠣᠯᠬᠣᠷ ᠪᠤᠷᠬᠠᠨ ᠲᠡᠳᠡᠨ ᠢ ᠥᠪᠡᠷᠰᠡᠳ ᠦᠨ ᠬᠢᠨᠢ ᠵᠣᠬᠢᠰ ᠦᠭᠡᠢ ᠪᠣᠳᠣᠯ ᠳᠤ ᠣᠷᠬᠢᠭᠰᠠᠨ ᠳᠤ᠂ ᠲᠡᠳᠡ ᠬᠢᠵᠦ ᠪᠣᠯᠬᠤ ᠦᠭᠡᠢ ᠶᠢ ᠬᠢᠬᠦ ᠪᠣᠯᠪᠠ᠃ 29 ᠲᠡᠳᠡ ᠶᠠᠩᠵᠤ ᠪᠦᠷᠢ ᠶᠢᠨ ᠵᠥᠪ ᠪᠤᠰᠤ᠂ ᠮᠠᠭᠤ᠂ ᠰᠢᠨᠤᠯ᠂ ᠬᠣᠣᠷᠲᠤ ᠰᠠᠨᠠᠭᠠ ᠪᠠᠷ ᠳᠦᠭᠦᠷᠴᠦ᠂ ᠠᠲᠠᠭᠠ᠂ ᠠᠯᠠᠯᠭᠠ᠂ ᠬᠡᠷᠡᠭᠦᠯ᠂ ᠮᠡᠬᠡᠯᠡᠯ ᠪᠠ ᠬᠣᠣᠷᠲᠤ ᠠᠷᠭᠠ ᠪᠠᠷ ᠳᠦᠭᠦᠷᠡᠩ ᠪᠠᠢᠳᠠᠭ᠃ ᠲᠡᠳᠡ ᠪᠣᠯ ᠬᠣᠪᠴᠢ ᠪᠥᠭᠡᠳ 30 ᠮᠠᠭᠤᠯᠠᠭᠴᠢ᠂ ᠪᠤᠷᠬᠠᠨ ᠢ ᠠᠳᠠ ᠦᠵᠡᠭᠴᠢ᠂ ᠣᠩᠭᠢᠷᠠᠭᠴᠢ᠂ ᠳᠡᠭᠡᠷᠡᠯᠬᠡᠭᠴᠢ᠂ ᠪᠠᠷᠳᠠᠮᠨᠠᠭᠴᠢ᠂ ᠬᠣᠷᠣᠨ ᠮᠠᠭᠤ ᠶᠢ ᠵᠣᠬᠢᠶᠠᠭᠴᠢ᠂ ᠡᠴᠢᠭᠡ ᠡᠬᠡ ᠳᠡᠭᠡᠨ ᠳᠤᠭᠤᠯᠭᠠᠪᠤᠷᠢ ᠦᠭᠡᠢ᠂ 31 ᠤᠬᠠᠪᠤᠷᠢ ᠦᠭᠡᠢ᠂ ᠢᠲᠡᠭᠡᠮᠵᠢ ᠦᠭᠡᠢ᠂ ᠬᠠᠢᠷᠠ ᠦᠭᠡᠢ᠂ ᠥᠷᠥᠰᠢᠶᠡᠯ ᠦᠭᠡᠢ ᠪᠠᠢᠳᠠᠭ᠃ 32 ᠡᠳᠡᠭᠡᠷ ᠢ ᠦᠢᠯᠡᠳᠦᠭᠴᠢ ᠨᠢ ᠦᠬᠦᠬᠦ ᠶᠣᠰᠣᠲᠠᠢ ᠭᠡᠬᠦ ᠪᠤᠷᠬᠠᠨ ᠤ ᠵᠥᠪ ᠲᠣᠭᠲᠠᠭᠠᠯ ᠢ ᠲᠡᠳᠡ ᠮᠡᠳᠡᠳᠡᠭ ᠪᠣᠯᠪᠠᠴᠤ ᠥᠪᠡᠷᠰᠡᠳ ᠢᠶᠡᠨ ᠦᠢᠯᠡᠳᠬᠦ ᠪᠡᠷ ᠪᠠᠷᠠᠬᠤ ᠦᠭᠡᠢ᠂ ᠪᠤᠰᠤᠳ ᠤᠨ ᠦᠢᠯᠡᠳᠬᠦ ᠶᠢ ᠴᠤ ᠰᠠᠢᠰᠢᠶᠠᠳᠠᠭ᠃