ᠶᠣᠶᠧᠯ ᠨᠢᠭᠡ
ᠠᠢᠰᠤᠢ ᠰᠦᠢᠷᠡᠯ
1 ᠫᠧᠲ᠋ᠦ᠋ᠶᠧᠯ ᠤᠨ ᠬᠦᠦ ᠶᠣᠶᠧᠯ ᠳᠤ ᠢᠷᠡᠭᠰᠡᠨ ᠶᠣᠬᠣᠸᠠ ᠶᠢᠨ ᠦᠭᠡ᠄
2 ᠰᠣᠨᠣᠰᠣᠭᠲᠤᠨ᠂ ᠠᠬᠠᠮᠠᠳ ᠤᠳ ᠡ ᠴᠢᠩᠨᠠᠭᠲᠤᠨ᠂ ᠭᠠᠵᠠᠷ ᠤᠨ ᠪᠦᠬᠦ ᠰᠠᠭᠤᠭᠠᠯᠢ ᠡ ᠡᠢᠮᠦ ᠶᠠᠪᠤᠳᠠᠯ ᠲᠠ ᠨᠠᠷ ᠤᠨ ᠦᠶᠡ ᠳᠦ᠂ ᠡᠴᠢᠭᠡ ᠡᠪᠦᠭᠡᠳ ᠦᠨ ᠴᠢᠨᠢ ᠦᠶᠡ ᠳᠦ ᠪᠣᠯᠵᠤ ᠪᠠᠢᠭᠰᠠᠨ ᠤᠤ︖
3 ᠲᠠ ᠨᠠᠷ ᠡᠭᠦᠨ ᠢ ᠬᠡᠦᠬᠡᠳ ᠤᠳ ᠲᠡᠭᠡᠨ ᠶᠠᠷᠢ ᠬᠡᠦᠬᠡᠳ ᠤᠳ ᠴᠢᠨᠢ ᠬᠡᠦᠬᠡᠳ ᠤᠳ ᠲᠡᠭᠡᠨ᠂ ᠬᠡᠦᠬᠡᠳ ᠤᠳ ᠨᠢ ᠳᠠᠷᠠᠭᠠ ᠦᠶᠡ ᠶᠢᠨ ᠬᠢᠨ ᠳᠡᠭᠡᠨ ᠶᠠᠷᠢᠭ᠃
4 ᠰᠦᠷᠦᠭ ᠴᠠᠷᠴᠠᠬᠠᠢ ᠶᠢᠨ ᠦᠯᠡᠳᠡᠭᠡᠭᠰᠡᠨ ᠢ ᠲᠣᠮᠣ ᠴᠠᠷᠴᠠᠬᠠᠢ ᠨᠤᠭᠤᠳ ᠴᠥᠯᠮᠥᠨ ᠲᠣᠮᠣ ᠴᠠᠷᠴᠠᠬᠠᠢ ᠨᠤᠭᠤᠳ ᠤᠨ ᠦᠯᠡᠳᠡᠭᠡᠭᠰᠡᠨ ᠢ ᠵᠢᠵᠢᠭ ᠴᠠᠷᠴᠠᠬᠠᠢ ᠨᠤᠭᠤᠳ ᠴᠥᠯᠮᠥᠵᠦ ᠵᠢᠵᠢᠭ ᠴᠠᠷᠴᠠᠬᠠᠢ ᠨᠤᠭᠤᠳ ᠤᠨ ᠦᠯᠡᠳᠡᠭᠡᠭᠰᠡᠨ ᠢ ᠪᠤᠰᠤᠳ ᠴᠠᠷᠴᠠᠬᠠᠢ ᠨᠤᠭᠤᠳ ᠴᠥᠯᠮᠥᠵᠡᠢ᠃
5 ᠰᠡᠷᠢᠭᠡᠳ᠂ ᠤᠬᠢᠯᠠᠵᠠᠭᠠ᠂ ᠰᠣᠭᠲᠣᠭᠤ ᠬᠥᠮᠦᠰ ᠡ ᠤᠬᠢᠯᠠ᠂ ᠳᠠᠷᠠᠰᠤ ᠤᠤᠭᠤᠭᠴᠢ ᠪᠦᠭᠦᠳᠡ ᠡ ᠤᠴᠢᠷ ᠨᠢ ᠠᠮᠲᠠᠲᠤ ᠳᠠᠷᠠᠰᠤ ᠠᠮᠠᠨ ᠠᠴᠠ ᠴᠢᠨᠢ ᠠᠪᠤᠭᠳᠠᠭᠰᠠᠨ᠂
6 ᠨᠢᠭᠡᠨ ᠦᠨᠳᠦᠰᠦᠲᠡᠨ ᠨᠤᠲᠤᠭ ᠲᠤ ᠮᠢᠨᠢ ᠬᠠᠯᠳᠠᠨ ᠢᠷᠡᠯᠡ ᠲᠡᠷᠡ ᠬᠦᠴᠦᠷᠬᠡᠭ ᠪᠥᠭᠡᠳ ᠲᠣᠭᠠ ᠲᠣᠮᠰᠢ ᠦᠭᠡᠢ ᠰᠢᠳᠦ ᠨᠢ ᠠᠷᠰᠯᠠᠨ ᠤ ᠬᠢ᠂ ᠰᠣᠶᠣᠭᠠ ᠨᠢ ᠡᠮᠡ ᠠᠷᠰᠯᠠᠨ ᠤ ᠬᠢ᠃
7 ᠦᠵᠦᠮ ᠦᠨ ᠮᠣᠳᠣ ᠶᠢ ᠮᠢᠨᠢ ᠲᠡᠳᠡ ᠰᠦᠢᠳᠬᠡᠵᠦ ᠢᠨᠵᠢᠷ ᠤᠨ ᠮᠣᠳᠣ ᠶᠢ ᠮᠢᠨᠢ ᠲᠡᠳᠡ ᠬᠤᠭᠤᠴᠢᠨ ᠬᠠᠯᠢᠰᠤ ᠶᠢ ᠨᠢ ᠬᠠᠭᠤᠯᠵᠤ ᠬᠠᠶᠠᠭᠰᠠᠨ ᠮᠥᠴᠢᠷ ᠤᠳ ᠨᠢ ᠴᠠᠢᠷᠠᠨ ᠦᠯᠡᠳᠡᠵᠡᠢ᠃
8 ᠢᠳᠡᠷ ᠨᠠᠰᠤᠨ ᠤ ᠪᠠᠨ ᠰᠦᠢᠲᠦ ᠵᠠᠯᠠᠭᠤ ᠶᠢᠨ ᠲᠥᠯᠥᠭᠡ ᠣᠩ᠋ᠭᠣᠨ ᠪᠦᠰᠡᠭᠦᠢ ᠲᠠᠭᠠᠷ ᠨᠥᠮᠥᠷᠥᠨ ᠤᠬᠢᠯᠠᠬᠤ ᠶᠢᠨ ᠠᠳᠠᠯᠢ ᠭᠠᠰᠢᠭᠤᠳᠠᠭᠲᠤᠨ᠃
9 ᠢᠳᠡᠭᠡᠨ ᠡᠷᠭᠦᠯ᠂ ᠤᠮᠳᠠᠭᠠᠨ ᠡᠷᠭᠦᠯ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠡᠴᠡ ᠲᠠᠰᠤᠷᠠᠪᠠ ᠶᠣᠬᠣᠸᠠ ᠳᠤ ᠦᠢᠯᠡᠴᠢᠯᠡᠳᠡᠭ᠌ ᠲᠠᠬᠢᠯᠴᠢᠳ ᠭᠠᠰᠢᠭᠤᠳᠠᠪᠠ᠃
10 ᠲᠠᠯᠠᠪᠠᠢ ᠬᠣᠭᠣᠰᠣᠷᠠᠵᠤ ᠭᠠᠵᠠᠷ ᠭᠠᠰᠢᠭᠤᠳᠠᠵᠠᠢ ᠦᠷᠡ ᠲᠠᠷᠢᠶᠠ ᠰᠦᠢᠳᠴᠦ ᠦᠵᠦᠮ ᠦᠨ ᠳᠠᠷᠠᠰᠤ ᠬᠠᠳᠠᠨ ᠲᠣᠰᠣ ᠴᠤ ᠳᠠᠭᠤᠰᠪᠠ᠃
11 ᠢᠴᠢᠭᠲᠦᠨ᠂ ᠲᠠᠷᠢᠶᠠᠴᠢᠳ ᠡ᠂ ᠤᠬᠢᠯᠠᠭᠲᠤᠨ᠂ ᠦᠵᠦᠮᠴᠢᠳ ᠡ ᠲᠠᠯᠠᠪᠠᠢ ᠶᠢᠨ ᠬᠤᠷᠢᠶᠠᠯᠲᠠ ᠲᠠᠰᠤᠷᠠᠵᠤ ᠪᠤᠭᠤᠳᠠᠢ ᠠᠷᠪᠠᠢ ᠴᠤ ᠦᠭᠡᠢ ᠪᠣᠯᠵᠤ
12 ᠦᠵᠦᠮ ᠦᠨ ᠮᠣᠳᠣ ᠭᠠᠩᠳᠠᠵᠤ᠂ ᠢᠨᠵᠢᠷ ᠤᠨ ᠮᠣᠳᠣ ᠬᠠᠳᠠᠪᠠ ᠠᠨᠠᠷ᠂ ᠳᠠᠯᠳᠠᠤ᠂ ᠠᠯᠢᠮᠠ ᠶᠢᠨ ᠮᠣᠳᠣ᠂ ᠲᠠᠯᠠᠪᠠᠢ ᠶᠢᠨ ᠪᠦᠬᠦ ᠮᠣᠳᠣ ᠬᠠᠭᠰᠠᠪᠠ ᠬᠥᠮᠦᠨ ᠦ ᠬᠡᠦᠬᠡᠳ ᠤᠳ ᠤᠨ ᠪᠠᠶᠠᠷ ᠬᠥᠷ ᠨᠢ ᠬᠠᠲᠠᠪᠠ᠃
ᠭᠡᠮᠰᠢᠭᠦᠯᠬᠦ ᠪᠡᠷ ᠤᠷᠢᠶᠠᠯᠠᠪᠠ
13 ᠲᠠᠬᠢᠯᠴᠢᠳ ᠡ᠂ ᠲᠠᠭᠠᠷ ᠨᠥᠮᠥᠷᠴᠦ᠂ ᠭᠠᠰᠢᠭᠤᠳᠠ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠦ ᠦᠢᠯᠡᠴᠢᠯᠡᠭᠴᠢᠳ ᠡ᠂ ᠤᠬᠢᠯᠠᠵᠠᠭᠠ ᠪᠤᠷᠬᠠᠨ ᠳᠤ ᠮᠢᠨᠢ ᠦᠢᠯᠡᠴᠢᠯᠡᠭᠴᠢᠳ ᠡ᠂ ᠲᠠᠭᠠᠷ ᠲᠠᠢ ᠪᠠᠷ ᠰᠥᠨᠢ ᠶᠢ ᠥᠩᠭᠡᠷᠡᠭᠦᠯ ᠪᠤᠷᠬᠠᠨ ᠤ ᠴᠢᠨᠢ ᠥᠷᠭᠥᠭᠡᠨ ᠡᠴᠡ ᠢᠳᠡᠭᠡᠨ ᠡᠷᠭᠦᠯ᠂ ᠤᠮᠳᠠᠭᠠᠨ ᠡᠷᠭᠦᠯ ᠲᠠᠰᠤᠷᠠᠵᠠᠢ᠃
14 ᠪᠠᠴᠠᠭ ᠪᠠᠷᠢᠬᠤ ᠡᠳᠦᠷ ᠢᠶᠡᠨ ᠲᠤᠰᠠᠭᠠᠷᠯᠠ ᠠᠷᠢᠭᠤᠨ ᠴᠢᠭᠤᠯᠭᠠᠨ ᠢᠶᠠᠨ ᠳᠠᠭᠤᠳᠠᠨ ᠠᠬᠠᠮᠠᠳ ᠪᠠ ᠨᠤᠲᠤᠭ ᠤᠨ ᠰᠠᠭᠤᠭᠠᠯᠢᠴᠢᠳ ᠪᠦᠭᠦᠳᠡ ᠶᠢ ᠶᠣᠬᠣᠸᠠ ᠪᠤᠷᠬᠠᠨ ᠤ ᠪᠠᠨ ᠥᠷᠭᠥᠭᠡᠨ ᠳᠦ ᠴᠤᠭᠯᠠᠭᠤᠯᠵᠤ ᠶᠣᠬᠣᠸᠠ ᠤᠷᠤᠭᠤ ᠬᠠᠰᠬᠢᠷᠴᠠᠭᠠ᠃
15 ᠲᠡᠷᠡ ᠡᠳᠦᠷ ᠭᠠᠰᠠᠯᠠᠩᠲᠠᠶᠠ︕ ᠶᠣᠬᠣᠸᠠ ᠶᠢᠨ ᠡᠳᠦᠷ ᠣᠢᠷᠠᠬᠠᠨ ᠪᠠᠢᠨᠠ ᠲᠡᠭᠦᠰ ᠬᠦᠴᠦᠲᠦ ᠨᠢᠭᠡᠨ ᠡᠴᠡ ᠰᠦᠢᠷᠡᠯ ᠢᠷᠡᠨᠡ
16 ᠨᠢᠳᠦᠨ ᠦ ᠮᠢᠨᠢ ᠡᠮᠦᠨᠡ ᠡᠴᠡ ᠬᠣᠭᠣᠯᠠ ᠬᠦᠨᠡᠰᠦ ᠪᠤᠷᠬᠠᠨ ᠤ ᠮᠢᠨᠢ ᠥᠷᠭᠥᠭᠡᠨ ᠡᠴᠡ ᠪᠠᠶᠠᠷ ᠬᠥᠷ ᠲᠠᠰᠤᠷᠠᠭᠰᠠᠨ ᠪᠢᠰᠢ ᠤᠤ︖
17 ᠦᠷᠡ ᠬᠥᠷᠥᠰᠥᠨ ᠳᠣᠣᠷᠠ ᠪᠠᠨ ᠬᠣᠷᠪᠣᠢᠵᠤ᠂ ᠬᠥᠮᠥᠷᠭᠡ ᠬᠣᠭᠣᠰᠣᠷᠠᠪᠠ᠃ ᠵᠣᠭᠣᠷᠢ ᠨᠤᠷᠠᠵᠤ᠂ ᠲᠠᠷᠢᠶᠠ ᠬᠠᠳᠠᠪᠠ᠃
18 ᠮᠠᠯ ᠠᠮᠢᠲᠠᠳ ᠬᠡᠴᠢᠨᠡᠨ ᠶᠡᠬᠡ ᠶᠣᠣᠯᠠᠵᠤ ᠪᠠᠢᠨᠠ︕ ᠪᠡᠯᠴᠢᠭᠡᠷ ᠦᠭᠡᠢ ᠪᠣᠯᠣᠭᠠᠳ ᠦᠬᠡᠷ ᠦᠨ ᠰᠦᠷᠦᠭ ᠲᠡᠨᠦᠵᠦ ᠬᠣᠨᠢᠨ ᠰᠦᠷᠦᠭ ᠲᠤᠢᠯᠳᠠᠵᠤ ᠪᠠᠢᠨᠠ᠃
19 ᠶᠣᠬᠣᠸᠠ ᠡ᠂ ᠪᠢ ᠲᠠᠨ ᠤᠷᠤᠭᠤ ᠬᠠᠰᠬᠢᠷᠤᠨᠠ ᠡᠪᠡᠰᠦ ᠪᠡᠯᠴᠢᠭᠡᠷ ᠢ ᠭᠠᠯ ᠵᠠᠯᠭᠢᠵᠤ ᠲᠠᠯᠠ ᠭᠠᠵᠠᠷ ᠤᠨ ᠪᠦᠬᠦ ᠮᠣᠳᠣ ᠶᠢ ᠳᠥᠯᠥ ᠰᠢᠲᠠᠭᠠᠪᠠ
20 ᠬᠡᠭᠡᠷᠡ ᠶᠢᠨ ᠠᠮᠢᠲᠠᠳ ᠴᠤ ᠲᠠᠨ ᠤᠷᠤᠭᠤ ᠲᠡᠮᠡᠦᠯᠦᠨᠡ ᠤᠰᠤᠨ ᠤ ᠤᠷᠤᠰᠬᠠᠯ ᠲᠠᠲᠠᠷᠠᠵᠤ᠂ ᠡᠪᠡᠰᠦ ᠪᠡᠯᠴᠢᠭᠡᠷ ᠭᠠᠯ ᠳᠤ ᠵᠠᠯᠭᠢᠭᠳᠠᠯᠠ᠃