ᠢᠰᠠᠢᠶᠠ ᠨᠢᠭᠡ
1 ᠶᠦᠳᠠ ᠶᠢᠨ ᠬᠠᠭᠠᠳ ᠦᠽᠢᠶᠠ᠂ ᠶᠣᠲ᠋ᠠᠮ᠂ ᠠᠬᠠᠽ᠂ ᠾᠧᠽᠧᠺᠢᠶᠠ ᠶᠢᠨ ᠡᠳᠦᠷ ᠤᠳ ᠲᠤ᠂ ᠶᠦᠳᠠ ᠪᠣᠯᠣᠨ ᠶᠧᠷᠦ᠋ᠰᠠᠯᠧᠮ ᠤᠨ ᠲᠤᠬᠠᠢ ᠠᠮᠣᠽ ᠤᠨ ᠬᠦᠦ ᠢᠰᠠᠢᠶᠠ ᠶᠢᠨ ᠦᠵᠡᠭᠰᠡᠨ ᠦᠵᠡᠭᠳᠡᠯ᠄
ᠰᠢᠳᠬᠡᠯ ᠦᠨ ᠲᠤᠩ᠋ᠬᠠᠭᠯᠠᠯ
2 ᠰᠣᠨᠣᠰᠣᠭᠲᠤᠨ᠂ ᠲᠩᠷᠢ ᠡ ᠴᠢᠩᠨᠠᠭᠲᠤᠨ᠂ ᠭᠠᠵᠠᠷ ᠡ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠬᠥᠮᠦᠵᠢᠭᠦᠯᠵᠦ ᠥᠰᠭᠡᠭᠰᠡᠨ ᠦᠷᠡ ᠬᠡᠦᠬᠡᠳ ᠤᠳ ᠮᠢᠨᠢ ᠨᠠᠳᠠ ᠠᠴᠠ ᠤᠷᠪᠠᠯᠠ
3 ᠦᠬᠡᠷ ᠡᠵᠡᠨ ᠢᠶᠡᠨ ᠲᠠᠨᠢᠳᠠᠭ ᠡᠯᠵᠢᠭᠡ ᠴᠤ ᠡᠵᠡᠨ ᠦ ᠪᠠᠨ ᠥᠭᠭᠥᠭᠰᠡᠨ ᠲᠡᠪᠰᠢ ᠶᠢ ᠲᠠᠨᠢᠳᠠᠭ ᠬᠠᠷᠢᠨ ᠢᠰᠷᠧᠯ ᠲᠠᠨᠢᠳᠠᠭ ᠦᠭᠡᠢ ᠮᠢᠨᠦ ᠠᠷᠠᠳ ᠲᠦᠮᠡᠨ ᠤᠬᠠᠭᠠᠷᠠᠳᠠᠭ ᠦᠭᠡᠢ᠃
4 ᠭᠠᠰᠠᠯᠠᠩᠲᠠᠶᠠ᠂ ᠨᠢᠭᠦᠯᠲᠦ ᠦᠨᠳᠦᠰᠦᠲᠡᠨ ᠭᠡᠮ ᠳᠦ ᠳᠠᠷᠤᠭᠳᠠᠭᠰᠠᠨ ᠠᠷᠠᠳ ᠲᠦᠮᠡᠨ ᠬᠣᠣᠷᠲᠤ ᠦᠷᠡᠰ ᠳᠣᠷᠣᠢᠲᠠᠭᠰᠠᠨ ᠬᠡᠦᠬᠡᠳ ᠤᠳ ᠲᠡᠳᠡ ᠶᠣᠬᠣᠸᠠ ᠶᠢ ᠣᠷᠬᠢᠯᠠ ᠲᠡᠳᠡ ᠢᠰᠷᠧᠯ ᠤᠨ ᠠᠷᠢᠭᠤᠨ ᠨᠢᠭᠡᠨ ᠢ ᠣᠭᠣᠷᠴᠤ ᠲᠡᠭᠦᠨ ᠡᠴᠡ ᠬᠥᠨᠳᠡᠢᠷᠡᠵᠦ ᠤᠬᠤᠷᠢᠯᠠ᠃
5 ᠲᠠ ᠨᠠᠷ ᠲᠠᠰᠢᠭᠤᠷᠳᠠᠭᠤᠯᠬᠤ ᠭᠡᠳ ᠪᠠᠢᠨᠠ ᠤᠤ︖ ᠶᠠᠭᠠᠬᠢᠭᠠᠳ ᠲᠡᠷᠰᠯᠡᠭᠡᠳ ᠪᠠᠢᠨᠠ︖ ᠪᠦᠲᠦᠨ ᠲᠣᠯᠣᠭᠠᠢ ᠴᠢᠨᠢ ᠭᠡᠮᠲᠦᠵᠦ ᠪᠦᠬᠦ ᠵᠢᠷᠦᠬᠡ ᠴᠢᠨᠢ ᠮᠠᠭᠤᠵᠢᠷᠠᠵᠠᠢ᠃
6 ᠬᠥᠯ ᠦᠨ ᠴᠢᠨᠢ ᠤᠯᠠ ᠠᠴᠠ ᠲᠣᠯᠣᠭᠠᠢ ᠳᠤ ᠴᠢᠨᠢ ᠬᠦᠷᠲᠡᠯᠡ ᠡᠷᠡᠭᠦᠯ ᠭᠠᠵᠠᠷ ᠠᠯᠠᠭᠠ᠂ ᠰᠢᠬᠠᠭᠠ ᠦᠭᠡᠢ᠂ ᠪᠣᠭᠣᠭᠠ ᠦᠭᠡᠢ᠂ ᠲᠣᠰᠣ ᠲᠦᠷᠬᠢᠭᠡ ᠴᠤ ᠦᠭᠡᠢ᠂ ᠰᠢᠷᠬᠠ ᠰᠣᠷᠪᠢ᠂ ᠰᠢᠯᠪᠤᠷᠬᠠᠢ ᠪᠠᠢᠨᠠ᠃
7 ᠭᠠᠵᠠᠷ ᠨᠤᠲᠤᠭ ᠴᠢᠨᠢ ᠬᠣᠭᠣᠰᠣᠷᠠᠵᠤ ᠬᠣᠲᠠ ᠨᠤᠭᠤᠳ ᠴᠢᠨᠢ ᠭᠠᠯ ᠳᠤ ᠰᠢᠲᠠᠵᠠᠢ ᠲᠠ ᠨᠠᠷ ᠤᠨ ᠲᠠᠷᠢᠶᠠᠨ ᠭᠠᠵᠠᠷ ᠢ ᠬᠠᠷᠢᠴᠤᠳ ᠨᠢᠭᠤᠷ ᠳᠡᠭᠡᠷᠡ ᠴᠢᠨᠢ ᠵᠠᠯᠭᠢᠵᠤ ᠪᠠᠢᠨᠠ ᠲᠡᠢᠨ ᠬᠦ ᠬᠠᠷᠢᠴᠤᠳ ᠨᠤᠷᠠᠭᠠᠭᠰᠠᠨ ᠢᠶᠠᠷ ᠲᠡᠷᠡ ᠨᠢ ᠰᠦᠢᠷᠡᠵᠡᠢ᠃
8 ᠽᠢᠶᠣᠨ ᠥᠬᠢᠨ ᠨᠢ ᠦᠵᠦᠮ ᠦᠨ ᠲᠠᠯᠠᠪᠠᠢ ᠳᠠᠬᠢ ᠣᠷᠣᠮᠵᠢ ᠥᠷᠭᠡᠰᠦᠲᠦ ᠬᠡᠮᠬᠡ ᠶᠢᠨ ᠲᠠᠯᠠᠪᠠᠢ ᠳᠠᠬᠢ ᠣᠪᠣᠬᠠᠢ ᠪᠤᠶᠤ ᠪᠦᠰᠡᠯᠡᠭᠳᠡᠭᠰᠡᠨ ᠬᠣᠲᠠ ᠮᠡᠲᠦ ᠦᠯᠡᠳᠡᠵᠡᠢ᠃
9 ᠬᠡᠷᠪᠡ ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠪᠢᠳᠡᠨ ᠦ ᠴᠥᠭᠡᠬᠦᠯᠡ ᠶᠢ ᠴᠤ ᠦᠯᠡᠳᠡᠭᠡᠭᠰᠡᠨ ᠦᠭᠡᠢ ᠪᠣᠯ ᠪᠢᠳᠡ ᠰᠣᠳᠣᠮ ᠮᠡᠲᠦ ᠭᠣᠮᠣᠷᠠ ᠰᠢᠭ᠋ ᠪᠣᠯᠬᠤ ᠪᠠᠢᠭᠰᠠᠨ᠃
10 ᠶᠣᠬᠣᠸᠠ ᠶᠢᠨ ᠦᠭᠡ ᠶᠢ ᠰᠣᠨᠣᠰᠣᠭᠲᠤᠨ ᠰᠣᠳᠣᠮ ᠤᠨ ᠵᠠᠬᠢᠷᠤᠭᠴᠢᠳ ᠡ︕ ᠪᠢᠳᠡᠨ ᠦ ᠪᠤᠷᠬᠠᠨ ᠤ ᠵᠢᠭᠠᠪᠤᠷᠢ ᠶᠢ ᠴᠢᠩᠨᠠᠭᠲᠤᠨ ᠭᠣᠮᠣᠷᠠ ᠶᠢᠨ ᠠᠷᠠᠳ ᠲᠦᠮᠡᠨ ᠡ︕
11 ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠣᠯᠠᠨ ᠲᠠᠬᠢᠯ ᠴᠢᠨᠢ ᠨᠠᠳᠠ ᠳᠤ ᠶᠠᠮᠠᠷ ᠬᠡᠷᠡᠭ ᠲᠡᠢ ᠪᠤᠢ︖ ᠬᠤᠴᠠ ᠶᠢᠨ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ᠂ ᠪᠣᠷᠳᠣᠭᠰᠠᠨ ᠮᠠᠯ ᠤᠨ ᠥᠭᠡᠬᠦᠨ ᠡᠴᠡ ᠪᠢ ᠵᠠᠯᠬᠠᠯᠠ ᠪᠤᠬᠠ᠂ ᠬᠤᠷᠠᠭᠠ᠂ ᠢᠮᠠᠭᠠᠨ ᠤ ᠴᠢᠰᠤ ᠶᠢ ᠪᠢ ᠲᠠᠭᠠᠯᠠᠳᠠᠭ ᠦᠭᠡᠢ᠃
12 ᠲᠠ ᠨᠠᠷ ᠮᠢᠨᠦ ᠡᠮᠦᠨᠡ ᠬᠠᠷᠠᠭᠳᠠᠬᠤ ᠪᠠᠷ ᠢᠷᠡᠳᠡᠭ ᠬᠠᠷᠢᠨ ᠬᠠᠰᠢᠶᠠ ᠶᠢ ᠮᠢᠨᠢ ᠢᠩᠭᠢᠵᠦ ᠳᠡᠪᠰᠡᠯᠡᠬᠦ ᠶᠢ ᠬᠡᠨ ᠱᠠᠭᠠᠷᠳᠠᠪᠠ︖
13 ᠤᠳᠬᠠ ᠦᠭᠡᠢ ᠡᠷᠭᠦᠯ ᠢᠶᠡᠨ ᠠᠪᠴᠢᠷᠠᠬᠤ ᠪᠠᠨ ᠪᠣᠯᠢ ᠤᠲᠤᠯᠭᠠ ᠴᠢᠨᠢ ᠨᠠᠳᠠ ᠳᠤ ᠵᠢᠭᠰᠢᠭᠦᠷᠢ᠂ ᠰᠢᠨᠡ ᠰᠠᠷᠠ᠂ ᠠᠮᠠᠷᠠᠯ ᠤᠨ ᠡᠳᠦᠷ ᠴᠤᠭᠯᠠᠷᠠᠯᠲᠠ ᠶᠢᠨ ᠳᠠᠭᠤᠳᠠᠯᠭᠠ ᠬᠢᠭᠡᠳ ᠨᠢᠭᠦᠯ ᠪᠦᠬᠦᠢ ᠴᠢᠭᠤᠯᠭᠠᠨ ᠢ ᠴᠢᠨᠢ ᠪᠢ ᠲᠡᠰᠴᠦ ᠶᠠᠳᠠᠵᠤ ᠪᠠᠢᠨᠠ᠃
14 ᠲᠠ ᠨᠠᠷ ᠤᠨ ᠰᠢᠨᠡ ᠰᠠᠷᠠ ᠶᠢᠨ ᠪᠠᠶᠠᠷ ᠲᠣᠭᠲᠠᠭᠰᠠᠨ ᠪᠠᠶᠠᠷ ᠤᠳ ᠢ ᠪᠢ ᠦᠵᠡᠨ ᠶᠠᠳᠠᠳᠠᠭ ᠲᠡᠳᠡᠭᠡᠷ ᠨᠢ ᠨᠠᠳᠠ ᠳᠤ ᠲᠡᠭᠡᠭᠡᠷᠡ ᠪᠣᠯᠵᠤ ᠲᠡᠳᠡᠭᠡᠷ ᠢ ᠡᠭᠦᠷᠬᠦ ᠭᠡᠵᠦ ᠪᠢ ᠶᠠᠳᠠᠷᠠᠵᠤ ᠪᠠᠢᠨᠠ᠃
15 ᠲᠠ ᠨᠠᠷ ᠭᠤᠶᠤᠬᠤ ᠪᠠᠷ ᠭᠠᠷ ᠢᠶᠠᠨ ᠡᠷᠭᠦᠭᠰᠡᠨ ᠴᠤ ᠪᠢ ᠬᠠᠷᠠᠴᠠ ᠪᠠᠨ ᠪᠤᠷᠤᠭᠤᠯᠠᠨᠠ ᠲᠠ ᠨᠠᠷ ᠣᠯᠠᠨᠲᠠ ᠳᠠᠭᠠᠳᠬᠠᠭᠰᠠᠨ ᠴᠤ ᠪᠢ ᠰᠣᠨᠣᠰᠬᠤ ᠦᠭᠡᠢ ᠭᠠᠷ ᠴᠢᠨᠢ ᠴᠢᠰᠤᠨ ᠳᠤ ᠪᠢᠯᠳᠠᠭᠰᠠᠨ ᠪᠠᠢᠨᠠ᠂
16 ᠪᠡᠶᠡ ᠪᠡᠨ ᠤᠬᠢᠶᠠᠵᠤ ᠴᠡᠪᠡᠷᠯᠡ ᠪᠤᠵᠠᠷ ᠦᠢᠯᠡᠰ ᠢᠶᠡᠨ ᠬᠠᠷᠠᠭᠠᠨ ᠠᠴᠠ ᠮᠢᠨᠢ ᠵᠠᠢᠯᠠᠭᠤᠯ ᠮᠠᠭᠤ ᠶᠢ ᠦᠢᠯᠡᠳᠬᠦ ᠪᠡᠨ ᠪᠣᠯᠢ
17 ᠰᠠᠢᠨ ᠢ ᠦᠢᠯᠡᠳᠬᠦ ᠶᠢ ᠰᠤᠷᠤᠯᠴᠠ ᠰᠢᠳᠤᠷᠭᠤ ᠶᠢ ᠳᠠᠭᠠᠵᠤ ᠳᠠᠷᠤᠯᠠᠭᠳᠠᠭᠰᠠᠳ ᠲᠤ ᠲᠤᠰᠠᠯᠠ ᠥᠨᠥᠴᠢᠨ ᠢ ᠥᠮᠥᠭᠡᠷᠡᠵᠦ ᠪᠡᠯᠪᠡᠰᠦᠨ ᠢ ᠥᠮᠥᠭᠯᠡ᠃》
18 《ᠨᠠᠰᠢ ᠢᠷᠡ᠂ ᠬᠠᠮᠲᠤ ᠪᠠᠷ ᠢᠶᠠᠨ ᠦᠵᠡᠶᠡ᠂》 ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠨᠢᠭᠦᠯ ᠴᠢᠨᠢ ᠴᠢᠰ ᠤᠯᠠᠭᠠᠨ ᠮᠡᠲᠦ ᠪᠠᠢᠪᠠᠴᠤ ᠴᠠᠰᠤ ᠴᠠᠭᠠᠨ ᠪᠣᠯᠣᠨᠠ ᠣᠪ ᠤᠯᠠᠭᠠᠨ ᠪᠠᠢᠪᠠᠴᠤ ᠨᠣᠣᠰᠣ ᠰᠢᠭ᠋ ᠪᠣᠯᠣᠨᠠ᠃
19 ᠲᠠ ᠨᠠᠷ ᠳᠤᠷᠠᠲᠠᠶᠠ ᠳᠠᠭᠠᠪᠠᠯ ᠭᠠᠵᠠᠷ ᠤᠨ ᠣᠬᠢ ᠡᠴᠡ ᠢᠳᠡᠨᠡ
20 ᠡᠰᠡᠷᠭᠦᠴᠡᠵᠦ ᠤᠷᠪᠠᠪᠠᠯ ᠢᠯᠳᠦᠨ ᠳᠦ ᠢᠳᠡᠭᠦᠯᠦᠨᠡ᠂》 ᠶᠣᠬᠣᠸᠠ ᠶᠢᠨ ᠠᠮᠠ ᠠᠢᠯᠠᠳᠤᠯᠠ᠃
21 ᠢᠲᠡᠭᠡᠮᠵᠢᠲᠦ ᠬᠣᠲᠠ ᠶᠠᠭᠠᠬᠢᠭᠠᠳ ᠶᠠᠩ᠋ᠬᠠᠨ ᠪᠣᠯᠣᠭᠰᠠᠨ ᠪᠠᠢᠨᠠ ᠪᠤᠢ︖ ᠲᠡᠷᠡ ᠰᠢᠳᠤᠷᠭᠤ ᠪᠠᠷ ᠳᠦᠭᠦᠷᠡᠩ ᠲᠡᠭᠦᠨ ᠦ ᠳᠣᠲᠣᠷᠠ ᠵᠥᠪ ᠨᠢ ᠣᠷᠣᠰᠢᠵᠤ ᠯᠠ ᠪᠠᠢᠭᠰᠠᠨ ᠬᠠᠷᠢᠨ ᠡᠳᠦᠭᠡ ᠠᠯᠠᠭᠤᠷᠴᠢᠳ ᠢᠶᠠᠷ ᠳᠦᠭᠦᠷᠴᠡᠢ᠃
22 ᠮᠥᠩᠭᠥ ᠴᠢᠨᠢ ᠰᠢᠭᠠᠷᠤ ᠪᠣᠯᠵᠤ ᠳᠠᠷᠠᠰᠤ ᠴᠢᠨᠢ ᠤᠰᠤ ᠪᠠᠷ ᠰᠢᠩ᠋ᠭᠡᠯᠡᠭᠳᠡᠵᠡᠢ᠃
23 ᠤᠳᠤᠷᠢᠳᠤᠭᠴᠢᠳ ᠴᠢᠨᠢ ᠲᠡᠷᠰᠡᠯᠡᠭᠴᠢᠳ ᠬᠤᠯᠠᠭᠠᠢᠴᠢᠳ ᠤᠨ ᠬᠠᠮᠰᠠᠭᠠᠲᠠᠨ ᠪᠦᠭᠦᠳᠡᠭᠡᠷ ᠬᠠᠬᠤᠤᠯᠢ ᠳᠤ ᠳᠤᠷᠠᠲᠠᠢ᠂ ᠬᠠᠷᠠᠮᠵᠢ ᠬᠥᠭᠡᠭᠡᠴᠡᠯᠳᠡᠳᠡᠭ᠌ ᠥᠨᠥᠴᠢᠨ ᠢ ᠥᠮᠥᠭᠯᠡᠳᠡᠭ ᠦᠭᠡᠢ ᠪᠡᠯᠪᠡᠰᠦᠨ ᠦ ᠵᠠᠷᠭᠤ ᠲᠡᠳᠡᠨ ᠳᠡᠭᠡᠷᠡ ᠬᠦᠷᠲᠡᠭ ᠦᠭᠡᠢ᠃》
24 ᠲᠡᠢᠮᠦ ᠡᠴᠡ ᠠᠤᠭᠠ ᠬᠦᠴᠦᠲᠦ ᠡᠵᠡᠨ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠥ᠂ ᠪᠢ ᠥᠰᠲᠡᠨ ᠨᠦᠭᠦᠳ ᠡᠴᠡ ᠪᠡᠨ ᠥᠰᠢᠶᠡ ᠪᠡᠨ ᠠᠪᠴᠤ ᠳᠠᠢᠰᠤᠨ ᠨᠤᠭᠤᠳ ᠠᠴᠠ ᠪᠠᠨ ᠰᠠᠯᠵᠤ ᠠᠮᠠᠷᠠᠨᠠ᠃
25 ᠪᠢ ᠭᠠᠷ ᠢᠶᠠᠨ ᠴᠢᠮᠠ ᠤᠷᠤᠭᠤ ᠡᠷᠭᠢᠭᠦᠯᠵᠦ ᠰᠢᠭᠠᠷᠤ ᠶᠢ ᠴᠢᠨᠢ ᠲᠤᠩ᠋ᠭᠠᠨ ᠴᠡᠪᠡᠷᠰᠢᠭᠦᠯᠵᠦ ᠬᠣᠯᠢᠴᠠ ᠶᠢ ᠴᠢᠨᠢ ᠪᠦᠭᠦᠳᠡ ᠶᠢ ᠠᠷᠢᠯᠭᠠᠨᠠ᠃
26 ᠪᠢ ᠰᠢᠭᠦᠭᠴᠢᠳ ᠢ ᠴᠢᠨᠢ ᠠᠩ᠋ᠬᠠᠨ ᠤ ᠬᠢ ᠰᠢᠭ᠋ ᠨᠢ ᠵᠥᠪᠯᠡᠭᠴᠢᠳ ᠢ ᠴᠢᠨᠢ ᠡᠬᠢᠨ ᠤ ᠬᠢ ᠰᠢᠭ ᠨᠢ ᠰᠡᠷᠭᠦᠭᠡᠨᠡ ᠡᠭᠦᠨ ᠦ ᠳᠠᠷᠠᠭᠠ ᠴᠢ ᠵᠥᠪᠲᠦ ᠬᠣᠲᠠ ᠢᠲᠡᠭᠡᠮᠵᠢᠲᠦ ᠬᠣᠲᠠ ᠭᠡᠭᠳᠡᠬᠦ ᠪᠣᠯᠣᠨᠠ᠃》
27 ᠲᠡᠷᠡ ᠪᠡᠷ ᠽᠢᠶᠣᠨ ᠢ ᠰᠢᠳᠤᠷᠭᠤ ᠪᠠᠷ ᠲᠡᠭᠦᠨ ᠳᠣᠲᠣᠷᠠᠬᠢ ᠭᠡᠮᠰᠢᠭ᠍ᠴᠢᠳ ᠢ ᠵᠥᠪ ᠢᠶᠡᠷ ᠵᠣᠯᠢᠨ ᠠᠪᠤᠨᠠ᠂
28 ᠬᠠᠷᠢᠨ ᠤᠷᠪᠠᠭᠴᠢᠳ ᠪᠠ ᠨᠢᠭᠦᠯᠲᠡᠳ ᠬᠠᠮᠲᠤ ᠳᠠᠭᠠᠨ ᠰᠦᠢᠷᠡᠵᠦ ᠶᠣᠬᠣᠸᠠ ᠶᠢ ᠣᠷᠬᠢᠭᠴᠢᠳ ᠰᠥᠨᠥᠨᠡ᠃
29 ᠬᠣᠵᠢᠮ ᠲᠡᠳᠡ ᠲᠠᠭᠠᠯᠠᠵᠤ ᠪᠠᠢᠭᠰᠠᠨ ᠴᠠᠷᠠᠰᠤᠨ ᠮᠣᠳᠣᠨ ᠠᠴᠠ ᠪᠠᠨ ᠪᠣᠯᠵᠤ ᠢᠴᠢᠨᠡ ᠰᠢᠯᠢᠭᠰᠡᠨ ᠴᠡᠴᠡᠷᠯᠢᠭ ᠡᠴᠡ ᠪᠡᠨ ᠪᠣᠯᠵᠤ ᠰᠢᠪᠰᠢᠭ ᠪᠣᠯᠣᠨᠠ
30 ᠲᠡᠳᠡ ᠨᠠᠪᠴᠢ ᠨᠢ ᠬᠠᠲᠠᠭᠰᠠᠨ ᠴᠠᠷᠠᠰᠤ ᠮᠡᠲᠦ ᠤᠰᠤ ᠦᠭᠡᠢ ᠴᠡᠴᠡᠷᠯᠢᠭ ᠮᠡᠲᠦ ᠪᠣᠯᠣᠨᠠ
31 ᠬᠦᠴᠦᠲᠡᠨ ᠨᠢ ᠮᠠᠭᠠᠯᠢᠩ᠋ᠭᠤᠨ ᠰᠢᠷᠬᠡᠭ ᠦᠢᠯᠡᠰ ᠨᠢ ᠣᠴᠢ ᠮᠡᠲᠦ ᠪᠣᠯᠵᠤ ᠲᠡᠳᠡ ᠬᠣᠶᠠᠭᠤᠯᠠ ᠪᠠᠨ ᠬᠠᠮᠲᠤ ᠳᠠᠭᠠᠨ ᠰᠢᠲᠠᠪᠠᠴᠤ ᠤᠨᠲᠠᠷᠠᠭᠠᠬᠤ ᠬᠥᠮᠦᠨ ᠦᠭᠡᠢ ᠪᠣᠯᠣᠨᠠ᠃