ᠢᠰᠠᠢᠶᠠ ᠭᠤᠴᠢᠨ ᠳᠥᠷᠪᠡ
ᠦᠨᠳᠦᠰᠦᠲᠡᠨ ᠨᠦᠭᠦᠳ ᠲᠦ ᠪᠠᠭᠤᠬᠤ ᠰᠢᠳᠬᠡᠯ
1 ᠦᠨᠳᠦᠰᠦᠲᠡᠨ ᠨᠦᠭᠦᠳ ᠡ᠂ ᠣᠢᠷᠠᠲᠤᠵᠤ ᠢᠷᠡᠭᠡᠳ ᠰᠣᠨᠣᠰ ᠶᠠᠰᠤᠲᠠᠨ ᠨᠤᠭᠤᠳ ᠡ᠂ ᠠᠩ᠋ᠬᠠᠷᠤᠭᠲᠤᠨ᠂ ᠭᠠᠵᠠᠷ ᠪᠠ ᠲᠡᠭᠦᠨ ᠢ ᠳᠦᠭᠦᠷᠭᠡᠭᠴᠢ ᠪᠦᠬᠦᠨ ᠶᠢᠷᠲᠢᠨᠴᠦ ᠪᠠ ᠲᠡᠭᠦᠨ ᠡᠴᠡ ᠭᠠᠷᠳᠠᠭ ᠪᠦᠬᠦᠨ ᠰᠣᠨᠣᠰ᠃
2 ᠶᠣᠬᠣᠸᠠ ᠪᠦᠬᠦ ᠦᠨᠳᠦᠰᠦᠲᠡᠨ ᠳᠦ ᠠᠭᠤᠷᠯᠠᠵᠠᠢ ᠪᠦᠬᠦ ᠴᠡᠷᠢᠭ ᠲᠤᠨᠢ ᠬᠢᠯᠢᠩᠨᠡᠵᠡᠢ ᠶᠣᠬᠣᠸᠠ ᠪᠦᠷᠢᠮᠦᠰᠦᠨ ᠤᠰᠠᠳᠬᠠᠬᠤ ᠪᠠᠷ ᠲᠡᠳᠡᠨ ᠢ ᠠᠯᠠᠯᠭᠠᠨ ᠳᠤ ᠲᠤᠰᠢᠶᠠᠨᠠ᠃
3 ᠠᠯᠠᠭᠳᠠᠭᠰᠠᠳ ᠨᠢ ᠬᠠᠶᠠᠭᠳᠠᠵᠤ ᠬᠡᠭᠦᠷ ᠨᠢ ᠥᠮᠡᠬᠡᠢᠷᠡᠵᠦ ᠠᠭᠤᠯᠠᠰ ᠴᠢᠰᠤᠨ ᠳᠤᠨᠢ ᠠᠭᠤᠰᠤᠨᠠ᠃
4 ᠲᠩᠷᠢ ᠶᠢᠨ ᠡᠷᠬᠡᠰ ᠪᠦᠭᠦᠳᠡ ᠢᠯᠵᠠᠷᠠᠨ ᠲᠩᠷᠢ ᠬᠤᠢᠯᠠᠮᠠᠯ ᠮᠡᠲᠦ ᠬᠤᠢᠯᠠᠭᠳᠠᠨᠠ ᠦᠵᠦᠮ ᠦᠨ ᠮᠣᠳᠣᠨ ᠤ ᠨᠠᠪᠴᠢ᠂ ᠢᠨᠵᠢᠷ ᠤᠨ ᠮᠣᠳᠣᠨ ᠤ ᠢᠨᠵᠢᠷ ᠤᠨᠠᠬᠤ ᠮᠡᠲᠦ ᠣᠳᠣᠳ ᠪᠦᠭᠦᠳᠡᠭᠡᠷ ᠢᠶᠡᠨ ᠤᠨᠠᠨᠠ᠃
5 ᠢᠯᠳᠦ ᠮᠢᠨᠢ ᠲᠩᠷᠢ ᠳᠡᠭᠡᠷᠡ ᠬᠠᠨᠲᠠᠯᠠ ᠤᠤᠭᠤᠭᠠᠳ ᠡᠳᠣᠮ ᠤᠨ ᠳᠡᠭᠡᠷᠡ᠂ ᠮᠢᠨᠦ ᠤᠰᠠᠳᠬᠠᠬᠤ ᠦᠨᠳᠦᠰᠦᠲᠡᠨ ᠳᠡᠭᠡᠷᠡ ᠰᠢᠭᠦᠬᠦ ᠪᠡᠷ ᠪᠠᠭᠤᠨᠠ᠃
6 ᠶᠣᠬᠣᠸᠠ ᠶᠢᠨ ᠢᠯᠳᠦ ᠴᠢᠰᠤᠨ ᠳᠤ ᠬᠠᠨᠤᠭᠰᠠᠨ ᠪᠠᠢᠨᠠ ᠬᠤᠷᠠᠭᠠ ᠢᠮᠠᠭᠠᠨ ᠤ ᠴᠢᠰᠤᠨ ᠳᠤ ᠬᠤᠴᠠ ᠶᠢᠨ ᠪᠥᠭᠡᠷᠡᠨ ᠦ ᠥᠭᠡᠬᠦᠨ ᠳᠦ ᠴᠠᠳᠤᠭᠰᠠᠨ ᠪᠠᠢᠨᠠ᠂ ᠪᠣᠽᠷᠠ ᠳᠤ ᠶᠣᠬᠣᠸᠠ ᠶᠢᠨ ᠲᠥᠯᠥᠭᠡᠬᠢ ᠲᠠᠬᠢᠯ ᠪᠠᠢᠨᠠ ᠡᠳᠣᠮ ᠤᠨ ᠨᠤᠲᠤᠭ ᠲᠤ ᠶᠡᠬᠡ ᠬᠢᠳᠤᠯᠭᠠ ᠪᠠᠢᠨᠠ᠃
7 ᠲᠡᠳᠡᠨ ᠲᠡᠢ ᠬᠠᠮᠲᠤ ᠵᠡᠷᠯᠢᠭ ᠱᠠᠷ ᠪᠠ ᠵᠠᠯᠠᠭᠤ ᠪᠤᠬᠠ᠂ ᠬᠦᠴᠦᠲᠦ ᠪᠤᠬᠠ ᠤᠨᠠᠨᠠ ᠨᠤᠲᠤᠭ ᠨᠢ ᠴᠢᠰᠤᠨ ᠳᠤ ᠰᠣᠭᠲᠣᠵᠤ ᠰᠢᠷᠣᠢ ᠨᠢ ᠥᠭᠡᠬᠦᠨ ᠳᠦ ᠪᠢᠯᠠᠭᠤᠷᠠᠨᠠ᠃
8 ᠶᠣᠬᠣᠸᠠ ᠶᠢᠨ ᠥᠰᠢᠶᠡ ᠠᠪᠤᠯᠲᠠ ᠶᠢᠨ ᠡᠳᠦᠷ ᠡᠨᠡ ᠽᠢᠶᠣᠨ ᠤ ᠡᠮᠦᠨᠡ ᠡᠴᠡ ᠬᠠᠷᠢᠭᠤ ᠠᠪᠬᠤ ᠵᠢᠯ ᠡᠨᠡ᠃
9 ᠡᠳᠣᠮ ᠤᠨ ᠤᠷᠤᠰᠬᠠᠯ ᠤᠳ ᠨᠢ ᠳᠠᠪᠠᠷᠬᠠᠢ ᠬᠥᠷᠥᠰᠥ ᠨᠢ ᠬᠦᠬᠦᠷ ᠭᠠᠵᠠᠷ ᠨᠢ ᠭᠠᠯᠲᠤ ᠳᠠᠪᠠᠷᠬᠠᠢ ᠪᠣᠯᠣᠨ ᠬᠤᠪᠢᠷᠠᠵᠤ
10 ᠡᠳᠦᠷᠵᠢᠨ ᠰᠥᠨᠢᠵᠢᠨ ᠦᠯᠦ ᠤᠨᠲᠠᠷᠠᠨ ᠤᠲᠤᠭᠠ ᠨᠢ ᠮᠥᠩᠬᠡᠳᠡ ᠰᠤᠭᠤᠨᠠᠭᠯᠠᠨᠠ ᠦᠶᠡ ᠶᠢᠨ ᠦᠶᠡ ᠳᠦ ᠡᠵᠡᠭᠦᠢᠷᠡᠨ ᠡᠭᠦᠷᠢᠳᠡ ᠮᠥᠩᠬᠡᠳᠡ ᠲᠡᠷᠡᠭᠦᠷ ᠥᠩᠭᠡᠷᠡᠬᠦ ᠬᠥᠮᠦᠨ ᠦᠭᠡᠢ ᠪᠣᠯᠣᠨᠠ᠃
11 ᠲᠡᠷᠡ ᠭᠠᠵᠠᠷ ᠢ ᠴᠥᠯ ᠦᠨ ᠣᠭᠣᠯᠢ ᠪᠣᠯᠣᠨ ᠰᠢᠷᠠ ᠰᠢᠪᠠᠭᠤ ᠡᠵᠡᠮᠰᠢᠵᠦ ᠲᠡᠨᠳᠡ ᠲᠣᠮᠣ ᠣᠭᠣᠯᠢ ᠪᠠ ᠬᠡᠷᠢᠶᠡ ᠡᠭᠦᠷᠯᠡᠨᠡ ᠶᠣᠬᠣᠸᠠ ᠡᠳᠣᠮ ᠤᠨ ᠳᠡᠭᠡᠭᠦᠷ ᠬᠣᠭᠣᠰᠣᠷᠠᠯ ᠤᠨ ᠬᠡᠮᠵᠢᠭᠦᠷ᠂ ᠡᠵᠡᠭᠦᠢᠷᠡᠯ ᠦᠨ ᠲᠡᠭᠰᠢᠯᠡᠭᠦᠷ ᠢ ᠲᠠᠲᠠᠨᠠ᠂
12 ᠬᠠᠭᠠᠨᠴᠢᠯᠠᠯ ᠤᠨ ᠨᠣᠶᠠᠳ ᠢ ᠨᠢ ᠳᠠᠭᠤᠳᠠᠬᠤ ᠳᠤ ᠴᠤ ᠬᠡᠨ ᠴᠤ ᠦᠭᠡᠢ᠂ ᠬᠠᠮᠤᠭ ᠤᠳᠤᠷᠢᠳᠤᠭᠴᠢ ᠨᠢ ᠠᠯᠠᠭᠠ ᠪᠣᠯᠣᠨᠠ᠃
13 ᠣᠷᠳᠣᠨ ᠬᠠᠷᠰᠢ ᠳᠤᠨᠢ ᠥᠷᠭᠡᠰᠦᠲᠦ ᠬᠠᠯᠠᠭᠠᠢ ᠪᠡᠬᠢᠯᠡᠯᠲᠡ ᠨᠦᠭᠦᠳ ᠲᠤᠨᠢ ᠦᠭᠦᠷᠭᠡᠨᠡ ᠶᠢᠨ ᠪᠤᠲᠠ ᠤᠷᠭᠤᠵᠤ ᠴᠢᠨᠣᠠ ᠶᠢᠨ ᠡᠭᠦᠷ᠂ ᠬᠢᠷᠭᠤᠤᠯ ᠤᠨ ᠣᠷᠣᠮᠵᠢ ᠪᠣᠯᠣᠨᠠ᠃
14 ᠲᠡᠨᠳᠡ ᠴᠥᠯ ᠦᠨ ᠠᠷᠢᠶᠠᠲᠠᠳ ᠰᠢᠷᠠᠨᠤᠳ ᠲᠠᠢ ᠲᠠᠭᠠᠷᠠᠯᠳᠤᠵᠤ ᠶᠠᠩᠭᠢᠷ ᠢᠵᠢᠯᠢ ᠪᠠᠨ ᠡᠷᠢᠨ ᠮᠠᠢᠯᠠᠯᠳᠤᠵᠤ ᠰᠥᠨᠢ ᠶᠢᠨ ᠠᠮᠢᠲᠠᠳ ᠲᠡᠨᠳᠡ ᠰᠠᠭᠤᠷᠢᠰᠢᠵᠤ ᠠᠮᠠᠷᠠᠬᠤ ᠭᠠᠵᠠᠷ ᠢᠶᠠᠨ ᠣᠯᠣᠨᠠ᠃
15 ᠲᠡᠨᠳᠡ ᠰᠢᠷᠠ ᠰᠢᠪᠠᠭᠤ ᠡᠭᠦᠷᠯᠡᠵᠦ᠂ ᠰᠠᠭᠤᠨ᠂ ᠥᠨᠳᠡᠭᠡ ᠪᠡᠨ ᠳᠠᠷᠤᠵᠤ᠂ ᠵᠤᠯᠵᠠᠭᠠ ᠪᠠᠨ ᠰᠡᠭᠦᠳᠡᠷ ᠳᠣᠣᠷᠠ ᠪᠠᠨ ᠴᠤᠭᠯᠠᠭᠤᠯᠤᠨᠠ ᠲᠡᠨᠳᠡ ᠲᠠᠰ ᠴᠤ ᠬᠠᠨᠢᠲᠠᠳ ᠲᠠᠢ ᠪᠠᠨ ᠬᠠᠮᠲᠤ ᠴᠤᠭᠯᠠᠷᠠᠨᠠ᠃
16 ᠲᠠ ᠨᠠᠷ ᠶᠣᠬᠣᠸᠠ ᠶᠢᠨ ᠨᠣᠮ ᠢ ᠰᠤᠳᠤᠯᠤᠨ ᠤᠩ᠋ᠰᠢ ᠲᠡᠳᠡᠭᠡᠷ ᠦᠨ ᠭᠠᠭᠴᠠ ᠨᠢ ᠴᠤ ᠣᠷᠬᠢᠭᠳᠠᠬᠤ ᠦᠭᠡᠢ ᠨᠢᠭᠡ ᠨᠢ ᠴᠤ ᠢᠵᠢᠯᠢ ᠪᠠᠨ ᠠᠯᠳᠠᠬᠤ ᠦᠭᠡᠢ ᠤᠴᠢᠷ ᠨᠢ ᠲᠡᠭᠦᠨ ᠦ ᠠᠮᠠ ᠠᠢᠯᠠᠳᠴᠤ ᠲᠡᠭᠦᠨ ᠦ ᠰᠦᠨᠡᠰᠦ ᠲᠡᠳᠡᠨ ᠢ ᠴᠤᠭᠯᠠᠭᠤᠯᠤᠭᠰᠠᠨ ᠶᠤᠮ᠃
17 ᠶᠣᠬᠣᠸᠠ ᠬᠤᠪᠢ ᠶᠢ ᠨᠢ ᠬᠤᠪᠢᠶᠠᠭᠰᠠᠨ ᠮᠤᠲᠤᠷ ᠢᠶᠠᠷ ᠢᠶᠠᠨ ᠲᠡᠳᠡᠭᠡᠷ ᠢ ᠬᠡᠮᠵᠢᠵᠦ ᠲᠦᠭᠡᠭᠡᠭᠰᠡᠨ ᠲᠡᠳᠡ ᠮᠥᠩᠬᠡᠳᠡ ᠡᠵᠡᠮᠰᠢᠵᠦ ᠦᠶᠡ ᠶᠢᠨ ᠦᠶᠡ ᠳᠦ ᠲᠡᠨᠳᠡ ᠰᠠᠭᠤᠨᠠ᠃