ᠢᠰᠠᠢᠶᠠ ᠵᠢᠷᠭᠤᠭᠠ
ᠢᠰᠠᠢᠶᠠ ᠳᠠᠭᠤᠳᠠᠭᠳᠠᠪᠠ
1 ᠦᠽᠢᠶᠠ ᠬᠠᠭᠠᠨ ᠤ ᠥᠭᠡᠳᠡ ᠪᠣᠯᠣᠭᠰᠠᠨ ᠵᠢᠯ᠂ ᠪᠢ ᠥᠨᠳᠥᠷ ᠲᠦ ᠡᠷᠭᠦᠮᠵᠢᠯᠡᠭᠳᠡᠭᠰᠡᠨ ᠰᠡᠨᠲᠢ ᠳᠤ ᠵᠠᠯᠠᠷᠠᠭᠰᠠᠨ ᠡᠵᠡᠨ ᠢ ᠬᠠᠷᠠᠪᠠ᠃ ᠲᠡᠭᠦᠨ ᠦ ᠬᠣᠷᠮᠣᠢ ᠥᠷᠭᠥᠭᠡ ᠶᠢ ᠳᠦᠭᠦᠷᠭᠡᠭᠰᠡᠨ ᠪᠠᠢᠯᠠ᠃ 2 ᠲᠡᠭᠦᠨ ᠦ ᠳᠡᠭᠡᠭᠦᠷ ᠰᠧᠷᠠᠹ 4 ᠤᠳ ᠪᠠᠢᠪᠠ᠂ ᠲᠤᠰ ᠪᠦᠷᠢ ᠵᠢᠷᠭᠤᠭᠠᠨ ᠵᠢᠭᠦᠷ ᠲᠡᠢ᠂ ᠬᠣᠶᠠᠷ ᠢᠶᠠᠷ ᠨᠢ ᠨᠢᠭᠤᠷ ᠢᠶᠠᠨ ᠪᠦᠲᠡᠭᠡᠵᠦ᠂ ᠬᠣᠶᠠᠷ ᠢᠶᠠᠷ ᠨᠢ ᠬᠥᠯ ᠢᠶᠡᠨ ᠪᠦᠲᠡᠭᠡᠨ᠂ ᠬᠣᠶᠠᠷ ᠢᠶᠠᠷ ᠨᠢ ᠨᠢᠰᠴᠦ ᠪᠠᠢᠭᠠ ᠪᠥᠭᠡᠳ 3 ᠪᠡᠶᠡ ᠪᠡᠶᠡ ᠳᠡᠭᠡᠨ ᠥᠨᠳᠥᠷ ᠳᠠᠭᠤᠨ ᠢᠶᠠᠷ᠄ 《ᠠᠷᠢᠭᠤᠨ᠂ ᠠᠷᠢᠭᠤᠨ᠂ ᠠᠷᠢᠭᠤᠨ ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ︕ ᠪᠦᠬᠦᠢᠯᠡ ᠭᠠᠵᠠᠷ ᠲᠡᠭᠦᠨ ᠦ ᠠᠯᠳᠠᠷ ᠢᠶᠠᠷ ᠳᠦᠭᠦᠷᠡᠩ ᠪᠠᠢᠨᠠ》
ᠭᠡᠵᠦ ᠪᠠᠢᠪᠠ᠃ 4 ᠲᠡᠳᠡᠨ ᠦ ᠳᠠᠭᠤᠨ ᠳᠤ ᠪᠣᠱᠣᠭᠠᠨ ᠤ ᠰᠠᠭᠤᠷᠢ ᠴᠡᠴᠡᠷᠡᠪᠡ᠂ ᠥᠷᠭᠥᠭᠡ ᠳᠦᠭᠦᠷᠡᠩ ᠤᠲᠤᠭᠠ ᠪᠣᠯᠣᠭᠰᠠᠨ ᠪᠠᠢᠯᠠ᠃ 5 ᠪᠢ᠄ 《ᠭᠠᠰᠠᠯᠠᠩᠲᠠᠶᠠ᠂ ᠪᠢ ᠰᠦᠢᠷᠡᠬᠦ ᠪᠣᠯᠣᠯᠠ︕ ᠪᠢ ᠥᠪᠡᠷ ᠢᠶᠡᠨ ᠪᠤᠵᠠᠷ ᠠᠮᠠ ᠲᠠᠢ ᠬᠥᠮᠦᠨ᠂ ᠪᠤᠵᠠᠷ ᠠᠮᠠ ᠲᠠᠢ ᠬᠥᠮᠦᠰ ᠦᠨ ᠳᠤᠮᠳᠠ ᠠᠮᠢᠳᠤᠷᠠᠳᠠᠭ ᠠᠲᠠᠯᠠ ᠪᠠᠨ ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠬᠠᠭᠠᠨ ᠢ ᠨᠢᠳᠦ ᠪᠡᠷ ᠢᠶᠠᠨ ᠬᠠᠷᠠᠯᠠ》 ᠭᠡᠬᠦ ᠳᠦ᠂ 6 ᠰᠧᠷᠠᠹ ᠤᠳ ᠤᠨ ᠳᠤᠮᠳᠠ ᠠᠴᠠ ᠨᠢᠭᠡ ᠨᠢ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠡᠴᠡ ᠴᠢᠮᠬᠢᠭᠦᠷ ᠢᠶᠡᠷ ᠠᠪᠴᠢᠷᠠᠭᠰᠠᠨ ᠰᠢᠲᠠᠵᠤ ᠪᠠᠢᠭᠠ ᠨᠡᠭᠦᠷᠡᠰᠦ ᠶᠢ ᠭᠠᠷ ᠲᠠᠭᠠᠨ ᠪᠠᠷᠢᠨ ᠨᠠᠳᠠ ᠤᠷᠤᠭᠤ ᠨᠢᠰᠴᠦ ᠢᠷᠡᠭᠡᠳ 7 ᠠᠮᠠᠨ ᠳᠤ ᠮᠢᠨᠢ ᠬᠦᠷᠭᠡᠵᠦ᠄ 《ᠬᠠᠷᠠ᠂ ᠡᠨᠡ ᠴᠢᠨᠦ ᠣᠷᠣᠭᠤᠯ ᠳᠤ ᠬᠦᠷᠦᠭᠰᠡᠨ ᠢᠶᠡᠷ ᠭᠡᠮ ᠴᠢᠨᠢ ᠠᠷᠢᠯᠵᠤ᠂ ᠨᠢᠭᠦᠯ ᠴᠢᠨᠢ ᠬᠡᠯᠲᠦᠷᠢᠯᠡ》 ᠭᠡᠪᠡ᠃ 8 ᠲᠡᠭᠡᠬᠦ ᠳᠦ ᠪᠢ ᠡᠵᠡᠨ ᠦ ᠳᠠᠭᠤ ᠶᠢ ᠰᠣᠨᠣᠰᠣᠯᠠ᠃ ᠲᠡᠷᠡ᠄ 《ᠪᠢ ᠬᠡᠨ ᠢ ᠶᠠᠪᠤᠭᠤᠯᠬᠤ ᠪᠤᠢ︖ ᠬᠡᠨ ᠪᠢᠳᠡᠨ ᠦ ᠡᠮᠦᠨᠡ ᠡᠴᠡ ᠶᠠᠪᠤᠬᠤ ᠪᠤᠢ︖》 ᠭᠡᠬᠦ ᠳᠦ᠂ ᠪᠢ᠄ 《ᠬᠠᠷᠠ᠂ ᠪᠢ ᠡ᠊ᠨᠳᠡ ᠪᠠᠢᠨᠠ᠂ ᠨᠠᠮᠠᠶᠢ ᠶᠠᠪᠤᠭᠤᠯᠤᠭᠠᠴᠢ》 ᠭᠡᠪᠡ᠃ 9 ᠲᠡᠷᠡ᠄ 《ᠶᠠᠪᠤ᠂ ᠡᠨᠡ ᠠᠷᠠᠳ ᠲᠦᠮᠡᠨ ᠳᠦ᠄ 〈ᠲᠠ ᠨᠠᠷ ᠰᠣᠨᠣᠰᠣᠨ ᠰᠣᠨᠣᠰᠪᠠᠴᠤ ᠶᠡᠷᠦ ᠣᠢᠯᠠᠭᠠᠬᠤ ᠦᠭᠡᠢ ᠬᠠᠷᠠᠨ ᠬᠠᠷᠠᠪᠠᠴᠤ ᠶᠡᠷᠦ ᠮᠡᠳᠡᠬᠦ ᠦᠭᠡᠢ〉 ᠭᠡᠵᠦ ᠶᠠᠷᠢ᠃
10 ᠲᠡᠢᠨ ᠬᠦ ᠴᠢ ᠡᠨᠡ ᠠᠷᠠᠳ ᠲᠦᠮᠡᠨ ᠦ ᠵᠢᠷᠦᠬᠡ ᠶᠢ ᠬᠠᠲᠠᠭᠤᠷᠠᠭᠤᠯᠵᠤ ᠴᠢᠬᠢ ᠶᠢ ᠨᠢ ᠪᠥᠭᠯᠡᠨ᠂ ᠨᠢᠳᠦ ᠶᠢ ᠨᠢ ᠬᠠᠯᠬᠠᠯᠠ ᠲᠡᠳᠡ ᠨᠢᠳᠦ ᠪᠡᠷ ᠢᠶᠠᠨ ᠬᠠᠷᠠᠬᠤ᠂ ᠴᠢᠬᠢ ᠪᠠᠷ ᠢᠶᠠᠨ ᠰᠣᠨᠣᠰᠬᠤ᠂ ᠵᠢᠷᠦᠬᠡ ᠪᠡᠷ ᠢᠶᠠᠨ ᠣᠢᠯᠠᠭᠠᠬᠤ᠂ ᠡᠷᠭᠢᠵᠦ ᠢᠷᠡᠬᠦ᠂ ᠡᠳᠡᠭᠡᠷᠡᠬᠦ ᠤᠴᠢᠷ ᠦᠭᠡᠢ》 ᠭᠡᠵᠡᠢ᠃
11 ᠪᠢ᠄ 《ᠡᠵᠡᠨ ᠮᠢᠨᠢ᠂ ᠬᠡᠳᠦᠢ ᠤᠳᠠᠭᠠᠨ ᠲᠡᠢᠮᠦ ᠪᠣᠯᠬᠤ ᠪᠤᠢ︖》 ᠭᠡᠬᠦ ᠳᠦ᠂ ᠲᠡᠷᠡ᠄ 《ᠬᠣᠲᠠ ᠨᠤᠭᠤᠳ ᠰᠠᠭᠤᠭᠠᠯᠢᠴᠢᠳ ᠦᠭᠡᠢ ᠬᠣᠭᠣᠰᠣᠷᠠᠵᠤ ᠭᠡᠷ ᠤᠳ ᠬᠥᠮᠦᠨ ᠦᠭᠡᠢ ᠪᠣᠯᠵᠤ ᠨᠤᠲᠤᠭ ᠨᠢ ᠡᠵᠡᠭᠦᠢᠷᠡᠨ ᠬᠣᠭᠣᠰᠣᠷᠠᠬᠤ ᠬᠦᠷᠲᠡᠯᠡ
12 ᠶᠣᠬᠣᠸᠠ ᠬᠥᠮᠦᠰ ᠢ ᠬᠣᠯᠠᠳᠠᠭᠤᠯᠵᠤ ᠭᠠᠵᠠᠷ ᠨᠤᠲᠤᠭ ᠤᠨ ᠳᠤᠮᠳᠠ ᠠᠴᠠ ᠶᠡᠬᠡᠩᠬᠢ ᠶᠢ ᠨᠢ ᠣᠷᠬᠢᠬᠤ ᠬᠦᠷᠲᠡᠯᠡ ᠲᠡᠢᠮᠦ ᠪᠠᠢᠬᠤ ᠪᠣᠯᠣᠨᠠ᠂
13 ᠠᠷᠪᠠᠨ ᠤ ᠨᠢᠭᠡ ᠬᠤᠪᠢ ᠨᠢ ᠲᠡᠨᠳᠡ ᠦᠯᠡᠳᠡᠭᠰᠡᠨ ᠴᠤ ᠠᠬᠢᠭᠠᠳ ᠰᠢᠲᠠᠭᠠᠭᠳᠠᠨᠠ᠂ ᠭᠡᠪᠡᠴᠦ ᠤᠯᠢᠶᠠᠰᠤ ᠪᠤᠶᠤ ᠴᠠᠷᠠᠰᠤᠨ ᠮᠣᠳᠣ ᠴᠠᠪᠴᠢᠭᠳᠠᠭᠰᠠᠨ ᠴᠤ ᠶᠣᠵᠣᠭᠣᠷ ᠨᠢ ᠦᠯᠡᠳᠡᠬᠦ ᠮᠡᠲᠦ ᠠᠷᠢᠭᠤᠨ ᠦᠷᠡ ᠶᠣᠵᠣᠭᠣᠷ ᠲᠠᠢ ᠪᠠᠢᠬᠤ ᠪᠣᠯᠣᠨᠠ》 ᠭᠡᠪᠡ᠃