ᠬᠣᠶᠠᠳᠤᠭᠠᠷ ᠫᠧᠲ᠋ᠧᠷ ᠨᠢᠭᠡ
ᠡᠰᠢ ᠦᠵᠡᠭᠦᠯᠦᠯᠭᠡ ᠶᠢᠨ ᠭᠡᠷᠡᠴᠢᠯᠡᠯ
1 ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠤᠨ ᠵᠠᠷᠤᠴᠠ᠂ ᠰᠢᠳᠠᠷ ᠱᠠᠪᠢ ᠰᠢᠮᠣᠨ ᠫᠧᠲ᠋ᠧᠷ ᠡᠴᠡ ᠪᠢᠳᠡᠨ ᠦ ᠪᠤᠷᠬᠠᠨ ᠪᠠ ᠠᠪᠤᠷᠠᠭᠴᠢ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠤᠨ ᠵᠥᠪ ᠢᠶᠡᠷ ᠪᠢᠳᠡᠨ ᠲᠡᠢ ᠠᠳᠠᠯᠢᠬᠠᠨ ᠦᠨᠡᠲᠦ ᠢᠲᠡᠭᠡᠯ ᠢ ᠣᠯᠣᠭᠰᠠᠨ ᠬᠥᠮᠦᠰ ᠲᠦ᠄
2 ᠲᠠ ᠨᠠᠷ ᠪᠤᠷᠬᠠᠨ ᠪᠠ ᠪᠢᠳᠡᠨ ᠦ ᠡᠵᠡᠨ ᠢᠰᠦ᠋ᠰ ᠢ ᠲᠠᠨᠢᠵᠤ ᠮᠡᠳᠡᠬᠦ ᠳᠦ᠂ ᠢᠪᠡᠭᠡᠯ ᠪᠠ ᠠᠮᠤᠷ ᠠᠮᠤᠭᠤᠯᠠᠩ ᠨᠡᠮᠡᠭᠳᠡᠬᠦ ᠪᠣᠯᠲᠤᠭᠠᠢ᠃ 3 ᠪᠢᠳᠡ ᠲᠡᠭᠦᠨ ᠢ ᠲᠠᠨᠢᠵᠤ ᠮᠡᠳᠡᠬᠦ ᠲᠤᠰᠤᠮ ᠲᠡᠷᠡ ᠪᠡᠷ ᠪᠢᠳᠡᠨ ᠦ ᠠᠮᠢᠳᠤᠷᠠᠯ ᠪᠠ ᠰᠦᠰᠦᠭ ᠲᠦ ᠬᠡᠷᠡᠭ ᠲᠡᠢ ᠪᠦᠭᠦᠳᠡ ᠶᠢ ᠪᠤᠷᠬᠠᠨᠯᠢᠭ ᠬᠦᠴᠦ ᠪᠡᠷ ᠢᠶᠠᠨ ᠰᠣᠶᠣᠷᠬᠠᠵᠤ ᠪᠠᠢᠳᠠᠭ᠃ ᠲᠡᠷᠡ ᠰᠦᠷ ᠪᠠ ᠵᠢᠪᠬᠤᠯᠠᠩ ᠲᠠᠢ ᠪᠠᠷ ᠪᠢᠳᠡᠨ ᠢ ᠳᠠᠭᠤᠳᠠᠵᠤ᠂ 4 ᠪᠢᠳᠡᠨ ᠳᠦ ᠦᠨᠡᠲᠦ᠂ ᠠᠭᠤᠤ ᠠᠮᠠᠯᠠᠯᠲᠠ ᠨᠤᠭᠤᠳ ᠢ ᠰᠣᠶᠣᠷᠬᠠᠭᠰᠠᠨ᠃ ᠡᠳᠡᠭᠡᠷ ᠠᠮᠠᠯᠠᠯᠲᠠ ᠶᠢ ᠠᠪᠤᠭᠰᠠᠨ ᠲᠠ ᠨᠠᠷ ᠶᠢᠷᠲᠢᠨᠴᠦ ᠶᠢᠨ ᠢᠯᠵᠢᠷᠠᠮᠠᠯ ᠰᠢᠨᠤᠯ ᠲᠠᠴᠢᠶᠠᠯ ᠠᠴᠠ ᠵᠠᠢᠯᠠᠵᠤ᠂ ᠪᠤᠷᠬᠠᠨᠯᠢᠭ ᠴᠢᠨᠠᠷ ᠠᠴᠠ ᠬᠤᠪᠢᠶᠠᠯᠴᠠᠭᠴᠢ ᠪᠠᠢᠬᠤ ᠤᠴᠢᠷᠲᠠᠢ᠃ 5 ᠡᠢᠮᠦ ᠡᠴᠡ ᠲᠠ ᠨᠠᠷ ᠬᠠᠮᠤᠭ ᠢᠳᠡᠪᠬᠢ ᠪᠠᠨ ᠳᠠᠢᠴᠢᠯᠠᠨ᠂ ᠢᠲᠡᠭᠡᠯ ᠳᠡᠭᠡᠷᠡ ᠪᠡᠨ ᠰᠦᠷ ᠬᠦᠴᠦ ᠶᠢ᠂ ᠰᠦᠷ ᠬᠦᠴᠦ ᠳᠡᠭᠡᠷᠡ ᠪᠡᠨ ᠮᠡᠳᠡᠯᠭᠡ ᠶᠢ᠂ 6 ᠮᠡᠳᠡᠯᠭᠡ ᠳᠡᠭᠡᠷᠡ ᠪᠡᠨ ᠪᠡᠶᠡ ᠪᠡᠨ ᠪᠠᠷᠢᠬᠤ ᠶᠢ᠂ ᠪᠡᠶᠡ ᠪᠡᠨ ᠪᠠᠷᠢᠬᠤ ᠳᠡᠭᠡᠷᠡ ᠪᠡᠨ ᠬᠦᠯᠢᠴᠡᠩᠭᠦᠢ ᠶᠢ᠂ ᠬᠦᠯᠢᠴᠡᠩᠭᠦᠢ ᠳᠡᠭᠡᠷᠡ ᠪᠡᠨ ᠰᠦᠰᠦᠭ ᠢ᠂ 7 ᠰᠦᠰᠦᠭ ᠳᠡᠭᠡᠷᠡ ᠪᠡᠨ ᠠᠬᠠ ᠳᠡᠭᠦᠦᠰ ᠦᠨ ᠬᠠᠢᠷᠠ ᠶᠢ᠂ ᠠᠬᠠ ᠳᠡᠭᠦᠦᠰ ᠦᠨ ᠬᠠᠢᠷᠠ ᠳᠡᠭᠡᠷᠡ ᠪᠡᠨ ᠬᠠᠢᠷᠠ ᠶᠢ ᠨᠡᠮᠡᠭᠲᠦᠨ᠃ 8 ᠡᠳᠡᠭᠡᠷ ᠵᠦᠢᠯ ᠲᠠ ᠨᠠᠷ ᠲᠤ ᠪᠠᠢᠭ᠂ ᠡᠯᠪᠡᠭᠵᠢᠭ᠃ ᠲᠡᠭᠡᠪᠡᠯ ᠪᠢᠳᠡᠨ ᠦ ᠡᠵᠡᠨ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠢ ᠲᠠᠨᠢᠵᠤ ᠮᠡᠳᠡᠬᠦ ᠳᠦ᠂ ᠲᠠ ᠨᠠᠷ ᠵᠠᠯᠬᠠᠭᠤᠷᠠᠬᠤ ᠦᠭᠡᠢ᠂ ᠦᠷᠡ ᠵᠢᠮᠢᠰ ᠴᠤ ᠲᠠᠰᠤᠷᠠᠬᠤ ᠦᠭᠡᠢ ᠪᠣᠯᠣᠨᠠ᠃ 9 ᠡᠳᠡᠭᠡᠷ ᠵᠦᠢᠯ ᠦᠭᠡᠢ ᠬᠥᠮᠦᠨ ᠪᠣᠯ ᠰᠣᠬᠣᠷ ᠪᠤᠶᠤ ᠬᠣᠯᠠ ᠶᠢᠨ ᠬᠠᠷᠠᠴᠠ ᠦᠭᠡᠢ᠂ ᠤᠷᠢᠳᠤ ᠶᠢᠨ ᠨᠢᠭᠦᠯ ᠦᠨ ᠢᠶᠠᠨ ᠴᠡᠪᠡᠷᠯᠡᠭᠳᠡᠭᠰᠡᠨ ᠢ ᠮᠠᠷᠲᠠᠭᠰᠠᠨ ᠪᠠᠢᠳᠠᠭ᠃ 10 ᠡᠢᠮᠦ ᠡᠴᠡ ᠠᠬᠠ ᠳᠡᠭᠦᠦ ᠨᠠᠷ ᠡ᠂ ᠢᠯᠡᠭᠦᠦ ᠴᠢᠷᠮᠠᠢᠯᠲᠠ ᠭᠠᠷᠭᠠ᠂ ᠳᠠᠭᠤᠳᠠᠭᠳᠠᠵᠤ ᠰᠣᠩ᠋ᠭᠣᠭᠳᠠᠭᠰᠠᠨ ᠢᠶᠠᠨ ᠪᠠᠲᠤᠵᠢᠭᠤᠯ᠃ ᠲᠠ ᠨᠠᠷ ᠡᠳᠡᠭᠡᠷ ᠢ ᠬᠢᠬᠦ ᠵᠠᠭᠤᠷᠠ ᠪᠠᠨ ᠶᠡᠷᠦ ᠪᠦᠳᠦᠷᠢᠬᠦ ᠦᠭᠡᠢ᠂ 11 ᠡᠢᠨ ᠬᠦ ᠪᠢᠳᠡᠨ ᠦ ᠡᠵᠡᠨ ᠪᠠ ᠠᠪᠤᠷᠠᠭᠴᠢ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠤᠨ ᠮᠥᠩᠬᠡ ᠬᠠᠭᠠᠨᠴᠢᠯᠠᠯ ᠳᠤ ᠣᠷᠣᠬᠤ ᠡᠷᠬᠡ ᠲᠠ ᠨᠠᠷ ᠲᠤ ᠭᠦᠢᠴᠡᠳ ᠰᠣᠶᠣᠷᠬᠠᠭᠳᠠᠬᠤ ᠪᠣᠯᠣᠨᠠ᠃
12 ᠲᠠ ᠨᠠᠷ ᠡᠳᠡᠭᠡᠷ ᠢ ᠮᠡᠳᠡᠳᠡᠭ ᠪᠥᠭᠡᠳ ᠣᠯᠣᠭᠰᠠᠨ ᠦᠨᠡᠨ ᠳᠣᠲᠣᠷᠠ ᠪᠠᠨ ᠲᠣᠭᠲᠠᠪᠤᠷᠢᠲᠠᠢ ᠪᠠᠢᠳᠠᠭ ᠴᠤ ᠪᠢ ᠲᠠ ᠨᠠᠷ ᠲᠤ ᠡᠳᠡᠭᠡᠷ ᠵᠦᠢᠯ ᠢ ᠦᠷᠭᠦᠯᠵᠢ ᠰᠠᠨᠠᠭᠤᠯᠬᠤ ᠪᠠᠷ ᠪᠡᠯᠡᠬᠡᠨ ᠪᠠᠢᠨᠠ᠃ 13 ᠪᠢ ᠡᠨᠡ ᠮᠢᠬᠠᠨ ᠪᠡᠶᠡ 1 ᠶᠢᠨ ᠢᠶᠠᠨ ᠳᠣᠲᠣᠷᠠ ᠪᠠᠢᠬᠤ ᠵᠠᠭᠤᠷᠠ ᠪᠠᠨ ᠲᠠ ᠨᠠᠷ ᠲᠤ ᠰᠠᠨᠠᠭᠤᠯᠤᠨ ᠰᠡᠷᠡᠮᠵᠢᠯᠡᠭᠦᠯᠬᠦ ᠨᠢ ᠵᠥᠪ ᠭᠡᠵᠦ ᠪᠣᠳᠣᠳᠠᠭ᠃ 14 ᠤᠴᠢᠷ ᠨᠢ ᠪᠢ ᠮᠢᠬᠠᠨ ᠪᠡᠶᠡ 2 ᠡᠴᠡ ᠪᠡᠨ ᠤᠳᠠᠯ ᠦᠭᠡᠢ ᠰᠠᠯᠤᠨᠠ ᠭᠡᠳᠡᠭ ᠢᠶᠡᠨ ᠮᠡᠳᠡᠵᠦ ᠪᠠᠢᠨᠠ᠃ ᠪᠢᠳᠡᠨ ᠦ ᠡᠵᠡᠨ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠡᠭᠦᠨ ᠢ ᠨᠠᠳᠠ ᠳᠤ ᠲᠣᠳᠣᠷᠠᠭᠤᠯᠤᠭᠰᠠᠨ ᠶᠤᠮ᠃ 15 ᠨᠠᠮᠠᠶᠢ ᠨᠥᠭᠴᠢᠭᠰᠡᠨ ᠦ ᠳᠠᠷᠠᠭᠠ ᠴᠤ ᠲᠠ ᠨᠠᠷ ᠡᠳᠡᠭᠡᠷ ᠢ ᠦᠷᠭᠦᠯᠵᠢ ᠰᠠᠨᠠᠭᠠᠯᠵᠠᠵᠤ ᠪᠠᠢᠭᠠᠰᠠᠢ᠃ ᠪᠢ ᠡᠭᠦᠨ ᠦ ᠲᠥᠯᠥᠭᠡ ᠴᠢᠷᠮᠠᠢᠶᠠ᠃
ᠢᠲᠡᠭᠡᠯ ᠦᠨ ᠦᠨᠳᠦᠰᠦ ᠰᠠᠭᠤᠷᠢ
16 ᠪᠢᠳᠡᠨ ᠦ ᠡᠵᠡᠨ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠤᠨ ᠬᠦᠴᠦ ᠪᠣᠯᠣᠨ ᠲᠡᠭᠦᠨ ᠦ ᠢᠷᠡᠬᠦ ᠲᠤᠬᠠᠢ ᠲᠠ ᠨᠠᠷ ᠲᠤ ᠪᠢᠳᠡ ᠮᠡᠳᠡᠭᠦᠯᠬᠦ ᠳᠡᠭᠡᠨ᠂ ᠣᠪᠵᠢᠨ ᠵᠠᠯᠢ ᠲᠠᠢ ᠵᠣᠬᠢᠶᠠᠭᠰᠠᠨ ᠳᠣᠮᠣᠭ ᠢ ᠳᠠᠭᠠᠭᠰᠠᠨ ᠦᠭᠡᠢ᠂ ᠲᠡᠭᠦᠨ ᠦ ᠶᠡᠬᠡ ᠵᠢᠪᠬᠤᠯᠠᠩ ᠢ ᠨᠢᠳᠦ ᠪᠡᠷ ᠢᠶᠠᠨ ᠦᠵᠡᠭᠰᠡᠨ ᠶᠤᠮ᠃ 17 ᠶᠡᠬᠡ ᠴᠣᠭ ᠵᠢᠪᠬᠤᠯᠠᠩ ᠤᠨ ᠳᠤᠮᠳᠠ ᠠᠴᠠ 《ᠡᠨᠡ ᠪᠣᠯ ᠮᠢᠨᠦ ᠬᠠᠢᠷᠠᠲᠠᠢ ᠬᠦᠦ᠂ ᠲᠡᠷᠡ ᠨᠠᠳᠠ ᠳᠤ ᠲᠠᠭᠠᠯᠠᠭᠳᠠᠳᠠᠭ》 ᠬᠡᠮᠡᠬᠦ ᠳᠠᠭᠤ ᠲᠡᠭᠦᠨ ᠳᠦ ᠬᠦᠷᠦᠩᠭᠦᠲᠡ ᠲᠡᠷᠡ ᠪᠡᠷ ᠡᠴᠢᠭᠡ ᠪᠤᠷᠬᠠᠨ ᠠᠴᠠ ᠬᠦᠨᠳᠦᠯᠡᠯ ᠪᠠ ᠠᠯᠳᠠᠷ ᠰᠤᠤ ᠶᠢ ᠣᠯᠣᠯᠠ᠃ 18 ᠲᠩᠷᠢ ᠡᠴᠡ ᠴᠤᠤᠷᠢᠶᠠᠲᠤᠭᠰᠠᠨ ᠡᠨᠡ ᠳᠠᠭᠤ ᠶᠢ ᠪᠢᠳᠡ ᠲᠡᠭᠦᠨ ᠲᠡᠢ ᠬᠠᠮᠲᠤ ᠠᠷᠢᠭᠤᠨ ᠠᠭᠤᠯᠠᠨ ᠳᠤ ᠪᠠᠢᠬᠤ ᠳᠠᠭᠠᠨ ᠰᠣᠨᠣᠰᠣᠭᠰᠠᠨ᠃
19 ᠡᠭᠦᠨ ᠡᠴᠡ ᠴᠤ ᠲᠣᠳᠣᠷᠬᠠᠢ ᠡᠰᠢ ᠦᠵᠡᠭᠦᠯᠦᠯᠭᠡ ᠶᠢᠨ ᠦᠭᠡ ᠪᠢᠳᠡᠨ ᠳᠦ ᠪᠤᠢ᠃ ᠬᠠᠷᠠᠩ᠋ᠭᠤᠢ ᠭᠠᠵᠠᠷ ᠢ ᠭᠡᠶᠢᠭᠦᠯᠳᠡᠭ ᠳ᠋ᠧᠩ ᠢ ᠠᠩ᠋ᠬᠠᠷᠬᠤ ᠰᠢᠭ᠋᠂ ᠰᠡᠳᠬᠢᠯ ᠳᠣᠲᠣᠷᠠ ᠴᠢᠨᠢ ᠦᠷ ᠴᠠᠢᠵᠤ ᠴᠣᠯᠮᠣᠨ ᠭᠠᠷᠲᠠᠯᠠ ᠲᠠ ᠨᠠᠷ ᠲᠡᠷᠡ ᠦᠭᠡ ᠶᠢ ᠠᠩ᠋ᠬᠠᠷᠪᠠᠯ ᠰᠠᠢᠨ᠃ 20 ᠬᠠᠷᠢᠨ ᠡᠭᠦᠨ ᠢ ᠶᠠᠭᠤᠨ ᠤ ᠡᠮᠦᠨᠡ ᠮᠡᠳᠡᠲᠦᠭᠡᠢ᠃ ᠠᠷᠢᠭᠤᠨ ᠨᠣᠮ ᠤᠨ ᠠᠯᠢ ᠡᠰᠢ ᠦᠵᠡᠭᠦᠯᠦᠯᠭᠡ ᠶᠢ ᠴᠤ ᠳᠤᠷᠠ ᠪᠠᠷ ᠢᠶᠠᠨ ᠲᠠᠢᠯᠪᠤᠷᠢᠯᠠᠵᠤ ᠦᠯᠦ ᠪᠣᠯᠣᠨᠠ᠃ 21 ᠤᠴᠢᠷ ᠨᠢ᠂ ᠡᠰᠢ ᠦᠵᠡᠭᠦᠯᠦᠯᠭᠡ ᠪᠣᠯ ᠬᠡᠵᠢᠶᠡ ᠴᠤ ᠬᠥᠮᠦᠨ ᠦ ᠰᠠᠨᠠᠭᠠᠨ ᠳᠤ ᠬᠥᠲᠥᠯᠥᠭᠳᠡᠭᠰᠡᠨ ᠦᠭᠡᠢ᠂ ᠬᠠᠷᠢᠨ ᠪᠤᠷᠬᠠᠨ ᠠᠴᠠ ᠭᠠᠷᠤᠭᠰᠠᠨ ᠪᠥᠭᠡᠳ ᠬᠥᠮᠦᠰ ᠠᠷᠢᠭᠤᠨ ᠰᠦᠨᠡᠰᠦᠨ ᠳᠦ ᠬᠥᠲᠥᠯᠥᠭᠳᠡᠭᠡᠳ ᠡᠭᠦᠨ ᠢ ᠶᠠᠷᠢᠭᠰᠠᠨ ᠶᠤᠮ᠃