ᠹᠢᠯᠧᠮᠣᠨ
ᠹᠢᠯᠧᠮᠣᠨ ᠢ ᠰᠠᠢᠰᠢᠶᠠᠪᠠ
1 ᠾᠷᠢᠰᠲ᠋ᠣᠰ ᠢᠰᠦ᠋ᠰ ᠡᠴᠡ ᠪᠣᠯᠵᠤ ᠬᠣᠷᠢᠭᠳᠠᠭᠰᠠᠨ ᠫᠠᠦ᠋ᠯ ᠪᠠ ᠳᠡᠭᠦᠦ ᠲᠢᠮᠣᠲ ᠠᠴᠠ ᠪᠢᠳᠡᠨ ᠦ ᠬᠠᠢᠷᠠᠲᠤ ᠬᠠᠮᠲᠤ ᠠᠵᠢᠯᠯᠠᠭᠴᠢ ᠹᠢᠯᠧᠮᠣᠨ᠂ 2 ᠥᠬᠢᠨ ᠳᠡᠭᠦᠦ ᠠᠹᠢᠶᠠ ᠪᠠ ᠪᠢᠳᠡᠨ ᠦ ᠬᠠᠮᠲᠤ ᠶᠢᠨ ᠪᠠᠢᠯᠳᠤᠭᠴᠢ ᠠᠷᠺᠢᠫ ᠬᠢᠭᠡᠳ ᠴᠢᠨᠦ ᠭᠡᠷ ᠳᠠᠬᠢ ᠴᠢᠭᠤᠯᠭᠠᠨ ᠳᠤ᠄
3 ᠪᠢᠳᠡᠨ ᠦ ᠡᠴᠢᠭᠡ ᠪᠤᠷᠬᠠᠨ ᠪᠠ ᠡᠵᠡᠨ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠤᠨ ᠢᠪᠡᠭᠡᠯ᠂ ᠠᠮᠤᠭᠤᠯᠠᠩ ᠲᠠ ᠨᠠᠷ ᠲᠤ ᠪᠠᠢᠬᠤ ᠪᠣᠯᠲᠤᠭᠠᠢ᠃
4 ᠪᠢ ᠳᠠᠭᠠᠳᠬᠠᠬᠤ ᠪᠣᠯᠭᠠᠨ ᠴᠢᠮᠠ ᠶᠢ ᠳᠤᠷᠠᠰᠴᠤ᠂ ᠪᠤᠷᠬᠠᠨ ᠳᠠᠭᠠᠨ ᠲᠠᠯᠠᠷᠬᠠᠳᠠᠭ᠃ 5 ᠤᠴᠢᠷ ᠨᠢ᠂ ᠡᠵᠡᠨ ᠢᠰᠦ᠋ᠰ ᠪᠠ ᠬᠠᠮᠤᠭ ᠠᠷᠢᠭᠤᠨ ᠬᠥᠮᠦᠨ ᠳᠦ ᠬᠠᠢᠷᠠᠲᠠᠢ᠂ ᠢᠲᠡᠭᠡᠯ ᠲᠡᠢ ᠶᠢ ᠴᠢᠨᠢ ᠪᠢ ᠰᠣᠨᠣᠰᠴᠤ ᠪᠠᠢᠨᠠ᠃ 6 ᠡᠢᠨ ᠬᠦ ᠢᠲᠡᠭᠡᠯ ᠦᠨ ᠳᠣᠲᠣᠷᠠ ᠢᠳᠡᠪᠬᠢᠲᠡᠢ ᠨᠥᠬᠥᠷᠯᠡᠭᠡᠳ ᠾᠷᠢᠰᠲ᠋ᠣᠰ ᠢ ᠵᠣᠷᠢᠭᠰᠠᠨ ᠪᠢᠳᠡᠨ ᠳᠦ ᠪᠠᠢᠭᠠ ᠠᠯᠢᠪᠠ ᠰᠠᠢᠨ ᠰᠠᠢᠬᠠᠨ ᠢ ᠴᠢ ᠲᠠᠨᠢᠵᠤ ᠮᠡᠳᠡᠭᠡᠰᠡᠢ᠃ 7 ᠴᠢᠨᠦ ᠬᠠᠢᠷᠠ ᠨᠠᠮᠠᠶᠢ ᠶᠡᠬᠡᠳᠡ ᠪᠠᠶᠠᠰᠬᠠᠵᠤ ᠵᠣᠷᠢᠭᠵᠢᠭᠤᠯᠤᠭᠰᠠᠨ᠃ ᠶᠠᠭᠠᠬᠢᠭᠠᠳ ᠭᠡᠪᠡᠯ᠂ ᠳᠡᠭᠦᠦ ᠮᠢᠨᠢ᠂ ᠴᠢᠨᠦ ᠠᠴᠢ ᠪᠠᠷ ᠠᠷᠢᠭᠤᠨ ᠬᠥᠮᠦᠰ ᠦᠨ ᠰᠡᠳᠬᠢᠯ ᠠᠮᠠᠷᠠᠭᠰᠠᠨ ᠶᠤᠮ᠃
ᠪᠣᠭᠣᠯ ᠤᠨ ᠡᠮᠦᠨᠡ ᠡᠴᠡ ᠭᠤᠶᠤᠪᠠ
8 ᠲᠡᠢᠮᠦ ᠡᠴᠡ ᠾᠷᠢᠰᠲ᠋ᠣᠰ ᠤᠨ ᠳᠣᠲᠣᠷᠠ ᠵᠣᠷᠢᠭ ᠭᠠᠷᠭᠠᠨ ᠬᠢᠬᠦ ᠶᠣᠰᠣᠲᠠᠢ ᠵᠦᠢᠯ ᠢ ᠴᠢᠨᠢ ᠴᠢᠮᠠ ᠳᠤ ᠵᠠᠬᠢᠬᠤ ᠶᠢᠨ ᠣᠷᠣᠨ ᠳᠤ 9 ᠪᠢ — ᠡᠳᠦᠭᠡ ᠥᠲᠡᠯᠦᠭᠰᠡᠨ ᠪᠥᠭᠡᠳ ᠾᠷᠢᠰᠲ᠋ᠣᠰ ᠢᠰᠦ᠋ᠰ ᠡᠴᠡ ᠪᠣᠯᠵᠤ ᠬᠣᠷᠢᠭᠳᠠᠭᠰᠠᠨ ᠫᠠᠦ᠋ᠯ — ᠬᠠᠢᠷᠠ ᠶᠢᠨ ᠤᠯᠠᠮ ᠠᠴᠠ ᠭᠤᠶᠤᠶᠠ᠃ 10 ᠴᠢᠮᠠ ᠠᠴᠠ ᠪᠢ ᠬᠦᠦ ᠣᠨᠧᠰᠢᠮ 1 ᠤᠨ ᠢᠶᠠᠨ ᠡᠮᠦᠨᠡ ᠡᠴᠡ ᠭᠤᠶᠤᠬᠤ ᠭᠡᠵᠦ ᠪᠠᠢᠨᠠ᠃ ᠲᠡᠭᠦᠨ ᠢ ᠪᠢ ᠬᠣᠷᠢᠭᠳᠠᠵᠤ ᠪᠠᠢᠬᠤ ᠳᠠᠭᠠᠨ ᠣᠯᠣᠭᠰᠠᠨ ᠶᠤᠮ᠃ 11 ᠲᠡᠷᠡ ᠤᠷᠢᠳᠤ ᠨᠢ ᠴᠢᠮᠠ ᠳᠤ ᠲᠤᠰᠠ ᠦᠭᠡᠢ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠡᠳᠦᠭᠡ ᠨᠠᠳᠠ ᠳᠤ ᠴᠤ᠂ ᠴᠢᠮᠠ ᠳᠤ ᠴᠤ ᠲᠤᠰᠠ ᠲᠠᠢ ᠪᠣᠯᠵᠠᠢ᠃ 12 ᠪᠢ ᠲᠡᠭᠦᠨ ᠢ ᠴᠢᠮᠠ ᠤᠷᠤᠭᠤ ᠪᠤᠴᠠᠭᠠᠬᠤ ᠪᠣᠯᠣᠯᠠ᠃ ᠲᠡᠷᠡ ᠪᠣᠯ ᠮᠢᠨᠦ ᠵᠢᠷᠦᠬᠡ᠃ 13 ᠪᠢ ᠲᠡᠭᠦᠨ ᠢ ᠬᠠᠵᠠᠭᠤ ᠳᠠᠭᠠᠨ ᠪᠠᠢᠯᠭᠠᠨ᠂ ᠪᠠᠶᠠᠷ ᠤᠨ ᠮᠡᠳᠡᠭᠡᠨ ᠦ ᠲᠥᠯᠥᠭᠡ ᠬᠣᠷᠢᠭᠳᠠᠵᠤ ᠪᠠᠢᠬᠤ ᠵᠠᠭᠤᠷᠠ ᠪᠠᠨ ᠴᠢᠨᠦ ᠣᠷᠣᠨ ᠳᠤ ᠪᠡᠶᠡ ᠳᠡᠭᠡᠨ ᠦᠢᠯᠡᠴᠢᠯᠡᠭᠦᠯᠬᠦ ᠰᠠᠨᠠᠭᠠ ᠲᠠᠢ ᠴᠤ᠂ 14 ᠴᠢᠨᠦ ᠵᠥᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠶᠠᠭᠤ ᠴᠤ ᠬᠢᠬᠦ ᠬᠦᠰᠡᠯ ᠦᠭᠡᠢ᠃ ᠤᠴᠢᠷ ᠨᠢ᠂ ᠰᠠᠢᠨ ᠦᠢᠯᠡ ᠠᠯᠪᠠᠳᠠᠯᠭᠠ ᠪᠠᠷ ᠪᠤᠰᠤ᠂ ᠬᠠᠷᠢᠨ ᠰᠠᠢᠨ ᠳᠤᠷᠠ ᠪᠠᠷ ᠪᠡᠶᠡᠯᠡᠬᠦ ᠶᠣᠰᠣᠲᠠᠢ᠃ 15 ᠲᠡᠭᠦᠨ ᠢ ᠮᠥᠩᠬᠡᠳᠡ ᠴᠢᠮᠠ ᠲᠠᠢ ᠪᠠᠢᠯᠭᠠᠬᠤ ᠶᠢᠨ ᠲᠤᠯᠠᠳᠠ ᠲᠡᠷᠡ ᠲᠦᠷ ᠵᠠᠭᠤᠷᠠ ᠴᠢᠮᠠ ᠠᠴᠠ ᠰᠠᠯᠭᠠᠭᠳᠠᠭᠰᠠᠨ ᠪᠠᠢᠵᠤ ᠮᠠᠭᠠᠳ᠃ 16 ᠲᠡᠷᠡ ᠪᠣᠭᠣᠯ ᠪᠢᠰᠢ᠂ ᠬᠠᠷᠢᠨ ᠪᠣᠭᠣᠯ ᠠᠴᠠ ᠢᠯᠡᠭᠦᠦ ᠬᠠᠢᠷᠠᠲᠤ ᠳᠡᠭᠦᠦ ᠪᠣᠯᠣᠭᠰᠠᠨ᠃ ᠨᠠᠳᠠ ᠳᠤ ᠲᠡᠷᠡ ᠡᠢᠮᠦ ᠣᠨᠴᠠᠭᠠᠢ ᠪᠠᠢᠬᠤ ᠳᠤ ᠮᠢᠬᠠᠨ ᠪᠡᠶᠡ ᠪᠣᠯᠣᠨ ᠡᠵᠡᠨ ᠦ ᠳᠣᠲᠣᠷᠠ ᠴᠢᠮᠠ ᠳᠤ ᠬᠡᠴᠢᠨᠡᠨ ᠣᠨᠴᠠᠭᠠᠢ ᠪᠠᠢᠬᠤ ᠪᠢᠯᠡ᠃
17 ᠬᠡᠷᠪᠡ ᠴᠢ ᠨᠠᠮᠠᠶᠢ ᠬᠠᠮᠲᠤ ᠠᠵᠢᠯᠯᠠᠭᠴᠢ ᠭᠡᠵᠦ ᠪᠣᠳᠣᠳᠠᠭ ᠪᠣᠯ᠂ ᠨᠠᠮᠠᠶᠢ ᠬᠦᠯᠢᠶᠡᠨ ᠠᠪᠬᠤ ᠰᠢᠭ᠋ ᠲᠡᠭᠦᠨ ᠢ ᠬᠦᠯᠢᠶᠡᠨ ᠠᠪᠤᠭᠠᠷᠠᠢ᠃ 18 ᠬᠡᠷᠪᠡ ᠲᠡᠷᠡ ᠴᠢᠮᠠ ᠳᠤ ᠶᠠᠮᠠᠷ ᠨᠢᠭᠡᠨ ᠬᠣᠬᠢᠷᠠᠯ ᠤᠴᠠᠷᠠᠭᠤᠯᠤᠨ ᠥᠷᠢ ᠲᠠᠯᠪᠢᠭᠰᠠᠨ ᠪᠣᠯ᠂ ᠨᠠᠳᠠ ᠪᠠᠷ ᠲᠥᠯᠥᠭᠦᠯ᠃ 19 ᠨᠠᠳᠠ ᠳᠤ ᠥᠷᠢ ᠲᠠᠢ ᠪᠠᠢᠭᠠ ᠶᠢ ᠴᠢᠨᠢ ᠳᠤᠷᠠᠳᠬᠤ ᠦᠭᠡᠢ᠃ ᠫᠠᠦ᠋ᠯ ᠪᠢ ᠥᠪᠡᠷ ᠦᠨ ᠭᠠᠷ ᠢᠶᠠᠷ ᠢᠶᠠᠨ 《ᠪᠢ ᠲᠥᠯᠥᠶᠡ》 ᠭᠡᠵᠦ ᠪᠢᠴᠢᠵᠦ ᠪᠠᠢᠨᠠ᠃ 20 ᠳᠡᠭᠦᠦ ᠮᠢᠨᠢ᠂ ᠡᠵᠡᠨ ᠦ ᠳᠣᠲᠣᠷᠠ ᠪᠢ ᠴᠢᠨᠦ ᠬᠠᠯᠠᠮᠵᠢ ᠶᠢ ᠶᠡᠬᠡᠳᠡ ᠬᠦᠰᠡᠵᠦ ᠪᠠᠢᠨᠠ᠃ ᠾᠷᠢᠰᠲ᠋ᠣᠰ ᠤᠨ ᠳᠣᠲᠣᠷᠠ ᠰᠡᠳᠬᠢᠯ ᠢ ᠮᠢᠨᠢ ᠠᠮᠠᠷᠠᠭᠤᠯᠤᠭᠠᠴᠢ᠃ 21 ᠳᠤᠭᠤᠯᠭᠠᠪᠤᠷᠢᠲᠠᠢ ᠪᠠᠢᠬᠤ ᠶᠢ ᠴᠢᠨᠢ ᠢᠲᠡᠭᠡᠵᠦ ᠴᠢᠮᠠ ᠳᠤ ᠪᠢᠴᠢᠵᠦ ᠪᠠᠢᠨᠠ᠃ ᠬᠡᠯᠡᠭᠰᠡᠨ ᠡᠴᠡ ᠮᠢᠨᠢ ᠢᠯᠡᠭᠦᠦ ᠪᠡᠷ ᠬᠢᠵᠦ ᠥᠭᠬᠦ ᠶᠢ ᠪᠢ ᠮᠡᠳᠡᠨᠡ᠃
22 ᠡᠭᠦᠨ ᠦ ᠬᠠᠮᠲᠤ ᠨᠠᠳᠠ ᠳᠤ ᠪᠠᠢᠷᠢ ᠪᠡᠯᠡᠳᠬᠡᠭᠡᠷᠡᠢ᠂ ᠲᠠ ᠨᠠᠷ ᠤᠨ ᠳᠠᠭᠠᠳᠬᠠᠯ ᠤᠨ ᠠᠴᠢ ᠪᠠᠷ ᠲᠠᠨ ᠤ ᠳᠤ ᠢᠯᠡᠭᠡᠭᠳᠡᠬᠦ ᠶᠢ ᠪᠢ ᠡᠷᠡᠮᠡᠯᠵᠡᠵᠦ ᠪᠠᠢᠨᠠ᠃
23 ᠾᠷᠢᠰᠲ᠋ᠣᠰ ᠢᠰᠦ᠋ᠰ ᠤᠨ ᠲᠥᠯᠥᠭᠡ ᠬᠠᠮᠲᠤ ᠬᠣᠷᠢᠭᠳᠠᠭᠴᠢ ᠧᠫᠠᠹᠷᠠ ᠪᠣᠯᠣᠨ 24 ᠮᠢᠨᠦ ᠬᠠᠮᠲᠤ ᠠᠵᠢᠯᠯᠠᠭᠴᠢ ᠮᠠᠷᠺ᠂ ᠠᠷᠢᠰᠲ᠋ᠠᠷᠺ᠂ ᠳ᠋ᠧᠮᠠ᠂ ᠯᠦᠺ ᠴᠢᠮᠠ ᠳᠤ ᠮᠡᠨᠳᠦ ᠬᠦᠷᠭᠡᠵᠦ ᠪᠠᠢᠨᠠ᠃
25 ᠡᠵᠡᠨ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠤᠨ ᠢᠪᠡᠭᠡᠯ ᠲᠠ ᠨᠠᠷ ᠤᠨ ᠰᠦᠨᠡᠰᠦᠨ ᠳᠦ ᠣᠷᠣᠰᠢᠬᠤ ᠪᠣᠯᠲᠤᠭᠠᠢ᠃