ᠡᠰᠲ᠋ᠧᠷ ᠨᠢᠭᠡ
ᠫᠧᠷᠰ ᠤᠨ ᠬᠠᠲᠤᠨ ᠤᠭᠴᠠᠷᠠᠭᠳᠠᠪᠠ
1 ᠡᠨᠡ ᠶᠠᠪᠤᠳᠠᠯ ᠠᠬᠠᠰᠦ᠋ᠶᠧᠷᠦ᠋ ᠶᠢᠨ ᠡᠳᠦᠷ ᠤᠳ ᠲᠤ ᠪᠣᠯᠣᠭᠰᠠᠨ ᠶᠤᠮ᠃ ᠠᠬᠠᠰᠦ᠋ᠶᠧᠷᠦ᠋ ᠡᠨᠡᠳᠬᠡᠭ ᠡᠴᠡ ᠺᠦᠱ ᠬᠦᠷᠲᠡᠯᠡᠬᠢ ᠵᠠᠭᠤ ᠬᠣᠷᠢᠨ ᠳᠣᠯᠣᠭᠠᠨ ᠮᠤᠵᠢ ᠶᠢ ᠬᠠᠭᠠᠨᠴᠢᠯᠠᠵᠤ ᠪᠠᠢᠵᠠᠢ᠃ 2 ᠲᠡᠷᠡ ᠡᠳᠦᠷ ᠤᠳ ᠲᠤ ᠬᠠᠭᠠᠨ ᠠᠬᠠᠰᠦ᠋ᠶᠧᠷᠦ᠋ ᠰᠦᠰᠠ ᠶᠢᠨ ᠰᠢᠯᠲᠦᠭᠡᠨ ᠳᠠᠬᠢ ᠬᠠᠭᠠᠨ ᠰᠡᠨᠲᠢ ᠳᠡᠭᠡᠨ ᠵᠠᠯᠠᠷᠠᠵᠤ ᠪᠠᠢᠪᠠ᠃ 3 ᠬᠠᠭᠠᠨᠴᠢᠯᠠᠯ ᠤᠨ ᠢᠶᠠᠨ ᠭᠤᠷᠪᠠᠳᠤᠭᠠᠷ ᠣᠨ ᠳᠤ ᠲᠡᠷᠡ ᠪᠡᠷ ᠪᠦᠬᠦ ᠨᠣᠶᠠᠨ ᠲᠦᠰᠢᠮᠡᠯ ᠲᠡᠭᠡᠨ ᠵᠣᠷᠢᠭᠤᠯᠤᠨ ᠨᠠᠢᠷ ᠬᠢᠪᠡ᠃ ᠫᠧᠷᠰ ᠪᠣᠯᠣᠨ ᠮᠧᠳᠢᠶᠠ ᠶᠢᠨ ᠵᠠᠩᠵᠤᠨ ᠨᠠᠷ᠂ ᠮᠥᠨ ᠮᠤᠵᠢ ᠶᠢᠨ ᠨᠣᠶᠠᠳ ᠪᠣᠯᠣᠨ ᠵᠠᠬᠢᠷᠤᠭᠴᠢᠳ ᠬᠠᠭᠠᠨ ᠤ ᠡᠮᠦᠨᠡ ᠪᠠᠢᠯᠠ᠃
4 ᠬᠠᠭᠠᠨ ᠵᠠᠭᠤ ᠨᠠᠶᠠᠨ ᠬᠣᠨᠣᠭ ᠤᠨ ᠲᠤᠷᠰᠢ᠂ ᠣᠯᠠᠨ ᠡᠳᠦᠷ ᠢᠶᠡᠷ ᠬᠠᠭᠠᠨᠴᠢᠯᠠᠯ ᠤᠨ ᠢᠶᠠᠨ ᠦᠯᠡᠮᠵᠢ ᠪᠠᠶᠠᠯᠢᠭ ᠪᠣᠯᠣᠨ ᠠᠤᠭᠠ ᠰᠦᠷ ᠵᠢᠪᠬᠤᠯᠠᠩ ᠢ ᠬᠠᠷᠠᠭᠤᠯᠤᠭᠰᠠᠨ ᠪᠠᠢᠨᠠ᠃ 5 ᠡᠳᠡᠭᠡᠷ ᠡᠳᠦᠷ ᠤᠳ ᠥᠩᠭᠡᠷᠡᠬᠦ ᠳᠦ᠂ ᠬᠠᠭᠠᠨ ᠰᠦᠰᠠ ᠰᠢᠯᠲᠦᠭᠡᠨ ᠳᠦ ᠪᠠᠢᠭᠠ ᠡᠷᠬᠢᠮ ᠳᠣᠣᠷᠠᠳᠤᠰ ᠢᠯᠭᠠᠯ ᠦᠭᠡᠢ ᠪᠦᠬᠦ ᠬᠥᠮᠦᠨ ᠳᠦ ᠵᠣᠷᠢᠭᠤᠯᠤᠨ ᠬᠠᠭᠠᠨ ᠤ ᠣᠷᠳᠣᠨ ᠤ ᠴᠡᠴᠡᠷᠯᠢᠭ ᠤᠨ ᠬᠦᠷᠢᠶᠡᠨ ᠳᠦ ᠳᠠᠬᠢᠨ ᠳᠣᠯᠣᠭᠠᠨ ᠬᠣᠨᠣᠭ ᠤᠨ ᠨᠠᠢᠷ ᠬᠢᠪᠡ᠃ 6 ᠲᠡᠨᠳᠡ ᠴᠠᠭᠠᠨ ᠤᠲᠠᠰᠤ ᠪᠣᠯᠣᠨ ᠨᠢᠯ ᠶᠠᠭᠠᠨ ᠪᠥᠰ ᠢᠶᠡᠷ ᠬᠢᠭᠰᠡᠨ ᠬᠥᠰᠢᠭᠡ ᠨᠦᠭᠦᠳ ᠪᠠᠢᠪᠠ᠃ ᠲᠡᠷᠡ ᠬᠥᠰᠢᠭᠡ ᠨᠦᠭᠦᠳ ᠢ ᠭᠠᠨᠲᠢᠭ ᠪᠠᠭᠠᠨᠠ ᠶᠢᠨ ᠮᠥᠩᠭᠥᠨ ᠭᠠᠷᠠᠬᠠ ᠨᠤᠭᠤᠳ ᠠᠴᠠ ᠨᠢᠯ ᠶᠠᠭᠠᠨ ᠥᠩᠭᠡ ᠶᠢᠨ ᠨᠠᠷᠢᠨ ᠮᠠᠭᠠᠯᠢᠩ᠋ᠭᠤᠨ ᠤᠲᠠᠰᠤ ᠪᠠᠷ ᠡᠯᠭᠦᠭᠰᠡᠨ ᠪᠠᠢᠪᠠ᠃ ᠮᠥᠨ ᠡᠷᠢᠶᠡᠨ ᠴᠢᠯᠠᠭᠤ᠂ ᠭᠠᠨᠲᠢᠭ᠂ ᠲᠠᠨᠠ ᠪᠣᠯᠣᠨ ᠡᠷᠳᠡᠨᠢ ᠶᠢᠨ ᠴᠢᠯᠠᠭᠤ ᠨᠤᠭᠤᠳ ᠢ ᠰᠢᠭᠢᠳᠬᠡᠭᠰᠡᠨ ᠵᠠᠮ ᠳᠡᠭᠡᠷᠡ ᠠᠯᠲᠠ ᠮᠥᠩᠭᠥᠨ ᠢᠰᠠᠷᠢ ᠨᠦᠭᠦᠳ ᠪᠠᠢᠯᠠ᠃ 7 ᠬᠠᠭᠠᠨ ᠤ ᠬᠡᠰᠢᠭ᠂ ᠬᠠᠭᠠᠨ ᠤ ᠦᠵᠦᠮ ᠦᠨ ᠳᠠᠷᠠᠰᠤ ᠬᠠᠯᠭᠢᠵᠤ ᠴᠠᠯᠭᠢᠵᠤ ᠪᠠᠢᠭᠰᠠᠨ ᠪᠥᠭᠡᠳ ᠲᠡᠭᠦᠨ ᠢ ᠶᠠᠩᠵᠤ ᠪᠦᠷᠢ ᠶᠢᠨ ᠠᠯᠲᠠᠨ ᠰᠠᠪᠠ ᠪᠠᠷ ᠲᠦᠭᠡᠭᠡᠨ ᠤᠤᠭᠤᠯᠭᠠᠵᠠᠢ᠃ 8 ᠤᠤᠭᠤᠬᠤ ᠲᠠᠯᠠ ᠪᠠᠷ ᠶᠠᠮᠠᠷ ᠴᠤ ᠴᠡᠭᠡᠷ᠂ ᠱᠠᠯᠠᠭᠠ ᠦᠭᠡᠢ ᠪᠠᠢᠪᠠ᠃ ᠬᠥᠮᠦᠨ ᠪᠦᠷᠢ ᠳᠤ ᠬᠦᠰᠡᠭᠰᠡᠨ ᠢᠶᠡᠷ ᠨᠢ ᠦᠢᠯᠡᠴᠢᠯᠡᠬᠦ ᠶᠢ ᠬᠠᠭᠠᠨ ᠣᠷᠳᠣᠨ ᠤ ᠪᠠᠨ ᠪᠦᠬᠦ ᠦᠢᠯᠡᠴᠢᠯᠡᠭᠴᠢ ᠳᠤ ᠲᠤᠰᠢᠶᠠᠭᠰᠠᠨ ᠠᠵᠢ᠃
9 ᠬᠠᠲᠤᠨ ᠸᠠᠱᠲ᠋ᠢ ᠮᠥᠨ ᠬᠠᠭᠠᠨ ᠠᠬᠠᠰᠦ᠋ᠶᠧᠷᠦ᠋ ᠶᠢᠨ ᠣᠷᠳᠣᠨ ᠳᠤ ᠡᠮᠡᠭᠲᠡᠢᠴᠦᠳ ᠲᠦ ᠵᠣᠷᠢᠭᠤᠯᠤᠨ ᠨᠠᠢᠷ ᠬᠢᠪᠡ᠃
10 ᠳᠣᠯᠣᠳᠠᠬᠢ ᠡᠳᠦᠷ ᠨᠢ ᠬᠠᠭᠠᠨ ᠤ ᠰᠡᠳᠬᠢᠯ ᠳᠠᠷᠠᠰᠤᠨ ᠳᠤ ᠬᠥᠭᠰᠡᠨ ᠪᠠᠶᠠᠰᠤᠭᠠᠳ ᠥᠪᠡᠷ ᠲᠤᠨᠢ ᠦᠢᠯᠡᠴᠢᠯᠡᠳᠡᠭ᠌ ᠳᠣᠯᠣᠭᠠᠨ ᠲᠠᠢᠭᠠᠨ ᠮᠧᠾᠦ᠋ᠮᠠᠨ᠂ ᠪᠢᠽᠲ᠋ᠠ᠂ ᠬᠠᠷᠪᠣᠨᠠ᠂ ᠪᠢᠭᠲ᠋ᠠ᠂ ᠠᠪᠠᠭᠲ᠋ᠠ᠂ ᠽᠧᠲ᠋ᠠᠷ ᠪᠠ ᠺᠠᠷᠺᠠᠰ ᠨᠠᠷ ᠲᠤ ᠲᠤᠰᠢᠶᠠᠨ᠂ 11 ᠬᠠᠲᠤᠨ ᠸᠠᠱᠲ᠋ᠢ ᠶᠢ ᠬᠠᠲᠤᠨ ᠤ ᠲᠢᠲᠢᠮ ᠲᠠᠢ ᠨᠢ ᠥᠪᠡᠷ ᠦᠨ ᠢᠶᠠᠨ ᠡᠮᠦᠨᠡ ᠠᠪᠴᠢᠷᠠᠭᠤᠯᠬᠤ ᠪᠠᠷ ᠪᠣᠯᠪᠠ᠃ ᠬᠠᠲᠤᠨ ᠭᠤᠸᠠ ᠦᠵᠡᠰᠬᠦᠯᠡᠩ ᠪᠣᠯᠬᠣᠷ ᠲᠡᠭᠦᠨ ᠦ ᠭᠤᠸᠠ ᠰᠠᠢᠬᠠᠨ ᠢ ᠠᠷᠠᠳ ᠲᠦᠮᠡᠨ ᠪᠣᠯᠣᠨ ᠵᠠᠰᠠᠭ ᠨᠣᠶᠠᠳ ᠲᠠᠭᠠᠨ ᠦᠵᠡᠭᠦᠯᠬᠦ ᠭᠡᠵᠦ ᠲᠡᠷᠡ ᠬᠦᠰᠡᠭᠰᠡᠨ ᠪᠠᠢᠯᠠ᠃ 12 ᠭᠡᠪᠡᠴᠦ ᠬᠠᠲᠤᠨ ᠸᠠᠱᠲ᠋ᠢ ᠲᠠᠢᠭᠠᠨ ᠨᠠᠷ ᠢᠶᠠᠷ ᠳᠠᠮᠵᠢᠭᠤᠯᠤᠭᠰᠠᠨ ᠬᠠᠭᠠᠨ ᠤ ᠦᠭᠡ ᠪᠡᠷ ᠢᠷᠡᠭᠡ ᠦᠭᠡᠢ ᠪᠠᠢᠯᠠ᠃ ᠲᠡᠭᠡᠬᠦ ᠳᠦ ᠬᠠᠭᠠᠨ ᠶᠡᠬᠡᠳᠡ ᠠᠭᠤᠷᠯᠠᠵᠤ᠂ ᠬᠢᠯᠢᠩ ᠨᠢ ᠳᠦᠷᠡᠯᠵᠡᠪᠡ᠃
13 ᠬᠠᠭᠠᠨ ᠬᠠᠤᠯᠢ ᠪᠠ ᠶᠣᠰᠣ ᠵᠠᠩᠰᠢᠯ ᠰᠠᠢᠨ ᠮᠡᠳᠡᠳᠡᠭ ᠬᠥᠮᠦᠰ ᠲᠡᠢ ᠵᠥᠪᠯᠡᠳᠡᠭ ᠶᠣᠰᠣᠭᠠᠷ ᠢᠶᠠᠨ ᠬᠠᠤᠯᠢ ᠮᠡᠳᠡᠳᠡᠭ ᠮᠡᠷᠭᠡᠨ ᠬᠥᠮᠦᠰ ᠲᠡᠢ ᠶᠠᠷᠢᠯᠴᠠᠵᠠᠢ᠃ 14 ᠬᠠᠭᠠᠨ ᠤ ᠰᠢᠳᠠᠷ ᠲᠦᠰᠢᠮᠡᠳ ᠨᠢ ᠺᠠᠷᠱᠧᠨᠠ᠂ ᠱᠧᠲ᠋ᠠᠷ᠂ ᠠᠳ᠋ᠮᠠᠲ᠋ᠠ᠂ ᠲᠠᠷᠱᠢᠱ᠂ ᠮᠧᠷᠧᠰ᠂ ᠮᠠᠷᠰᠧᠨᠠ ᠪᠠ ᠮᠧᠮᠦ᠋ᠺᠠᠨ ᠵᠡᠷᠭᠡ ᠫᠧᠷᠰ ᠪᠣᠯᠣᠨ ᠮᠧᠳᠢᠶᠠ ᠶᠢᠨ ᠳᠣᠯᠣᠭᠠᠨ ᠨᠣᠶᠠᠨ ᠪᠠᠢᠪᠠ᠃ ᠲᠡᠳᠡ ᠬᠠᠭᠠᠨᠴᠢᠯᠠᠯ ᠤᠨ ᠳᠣᠲᠣᠷᠠ ᠬᠠᠮᠤᠭ ᠤᠨ ᠥᠨᠳᠥᠷ ᠲᠤᠰᠢᠶᠠᠯ ᠲᠠᠢ ᠪᠥᠭᠡᠳ ᠬᠠᠭᠠᠨ ᠳᠤ ᠪᠠᠷᠠ ᠪᠣᠯᠳᠠᠭ ᠪᠠᠢᠪᠠ᠃
15 ᠬᠠᠭᠠᠨ ᠲᠡᠳᠡᠨ ᠡᠴᠡ᠄ 《ᠬᠠᠲᠤᠨ ᠸᠠᠱᠲ᠋ᠢ ᠲᠠᠢᠭᠠᠨ ᠨᠠᠷ ᠢᠶᠠᠷ ᠳᠠᠮᠵᠢᠭᠤᠯᠤᠭᠰᠠᠨ ᠬᠠᠭᠠᠨ ᠠᠬᠠᠰᠦ᠋ᠶᠧᠷᠦ᠋ ᠶᠢᠨ ᠲᠤᠰᠢᠶᠠᠯ ᠢ ᠳᠠᠭᠠᠭᠰᠠᠨ ᠦᠭᠡᠢ ᠤᠴᠢᠷ ᠠᠴᠠ ᠬᠠᠤᠯᠢ ᠶᠢᠨ ᠳᠠᠭᠠᠤ ᠲᠡᠭᠦᠨ ᠢ ᠶᠠᠭᠠᠬᠢᠬᠤ ᠶᠣᠰᠣᠲᠠᠢ ᠪᠤᠢ︖》 ᠭᠡᠪᠡ᠃
16 ᠬᠠᠭᠠᠨ ᠬᠢᠭᠡᠳ ᠰᠢᠳᠠᠷ ᠨᠣᠶᠠᠳ ᠤᠨ ᠡᠮᠦᠨᠡ ᠮᠧᠮᠦ᠋ᠺᠠᠨ᠄ 《ᠬᠠᠲᠤᠨ ᠸᠠᠱᠲ᠋ᠢ ᠵᠥᠪᠬᠡᠨ ᠬᠠᠭᠠᠨ ᠤ ᠡᠮᠦᠨᠡ ᠪᠢᠰᠢ᠂ ᠮᠥᠨ ᠬᠠᠭᠠᠨ ᠠᠬᠠᠰᠦ᠋ᠶᠧᠷᠦ᠋ ᠶᠢᠨ ᠪᠦᠬᠦ ᠮᠤᠵᠢ ᠶᠢᠨ ᠬᠠᠮᠤᠭ ᠨᠣᠶᠠᠨ ᠪᠣᠯᠣᠨ ᠬᠠᠮᠤᠭ ᠣᠯᠠᠨ ᠤ ᠡᠮᠦᠨᠡ ᠪᠤᠷᠤᠭᠤᠳᠠᠪᠠ᠃ 17 ᠬᠠᠲᠤᠨ ᠤ ᠡᠨᠡ ᠶᠠᠪᠤᠳᠠᠯ ᠪᠤᠰᠤᠳ ᠡᠮᠡᠭᠲᠡᠢᠴᠦᠳ ᠲᠦ ᠮᠡᠳᠡᠭᠳᠡᠪᠡᠯ᠂ ᠲᠡᠳᠡ᠄ 〈ᠬᠠᠭᠠᠨ ᠠᠬᠠᠰᠦ᠋ᠶᠧᠷᠦ᠋ ᠬᠠᠲᠤᠨ ᠸᠠᠱᠲ᠋ᠢ ᠳᠤ ᠥᠪᠡᠷ ᠦᠨ ᠬᠢᠨᠢ ᠡᠮᠦᠨᠡ ᠢᠷᠡᠬᠦ ᠶᠢ ᠲᠤᠰᠢᠶᠠᠬᠤ ᠳᠤ᠂ ᠲᠡᠷᠡ ᠢᠷᠡᠭᠡ ᠦᠭᠡᠢ〉 ᠭᠡᠳ ᠨᠥᠬᠥᠷ ᠤᠳ ᠢᠶᠠᠨ ᠪᠠᠰᠤᠮᠵᠢᠯᠠᠬᠤ ᠳᠤ ᠬᠦᠷᠬᠦ ᠪᠣᠯᠣᠨᠠ᠃ 18 ᠬᠠᠲᠤᠨ ᠤ ᠶᠠᠪᠤᠳᠠᠯ ᠢ ᠰᠣᠨᠣᠰᠣᠭᠰᠠᠨ ᠫᠧᠷᠰ ᠪᠣᠯᠣᠨ ᠮᠧᠳᠢᠶᠠ ᠶᠢᠨ ᠬᠠᠲᠤᠭᠲᠠᠢ ᠨᠠᠷ ᠥᠨᠥᠳᠥᠷ ᠬᠠᠭᠠᠨ ᠤ ᠬᠠᠮᠤᠭ ᠨᠣᠶᠠᠳ ᠲᠠᠢ ᠮᠥᠨ ᠡᠢᠨ ᠬᠦ ᠶᠠᠷᠢᠬᠤ ᠪᠥᠭᠡᠳ ᠪᠠᠰᠤᠮᠵᠢᠯᠠᠯ ᠪᠣᠯᠣᠨ ᠡᠪᠳᠡᠷᠡᠯᠴᠡᠯ ᠬᠠᠩ᠋ᠭᠠᠯᠲᠠᠲᠠᠢ ᠪᠣᠯᠬᠤ ᠨᠢ ᠡ᠃
19 ᠬᠡᠷᠪᠡ ᠬᠠᠭᠠᠨ ᠲᠠᠭᠠᠯᠠᠪᠠᠯ ᠸᠠᠱᠲ᠋ᠢ ᠳᠤ ᠬᠠᠭᠠᠨ ᠠᠬᠠᠰᠦ᠋ᠶᠧᠷᠦ᠋ ᠶᠢᠨ ᠡᠮᠦᠨᠡ ᠢᠷᠡᠵᠦ ᠦᠯᠦ ᠪᠣᠯᠬᠤ ᠵᠠᠷᠯᠢᠭ ᠪᠠᠭᠤᠯᠭᠠᠵᠤ᠂ ᠡᠭᠦᠨ ᠢ ᠫᠧᠷᠰ ᠪᠣᠯᠣᠨ ᠮᠧᠳᠢᠶᠠ ᠳᠤ ᠡᠷᠭᠢᠯᠲᠡ ᠦᠭᠡᠢ ᠲᠣᠭᠲᠠᠭᠠᠯ ᠪᠣᠯᠭᠠᠨ ᠲᠣᠭᠲᠠᠭᠠᠬᠤ ᠶᠣᠰᠣᠲᠠᠢ᠃ ᠮᠥᠨ ᠬᠠᠲᠤᠨ ᠤ ᠪᠠᠢᠷᠢ ᠰᠠᠭᠤᠷᠢ ᠶᠢ ᠲᠡᠭᠦᠨ ᠡᠴᠡ ᠵᠣᠬᠢᠰᠲᠠᠢ ᠥᠭᠡᠷᠡ ᠪᠦᠰᠡᠭᠦᠢ ᠳᠦ ᠥᠭᠭᠥᠨᠡ ᠤᠤ︖ 20 ᠬᠠᠭᠠᠨ ᠤ ᠲᠡᠷᠡ ᠵᠠᠷᠯᠢᠭ ᠬᠠᠭᠠᠨ ᠤ ᠠᠭᠤᠤ ᠬᠠᠭᠠᠨᠴᠢᠯᠠᠯ ᠳᠠᠶᠠᠭᠠᠷ ᠰᠣᠨᠣᠰᠳᠠᠬᠤ ᠳᠤ᠂ ᠡᠷᠬᠢᠮ ᠴᠤ ᠪᠠᠶᠢᠭ᠂ ᠡᠭᠡᠯ ᠴᠤ ᠪᠠᠶᠢᠭ᠂ ᠡᠮᠡᠭᠲᠡᠢᠴᠦᠳ ᠪᠦᠭᠦᠳᠡᠭᠡᠷ ᠨᠥᠬᠥᠷ ᠢᠶᠡᠨ ᠬᠦᠨᠳᠦᠯᠡᠬᠦ ᠪᠣᠯᠣᠨᠠ》 ᠭᠡᠪᠡ᠃
21 ᠡᠨᠡ ᠦᠭᠡ ᠬᠠᠭᠠᠨ ᠪᠣᠯᠣᠨ ᠨᠣᠶᠠᠳ ᠤᠨ ᠬᠢᠨᠢ ᠲᠠᠭᠠᠯᠠᠯ ᠳᠤ ᠨᠡᠢᠴᠡᠭᠰᠡᠨ ᠢᠶᠡᠷ ᠬᠠᠭᠠᠨ ᠮᠧᠮᠦ᠋ᠺᠠᠨ ᠤ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠦᠢᠯᠡᠳᠪᠡ᠃ 22 ᠲᠡᠷᠡ ᠪᠡᠷ ᠪᠦᠬᠦ ᠮᠤᠵᠢ ᠶᠢᠨ ᠦᠨᠳᠦᠰᠦᠲᠡᠨ ᠪᠣᠯᠭᠠᠨ ᠤ ᠥᠪᠡᠷ ᠦᠨ ᠬᠢᠨᠢ ᠬᠡᠯᠡ ᠪᠡᠷ᠂ ᠠᠷᠠᠳ ᠲᠦᠮᠡᠨ ᠪᠣᠯᠭᠠᠨ ᠤ ᠥᠪᠡᠷ ᠦᠨ ᠬᠢᠨᠢ ᠦᠰᠦᠭ ᠢᠶᠡᠷ ᠵᠠᠷᠯᠢᠭ ᠪᠢᠴᠢᠵᠦ᠂ ᠡᠷᠡ ᠬᠥᠮᠦᠨ ᠪᠦᠷᠢ ᠥᠪᠡᠷ ᠦᠨ ᠢᠶᠠᠨ ᠭᠡᠷ ᠲᠦ ᠡᠵᠡᠨ ᠪᠠᠢᠬᠤ ᠶᠣᠰᠣᠲᠠᠢ ᠶᠢ ᠦᠨᠳᠦᠰᠦᠲᠡᠨ ᠪᠦᠷᠢ ᠶᠢᠨ ᠬᠡᠯᠡ ᠪᠡᠷ ᠲᠤᠩ᠋ᠬᠠᠭᠯᠠᠭᠰᠠᠨ ᠪᠠᠢᠨᠠ᠃