ᠶᠧᠷᠧᠮᠢᠶᠠ ᠨᠢᠭᠡ
1 ᠪᠢᠨᠶᠠᠮᠢᠨ ᠨᠤᠲᠤᠭ ᠤᠨ ᠠᠨᠠᠲ᠋ᠣᠲ ᠳᠠᠬᠢ ᠲᠠᠬᠢᠯᠴᠢᠳ ᠤᠨ ᠨᠢᠭᠡ ᠾᠢᠯᠺᠢᠶᠠ ᠶᠢᠨ ᠬᠦᠦ ᠶᠧᠷᠧᠮᠢᠶᠠ ᠶᠢᠨ ᠦᠭᠡᠰ᠄ 2 ᠶᠦᠳᠠ ᠶᠢᠨ ᠬᠠᠭᠠᠨ᠂ ᠠᠮᠣᠨ ᠤ ᠬᠦᠦ ᠶᠣᠰᠢᠶᠠ ᠶᠢᠨ ᠡᠳᠦᠷ ᠤᠳ ᠲᠤ᠂ ᠬᠠᠭᠠᠨᠴᠢᠯᠠᠯ ᠤᠨ ᠬᠢᠨᠢ ᠠᠷᠪᠠᠨ ᠭᠤᠷᠪᠠᠳᠤᠭᠠᠷ ᠣᠨ ᠳᠤ ᠶᠣᠬᠣᠸᠠ ᠶᠢᠨ ᠦᠭᠡᠰ ᠶᠧᠷᠧᠮᠢᠶᠠ ᠳᠤ ᠪᠠᠭᠤᠵᠤ᠂ 3 ᠶᠦᠳᠠ ᠶᠢᠨ ᠬᠠᠭᠠᠨ᠂ ᠶᠣᠰᠢᠶᠠ ᠶᠢᠨ ᠬᠦᠦ ᠶᠧᠬᠣᠢᠶᠠᠺᠢᠮ ᠤᠨ ᠡᠳᠦᠷ ᠤᠳ ᠢᠶᠠᠷ᠂ ᠪᠠᠰᠠ ᠶᠦᠳᠠ ᠶᠢᠨ ᠬᠠᠭᠠᠨ᠂ ᠶᠣᠰᠢᠶᠠ ᠶᠢᠨ ᠬᠦᠦ ᠽᠧᠳᠧᠺᠢᠶᠠ ᠶᠢᠨ ᠬᠠᠭᠠᠨᠴᠢᠯᠠᠯ ᠤᠨ ᠠᠷᠪᠠᠨ ᠨᠢᠭᠡᠳᠦᠭᠡᠷ ᠣᠨ ᠤ ᠲᠠᠪᠤᠳᠤᠭᠠᠷ ᠰᠠᠷᠠ ᠳᠤ ᠶᠧᠷᠦ᠋ᠰᠠᠯᠧᠮ ᠤᠨ ᠬᠢᠨ ᠴᠥᠯᠡᠭᠳᠡᠬᠦ ᠬᠦᠷᠲᠡᠯᠡ ᠢᠷᠡᠭᠰᠡᠭᠡᠷ ᠪᠠᠢᠪᠠ᠃
ᠶᠧᠷᠧᠮᠢᠶᠠ ᠳᠠᠭᠤᠳᠠᠭᠳᠠᠪᠠ
4 ᠶᠣᠬᠣᠸᠠ ᠶᠢᠨ ᠦᠭᠡ ᠨᠠᠳᠠ ᠤᠷᠤᠭᠤ ᠢᠷᠡᠵᠦ᠄
5 《ᠡᠬᠡ ᠶᠢᠨ ᠲᠠᠨᠢ ᠬᠡᠪᠡᠯᠢ ᠳᠤ ᠪᠦᠷᠢᠯᠳᠦᠭᠦᠯᠬᠦ ᠡᠴᠡ ᠪᠡᠨ ᠡᠮᠦᠨᠡ ᠪᠢ ᠴᠢᠮᠠᠶᠢ ᠮᠡᠳᠡᠭᠰᠡᠨ ᠲᠥᠷᠥᠬᠦ ᠡᠴᠡ ᠴᠢᠨᠢ ᠴᠤ ᠡᠮᠦᠨᠡ ᠪᠢ ᠴᠢᠮᠠᠶᠢ ᠲᠤᠰᠠᠭᠠᠷᠯᠠᠵᠤ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠡᠰᠢ ᠦᠵᠡᠭᠦᠯᠦᠭᠴᠢ ᠪᠣᠯᠭᠠᠨ ᠲᠣᠮᠢᠯᠠᠭᠰᠠᠨ》 ᠭᠡᠵᠡᠢ᠃
6 ᠪᠢ᠄ 《ᠥ᠂ ᠡᠵᠡᠨ ᠶᠣᠬᠣᠸᠠ︕ ᠪᠢ ᠨᠠᠰᠤ ᠪᠠᠭᠠ ᠪᠣᠯᠬᠣᠷ ᠶᠠᠭᠠᠬᠢᠵᠤ ᠶᠠᠷᠢᠬᠤ ᠪᠠᠨ ᠮᠡᠳᠡᠬᠦ ᠦᠭᠡᠢ︕》 ᠭᠡᠬᠦ ᠳᠦ᠂
7 ᠶᠣᠬᠣᠸᠠ ᠨᠠᠳᠠ ᠳᠤ᠄ 《〈ᠨᠠᠰᠤ ᠪᠠᠭᠠ〉 ᠭᠡᠵᠦ ᠪᠦᠦ ᠬᠡᠯᠡ ᠢᠯᠡᠭᠡᠬᠦ ᠭᠠᠵᠠᠷ ᠪᠦᠷᠢ ᠳᠤ ᠮᠢᠨᠢ ᠴᠢ ᠶᠠᠪᠤᠵᠤ ᠲᠤᠰᠢᠶᠠᠬᠤ ᠪᠦᠬᠦᠨ ᠢ ᠮᠢᠨᠢ ᠴᠢ ᠶᠠᠷᠢᠬᠤ ᠪᠣᠯᠣᠨᠠ
8 ᠴᠢ ᠬᠡᠨ ᠡᠴᠡ ᠴᠤ ᠠᠶᠤᠬᠤ ᠬᠡᠷᠡᠭ ᠦᠭᠡᠢ ᠪᠢ ᠴᠢᠮᠠ ᠲᠠᠢ ᠬᠠᠮᠲᠤ ᠪᠠᠢᠵᠤ ᠴᠢᠮᠠᠶᠢ ᠭᠡᠲᠦᠯᠭᠡᠨᠡ᠂ ᠶᠣᠬᠣᠸᠠ ᠪᠢ ᠪᠠᠲᠤᠲᠠᠢ ᠬᠡᠯᠡᠵᠦ ᠪᠠᠢᠨᠠ》 ᠭᠡᠪᠡ᠃
9 ᠶᠣᠬᠣᠸᠠ ᠮᠤᠲᠤᠷ ᠢᠶᠠᠨ ᠰᠤᠩ᠋ᠭᠠᠨ ᠮᠢᠨᠦ ᠠᠮᠠᠨ ᠳᠤ ᠬᠦᠷᠭᠡᠵᠦ ᠨᠠᠳᠠ ᠳᠤ᠄ 《ᠬᠠᠷᠠ᠂ ᠪᠢ ᠥᠪᠡᠷ ᠦᠨ ᠢᠶᠠᠨ ᠦᠭᠡᠰ ᠢ ᠴᠢᠨᠦ ᠠᠮᠠᠨ ᠳᠤ ᠬᠢᠯᠡ᠂
10 ᠬᠠᠷᠠ᠂ ᠥᠨᠥᠳᠥᠷ ᠪᠢ ᠤᠯᠤᠰ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠢ ᠵᠤᠯᠭᠠᠭᠠᠬᠤ ᠪᠠ ᠵᠤᠮᠠᠭᠠᠬᠤ ᠪᠠᠷ ᠰᠦᠢᠳᠬᠡᠬᠦ ᠪᠠ ᠰᠥᠨᠥᠭᠡᠬᠦ ᠪᠡᠷ ᠰᠡᠷᠭᠦᠭᠡᠬᠦ ᠪᠠ ᠰᠠᠭᠤᠯᠭᠠᠬᠤ ᠪᠠᠷ ᠴᠢᠮᠠᠶᠢ ᠲᠡᠳᠡᠨ ᠦ ᠳᠡᠭᠡᠷᠡ ᠲᠣᠮᠢᠯᠠᠶᠠ》 ᠭᠡᠪᠡ᠃
11 ᠶᠣᠬᠣᠸᠠ ᠶᠢᠨ ᠦᠭᠡ ᠨᠠᠳᠠ ᠳᠡᠭᠡᠷᠡ ᠢᠷᠡᠵᠦ᠄ 《ᠶᠧᠷᠧᠮᠢᠶᠠ᠂ ᠴᠢ ᠶᠠᠭᠤ ᠬᠠᠷᠠᠵᠤ ᠪᠠᠢᠨᠠ ᠪᠤᠢ︖》 ᠭᠡᠰᠡᠨ ᠳᠦ᠂ ᠪᠢ᠄ 《ᠭᠦᠢᠯᠡᠰᠦᠨ ᠮᠣᠳᠣᠨ ᠤ ᠮᠥᠴᠢᠷ ᠢ ᠬᠠᠷᠠᠵᠤ ᠪᠠᠢᠨᠠ》 ᠭᠡᠪᠡ᠃ 12 ᠶᠣᠬᠣᠸᠠ ᠨᠠᠳᠠ ᠳᠤ᠄ 《ᠴᠢ ᠰᠠᠢᠨ ᠬᠠᠷᠠᠯᠠ᠃ ᠪᠢ ᠦᠭᠡ ᠶᠢᠨ ᠢᠶᠠᠨ ᠪᠡᠶᠡᠯᠡᠭᠳᠡᠬᠦ ᠶᠢ ᠬᠠᠷᠠᠵᠤ ᠯᠠ 1 ᠪᠠᠢᠨᠠ》 ᠭᠡᠪᠡ᠃ 13 ᠶᠣᠬᠣᠸᠠ ᠶᠢᠨ ᠦᠭᠡ ᠨᠠᠳᠠ ᠳᠤ ᠳᠠᠬᠢᠨ ᠢᠷᠡᠵᠦ᠄ 《ᠴᠢ ᠶᠠᠭᠤ ᠬᠠᠷᠠᠵᠤ ᠪᠠᠢᠨᠠ ᠪᠤᠢ︖》 ᠭᠡᠯᠡ᠃ ᠪᠢ᠄ 《ᠬᠣᠢᠨᠠ ᠲᠠᠯᠠ ᠠᠴᠠ ᠪᠠᠨ ᠬᠠᠵᠠᠢᠭᠰᠠᠨ ᠪᠤᠴᠠᠯᠵᠤ ᠪᠤᠢ ᠲᠣᠭᠣᠭᠠ ᠶᠢ ᠬᠠᠷᠠᠵᠤ ᠪᠠᠢᠨᠠ》 ᠭᠡᠪᠡ᠃
14 ᠶᠣᠬᠣᠸᠠ ᠨᠠᠳᠠ ᠳᠤ᠄ 《ᠡᠨᠡ ᠨᠤᠲᠤᠭ ᠤᠨ ᠰᠠᠭᠤᠭᠠᠯᠢᠴᠢᠳ ᠪᠦᠭᠦᠳᠡ ᠶᠢᠨ ᠳᠡᠭᠡᠷᠡ ᠬᠣᠢᠲᠤ ᠵᠦᠭ ᠡᠴᠡ ᠬᠣᠣᠷ ᠬᠥᠨᠥᠭᠡᠯ ᠬᠥᠮᠥᠷᠢᠬᠦ ᠪᠣᠯᠣᠨᠠ᠃ 15 ᠶᠣᠬᠣᠸᠠ ᠪᠢ ᠪᠠᠲᠤᠲᠠᠢ ᠬᠡᠯᠡᠶᠡ᠃ ᠬᠠᠷᠠ᠂ ᠪᠢ ᠬᠣᠢᠲᠤ ᠵᠦᠭ ᠦᠨ ᠬᠠᠭᠠᠨᠴᠢᠯᠠᠯ ᠤᠳ ᠤᠨ ᠪᠦᠬᠦ ᠦᠨᠳᠦᠰᠦᠲᠡᠨ ᠢ ᠳᠠᠭᠤᠳᠠᠵᠤ ᠪᠠᠢᠨᠠ︕ ᠲᠡᠳᠡ ᠢᠷᠡᠵᠦ ᠶᠧᠷᠦ᠋ᠰᠠᠯᠧᠮ ᠤᠨ ᠬᠠᠭᠠᠯᠭᠠ ᠨᠤᠭᠤᠳ ᠳᠡᠭᠡᠷᠡ ᠥᠪᠡᠷ ᠥᠪᠡᠷᠰᠡᠳ ᠦᠨ ᠢᠶᠠᠨ ᠰᠠᠭᠤᠳᠠᠯ ᠢ ᠪᠣᠰᠬᠠᠬᠤ ᠪᠥᠭᠡᠳ ᠬᠣᠲᠠ ᠶᠢᠨ ᠡᠷᠭᠢᠨ ᠲᠣᠭᠣᠷᠢᠨ ᠤ ᠬᠢᠨᠢ ᠬᠡᠷᠡᠮ ᠢ᠂ ᠮᠥᠨ ᠶᠦᠳᠠ ᠶᠢᠨ ᠪᠦᠬᠦ ᠬᠣᠲᠠ ᠶᠢ ᠴᠣᠬᠢᠨᠠ᠃ 16 ᠲᠡᠢᠨ ᠬᠦ ᠪᠢ ᠨᠠᠮᠠᠶᠢ ᠣᠷᠬᠢᠵᠤ᠂ ᠪᠤᠰᠤᠳ ᠪᠤᠷᠬᠠᠳ ᠲᠤ ᠲᠠᠬᠢᠯ ᠡᠷᠭᠦᠨ᠂ ᠥᠪᠡᠷᠰᠡᠳ ᠦᠨ ᠭᠠᠷ ᠤᠨ ᠪᠦᠲᠦᠭᠡᠯ ᠳᠡᠭᠡᠨ ᠮᠥᠷᠭᠥᠭᠰᠡᠨ ᠪᠤᠵᠠᠷ ᠦᠢᠯᠡ ᠶᠢᠨ ᠬᠢᠨᠢ ᠤᠯᠠᠮ ᠢᠶᠠᠷ ᠠᠷᠠᠳ ᠲᠦᠮᠡᠨ ᠳᠡᠭᠡᠨ ᠶᠠᠯᠠ ᠤᠨᠤᠭᠠᠨᠠ᠃ 17 ᠣᠳᠣ ᠴᠢ ᠪᠦᠰᠡ ᠪᠡᠨ ᠴᠢᠩ᠋ᠭᠠᠯᠠᠵᠤ ᠪᠣᠰᠣᠭᠠᠳ ᠴᠢᠮᠠ ᠳᠤ ᠲᠤᠰᠢᠶᠠᠬᠤ ᠪᠦᠬᠦᠨ ᠢ ᠮᠢᠨᠢ ᠲᠡᠳᠡᠨ ᠳᠦ ᠶᠠᠷᠢ᠃ ᠲᠡᠳᠡᠨ ᠦ ᠡᠮᠦᠨᠡ ᠪᠦᠦ ᠰᠦᠷᠳᠡ᠂ ᠡᠰᠡ ᠲᠡᠭᠡᠪᠡᠯ ᠪᠢ ᠴᠢᠮᠠᠶᠢ ᠲᠡᠳᠡᠨ ᠦ ᠡᠮᠦᠨᠡ ᠰᠦᠷᠳᠡᠭᠦᠯᠬᠦ ᠪᠣᠯᠣᠨᠠ᠃ 18 ᠬᠠᠷᠠ᠂ ᠥᠨᠥᠳᠥᠷ ᠪᠢ ᠥᠪᠡᠷ ᠢᠶᠡᠨ ᠴᠢᠮᠠᠶᠢ ᠲᠡᠷᠡ ᠪᠦᠬᠦ ᠨᠤᠲᠤᠭ ᠤᠨ ᠬᠢᠨ ᠤ ᠡᠮᠦᠨᠡ᠂ ᠶᠦᠳᠠ ᠶᠢᠨ ᠬᠠᠭᠠᠳ᠂ ᠲᠦᠰᠢᠮᠡᠳ᠂ ᠲᠠᠬᠢᠯᠴᠢᠳ ᠬᠢᠭᠡᠳ ᠲᠡᠷᠡ ᠨᠤᠲᠤᠭ ᠤᠨ ᠠᠷᠠᠳ ᠲᠦᠮᠡᠨ ᠦ ᠡᠮᠦᠨᠡ ᠪᠡᠬᠢᠯᠡᠯᠲᠡᠲᠦ ᠬᠣᠲᠠ᠂ ᠲᠡᠮᠦᠷ ᠪᠠᠭᠠᠨᠠ ᠪᠤᠶᠤ ᠬᠦᠷᠡᠯ ᠬᠡᠷᠡᠮ ᠮᠡᠲᠦ ᠪᠣᠯᠭᠠᠯᠠ᠃ 19 ᠲᠡᠳᠡ ᠴᠢᠮᠠ ᠲᠠᠢ ᠲᠤᠯᠤᠯᠳᠤᠬᠤ ᠪᠣᠯᠪᠠᠴᠤ ᠴᠢᠮᠠᠶᠢ ᠳᠡᠢᠯᠬᠦ ᠦᠭᠡᠢ᠂ ᠪᠢ ᠴᠢᠮᠠ ᠲᠠᠢ ᠬᠠᠮᠲᠤ ᠪᠠᠢᠵᠤ᠂ ᠴᠢᠮᠠᠶᠢ ᠭᠡᠲᠦᠯᠭᠡᠨᠡ᠃ ᠶᠣᠬᠣᠸᠠ ᠪᠢ ᠪᠠᠲᠤᠲᠠᠢ ᠬᠡᠯᠡᠵᠦ ᠪᠠᠢᠨᠠ》 ᠭᠡᠪᠡ᠃