ᠶᠧᠷᠧᠮᠢᠶᠠ ᠳᠥᠴᠢ ᠶᠢᠰᠦ
ᠠᠮᠣᠨ ᠤ ᠲᠠᠯᠠ ᠪᠠᠷ ᠬᠢ ᠡᠰᠢ ᠦᠵᠡᠭᠦᠯᠦᠯᠭᠡ
1 ᠠᠮᠣᠨᠴᠤᠳ ᠤᠨ ᠲᠤᠬᠠᠢ᠄ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠢᠰᠷᠧᠯ ᠬᠥᠪᠡᠭᠦᠳ ᠦᠭᠡᠢ ᠤᠤ︖ ᠲᠡᠭᠦᠨ ᠳᠦ ᠥᠪ ᠵᠠᠯᠭᠠᠮᠵᠢᠯᠠᠭᠴᠢ ᠦᠭᠡᠢ ᠤᠤ︖ ᠶᠠᠭᠠᠬᠢᠭᠠᠳ ᠮᠣᠯᠧᠺ ᠭᠠᠳ᠋ ᠢ ᠡᠵᠡᠮᠰᠢᠵᠦ᠂ ᠲᠡᠭᠦᠨ ᠦ ᠠᠷᠠᠳ ᠲᠦᠮᠡᠨ ᠬᠣᠲᠠ ᠨᠤᠭᠤᠳ ᠲᠤᠨᠢ ᠰᠠᠭᠤᠷᠢᠰᠢᠪᠠ︖》
2 ᠲᠡᠢᠮᠦ ᠡᠴᠡ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠬᠠᠷᠠ᠂ ᠷᠠᠪᠠ ᠶᠢᠨ ᠠᠮᠣᠨᠴᠤᠳ ᠲᠤ ᠪᠠᠢᠯᠳᠤᠭᠠᠨ ᠤ ᠪᠦᠷᠢᠶᠡᠨ ᠳᠠᠭᠤ ᠶᠢ ᠰᠣᠨᠣᠰᠬᠠᠶᠠ᠂ ᠲᠡᠷᠡ ᠡᠳᠦᠷ ᠤᠳ ᠢᠷᠡᠵᠦ ᠪᠠᠢᠨᠠ᠂ ᠷᠠᠪᠠ ᠨᠤᠷᠠᠩᠬᠠᠢ ᠣᠪᠣᠭᠠ ᠪᠣᠯᠵᠤ᠂ ᠬᠣᠲᠠ ᠲᠣᠰᠬᠣᠳ ᠨᠢ ᠰᠢᠲᠠᠭᠠᠭᠳᠠᠬᠤ ᠪᠥᠭᠡᠳ ᠢᠰᠷᠧᠯ ᠡᠵᠡᠮᠰᠢᠯ ᠢᠶᠠᠨ ᠪᠤᠴᠠᠭᠠᠨ ᠡᠵᠡᠮᠰᠢᠬᠦ ᠪᠣᠯᠣᠨᠠ᠂》 ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃
3 《ᠾᠧᠱᠪᠣᠨ ᠡ᠂ ᠭᠠᠰᠢᠭᠤᠳᠠᠭᠲᠤᠨ︕ ᠠᠢ ᠬᠣᠭᠣᠰᠣᠷᠠᠭᠰᠠᠨ᠂ ᠷᠠᠪᠠ ᠶᠢᠨ ᠥᠬᠢᠳ ᠡ᠂ ᠬᠠᠰᠬᠢᠷᠤᠭᠲᠤᠨ᠂ ᠲᠠᠭᠠᠷ ᠨᠥᠮᠥᠷᠴᠦ ᠭᠠᠰᠠᠯ᠂ ᠬᠠᠨᠠ ᠬᠡᠷᠡᠮ ᠦᠨ ᠳᠣᠲᠣᠭᠤᠷ ᠨᠠᠰᠢ ᠴᠠᠰᠢ ᠪᠠᠨ ᠭᠦᠶᠦ᠂ ᠮᠣᠯᠧᠺ ᠲᠠᠬᠢᠯᠴᠢᠳ ᠪᠣᠯᠣᠨ ᠪᠠᠷᠠ ᠪᠣᠯᠣᠭᠰᠠᠳ ᠲᠠᠢ ᠪᠠᠨ ᠬᠠᠮᠲᠤ ᠴᠥᠯᠡᠯᠭᠡ ᠳᠦ ᠶᠠᠪᠤᠬᠤ ᠪᠣᠯᠣᠨᠠ᠃
4 ᠲᠡᠷᠰᠯᠡᠭᠦᠦ ᠥᠬᠢᠨ ᠴᠢ᠂ ᠶᠠᠭᠤᠨ ᠳᠤ ᠬᠥᠨᠳᠡᠢ ᠪᠠᠷ ᠢᠶᠠᠨ᠂ ᠤᠰᠤ ᠲᠠᠢ ᠬᠥᠨᠳᠡᠢ ᠪᠠᠷ ᠢᠶᠠᠨ ᠰᠠᠢᠷᠬᠠᠨᠠ ᠪᠤᠢ︕ ᠶᠠᠭᠤᠨ ᠳᠤ ᠡᠳ᠋ ᠬᠥᠷᠥᠩᠭᠡᠨ ᠳᠡᠭᠡᠨ ᠢᠲᠡᠭᠡᠵᠦ 〈ᠨᠠᠮᠠᠶᠢ ᠬᠡᠨ ᠳᠣᠪᠲᠣᠯᠣᠨᠠ︖〉 ᠭᠡᠬᠦ ᠨᠢ ᠪᠤᠢ︖
5 ᠠᠤᠭᠠ ᠬᠦᠴᠦᠲᠦ ᠡᠵᠡᠨ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃ ᠬᠠᠷᠠ᠂ ᠪᠢ ᠡᠷᠭᠢᠨ ᠲᠣᠭᠣᠷᠢᠨ ᠠᠴᠠ ᠴᠢᠨᠢ ᠴᠢᠮᠠ ᠳᠤ ᠠᠶᠤᠯ ᠠᠢᠳᠠᠰ ᠢ ᠠᠪᠴᠢᠷᠠᠨᠠ᠃》 《ᠲᠠ ᠨᠠᠷ ᠤᠨ ᠬᠥᠮᠦᠨ ᠪᠦᠷᠢ ᠵᠦᠭ ᠪᠦᠷᠢ ᠳᠤ ᠲᠠᠷᠬᠠᠭᠠᠭᠳᠠᠵᠤ ᠳᠦᠷᠪᠡᠭᠰᠡᠳ ᠢ ᠴᠢᠨᠢ ᠴᠤᠭᠯᠠᠭᠤᠯᠬᠤ ᠬᠥᠮᠦᠨ ᠦᠭᠡᠢ ᠪᠣᠯᠣᠨᠠ᠃
6 ᠬᠠᠷᠢᠨ ᠡᠭᠦᠨ ᠦ ᠳᠠᠷᠠᠭᠠ ᠪᠢ ᠠᠮᠣᠨᠴᠤᠳ ᠤᠨ ᠴᠥᠯᠡᠭᠳᠡᠭᠰᠡᠳ ᠢ ᠪᠤᠴᠠᠭᠠᠨᠠ᠂》 ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃
ᠡᠳᠣᠮ ᠤᠨ ᠲᠠᠯᠠ ᠪᠠᠷ ᠬᠢ ᠡᠰᠢ ᠦᠵᠡᠭᠦᠯᠦᠯᠭᠡ
7 ᠡᠳᠣᠮ ᠤᠨ ᠲᠤᠬᠠᠢ᠄ ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠮᠡᠷᠭᠡᠨ ᠤᠬᠠᠭᠠᠨ ᠲᠧᠮᠠᠨ ᠳᠤ ᠠᠯᠠᠭᠠ ᠪᠣᠯᠣᠭᠰᠠᠨ ᠭᠡᠵᠢ ᠤᠤ︖ ᠴᠡᠴᠡᠨ ᠬᠥᠮᠦᠨ ᠦ ᠵᠥᠪᠯᠡᠯᠭᠡ ᠠᠷᠢᠯᠤᠭᠰᠠᠨ ᠭᠡᠵᠢ ᠤᠤ︖ ᠲᠡᠳᠡᠨ ᠦ ᠮᠡᠷᠭᠡᠨ ᠤᠬᠠᠭᠠᠨ ᠡᠴᠦᠰᠯᠡᠭᠰᠡᠨ ᠭᠡᠵᠢ ᠤᠤ︖
8 ᠡᠷᠭᠢᠵᠦ ᠵᠢᠭᠤᠲᠠ᠂ ᠳ᠋ᠧᠳᠠᠨ ᠤ ᠰᠠᠭᠤᠭᠠᠯᠢᠴᠢᠳ ᠡ᠂ ᠭᠦᠨ ᠨᠦᠬᠡᠨ ᠳᠦ ᠨᠢᠭᠤᠭᠳᠠ ᠪᠢ ᠡᠰᠡᠦ᠋ ᠳᠤ ᠭᠠᠮᠰᠢᠭ ᠪᠠᠭᠤᠯᠭᠠᠨᠠ᠂ ᠲᠡᠭᠦᠨ ᠢ ᠰᠢᠳᠬᠡᠬᠦ ᠴᠠᠭ ᠪᠣᠯᠣᠯᠠ᠃
9 ᠦᠵᠦᠮ ᠲᠡᠭᠦᠭᠴᠢᠳ ᠴᠢᠮᠠ ᠳᠡᠭᠡᠷᠡ ᠢᠷᠡᠪᠡᠯ᠂ ᠵᠢᠭᠠᠬᠠᠨ ᠦᠯᠡᠳᠡᠭᠡᠳᠡᠭ ᠦᠭᠡᠢ ᠭᠡᠵᠢ ᠤᠤ︖ ᠰᠥᠨᠢ ᠪᠠᠷ ᠬᠤᠯᠠᠭᠠᠢᠴᠢᠳ ᠢᠷᠡᠪᠡᠯ᠂ ᠬᠦᠰᠡᠭᠰᠡᠨ ᠵᠦᠢᠯᠡᠰ ᠢᠶᠡᠨ ᠯᠠ ᠲᠣᠨᠣᠳᠠᠭ ᠪᠢᠰᠢ ᠤᠤ︖
10 ᠬᠠᠷᠢᠨ ᠪᠢ ᠡᠰᠡᠦ᠋ ᠶᠢ ᠨᠢᠴᠦᠭᠦᠷᠡᠭᠦᠯᠦᠨᠡ᠂ ᠪᠢ ᠲᠡᠭᠦᠨ ᠦ ᠨᠢᠭᠤᠴᠠ ᠭᠠᠵᠠᠷ ᠤᠳ ᠢ ᠰᠡᠬᠦᠬᠦ ᠲᠤᠯᠠ ᠲᠡᠷᠡ ᠥᠪᠡᠷ ᠢ ᠪᠠᠨ ᠳᠠᠯᠳᠠᠯᠠᠵᠤ ᠴᠢᠳᠠᠬᠤ ᠦᠭᠡᠢ᠂ ᠲᠡᠭᠦᠨ ᠦ ᠦᠷᠡ ᠤᠳᠤᠮ᠂ ᠰᠠᠳᠤᠨ ᠲᠥᠷᠥᠯ ᠪᠣᠯᠣᠨ ᠠᠢᠯ ᠬᠥᠷᠰᠢ ᠪᠦᠭᠦᠳᠡ ᠤᠰᠠᠳᠴᠤ᠂ ᠲᠡᠷᠡ ᠥᠪᠡᠷ ᠢᠶᠡᠨ ᠴᠤ ᠠᠯᠠᠭᠠ ᠪᠣᠯᠣᠨᠠ᠃
11 ᠴᠢ ᠥᠨᠥᠴᠢᠷᠡᠭᠰᠡᠳ ᠢᠶᠡᠨ ᠨᠠᠳᠠ ᠳᠤ ᠦᠯᠡᠳᠡᠭᠡ ᠪᠢ ᠲᠡᠳᠡᠨ ᠢ ᠠᠮᠢᠳᠤ ᠦᠯᠡᠳᠡᠭᠡᠨᠡ ᠪᠡᠯᠪᠡᠰᠦᠨ ᠡᠮᠡᠭᠲᠡᠢᠴᠦᠳ ᠴᠢᠨᠢ ᠨᠠᠳᠠ ᠳᠤ ᠨᠠᠢᠳᠠᠬᠤ ᠪᠣᠯᠣᠨᠠ᠂》
12 ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠬᠠᠷᠠ᠂ ᠡᠨᠡ ᠠᠶᠠᠭᠠᠨ ᠠᠴᠠ ᠤᠤᠭᠤᠬᠤ ᠶᠠᠯᠠ ᠦᠭᠡᠢ ᠬᠥᠮᠦᠨ ᠴᠤ ᠵᠠᠪᠠᠯ ᠤᠤᠭᠤᠬᠤ ᠠᠲᠠᠯᠠ ᠴᠢ ᠶᠠᠭᠠᠬᠢᠨ ᠰᠢᠳᠬᠡᠯ ᠠᠪᠤᠯ ᠦᠭᠡᠢ ᠥᠩᠭᠡᠷᠡᠨᠡ ᠪᠤᠢ︖ ᠴᠢ ᠰᠢᠳᠬᠡᠯ ᠠᠪᠤᠯ ᠦᠭᠡᠢ ᠥᠩᠭᠡᠷᠡᠬᠦ ᠦᠭᠡᠢ᠂ ᠵᠠᠪᠠᠯ ᠤᠤᠭᠤᠬᠤ ᠪᠣᠯᠣᠨᠠ᠃ 13 ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃ ᠮᠢᠨᠦ ᠠᠮᠢᠳᠤ ᠯᠤᠭᠠ ᠨᠢᠭᠡᠨ ᠠᠳᠠᠯᠢ ᠪᠠᠲᠤ ᠦᠨᠡᠨ ᠭᠡᠪᠡᠯ᠂ ᠪᠣᠽᠷᠠ ᠪᠠᠯᠭᠠᠰᠤ ᠪᠣᠯᠵᠤ᠂ ᠵᠢᠭ᠍ᠰᠢᠯ᠂ ᠵᠢᠪᠡᠭᠦᠴᠡᠯ᠂ ᠬᠠᠷᠢᠶᠠᠯ ᠪᠣᠯᠣᠨᠠ᠂ ᠲᠡᠭᠦᠨ ᠦ ᠬᠣᠲᠠ ᠲᠣᠰᠬᠣᠳ ᠪᠦᠭᠦᠳᠡ ᠡᠭᠦᠷᠢᠳᠡ ᠶᠢᠨ ᠪᠠᠯᠭᠠᠰᠤ ᠪᠣᠯᠣᠨᠠ᠃》
14 ᠪᠢ ᠶᠣᠬᠣᠸᠠ ᠶᠢᠨ ᠶᠠᠪᠤᠭᠤᠯᠤᠭᠰᠠᠨ ᠮᠡᠳᠡᠭᠡ ᠶᠢ ᠰᠣᠨᠣᠰᠣᠯᠠ᠄ ᠨᠢᠭᠡᠨ ᠡᠯᠴᠢ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠤᠷᠤᠭᠤ ᠢᠯᠡᠭᠡᠭᠳᠡᠵᠦ᠄ 《ᠴᠤᠭᠯᠠᠷᠠᠭᠠᠳ ᠲᠡᠭᠦᠨ ᠦ ᠥᠭᠡᠳᠡ ᠡᠴᠡ ᠣᠴᠢᠵᠤ᠂ ᠲᠡᠭᠦᠨ ᠢ ᠴᠣᠬᠢ᠂ ᠪᠣᠰᠴᠠᠭᠠᠵᠤ ᠪᠠᠢᠯᠳᠤᠭᠲᠤᠨ》 ᠭᠡᠯᠡ᠃
15 ᠶᠣᠬᠣᠸᠠ ᠠᠢᠯᠠᠳᠤᠨ᠄ 《ᠬᠠᠷᠠ᠂ ᠪᠢ ᠴᠢᠮᠠᠶᠢ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠳᠤᠮᠳᠠ ᠥᠴᠦᠬᠡᠨ ᠬᠥᠮᠦᠰ ᠦᠨ ᠳᠤᠮᠳᠠ ᠵᠢᠭ᠍ᠰᠢᠯ ᠪᠣᠯᠭᠠᠨᠠ᠃
16 ᠴᠢ ᠬᠠᠳᠠᠨ ᠤ ᠠᠩ ᠴᠠᠪᠠ ᠪᠠᠷ ᠰᠠᠭᠤᠵᠤ᠂ ᠠᠭᠤᠯᠠ ᠶᠢᠨ ᠣᠷᠣᠢ ᠶᠢ ᠡᠵᠡᠮᠰᠢᠴᠢᠬᠡᠭᠰᠡᠨ ᠭᠡᠳ ᠰᠦᠷᠳᠡᠭᠦᠯᠦᠯ ᠬᠢᠭᠡᠳ ᠰᠠᠭᠰᠠᠭᠤ ᠵᠠᠩ ᠳᠠᠭᠠᠨ ᠮᠡᠬᠡᠯᠡᠭᠳᠡᠭᠰᠡᠨ ᠪᠠᠢᠨᠠ᠃ ᠴᠢ ᠪᠦᠷᠭᠦᠳ ᠮᠡᠲᠦ ᠥᠨᠳᠥᠷ ᠲᠦ ᠡᠭᠦᠷᠯᠡᠪᠡᠴᠦ ᠪᠢ ᠴᠢᠮᠠᠶᠢ ᠲᠡᠨᠳᠡ ᠡᠴᠡ ᠳᠣᠷᠣᠭᠰᠢ ᠤᠨᠠᠭᠠᠨᠠ᠂》 ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃
17 《ᠡᠳᠣᠮ ᠵᠢᠪᠡᠭᠦᠴᠡᠯ ᠪᠣᠯᠣᠨᠠ᠃ ᠬᠠᠵᠠᠭᠤ ᠪᠠᠷ ᠨᠢ ᠥᠩᠭᠡᠷᠡᠭᠴᠢ ᠬᠥᠮᠦᠨ ᠪᠦᠷᠢ ᠰᠣᠴᠢᠬᠤ ᠪᠥᠭᠡᠳ ᠪᠦᠬᠦ ᠵᠣᠪᠠᠯᠠᠩ ᠭᠠᠮᠰᠢᠭ ᠠᠴᠠ ᠨᠢ ᠪᠣᠯᠵᠤ ᠲᠠᠪᠠᠯᠠᠬᠤ ᠪᠣᠯᠣᠨᠠ᠃ 18 ᠰᠣᠳᠣᠮ ᠪᠣᠯᠣᠨ ᠭᠣᠮᠣᠷᠠ ᠬᠥᠷᠰᠢ ᠲᠣᠰᠬᠣᠳ ᠲᠠᠢ ᠪᠠᠨ ᠬᠠᠮᠲᠤ ᠰᠦᠢᠷᠡᠭᠰᠡᠨ ᠰᠢᠭ᠂ ᠲᠡᠨᠳᠡ ᠦᠯᠡᠳᠡᠬᠦ ᠬᠥᠮᠦᠨ ᠦᠭᠡᠢ᠂ ᠰᠠᠭᠤᠬᠤ ᠬᠥᠮᠦᠨ ᠦᠭᠡᠢ ᠪᠣᠯᠣᠨᠠ᠂》 ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃ 19 《ᠬᠠᠷᠠ᠂ ᠠᠷᠰᠯᠠᠨ ᠶᠣᠷᠳᠠᠨ ᠤ ᠰᠢᠭᠤᠢ ᠠᠴᠠ ᠤᠰᠤᠨ ᠤ ᠳᠡᠷᠭᠡᠳᠡᠬᠢ ᠪᠡᠯᠴᠢᠭᠡᠷ ᠤᠷᠤᠭᠤ ᠭᠠᠷᠬᠤ ᠮᠡᠲᠦ ᠪᠢ ᠬᠣᠷᠣᠮᠬᠠᠨ ᠵᠠᠭᠤᠷᠠ ᠡᠳᠣᠮ ᠢ ᠭᠠᠵᠠᠷ ᠠᠴᠠ ᠨᠢ ᠬᠥᠭᠡᠭᠡᠵᠦ᠂ ᠰᠣᠩ᠋ᠭᠣᠭᠰᠠᠨ ᠨᠢᠭᠡᠨ ᠢᠶᠡᠨ ᠲᠡᠭᠦᠨ ᠦ ᠳᠡᠭᠡᠷᠡ ᠲᠣᠮᠢᠯᠠᠨᠠ᠃ ᠲᠡᠭᠡᠬᠦ ᠳᠦ ᠬᠡᠨ ᠨᠠᠳᠠ ᠲᠠᠢ ᠵᠡᠷᠭᠡᠴᠡᠬᠦ ᠪᠤᠢ︖ ᠬᠡᠨ ᠨᠠᠳᠠ ᠲᠠᠢ ᠵᠥᠷᠢᠯᠳᠦᠬᠦ ᠪᠤᠢ︖ ᠬᠡᠨ ᠮᠢᠨᠦ ᠡᠰᠡᠷᠭᠦ ᠵᠣᠭᠰᠣᠬᠤ ᠬᠣᠨᠢᠴᠢᠨ ᠪᠣᠯᠬᠤ ᠪᠤᠢ︖》 20 ᠲᠡᠢᠮᠦ ᠡᠴᠡ᠂ ᠡᠳᠣᠮ ᠤᠨ ᠲᠤᠬᠠᠢ ᠶᠣᠬᠣᠸᠠ ᠶᠠᠭᠤ ᠲᠥᠯᠥᠪᠯᠡᠭᠰᠡᠨ ᠢ᠂ ᠮᠥᠨ ᠲᠧᠮᠠᠨ ᠤ ᠰᠠᠭᠤᠭᠠᠯᠢᠴᠢᠳ ᠤᠨ ᠲᠤᠬᠠᠢ ᠶᠠᠭᠤ ᠳᠣᠬᠢᠶᠠᠭᠰᠠᠨ ᠢ ᠲᠠ ᠨᠠᠷ ᠰᠣᠨᠣᠰᠣᠭᠲᠤᠨ᠃ ᠲᠡᠳᠡᠨ ᠦ ᠰᠦᠷᠦᠭ ᠦᠨ ᠬᠢᠨᠢ ᠲᠥᠯ ᠤᠳ ᠬᠦᠷᠲᠡᠯᠡ ᠴᠢᠷᠦᠭᠳᠡᠨ ᠭᠠᠷᠴᠤ᠂ ᠰᠠᠭᠤᠳᠠᠭ ᠭᠠᠵᠠᠷ ᠨᠢ ᠲᠠᠯᠬᠢᠳᠠᠭᠳᠠᠨᠠ᠃ 21 ᠲᠡᠳᠡᠨ ᠦ ᠤᠨᠠᠬᠤ ᠴᠢᠮᠡᠭᠡᠨ ᠳᠦ ᠭᠠᠵᠠᠷ ᠬᠥᠳᠡᠯᠵᠦ᠂ ᠲᠡᠳᠡᠨ ᠦ ᠬᠠᠰᠬᠢᠷᠬᠤ ᠳᠠᠭᠤ ᠤᠯᠠᠭᠠᠨ ᠲᠠᠩᠭᠢᠰ ᠲᠤ ᠰᠣᠨᠣᠰᠳᠠᠨᠠ᠃ 22 ᠬᠠᠷᠠ᠂ ᠨᠢᠭᠡᠨ ᠪᠦᠷᠭᠦᠳ ᠬᠠᠯᠢᠨ ᠭᠠᠷᠤᠭᠰᠠᠨ ᠢᠶᠠᠨ ᠰᠤᠮᠤᠳᠠᠨ ᠢᠷᠡᠭᠡᠳ᠂ ᠪᠣᠽᠷᠠ ᠶᠢᠨ ᠳᠡᠭᠡᠷᠡ ᠵᠢᠭᠦᠷ ᠢᠶᠡᠨ ᠳᠡᠯᠭᠡᠨᠡ᠃ ᠲᠡᠷᠡ ᠡᠳᠦᠷ ᠡᠳᠣᠮ ᠤᠨ ᠳᠠᠢᠴᠢᠳ ᠤᠨ ᠵᠢᠷᠦᠬᠡ ᠬᠡᠦᠬᠡᠳ ᠲᠥᠷᠥᠭᠦᠯᠬᠦ ᠡᠮᠡᠭᠲᠡᠢ ᠶᠢᠨ ᠵᠢᠷᠦᠬᠡ ᠮᠡᠲᠦ ᠪᠣᠯᠣᠨᠠ᠃
ᠳ᠋ᠠᠮᠠᠰᠺᠦ᠋ᠰ ᠤᠨ ᠲᠠᠯᠠ ᠪᠠᠷ ᠬᠢ ᠡᠰᠢ ᠦᠵᠡᠭᠦᠯᠦᠯᠭᠡ
23 ᠳ᠋ᠠᠮᠠᠰᠺᠦ᠋ᠰ ᠤᠨ ᠲᠤᠬᠠᠢ᠄ 《ᠬᠠᠮᠠᠲ ᠪᠣᠯᠣᠨ ᠠᠷᠫᠠᠳ᠋ ᠮᠠᠭᠤ ᠮᠡᠳᠡᠭᠡ ᠰᠣᠨᠣᠰᠣᠭᠠᠳ ᠪᠠᠯᠠᠮᠠᠭᠳᠠᠨᠠ ᠲᠡᠳᠡ ᠵᠢᠷᠦᠬᠡ ᠠᠯᠳᠠᠵᠤ ᠨᠠᠮᠵᠢᠬᠤ ᠦᠭᠡᠢ ᠳᠠᠯᠠᠢ ᠮᠡᠲᠦ ᠪᠠᠴᠢᠮᠳᠠᠨᠠ᠃
24 ᠳ᠋ᠠᠮᠠᠰᠺᠦ᠋ᠰ ᠵᠣᠷᠢᠭ ᠠᠯᠳᠠᠭᠠᠳ ᠵᠢᠭᠤᠲᠠᠬᠤ ᠪᠠᠷ ᠡᠷᠭᠢᠭᠰᠡᠨ ᠢᠶᠡᠨ ᠠᠢᠳᠠᠰ ᠲᠤ ᠠᠪᠲᠠᠪᠠ ᠨᠢᠷᠠᠢᠯᠠᠬᠤ ᠪᠦᠰᠡᠭᠦᠢ ᠶᠢᠨ ᠡᠪᠡᠳᠦᠯᠲᠡ ᠵᠣᠪᠠᠯᠠᠩ ᠲᠡᠭᠦᠨ ᠢ ᠡᠵᠡᠮᠳᠡᠪᠡ᠃
25 ᠴᠤᠤ ᠲᠠᠢ ᠬᠣᠲᠠ᠂ ᠴᠡᠩᠭᠡᠭᠡᠨ ᠦ ᠬᠣᠲᠠ ᠶᠠᠭᠠᠬᠢᠨ ᠬᠠᠶᠠᠭᠳᠠᠬᠤ ᠦᠭᠡᠢ ᠪᠠᠢᠬᠤ ᠶᠤᠮ ᠪᠤᠢ︕
26 ᠲᠡᠷᠡ ᠡᠳᠦᠷ ᠵᠠᠯᠠᠭᠤᠰ ᠨᠢ ᠭᠤᠳᠤᠮᠵᠢ ᠨᠤᠭᠤᠳ ᠲᠤ ᠤᠨᠠᠵᠤ ᠳᠠᠢᠴᠢᠳ ᠨᠢ ᠪᠦᠭᠦᠳᠡᠭᠡᠷ ᠤᠰᠠᠳᠬᠠᠭᠳᠠᠨᠠ᠂》 ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃
27 ᠪᠢ ᠳ᠋ᠠᠮᠠᠰᠺᠦ᠋ᠰ ᠤᠨ ᠬᠡᠷᠡᠮ ᠳᠦ ᠭᠠᠯ ᠲᠠᠯᠪᠢᠨᠠ ᠪᠧᠨ ᠬᠠᠳᠠᠳ᠋ ᠤᠨ ᠣᠷᠳᠣᠨ ᠨᠤᠭᠤᠳ ᠰᠢᠲᠠᠭᠠᠭᠳᠠᠨᠠ᠃
ᠺᠧᠳᠠᠷ ᠪᠣᠯᠣᠨ ᠬᠠᠽᠣᠷ ᠤᠨ ᠲᠠᠯᠠ ᠪᠠᠷ ᠬᠢ ᠡᠰᠢ ᠦᠵᠡᠭᠦᠯᠦᠯᠭᠡ
28 ᠪᠠᠪᠢᠯᠣᠨ ᠤ ᠬᠠᠭᠠᠨ ᠨᠧᠪᠦ᠋ᠺᠠᠨᠧᠽᠠᠷ ᠲᠤ ᠳᠡᠢᠯᠦᠭᠳᠡᠭᠰᠡᠨ ᠺᠧᠳᠠᠷ ᠪᠣᠯᠣᠨ ᠬᠠᠽᠣᠷ ᠤᠨ ᠬᠠᠭᠠᠨᠴᠢᠯᠠᠯ ᠤᠳ ᠤᠨ ᠲᠤᠬᠠᠢ᠄ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠂ 《ᠪᠣᠰᠴᠠᠭᠠ᠂ ᠺᠧᠳᠠᠷ ᠤᠷᠤᠭᠤ ᠳᠣᠪᠲᠣᠯ᠂ ᠳᠣᠷᠣᠨᠠ ᠶᠢᠨ ᠬᠥᠮᠦᠰ ᠢ ᠤᠰᠠᠳᠬᠠ᠃
29 ᠲᠡᠳᠡᠨ ᠦ ᠮᠠᠢᠬᠠᠨ ᠨᠤᠭᠤᠳ ᠴᠤ᠂ ᠲᠡᠳᠡᠨ ᠦ ᠮᠠᠯ ᠰᠦᠷᠦᠭ ᠴᠤ ᠪᠤᠯᠢᠶᠠᠭᠳᠠᠨᠠ᠂ ᠲᠡᠳᠡᠨ ᠦ ᠬᠥᠰᠢᠭᠡ ᠨᠦᠭᠦᠳ ᠨᠢ ᠲᠡᠳᠡᠨ ᠦ ᠪᠦᠬᠦ ᠡᠳ᠋ ᠬᠥᠷᠥᠩᠭᠡ ᠪᠣᠯᠣᠨ ᠲᠡᠮᠡᠭᠡ ᠨᠦᠭᠦᠳ ᠲᠡᠢ ᠬᠠᠮᠲᠤ ᠠᠪᠠᠴᠢᠭᠳᠠᠨᠠ᠃ ᠬᠥᠮᠦᠰ᠄ 〈ᠲᠠᠯᠠ ᠪᠦᠷᠢ ᠳᠤ ᠠᠶᠤᠯ ᠠᠢᠳᠠᠰ︕〉 ᠭᠡᠵᠦ ᠬᠠᠰᠬᠢᠷᠤᠨᠠ᠃
30 ᠬᠠᠽᠣᠷ ᠤᠨ ᠰᠠᠭᠤᠭᠠᠯᠢᠴᠢᠳ ᠡ᠂ ᠭᠦᠶᠦ᠂ ᠵᠢᠭᠤᠲᠠ︕ ᠭᠦᠨ ᠨᠦᠬᠡᠨ ᠳᠦ ᠨᠢᠭᠤᠭᠳᠠ᠂》 ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃ 《ᠤᠴᠢᠷ ᠨᠢ ᠪᠠᠪᠢᠯᠣᠨ ᠤ ᠬᠠᠭᠠᠨ ᠨᠧᠪᠦ᠋ᠺᠠᠨᠧᠽᠠᠷ ᠲᠠ ᠨᠠᠷ ᠢ ᠴᠣᠬᠢᠬᠤ ᠲᠥᠯᠥᠪᠯᠡᠭᠡ ᠵᠣᠬᠢᠶᠠᠭᠰᠠᠨ᠂ ᠲᠠ ᠨᠠᠷ ᠢ ᠴᠣᠬᠢᠬᠤ ᠠᠷᠭᠠ ᠰᠡᠳᠦᠭᠰᠡᠨ᠃
31 ᠪᠣᠰᠴᠠᠭᠠ︕ ᠬᠠᠭᠠᠯᠭᠠ ᠦᠭᠡᠢ᠂ ᠴᠣᠣᠵᠢ ᠦᠭᠡᠢ ᠭᠠᠭᠴᠠᠭᠠᠷ ᠢᠶᠠᠨ ᠠᠶᠤᠯ ᠦᠭᠡᠢ ᠲᠠᠢᠪᠤᠩ ᠰᠠᠭᠤᠵᠤ ᠪᠠᠢᠭᠠ ᠲᠡᠷᠡ ᠦᠨᠳᠦᠰᠦᠲᠡᠨ ᠢ ᠳᠠᠭᠠᠷᠢ᠂》 ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃
32 ᠲᠡᠳᠡᠨ ᠦ ᠲᠡᠮᠡᠭᠡ ᠨᠦᠭᠦᠳ ᠳᠡᠭᠡᠷᠡᠮᠳᠡᠭᠳᠡᠵᠦ᠂ ᠥᠨᠢᠷ ᠣᠯᠠᠨ ᠮᠠᠯ ᠰᠦᠷᠦᠭ ᠨᠢ ᠣᠯᠵᠠ ᠪᠣᠯᠣᠨᠠ ᠰᠢᠨᠠ ᠶᠢᠨ ᠦᠰᠦ ᠪᠡᠨ ᠬᠤᠰᠤᠳᠠᠭ ᠡᠨᠡ ᠬᠥᠮᠦᠰ ᠢ ᠪᠢ ᠰᠠᠯᠬᠢ ᠪᠠᠷ ᠵᠦᠭ ᠪᠦᠷᠢ ᠳᠤ ᠪᠤᠲᠠᠷᠠᠭᠠᠵᠤ᠂ ᠲᠠᠯᠠ ᠪᠦᠷᠢ ᠶᠢᠨ ᠭᠠᠮᠰᠢᠭ ᠢ ᠲᠡᠳᠡᠨ ᠤᠷᠤᠭᠤ ᠠᠪᠴᠢᠷᠠᠨᠠ᠂》 ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃
33 《ᠬᠠᠽᠣᠷ ᠴᠥᠭᠡᠪᠦᠷᠢ ᠴᠢᠨᠣᠠ ᠨᠤᠭᠤᠳ ᠤᠨ ᠡᠭᠦᠷ᠂ ᠮᠥᠩᠬᠡ ᠶᠢᠨ ᠵᠡᠯᠢᠭᠦᠳ ᠭᠠᠵᠠᠷ ᠪᠣᠯᠣᠨᠠ᠂ ᠬᠡᠨ ᠴᠤ ᠲᠡᠨᠳᠡ ᠦᠯᠡᠳᠡᠬᠦ ᠦᠭᠡᠢ᠂ ᠬᠡᠨ ᠴᠤ ᠲᠡᠨᠳᠡ ᠰᠠᠭᠤᠬᠤ ᠦᠭᠡᠢ᠃》
ᠡᠯᠠᠮ ᠤᠨ ᠲᠠᠯᠠ ᠪᠠᠷ ᠬᠢ ᠡᠰᠢ ᠦᠵᠡᠭᠦᠯᠦᠯᠭᠡ
34 ᠶᠦᠳᠠ ᠶᠢᠨ ᠬᠠᠭᠠᠨ ᠽᠧᠳᠧᠺᠢᠶᠠ ᠶᠢᠨ ᠬᠠᠭᠠᠨᠴᠢᠯᠠᠯ ᠤᠨ ᠡᠬᠢᠨ ᠳᠤ ᠡᠯᠠᠮ ᠤᠨ ᠲᠤᠬᠠᠢ ᠡᠰᠢ ᠦᠵᠡᠭᠦᠯᠦᠭᠴᠢ ᠶᠧᠷᠧᠮᠢᠶᠠ ᠳᠤ ᠢᠷᠡᠭᠰᠡᠨ ᠶᠣᠬᠣᠸᠠ ᠶᠢᠨ ᠦᠭᠡ᠄
35 《ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠬᠠᠷᠠ᠂ ᠪᠢ ᠡᠯᠠᠮ ᠤᠨ ᠭᠣᠣᠯ ᠬᠦᠴᠦ ᠪᠣᠯᠬᠤ ᠨᠤᠮᠤ ᠶᠢ ᠬᠤᠭᠤᠯᠬᠤ ᠭᠡᠵᠦ ᠪᠠᠢᠨᠠ᠃
36 ᠪᠢ ᠲᠩᠷᠢ ᠶᠢᠨ ᠳᠥᠷᠪᠡᠨ ᠬᠢᠵᠠᠭᠠᠷ ᠠᠴᠠ ᠳᠥᠷᠪᠡᠨ ᠰᠠᠯᠬᠢ ᠶᠢ ᠡᠯᠠᠮ ᠤᠷᠤᠭᠤ ᠠᠪᠴᠢᠷᠠᠵᠤ ᠲᠡᠳᠡᠨ ᠢ ᠡᠳᠡᠭᠡᠷ ᠰᠠᠯᠬᠢ ᠪᠠᠷ ᠪᠤᠲᠠᠷᠠᠭᠠᠨᠠ ᠡᠯᠠᠮ ᠤᠨ ᠴᠥᠯᠡᠭᠳᠡᠭᠰᠡᠳ ᠦᠨ ᠣᠴᠢᠬᠤ ᠦᠭᠡᠢ ᠭᠦᠷᠦᠨ ᠭᠡᠵᠦ ᠪᠠᠢᠬᠤ ᠦᠭᠡᠢ ᠪᠣᠯᠣᠨᠠ᠃
37 ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃ ᠪᠢ ᠡᠯᠠᠮ ᠢ ᠳᠠᠢᠰᠤᠨ ᠨᠤᠭᠤᠳ ᠤᠨ ᠬᠢᠨᠢ ᠡᠮᠦᠨᠡ᠂ ᠠᠮᠢ ᠶᠢ ᠨᠢ ᠡᠷᠢᠭ᠍ᠴᠢᠳ ᠤᠨ ᠡᠮᠦᠨᠡ ᠪᠠᠯᠠᠮᠠᠭᠳᠠᠭᠤᠯᠬᠤ ᠪᠥᠭᠡᠳ ᠲᠡᠳᠡᠨ ᠦ ᠳᠡᠭᠡᠷᠡ ᠭᠠᠢ ᠭᠠᠮᠰᠢᠭ ᠬᠢᠭᠡᠳ ᠰᠢᠷᠦᠭᠦᠨ ᠠᠭᠤᠷ ᠬᠢᠯᠢᠩ ᠢᠶᠠᠨ ᠠᠪᠴᠢᠷᠠᠵᠤ᠂ ᠲᠡᠳᠡᠨ ᠦ ᠠᠷᠤ ᠠᠴᠠ ᠢᠯᠳᠦ ᠶᠠᠪᠤᠭᠤᠯᠤᠨ᠂ ᠲᠡᠳᠡᠨ ᠢ ᠤᠰᠠᠳᠬᠠᠨᠠ᠃
38 ᠪᠢ ᠰᠡᠨᠲᠢ ᠪᠠᠨ ᠡᠯᠠᠮ ᠳᠤ ᠵᠠᠰᠠᠵᠤ ᠲᠡᠭᠦᠨ ᠦ ᠬᠠᠭᠠᠨ ᠪᠣᠯᠣᠨ ᠲᠦᠰᠢᠮᠡᠳ ᠢ ᠰᠥᠨᠥᠭᠡᠨᠡ〉 ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃
39 〈ᠭᠡᠪᠡᠴᠦ ᠬᠣᠵᠢᠮ ᠤᠨ ᠡᠳᠦᠷ ᠤᠳ ᠲᠤ ᠪᠢ ᠡᠯᠠᠮ ᠤᠨ ᠴᠥᠯᠡᠭᠳᠡᠭᠰᠡᠳ ᠢ ᠪᠤᠴᠠᠭᠠᠨᠠ᠂〉》 ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃