ᠶᠧᠷᠧᠮᠢᠶᠠ ᠵᠢᠷᠭᠤᠭᠠ
ᠶᠧᠷᠦ᠋ᠰᠠᠯᠧᠮ ᠪᠦᠰᠡᠯᠡᠭᠳᠡᠨᠡ
1 ᠪᠢᠨᠶᠠᠮᠢᠨᠴᠤᠳ ᠡ᠂ ᠶᠧᠷᠦ᠋ᠰᠠᠯᠧᠮ ᠡᠴᠡ ᠭᠠᠷᠴᠤ ᠵᠢᠭᠤᠲᠠ ᠲᠧᠺᠣᠶᠠ ᠳᠤ ᠪᠦᠷᠢᠶᠡ ᠦᠯᠢᠶᠡᠵᠦ ᠪᠧᠲ ᠬᠠᠺᠧᠷᠧᠮ ᠳᠤ ᠳᠣᠬᠢᠶᠠᠨ ᠭᠠᠯ ᠡᠷᠭᠦ ᠭᠠᠢ ᠵᠣᠪᠠᠯᠠᠩ ᠪᠠ ᠠᠶᠤᠮᠰᠢᠭᠲᠤ ᠬᠥᠨᠥᠭᠡᠯ ᠬᠣᠢᠲᠤ ᠵᠦᠭ ᠡᠴᠡ ᠬᠠᠷᠠᠭᠳᠠᠵᠤ ᠪᠠᠢᠨᠠ᠃
2 ᠳᠤᠷᠠ ᠪᠤᠯᠢᠶᠠᠮᠠ᠂ ᠬᠥᠭᠡᠷᠦᠬᠦᠨ ᠽᠢᠶᠣᠨ ᠥᠬᠢᠨ ᠢ ᠪᠢ ᠤᠰᠠᠳᠬᠠᠬᠤ ᠪᠣᠯᠣᠨᠠ᠃
3 ᠬᠣᠨᠢᠴᠢᠳ ᠰᠦᠷᠦᠭ ᠲᠡᠢ ᠪᠡᠨ ᠲᠡᠰᠢ ᠣᠴᠢᠵᠤ ᠲᠡᠭᠦᠨ ᠦ ᠡᠷᠭᠢᠨ ᠲᠣᠭᠣᠷᠢᠨ ᠳᠤ ᠮᠠᠢᠬᠠᠨ ᠨᠤᠭᠤᠳ ᠪᠣᠰᠬᠠᠵᠤ ᠥᠪᠡᠷ ᠥᠪᠡᠷᠰᠡᠳ ᠦᠨ ᠢᠶᠠᠨ ᠭᠠᠵᠠᠷ ᠲᠤ ᠪᠡᠯᠴᠢᠭᠡᠷᠯᠡᠭᠦᠯᠦᠨᠡ᠃
4 ᠲᠡᠳᠡ 《ᠲᠡᠭᠦᠨ ᠦ ᠡᠰᠡᠷᠭᠦ ᠳᠠᠢᠨ ᠳᠤ ᠪᠡᠯᠡᠳᠬᠡ ᠪᠣᠰᠴᠠᠭᠠ᠂ ᠵᠢᠩ ᠦᠳᠡ ᠳᠦ ᠳᠣᠪᠲᠣᠯᠵᠠᠭᠠᠶᠠ ᠬᠥᠶᠶ᠂ ᠡᠳᠦᠷ ᠳᠠᠭᠤᠰᠴᠤ᠂ ᠦᠳᠡᠰᠢ ᠶᠢᠨ ᠰᠡᠭᠦᠳᠡᠷ ᠤᠷᠲᠤᠰᠴᠤ ᠪᠠᠢᠨᠠ
5 ᠪᠣᠰᠴᠠᠭᠠ᠂ ᠰᠥᠨᠢ ᠪᠠᠷ ᠬᠥᠳᠡᠯᠵᠦ᠂ ᠰᠢᠯᠲᠦᠭᠡᠨ ᠢ ᠨᠢ ᠰᠦᠢᠳᠬᠡᠶᠡ》 ᠭᠡᠵᠡᠭᠡᠳᠡᠭ᠃
6 ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠲᠠ ᠨᠠᠷ ᠮᠣᠳᠣ ᠣᠭᠲᠣᠯᠵᠤ᠂ ᠶᠧᠷᠦ᠋ᠰᠠᠯᠧᠮ ᠤᠨ ᠡᠮᠦᠨᠡ ᠪᠦᠰᠡᠯᠡᠯᠲᠡ ᠶᠢᠨ ᠣᠪᠣᠭᠠ ᠪᠣᠰᠬᠠ ᠡᠨᠡ ᠬᠣᠲᠠ ᠰᠢᠳᠬᠡᠭᠳᠡᠬᠦ ᠶᠣᠰᠣᠲᠠᠢ᠂ ᠳᠣᠲᠣᠷᠠ ᠨᠢ ᠳᠠᠷᠤᠯᠠᠯ ᠳᠦᠭᠦᠷᠡᠩ ᠪᠠᠢᠨᠠ᠂
7 ᠬᠤᠳᠳᠤᠭ ᠤᠰᠤ ᠪᠠᠨ ᠭᠠᠷᠭᠠᠭᠰᠠᠭᠠᠷ ᠪᠠᠢᠳᠠᠭ ᠤᠨ ᠠᠳᠠᠯᠢ ᠬᠣᠲᠠ ᠨᠢ ᠬᠣᠷᠣᠨ ᠮᠠᠭᠤ ᠪᠠᠨ ᠭᠠᠷᠭᠠᠭᠰᠠᠭᠠᠷ ᠬᠦᠴᠦᠷᠬᠡᠭᠯᠡᠯ ᠪᠣᠯᠣᠨ ᠰᠦᠢᠷᠡᠯ ᠲᠡᠭᠦᠨ ᠦ ᠳᠣᠲᠣᠷᠠ ᠰᠣᠨᠣᠰᠳᠠᠵᠤ ᠡᠪᠡᠳᠴᠢᠨ ᠬᠢᠭᠡᠳ ᠰᠢᠷᠬᠠ ᠨᠤᠭᠤᠳ ᠮᠢᠨᠦ ᠡᠮᠦᠨᠡ ᠪᠠᠢᠭᠰᠠᠭᠠᠷ ᠪᠠᠢᠨᠠ᠃
8 ᠶᠧᠷᠦ᠋ᠰᠠᠯᠧᠮ ᠡ᠂ ᠰᠠᠨᠠᠭᠤᠯᠭᠠ ᠶᠢ ᠮᠢᠨᠢ ᠠᠪ ᠡᠰᠡ ᠲᠡᠭᠡᠪᠡᠯ ᠪᠢ ᠴᠢᠮᠠ ᠠᠴᠠ ᠬᠥᠨᠳᠡᠢᠷᠡᠨ ᠴᠢᠮᠠ ᠶᠢ ᠡᠵᠡᠭᠦᠢ ᠵᠡᠯᠢᠭᠦᠳ ᠭᠠᠵᠠᠷ ᠪᠣᠯᠭᠠᠨᠠ᠃》
9 ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠲᠡᠳᠡ ᠦᠵᠦᠮ ᠲᠡᠭᠦᠬᠦ ᠰᠢᠭ ᠢᠶᠠᠨ ᠢᠰᠷᠧᠯ ᠤᠨ ᠦᠯᠡᠳᠡᠭᠰᠡᠳ ᠢ ᠭᠦᠢᠴᠡᠳ ᠲᠡᠭᠦᠬᠦ ᠪᠣᠯᠣᠨᠠ ᠴᠢ ᠦᠵᠦᠮ ᠲᠡᠭᠦᠭᠴᠢ ᠮᠡᠲᠦ ᠪᠡᠷ ᠭᠠᠷ ᠢᠶᠠᠨ ᠮᠥᠴᠢᠷ ᠤᠳ ᠤᠨ ᠳᠡᠭᠡᠷᠡ ᠠᠬᠢᠨ ᠳᠠᠬᠢᠨ ᠬᠦᠷᠭᠡᠭᠡᠷᠡᠢ᠃》
10 ᠪᠢ ᠬᠡᠨ ᠳᠦ ᠰᠠᠨᠠᠭᠤᠯᠤᠨ ᠶᠠᠷᠢᠵᠤ᠂ ᠰᠣᠨᠣᠰᠬᠠᠬᠤ ᠶᠤᠮ ᠪᠤᠢ︖ ᠬᠠᠷᠠ᠂ ᠲᠡᠳᠡᠨ ᠦ ᠴᠢᠬᠢ ᠲᠠᠭᠯᠠᠭᠳᠠᠭᠰᠠᠨ ᠲᠤᠯᠠ ᠲᠡᠳᠡ ᠠᠩ᠋ᠬᠠᠷᠴᠤ ᠴᠢᠳᠠᠬᠤ ᠦᠭᠡᠢ ᠬᠠᠷᠠ᠂ ᠶᠣᠬᠣᠸᠠ ᠶᠢᠨ ᠦᠭᠡ ᠲᠡᠳᠡᠨ ᠳᠦ ᠵᠢᠪᠡᠭᠦᠴᠡᠯ ᠪᠣᠯᠪᠠ ᠲᠡᠳᠡ ᠲᠡᠭᠦᠨ ᠢ ᠲᠠᠭᠠᠰᠢᠶᠠᠳᠠᠭ ᠦᠭᠡᠢ᠃
11 ᠬᠠᠷᠢᠨ ᠪᠢ ᠶᠣᠬᠣᠸᠠ ᠶᠢᠨ ᠠᠭᠤᠷ ᠬᠢᠯᠢᠩ ᠢᠶᠠᠷ ᠳᠦᠭᠦᠷᠴᠦ ᠡᠭᠦᠨ ᠢ ᠪᠠᠨ ᠪᠠᠷᠢᠵᠤ ᠶᠠᠳᠠᠵᠤ ᠪᠠᠢᠨᠠ ᠡᠭᠦᠨ ᠢ ᠪᠠᠨ ᠪᠢ ᠭᠤᠳᠤᠮᠵᠢᠨ ᠳᠠᠬᠢ ᠬᠡᠦᠬᠡᠳ ᠤᠳ ᠤᠨ ᠳᠡᠭᠡᠷᠡ᠂ ᠬᠤᠷᠠᠭᠰᠠᠨ ᠵᠠᠯᠠᠭᠤᠴᠤᠳ ᠤᠨ ᠳᠡᠭᠡᠷᠡ ᠠᠰᠬᠠᠶᠠ ᠡᠷᠡᠭᠲᠡᠢ ᠡᠮᠡᠭᠲᠡᠢ ᠢᠯᠭᠠᠭᠠ ᠦᠭᠡᠢ᠂ ᠥᠲᠡᠭᠦᠰ ᠨᠠᠰᠤᠲᠠᠳ ᠴᠤ ᠠᠪᠠᠴᠢᠭᠳᠠᠨᠠ᠃
12 ᠶᠣᠬᠣᠸᠠ ᠪᠢ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠪᠢ ᠡᠨᠡ ᠭᠠᠵᠠᠷ ᠤᠨ ᠰᠠᠭᠤᠭᠠᠯᠢᠴᠢᠳ ᠤᠷᠤᠭᠤ ᠮᠤᠲᠤᠷ ᠢᠶᠠᠨ ᠰᠤᠩ᠋ᠭᠠᠨᠠ᠂ ᠲᠡᠳᠡᠨ ᠦ ᠭᠡᠷ ᠤᠳ᠂ ᠲᠠᠯᠠᠪᠠᠢ ᠨᠤᠭᠤᠳ ᠪᠣᠯᠣᠨ ᠡᠬᠡᠨᠡᠷ ᠤᠳ ᠨᠢ ᠴᠤ ᠪᠤᠰᠤᠳ ᠤᠨ ᠡᠷᠬᠡᠨ ᠳᠦ ᠣᠷᠣᠨᠠ᠂
13 ᠤᠴᠢᠷ ᠨᠢ ᠲᠡᠳᠡᠨ ᠦ ᠪᠠᠭᠠ ᠠᠴᠠ ᠨᠢ ᠲᠣᠮᠣ ᠳᠠᠭᠠᠨ ᠬᠦᠷᠲᠡᠯᠡ ᠪᠦᠭᠦᠳᠡ ᠵᠥᠪ ᠪᠤᠰᠤ ᠳᠤ ᠰᠢᠨᠤᠵᠤ ᠡᠰᠢ ᠦᠵᠡᠭᠦᠯᠦᠭᠴᠢ ᠡᠴᠡ ᠪᠡᠨ ᠲᠠᠬᠢᠯᠴᠢ ᠬᠦᠷᠲᠡᠯᠡ ᠪᠦᠭᠦᠳᠡ ᠵᠠᠯᠢ ᠭᠠᠷᠭᠠᠵᠤ ᠪᠠᠢᠨᠠ᠃
14 ᠲᠡᠳᠡ ᠠᠷᠠᠳ ᠲᠦᠮᠡᠨ ᠦ ᠮᠢᠨᠢ ᠰᠢᠷᠬᠠ ᠶᠢ ᠬᠠᠰᠢ ᠶᠠᠰᠢ ᠡᠮᠴᠢᠯᠡᠵᠤ 〈ᠠᠮᠤᠭᠤᠯᠠᠩ᠂ ᠠᠮᠤᠭᠤᠯᠠᠩ〉 ᠭᠡᠳᠡᠭ ᠪᠣᠯᠪᠠᠴᠤ ᠠᠮᠤᠷ ᠠᠮᠤᠭᠤᠯᠠᠩ ᠨᠢ ᠠᠯᠠᠭᠠ᠃
15 ᠦᠢᠯᠡᠳᠦᠭᠰᠡᠨ ᠵᠢᠭᠰᠢᠭᠦᠷᠢ ᠡᠴᠡ ᠪᠡᠨ ᠲᠡᠳᠡ ᠢᠴᠢᠭᠰᠡᠨ ᠤᠤ︖ ᠣᠭᠲᠣᠬᠠᠨ ᠴᠤ ᠢᠴᠢᠭᠰᠡᠨ ᠦᠭᠡᠢ᠂ ᠤᠯᠠᠢᠬᠤ ᠪᠠᠨ ᠴᠤ ᠮᠡᠳᠡᠬᠦ ᠦᠭᠡᠢ ᠪᠠᠢᠪᠠ ᠡᠢᠮᠦ ᠡᠴᠡ ᠲᠡᠳᠡ ᠤᠨᠠᠭᠰᠠᠳ ᠤᠨ ᠳᠤᠮᠳᠠ ᠤᠨᠠᠨᠠ ᠲᠡᠳᠡᠨ ᠢ ᠰᠢᠳᠬᠡᠬᠦ ᠦᠶᠡ ᠳᠦ ᠮᠢᠨᠢ ᠲᠡᠳᠡ ᠪᠦᠳᠦᠷᠢᠨᠡ》 ᠭᠡᠵᠦ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃
16 ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠰᠠᠯᠠᠭᠠ ᠵᠠᠮ ᠳᠡᠭᠡᠷᠡ ᠵᠣᠭᠰᠣᠵᠤ ᠬᠠᠷᠠ ᠡᠷᠲᠡᠨ ᠦ ᠵᠠᠮ ᠢ ᠯᠠᠪᠯᠠ ᠰᠠᠢᠨ ᠵᠠᠮ ᠨᠢ ᠬᠠᠮᠢᠭᠠ ᠪᠠᠢᠪᠠᠯ ᠲᠡᠷᠡᠭᠦᠷ ᠠᠯᠬᠤᠵᠤ ᠠᠮᠢ ᠰᠦᠨᠡᠰᠦᠨ ᠦ ᠪᠠᠨ ᠠᠮᠠᠷᠠᠯ ᠢ ᠣᠯᠬᠤ ᠪᠠᠢᠲᠠᠯᠠ ᠲᠠ ᠨᠠᠷ᠄ 〈ᠲᠡᠷᠡᠭᠦᠷ ᠠᠯᠬᠤᠬᠤ ᠦᠭᠡᠢ〉 ᠭᠡᠰᠡᠨ ᠶᠤᠮ᠃
17 ᠪᠢ ᠲᠠ ᠨᠠᠷ ᠤᠨ ᠳᠡᠭᠡᠷᠡ ᠬᠠᠷᠠᠭᠤᠯ ᠤᠳ ᠢ ᠲᠠᠯᠪᠢᠵᠤ 〈ᠪᠦᠷᠢᠶᠡᠨ ᠳᠠᠭᠤ ᠶᠢ ᠰᠣᠨᠣᠰ〉 ᠭᠡᠰᠡᠨ ᠴᠤ ᠲᠠ ᠨᠠᠷ᠄ 〈ᠰᠣᠨᠣᠰᠬᠤ ᠦᠭᠡᠢ〉 ᠭᠡᠰᠡᠨ ᠶᠤᠮ᠃
18 ᠲᠡᠢᠮᠦ ᠡᠴᠡ ᠰᠣᠨᠣᠰᠣᠭᠲᠤᠨ᠂ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠡ ᠲᠡᠳᠡᠨ ᠳᠦ ᠶᠠᠭᠤ ᠪᠣᠯᠬᠤ ᠶᠢ ᠠᠩ᠋ᠬᠠᠷᠤᠭᠲᠤᠨ᠂ ᠭᠡᠷᠡᠴᠢ ᠨᠦᠭᠦᠳ ᠡ
19 ᠰᠣᠨᠣᠰᠣᠭᠲᠤᠨ᠂ ᠭᠠᠵᠠᠷ ᠳᠡᠯᠡᠬᠡᠢ ᠬᠠᠷᠠ᠂ ᠪᠢ ᠡᠨᠡ ᠠᠷᠠᠳ ᠲᠦᠮᠡᠨ ᠦ ᠳᠡᠭᠡᠷᠡ ᠭᠠᠢ ᠭᠠᠮᠰᠢᠭ ᠢ ᠠᠪᠴᠢᠷᠠᠵᠤ ᠪᠠᠢᠨᠠ︕ ᠲᠡᠳᠡᠨ ᠦ ᠪᠣᠳᠣᠯ ᠰᠠᠨᠠᠭᠠᠨ ᠤ ᠦᠷᠡ ᠳ᠋ᠦᠩ ᠡᠨᠡ ᠶᠤᠮ ᠲᠡᠳᠡ ᠮᠢᠨᠦ ᠦᠭᠡ ᠶᠢ ᠦᠯᠦ ᠣᠢᠰᠢᠶᠠᠨ ᠬᠠᠤᠯᠢ ᠶᠢ ᠮᠢᠨᠢ ᠣᠭᠣᠷᠣᠭᠰᠠᠨ ᠪᠢᠯᠡ᠂
20 ᠱᠧᠪᠠ ᠠᠴᠠ ᠭᠦᠭᠦᠯ ᠠᠯᠤᠰ ᠬᠣᠯᠠ ᠠᠴᠠ ᠠᠮᠲᠠᠲᠤ ᠨᠢᠰᠢᠩᠭᠦ ᠠᠪᠴᠢᠷᠠᠭᠠᠳ ᠶᠠᠭᠠᠬᠢᠬᠤ ᠭᠡᠵᠦ ᠪᠠᠢᠨᠠ︖ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠤᠳ ᠴᠢᠨᠢ ᠲᠠᠭᠠᠯᠠᠮᠵᠢᠲᠤ ᠪᠢᠰᠢ ᠲᠠᠬᠢᠯ ᠤᠳ ᠴᠢᠨᠢ ᠨᠠᠳᠠ ᠳᠤ ᠲᠠᠭᠠᠯᠠᠭᠳᠠᠬᠤ ᠦᠭᠡᠢ ᠪᠠᠢᠨᠠ᠃》
21 ᠲᠡᠢᠮᠦ ᠡᠴᠡ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠬᠠᠷᠠ᠂ ᠡᠨᠡ ᠠᠷᠠᠳ ᠲᠦᠮᠡᠨ ᠦ ᠡᠮᠦᠨᠡ ᠪᠢ ᠪᠦᠳᠦᠷᠢᠭᠦᠯᠬᠦ ᠴᠢᠯᠠᠭᠤ ᠲᠠᠯᠪᠢᠵᠤ ᠪᠠᠢᠨᠠ ᠡᠴᠢᠭᠡ ᠨᠦᠭᠦᠳ ᠬᠦᠦ ᠲᠠᠢ ᠪᠠᠨ ᠬᠠᠮᠲᠤ ᠲᠡᠭᠦᠨ ᠳᠦ ᠪᠦᠳᠦᠷᠢᠬᠦ ᠪᠥᠭᠡᠳ ᠠᠨᠳᠠ ᠨᠤᠭᠤᠳ ᠨᠢ ᠠᠢᠯ ᠬᠥᠷᠰᠢ ᠲᠠᠢ ᠪᠠᠨ ᠰᠦᠢᠷᠡᠨᠡ᠃》
22 ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠬᠠᠷᠠ᠂ ᠬᠣᠢᠲᠤ ᠵᠦᠭ ᠦᠨ ᠨᠤᠲᠤᠭ ᠠᠴᠠ ᠴᠡᠷᠢᠭ ᠤᠳ ᠢᠷᠡᠵᠦ ᠪᠠᠢᠨᠠ ᠭᠠᠵᠠᠷ ᠤᠨ ᠬᠢᠵᠠᠭᠠᠷ ᠠᠴᠠ ᠨᠢᠭᠡᠨ ᠠᠭᠤᠤ ᠦᠨᠳᠦᠰᠦᠲᠡᠨ ᠬᠥᠳᠡᠯᠵᠦ ᠪᠠᠢᠨᠠ
23 ᠲᠡᠳᠡ ᠨᠤᠮᠤ ᠪᠠ ᠵᠢᠳᠠ ᠠᠭᠰᠠᠭᠴᠢᠳ ᠪᠥᠭᠡᠳ ᠬᠠᠢᠷᠠ ᠨᠠᠢᠷ ᠦᠭᠡᠢ ᠬᠠᠷᠭᠢᠰ ᠳᠠᠭᠤ ᠨᠢ ᠳᠠᠯᠠᠢ ᠮᠡᠲᠦ ᠬᠦᠷᠬᠢᠷᠡᠳᠡᠭ ᠲᠡᠳᠡ ᠳᠠᠢᠴᠢᠨ ᠤ ᠵᠢᠭᠰᠠᠭᠠᠯ ᠵᠢᠭᠰᠠᠨ᠂ ᠮᠣᠷᠢᠨ ᠳᠠᠭᠠᠨ ᠮᠣᠷᠳᠠᠭᠠᠳ ᠽᠢᠶᠣᠨ ᠥᠬᠢᠨ ᠴᠢᠮᠠ ᠤᠷᠤᠭᠤ ᠳᠠᠭᠠᠷᠢᠨᠠ᠃
24 ᠪᠢᠳᠡ ᠡᠨᠡ ᠲᠤᠬᠠᠢ ᠮᠡᠳᠡᠭᠡ ᠶᠢ ᠰᠣᠨᠣᠰᠣᠭᠠᠳ ᠵᠣᠷᠢᠭ ᠠᠯᠳᠠᠪᠠ᠂ ᠲᠥᠷᠥᠯᠲᠡ ᠶᠢᠨ ᠬᠢ ᠮᠡᠲᠦ ᠡᠪᠡᠷᠰᠢᠶᠡᠯ ᠳᠦ ᠨᠡᠷᠪᠡᠭᠳᠡᠵᠡᠢ᠃
25 ᠲᠠ ᠨᠠᠷ ᠲᠠᠯᠠ ᠳᠡᠭᠡᠷᠡ ᠪᠦᠦ ᠭᠠᠷ᠂ ᠵᠠᠮ ᠢᠶᠠᠷ ᠪᠦᠦ ᠶᠠᠪᠤ ᠳᠠᠢᠰᠤᠨ ᠤ ᠢᠯᠳᠦ ᠪᠤᠢ︕ ᠡ᠊ᠨᠳᠡ ᠲᠡᠨᠳᠡ ᠦᠭᠡᠢ ᠠᠶᠤᠯ ᠠᠢᠳᠠᠰ ᠪᠠᠢᠨᠠ᠃
26 ᠥᠬᠢᠨ ᠠᠷᠠᠳ ᠲᠦᠮᠡᠨ ᠮᠢᠨᠢ ᠲᠠᠭᠠᠷ ᠤᠭᠯᠠᠨ᠂ ᠦᠨᠡᠰᠦᠨ ᠳᠡᠭᠡᠷᠡ ᠥᠩᠬᠥᠷᠢ ᠭᠠᠭᠴᠠ ᠬᠦᠦ ᠪᠡᠨ ᠠᠯᠳᠠᠭᠰᠠᠨ ᠮᠡᠲᠦ ᠬᠠᠮᠤᠭ ᠤᠨ ᠭᠠᠰᠢᠭᠤᠨ ᠢᠶᠠᠷ ᠭᠠᠰᠢᠭᠤᠳᠠ ᠰᠦᠢᠳᠬᠡᠭᠴᠢ ᠪᠢᠳᠡᠨ ᠳᠡᠭᠡᠷᠡ ᠭᠡᠨᠡᠳᠲᠡ ᠢᠷᠡᠨᠡ᠃
27 ᠪᠢ ᠴᠢᠮᠠ ᠶᠢ ᠰᠢᠯᠭᠠᠭᠴᠢ ᠪᠣᠯᠭᠠᠵᠤ᠂ ᠠᠷᠠᠳ ᠲᠦᠮᠡᠨ ᠢ ᠬᠦᠳᠡᠷ ᠪᠣᠯᠭᠠᠭᠰᠠᠨ ᠴᠢ ᠲᠡᠳᠡᠨ ᠦ ᠦᠢᠯᠡᠰ ᠢ ᠦᠵᠡᠵᠦ ᠰᠢᠯᠭᠠ᠃
28 ᠲᠡᠳᠡ ᠪᠦᠭᠦᠳᠡ ᠵᠥᠷᠢᠭᠦᠳ ᠤᠷᠪᠠᠭᠴᠢᠳ᠂ ᠬᠣᠪ ᠵᠥᠭᠡᠭᠡᠭᠴᠢᠳ ᠬᠦᠷᠡᠯ ᠪᠠ ᠲᠡᠮᠦᠷ ᠪᠥᠭᠡᠳ ᠲᠡᠳᠡ ᠪᠦᠭᠦᠳᠡᠭᠡᠷ ᠢᠶᠡᠨ ᠵᠢᠪᠡᠷᠡᠭᠰᠡᠨ ᠪᠠᠢᠨᠠ᠃
29 ᠲᠤᠯᠤᠮ ᠤᠨ ᠬᠥᠭᠡᠷᠭᠡ ᠪᠡᠷ ᠰᠢᠷᠦᠭᠦᠨ ᠦᠯᠢᠶᠡᠯᠭᠡᠪᠡᠯ ᠲᠤᠭᠤᠯᠭᠠ ᠬᠠᠢᠯᠵᠤ ᠴᠡᠪᠡᠷᠰᠢᠭᠦᠯᠦᠭᠰᠡᠭᠡᠷ ᠪᠠᠢᠭᠰᠠᠨ ᠴᠤ ᠲᠠᠯᠠᠭᠠᠷ ᠪᠣᠯᠳᠠᠭ ᠤᠨ ᠠᠳᠠᠯᠢ 3 ᠲᠡᠳᠡᠨ ᠦ ᠬᠣᠷᠣᠨ ᠮᠠᠭᠤ ᠮᠥᠨ ᠯᠠ ᠠᠷᠢᠯᠳᠠᠭ ᠦᠭᠡᠢ᠂
30 ᠶᠣᠬᠣᠸᠠ ᠲᠡᠳᠡᠨ ᠢ ᠭᠣᠯᠣᠭᠰᠠᠨ ᠲᠤᠯᠠ ᠲᠡᠳᠡ 《ᠭᠣᠯᠣᠭᠳᠠᠭᠰᠠᠨ ᠮᠥᠩᠭᠥ》 ᠭᠡᠭᠳᠡᠨᠡ᠃