ᠶᠧᠷᠧᠮᠢᠶᠠ ᠭᠤᠴᠢᠨ ᠨᠢᠭᠡ
1 《ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃ ᠲᠡᠷᠡ ᠦᠶᠡ ᠳᠦ ᠪᠢ ᠢᠰᠷᠧᠯ ᠤᠨ ᠪᠦᠬᠦ ᠪᠦᠯᠢ ᠶᠢᠨ ᠪᠤᠷᠬᠠᠨ ᠪᠣᠯᠵᠤ᠂ ᠲᠡᠳᠡ ᠮᠢᠨᠦ ᠠᠷᠠᠳ ᠲᠦᠮᠡᠨ ᠪᠣᠯᠣᠨᠠ᠃》
2 ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠢᠯᠳᠦᠨ ᠡᠴᠡ ᠠᠮᠢᠳᠤ ᠦᠯᠡᠳᠡᠭᠰᠡᠨ ᠠᠷᠠᠳ ᠣᠯᠠᠨ ᠴᠥᠯ ᠳᠤ ᠢᠪᠡᠭᠡᠯ ᠢ ᠣᠯᠣᠨᠠ ᠢᠰᠷᠧᠯ ᠳᠤ ᠪᠢ ᠠᠮᠠᠷᠠᠯ ᠥᠭᠬᠦ ᠪᠡᠷ ᠢᠷᠡᠨᠡ᠃》
3 ᠥᠨᠢ ᠡᠷᠲᠡ ᠡᠴᠡ 12 ᠶᠣᠬᠣᠸᠠ ᠪᠢᠳᠡᠨ ᠳᠦ ᠦᠵᠡᠭᠳᠡᠨ᠄ 《〈ᠪᠢ ᠴᠢᠮᠠᠶᠢ ᠡᠭᠦᠷᠢᠳᠡ ᠶᠢᠨ ᠬᠠᠢᠷᠠ ᠪᠠᠷ ᠬᠠᠢᠷᠠᠯᠠᠭᠰᠠᠨ ᠪᠢ ᠴᠢᠮᠠᠶᠢ ᠦᠨᠡᠨᠴᠢ ᠬᠠᠢᠷᠠ ᠪᠠᠷ ᠬᠥᠲᠥᠯᠥᠭᠰᠡᠨ〉 ᠭᠡᠪᠡ᠃
4 ᠥᠬᠢᠨ ᠢᠰᠷᠧᠯ ᠮᠢᠨᠢ᠂ ᠪᠢ ᠴᠢᠮᠠᠶᠢ ᠳᠠᠬᠢᠨ ᠪᠣᠰᠬᠠᠬᠤ ᠲᠤᠯᠠ ᠴᠢ ᠪᠣᠰᠬᠠᠭᠳᠠᠨᠠ ᠴᠢ ᠳᠠᠬᠢᠨ ᠬᠡᠩᠭᠡᠷᠭᠡ ᠠᠪᠴᠤ᠂ ᠪᠠᠶᠠᠷᠯᠠᠭᠴᠢᠳ ᠤᠨ ᠳᠤᠮᠳᠠ ᠠᠴᠠ ᠪᠥᠵᠢᠭᠯᠡᠵᠦ ᠭᠠᠷᠬᠤ ᠪᠣᠯᠣᠨᠠ᠃
5 ᠴᠢ ᠳᠠᠬᠢᠨ ᠰᠠᠮᠠᠷᠢᠶᠠ ᠶᠢᠨ ᠲᠣᠯᠣᠭᠠᠳ ᠳᠡᠭᠡᠷᠡ ᠦᠵᠦᠮ ᠦᠨ ᠴᠡᠴᠡᠷᠯᠢᠭ ᠪᠠᠢᠭᠤᠯᠬᠤ ᠪᠥᠭᠡᠳ ᠲᠠᠷᠢᠭᠴᠢᠳ ᠲᠠᠷᠢᠭᠰᠠᠨ ᠢᠶᠠᠨ ᠠᠮᠰᠠᠬᠤ ᠪᠣᠯᠣᠨᠠ᠃
6 ᠡᠹᠷᠠᠢᠮ ᠤᠨ ᠲᠣᠯᠣᠭᠠᠳ ᠳᠡᠭᠡᠷᠡ ᠬᠠᠷᠠᠭᠤᠯ ᠤᠳ ᠥᠨᠳᠥᠷ ᠳᠠᠭᠤ ᠪᠠᠷ᠄ 〈ᠵᠠ᠂ ᠪᠢᠳᠡ ᠽᠢᠶᠣᠨ ᠳᠠᠬᠢ ᠶᠣᠬᠣᠸᠠ ᠪᠤᠷᠬᠠᠨ ᠥᠭᠡᠳᠡ ᠪᠡᠨ ᠣᠴᠢᠵᠠᠭᠠᠶᠠ〉》 ᠭᠡᠬᠦ ᠡᠳᠦᠷ ᠯᠠᠪ ᠢᠷᠡᠨᠡ᠃
7 ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠲᠠ ᠨᠠᠷ ᠶᠠᠺᠣᠪ ᠲᠤ ᠪᠠᠶᠠᠷ ᠤᠨ ᠳᠠᠭᠤᠤ ᠳᠠᠭᠤᠯᠠᠵᠤ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠲᠡᠷᠢᠭᠦᠨ ᠦ ᠡᠮᠦᠨᠡ ᠤᠤᠬᠠᠢᠯᠠ ᠲᠠ ᠨᠠᠷ ᠮᠠᠭᠲᠠᠭᠠᠯ ᠢᠶᠠᠨ ᠰᠣᠨᠣᠰᠬᠠᠵᠤ᠄ 〈ᠶᠣᠬᠣᠸᠠ᠂ ᠥᠪᠡᠷ ᠦᠨ ᠢᠶᠠᠨ ᠠᠷᠠᠳ ᠲᠦᠮᠡᠨ ᠢᠰᠷᠧᠯ ᠤᠨ ᠦᠯᠡᠳᠡᠭᠰᠡᠳ ᠢ ᠠᠪᠤᠷᠠᠭᠠᠴᠢ〉 ᠭᠡᠵᠦ ᠬᠡᠯᠡ᠃
8 ᠬᠠᠷᠠ᠂ ᠪᠢ ᠲᠡᠳᠡᠨ ᠢ ᠬᠣᠢᠲᠤ ᠵᠦᠭ ᠦᠨ ᠨᠤᠲᠤᠭ ᠠᠴᠠ ᠠᠪᠴᠢᠷᠠᠵᠤ ᠪᠠᠢᠨᠠ︕ ᠪᠢ ᠭᠠᠵᠠᠷ ᠤᠨ ᠬᠢᠵᠠᠭᠠᠷ ᠠᠴᠠ ᠲᠡᠳᠡᠨ ᠢ ᠴᠤᠭᠯᠠᠭᠤᠯᠬᠤ ᠳᠤ ᠰᠣᠬᠣᠷ ᠪᠠ ᠳᠣᠭᠣᠯᠠᠩ ᠵᠢᠷᠮᠦᠰᠦᠨ ᠪᠠ ᠨᠢᠷᠠᠢᠯᠠᠬᠤ ᠭᠡᠵᠦ ᠪᠤᠢ ᠪᠦᠰᠡᠭᠦᠢ ᠬᠠᠮᠲᠤ ᠳᠠᠭᠠᠨ ᠦᠢ ᠲᠦᠮᠡᠨ ᠬᠥᠮᠦᠰ ᠪᠤᠴᠠᠵᠤ ᠢᠷᠡᠨᠡ᠂
9 ᠲᠡᠳᠡ ᠤᠬᠢᠯᠠᠨ ᠢᠷᠡᠨᠡ᠂ ᠲᠡᠳᠡ ᠭᠤᠶᠤᠬᠤ ᠳᠤ ᠪᠢ ᠤᠳᠤᠷᠢᠳᠤᠨᠠ ᠪᠢ ᠲᠡᠳᠡᠨ ᠢ ᠤᠷᠤᠰᠬᠠᠯ ᠤᠰᠤᠨ ᠤ ᠬᠠᠵᠠᠭᠤ ᠪᠠᠷ ᠪᠦᠳᠦᠷᠢᠬᠦ ᠦᠭᠡᠢ ᠲᠡᠭᠰᠢᠬᠡᠨ ᠵᠠᠮ ᠢᠶᠠᠷ ᠠᠯᠬᠤᠭᠤᠯᠤᠨᠠ᠂ ᠪᠢ ᠪᠣᠯ ᠢᠰᠷᠧᠯ ᠤᠨ ᠡᠴᠢᠭᠡ᠂ ᠡᠹᠷᠠᠢᠮ ᠪᠣᠯ ᠮᠢᠨᠦ ᠤᠤᠭᠠᠨ ᠬᠦᠦ ᠪᠢᠯᠡ᠃
10 ᠦᠨᠳᠦᠰᠦᠲᠡᠨ ᠨᠦᠭᠦᠳ ᠡ᠂ ᠶᠣᠬᠣᠸᠠ ᠶᠢᠨ ᠦᠭᠡ ᠶᠢ ᠰᠣᠨᠣᠰᠴᠠᠭᠠᠵᠤ ᠠᠯᠤᠰ ᠤᠨ ᠠᠷᠠᠯ ᠳᠤ ᠲᠤᠩ᠋ᠬᠠᠭᠯᠠᠨ᠄ 〈ᠢᠰᠷᠧᠯ ᠢ ᠲᠠᠷᠬᠠᠭᠠᠭᠰᠠᠨ ᠶᠣᠬᠣᠸᠠ ᠲᠡᠭᠦᠨ ᠢ ᠴᠤᠭᠯᠠᠭᠤᠯᠤᠨ ᠬᠣᠨᠢᠴᠢᠨ ᠬᠣᠨᠢᠨ ᠰᠦᠷᠦᠭ ᠢᠶᠡᠨ ᠬᠠᠷᠢᠭᠤᠯᠳᠠᠭ ᠰᠢᠭ᠋ ᠲᠡᠭᠦᠨ ᠢ ᠬᠠᠷᠢᠭᠤᠯᠤᠨᠠ〉 ᠭᠡᠵᠦ ᠬᠡᠯᠡ᠃
11 ᠦᠨᠡᠬᠡᠷ ᠶᠣᠬᠣᠸᠠ ᠶᠠᠺᠣᠪ ᠢ ᠵᠣᠯᠢᠨ ᠠᠪᠴᠤ ᠥᠪᠡᠷ ᠡᠴᠡ ᠨᠢ ᠬᠦᠴᠦᠲᠡᠢ ᠨᠢᠭᠡᠨ ᠦ ᠭᠠᠷ ᠠᠴᠠ ᠴᠢᠯᠥᠭᠡᠯᠡᠭᠰᠡᠨ ᠶᠤᠮ᠃
12 ᠲᠡᠳᠡ ᠪᠤᠴᠠᠵᠤ ᠢᠷᠡᠭᠡᠳ ᠽᠢᠶᠣᠨ ᠤ ᠲᠣᠯᠣᠭᠠᠳ ᠳᠡᠭᠡᠷᠡ ᠪᠠᠶᠠᠷᠯᠠᠨ ᠬᠠᠰᠬᠢᠷᠤᠯᠳᠤᠨᠠ ᠦᠷᠡ ᠲᠠᠷᠢᠶᠠ᠂ ᠰᠢᠨᠡ ᠳᠠᠷᠠᠰᠤ᠂ ᠲᠣᠰᠣ᠂ ᠮᠠᠯ ᠰᠦᠷᠦᠭ ᠦᠨ ᠦᠷᠡ ᠲᠥᠯ ᠵᠡᠷᠭᠡ ᠶᠣᠬᠣᠸᠠ ᠶᠢᠨ ᠬᠡᠰᠢᠭ ᠢᠶᠠᠷ ᠭᠡᠷᠡᠯᠲᠦᠨᠡ ᠰᠦᠨᠡᠰᠦ ᠨᠢ ᠰᠢᠨᠲᠠᠷᠠᠬᠤ ᠪᠠᠨ ᠪᠣᠯᠢᠵᠤ᠂ ᠤᠰᠤᠯᠠᠭᠳᠠᠭᠰᠠᠨ ᠴᠡᠴᠡᠷᠯᠢᠭ ᠮᠡᠲᠦ ᠪᠣᠯᠣᠨᠠ
13 ᠪᠦᠰᠡᠭᠦᠢᠴᠦᠦᠯ ᠪᠥᠵᠢᠭᠯᠡᠨ ᠪᠠᠶᠠᠷᠯᠠᠵᠤ᠂ ᠬᠥᠭᠰᠢᠨ ᠵᠠᠯᠠᠭᠤ ᠬᠠᠮᠲᠤ ᠳᠠᠭᠠᠨ ᠬᠥᠭᠰᠡᠨᠡ ᠭᠠᠰᠢᠭᠤᠳᠠᠯ ᠢ ᠨᠢ ᠪᠢ ᠪᠠᠶᠠᠷ ᠢᠶᠠᠷ ᠰᠣᠯᠢᠵᠤ ᠭᠠᠰᠠᠯᠠᠩ ᠤᠨ ᠣᠷᠣᠨ ᠳᠤ ᠲᠠᠢᠪᠤᠰᠢᠷᠠᠯ ᠪᠣᠯᠣᠨ ᠵᠢᠷᠭᠠᠯ ᠢ ᠣᠯᠭᠣᠨᠠ᠃
14 ᠲᠠᠬᠢᠯᠴᠢᠳ ᠤᠨ ᠰᠦᠨᠡᠰᠦ ᠶᠢ ᠪᠢ ᠲᠣᠰᠣᠯᠠᠨ ᠳᠦᠭᠦᠷᠭᠡᠨᠡ ᠮᠢᠨᠦ ᠠᠷᠠᠳ ᠲᠦᠮᠡᠨ ᠰᠠᠢᠨ ᠰᠠᠢᠬᠠᠨ ᠢᠶᠠᠷ ᠮᠢᠨᠢ ᠬᠠᠩ᠋ᠬᠤ ᠪᠣᠯᠣᠨᠠ᠂》 ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃
15 ᠶᠣᠬᠣᠸᠠ ᠢᠩᠭᠢᠵᠦ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠷᠠᠮᠠ ᠠᠴᠠ ᠶᠡᠬᠡᠳᠡ ᠤᠬᠢᠯᠠᠨ ᠭᠠᠰᠢᠭᠤᠳᠠᠬᠤ ᠴᠢᠩᠭ᠍ᠠ ᠳᠠᠭᠤ ᠰᠣᠨᠣᠰᠳᠠᠪᠠ ᠷᠠᠾᠢᠯ ᠬᠡᠦᠬᠡᠳ ᠤᠳ ᠢᠶᠠᠨ ᠰᠠᠨᠠᠨ ᠤᠬᠢᠯᠠᠵᠤ ᠪᠠᠢᠨᠠ ᠲᠡᠷᠡ ᠲᠠᠢᠳᠬᠤᠷᠠᠭᠤᠯᠤᠭᠳᠠᠬᠤ ᠶᠢ ᠬᠦᠰᠡᠭᠰᠡᠨ ᠦᠭᠡᠢ ᠲᠡᠳᠡᠨ ᠦ ᠬᠡᠦᠬᠡᠳ ᠤᠳ ᠠᠯᠠᠭᠠ ᠪᠣᠯᠴᠢᠬᠠᠭᠰᠠᠨ ᠠᠵᠢ᠃》
16 ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠤᠬᠢᠯᠠᠬᠤ ᠳᠠᠭᠤ᠂ ᠨᠢᠳᠦᠨ ᠦ ᠪᠠᠨ ᠨᠢᠯᠪᠤᠰᠤ ᠶᠢ ᠵᠣᠭᠰᠣᠭᠠ ᠦᠢᠯᠡᠰ ᠴᠢᠨᠢ ᠱᠠᠩᠨᠠᠯ ᠲᠠᠢ ᠪᠥᠭᠡᠳ ᠥᠰᠲᠡᠨ ᠦ ᠨᠤᠲᠤᠭ ᠠᠴᠠ ᠲᠡᠳᠡ ᠪᠤᠴᠠᠵᠤ ᠢᠷᠡᠨᠡ᠂》 ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃
17 《ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠂ ᠴᠢᠨᠦ ᠢᠷᠡᠭᠡᠳᠦᠢ ᠨᠠᠢᠳᠠᠪᠤᠷᠢ ᠲᠠᠢ ᠴᠢᠨᠦ ᠦᠷᠡ ᠬᠡᠦᠬᠡᠳ ᠨᠤᠲᠤᠭ ᠳᠡᠪᠢᠰᠬᠡᠷ ᠤᠷᠤᠭᠤ ᠪᠠᠨ ᠪᠤᠴᠠᠵᠤ ᠢᠷᠡᠨᠡ᠃
18 ᠪᠢ ᠦᠨᠡᠬᠡᠷ ᠰᠣᠨᠣᠰᠣᠯᠠ᠂ ᠡᠹᠷᠠᠢᠮ ᠬᠠᠷᠠᠮᠰᠠᠨ ᠤᠬᠢᠯᠠᠵᠤ᠄ 〈ᠲᠠ ᠨᠠᠮᠠᠶᠢ ᠭᠡᠰᠬᠡᠭᠡᠵᠦ᠂ ᠪᠢ ᠭᠡᠰᠬᠡᠭᠳᠡᠭᠰᠡᠨ᠃ ᠪᠢ ᠰᠤᠷᠭᠠᠭᠳᠠᠭᠠ ᠦᠭᠡᠢ ᠲᠤᠭᠤᠯ ᠰᠢᠭ᠋ ᠪᠠᠢᠵᠠᠢ ᠨᠠᠮᠠᠶᠢ ᠪᠤᠴᠠᠭᠠᠵᠤ ᠠᠪᠠᠴᠢᠭᠠᠴᠢ ᠪᠢ ᠪᠤᠴᠠᠵᠤ ᠣᠴᠢᠶᠡ ᠮᠢᠨᠦ ᠪᠤᠷᠬᠠᠨ ᠪᠣᠯ ᠶᠣᠬᠣᠸᠠ ᠲᠠ ᠪᠢᠯᠡ᠃
19 ᠪᠢ ᠲᠠᠨ ᠠᠴᠠ ᠡᠷᠭᠢᠭᠰᠡᠨ ᠦ ᠳᠠᠷᠠᠭᠠ ᠭᠡᠮᠰᠢᠭᠰᠡᠨ ᠰᠤᠷᠭᠠᠭᠳᠠᠭᠰᠠᠨ ᠤ ᠳᠠᠷᠠᠭᠠ ᠪᠢ ᠴᠡᠭᠡᠵᠢ ᠪᠠᠨ ᠳᠡᠯᠡᠳᠪᠡ ᠪᠢ ᠵᠠᠯᠠᠭᠤ ᠦᠶᠡ ᠶᠢᠨ ᠢᠶᠠᠨ ᠭᠤᠲᠤᠮᠰᠢᠭᠲᠤ ᠶᠠᠪᠤᠳᠠᠯ ᠢ ᠡᠭᠦᠷᠦᠭᠡᠳ ᠢᠴᠢᠵᠦ ᠶᠡᠬᠡᠳᠡ ᠵᠣᠪᠠᠪᠠ〉 ᠭᠡᠵᠦ ᠶᠠᠷᠢᠵᠤ ᠪᠠᠢᠯᠠ᠃
20 ᠡᠹᠷᠠᠢᠮ ᠮᠢᠨᠦ ᠬᠠᠢᠷᠠᠲᠤ ᠬᠦᠦ ᠮᠢᠨᠦ ᠲᠠᠭᠠᠯᠠᠮᠵᠢᠲᠤ ᠬᠦᠦ ᠪᠢᠰᠢ ᠤᠤ︖ ᠪᠢ ᠲᠡᠭᠦᠨ ᠢ ᠪᠠᠢᠨ ᠪᠠᠢᠨ ᠵᠢᠮᠡᠯᠡᠳᠡᠭ ᠪᠣᠯᠪᠠᠴᠤ ᠲᠡᠭᠦᠨ ᠢ ᠬᠦᠰᠡᠨ ᠰᠠᠨᠠᠭᠠᠯᠵᠠᠳᠠᠭ ᠡᠭᠦᠨᠴᠢᠯᠡᠨ ᠵᠢᠷᠦᠬᠡ ᠰᠡᠳᠬᠢᠯ ᠮᠢᠨᠢ ᠲᠡᠭᠦᠨ ᠤᠷᠤᠭᠤ ᠲᠡᠮᠡᠦᠯᠳᠡᠭ ᠦᠨᠡᠬᠡᠷ ᠪᠢ ᠲᠡᠭᠦᠨ ᠳᠦ ᠥᠷᠥᠰᠢᠶᠡᠯ ᠦᠵᠡᠭᠦᠯᠦᠨᠡ᠂》 ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃
21 《ᠵᠠᠮ ᠤᠨ ᠲᠡᠮᠳᠡᠭ ᠲᠠᠯᠪᠢ᠂ ᠴᠢᠭ ᠵᠢᠭᠠᠭᠴᠢ ᠱᠣᠩ ᠪᠠᠢᠷᠢᠯᠠᠭᠤᠯ ᠥᠪᠡᠷ ᠦᠨ ᠢᠶᠠᠨ ᠶᠠᠪᠤᠭᠰᠠᠨ ᠵᠠᠮ᠂ ᠥᠨᠥᠬᠢ ᠶᠡᠬᠡ ᠵᠠᠮ ᠢ ᠠᠩ᠋ᠬᠠᠷ ᠥᠬᠢᠨ ᠢᠰᠷᠧᠯ ᠡ᠂ ᠡᠷᠭᠢᠨ ᠪᠤᠴᠠᠵᠤ ᠥᠪᠡᠷ ᠦᠨ ᠢᠶᠠᠨ ᠬᠣᠲᠠ ᠲᠣᠰᠬᠣᠨ ᠤᠷᠤᠭᠤ ᠢᠷᠡ᠃
22 ᠲᠡᠷᠰᠯᠡᠭᠦᠦ ᠪᠠᠢᠭᠰᠠᠨ ᠥᠬᠢᠨ᠂ ᠴᠢ ᠬᠡᠵᠢᠶᠡ ᠪᠣᠯᠲᠠᠯᠠ ᠬᠤᠯᠬᠢᠬᠤ ᠶᠤᠮ ᠪᠤᠢ︖ ᠡᠨᠡ ᠭᠠᠵᠠᠷ ᠳᠡᠭᠡᠷᠡ ᠶᠣᠬᠣᠸᠠ ᠴᠤ᠋ ᠰᠢᠨᠡ ᠶᠢ ᠪᠦᠲᠦᠭᠡᠵᠦ ᠡᠮᠡᠭᠲᠡᠢ ᠬᠥᠮᠦᠨ ᠡᠷᠡᠭᠲᠡᠢ ᠬᠥᠮᠦᠨ ᠢ ᠬᠦᠷᠢᠶᠡᠯᠡᠨᠡ 13 ᠃》
23 ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ᠂ ᠢᠰᠷᠧᠯ ᠤᠨ ᠪᠤᠷᠬᠠᠨ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠲᠡᠳᠡᠨ ᠢ ᠴᠥᠯᠡᠯᠭᠡ ᠡᠴᠡ ᠪᠤᠴᠠᠭᠠᠬᠤ ᠳᠤ ᠮᠢᠨᠢ ᠶᠦᠳᠠ ᠶᠢᠨ ᠨᠤᠲᠤᠭ ᠳᠠᠬᠢ ᠬᠣᠲᠠ ᠲᠣᠰᠬᠣᠳ ᠤᠨ ᠬᠥᠮᠦᠰ 〈ᠠᠷᠢᠭᠤᠨ ᠠᠭᠤᠯᠠ᠂ ᠵᠥᠪ ᠶᠣᠰᠣᠨ ᠤ ᠣᠷᠣᠰᠢᠬᠤ ᠭᠠᠵᠠᠷ ᠡ ᠶᠣᠬᠣᠸᠠ ᠴᠢᠮᠠᠶᠢ ᠢᠷᠥᠭᠡᠬᠦ ᠪᠣᠯᠲᠤᠭᠠᠢ︕〉
ᠭᠡᠰᠡᠨ ᠦᠭᠡ ᠶᠢ ᠳᠠᠬᠢᠨ ᠬᠡᠷᠡᠭᠯᠡᠬᠦ ᠪᠣᠯᠣᠨᠠ᠃ 24 ᠲᠠᠷᠢᠶᠠᠴᠢᠨ ᠴᠤ᠂ ᠬᠣᠨᠢᠨ ᠰᠦᠷᠦᠭ ᠲᠡᠢ ᠨᠡᠭᠦᠳᠡᠯᠴᠢᠨ ᠴᠤ ᠬᠠᠮᠲᠤ ᠳᠠᠭᠠᠨ ᠶᠦᠳᠠ ᠳᠠᠬᠢ ᠪᠦᠬᠦ ᠬᠣᠲᠠ ᠲᠣᠰᠬᠣᠨ ᠳᠤ ᠰᠠᠭᠤᠷᠢᠰᠢᠬᠤ ᠪᠣᠯᠣᠨᠠ᠃ 25 ᠲᠡᠢᠨ ᠬᠦ ᠪᠢ ᠴᠠᠩ᠋ᠭᠠᠭᠰᠠᠨ ᠬᠥᠮᠦᠨ ᠢ ᠤᠮᠳᠠᠯᠠᠵᠤ᠂ ᠴᠤᠴᠠᠭᠰᠠᠨ ᠬᠥᠮᠦᠨ ᠢ ᠰᠡᠷᠭᠦᠭᠡᠨᠡ》 ᠭᠡᠯᠡ᠃
26 ᠡᠨᠡ ᠮᠥᠴᠡ ᠳᠦ ᠪᠢ ᠰᠡᠷᠢᠭᠡᠳ ᠨᠢᠳᠦ ᠪᠡᠨ ᠨᠡᠭᠡᠭᠡᠪᠡ᠃ ᠨᠣᠢᠷ ᠮᠢᠨᠢ ᠠᠮᠲᠠᠲᠠᠢ ᠪᠠᠢᠯᠠ᠃
27 《ᠬᠠᠷᠠ᠂ ᠪᠢ ᠢᠰᠷᠧᠯ ᠤᠨ ᠭᠡᠷ ᠪᠣᠯᠣᠨ ᠶᠦᠳᠠ ᠶᠢᠨ ᠭᠡᠷ ᠲᠦ ᠬᠥᠮᠦᠨ ᠦ ᠦᠷᠡ ᠪᠣᠯᠣᠨ ᠠᠮᠢᠲᠠᠨ ᠤ ᠦᠷᠡ ᠶᠢ ᠰᠠᠴᠤᠨᠠ᠃ ᠲᠡᠷᠡ ᠡᠳᠦᠷ ᠤᠳ ᠢᠷᠡᠵᠦ ᠪᠠᠢᠨᠠ᠂》 ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃ 28 《ᠤᠷᠢᠳᠤ ᠨᠢ ᠲᠡᠳᠡᠨ ᠢ ᠵᠤᠯᠭᠠᠭᠠᠨ ᠰᠦᠢᠳᠬᠡᠵᠦ᠂ ᠤᠨᠠᠭᠠᠨ ᠤᠰᠠᠳᠬᠠᠵᠤ᠂ ᠵᠣᠪᠠᠭᠠᠬᠤ ᠪᠠᠷ ᠬᠠᠷᠠᠭᠤᠯᠳᠠᠵᠤ ᠪᠠᠢᠭᠰᠠᠨ ᠰᠢᠭ᠋ ᠢᠶᠠᠨ ᠪᠢ ᠲᠡᠳᠡᠨ ᠢ ᠪᠣᠰᠬᠠᠵᠤ᠂ ᠤᠷᠭᠤᠭᠤᠯᠬᠤ ᠪᠠᠷ ᠬᠠᠷᠠᠭᠤᠯᠳᠠᠬᠤ ᠪᠣᠯᠣᠨᠠ᠂》 ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃ 29 《ᠲᠡᠷᠡ ᠡᠳᠦᠷ ᠤᠳ ᠲᠤ ᠲᠡᠳᠡ᠄ 〈ᠡᠴᠢᠭᠡ ᠨᠢ ᠢᠰᠭᠦᠯᠡᠩ ᠦᠵᠦᠮ ᠢᠳᠡᠪᠡᠯ ᠬᠡᠦᠬᠡᠳ ᠦᠨ ᠬᠢᠨᠢ ᠰᠢᠳᠦ ᠬᠠᠪᠤᠨᠠ〉
ᠭᠡᠵᠦ ᠶᠠᠷᠢᠬᠤ ᠪᠠᠨ ᠪᠣᠯᠢᠨᠠ᠃ 30 ᠢᠰᠭᠦᠯᠡᠩ ᠦᠵᠦᠮ ᠢ ᠢᠳᠡᠭᠰᠡᠨ ᠬᠥᠮᠦᠨ ᠦ ᠯᠠ ᠰᠢᠳᠦ ᠬᠠᠪᠤᠳᠠᠭ ᠲᠠᠢ ᠠᠳᠠᠯᠢ ᠬᠥᠮᠦᠨ ᠪᠦᠷᠢ ᠥᠪᠡᠷ ᠥᠪᠡᠷ ᠦᠨ ᠢᠶᠠᠨ ᠨᠢᠭᠦᠯ ᠢᠶᠡᠷ ᠦᠬᠦᠨᠡ᠃》
31 ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠬᠠᠷᠠ᠂ ᠪᠢ ᠢᠰᠷᠧᠯ ᠤᠨ ᠭᠡᠷ ᠪᠣᠯᠣᠨ ᠶᠦᠳᠠ ᠶᠢᠨ ᠭᠡᠷ ᠲᠡᠢ ᠰᠢᠨᠡ ᠭᠡᠷᠡ ᠪᠠᠢᠭᠤᠯᠤᠨᠠ᠃ ᠲᠡᠷᠡ ᠡᠳᠦᠷ ᠤᠳ ᠢᠷᠡᠵᠦ ᠪᠠᠢᠨᠠ᠃ 32 ᠲᠡᠷᠡ ᠭᠡᠷᠡ ᠪᠣᠯ ᠪᠢ ᠲᠡᠳᠡᠨ ᠦ ᠡᠴᠢᠭᠡ ᠡᠪᠦᠭᠡᠳ ᠢ ᠭᠠᠷ ᠠᠴᠠ ᠨᠢ ᠬᠥᠲᠥᠯᠵᠦ ᠶᠧᠵᠢᠫᠲ ᠡᠴᠡ ᠭᠠᠷᠭᠠᠬᠤ ᠳᠠᠭᠠᠨ ᠲᠡᠳᠡᠨ ᠯᠦᠭᠡ ᠪᠠᠢᠭᠤᠯᠤᠭᠰᠠᠨ ᠭᠡᠷᠡ ᠲᠠᠢ ᠮᠢᠨᠢ ᠠᠳᠠᠯᠢ ᠦᠭᠡᠢ᠃ ᠨᠠᠮᠠᠶᠢ ᠥᠪᠡᠷ ᠲᠡᠢ ᠨᠢ ᠭᠡᠷᠯᠡᠭᠰᠡᠨ ᠪᠠᠢᠬᠤ ᠳᠤ᠂ ᠲᠡᠳᠡ ᠮᠢᠨᠦ ᠭᠡᠷᠡ ᠶᠢ ᠵᠥᠷᠢᠴᠡᠭᠰᠡᠨ ᠪᠢᠯᠡ᠂》 ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃ 33 ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃ 《ᠲᠡᠷᠡ ᠡᠳᠦᠷ ᠤᠳ ᠤᠨ ᠳᠠᠷᠠᠭᠠ ᠢᠰᠷᠧᠯ ᠤᠨ ᠭᠡᠷ ᠲᠡᠢ ᠮᠢᠨᠦ ᠪᠠᠢᠭᠤᠯᠬᠤ ᠭᠡᠷᠡ ᠪᠣᠯ ᠡᠨᠡ᠄ ᠪᠢ ᠬᠠᠤᠯᠢ ᠪᠠᠨ ᠲᠡᠳᠡᠨ ᠦ ᠳᠣᠲᠣᠷᠠ ᠬᠢᠵᠦ᠂ ᠵᠢᠷᠦᠬᠡᠨ ᠳᠡᠭᠡᠷᠡ ᠨᠢ ᠪᠢᠴᠢᠨᠡ᠃ ᠡᠢᠨ ᠬᠦ ᠪᠢ ᠲᠡᠳᠡᠨ ᠦ ᠪᠤᠷᠬᠠᠨ᠂ ᠲᠡᠳᠡ ᠮᠢᠨᠦ ᠠᠷᠠᠳ ᠲᠦᠮᠡᠨ ᠪᠣᠯᠬᠤ ᠪᠥᠭᠡᠳ 34 ᠬᠡᠦᠬᠡᠳ ᠨᠠᠰᠤᠲᠠᠳ ᠦᠭᠡᠢ ᠪᠦᠭᠦᠳᠡᠭᠡᠷ ᠨᠠᠮᠠᠶᠢ ᠮᠡᠳᠡᠬᠦ ᠲᠤᠯᠠ ᠬᠥᠮᠦᠨ ᠬᠥᠷᠰᠢ ᠪᠣᠯᠣᠨ ᠠᠬᠠ ᠳᠡᠭᠦᠦ ᠳᠡᠭᠡᠨ᠄ 〈ᠶᠣᠬᠣᠸᠠ ᠶᠢ ᠮᠡᠳᠡ〉 ᠭᠡᠵᠦ ᠵᠢᠭᠠᠬᠤ ᠬᠡᠷᠡᠭ ᠦᠭᠡᠢ ᠪᠣᠯᠣᠨᠠ᠂》 ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃ ᠲᠡᠢᠨ ᠬᠦ ᠪᠢ ᠲᠡᠳᠡᠨ ᠦ ᠭᠡᠮ ᠪᠤᠷᠤᠭᠤ ᠶᠢ ᠠᠭᠤᠴᠢᠯᠠᠵᠤ᠂ ᠲᠡᠳᠡᠨ ᠦ ᠨᠢᠭᠦᠯ ᠢ ᠳᠠᠬᠢᠨ ᠰᠠᠨᠠᠬᠤ ᠦᠭᠡᠢ᠃
35 ᠨᠠᠷᠠ ᠶᠢ ᠡᠳᠦᠷ ᠦᠨ ᠭᠡᠷᠡᠯ ᠪᠣᠯᠭᠠᠵᠤ ᠰᠠᠷᠠ ᠪᠣᠯᠣᠨ ᠣᠳᠣᠳ ᠢ ᠰᠥᠨᠢ ᠶᠢᠨ ᠭᠡᠷᠡᠯ ᠢᠶᠡᠷ ᠲᠣᠭᠲᠠᠭᠠᠭᠰᠠᠨ ᠳᠠᠯᠠᠢ ᠶᠢ ᠬᠤᠳᠬᠤᠨ ᠳᠠᠪᠠᠯᠭᠠᠨ ᠢ ᠬᠤᠢᠯᠠᠷᠠᠭᠤᠯᠳᠠᠭ ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠭᠡᠭᠳᠡᠳᠡᠭ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠂
36 《ᠡᠳᠡᠭᠡᠷ ᠵᠢᠮᠡ ᠨᠦᠭᠦᠳ ᠮᠢᠨᠦ ᠡᠮᠦᠨᠡ ᠡᠴᠡ ᠠᠯᠠᠭᠠ ᠪᠣᠯᠪᠠᠯ ᠢᠰᠷᠧᠯ ᠤᠨ ᠦᠷᠡ ᠤᠳᠤᠮ ᠮᠢᠨᠦ ᠡᠮᠦᠨᠡ ᠦᠨᠳᠦᠰᠦᠲᠡᠨ ᠪᠠᠢᠬᠤ ᠪᠠᠨ ᠡᠭᠦᠷᠢᠳᠡ ᠪᠣᠯᠢᠨᠠ᠂》 ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃
37 ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠳᠡᠭᠡᠷᠡᠬᠢ ᠲᠩᠷᠢ ᠬᠡᠮᠵᠢᠭᠳᠡᠵᠦ ᠳᠣᠣᠷᠠᠬᠢ ᠭᠠᠵᠠᠷ ᠤᠨ ᠰᠠᠭᠤᠷᠢ ᠨᠤᠭᠤᠳ ᠠᠭᠤᠳᠠᠯᠤᠭᠳᠠᠳᠠᠭ ᠪᠣᠯ᠂ ᠦᠢᠯᠡᠳᠦᠭᠰᠡᠨ ᠪᠦᠭᠦᠳᠡ ᠶᠢᠨ ᠬᠢᠨᠢ ᠤᠯᠠᠮ ᠢᠶᠠᠷ ᠪᠢ ᠴᠤ ᠢᠰᠷᠧᠯ ᠤᠨ ᠪᠦᠬᠦ ᠦᠷᠡ ᠤᠳᠤᠮ ᠢ ᠣᠭᠣᠷᠣᠨᠠ᠂》 ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃
38 《ᠬᠠᠷᠠ᠂ ᠡᠨᠡ ᠬᠣᠲᠠ ᠶᠢ ᠬᠠᠨᠠᠨᠧᠯ ᠤᠨ ᠴᠠᠮᠬᠠᠭ ᠠᠴᠠ ᠪᠤᠯᠤᠩ ᠤᠨ ᠬᠠᠭᠠᠯᠭᠠ ᠬᠦᠷᠲᠡᠯᠡ ᠮᠢᠨᠦ ᠲᠥᠯᠥᠭᠡ ᠳᠠᠬᠢᠨ ᠪᠠᠷᠢᠬᠤ ᠡᠳᠦᠷ ᠤᠳ ᠢᠷᠡᠵᠦ ᠪᠠᠢᠨᠠ᠂》 ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃ 39 ᠬᠡᠮᠵᠢᠭᠦᠷ ᠱᠤᠭᠤᠮ ᠨᠢ ᠲᠡᠨᠳᠡ ᠡᠴᠡ ᠴᠢᠭ ᠢᠶᠠᠷ ᠢᠶᠠᠨ ᠴᠢᠨᠠᠭᠰᠢᠯᠠᠨ ᠭᠠᠷᠧᠳ᠋ ᠲᠣᠯᠣᠭᠠᠳ ᠲᠤ ᠬᠦᠷᠴᠦ᠂ ᠭᠣᠶᠠ ᠤᠷᠤᠭᠤ ᠡᠷᠭᠢᠨᠡ᠃ 40 ᠬᠡᠭᠦᠷ ᠪᠠ ᠦᠨᠡᠰᠦ ᠬᠠᠶᠠᠳᠠᠭ ᠪᠦᠬᠦᠢᠯᠡ ᠬᠥᠨᠳᠡᠢ ᠬᠢᠭᠡᠳ ᠪᠠᠷᠠᠭᠤᠨ ᠲᠠᠯᠠ ᠶᠢᠨ ᠺᠢᠳ᠋ᠷᠣᠨ ᠭᠣᠷᠣᠬᠠ ᠪᠠᠷ ᠳᠠᠮᠵᠢᠨ ᠮᠣᠷᠢᠨ ᠬᠠᠭᠠᠯᠭᠠᠨ ᠤ ᠪᠤᠯᠤᠩ ᠬᠦᠷᠲᠡᠯᠡᠬᠢ ᠪᠦᠬᠦ ᠲᠠᠯᠠᠪᠠᠢ ᠶᠣᠬᠣᠸᠠ ᠳᠤ ᠠᠷᠢᠭᠤᠨ ᠪᠣᠯᠬᠤ ᠪᠥᠭᠡᠳ ᠳᠠᠬᠢᠨ ᠵᠤᠯᠭᠠᠭᠠᠭᠳᠠᠬᠤ ᠦᠭᠡᠢ᠂ ᠰᠦᠢᠳᠬᠡᠭᠳᠡᠬᠦ ᠦᠭᠡᠢ᠃