ᠶᠧᠷᠧᠮᠢᠶᠠ ᠭᠤᠷᠪᠠ
1 《ᠬᠡᠷᠪᠡ ᠡᠷᠡ ᠬᠥᠮᠦᠨ ᠡᠬᠡᠨᠡᠷ ᠡᠴᠡ ᠪᠡᠨ ᠰᠠᠯᠪᠠᠯ ᠡᠬᠡᠨᠡᠷ ᠨᠢ ᠶᠠᠪᠤᠵᠤ ᠥᠭᠡᠷᠡ ᠡᠷᠡ ᠶᠢᠨ ᠬᠢ ᠪᠣᠯᠣᠭᠰᠠᠨ ᠤ ᠳᠠᠷᠠᠭᠠ ᠲᠡᠭᠦᠨ ᠤᠷᠤᠭᠤ ᠪᠤᠴᠠᠵᠤ ᠪᠣᠯᠬᠤ ᠤᠤ︖ ᠬᠡᠷᠪᠡ ᠲᠡᠭᠡᠬᠦ ᠶᠤᠮ ᠪᠣᠯ ᠨᠤᠲᠤᠭ ᠨᠢ ᠪᠦᠷᠢᠮᠦᠰᠦᠨ ᠪᠣᠬᠢᠷᠲᠣᠬᠤ ᠦᠭᠡᠢ ᠭᠡᠵᠢ ᠤᠤ︖ ᠬᠠᠷᠢᠨ ᠴᠢ ᠣᠯᠠᠨ ᠠᠮᠠᠷᠠᠭ ᠲᠠᠢ ᠵᠠᠪᠬᠠᠢᠷᠠᠴᠢᠬᠠᠭᠠᠳ ᠨᠠᠳᠠ ᠤᠷᠤᠭᠤ ᠡᠷᠭᠢᠴᠢᠭᠡᠵᠦ ᠪᠣᠯᠣᠨᠠ ᠤᠤ︖》 ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠄
2 《ᠴᠢ ᠨᠢᠳᠦ ᠪᠡᠨ ᠡᠷᠭᠦᠭᠡᠳ ᠨᠢᠴᠦᠭᠦᠨ ᠲᠣᠯᠣᠭᠠᠳ ᠢ ᠬᠠᠷᠠ ᠳᠠ ᠴᠢ ᠬᠠᠮᠢᠭᠠ ᠨᠢ ᠪᠡᠶᠡ ᠪᠡᠨ ᠪᠤᠵᠠᠷᠯᠠᠭᠠ ᠦᠭᠡᠢ ᠪᠤᠢ︖ ᠴᠥᠯ ᠳᠠᠬᠢ ᠨᠡᠭᠦᠳᠡᠯᠴᠢᠨ ᠰᠢᠭ ᠵᠠᠮ ᠤᠨ ᠬᠠᠵᠠᠭᠤ ᠪᠠᠷ ᠰᠠᠭᠤᠵᠤ ᠠᠮᠠᠷᠠᠭ ᠤᠳ ᠢ ᠬᠦᠯᠢᠶᠡᠨ ᠡᠨᠡ ᠨᠤᠲᠤᠭ ᠢ ᠥᠪᠡᠷ ᠦᠨ ᠢᠶᠠᠨ ᠵᠠᠪᠬᠠᠢᠷᠠᠯ ᠪᠠ ᠪᠤᠵᠠᠷ ᠪᠤᠯᠠᠢ ᠪᠠᠷ ᠪᠤᠵᠠᠷᠲᠤᠭᠤᠯᠤᠭᠰᠠᠨ ᠪᠢᠯᠡ᠃
3 ᠲᠡᠢᠮᠦ ᠡᠴᠡ ᠠᠭᠠᠳᠠᠷ ᠪᠣᠷᠣᠭᠠ ᠰᠠᠭᠠᠲᠠᠵᠤ᠂ ᠬᠠᠪᠤᠷ ᠤᠨ ᠪᠣᠷᠣᠭᠠᠨ ᠴᠤ ᠣᠷᠣᠭᠠ ᠦᠭᠡᠢ ᠴᠢ ᠶᠠᠩ᠋ᠬᠠᠨ ᠤ ᠬᠥᠮᠥᠰᠬᠡ ᠲᠠᠢ ᠪᠥᠭᠡᠳ ᠢᠴᠢᠬᠦ ᠨᠢᠭᠤᠷ ᠦᠭᠡᠢ᠃
4 ᠡᠳᠦᠭᠡ ᠴᠢ ᠨᠠᠳᠠ ᠤᠷᠤᠭᠤ ᠬᠠᠰᠬᠢᠷᠤᠨ᠄ 〈ᠡᠴᠢᠭᠡ ᠮᠢᠨᠢ᠂ ᠲᠠ ᠪᠣᠯ ᠵᠠᠯᠠᠭᠤ ᠦᠶᠡ ᠶᠢᠨ ᠮᠢᠨᠢ ᠰᠤᠷᠭᠠᠭᠴᠢ〉 ᠭᠡᠰᠡᠨ ᠪᠢᠰᠢ ᠤᠤ︖
5 ᠬᠠᠷᠢᠨ ᠴᠢ 〈ᠡᠭᠦᠷᠢᠳᠡ ᠲᠡᠷᠡ ᠠᠭᠤᠷᠯᠠᠬᠤ ᠨᠢ ᠤᠤ︖ ᠡᠴᠦᠰ ᠬᠦᠷᠲᠡᠯᠡ ᠠᠭᠤᠷ ᠲᠠᠢ ᠪᠠᠢᠬᠤ ᠨᠢ ᠤᠤ︖〉 ᠬᠡᠮᠡᠨ ᠶᠠᠷᠢᠭᠰᠠᠭᠠᠷ ᠪᠠᠢᠵᠤ ᠦᠢᠯᠡᠳᠴᠦ ᠴᠢᠳᠠᠬᠤ ᠪᠤᠵᠠᠷ ᠮᠠᠭᠤ ᠪᠦᠬᠦᠨ ᠢ ᠦᠢᠯᠡᠳᠴᠡᠢ》 ᠭᠡᠪᠡ᠃
ᠢᠲᠡᠭᠡᠮᠵᠢ ᠦᠭᠡᠢ ᠢᠰᠷᠧᠯ
6 ᠶᠣᠰᠢᠶᠠ ᠬᠠᠭᠠᠨ ᠤ ᠦᠶᠡ ᠳᠦ ᠶᠣᠬᠣᠸᠠ ᠨᠠᠳᠠ ᠳᠤ ᠠᠢᠯᠠᠳᠪᠠ᠄ 《ᠲᠡᠷᠰ ᠢᠰᠷᠧᠯ ᠤᠨ ᠶᠠᠭᠤ ᠬᠢᠭᠰᠡᠨ ᠢ ᠴᠢ ᠬᠠᠷᠠᠪᠠ ᠤᠤ︖ ᠲᠡᠷᠡ ᠪᠡᠷ ᠥᠨᠳᠥᠷ ᠲᠣᠯᠣᠭᠠᠳ ᠪᠦᠷᠢ ᠳᠡᠭᠡᠷᠡ ᠭᠠᠷᠴᠤ᠂ ᠱᠠᠩᠰᠢ ᠮᠣᠳᠣ ᠪᠦᠷᠢ ᠶᠢᠨ ᠳᠣᠣᠷᠠ ᠣᠴᠢᠵᠤ ᠵᠠᠪᠬᠠᠢᠷᠠᠪᠠ᠃ 7 〈ᠡᠨᠡ ᠪᠦᠬᠦᠨ ᠢ ᠦᠢᠯᠡᠳᠦᠭᠰᠡᠨ ᠦ ᠪᠠᠨ ᠳᠠᠷᠠᠭᠠ ᠲᠡᠷᠡ ᠨᠠᠳᠠ ᠤᠷᠤᠭᠤ ᠪᠤᠴᠠᠵᠤ ᠢᠷᠡᠨᠡ〉 ᠭᠡᠵᠦ ᠪᠢ ᠪᠣᠳᠣᠭᠰᠠᠨ ᠪᠣᠯᠪᠠᠴᠤ ᠲᠡᠷᠡ ᠪᠤᠴᠠᠵᠤ ᠢᠷᠡᠭᠡ ᠦᠭᠡᠢ᠂ ᠲᠡᠭᠦᠨ ᠦ ᠢᠲᠡᠭᠡᠮᠵᠢ ᠦᠭᠡᠢ ᠡᠭᠡᠴᠢ ᠶᠦᠳᠠ ᠡᠭᠦᠨ ᠢ ᠬᠠᠷᠠᠭᠰᠠᠨ ᠶᠤᠮ᠃ 8 ᠲᠡᠷᠰ ᠢᠰᠷᠧᠯ ᠤᠨ ᠪᠦᠬᠦᠢᠯᠡ ᠰᠠᠳᠤᠷ ᠰᠠᠮᠠᠭᠤᠨ ᠠᠴᠠ ᠪᠣᠯᠵᠤ ᠪᠢ ᠰᠠᠯᠤᠯᠲᠠ ᠶᠢᠨ ᠪᠢᠴᠢᠭ ᠥᠭᠴᠦ᠂ ᠲᠡᠭᠦᠨ ᠢ ᠬᠥᠭᠡᠭᠡᠭᠰᠡᠨ ᠪᠣᠯᠪᠠᠴᠤ ᠲᠡᠭᠦᠨ ᠦ ᠢᠲᠡᠭᠡᠮᠵᠢ ᠦᠭᠡᠢ ᠡᠭᠡᠴᠢ ᠶᠦᠳᠠ ᠡᠮᠢᠶᠡᠭᠰᠡᠨ ᠦᠭᠡᠢ᠃ ᠬᠠᠷᠢᠨ ᠲᠡᠷᠡ ᠴᠤ ᠵᠠᠪᠬᠠᠢᠷᠠᠬᠤ ᠪᠠᠷ ᠶᠠᠪᠤᠭᠰᠠᠨ ᠪᠢᠯᠡ᠃ 9 ᠲᠡᠷᠡ ᠰᠠᠳᠤᠷ ᠰᠠᠮᠠᠭᠤᠨ ᠢᠶᠠᠨ ᠬᠥᠩᠭᠡᠨ ᠭᠡᠵᠦ ᠦᠵᠡᠭᠡᠳ ᠭᠠᠵᠠᠷ ᠨᠤᠲᠤᠭ ᠢ ᠪᠤᠵᠠᠷᠯᠠᠵᠤ᠂ ᠴᠢᠯᠠᠭᠤ᠂ ᠮᠣᠳᠣ ᠲᠠᠢ ᠵᠠᠪᠬᠠᠢᠷᠠᠪᠠ᠃ 10 ᠡᠨᠡ ᠪᠦᠭᠦᠳᠡ ᠶᠢᠨ ᠳᠠᠷᠠᠭᠠ ᠴᠤ ᠢᠲᠡᠭᠡᠮᠵᠢ ᠦᠭᠡᠢ ᠡᠭᠡᠴᠢ ᠶᠦᠳᠠ ᠨᠢ ᠨᠠᠳᠠ ᠤᠷᠤᠭᠤ ᠢᠷᠡᠬᠦ ᠳᠦᠷᠢ ᠦᠵᠡᠭᠦᠯᠦᠭᠰᠡᠨ ᠴᠤ᠂ ᠴᠢᠩ ᠰᠡᠳᠬᠢᠯ ᠡᠴᠡ ᠪᠡᠨ ᠢᠷᠡᠭᠰᠡᠨ ᠪᠢᠰᠢ᠃ ᠶᠣᠬᠣᠸᠠ ᠪᠢ ᠠᠢᠯᠠᠳᠴᠤ ᠪᠠᠢᠨᠠ᠃》
11 ᠶᠣᠬᠣᠸᠠ ᠨᠠᠳᠠ ᠳᠤ ᠠᠢᠯᠠᠳᠪᠠ᠄ 《ᠲᠡᠷᠰ ᠢᠰᠷᠧᠯ ᠢᠲᠡᠭᠡᠮᠵᠢ ᠦᠭᠡᠢ ᠶᠦᠳᠠ ᠠᠴᠠ ᠢᠯᠡᠭᠦᠦ ᠵᠥᠪ ᠰᠢᠳᠤᠷᠭᠤ ᠭᠡᠳᠡᠭ ᠢᠶᠡᠨ ᠬᠠᠷᠠᠭᠤᠯᠪᠠ᠃ 12 ᠴᠢ ᠤᠮᠠᠷᠠ ᠵᠦᠭ ᠶᠠᠪᠤᠵᠤ ᠡᠳᠡᠭᠡᠷ ᠦᠭᠡ ᠶᠢ ᠲᠤᠩ᠋ᠬᠠᠭᠯᠠ᠄ 〈ᠲᠡᠷᠰ ᠢᠰᠷᠧᠯ ᠡ᠂ ᠪᠤᠴᠠᠵᠤ ᠢᠷᠡᠭᠲᠦᠨ〉 ᠶᠣᠬᠣᠸᠠ ᠪᠢ ᠠᠢᠯᠠᠳᠴᠤ ᠪᠠᠢᠨᠠ᠂ ᠥᠪᠡᠷ ᠳᠡᠭᠡᠷᠡ ᠴᠢᠨᠢ ᠪᠢ ᠬᠢᠯᠢᠩ ᠢᠶᠠᠨ ᠪᠠᠭᠤᠯᠭᠠᠬᠤ ᠦᠭᠡᠢ᠃ ᠤᠴᠢᠷ ᠨᠢ ᠪᠢ ᠡᠨᠡᠷᠢᠩᠭᠦᠢ ᠪᠢᠯᠡ ᠶᠣᠬᠣᠸᠠ ᠪᠢ ᠠᠢᠯᠠᠳᠴᠤ ᠪᠠᠢᠨᠠ᠃ ᠠᠭᠤᠷ ᠬᠢᠯᠢᠩ ᠢᠶᠠᠨ ᠪᠢ ᠡᠭᠦᠷᠢᠳᠡ ᠬᠠᠳᠠᠭᠠᠯᠠᠬᠤ ᠪᠢᠰᠢ᠂
13 ᠣᠳᠣ ᠴᠢ ᠭᠠᠭᠴᠠ ᠬᠦ ᠭᠡᠮ ᠪᠤᠷᠤᠭᠤ ᠪᠠᠨ ᠮᠡᠳᠡ ᠱᠠᠩᠰᠢ ᠮᠣᠳᠣ ᠪᠦᠷᠢ ᠶᠢᠨ ᠳᠣᠣᠷᠠ ᠴᠢ ᠬᠠᠷᠢ ᠶᠢᠨ ᠪᠤᠷᠬᠠᠳ ᠲᠠᠢ ᠵᠠᠪᠬᠠᠢᠷᠠᠭᠰᠠᠨ ᠥᠪᠡᠷ ᠦᠨ ᠢᠶᠠᠨ ᠪᠤᠷᠬᠠᠨ ᠶᠣᠬᠣᠸᠠ ᠶᠢᠨ ᠦᠭᠡ ᠶᠢ ᠰᠣᠨᠣᠰᠣᠯ ᠦᠭᠡᠢ ᠤᠷᠪᠠᠭᠰᠠᠨ᠂ ᠶᠣᠬᠣᠸᠠ ᠪᠢ ᠠᠢᠯᠠᠳᠴᠤ ᠪᠠᠢᠨᠠ᠃
14 ᠲᠡᠷᠰ ᠬᠡᠦᠬᠡᠳ ᠤᠳ ᠡ᠂ ᠪᠤᠴᠠᠵᠤ ᠢᠷᠡᠭᠲᠦᠨ᠂ ᠶᠣᠬᠣᠸᠠ ᠪᠢ ᠠᠢᠯᠠᠳᠴᠤ ᠪᠠᠢᠨᠠ᠃ ᠲᠠ ᠨᠠᠷ ᠤᠨ ᠡᠵᠡᠨ ᠪᠣᠯ ᠪᠢ ᠶᠤᠮ᠃ ᠪᠢ ᠬᠣᠲᠠ ᠪᠦᠷᠢ ᠡᠴᠡ ᠨᠢᠭᠡ ᠶᠢ᠂ ᠠᠢᠮᠠᠭ ᠪᠦᠷᠢ ᠡᠴᠡ ᠬᠣᠶᠠᠷ ᠢ ᠰᠢᠯᠢᠨ ᠠᠪᠴᠤ᠂ ᠲᠠ ᠨᠠᠷ ᠢ ᠽᠢᠶᠣᠨ ᠠᠭᠤᠯᠠᠨ ᠳᠤ ᠠᠪᠴᠢᠷᠠᠬᠤ ᠪᠥᠭᠡᠳ 15 ᠰᠡᠳᠬᠢᠯ ᠳᠤ ᠮᠢᠨᠢ ᠨᠡᠢᠴᠡᠭᠰᠡᠨ ᠬᠣᠨᠢᠴᠢᠳ ᠢ ᠲᠠ ᠨᠠᠷ ᠲᠤ ᠥᠭᠭᠥᠨᠡ᠃ ᠲᠡᠳᠡ ᠡᠷᠳᠡᠮ ᠮᠡᠳᠡᠯᠭᠡ᠂ ᠰᠠᠷᠠᠭᠤᠯ ᠤᠬᠠᠭᠠᠨ ᠢᠶᠠᠷ ᠲᠠ ᠨᠠᠷ ᠢ ᠲᠡᠵᠢᠭᠡᠨᠡ᠃ 16 ᠶᠣᠬᠣᠸᠠ ᠪᠢ ᠠᠢᠯᠠᠳᠴᠤ ᠪᠠᠢᠨᠠ᠃ ᠲᠡᠷᠡ ᠡᠳᠦᠷ ᠤᠳ ᠲᠤ ᠲᠠ ᠨᠠᠷ ᠡᠨᠡ ᠭᠠᠵᠠᠷ ᠲᠤ ᠦᠷᠡᠵᠢᠵᠦ ᠣᠯᠠᠰᠢᠷᠠᠨᠠ᠃ ᠬᠥᠮᠦᠰ ᠶᠣᠬᠣᠸᠠ ᠶᠢᠨ ᠭᠡᠷᠡ ᠶᠢᠨ ᠠᠪᠳᠠᠷᠠ ᠶᠢᠨ ᠲᠤᠬᠠᠢ ᠶᠠᠷᠢᠬᠤ ᠪᠠᠨ ᠪᠣᠯᠢᠬᠤ ᠪᠥᠭᠡᠳ ᠰᠠᠨᠠᠭᠠᠨ ᠳᠤ ᠣᠷᠣᠬᠤ ᠦᠭᠡᠢ᠂ ᠪᠣᠳᠣᠬᠤ ᠦᠭᠡᠢ᠂ ᠦᠭᠡᠶᠢᠯᠡᠬᠦ ᠦᠭᠡᠢ᠂ ᠳᠠᠬᠢᠨ ᠬᠢᠬᠦ ᠴᠤ ᠦᠭᠡᠢ᠃ 17 ᠲᠡᠷᠡ ᠦᠶᠡ ᠳᠦ ᠬᠥᠮᠦᠰ ᠶᠧᠷᠦ᠋ᠰᠠᠯᠧᠮ ᠢ 〈ᠶᠣᠬᠣᠸᠠ ᠶᠢᠨ ᠰᠡᠨᠲᠢ〉 ᠭᠡᠵᠦ ᠳᠠᠭᠤᠳᠠᠨ᠂ ᠶᠣᠬᠣᠸᠠ ᠶᠢᠨ ᠨᠡᠷᠡ ᠶᠢᠨ ᠤᠯᠠᠮ ᠢᠶᠠᠷ ᠪᠦᠬᠦ ᠦᠨᠳᠦᠰᠦᠲᠡᠨ ᠶᠧᠷᠦ᠋ᠰᠠᠯᠧᠮ ᠤᠷᠤᠭᠤ ᠴᠤᠭᠯᠠᠷᠠᠬᠤ ᠪᠥᠭᠡᠳ ᠲᠡᠳᠡ ᠵᠥᠷᠢᠭᠦᠳ ᠮᠠᠭᠤ ᠰᠠᠨᠠᠭᠠ ᠪᠠᠨ ᠳᠠᠭᠠᠵᠤ ᠠᠮᠢᠳᠤᠷᠠᠬᠤ ᠪᠠᠨ ᠪᠣᠯᠢᠨᠠ᠃ 18 ᠲᠡᠷᠡ ᠡᠳᠦᠷ ᠤᠳ ᠲᠤ ᠶᠦᠳᠠ ᠶᠢᠨ ᠭᠡᠷ ᠢᠰᠷᠧᠯ ᠤᠨ ᠭᠡᠷ ᠲᠡᠢ ᠨᠢᠭᠡᠳᠴᠦ᠂ ᠬᠠᠮᠲᠤ ᠳᠠᠭᠠᠨ ᠤᠮᠠᠷᠠ ᠵᠦᠭ ᠦᠨ ᠨᠤᠲᠤᠭ ᠠᠴᠠ ᠭᠠᠷᠴᠤ᠂ ᠮᠢᠨᠦ ᠲᠠ ᠨᠠᠷ ᠤᠨ ᠡᠴᠢᠭᠡ ᠡᠪᠦᠭᠡᠳ ᠲᠦ ᠥᠪᠯᠡᠭᠦᠯᠦᠭᠰᠡᠨ ᠨᠤᠲᠤᠭ ᠲᠤ ᠢᠷᠡᠬᠦ ᠪᠣᠯᠣᠨᠠ᠃
19 ᠪᠢ᠄ 〈ᠴᠢᠮᠠᠶᠢ ᠪᠢ ᠥᠪᠡᠷ ᠦᠨ ᠢᠶᠠᠨ ᠬᠡᠦᠬᠡᠳ ᠤᠳ ᠤᠨ ᠳᠤᠮᠳᠠ ᠪᠠᠢᠯᠭᠠᠶᠠ ᠲᠠᠭᠠᠯᠠᠮᠵᠢᠲᠤ ᠰᠠᠢᠬᠠᠨ ᠨᠤᠲᠤᠭ ᠢ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠳᠤᠮᠳᠠ ᠦᠵᠡᠰᠬᠦᠯᠡᠩ ᠲᠡᠢ ᠨᠤᠲᠤᠭ ᠢ ᠥᠪ ᠪᠣᠯᠭᠠᠨ ᠥᠭᠭᠥᠶᠡ ᠭᠡᠰᠡᠨ ᠲᠡᠭᠡᠭᠰᠡᠨ ᠢᠶᠡᠷ ᠲᠠ ᠨᠠᠷ ᠨᠠᠮᠠᠶᠢ ᠡᠴᠢᠭᠡ ᠭᠡᠵᠦ ᠳᠠᠭᠤᠳᠠᠨ ᠡᠷᠭᠢᠵᠦ ᠬᠡᠵᠢᠶᠡ ᠴᠤ ᠪᠤᠴᠠᠬᠤ ᠦᠭᠡᠢ〉 ᠭᠡᠵᠦ ᠪᠣᠳᠣᠵᠤ ᠪᠠᠢᠭᠰᠠᠨ ᠪᠢᠯᠡ᠂
20 ᠬᠠᠨᠢ ᠪᠠᠨ ᠣᠷᠬᠢᠵᠤ ᠢᠲᠡᠭᠡᠯ ᠡᠪᠳᠡᠳᠡᠭ ᠡᠮᠡᠭᠲᠡᠢ ᠠᠳᠠᠯᠢ ᠬᠠᠷᠢᠨ ᠴᠢ ᠲᠡᠢᠨ ᠬᠦ ᠨᠠᠳᠠ ᠳᠤ ᠢᠲᠡᠭᠡᠯ ᠡᠪᠳᠡᠭᠰᠡᠨ ᠪᠢᠯᠡ᠂ ᠢᠰᠷᠧᠯ ᠤᠨ ᠭᠡᠷ ᠡ᠂ ᠶᠣᠬᠣᠸᠠ ᠪᠢ ᠠᠢᠯᠠᠳᠴᠤ ᠪᠠᠢᠨᠠ᠃》
21 ᠵᠠᠮ ᠠᠴᠠ ᠪᠠᠨ ᠭᠠᠵᠢᠵᠤ᠂ ᠶᠣᠬᠣᠸᠠ ᠪᠤᠷᠬᠠᠨ ᠢᠶᠠᠨ ᠮᠠᠷᠲᠠᠭᠰᠠᠨ ᠤ ᠤᠯᠠᠮ ᠢᠶᠠᠷ ᠵᠡᠯᠢᠭᠦᠳ ᠲᠣᠯᠣᠭᠠᠳ ᠠᠴᠠ ᠢᠰᠷᠧᠯᠴᠦᠳ ᠦᠨ ᠤᠬᠢᠯᠠᠨ ᠭᠤᠶᠤᠬᠤ ᠳᠠᠭᠤ ᠰᠣᠨᠣᠰᠳᠠᠵᠤ ᠪᠠᠢᠨᠠ᠃
22 《ᠲᠡᠷᠰ ᠬᠡᠦᠬᠡᠳ ᠤᠳ ᠡ᠂ ᠪᠤᠴᠠᠵᠤ ᠢᠷᠡᠭᠲᠦᠨ ᠲᠡᠷᠰ ᠵᠠᠩ ᠢ ᠴᠢᠨᠢ ᠪᠢ ᠵᠠᠰᠠᠶᠠ》 ᠭᠡᠵᠦ ᠪᠠᠢᠨᠠ᠂ ᠬᠠᠷᠠ᠂ ᠪᠢᠳᠡ ᠲᠠᠨ ᠤᠷᠤᠭᠤ ᠣᠴᠢᠶᠡ᠂ ᠪᠢᠳᠡᠨ ᠦ ᠪᠤᠷᠬᠠᠨ ᠪᠣᠯ ᠶᠣᠬᠣᠸᠠ ᠲᠠ ᠪᠢᠯᠡ︕
23 ᠦᠨᠡᠨ ᠳᠡᠭᠡᠨ ᠠᠭᠤᠯᠠ ᠳᠠᠪᠠᠭᠠᠨ ᠳᠡᠭᠡᠷᠡᠬᠢ ᠦᠢᠮᠡᠭᠡᠨ ᠰᠠᠮᠠᠭᠤᠨ ᠤᠳᠬᠠ ᠦᠭᠡᠢ ᠦᠨᠡᠨ ᠳᠡᠭᠡᠨ ᠢᠰᠷᠧᠯ ᠤᠨ ᠠᠪᠤᠷᠠᠯ ᠪᠢᠳᠡᠨ ᠦ ᠪᠤᠷᠬᠠᠨ ᠶᠣᠬᠣᠸᠠ ᠳᠤ ᠪᠤᠢ᠃
24 ᠬᠠᠷᠢᠨ ᠢᠴᠢᠭᠦᠷᠢᠲᠡᠢ ᠪᠤᠷᠬᠠᠳ ᠪᠠᠭᠠ ᠵᠠᠯᠠᠭᠤ ᠦᠶᠡ ᠡᠴᠡ ᠮᠢᠨᠢ ᠡᠴᠢᠭᠡ ᠡᠪᠦᠭᠡᠳ ᠦᠨ ᠮᠠᠨᠢ ᠬᠥᠳᠡᠯᠮᠦᠷᠢ ᠪᠠᠷ ᠢᠶᠠᠨ ᠣᠯᠣᠭᠰᠠᠨ ᠮᠠᠯ ᠰᠦᠷᠦᠭ ᠢ ᠨᠢ ᠬᠥᠪᠡᠭᠦᠳ ᠥᠬᠢᠳ ᠲᠠᠢ ᠨᠢ ᠬᠠᠮᠲᠤ ᠵᠠᠯᠭᠢᠭᠰᠠᠨ ᠪᠣᠯᠬᠣᠷ 25 ᠪᠢᠳᠡ ᠢᠴᠢᠭᠦᠷᠢ ᠳᠣᠲᠣᠷᠠ ᠬᠡᠪᠲᠡᠵᠦ ᠪᠠᠢᠨᠠ᠂ ᠰᠢᠪᠰᠢᠭ ᠪᠢᠳᠡᠨ ᠢ ᠪᠦᠷᠬᠦᠵᠦ ᠪᠠᠢᠨᠠ᠃ ᠪᠢᠳᠡ ᠴᠤ᠂ ᠪᠢᠳᠡᠨ ᠦ ᠡᠴᠢᠭᠡ ᠡᠪᠦᠭᠡᠳ ᠴᠤ ᠶᠣᠬᠣᠸᠠ ᠪᠤᠷᠬᠠᠨ ᠳᠠᠭᠠᠨ ᠨᠢᠭᠦᠯ ᠦᠢᠯᠡᠳᠦᠭᠰᠡᠨ᠂ ᠪᠠᠭᠠ ᠨᠠᠰᠤᠨ ᠠᠴᠠ ᠪᠠᠨ ᠥᠨᠥᠳᠥᠷ ᠬᠦᠷᠲᠡᠯᠡ ᠪᠢᠳᠡ ᠶᠣᠬᠣᠸᠠ ᠪᠤᠷᠬᠠᠨ ᠤ ᠪᠠᠨ ᠳᠠᠭᠤ ᠶᠢ ᠳᠠᠭᠠᠭᠰᠠᠨ ᠦᠭᠡᠢ ᠪᠢᠯᠡ᠃