ᠶᠧᠷᠧᠮᠢᠶᠠ ᠳᠥᠴᠢᠨ ᠳᠣᠯᠣᠭᠠ
ᠹᠢᠯᠢᠰᠲ᠋ᠴᠦᠳ ᠦᠨ ᠲᠠᠯᠠ ᠪᠠᠷ ᠬᠢ ᠡᠰᠢ ᠦᠵᠡᠭᠦᠯᠦᠯᠭᠡ
1 ᠹᠠᠷᠠᠣ᠋ ᠭᠠᠽᠠ ᠶᠢ ᠳᠣᠪᠲᠣᠯᠬᠤ ᠠᠴᠠ ᠡᠮᠦᠨᠡ ᠹᠢᠯᠢᠰᠲ᠋ᠴᠦᠳ ᠦᠨ ᠲᠠᠯᠠ ᠪᠠᠷ ᠶᠣᠬᠣᠸᠠ ᠠᠴᠠ ᠡᠰᠢ ᠦᠵᠡᠭᠦᠯᠦᠭᠴᠢ ᠶᠧᠷᠧᠮᠢᠶᠠ ᠳᠤ ᠢᠷᠡᠭᠰᠡᠨ ᠦᠭᠡ᠄
2 ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠬᠠᠷᠠ᠂ ᠬᠣᠢᠲᠤ ᠵᠦᠭ ᠡᠴᠡ ᠤᠰᠤ ᠨᠡᠮᠡᠭᠳᠡᠭᠰᠡᠭᠡᠷ ᠦᠶᠡᠷᠯᠡᠭᠡᠳ ᠭᠠᠵᠠᠷ ᠨᠤᠲᠤᠭ᠂ ᠲᠡᠭᠦᠨ ᠦ ᠳᠡᠭᠡᠷᠡᠬᠢ ᠪᠦᠬᠦᠨ ᠬᠣᠲᠠ ᠪᠣᠯᠣᠨ ᠲᠡᠭᠦᠨ ᠦ ᠪᠦᠬᠦ ᠰᠠᠭᠤᠭᠠᠯᠢᠴᠢᠳ ᠢ ᠨᠥᠮᠥᠷᠬᠦ ᠳᠦ ᠬᠥᠮᠦᠰ ᠬᠠᠰᠬᠢᠷᠴᠤ᠂ ᠨᠤᠲᠤᠭ ᠤᠨ ᠰᠠᠭᠤᠭᠠᠯᠢᠴᠢᠳ ᠪᠦᠭᠦᠳᠡ ᠤᠬᠢᠯᠠᠬᠤ ᠪᠣᠯᠣᠨᠠ᠃
3 ᠠᠵᠢᠷᠭᠠ ᠨᠤᠭᠤᠳ ᠤᠨ ᠳᠠᠪᠬᠢᠬᠤ ᠲᠤᠭᠤᠷᠠᠢ ᠶᠢᠨ ᠴᠢᠮᠡᠭᠡ ᠳᠠᠢᠰᠤᠨ ᠤ ᠲᠡᠷᠭᠡ ᠨᠦᠭᠦᠳ ᠦᠨ ᠱᠤᠤᠭᠢᠶᠠᠨ᠂ ᠬᠦᠷᠳᠦ ᠨᠦᠭᠦᠳ ᠦᠨ ᠬᠢᠨᠢ ᠲᠦᠷᠴᠢᠭᠢᠨᠡᠬᠦ ᠴᠢᠮᠡᠭᠡᠨ ᠡᠴᠡ ᠪᠣᠯᠵᠤ ᠡᠴᠢᠭᠡ ᠨᠢ ᠵᠣᠷᠢᠭ ᠠᠯᠳᠠᠭᠰᠠᠨ ᠢᠶᠠᠷ ᠬᠡᠦᠬᠡᠳ ᠤᠳ ᠤᠷᠤᠭᠤ ᠪᠠᠨ ᠡᠷᠭᠢᠬᠦ ᠴᠤ ᠦᠭᠡᠢ ᠵᠢᠭᠤᠲᠠᠨᠠ᠃
4 ᠪᠦᠬᠦ ᠹᠢᠯᠢᠰᠲ᠋ᠴᠦᠳ ᠢ ᠤᠰᠠᠳᠬᠠᠵᠤ ᠲᠢᠷ ᠪᠠ ᠰᠢᠢᠳᠣᠨ ᠳᠤ ᠲᠤᠰᠠᠯᠠᠬᠤ ᠠᠯᠢᠪᠠ ᠠᠮᠢᠳᠤ ᠦᠯᠡᠳᠡᠭᠰᠡᠳ ᠢ ᠨᠢ ᠴᠤ ᠲᠠᠰᠤᠯᠬᠤ ᠡᠳᠦᠷ ᠢᠷᠡᠯᠡ᠂ ᠶᠣᠬᠣᠸᠠ ᠺᠠᠹᠲ᠋ᠣᠷ ᠤᠨ ᠡᠷᠭᠢ ᠡᠴᠡ ᠢᠷᠡᠭᠰᠡᠨ ᠹᠢᠯᠢᠰᠲ᠋ᠴᠦᠳ ᠦᠨ ᠦᠯᠡᠳᠡᠭᠰᠡᠳ ᠢ ᠤᠰᠠᠳᠬᠠᠬᠤ ᠭᠡᠵᠦ ᠪᠠᠢᠨᠠ᠃
5 ᠭᠠᠽᠠ ᠭᠠᠰᠢᠭᠤᠳᠠᠨ ᠦᠰᠦ ᠪᠡᠨ ᠬᠤᠰᠤᠯᠠ ᠠᠱᠺᠧᠯᠣᠨ ᠴᠢᠮᠡᠭᠡ ᠦᠭᠡᠢ ᠪᠣᠯᠣᠯᠠ ᠬᠡᠭᠡᠷᠡ ᠲᠠᠯᠠ ᠶᠢᠨ ᠦᠯᠡᠳᠡᠭᠰᠡᠳ ᠡ᠂ ᠬᠡᠵᠢᠶᠡ ᠬᠦᠷᠲᠡᠯᠡ ᠭᠠᠰᠢᠭᠤᠳᠠᠨ ᠪᠡᠶᠡ ᠪᠡᠨ ᠵᠦᠰᠦᠭᠰᠡᠭᠡᠷ ᠪᠠᠢᠬᠤ ᠪᠤᠢ︖
6 ᠥ᠂ ᠶᠣᠬᠣᠸᠠ ᠶᠢᠨ ᠰᠡᠯᠡᠮᠡ ᠡ᠂ ᠬᠡᠵᠢᠶᠡ ᠴᠢ ᠲᠠᠢᠪᠤᠰᠢᠷᠠᠬᠤ ᠪᠤᠢ︖ ᠬᠤᠢ ᠳᠠᠭᠠᠨ ᠡᠷᠭᠢᠨ ᠣᠷᠣᠭᠠᠳ ᠠᠮᠠᠷᠠ ᠨᠠᠮ ᠵᠢᠮ ᠪᠠᠢ᠃
7 ᠬᠠᠷᠢᠨ ᠶᠣᠬᠣᠸᠠ ᠵᠠᠷᠯᠢᠭ ᠪᠠᠭᠤᠯᠭᠠᠭᠰᠠᠨ ᠪᠠᠢᠬᠤ ᠳᠤ᠂ ᠰᠡᠯᠡᠮᠡ ᠨᠢ ᠶᠠᠭᠠᠬᠢᠵᠤ ᠲᠠᠢᠪᠤᠰᠢᠷᠠᠵᠤ ᠴᠢᠳᠠᠬᠤ ᠪᠤᠢ︖ ᠠᠱᠺᠧᠯᠣᠨ ᠪᠣᠯᠣᠨ ᠳᠠᠯᠠᠢ ᠶᠢᠨ ᠡᠷᠭᠢ ᠶᠢ ᠴᠣᠬᠢ ᠭᠡᠵᠦ ᠶᠣᠬᠣᠸᠠ ᠵᠠᠬᠢᠭᠰᠠᠨ ᠪᠢᠯᠡ᠃》