ᠶᠧᠷᠧᠮᠢᠶ᠎ᠠ ᠬᠣᠷᠢᠨ ᠭᠤᠷᠪᠠ
 ᠰᠢᠳᠤᠷᠭᠤ ᠬᠠᠭᠠᠨ ᠤ ᠬᠠᠭᠠᠨᠴᠢᠯᠠᠯ

1 ᠶᠣᠬᠣᠸᠠ ᠪᠢ ᠠᠢᠯᠠᠳᠴᠤ ᠪᠠᠢᠨ᠎ᠠ᠄ 《ᠮᠢᠨᠦ ᠪᠡᠯᠴᠢᠭᠡᠷ ᠦᠨ ᠬᠣᠨᠢᠳ ᠢ ᠲᠠᠷᠬᠠᠭᠠᠵᠤ ᠰᠦᠢᠳᠬᠡᠬᠦ ᠬᠣᠨᠢᠴᠢᠳ ᠭᠠᠰᠠᠯᠠᠩᠲᠠᠶ᠎ᠠ︕》 2 ᠡᠢᠮᠦ ᠡᠴᠡ ᠢᠰᠷᠧᠯ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠪᠢ ᠮᠢᠨᠦ ᠠᠷᠠᠳ ᠲᠦᠮᠡᠨ ᠢ ᠬᠠᠷᠢᠭᠤᠯᠵᠤ ᠪᠠᠢᠭ᠎ᠠ ᠬᠣᠨᠢᠴᠢᠳ ᠤᠨ ᠲᠤᠬᠠᠢ ᠠᠢᠯᠠᠳᠴᠤ ᠪᠠᠢᠨ᠎ᠠ᠄ 《ᠲᠠ ᠨᠠᠷ ᠮᠢᠨᠦ ᠬᠣᠨᠢᠨ ᠰᠦᠷᠦᠭ ᠲᠦ ᠠᠩ᠋ᠬᠠᠷᠤᠯ ᠲᠠᠯᠪᠢᠯ ᠦᠭᠡᠢ ᠲᠠᠷᠬᠠᠭᠠᠵᠤ ᠬᠥᠭᠡᠭᠡᠭᠰᠡᠨ ᠪᠠᠢᠨ᠎ᠠ᠃ ᠬᠠᠷᠠ᠂ ᠬᠢᠭᠰᠡᠨ ᠪᠤᠵᠠᠷ ᠮᠠᠭᠤ ᠶᠢᠨ ᠴᠢᠨᠢ ᠤᠴᠢᠷ ᠢᠶᠠᠷ ᠪᠢ ᠲᠠ ᠨᠠᠷ ᠲᠤ ᠠᠩ᠋ᠬᠠᠷᠤᠯ ᠲᠠᠯᠪᠢᠵᠤ ᠪᠠᠢᠨ᠎ᠠ᠂ ᠶᠣᠬᠣᠸᠠ ᠪᠢ ᠠᠢᠯᠠᠳᠴᠤ ᠪᠠᠢᠨ᠎ᠠ᠃ 3 ᠬᠠᠷᠢᠨ ᠪᠢ ᠦᠯᠡᠳᠡᠭᠰᠡᠨ ᠰᠦᠷᠦᠭ ᠢᠶᠡᠨ ᠬᠥᠭᠡᠭᠡᠨ ᠣᠴᠢᠭᠤᠯᠤᠭᠰᠠᠨ ᠨᠤᠲᠤᠭ ᠠᠴᠠ ᠪᠠᠨ ᠴᠤᠭᠯᠠᠭᠤᠯᠵᠤ᠂ ᠪᠡᠯᠴᠢᠭᠡᠷ ᠲᠤᠨᠢ ᠪᠤᠴᠠᠭᠠᠨ᠎ᠠ᠃ ᠲᠡᠳᠡ ᠲᠡᠨᠳᠡ ᠦᠷᠡᠵᠢᠨ ᠣᠯᠠᠰᠢᠷᠠᠬᠤ ᠪᠣᠯᠣᠨ᠎ᠠ᠃ 4 ᠪᠢ ᠪᠠᠰᠠ ᠲᠡᠳᠡᠨ ᠦ ᠳᠡᠭᠡᠷ᠎ᠡ ᠲᠡᠳᠡᠨ ᠢ ᠬᠠᠷᠢᠭᠤᠯᠬᠤ ᠬᠣᠨᠢᠴᠢᠳ ᠢ ᠲᠠᠯᠪᠢᠬᠤ ᠲᠤᠯᠠ ᠲᠡᠳᠡ ᠳᠠᠬᠢᠭᠠᠳ ᠠᠶᠤᠵᠤ ᠲᠦᠭᠰᠢᠬᠦ ᠦᠭᠡᠢ᠂ ᠪᠠᠰᠠ ᠠᠯᠳᠠᠭᠳᠠᠬᠤ ᠦᠭᠡᠢ᠂ ᠶᠣᠬᠣᠸᠠ ᠪᠢ ᠠᠢᠯᠠᠳᠴᠤ ᠪᠠᠢᠨ᠎ᠠ᠃》
5 ᠶᠣᠬᠣᠸᠠ ᠪᠢ ᠠᠢᠯᠠᠳᠴᠤ ᠪᠠᠢᠨ᠎ᠠ᠃ 《ᠪᠢ ᠳ᠋ᠠᠸᠢᠳ᠋ ᠤᠨ ᠵᠥᠪ ᠰᠢᠳᠤᠷᠭᠤ ᠨᠠᠬᠢᠶ᠎ᠠ ᠶᠢ ᠪᠣᠰᠬᠠᠨ᠎ᠠ᠃ ᠠᠩ᠋ᠬᠠᠷᠤᠭᠲᠤᠨ ᠲᠡᠷᠡ ᠡᠳᠦᠷ ᠤᠳ ᠢᠷᠡᠵᠦ ᠪᠠᠢᠨ᠎ᠠ︕》 《ᠨᠢᠭᠡ ᠬᠠᠭᠠᠨ ᠬᠠᠭᠠᠨᠴᠢᠯᠠᠵᠤ ᠲᠡᠷᠡ ᠪᠡᠷ ᠮᠠᠨᠳᠤᠨ ᠪᠠᠳᠠᠷᠠᠵᠤ ᠭᠠᠵᠠᠷ ᠳᠡᠭᠡᠷ᠎ᠡ ᠵᠥᠪ ᠰᠢᠳᠤᠷᠭᠤ ᠶᠢ ᠪᠡᠶᠡᠯᠡᠭᠦᠯᠦᠨ᠎ᠡ
6 ᠲᠡᠭᠦᠨ ᠦ ᠡᠳᠦᠷ ᠤᠳ ᠲᠤ ᠶᠦᠳᠠ ᠠᠪᠤᠷᠠᠭᠳᠠᠵᠤ ᠢᠰᠷᠧᠯ ᠠᠶᠤᠯ ᠦᠭᠡᠢ ᠠᠮᠢᠳᠤᠷᠠᠨ᠎ᠠ ᠲᠡᠷᠡ ᠪᠡᠷ 〈ᠶᠣᠬᠣᠸᠠ ᠪᠢᠳᠡᠨ ᠢ ᠵᠥᠪᠲᠥᠭᠡᠭᠴᠢ〉 ᠭᠡᠵᠦ ᠨᠡᠷᠡᠯᠡᠭᠳᠡᠨ᠎ᠡ᠃》

7 ᠶᠣᠬᠣᠸᠠ ᠪᠢ ᠠᠢᠯᠠᠳᠴᠤ ᠪᠠᠢᠨ᠎ᠠ᠄ 《ᠠᠩ᠋ᠬᠠᠷᠤᠭᠲᠤᠨ᠂ ᠬᠥᠮᠦᠰ᠄ 〈ᠢᠰᠷᠧᠯᠴᠦᠳ ᠢ ᠶᠧᠵᠢᠫᠲ ᠤᠨ ᠨᠤᠲᠤᠭ ᠠᠴᠠ ᠭᠠᠷᠭᠠᠭᠰᠠᠨ ᠶᠣᠬᠣᠸᠠ ᠶᠢᠨ ᠠᠮᠢᠳᠤ ᠯᠤᠭ᠎ᠠ ᠨᠢᠭᠡᠨ ᠠᠳᠠᠯᠢ ᠪᠠᠲᠤ ᠦᠨᠡᠨ ᠭᠡᠪᠡᠯ〉 ᠭᠡᠵᠦ ᠬᠡᠯᠡᠬᠦ ᠪᠡᠨ ᠪᠣᠯᠢᠵᠤ᠂ 8 〈ᠢᠰᠷᠧᠯ ᠤᠨ ᠭᠡᠷ ᠦᠨ ᠬᠢᠨ ᠤ ᠦᠷ᠎ᠡ ᠤᠳᠤᠮ ᠢ ᠬᠣᠢᠲᠤ ᠵᠦᠭ ᠦᠨ ᠨᠤᠲᠤᠭ ᠠᠴᠠ᠂ ᠲᠡᠳᠡᠨ ᠢ ᠬᠥᠭᠡᠭᠡᠨ ᠣᠴᠢᠭᠤᠯᠤᠭᠰᠠᠨ ᠪᠦᠬᠦ ᠣᠷᠣᠨ ᠠᠴᠠ ᠠᠪᠴᠢᠷᠠᠭᠰᠠᠨ ᠶᠣᠬᠣᠸᠠ ᠶᠢᠨ ᠠᠮᠢᠳᠤ ᠯᠤᠭ᠎ᠠ ᠨᠢᠭᠡᠨ ᠠᠳᠠᠯᠢ ᠪᠠᠲᠤ ᠦᠨᠡᠨ ᠭᠡᠪᠡᠯ〉 ᠭᠡᠵᠦ ᠬᠡᠯᠡᠬᠦ ᠡᠳᠦᠷ ᠤᠳ ᠢᠷᠡᠵᠦ ᠪᠠᠢᠨ᠎ᠠ᠃ ᠲᠡᠭᠡᠬᠦ ᠳᠦ ᠲᠡᠳᠡ ᠥᠪᠡᠷ ᠥᠪᠡᠷᠰᠡᠳ ᠦᠨ ᠢᠶᠠᠨ ᠨᠤᠲᠤᠭ ᠲᠤ ᠠᠮᠢᠳᠤᠷᠠᠨ᠎ᠠ᠃》
 ᠬᠠᠭᠤᠷᠮᠠᠭ ᠡᠰᠢ ᠦᠵᠡᠭᠦᠯᠦᠭᠴᠢᠳ
9 ᠡᠰᠢ ᠦᠵᠡᠭᠦᠯᠦᠭᠴᠢᠳ ᠤᠨ ᠤᠯᠠᠮ ᠢᠶᠠᠷ ᠵᠣᠷᠢᠭ ᠵᠢᠷᠦᠬᠡ ᠮᠢᠨᠢ ᠮᠣᠬᠣᠵᠤ ᠬᠠᠮᠤᠭ ᠶᠠᠰᠤ ᠮᠢᠨᠢ ᠰᠠᠯᠭᠠᠨᠠᠵᠤ ᠪᠠᠢᠨ᠎ᠠ᠂ ᠶᠣᠬᠣᠸᠠ ᠪᠣᠯᠣᠨ ᠲᠡᠭᠦᠨ ᠦ ᠠᠷᠢᠭᠤᠨ ᠦᠭᠡᠰ ᠡᠴᠡ ᠪᠣᠯᠵᠤ ᠪᠢ ᠰᠣᠭᠲᠣᠭᠤ ᠬᠥᠮᠦᠨ ᠮᠡᠲᠦ᠂ ᠳᠠᠷᠠᠰᠤᠨ ᠳᠤ ᠠᠪᠲᠠᠭᠰᠠᠨ ᠬᠥᠮᠦᠨ ᠮᠡᠲᠦ ᠪᠣᠯᠣᠭᠰᠠᠨ ᠨᠢ
10 ᠡᠨᠡ ᠨᠤᠲᠤᠭ ᠲᠤ ᠰᠠᠳᠤᠷ ᠰᠠᠮᠠᠭᠤᠨ ᠢ ᠦᠢᠯᠡᠳᠦᠭᠴᠢᠳ ᠳᠦᠭᠦᠷᠴᠦ ᠬᠠᠷᠢᠶᠠᠯ ᠠᠴᠠ ᠪᠣᠯᠵᠤ ᠡᠨᠡ ᠨᠤᠲᠤᠭ ᠬᠠᠲᠠᠵᠤ ᠴᠥᠯ ᠦᠨ ᠪᠡᠯᠴᠢᠭᠡᠷ ᠤᠳ ᠭᠠᠩ᠋ᠳᠠᠭᠰᠠᠨ ᠪᠠᠢᠬᠤ ᠳᠤ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠪᠤᠵᠠᠷ ᠮᠠᠭᠤ ᠶᠢ ᠳᠠᠭᠠᠨ᠂ ᠡᠷᠬᠡ ᠪᠡᠨ ᠵᠥᠪ ᠪᠤᠰᠤ ᠪᠠᠷ ᠠᠰᠢᠭᠯᠠᠵᠤ ᠪᠠᠢᠬᠤ ᠶᠢᠨ ᠤᠴᠢᠷ ᠶᠤᠮ᠃
11 ᠶᠣᠬᠣᠸᠠ ᠪᠢ ᠠᠢᠯᠠᠳᠴᠤ ᠪᠠᠢᠨ᠎ᠠ᠃ 《ᠡᠰᠢ ᠦᠵᠡᠭᠦᠯᠦᠭᠴᠢ ᠴᠤ᠂ ᠲᠠᠬᠢᠯᠴᠢ ᠴᠤ ᠪᠤᠵᠠᠷᠲᠤᠵᠠᠢ ᠬᠣᠷᠣᠨ ᠮᠠᠭᠤ ᠶᠢ ᠨᠢ ᠪᠢ ᠥᠪᠡᠷ ᠦᠨ ᠢᠶᠠᠨ ᠥᠷᠭᠥᠭᠡᠨ ᠡᠴᠡ ᠴᠤ ᠣᠯᠵᠤ ᠪᠠᠢᠨ᠎ᠠ᠂》
12 《ᠲᠡᠢᠮᠦ ᠡᠴᠡ ᠲᠡᠳᠡᠨ ᠦ ᠵᠠᠮ ᠬᠠᠯᠲᠤᠷᠢᠭ᠎ᠠ ᠲᠠᠢ ᠪᠣᠯᠵᠤ ᠬᠠᠷᠠᠩ᠋ᠭᠤᠢ ᠳᠤ ᠲᠡᠳᠡ ᠲᠦᠯᠬᠢᠭᠳᠡᠵᠦ ᠵᠠᠮ ᠳᠡᠭᠡᠷ᠎ᠡ ᠤᠨᠠᠨ᠎ᠠ ᠲᠡᠢᠨ ᠬᠦ ᠪᠢ ᠲᠡᠳᠡᠨ ᠢ ᠰᠢᠳᠬᠡᠬᠦ ᠵᠢᠯ ᠳᠡᠭᠡᠨ ᠭᠠᠮᠰᠢᠭ ᠵᠣᠪᠠᠯᠠᠩ ᠪᠠᠭᠤᠯᠭᠠᠨ᠎ᠠ᠂ ᠶᠣᠬᠣᠸᠠ ᠪᠢ ᠠᠢᠯᠠᠳᠴᠤ ᠪᠠᠢᠨ᠎ᠠ᠃》

13 《ᠪᠢ ᠰᠠᠮᠠᠷᠢᠶ᠎ᠠ ᠶᠢᠨ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠤᠨ ᠳᠤᠮᠳᠠ ᠮᠤᠩ᠋ᠬᠠᠭ ᠶᠠᠪᠤᠳᠠᠯ ᠢ ᠬᠠᠷᠠᠪᠠ ᠲᠡᠳᠡ ᠪᠠᠯ ᠢᠶᠠᠷ ᠡᠰᠢ ᠦᠵᠡᠭᠦᠯᠵᠦ᠂ ᠮᠢᠨᠦ ᠠᠷᠠᠳ ᠲᠦᠮᠡᠨ ᠢᠰᠷᠧᠯ ᠢ ᠲᠥᠭᠡᠷᠢᠭᠦᠯᠦᠭᠰᠡᠨ
14 ᠪᠢ ᠮᠥᠨ ᠶᠧᠷᠦ᠋ᠰᠠᠯᠧᠮ ᠤᠨ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠤᠨ ᠳᠤᠮᠳᠠ ᠠᠶᠤᠮᠰᠢᠭᠲᠤ ᠶᠠᠪᠤᠳᠠᠯ ᠢ ᠬᠠᠷᠠᠪᠠ ᠲᠡᠳᠡ ᠰᠠᠳᠤᠷ ᠰᠠᠮᠠᠭᠤᠨ ᠢ ᠦᠢᠯᠡᠳᠦᠨ ᠬᠤᠳᠠᠯ ᠬᠠᠭᠤᠷᠮᠠᠭ ᠤᠨ ᠳᠤᠮᠳᠠ ᠠᠮᠢᠳᠤᠷᠠᠵᠤ ᠪᠤᠵᠠᠷ ᠮᠠᠭᠤ ᠶᠢ ᠦᠢᠯᠡᠳᠦᠭᠴᠢᠳ ᠢ ᠤᠷᠮᠠᠰᠢᠭᠤᠯᠳᠠᠭ ᠲᠤᠯᠠ ᠪᠤᠵᠠᠷ ᠮᠠᠭᠤ ᠠᠴᠠ ᠪᠠᠨ ᠡᠷᠭᠢᠬᠦ ᠬᠥᠮᠦᠨ ᠠᠯᠠᠭ᠎ᠠ ᠪᠣᠯᠵᠤ ᠪᠦᠭᠦᠳᠡᠭᠡᠷ ᠮᠢᠨᠦ ᠡᠮᠦᠨ᠎ᠡ ᠰᠣᠳᠣᠮ ᠮᠡᠲᠦ ᠰᠠᠭᠤᠭᠠᠯᠢᠴᠢᠳ ᠨᠢ ᠭᠣᠮᠣᠷᠠ ᠶᠢᠨ ᠬᠢ ᠠᠳᠠᠯᠢ ᠪᠣᠯᠪᠠ᠃
15 ᠲᠡᠢᠮᠦ ᠡᠴᠡ ᠠᠤᠭ᠎ᠠ ᠬᠦᠴᠦᠲᠦ ᠶᠣᠬᠣᠸᠠ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠤᠨ ᠲᠤᠬᠠᠢ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨ᠎ᠠ᠄ 〈ᠬᠠᠷᠠ᠂ ᠪᠢ ᠲᠡᠳᠡᠨ ᠢ ᠭᠠᠰᠢᠭᠤᠨ ᠢᠶᠠᠷ ᠲᠡᠵᠢᠭᠡᠵᠦ ᠬᠣᠣᠷᠲᠠᠢ ᠤᠰᠤ ᠤᠤᠭᠤᠯᠭᠠᠬᠤ ᠭᠡᠵᠦ ᠪᠠᠢᠨ᠎ᠠ ᠤᠴᠢᠷ ᠨᠢ ᠪᠤᠵᠠᠷᠲᠤᠭᠤᠯᠤᠯ ᠶᠧᠷᠦ᠋ᠰᠠᠯᠧᠮ ᠤᠨ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠡᠴᠡ ᠭᠠᠷᠴᠤ᠂ ᠪᠦᠬᠦ ᠭᠠᠵᠠᠷ ᠳᠡᠭᠡᠷ᠎ᠡ ᠲᠠᠷᠬᠠᠭᠰᠠᠨ ᠪᠠᠢᠨ᠎ᠠ〉 ᠭᠡᠪᠡ᠃》

16 ᠠᠤᠭ᠎ᠠ ᠬᠦᠴᠦᠲᠦ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨ᠎ᠠ᠄ 《ᠲᠠ ᠨᠠᠷ ᠲᠤ ᠡᠰᠢ ᠦᠵᠡᠭᠦᠯᠵᠦ ᠪᠠᠢᠭ᠎ᠠ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠤᠨ ᠦᠭᠡ ᠶᠢ ᠪᠦᠦ ᠰᠣᠨᠣᠰ ᠲᠡᠳᠡ ᠲᠠ ᠨᠠᠷ ᠢ ᠬᠣᠭᠣᠰᠣᠨ ᠳᠤ ᠨᠠᠢᠳᠠᠭᠤᠯᠳᠠᠭ ᠪᠥᠭᠡᠳ ᠲᠡᠳᠡᠨ ᠦ ᠶᠠᠷᠢᠳᠠᠭ ᠦᠵᠡᠭᠳᠡᠯ ᠶᠣᠬᠣᠸᠠ ᠶᠢᠨ ᠠᠮᠠᠨ ᠠᠴᠠ ᠪᠤᠰᠤ᠂ ᠥᠪᠡᠷᠰᠡᠳ ᠦᠨ ᠬᠢᠨᠢ ᠰᠠᠨᠠᠭᠠᠨ ᠠᠴᠠ ᠭᠠᠷᠳᠠᠭ᠃
17 ᠲᠡᠳᠡ ᠨᠠᠮᠠᠶᠢ ᠪᠠᠰᠤᠮᠵᠢᠯᠠᠳᠠᠭ ᠬᠥᠮᠦᠰ ᠲᠦ᠄ 〈ᠲᠠ ᠨᠠᠷ ᠠᠮᠤᠷ ᠠᠮᠤᠭᠤᠯᠠᠩ ᠪᠠᠢᠬᠤ ᠪᠣᠯᠣᠨ᠎ᠠ ᠭᠡᠵᠦ ᠶᠣᠬᠣᠸᠠ ᠠᠢᠯᠠᠳᠪᠠ〉 ᠬᠡᠮᠡᠨ ᠵᠥᠷᠢᠭᠦᠳ ᠰᠠᠨᠠᠭ᠎ᠠ ᠪᠠᠷ ᠢᠶᠠᠨ ᠠᠮᠢᠳᠤᠷᠠᠳᠠᠭ ᠬᠥᠮᠦᠰ ᠲᠦ᠄ 〈ᠭᠠᠢ ᠭᠠᠮᠰᠢᠭ ᠲᠠ ᠨᠠᠷ ᠲᠤ ᠪᠠᠭᠤᠬᠤ ᠦᠭᠡᠢ〉 ᠭᠡᠳᠡᠭ᠃
18 ᠲᠡᠳᠡᠨ ᠦ ᠬᠡᠨ ᠨᠢ ᠶᠣᠬᠣᠸᠠ ᠶᠢᠨ ᠵᠥᠪᠯᠡᠯ ᠳᠦ ᠵᠣᠭᠰᠣᠭᠠᠳ ᠲᠡᠭᠦᠨ ᠦ ᠦᠭᠡ ᠶᠢ ᠦᠵᠡᠵᠦ᠂ ᠰᠣᠨᠣᠰᠪᠠ︖ ᠬᠡᠨ ᠨᠢ ᠲᠡᠭᠦᠨ ᠦ ᠦᠭᠡ ᠶᠢ ᠠᠩ᠋ᠬᠠᠷᠴᠤ ᠰᠣᠨᠣᠰᠪᠠ︖
19 ᠬᠠᠷᠠ᠂ ᠶᠣᠬᠣᠸᠠ ᠶᠢᠨ ᠠᠭᠤᠷ ᠬᠢᠯᠢᠩ ᠤᠨ ᠰᠢᠭᠤᠷᠭ᠎ᠠ ᠢᠷᠡᠵᠦ ᠪᠠᠢᠨ᠎ᠠ᠂ ᠲᠡᠷᠡ ᠨᠢ ᠬᠤᠢᠯᠠᠷᠠᠬᠤ ᠰᠢᠭᠤᠷᠭ᠎ᠠ ᠮᠡᠲᠦ ᠬᠣᠷᠣᠨ ᠮᠠᠭᠤ ᠬᠥᠮᠦᠰ ᠦᠨ ᠲᠣᠯᠣᠭᠠᠢ ᠳᠡᠭᠡᠷ᠎ᠡ ᠬᠤᠢᠯᠠᠷᠠᠨ ᠢᠷᠡᠨ᠎ᠡ᠃
20 ᠶᠣᠬᠣᠸᠠ ᠪᠢ ᠰᠠᠨᠠᠭ᠎ᠠ ᠵᠣᠷᠢᠯᠭ᠎ᠠ ᠪᠠᠨ ᠭᠦᠢᠴᠡᠳ ᠪᠡᠶᠡᠯᠡᠭᠦᠯᠬᠦ ᠡᠴᠡ ᠨᠠᠰᠢ ᠠᠭᠤᠷ ᠬᠢᠯᠢᠩ ᠢᠶᠠᠨ ᠨᠠᠮᠳᠠᠭᠠᠬᠤ ᠦᠭᠡᠢ ᠰᠡᠭᠦᠯᠴᠢ ᠶᠢᠨ ᠡᠳᠦᠷ ᠤᠳ ᠲᠤ ᠲᠠ ᠨᠠᠷ ᠡᠭᠦᠨ ᠢ ᠲᠣᠳᠣᠷᠬᠠᠢ ᠣᠢᠯᠠᠭᠠᠨ᠎ᠠ
21 ᠲᠡᠳᠡᠭᠡᠷ ᠡᠰᠢ ᠦᠵᠡᠭᠦᠯᠦᠭᠴᠢ ᠶᠢ ᠪᠢ ᠶᠠᠪᠤᠭᠤᠯᠤᠭ᠎ᠠ ᠦᠭᠡᠢ ᠪᠣᠯᠪᠠᠴᠤ ᠲᠡᠳᠡ ᠶᠠᠭᠠᠷᠠᠨ ᠭᠠᠷᠪᠠ ᠮᠢᠨᠦ ᠶᠠᠷᠢᠭ᠎ᠠ ᠦᠭᠡᠢ ᠶᠢ ᠲᠡᠳᠡ ᠡᠰᠢ ᠦᠵᠡᠭᠦᠯᠪᠡ᠃
22 ᠬᠡᠷᠪᠡ ᠲᠡᠳᠡ ᠮᠢᠨᠦ ᠵᠥᠪᠯᠡᠯ ᠳᠦ ᠵᠣᠭᠰᠣᠭᠰᠠᠨ ᠪᠣᠯ᠂ ᠮᠢᠨᠦ ᠠᠷᠠᠳ ᠲᠦᠮᠡᠨ ᠳᠦ ᠮᠢᠨᠦ ᠦᠭᠡᠰ ᠢ ᠰᠣᠨᠣᠰᠬᠠᠵᠤ ᠲᠡᠳᠡᠨ ᠢ ᠮᠠᠭᠤ ᠵᠠᠮ ᠠᠴᠠ ᠨᠢ᠂ ᠮᠥᠨ ᠮᠠᠭᠤ ᠦᠢᠯᠡᠰ ᠡᠴᠡ ᠨᠢ ᠡᠷᠭᠢᠭᠦᠯᠬᠦ ᠪᠠᠢᠭᠰᠠᠨ᠃

23 ᠪᠢ ᠣᠢᠷ᠎ᠠ ᠶᠢᠨ ᠪᠤᠷᠬᠠᠨ ᠯᠠ ᠭᠡᠵᠢ ᠤᠤ︖ ᠠᠯᠤᠰ ᠤᠨ ᠪᠤᠷᠬᠠᠨ ᠴᠤ ᠪᠢᠰᠢ ᠤᠤ︖》 ᠶᠣᠬᠣᠸᠠ ᠪᠢ ᠠᠢᠯᠠᠳᠴᠤ ᠪᠠᠢᠨ᠎ᠠ᠃
24 ᠶᠣᠬᠣᠸᠠ ᠪᠢ ᠠᠢᠯᠠᠳᠴᠤ ᠪᠠᠢᠨ᠎ᠠ᠄ 《ᠬᠡᠷᠪᠡ ᠬᠥᠮᠦᠨ ᠪᠡᠶ᠎ᠡ ᠪᠡᠨ ᠨᠢᠭᠤᠴᠠ ᠭᠠᠵᠠᠷ ᠲᠤ ᠳᠠᠯᠳᠠᠯᠠᠪᠠᠯ ᠪᠢ ᠲᠡᠭᠦᠨ ᠢ ᠬᠠᠷᠠᠵᠤ ᠴᠢᠳᠠᠬᠤ ᠦᠭᠡᠢ ᠭᠡᠵᠢ ᠤᠤ︖》 ᠶᠣᠬᠣᠸᠠ ᠪᠢ ᠠᠢᠯᠠᠳᠴᠤ ᠪᠠᠢᠨ᠎ᠠ᠄ 《ᠲᠩᠷᠢ ᠴᠤ᠂ ᠭᠠᠵᠠᠷ ᠴᠤ ᠨᠠᠳᠠ ᠪᠠᠷ ᠳᠦᠭᠦᠷᠡᠩ ᠪᠢᠰᠢ ᠤᠤ︖》

25 《ᠮᠢᠨᠦ ᠨᠡᠷ᠎ᠡ ᠪᠡᠷ ᠬᠠᠭᠤᠷᠮᠠᠭ ᠢᠶᠠᠷ ᠡᠰᠢ ᠦᠵᠡᠭᠦᠯᠳᠡᠭ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠤᠨ᠄ 〈ᠪᠢ ᠵᠡᠭᠦᠳᠦᠯᠡᠯ᠎ᠡ᠂ ᠪᠢ ᠵᠡᠭᠦᠳᠦᠯᠡᠯ᠎ᠡ︕〉 ᠭᠡᠳᠡᠭ ᠢ ᠪᠢ ᠰᠣᠨᠣᠰᠣᠭᠰᠠᠨ ᠪᠢᠯᠡ᠃ 26 ᠬᠡᠳᠦᠢ ᠪᠣᠯᠲᠠᠯ᠎ᠠ ᠡᠳᠡᠭᠡᠷ ᠡᠰᠢ ᠦᠵᠡᠭᠦᠯᠦᠭᠴᠢ ᠬᠠᠭᠤᠷᠮᠠᠭ ᠢᠶᠠᠷ᠂ ᠵᠠᠯᠢᠲᠤ ᠰᠠᠨᠠᠭ᠎ᠠ ᠪᠠᠷ ᠡᠰᠢ ᠦᠵᠡᠭᠦᠯᠦᠭᠰᠡᠭᠡᠷ ᠪᠠᠢᠬᠤ ᠶᠤᠮ ᠪᠤᠢ︖ 27 ᠮᠢᠨᠦ ᠠᠷᠠᠳ ᠲᠦᠮᠡᠨ ᠦ ᠡᠴᠢᠭᠡ ᠡᠪᠦᠭᠡᠳ ᠪᠠᠯ ᠤᠨ ᠤᠯᠠᠮ ᠢᠶᠠᠷ ᠮᠢᠨᠦ ᠨᠡᠷ᠎ᠡ ᠶᠢ ᠮᠠᠷᠲᠠᠭᠰᠠᠨ ᠲᠠᠢ ᠠᠳᠠᠯᠢ ᠪᠠᠷ ᠡᠳᠡᠭᠡᠷ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠤᠨ ᠪᠤᠰᠤᠳ ᠲᠤ ᠶᠠᠷᠢᠳᠠᠭ ᠵᠡᠭᠦᠳᠦᠨ ᠦ ᠬᠢᠨᠢ ᠤᠯᠠᠮ ᠢᠶᠠᠷ ᠮᠢᠨᠦ ᠠᠷᠠᠳ ᠲᠦᠮᠡᠨ ᠮᠢᠨᠦ ᠨᠡᠷ᠎ᠡ ᠶᠢ ᠮᠠᠷᠲᠠᠵᠤ ᠪᠠᠢᠨ᠎ᠠ᠃ 28 ᠶᠣᠬᠣᠸᠠ ᠪᠢ ᠠᠢᠯᠠᠳᠴᠤ ᠪᠠᠢᠨ᠎ᠠ᠃ ᠵᠡᠭᠦᠳᠦ ᠲᠠᠢ ᠡᠰᠢ ᠦᠵᠡᠭᠦᠯᠦᠭᠴᠢ ᠨᠢ ᠵᠡᠭᠦᠳᠦ ᠪᠡᠨ ᠶᠠᠷᠢᠭ᠂ ᠮᠢᠨᠦ ᠦᠭᠡ ᠲᠠᠢ ᠨᠢ ᠮᠢᠨᠦ ᠦᠭᠡ ᠶᠢ ᠦᠨᠡᠨᠴᠢ ᠰᠢᠳᠤᠷᠭᠤ ᠪᠠᠷ ᠶᠠᠷᠢᠭ᠃ ᠬᠡᠪᠡᠭ ᠨᠢ ᠠᠮᠤ ᠪᠤᠳᠠᠭ᠎ᠠ ᠲᠠᠢ ᠶᠠᠭᠤ ᠪᠠᠷ ᠢᠶᠠᠨ ᠠᠳᠠᠯᠢ ᠪᠤᠢ︖》 29 《ᠮᠢᠨᠦ ᠦᠭᠡ ᠭᠠᠯ ᠲᠠᠢ ᠠᠳᠠᠯᠢ᠂ ᠬᠠᠳᠠ ᠶᠢ ᠪᠤᠲᠠᠯᠬᠤ ᠠᠯᠤᠬ᠎ᠠ ᠲᠠᠢ ᠠᠳᠠᠯᠢ ᠪᠢᠰᠢ ᠭᠡᠵᠢ ᠤᠤ︖》 ᠶᠣᠬᠣᠸᠠ ᠪᠢ ᠠᠢᠯᠠᠳᠴᠤ ᠪᠠᠢᠨ᠎ᠠ᠃ 30 ᠲᠡᠢᠮᠦ ᠡᠴᠡ ᠶᠣᠬᠣᠸᠠ ᠪᠢ ᠠᠩ᠋ᠬᠠᠷᠤᠭᠤᠯᠤᠶ᠎ᠠ᠂ ᠮᠢᠨᠦ ᠦᠭᠡᠰ ᠢ ᠪᠡᠶ᠎ᠡ ᠪᠡᠶ᠎ᠡ ᠡᠴᠡ ᠪᠡᠨ ᠬᠤᠯᠠᠭᠠᠢᠯᠠᠳᠠᠭ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠢ ᠪᠢ ᠮᠡᠳᠡᠶ᠎ᠡ᠂》 31 《ᠶᠣᠬᠣᠸᠠ ᠪᠢ ᠠᠩ᠋ᠬᠠᠷᠤᠭᠤᠯᠤᠶ᠎ᠠ᠂ ᠬᠡᠯᠡ ᠪᠡᠨ ᠠᠰᠢᠭᠯᠠᠨ᠄ 〈ᠶᠣᠬᠣᠸᠠ ᠠᠢᠯᠠᠳᠪᠠ〉 ᠭᠡᠵᠦ ᠶᠠᠷᠢᠳᠠᠭ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠢ ᠪᠢ ᠮᠡᠳᠡᠶ᠎ᠡ᠂》 32 《ᠶᠣᠬᠣᠸᠠ ᠪᠢ ᠠᠩ᠋ᠬᠠᠷᠤᠭᠤᠯᠤᠶ᠎ᠠ᠂ ᠬᠠᠭᠤᠷᠮᠠᠭ ᠵᠡᠭᠦᠳᠦ ᠪᠡᠷ ᠡᠰᠢ ᠦᠵᠡᠭᠦᠯᠦᠨ᠂ ᠲᠡᠭᠦᠨ ᠢ ᠶᠠᠷᠢᠵᠤ᠂ ᠬᠤᠳᠠᠯ ᠬᠠᠭᠤᠮᠠᠭᠠᠢ ᠪᠠᠷ ᠮᠢᠨᠦ ᠠᠷᠠᠳ ᠲᠦᠮᠡᠨ ᠢ ᠲᠥᠭᠡᠷᠢᠭᠦᠯᠳᠡᠭ ᠬᠥᠮᠦᠰ ᠢ ᠪᠢ ᠮᠡᠳᠡᠶ᠎ᠡ᠃ ᠶᠣᠬᠣᠸᠠ ᠪᠢ ᠠᠢᠯᠠᠳᠴᠤ ᠪᠠᠢᠨ᠎ᠠ᠃ ᠪᠢ ᠲᠡᠳᠡᠨ ᠢ ᠢᠯᠡᠭᠡᠭᠡ ᠦᠭᠡᠢ᠂ ᠲᠡᠳᠡᠨ ᠳᠦ ᠲᠤᠰᠢᠶᠠᠭ᠎ᠠ ᠴᠤ ᠦᠭᠡᠢ᠂ ᠲᠡᠳᠡ ᠡᠨᠡ ᠠᠷᠠᠳ ᠲᠦᠮᠡᠨ ᠲᠤ ᠣᠭᠲᠣᠬᠠᠨ ᠴᠤ ᠲᠤᠰᠠ ᠪᠣᠯᠳᠠᠭ ᠦᠭᠡᠢ》 ᠭᠡᠪᠡ᠃
 ᠬᠠᠭᠤᠷᠮᠠᠭ ᠡᠰᠢ ᠦᠵᠡᠭᠦᠯᠦᠯᠭᠡ

33 《ᠡᠳᠡᠭᠡᠷ ᠠᠷᠠᠳ ᠲᠦᠮᠡᠨ᠂ ᠡᠰᠢ ᠦᠵᠡᠭᠦᠯᠦᠭᠴᠢ᠂ ᠡᠰᠡᠪᠡᠯ ᠲᠠᠬᠢᠯᠴᠢ ᠴᠢᠮ᠎ᠠ ᠠᠴᠠ᠄ 〈ᠶᠣᠬᠣᠸᠠ ᠠᠴᠠ ᠠᠪᠤᠭᠰᠠᠨ ᠵᠥᠩ ᠶᠠᠭᠤ ᠪᠠᠢᠨ᠎ᠠ︖〉 ᠭᠡᠵᠦ ᠠᠰᠠᠭᠤᠪᠠᠯ᠂ ᠴᠢ ᠲᠡᠳᠡᠨ ᠳᠦ᠄ 〈ᠵᠥᠩ 8 ᠭᠡᠵᠢ ᠤᠤ︖〉᠂ ᠶᠣᠬᠣᠸᠠ᠄ 〈ᠪᠢ ᠲᠠ ᠨᠠᠷ ᠢ ᠬᠠᠶᠠᠨ᠎ᠠ〉 ᠭᠡᠵᠦ ᠠᠢᠯᠠᠳᠤᠭᠰᠠᠨ ᠭᠡᠭᠡᠷᠡᠢ》᠃ 34 ᠬᠡᠷᠪᠡ ᠡᠰᠢ ᠦᠵᠡᠭᠦᠯᠦᠭᠴᠢ᠂ ᠲᠠᠬᠢᠯᠴᠢ᠂ ᠡᠰᠡᠪᠡᠯ ᠠᠷᠠᠳ ᠲᠦᠮᠡᠨ ᠦ ᠬᠡᠨ ᠨᠢᠭᠡ ᠨᠢ᠄ 〈ᠶᠣᠬᠣᠸᠠ ᠶᠢᠨ ᠵᠥᠩ ᠡᠨᠡ〉 ᠭᠡᠵᠦ ᠬᠡᠯᠡᠪᠡᠯ᠂ ᠪᠢ ᠲᠡᠷᠡ ᠬᠥᠮᠦᠨ ᠪᠣᠯᠣᠨ ᠲᠡᠭᠦᠨ ᠦ ᠭᠡᠷ ᠦᠨ ᠬᠢᠨ ᠢ ᠰᠢᠳᠬᠡᠨ᠎ᠡ᠃ 35 ᠡᠢᠮᠦ ᠡᠴᠡ ᠲᠠ ᠨᠠᠷ ᠤᠨ ᠬᠥᠮᠦᠨ ᠪᠦᠷᠢ ᠨᠠᠢᠵᠠ ᠪᠤᠶᠤ ᠠᠬ᠎ᠠ ᠳᠡᠭᠦᠦ ᠡᠴᠡ ᠪᠡᠨ᠄ 〈ᠶᠣᠬᠣᠸᠠ ᠶᠠᠭᠤ ᠭᠡᠵᠦ ᠬᠠᠷᠢᠭᠤᠯᠪᠠ︖〉 ᠡᠰᠡᠪᠡᠯ᠄ 〈ᠶᠣᠬᠣᠸᠠ ᠶᠠᠭᠤ ᠭᠡᠵᠦ ᠠᠢᠯᠠᠳᠪᠠ︖〉 ᠭᠡᠵᠦ ᠪᠣᠯᠣᠨ᠎ᠠ᠂ 36 ᠬᠠᠷᠢᠨ ᠲᠠ ᠨᠠᠷ 〈ᠶᠣᠬᠣᠸᠠ ᠶᠢᠨ ᠵᠥᠩ〉 ᠭᠡᠵᠦ ᠶᠠᠷᠢᠬᠤ ᠪᠠᠨ ᠪᠣᠯᠢ᠃ ᠤᠴᠢᠷ ᠨᠢ ᠬᠥᠮᠦᠨ ᠪᠦᠷᠢ ᠶᠢᠨ ᠥᠪᠡᠷ ᠦᠨ ᠬᠢᠨᠢ ᠦᠭᠡ ᠵᠥᠩ ᠨᠢ ᠪᠣᠯᠣᠭᠰᠠᠨ ᠢᠶᠠᠷ ᠲᠠ ᠨᠠᠷ ᠠᠮᠢᠳᠤ ᠪᠤᠷᠬᠠᠨ᠂ ᠠᠤᠭ᠎ᠠ ᠬᠦᠴᠦᠲᠦ ᠶᠣᠬᠣᠸᠠ᠂ ᠪᠤᠷᠬᠠᠨ ᠤ ᠪᠠᠨ ᠦᠭᠡᠰ ᠢ ᠭᠤᠢᠪᠢᠭᠤᠯᠬᠤ ᠪᠣᠯᠣᠨ᠎ᠠ᠃ 37 ᠡᠢᠮᠦ ᠡᠴᠡ ᠴᠢ ᠡᠰᠢ ᠦᠵᠡᠭᠦᠯᠦᠭᠴᠢ ᠡᠴᠡ᠄ 〈ᠶᠣᠬᠣᠸᠠ ᠴᠢᠮ᠎ᠠ ᠳᠤ ᠶᠠᠭᠤ ᠭᠡᠵᠦ ᠬᠠᠷᠢᠭᠤᠯᠪᠠ︖〉 ᠡᠰᠡᠪᠡᠯ 〈ᠶᠣᠬᠣᠸᠠ ᠶᠠᠭᠤ ᠭᠡᠵᠦ ᠠᠢᠯᠠᠳᠪᠠ︖〉 ᠭᠡᠵᠦ ᠠᠰᠠᠭᠤᠵᠤ ᠪᠣᠯᠣᠨ᠎ᠠ᠃ 38 ᠭᠡᠪᠡᠴᠦ ᠲᠠ ᠨᠠᠷ᠄ 〈ᠶᠣᠬᠣᠸᠠ ᠶᠢᠨ ᠵᠥᠩ〉 ᠭᠡᠳᠡᠭ ᠤᠴᠢᠷ ᠠᠴᠠ ᠶᠣᠬᠣᠸᠠ ᠪᠢ ᠬᠡᠯᠡᠶ᠎ᠡ᠂ ᠲᠠ ᠨᠠᠷ ᠲᠤ ᠪᠢ᠄ 〈ᠶᠣᠬᠣᠸᠠ ᠶᠢᠨ ᠵᠥᠩ ᠡᠨᠡ〉 ᠭᠡᠵᠦ ᠶᠠᠷᠢᠬᠤ ᠪᠠᠨ ᠪᠣᠯᠢ ᠭᠡᠵᠦ ᠬᠡᠯᠡᠭᠰᠡᠨ ᠪᠣᠯᠪᠠᠴᠤ ᠲᠠ ᠨᠠᠷ᠄ 〈ᠶᠣᠬᠣᠸᠠ ᠶᠢᠨ ᠦᠭᠡ ᠡᠨᠡ〉 ᠭᠡᠳᠡᠭ᠃ 39 ᠲᠡᠢᠮᠦ ᠡᠴᠡ ᠠᠩ᠋ᠬᠠᠷᠤᠭᠲᠤᠨ᠂ ᠪᠢ ᠲᠠ ᠨᠠᠷ ᠢ ᠪᠦᠷᠢᠮᠦᠰᠦᠨ ᠮᠠᠷᠲᠠᠨ᠂ ᠥᠪᠡᠷ ᠲᠦ ᠴᠢᠨᠢ ᠪᠣᠯᠣᠨ ᠡᠴᠢᠭᠡ ᠡᠪᠦᠭᠡᠳ ᠲᠦ ᠴᠢᠨᠢ ᠥᠭᠭᠥᠭᠰᠡᠨ ᠬᠣᠲᠠ ᠶᠢᠨ ᠢᠶᠠᠨ ᠬᠠᠮᠲᠤ ᠥᠪᠡᠷ ᠦᠨ ᠢᠶᠠᠨ ᠣᠷᠣᠰᠢᠬᠤᠢ ᠠᠴᠠ ᠬᠠᠶᠠᠨ᠎ᠠ᠃ 40 ᠪᠢ ᠲᠠ ᠨᠠᠷ ᠤᠨ ᠳᠡᠭᠡᠷ᠎ᠡ ᠡᠭᠦᠷᠢᠳᠡ ᠶᠢᠨ ᠭᠤᠲᠤᠮᠰᠢᠭ᠂ ᠮᠠᠷᠲᠠᠭᠳᠠᠰᠢ ᠦᠭᠡᠢ ᠰᠢᠪᠰᠢᠭ ᠢ ᠠᠪᠴᠢᠷᠠᠨ᠎ᠠ᠃