ᠶᠣᠪ ᠨᠢᠭᠡ
ᠶᠣᠪ ᠬᠢᠭᠡᠳ ᠲᠡᠭᠦᠨ ᠦ ᠭᠡᠷ ᠪᠦᠯᠢ
1 ᠦᠽ ᠨᠤᠲᠤᠭ ᠲᠤ ᠶᠣᠪ ᠭᠡᠳᠡᠭ ᠬᠥᠮᠦᠨ ᠪᠠᠢᠵᠠᠢ᠃ ᠲᠡᠷᠡ ᠪᠣᠯ ᠥ ᠦᠭᠡᠢ᠂ ᠰᠢᠳᠤᠷᠭᠤ ᠪᠥᠭᠡᠳ ᠪᠤᠷᠬᠠᠨ ᠠᠴᠠ ᠡᠮᠢᠶᠡᠵᠦ᠂ ᠪᠤᠵᠠᠷ ᠠᠴᠠ ᠵᠠᠢᠯᠠᠳᠠᠭ ᠬᠥᠮᠦᠨ ᠶᠤᠮ᠃ 2 ᠲᠡᠭᠦᠨ ᠳᠦ ᠳᠣᠯᠣᠭᠠᠨ ᠬᠦᠦ᠂ ᠭᠤᠷᠪᠠᠨ ᠥᠬᠢᠨ ᠲᠥᠷᠥᠵᠡᠢ᠃ 3 ᠲᠡᠭᠦᠨ ᠦ ᠬᠥᠷᠥᠩᠭᠡ ᠭᠡᠪᠡᠯ᠂ ᠳᠣᠯᠣᠭᠠᠨ ᠮᠢᠩ᠋ᠭᠠᠨ ᠬᠣᠨᠢ᠂ ᠭᠤᠷᠪᠠᠨ ᠮᠢᠩ᠋ᠭᠠᠨ ᠲᠡᠮᠡᠭᠡ᠂ ᠲᠠᠪᠤᠨ ᠵᠠᠭᠤᠨ ᠪᠤᠭᠤᠯᠠᠭᠠᠨ ᠤ ᠬᠣᠣᠰ ᠦᠬᠡᠷ ᠪᠠ ᠲᠠᠪᠤᠨ ᠵᠠᠭᠤᠨ ᠡᠮᠡ ᠡᠯᠵᠢᠭᠡ ᠪᠠᠢᠪᠠ᠂ ᠪᠠᠰᠠ ᠠᠰᠤᠷᠤ ᠣᠯᠠᠨ ᠵᠠᠷᠤᠴᠠ ᠲᠠᠢ ᠪᠠᠢᠪᠠ᠃ ᠡᠨᠡ ᠬᠥᠮᠦᠨ ᠳᠣᠷᠣᠨᠠ ᠶᠢᠨ ᠬᠢᠨ ᠤ ᠳᠤᠮᠳᠠ ᠬᠠᠮᠤᠭ ᠤᠨ ᠠᠭᠤᠤ ᠪᠠᠢᠵᠠᠢ᠃ 4 ᠲᠡᠭᠦᠨ ᠦ ᠬᠥᠪᠡᠭᠦᠳ ᠲᠣᠭᠲᠠᠭᠰᠠᠨ ᠡᠳᠦᠷ ᠲᠡᠭᠡᠨ ᠡᠭᠡᠯᠵᠢ ᠪᠠᠷ ᠭᠡᠷ ᠭᠡᠷ ᠲᠡᠭᠡᠨ ᠨᠠᠢᠷ ᠬᠢᠳᠡᠭ ᠪᠥᠭᠡᠳ ᠭᠤᠷᠪᠠᠨ ᠡᠭᠡᠴᠢ ᠳᠡᠭᠦᠦ ᠳᠡᠭᠡᠨ ᠴᠤ ᠬᠡᠯᠡ ᠶᠠᠪᠤᠭᠤᠯᠵᠤ ᠳᠠᠭᠤᠳᠠᠭᠤᠯᠤᠨ ᠬᠠᠮᠲᠤ ᠳᠠᠭᠠᠨ ᠢᠳᠡᠵᠦ ᠤᠤᠭᠤᠳᠠᠭ ᠪᠠᠢᠪᠠ᠃ 5 ᠨᠠᠢᠷ ᠤᠨ ᠡᠳᠦᠷ ᠤᠳ ᠳᠠᠭᠤᠰᠤᠩ᠋ᠭᠤᠲᠠ ᠶᠣᠪ᠄ 《ᠮᠢᠨᠦ ᠬᠡᠦᠬᠡᠳ ᠤᠳ ᠵᠢᠷᠦᠬᠡᠨ ᠳᠡᠭᠡᠨ ᠨᠢᠭᠦᠯ ᠦᠢᠯᠡᠳᠴᠦ᠂ ᠪᠤᠷᠬᠠᠨ ᠢ ᠬᠠᠷᠢᠶᠠᠭᠰᠠᠨ ᠪᠠᠢᠵᠤ ᠮᠠᠭᠠᠳ ᠦᠭᠡᠢ》 ᠭᠡᠳ ᠲᠡᠳᠡᠨ ᠢ ᠴᠡᠪᠡᠷᠰᠢᠭᠦᠯᠦᠭᠦᠯᠬᠦ ᠪᠡᠷ ᠬᠡᠯᠡ ᠶᠠᠪᠤᠭᠤᠯᠳᠠᠭ᠃ ᠲᠡᠭᠡᠭᠡᠳ ᠲᠡᠷᠡ ᠪᠡᠷ ᠥᠷᠯᠥᠭᠡ ᠡᠷᠲᠡᠯᠡᠨ ᠪᠣᠰᠣᠭᠠᠳ ᠬᠡᠦᠬᠡᠳ ᠪᠣᠯᠭᠠᠨ ᠤ ᠪᠠᠨ ᠲᠥᠯᠥᠭᠡ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠡᠷᠭᠦᠳᠡᠭ ᠪᠠᠢᠯᠠ᠃ ᠶᠣᠪ ᠦᠷᠭᠦᠯᠵᠢ ᠡᠢᠨ ᠬᠦ ᠦᠢᠯᠡᠳᠳᠡᠭ ᠪᠠᠢᠪᠠ᠃
ᠰᠠᠲ᠋ᠠᠨ ᠶᠣᠪ ᠢ ᠠᠩᠬᠠ ᠤᠳᠠᠭᠠ ᠲᠡᠩᠰᠡᠪᠡ
6 ᠨᠢᠭᠡᠨ ᠡᠳᠦᠷ ᠪᠤᠷᠬᠠᠨ ᠤ ᠬᠥᠪᠡᠭᠦᠳ ᠢᠷᠡᠵᠡᠭᠡᠵᠦ᠂ ᠶᠣᠬᠣᠸᠠ ᠳᠤ ᠪᠠᠷᠠᠭᠠᠯᠬᠠᠬᠤ ᠳᠤ᠂ ᠰᠠᠲ᠋ᠠᠨ ᠴᠤ ᠲᠡᠳᠡᠨ ᠦ ᠳᠤᠮᠳᠠ ᠢᠷᠡᠪᠡ᠃ 7 ᠶᠣᠬᠣᠸᠠ ᠰᠠᠲ᠋ᠠᠨ ᠳᠤ᠄ 《ᠴᠢ ᠬᠠᠮᠢᠭᠠ ᠠᠴᠠ ᠢᠷᠡᠪᠡ︖》 ᠭᠡᠬᠦ ᠳᠦ᠂ ᠰᠠᠲ᠋ᠠᠨ ᠶᠣᠬᠣᠸᠠ ᠳᠤ ᠬᠠᠷᠢᠭᠤᠯᠤᠨ᠄ 《ᠪᠢ ᠭᠠᠵᠠᠷ ᠢᠶᠠᠷ ᠡᠰᠢ ᠲᠡᠰᠢ᠂ ᠡᠨᠡᠭᠦᠷ ᠲᠡᠷᠡᠭᠦᠷ ᠶᠠᠪᠤᠭᠰᠠᠭᠠᠷ ᠢᠷᠡᠯᠡ》 ᠭᠡᠪᠡ᠃ 8 ᠶᠣᠬᠣᠸᠠ ᠰᠠᠲ᠋ᠠᠨ ᠳᠤ᠄ 《ᠴᠢ ᠮᠢᠨᠦ ᠵᠠᠷᠤᠴᠠ ᠶᠣᠪ ᠢ ᠠᠩ᠋ᠬᠠᠷᠪᠠ ᠤᠤ︖ ᠭᠠᠵᠠᠷ ᠳᠡᠭᠡᠷᠡ ᠲᠡᠭᠦᠨ ᠰᠢᠭ ᠥ ᠦᠭᠡᠢ᠂ ᠰᠢᠳᠤᠷᠭᠤ᠂ ᠪᠤᠷᠬᠠᠨ ᠠᠴᠠ ᠡᠮᠢᠶᠡᠵᠦ᠂ ᠪᠤᠵᠠᠷ ᠠᠴᠠ ᠵᠠᠢᠯᠠᠳᠠᠭ ᠬᠥᠮᠦᠨ ᠠᠯᠠᠭᠠ》 ᠭᠡᠪᠡ᠃ 9 ᠰᠠᠲ᠋ᠠᠨ ᠶᠣᠬᠣᠸᠠ ᠳᠤ ᠬᠠᠷᠢᠭᠤᠯᠤᠨ᠄ 《ᠶᠣᠪ ᠰᠢᠯᠲᠠᠭᠠᠨ ᠦᠭᠡᠢ ᠪᠠᠷ ᠪᠤᠷᠬᠠᠨ ᠠᠴᠠ ᠡᠮᠢᠶᠡᠳᠡᠭ ᠭᠡᠵᠢ ᠤᠤ︖ 10 ᠲᠠ ᠥᠪᠡᠷ ᠢᠶᠡᠨ ᠲᠡᠭᠦᠨ ᠢ᠂ ᠮᠥᠨ ᠲᠡᠭᠦᠨ ᠦ ᠭᠡᠷ ᠢ᠂ ᠲᠡᠭᠦᠨ ᠳᠦ ᠪᠠᠢᠭᠠ ᠪᠦᠬᠦᠨ ᠢ ᠲᠠᠯᠠ ᠪᠦᠷᠢ ᠡᠴᠡ ᠨᠢ ᠬᠦᠷᠢᠶᠡᠯᠡᠳᠡᠭ ᠪᠢᠰᠢ ᠤᠤ︖ ᠲᠠ ᠭᠠᠷ ᠤᠨ ᠬᠢᠨᠢ ᠦᠢᠯᠡ ᠶᠢ ᠢᠪᠡᠭᠡᠵᠦ᠂ ᠲᠡᠭᠦᠨ ᠦ ᠬᠥᠷᠥᠩᠭᠡ ᠶᠢ ᠭᠠᠵᠠᠷ ᠨᠤᠲᠤᠭ ᠢᠶᠠᠷ ᠨᠢ ᠪᠢᠯᠠᠬᠠᠭᠤᠯᠤᠭᠰᠠᠨ᠃ 11 ᠣᠳᠣ ᠲᠠ ᠭᠠᠷ ᠢᠶᠠᠨ ᠰᠤᠩ᠋ᠭᠠᠵᠤ᠂ ᠪᠠᠢᠭᠠ ᠪᠦᠬᠦᠨ ᠢ ᠨᠢ ᠴᠣᠬᠢᠵᠤ ᠦᠵᠡ᠂ ᠲᠡᠷᠡ ᠯᠠᠪᠲᠠᠢ ᠲᠠᠨ ᠢ ᠨᠢᠭᠤᠷ ᠳᠡᠭᠡᠷᠡ ᠴᠢᠨᠢ ᠬᠠᠷᠢᠶᠠᠬᠤ ᠪᠣᠯᠣᠨᠠ》 ᠭᠡᠯᠡ᠃ 12 ᠶᠣᠬᠣᠸᠠ ᠰᠠᠲ᠋ᠠᠨ ᠳᠤ᠄ 《ᠵᠠ᠂ ᠪᠢ ᠲᠡᠭᠦᠨ ᠳᠦ ᠪᠠᠢᠭᠠ ᠪᠦᠬᠦᠨ ᠢ ᠴᠢᠨᠦ ᠭᠠᠷ ᠲᠤ ᠲᠤᠰᠢᠶᠠᠶᠠ᠂ ᠬᠠᠷᠢᠨ ᠴᠢ ᠲᠡᠭᠦᠨ ᠳᠦ ᠭᠠᠷ ᠬᠦᠷᠴᠦ ᠪᠣᠯᠬᠤ ᠦᠭᠡᠢ》 ᠭᠡᠵᠡᠢ᠃ ᠲᠡᠭᠡᠭᠡᠳ ᠰᠠᠲ᠋ᠠᠨ ᠶᠣᠬᠣᠸᠠ ᠶᠢᠨ ᠣᠷᠣᠰᠢᠬᠤᠢ ᠠᠴᠠ ᠭᠠᠷᠴᠠᠢ᠃
13 ᠨᠢᠭᠡᠨ ᠡᠳᠦᠷ ᠶᠣᠪ ᠤᠨ ᠬᠥᠪᠡᠭᠦᠳ ᠥᠬᠢᠳ ᠬᠠᠮᠤᠭ ᠤᠨ ᠲᠣᠮᠣ ᠠᠬᠠ ᠶᠢᠨ ᠢᠶᠠᠨ ᠭᠡᠷ ᠲᠦ ᠬᠣᠭᠣᠯᠠ ᠢᠳᠡᠵᠦ᠂ ᠳᠠᠷᠠᠰᠤ ᠤᠤᠭᠤᠵᠤ ᠪᠠᠢᠪᠠ᠃ 14 ᠨᠢᠭᠡᠨ ᠡᠯᠴᠢ ᠶᠣᠪ ᠤᠷᠤᠭᠤ ᠢᠷᠡᠵᠦ᠄ 《ᠦᠬᠡᠷ ᠤᠳ ᠭᠠᠵᠠᠷ ᠬᠠᠭᠠᠯᠵᠤ᠂ ᠡᠯᠵᠢᠭᠡ ᠨᠦᠭᠦᠳ ᠬᠠᠵᠠᠭᠤᠬᠠᠨ ᠳᠤᠨᠢ ᠢᠳᠡᠰᠢᠯᠡᠵᠦ ᠪᠠᠢᠬᠤ ᠳᠤ᠂ 15 ᠱᠧᠪᠠᠴᠤᠳ ᠳᠣᠪᠲᠣᠯᠣᠨ ᠲᠡᠳᠡᠭᠡᠷ ᠢ ᠪᠤᠯᠢᠶᠠᠨ ᠠᠪᠴᠤ᠂ ᠪᠠᠰᠠ ᠵᠠᠷᠤᠴᠠ ᠨᠠᠷ ᠢ ᠢᠯᠳᠦᠨ ᠦ ᠢᠷ ᠢᠶᠠᠷ ᠬᠥᠨᠥᠭᠡᠵᠡᠢ᠃ ᠪᠢ ᠭᠠᠭᠴᠠᠭᠠᠷ ᠢᠶᠠᠨ ᠵᠢᠭᠤᠲᠠᠵᠤ ᠲᠠᠨ ᠳᠤ ᠮᠡᠳᠡᠭᠦᠯᠬᠦ ᠪᠡᠷ ᠢᠷᠡᠯᠡ》 ᠭᠡᠪᠡ᠃ 16 ᠲᠡᠷᠡ ᠶᠠᠷᠢᠵᠤ ᠪᠠᠢᠲᠠᠯᠠ ᠥᠭᠡᠷᠡ ᠨᠢᠭᠡ ᠨᠢ ᠢᠷᠡᠵᠦ᠄ 《ᠲᠩᠷᠢ ᠡᠴᠡ ᠪᠤᠷᠬᠠᠨ ᠤ ᠭᠠᠯ ᠪᠠᠭᠤᠵᠤ᠂ ᠬᠣᠨᠢᠨ ᠰᠦᠷᠦᠭ ᠪᠣᠯᠣᠨ ᠵᠠᠷᠤᠴᠠ ᠨᠠᠷ ᠢ ᠵᠠᠯᠭᠢᠯᠠ᠃ ᠪᠢ ᠭᠠᠭᠴᠠᠭᠠᠷ ᠢᠶᠠᠨ ᠵᠢᠭᠤᠲᠠᠵᠤ ᠲᠠᠨ ᠳᠤ ᠮᠡᠳᠡᠭᠦᠯᠬᠦ ᠪᠡᠷ ᠢᠷᠡᠯᠡ》 ᠭᠡᠪᠡ᠃ 17 ᠲᠡᠷᠡ ᠶᠠᠷᠢᠵᠤ ᠪᠠᠢᠲᠠᠯᠠ ᠥᠭᠡᠷᠡ ᠨᠢᠭᠡ ᠨᠢ ᠢᠷᠡᠵᠦ᠄ 《ᠺᠠᠯᠳᠧᠶᠠᠴᠤᠳ ᠤᠨ ᠭᠤᠷᠪᠠᠨ ᠪᠦᠯᠦᠭ ᠳᠡᠭᠡᠷᠡᠮ ᠲᠡᠮᠡᠭᠡᠳ ᠢ ᠳᠡᠭᠡᠷᠡᠮᠳᠡᠨ ᠠᠪᠴᠤ᠂ ᠵᠠᠷᠤᠴᠠ ᠨᠠᠷ ᠢ ᠢᠯᠳᠦᠨ ᠦ ᠢᠷ ᠢᠶᠠᠷ ᠬᠥᠨᠥᠭᠡᠪᠡ᠃ ᠪᠢ ᠭᠠᠭᠴᠠᠭᠠᠷ ᠢᠶᠠᠨ ᠵᠢᠭᠤᠲᠠᠵᠤ ᠲᠠᠨ ᠳᠤ ᠮᠡᠳᠡᠭᠦᠯᠬᠦ ᠪᠡᠷ ᠢᠷᠡᠯᠡ》 ᠭᠡᠪᠡ᠃ 18 ᠲᠡᠷᠡ ᠶᠠᠷᠢᠵᠤ ᠪᠠᠢᠲᠠᠯᠠ ᠥᠭᠡᠷᠡ ᠨᠢᠭᠡ ᠨᠢ ᠢᠷᠡᠵᠦ᠄ 《ᠲᠠᠨ ᠤ ᠬᠥᠪᠡᠭᠦᠳ ᠥᠬᠢᠳ ᠲᠣᠮᠣ ᠠᠬᠠ ᠶᠢᠨ ᠢᠶᠠᠨ ᠭᠡᠷ ᠲᠦ ᠬᠣᠭᠣᠯᠠ ᠢᠳᠡᠵᠦ᠂ ᠳᠠᠷᠠᠰᠤ ᠤᠤᠭᠤᠵᠤ ᠪᠠᠢᠲᠠᠯᠠ᠂ 19 ᠶᠡᠬᠡ ᠰᠠᠯᠬᠢ ᠴᠥᠯ ᠦᠨ ᠴᠠᠭᠠᠨᠠ ᠠᠴᠠ ᠢᠷᠡᠵᠦ᠂ ᠪᠠᠢᠰᠢᠩ ᠤᠨ ᠳᠥᠷᠪᠡᠨ ᠪᠤᠯᠤᠩ ᠢ ᠴᠣᠬᠢᠭᠰᠠᠨ ᠳᠤ᠂ ᠪᠠᠢᠰᠢᠩ ᠵᠠᠯᠠᠭᠤᠰ ᠤᠨ ᠳᠡᠭᠡᠷᠡ ᠨᠤᠷᠠᠵᠤ᠂ ᠲᠡᠳᠡ ᠡ᠊ᠨᠳᠡᠪᠡ᠃ ᠪᠢ ᠭᠠᠭᠴᠠᠭᠠᠷ ᠢᠶᠠᠨ ᠵᠢᠭᠤᠲᠠᠵᠤ ᠲᠠᠨ ᠳᠤ ᠮᠡᠳᠡᠭᠦᠯᠬᠦ ᠪᠡᠷ ᠢᠷᠡᠯᠡ》 ᠭᠡᠪᠡ᠃
20 ᠶᠣᠪ ᠪᠣᠰᠴᠤ᠂ ᠳᠡᠪᠡᠯ ᠢᠶᠡᠨ ᠤᠷᠠᠵᠤ᠂ ᠲᠣᠯᠣᠭᠠᠢ ᠶᠢᠨ ᠦᠰᠦ ᠪᠡᠨ ᠬᠤᠰᠤᠭᠤᠯᠤᠭᠠᠳ ᠭᠠᠵᠠᠷ ᠲᠤ ᠤᠨᠠᠨ ᠮᠥᠷᠭᠥᠵᠦ᠄
21 《ᠪᠢ ᠡᠬᠡ ᠶᠢᠨ ᠢᠶᠠᠨ ᠬᠡᠪᠡᠯᠢ ᠡᠴᠡ ᠨᠢᠴᠦᠭᠦᠨ ᠢᠷᠡᠭᠰᠡᠨ ᠪᠢ ᠲᠡᠰᠢ ᠪᠠᠨ ᠨᠢᠴᠦᠭᠦᠨ ᠪᠤᠴᠠᠨᠠ ᠶᠣᠬᠣᠸᠠ ᠥᠭᠭᠥᠭᠰᠡᠨ᠂ ᠶᠣᠬᠣᠸᠠ ᠠᠪᠤᠭᠰᠠᠨ ᠶᠣᠬᠣᠸᠠ ᠶᠢᠨ ᠨᠡᠷᠡ ᠠᠯᠳᠠᠷᠰᠢᠬᠤ ᠪᠣᠯᠲᠤᠭᠠᠢ》 ᠭᠡᠪᠡ᠃
22 ᠡᠨᠡ ᠪᠦᠬᠦᠨ ᠪᠣᠯᠵᠤ ᠪᠠᠢᠬᠤ ᠳᠤ᠂ ᠶᠣᠪ ᠨᠢᠭᠦᠯ ᠬᠢᠭᠰᠡᠨ ᠦᠭᠡᠢ᠂ ᠪᠤᠷᠬᠠᠨ ᠤ ᠡᠰᠡᠷᠭᠦ ᠮᠤᠩ᠋ᠬᠠᠭᠯᠠᠭᠠ ᠦᠭᠡᠢ᠃