ᠶᠣᠪ ᠠᠷᠪᠠᠨ ᠭᠤᠷᠪᠠ
1 ᠬᠠᠷᠠ᠂ ᠨᠢᠳᠦ ᠮᠢᠨᠢ ᠡᠨᠡ ᠪᠦᠬᠦᠨ ᠢ ᠬᠠᠷᠠᠭᠰᠠᠨ ᠴᠢᠬᠢ ᠮᠢᠨᠢ ᠰᠣᠨᠣᠰᠴᠤ ᠣᠢᠯᠠᠭᠠᠭᠰᠠᠨ᠂
2 ᠲᠠ ᠨᠠᠷ ᠤᠨ ᠮᠡᠳᠡᠳᠡᠭ ᠢ ᠪᠢ ᠪᠠᠰᠠ ᠮᠡᠳᠡᠨᠡ ᠲᠠ ᠨᠠᠷ ᠠᠴᠠ ᠳᠤᠲᠠᠬᠤ ᠶᠠᠭᠤᠮᠠ ᠨᠠᠳᠠ ᠳᠤ ᠦᠭᠡᠢ᠃
3 ᠬᠠᠷᠢᠨ ᠪᠢ ᠲᠡᠭᠦᠰ ᠬᠦᠴᠦᠲᠡᠨ ᠲᠡᠢ ᠶᠠᠷᠢᠯᠴᠠᠭᠰᠠᠨ ᠴᠤ ᠪᠣᠯᠣᠭᠠᠰᠠᠢ ᠤᠴᠢᠷ ᠢ ᠪᠤᠷᠬᠠᠨ ᠢᠶᠠᠷ ᠲᠠᠢᠯᠪᠤᠷᠢᠯᠠᠭᠤᠯᠬᠤ ᠶᠢ ᠬᠦᠰᠡᠨᠡ᠂
4 ᠬᠠᠷᠢᠨ ᠲᠠ ᠨᠠᠷ ᠪᠣᠯ ᠬᠤᠳᠠᠯ ᠢ ᠵᠣᠬᠢᠶᠠᠭᠴᠢ ᠪᠦᠭᠦᠳᠡᠭᠡᠷ ᠢᠶᠡᠨ ᠲᠤᠰᠠ ᠦᠭᠡᠢ ᠡᠮᠴᠢ ᠶᠤᠮ᠂
5 ᠲᠠ ᠨᠠᠷ ᠠᠮᠠ ᠪᠠᠨ ᠬᠠᠮᠬᠢᠨ ᠳᠠᠭᠤ ᠦᠭᠡᠢ ᠪᠠᠢᠭᠰᠠᠨ ᠴᠤ ᠪᠣᠯᠣᠭᠠᠰᠠᠢ᠂ ᠲᠡᠭᠡᠬᠦ ᠨᠢ ᠲᠠ ᠨᠠᠷ ᠤᠨ ᠮᠡᠷᠭᠡᠨ ᠤᠬᠠᠭᠠᠨ᠂
6 ᠣᠳᠣ ᠥᠪᠡᠷ ᠢ ᠪᠠᠨ ᠥᠮᠥᠭᠯᠡᠬᠦ ᠶᠢ ᠮᠢᠨᠢ ᠰᠣᠨᠣᠰᠣᠭᠠᠴᠢ ᠣᠷᠣᠭᠤᠯ ᠤᠨ ᠮᠢᠨᠢ ᠲᠠᠢᠯᠪᠤᠷᠢ ᠶᠢ ᠴᠢᠩᠨᠠᠭᠠᠴᠢ᠂
7 ᠲᠠ ᠨᠠᠷ ᠪᠤᠷᠬᠠᠨ ᠤ ᠲᠥᠯᠥᠭᠡ ᠭᠡᠳ ᠰᠢᠳᠤᠷᠭᠤ ᠪᠤᠰᠤ ᠶᠢ᠂ ᠲᠡᠭᠦᠨ ᠦ ᠲᠥᠯᠥᠭᠡ ᠭᠡᠳ ᠬᠠᠭᠤᠷᠮᠠᠭ ᠢ ᠶᠠᠷᠢᠬᠤ ᠭᠡᠵᠦ ᠪᠠᠢᠨᠠ ᠤᠤ︖
8 ᠪᠤᠷᠬᠠᠨ ᠳᠤ ᠲᠠ ᠨᠠᠷ ᠲᠠᠯᠠ ᠵᠠᠰᠠᠬᠤ ᠤᠤ︖ ᠲᠡᠭᠦᠨ ᠦ ᠲᠥᠯᠥᠭᠡ ᠮᠠᠷᠭᠤᠯᠳᠤᠬᠤ ᠤᠤ︖
9 ᠪᠤᠷᠬᠠᠨ ᠲᠠ ᠨᠠᠷ ᠢ ᠰᠢᠯᠭᠠᠪᠠᠯ ᠲᠠ ᠨᠠᠷ ᠲᠤ ᠲᠠᠭᠠᠲᠠᠢ ᠤᠤ︖ ᠬᠥᠮᠦᠨ ᠬᠥᠮᠦᠨ ᠢ ᠬᠠᠭᠤᠷᠲᠠᠭ ᠰᠢᠭ᠋ ᠢᠶᠠᠨ ᠲᠡᠭᠦᠨ ᠢ ᠬᠠᠭᠤᠷᠤᠨᠠ ᠭᠡᠵᠢ ᠤᠤ︖
10 ᠨᠢᠭᠤᠴᠠ ᠪᠠᠷ ᠲᠠᠯᠠ ᠵᠠᠰᠠᠬᠤ ᠭᠡᠰᠡᠨ ᠴᠤ ᠪᠤᠷᠬᠠᠨ ᠲᠠ ᠨᠠᠷ ᠢ ᠭᠠᠷᠴᠠᠭᠠ ᠦᠭᠡᠢ ᠵᠢᠮᠡᠯᠡᠨᠡ᠂
11 ᠲᠡᠭᠦᠨ ᠦ ᠰᠦᠷ ᠬᠦᠴᠦ ᠲᠠ ᠨᠠᠷ ᠢ ᠠᠶᠤᠯᠭᠠᠵᠤ ᠲᠠ ᠨᠠᠷ ᠠᠢᠳᠠᠰ ᠲᠤ ᠠᠪᠲᠠᠬᠤ ᠦᠭᠡᠢ ᠭᠡᠵᠢ ᠤᠤ︖
12 ᠤᠷᠠᠨ ᠦᠭᠡ ᠴᠢᠨᠢ ᠦᠨᠡᠰᠦ ᠠᠳᠠᠯᠢ ᠵᠦᠢᠷ ᠦᠭᠡ ᠥᠮᠥᠭᠯᠡᠯ ᠴᠢᠨᠢ ᠰᠢᠪᠠᠷ ᠮᠡᠲᠦ ᠥᠮᠥᠭᠯᠡᠯ ᠶᠤᠮ᠃
13 ᠲᠠ ᠨᠠᠷ ᠳᠠᠭᠤ ᠦᠭᠡᠢ ᠪᠠᠢ᠂ ᠪᠢ ᠶᠠᠷᠢᠶᠠ᠂ ᠨᠠᠳᠠ ᠳᠤ ᠶᠠᠭᠤ ᠲᠣᠬᠢᠶᠠᠯᠳᠤᠪᠠᠯ ᠲᠣᠬᠢᠶᠠᠯᠳᠤᠭ᠂
14 ᠥᠪᠡᠷ ᠦᠨ ᠢᠶᠠᠨ ᠮᠢᠬᠠ ᠶᠢ ᠪᠢ ᠰᠢᠳᠦ ᠪᠡᠷ ᠢᠶᠠᠨ ᠵᠠᠭᠤᠬᠤ ᠶᠢᠨ ᠬᠡᠷᠡᠭ ᠶᠠᠭᠤᠨ︖ ᠥᠪᠡᠷ ᠦᠨ ᠠᠮᠢ ᠶᠢ ᠪᠢ ᠭᠠᠷ ᠲᠠᠭᠠᠨ ᠠᠳᠬᠤᠬᠤ ᠶᠢᠨ ᠬᠡᠷᠡᠭ ᠶᠠᠭᠤᠨ︖
15 ᠬᠠᠷᠠ᠂ ᠲᠡᠷᠡ ᠨᠠᠮᠠᠶᠢ ᠠᠯᠠᠭᠰᠠᠨ ᠴᠤ ᠪᠢ ᠲᠡᠭᠦᠨ ᠳᠦ ᠨᠠᠢᠳᠠᠨᠠ᠂ ᠬᠠᠷᠢᠨ ᠪᠢ ᠲᠡᠭᠦᠨ ᠦ ᠡᠮᠦᠨᠡ ᠵᠠᠪᠠᠯ ᠵᠠᠮ ᠮᠥᠷ ᠢᠶᠡᠨ ᠥᠮᠥᠭᠯᠡᠬᠦ ᠤᠴᠢᠷ ᠲᠠᠢ᠂
16 ᠡᠨᠡ ᠨᠢ ᠮᠢᠨᠦ ᠠᠪᠤᠷᠠᠯ ᠪᠣᠯᠣᠨᠠ᠂ ᠪᠤᠷᠬᠠᠨ ᠦᠭᠡᠢ ᠬᠥᠮᠦᠨ ᠲᠡᠭᠦᠨ ᠦ ᠣᠷᠣᠰᠢᠬᠤᠢ ᠳᠤ ᠣᠴᠢᠬᠤ ᠦᠭᠡᠢ᠂
17 ᠦᠭᠡ ᠶᠢ ᠮᠢᠨᠢ ᠠᠩ᠋ᠬᠠᠷᠤᠯ ᠲᠠᠢ ᠰᠣᠨᠣᠰᠴᠠᠭᠠ᠂ ᠶᠠᠷᠢᠶᠠ ᠮᠢᠨᠢ ᠲᠠ ᠨᠠᠷ ᠤᠨ ᠴᠢᠬᠢᠨ ᠳᠤ ᠬᠦᠷᠬᠦ ᠪᠣᠯᠲᠤᠭᠠᠢ᠂
18 ᠬᠠᠷᠠ᠂ ᠪᠢ ᠰᠢᠭᠦᠯᠲᠡ ᠳᠦ ᠣᠷᠣᠬᠤ ᠳᠤ ᠪᠡᠯᠡᠨ ᠪᠠᠢᠨᠠ ᠪᠢ ᠵᠥᠪᠲᠥᠭᠡᠭᠳᠡᠨᠡ ᠭᠡᠳᠡᠭ ᠢᠶᠡᠨ ᠮᠡᠳᠡᠨᠡ᠂
19 ᠬᠡᠨ ᠨᠢᠭᠡᠨ ᠨᠢ ᠭᠡᠮ ᠢ ᠮᠢᠨᠢ ᠭᠡᠷᠡᠴᠢᠯᠡᠵᠦ ᠴᠢᠳᠠᠬᠤ ᠤᠤ︖ ᠲᠡᠭᠡᠪᠡᠯ ᠪᠢ ᠳᠠᠭᠤ ᠦᠭᠡᠢ ᠦᠬᠦᠶᠡ᠃
20 ᠵᠥᠪᠬᠡᠨ ᠬᠣᠶᠠᠷ ᠵᠦᠢᠯ ᠢ ᠯᠠ ᠨᠠᠳᠠ ᠳᠤ ᠪᠦᠦ ᠬᠢ᠂ ᠪᠤᠷᠬᠠᠨ ᠮᠢᠨᠢ᠄ (ᠲᠡᠭᠡᠪᠡᠯ ᠪᠢ ᠲᠠᠨ ᠤ ᠨᠢᠭᠤᠷ ᠠᠴᠠ ᠨᠢᠭᠤᠭᠳᠠᠬᠤ ᠦᠭᠡᠢ᠂)
21 ᠨᠠᠳᠠ ᠠᠴᠠ ᠨᠢᠳᠤᠷᠭᠠ ᠪᠠᠨ ᠬᠣᠯᠠᠳᠠᠭᠤᠯᠵᠤ ᠠᠶᠤᠮᠰᠢᠭ ᠢᠶᠠᠷ ᠢᠶᠠᠨ ᠨᠠᠮᠠᠶᠢ ᠪᠦᠦ ᠠᠶᠤᠯᠭᠠᠭᠠᠴᠢ᠂
22 ᠲᠡᠭᠡᠭᠡᠳ ᠨᠠᠮᠠᠶᠢ ᠳᠠᠭᠤᠳᠠᠭᠠᠴᠢ᠂ ᠪᠢ ᠬᠠᠷᠢᠭᠤᠯᠤᠨᠠ ᠡᠰᠡᠪᠡᠯ ᠨᠠᠮᠠᠶᠢ ᠶᠠᠷᠢᠭᠤᠯᠵᠤ᠂ ᠳᠠᠷᠠᠭᠠ ᠨᠢ ᠬᠠᠷᠢᠭᠤᠯᠤᠭᠠᠴᠢ᠂
23 ᠮᠢᠨᠦ ᠭᠡᠮ ᠨᠢᠭᠦᠯ ᠬᠡᠳᠦᠢ ᠪᠠᠢᠬᠤ ᠪᠤᠢ︖ ᠨᠢᠭᠦᠯ ᠬᠢᠯᠢᠨᠴᠡ ᠶᠢ ᠮᠢᠨᠢ ᠨᠠᠳᠠ ᠳᠤ ᠮᠡᠳᠡᠭᠦᠯᠦᠭᠡᠴᠢ᠃
24 ᠲᠠ ᠶᠠᠭᠤᠨ ᠳᠤ ᠨᠢᠭᠤᠷ ᠢᠶᠠᠨ ᠨᠢᠭᠤᠵᠤ ᠨᠠᠮᠠᠶᠢ ᠳᠠᠢᠰᠤᠨ ᠢᠶᠠᠨ ᠭᠡᠵᠦ ᠦᠵᠡᠨᠡ ᠪᠤᠢ︖
25 ᠬᠡᠶᠢᠰᠴᠦ ᠪᠤᠢ ᠨᠠᠪᠴᠢ ᠶᠢ ᠲᠠ ᠠᠶᠤᠯᠭᠠᠬᠤ ᠤᠤ︖ ᠬᠠᠲᠠᠭᠰᠠᠨ ᠰᠦᠷᠡᠯ ᠢ ᠲᠠ ᠨᠡᠬᠡᠮᠵᠢᠯᠡᠬᠦ ᠤᠤ︖
26 ᠲᠠ ᠨᠠᠮᠠᠶᠢ ᠵᠣᠪᠠᠭᠠᠬᠤ ᠵᠦᠢᠯᠡᠰ ᠢ ᠪᠢᠴᠢᠭᠡᠳ ᠵᠠᠯᠠᠭᠤ ᠦᠶᠡ ᠶᠢᠨ ᠮᠢᠨᠢ ᠭᠡᠮ ᠪᠤᠷᠤᠭᠤ ᠶᠢ ᠴᠤ ᠥᠪᠯᠡᠭᠦᠯᠬᠦ ᠭᠡᠵᠦ ᠪᠠᠢᠨᠠ᠂
27 ᠲᠠ ᠬᠥᠯ ᠢ ᠮᠢᠨᠢ ᠳᠥᠩᠭᠡᠯᠡᠵᠦ ᠬᠥᠯ ᠦᠨ ᠮᠢᠨᠢ ᠠᠯᠬᠤᠮ ᠢ ᠬᠢᠵᠠᠭᠠᠷᠯᠠᠵᠤ ᠵᠠᠮ ᠪᠦᠷᠢ ᠶᠢ ᠮᠢᠨᠢ ᠬᠢᠨᠠᠵᠤ ᠪᠠᠢᠳᠠᠭ᠂
28 ᠡᠨᠡ ᠬᠥᠮᠦᠨ ᠢᠯᠵᠢᠷᠡᠭᠰᠡᠨ ᠶᠠᠭᠤᠮᠠ ᠮᠡᠲᠦ ᠬᠦᠷᠢᠳ ᠬᠣᠷᠣᠬᠠᠢ ᠳᠤ ᠢᠳᠡᠭᠦᠯᠦᠭᠰᠡᠨ ᠬᠤᠪᠴᠠᠰᠤ ᠮᠡᠲᠦ ᠡᠯᠡᠭᠳᠡᠵᠦ ᠪᠠᠢᠨᠠ᠃