ᠶᠣᠪ ᠬᠣᠷᠢᠨ ᠨᠢᠭᠡ
ᠶᠣᠪ ᠤᠨ ᠬᠠᠷᠢᠭᠤ
1 ᠶᠣᠪ ᠬᠠᠷᠢᠭᠤᠯᠤᠨ᠄
2 《ᠦᠭᠡ ᠶᠢ ᠮᠢᠨᠢ ᠠᠩ᠋ᠬᠠᠷᠤᠯ ᠲᠠᠢ ᠰᠣᠨᠣᠰ ᠲᠡᠷᠡ ᠨᠢ ᠲᠠ ᠨᠠᠷ ᠲᠤ ᠲᠠᠢᠪᠤᠰᠢᠷᠠᠭᠤᠯᠤᠯ ᠪᠣᠯᠣᠨᠠ᠃
3 ᠶᠠᠷᠢᠵᠤ ᠪᠠᠢᠬᠤ ᠳᠤ ᠮᠢᠨᠢ ᠲᠡᠪᠴᠢᠶᠡᠷᠢ ᠲᠠᠢ ᠪᠠᠷ ᠶᠠᠷᠢᠵᠤ ᠳᠠᠭᠤᠰᠬᠤ ᠳᠤ ᠮᠢᠨᠢ ᠨᠠᠮᠠᠶᠢ ᠲᠣᠬᠣᠭᠤᠷᠬᠠᠵᠤ ᠪᠣᠯᠣᠨᠠ᠂
4 ᠬᠠᠷᠢᠨ ᠪᠢ ᠬᠥᠮᠦᠨ ᠳᠦ ᠯᠠ ᠭᠣᠮᠣᠳᠠᠯ ᠲᠣᠭᠠᠴᠢᠵᠤ ᠪᠠᠢᠨᠠ ᠭᠡᠵᠢ ᠤᠤ︖ ᠬᠡᠷᠬᠢᠨ ᠪᠢ ᠪᠠᠴᠢᠮᠳᠠᠬᠤ ᠦᠭᠡᠢ ᠪᠠᠢᠵᠤ ᠴᠢᠳᠠᠬᠤ ᠪᠢᠯᠡ︖
5 ᠨᠠᠳᠠ ᠤᠷᠤᠭᠤ ᠬᠠᠷᠠ᠂ ᠲᠠ ᠨᠠᠷ ᠠᠯᠮᠠᠢᠷᠠᠵᠤ᠂ ᠭᠠᠷ ᠢᠶᠠᠷ ᠢᠶᠠᠨ ᠠᠮᠠ ᠪᠠᠨ ᠲᠠᠭᠯᠠᠬᠤ ᠪᠠᠢᠬᠠ᠂
6 ᠡᠭᠦᠨ ᠢ ᠪᠣᠳᠣᠬᠤ ᠳᠤ᠂ ᠳᠣᠲᠣᠷᠠ ᠤᠢᠮᠤᠷᠠᠵᠤ᠂ ᠪᠡᠶᠡ ᠮᠢᠨᠢ ᠴᠡᠴᠡᠷᠡᠵᠦ ᠪᠠᠢᠨᠠ᠂
7 ᠶᠠᠭᠠᠬᠢᠭᠠᠳ ᠪᠤᠷᠤᠭᠤᠲᠠᠳ ᠠᠮᠢᠳᠤ ᠦᠯᠡᠳᠡᠵᠦ ᠥᠨᠳᠥᠷ ᠨᠠᠰᠤᠯᠠᠨ ᠡᠷᠬᠡ ᠮᠡᠳᠡᠯ ᠨᠢ ᠥᠰᠥᠭᠰᠡᠭᠡᠷ ᠪᠠᠢᠨᠠ ᠪᠤᠢ︖
8 ᠦᠷᠡ ᠬᠡᠦᠬᠡᠳ ᠤᠳ ᠨᠢ ᠲᠡᠳᠡᠨ ᠦ ᠡᠮᠦᠨᠡ ᠦᠷᠡ ᠤᠳᠤᠮ ᠨᠢ ᠲᠡᠳᠡᠨ ᠦ ᠨᠢᠳᠦᠨ ᠳᠡᠭᠡᠷᠡ ᠪᠡᠬᠢᠵᠢᠭᠰᠡᠭᠡᠷ
9 ᠠᠢᠯ ᠭᠡᠷ ᠨᠢ ᠠᠶᠤᠯ ᠦᠭᠡᠢ ᠠᠮᠤᠷ ᠪᠠᠢᠵᠤ ᠪᠤᠷᠬᠠᠨ ᠤ ᠲᠠᠰᠢᠭᠤᠷ ᠲᠡᠳᠡᠨ ᠦ ᠳᠡᠭᠡᠷᠡ ᠠᠯᠠᠭᠠ᠂
10 ᠪᠤᠬᠠ ᠨᠢ ᠠᠯᠳᠠᠯ ᠦᠭᠡᠢ ᠬᠡᠭᠡᠯᠲᠦᠭᠦᠯᠳᠡᠭ ᠦᠨᠢᠶᠡ ᠨᠢ ᠬᠡᠭᠡᠯ ᠬᠠᠶᠠᠬᠤ ᠦᠭᠡᠢ ᠲᠥᠯᠯᠡᠭᠰᠡᠭᠡᠷ ᠪᠠᠢᠨᠠ᠂
11 ᠲᠡᠳᠡ ᠬᠡᠦᠬᠡᠳ ᠤᠳ ᠢᠶᠠᠨ ᠬᠣᠨᠢᠨ ᠰᠦᠷᠦᠭ ᠮᠡᠲᠦ ᠭᠠᠷᠭᠠᠵᠤ ᠪᠠᠭᠠᠴᠤᠳ ᠨᠢ ᠳᠡᠪᠬᠡᠷᠦᠨ ᠪᠥᠵᠢᠭᠯᠡᠳᠡᠭ᠂
12 ᠲᠡᠳᠡ ᠰᠢᠭᠰᠢᠭᠦᠷ ᠪᠤᠶᠤ ᠶᠠᠲᠤᠭᠠᠨ ᠤ ᠠᠶᠠ ᠲᠠᠢ ᠳᠠᠭᠤᠯᠠᠵᠤ ᠯᠢᠩᠪᠦ ᠶᠢᠨ ᠡᠭᠡᠰᠢᠭ ᠳᠤ ᠪᠠᠶᠠᠷᠯᠠᠳᠠᠭ᠂
13 ᠲᠡᠳᠡ ᠡᠳᠦᠷ ᠬᠣᠨᠣᠭ ᠢᠶᠠᠨ ᠠᠵᠠ ᠵᠢᠷᠭᠠᠯ ᠲᠠᠢ ᠥᠩᠭᠡᠷᠡᠭᠦᠯᠵᠦ ᠴᠠᠭ ᠨᠢ ᠪᠣᠯᠬᠤ ᠳᠤ ᠬᠣᠷᠣᠮᠬᠠᠨ ᠵᠠᠭᠤᠷᠠ ᠦᠬᠦᠭᠰᠡᠳ ᠦᠨ ᠣᠷᠣᠨ ᠤᠷᠤᠭᠤ ᠪᠠᠭᠤᠳᠠᠭ᠂
14 ᠬᠠᠷᠢᠨ ᠲᠡᠳᠡ ᠪᠤᠷᠬᠠᠨ ᠳᠤ᠄ 〈ᠪᠢᠳᠡᠨ ᠡᠴᠡ ᠵᠠᠢᠯᠠ︕ ᠲᠠᠨ ᠤ ᠵᠠᠮ ᠢ ᠪᠢᠳᠡ ᠰᠣᠨᠢᠷᠬᠠᠳᠠᠭ ᠦᠭᠡᠢ᠂
15 ᠲᠡᠭᠦᠰ ᠬᠦᠴᠦᠲᠡᠨ ᠭᠡᠵᠦ ᠬᠡᠨ ᠪᠣᠯᠣᠭᠠᠳ ᠪᠢᠳᠡ ᠲᠡᠭᠦᠨ ᠳᠦ ᠦᠢᠯᠡᠴᠢᠯᠡᠬᠦ ᠶᠣᠰᠣᠲᠠᠢ ᠪᠢᠯᠡ︖ ᠲᠡᠭᠦᠨ ᠡᠴᠡ ᠭᠤᠶᠤᠭᠰᠠᠨ ᠴᠤ ᠪᠢᠳᠡᠨ ᠳᠦ ᠶᠠᠮᠠᠷ ᠠᠰᠢᠭ ᠪᠠᠢᠬᠤ ᠪᠢᠯᠡ︖〉 ᠭᠡᠵᠡᠭᠡᠳᠡᠭ᠂
16 ᠬᠠᠷᠠ᠂ ᠲᠡᠳᠡᠨ ᠦ ᠠᠵᠠ ᠵᠢᠷᠭᠠᠯ ᠥᠪᠡᠷᠰᠡᠳ ᠦᠨ ᠬᠢᠨᠢ ᠭᠠᠷ ᠲᠤ ᠪᠠᠢᠬᠤ ᠪᠢᠰᠢ ᠪᠤᠷᠤᠭᠤᠲᠠᠨ ᠤ ᠪᠣᠳᠣᠯ ᠨᠠᠳᠠ ᠠᠴᠠ ᠬᠣᠯᠠ ᠪᠠᠢᠳᠠᠭ᠃
17 ᠬᠠᠷᠢᠨ ᠪᠤᠷᠤᠭᠤᠲᠠᠳ ᠤᠨ ᠳ᠋ᠧᠩ ᠬᠡᠳᠦ ᠤᠳᠠᠭᠠ ᠤᠨᠲᠠᠷᠠᠳᠠᠭ ᠪᠤᠢ︖ ᠭᠠᠢ ᠵᠣᠪᠠᠯᠠᠩ ᠲᠡᠳᠡᠨ ᠦ ᠳᠡᠭᠡᠷᠡ ᠬᠡᠳᠦ ᠤᠳᠠᠭᠠ ᠪᠠᠭᠤᠳᠠᠭ ᠪᠤᠢ︖ ᠪᠤᠷᠬᠠᠨ ᠠᠭᠤᠷ ᠢᠶᠠᠷ ᠢᠶᠠᠨ ᠲᠡᠳᠡᠨ ᠳᠦ ᠬᠡᠳᠦ ᠤᠳᠠᠭᠠ ᠵᠣᠪᠠᠯᠠᠩ ᠤᠨᠤᠭᠠᠳᠠᠭ ᠪᠤᠢ︖
18 ᠲᠡᠳᠡ ᠬᠡᠳᠦ ᠤᠳᠠᠭᠠ ᠰᠠᠯᠬᠢᠨ ᠳᠤ ᠬᠡᠶᠢᠰᠬᠦ ᠰᠦᠷᠡᠯ᠂ ᠰᠢᠭᠤᠷᠭᠠᠨ ᠳᠤ ᠳᠡᠭᠳᠡᠬᠦ ᠬᠡᠪᠡᠭ ᠮᠡᠲᠦ ᠪᠣᠯᠳᠠᠭ ᠪᠤᠢ︖
19 ᠲᠠ ᠨᠠᠷ 〈ᠪᠤᠷᠬᠠᠨ ᠬᠥᠮᠦᠨ ᠪᠣᠯᠭᠠᠨ ᠤ ᠶᠠᠯᠠ ᠶᠢ ᠬᠤᠷᠢᠶᠠᠭᠠᠳ ᠬᠡᠦᠬᠡᠳ ᠤᠳ ᠲᠤᠨᠢ ᠤᠨᠤᠭᠠᠳᠠᠭ〉 ᠭᠡᠳᠡᠭ᠂ ᠦᠨᠡᠨ ᠳᠡᠭᠡᠨ ᠪᠤᠷᠬᠠᠨ ᠶᠠᠯᠠ ᠶᠢ ᠥᠪᠡᠷ ᠲᠤᠨᠢ ᠲᠤᠯᠭᠠᠬᠤ ᠪᠣᠯᠣᠨᠠ᠂ ᠡᠢᠨ ᠬᠦ ᠲᠡᠭᠦᠨ ᠳᠦ ᠥᠪᠡᠷ ᠦᠨ ᠬᠢᠨᠢ ᠪᠤᠷᠤᠭᠤ ᠶᠢ ᠣᠢᠯᠠᠭᠠᠭᠤᠯᠵᠤ
20 ᠥᠪᠡᠷ ᠦᠨ ᠬᠢᠨᠢ ᠰᠦᠢᠷᠡᠯ ᠢ ᠨᠢᠳᠦ ᠪᠡᠷ ᠨᠢ ᠬᠠᠷᠠᠭᠤᠯᠵᠤ ᠲᠡᠭᠦᠰ ᠬᠦᠴᠦᠲᠡᠨ ᠦ ᠠᠭᠤᠷ ᠬᠢᠯᠢᠩ ᠢ ᠤᠤᠭᠤᠯᠭᠠᠨᠠ᠂
21 ᠰᠠᠷᠠ ᠨᠤᠭᠤᠳ ᠤᠨ ᠬᠢᠨᠢ ᠲᠣᠭᠠ ᠭᠦᠢᠴᠡᠴᠢᠬᠡᠪᠡᠯ ᠭᠡᠷ ᠣᠷᠣᠨ ᠤ ᠪᠠᠨ ᠲᠠᠯᠠ ᠪᠠᠷ ᠬᠡᠳᠦ ᠤᠳᠠᠭᠠ ᠰᠣᠨᠢᠷᠬᠠᠵᠤ ᠴᠢᠳᠠᠬᠤ ᠪᠤᠢ︖
22 ᠬᠡᠨ ᠪᠤᠷᠬᠠᠨ ᠳᠤ ᠡᠳᠡᠭᠡᠷ ᠢ ᠮᠡᠳᠡᠭᠦᠯᠬᠦ ᠪᠡᠷ ᠵᠢᠭᠠᠵᠤ ᠴᠢᠳᠠᠬᠤ ᠪᠢᠯᠡ︖ ᠲᠡᠷᠡ ᠪᠡᠷ ᠥᠨᠳᠥᠷ ᠲᠦ ᠪᠠᠢᠭᠰᠠᠳ ᠢ ᠴᠤ ᠰᠢᠭᠦᠨ ᠰᠢᠳᠬᠡᠬᠦ ᠪᠣᠯᠣᠨᠠ᠂
23 ᠵᠠᠷᠢᠮ ᠨᠢ ᠨᠠᠰᠤ ᠪᠠᠷᠠᠲᠠᠯᠠ ᠪᠠᠨ ᠬᠦᠴᠦ ᠲᠡᠩᠬᠡᠭᠡ ᠲᠡᠭᠦᠰ᠂ ᠠᠮᠤᠷ ᠲᠠᠢᠪᠤᠩ ᠪᠥᠭᠡᠳ
24 ᠮᠢᠬᠠ ᠨᠢ ᠥᠭᠡᠬᠦ ᠲᠠᠢ ᠶᠠᠰᠤ ᠨᠢ ᠴᠢᠮᠥᠭᠡ ᠲᠠᠢ ᠪᠠᠢᠬᠤ ᠳᠤ᠂
25 ᠵᠠᠷᠢᠮ ᠨᠢ ᠨᠠᠰᠤ ᠪᠠᠷᠠᠲᠠᠯᠠ ᠪᠠᠨ ᠰᠠᠢᠨ ᠰᠠᠢᠬᠠᠨ ᠢ ᠠᠮᠰᠠᠯ ᠦᠭᠡᠢ ᠵᠣᠪᠠᠯᠠᠩ ᠲᠠᠢ ᠪᠠᠢᠳᠠᠭ᠂
26 ᠭᠡᠪᠡᠴᠦ ᠲᠡᠳᠡ ᠬᠣᠶᠠᠭᠤᠯᠠ ᠪᠠᠨ ᠰᠢᠷᠣᠢ ᠳᠤ ᠬᠡᠪᠲᠡᠵᠦ ᠥᠲᠥᠨ ᠳᠤ ᠬᠤᠴᠢᠭᠳᠠᠬᠤ ᠪᠣᠯᠣᠨᠠ᠃
27 ᠬᠠᠷᠠ᠂ ᠨᠠᠮᠠᠶᠢ ᠪᠤᠷᠤᠭᠤᠳᠬᠠᠬᠤ ᠪᠠᠷ ᠪᠤᠢ ᠲᠠ ᠨᠠᠷ ᠤᠨ ᠪᠣᠳᠣᠯ᠂ ᠳᠠᠯᠳᠠ ᠰᠠᠨᠠᠭᠠ ᠶᠢ ᠪᠢ ᠮᠡᠳᠡᠳᠡᠭ᠂
28 ᠲᠠ ᠨᠠᠷ᠄ 〈ᠨᠥᠭᠥᠭᠡ ᠡᠷᠬᠡ ᠪᠠᠷᠢᠭᠴᠢ ᠶᠢᠨ ᠭᠡᠷ ᠬᠠᠮᠢᠭᠠ ᠪᠠᠢᠨᠠ︖ ᠪᠤᠷᠤᠭᠤᠲᠠᠳ ᠤᠨ ᠰᠠᠭᠤᠭᠰᠠᠨ ᠭᠠᠵᠠᠷ ᠬᠠᠮᠢᠭᠠ ᠪᠠᠢᠨᠠ︖〉 ᠭᠡᠨᠡ᠂
29 ᠲᠠ ᠨᠠᠷ ᠵᠠᠮ ᠤᠨ ᠬᠥᠮᠦᠨ ᠡᠴᠡ ᠠᠰᠠᠭᠤᠳᠠᠭ ᠦᠭᠡᠢ ᠤᠤ︖ ᠭᠡᠷᠡᠴᠢᠯᠡᠯ ᠢ ᠨᠢ ᠬᠦᠯᠢᠶᠡᠨ ᠠᠪᠬᠤ ᠦᠭᠡᠢ ᠤᠤ︖
30 ᠲᠡᠳᠡ 〈ᠬᠣᠷᠣᠨ ᠮᠠᠭᠤ ᠬᠥᠮᠦᠨ ᠭᠠᠮᠰᠢᠭ ᠤᠨ ᠡᠳᠦᠷ ᠲᠦ ᠬᠡᠯᠲᠦᠷᠢᠬᠦ ᠨᠢ ᠪᠤᠢ ᠬᠢᠯᠢᠩ ᠤᠨ ᠡᠳᠦᠷ ᠲᠦ ᠭᠡᠲᠦᠯᠭᠡᠭᠳᠡᠬᠦ ᠨᠢ ᠪᠤᠢ〉 ᠭᠡᠵᠦ ᠬᠡᠯᠡᠨᠡ᠂
31 ᠬᠡᠨ ᠲᠡᠳᠡᠨ ᠦ ᠦᠢᠯᠡᠰ ᠢ ᠨᠢᠭᠤᠷ ᠳᠡᠭᠡᠷᠡ ᠨᠢ ᠬᠡᠯᠡᠬᠦ ᠪᠢᠯᠡ︖ ᠬᠡᠨ ᠦᠢᠯᠡᠳᠦᠭᠰᠡᠨ ᠵᠦᠢᠯ ᠤᠨ ᠬᠢᠨᠢ ᠲᠥᠯᠥᠭᠡ ᠲᠡᠳᠡᠨ ᠳᠦ ᠬᠠᠷᠢᠭᠤᠯᠬᠤ ᠪᠢᠯᠡ︖
32 ᠲᠡᠷᠡ ᠪᠡᠷ ᠪᠤᠯᠠᠰᠢᠨ ᠳᠤ ᠠᠪᠠᠴᠢᠭᠳᠠᠬᠤ ᠳᠤ ᠬᠠᠷᠠᠭᠤᠯ ᠪᠤᠯᠠᠰᠢ ᠶᠢ ᠨᠢ ᠮᠠᠨᠠᠬᠤ ᠪᠣᠯᠣᠨᠠ᠂
33 ᠬᠥᠮᠦᠨ ᠪᠦᠷᠢ ᠲᠡᠭᠦᠨ ᠦ ᠠᠷᠤ ᠠᠴᠠ ᠳᠠᠭᠠᠨᠠ ᠲᠣᠭᠠᠯᠠᠰᠢ ᠦᠭᠡᠢ ᠣᠯᠠᠨ ᠨᠢ ᠲᠡᠭᠦᠨ ᠦ ᠡᠮᠦᠨᠡ ᠶᠠᠪᠤᠨᠠ ᠬᠥᠨᠳᠡᠢ ᠶᠢᠨ ᠰᠢᠪᠠᠷ ᠴᠤ ᠲᠡᠭᠦᠨ ᠳᠦ ᠵᠥᠭᠡᠯᠡᠨ ᠪᠠᠢᠬᠤ ᠪᠣᠯᠣᠨᠠ᠃
34 ᠡᠢᠮᠦ ᠪᠠᠢᠬᠤ ᠳᠤ ᠲᠠ ᠨᠠᠷ ᠲᠡᠳᠡᠭᠡᠷ ᠬᠣᠭᠣᠰᠣᠨ ᠦᠭᠡ ᠪᠡᠷ ᠢᠶᠠᠨ ᠨᠠᠮᠠᠶᠢ ᠲᠠᠢᠳᠬᠤᠷᠠᠭᠤᠯᠬᠤ ᠭᠡᠬᠦ ᠨᠢ ᠤᠤ︖ ᠬᠠᠷᠢᠭᠤᠯᠲᠠ ᠳᠤ ᠴᠢᠨᠢ ᠬᠤᠳᠠᠯ ᠬᠠᠭᠤᠷᠮᠠᠭ ᠠᠴᠠ ᠥᠭᠡᠷᠡ ᠶᠠᠭᠤ ᠴᠤ ᠦᠯᠡᠳᠡᠬᠦ ᠦᠭᠡᠢ》 ᠭᠡᠪᠡ᠃