ᠶᠣᠪ ᠠᠷᠪᠠᠨ ᠲᠠᠪᠤ
ᠬᠣᠶᠠᠳᠤᠭᠠᠷ ᠡᠷᠭᠢᠭᠡᠨ ᠦ ᠶᠠᠷᠢᠯᠴᠠᠭᠠ ᠡᠯᠢᠹᠠᠽ ᠤᠨ ᠶᠠᠷᠢᠶᠠ
1 ᠲᠧᠮᠠᠨ ᠬᠥᠮᠦᠨ ᠡᠯᠢᠹᠠᠽ ᠬᠠᠷᠢᠭᠤᠯᠤᠨ᠄
2 《ᠴᠡᠴᠡᠨ ᠭᠡᠭᠳᠡᠳᠡᠭ ᠬᠥᠮᠦᠨ ᠬᠣᠭᠣᠰᠣᠨ ᠮᠡᠳᠡᠯᠭᠡ ᠪᠡᠷ ᠬᠠᠷᠢᠭᠤᠯᠵᠤ ᠴᠡᠭᠡᠵᠢ ᠪᠠᠨ ᠳᠣᠷᠣᠨᠠ ᠶᠢᠨ ᠬᠠᠷᠠ ᠰᠠᠯᠬᠢ ᠪᠠᠷ ᠳᠦᠭᠦᠷᠭᠡᠨ
3 ᠤᠳᠬᠠ ᠦᠭᠡᠢ ᠦᠭᠡ᠂ ᠠᠰᠢᠭ ᠦᠭᠡᠢ ᠶᠠᠷᠢᠶᠠ ᠪᠠᠷ ᠮᠠᠷᠭᠤᠯᠳᠤᠬᠤ ᠨᠢ ᠤᠤ︖
4 ᠦᠨᠡᠬᠡᠷ ᠴᠢ ᠪᠤᠷᠬᠠᠨ ᠠᠴᠠ ᠡᠮᠢᠶᠡᠬᠦ ᠶᠢ ᠬᠣᠷᠢᠭᠯᠠᠬᠤ ᠭᠡᠵᠦ ᠲᠡᠭᠦᠨ ᠦ ᠡᠮᠦᠨᠡᠬᠢ ᠪᠢᠰᠢᠯᠭᠠᠯ ᠢ ᠰᠠᠭᠠᠲᠠᠭᠤᠯᠵᠤ ᠪᠠᠢᠨᠠ᠂
5 ᠭᠡᠮ ᠴᠢᠨᠢ ᠴᠢᠨᠦ ᠠᠮᠠ ᠶᠢ ᠵᠢᠯᠣᠭᠣᠳᠴᠤ ᠴᠢ ᠵᠠᠯᠢᠲᠤ ᠬᠡᠯᠡ ᠶᠢ ᠰᠣᠩ᠋ᠭᠣᠵᠠᠢ᠂
6 ᠴᠢᠮᠠᠶᠢ ᠪᠤᠷᠤᠭᠤᠳᠬᠠᠭᠴᠢ ᠨᠢ ᠪᠢ ᠪᠢᠰᠢ᠂ ᠥᠪᠡᠷ ᠦᠨ ᠴᠢᠨᠢ ᠠᠮᠠ ᠴᠢᠨᠦ ᠡᠰᠡᠷᠭᠦ ᠭᠡᠷᠡᠴᠢᠯᠡᠭᠴᠢ ᠨᠢ ᠥᠪᠡᠷ ᠦᠨ ᠴᠢᠨᠢ ᠣᠷᠣᠭᠤᠯ ᠶᠤᠮ᠃
7 ᠴᠢ ᠠᠩ᠋ᠬᠠᠨ ᠤ ᠬᠥᠮᠦᠨ ᠪᠣᠯᠵᠤ ᠲᠥᠷᠥᠭᠰᠡᠨ ᠤᠤ︖ ᠠᠭᠤᠯᠠ ᠲᠣᠯᠣᠭᠠᠳ ᠠᠴᠠ ᠴᠤ ᠡᠮᠦᠨᠡ ᠡᠭᠦᠰᠦᠭᠰᠡᠨ ᠤᠤ︖
8 ᠴᠢ ᠪᠤᠷᠬᠠᠨ ᠤ ᠵᠥᠪᠯᠡᠯ ᠳᠦ ᠰᠣᠨᠣᠰᠴᠤ ᠪᠠᠢᠨᠠ ᠤᠤ︖ ᠮᠡᠷᠭᠡᠨ ᠤᠬᠠᠭᠠᠨ ᠢ ᠴᠢ ᠯᠠ ᠠᠪᠤᠭᠰᠠᠨ ᠤᠤ︖
9 ᠴᠢᠨᠦ ᠯᠠ ᠮᠡᠳᠡᠳᠡᠭ ᠪᠢᠳᠡᠨ ᠦ ᠮᠡᠳᠡᠳᠡᠭ ᠦᠭᠡᠢ ᠨᠢ ᠶᠠᠭᠤ ᠪᠠᠢᠨᠠ︖ ᠴᠢᠨᠦ ᠯᠠ ᠣᠢᠯᠠᠭᠠᠳᠠᠭ ᠪᠢᠳᠡᠨ ᠦ ᠣᠢᠯᠠᠭᠠᠳᠠᠭ ᠦᠭᠡᠢ ᠨᠢ ᠶᠠᠭᠤ ᠪᠠᠢᠨᠠ︖
10 ᠪᠢᠳᠡᠨ ᠦ ᠳᠤᠮᠳᠠ ᠪᠤᠭᠤᠷᠤᠯ ᠨᠢ ᠴᠤ᠂ ᠴᠢᠨᠦ ᠡᠴᠢᠭᠡ ᠡᠴᠡ ᠥᠲᠡᠯᠦᠭᠡ ᠨᠢᠭᠡᠨ ᠨᠢ ᠴᠤ ᠪᠠᠢᠨᠠ᠂
11 ᠪᠤᠷᠬᠠᠨ ᠤ ᠲᠠᠢᠳᠬᠤᠷᠠᠭᠤᠯᠤᠯ᠂ ᠵᠥᠭᠡᠯᠡᠨ ᠦᠭᠡᠰ ᠨᠢ ᠴᠢᠮᠠ ᠳᠤ ᠪᠠᠭᠠᠳᠠᠭᠠᠳ ᠪᠠᠢᠨᠠ ᠤᠤ︖
12 ᠴᠢ ᠵᠢᠷᠦᠬᠡ ᠪᠡᠨ ᠶᠠᠭᠤᠨ ᠳᠤ ᠠᠪᠲᠠᠭᠤᠯᠴᠢᠬᠠᠭᠠᠳ ᠨᠢᠳᠦ ᠪᠡᠨ ᠦᠵᠦᠭᠦᠷᠯᠡᠵᠦ
13 ᠠᠭᠤᠷ ᠢᠶᠠᠨ ᠪᠤᠷᠬᠠᠨ ᠤᠷᠤᠭᠤ ᠡᠷᠭᠢᠭᠦᠯᠵᠦ ᠠᠮᠠᠨ ᠠᠴᠠ ᠪᠠᠨ ᠡᠢᠮᠦ ᠦᠭᠡᠰ ᠢ ᠭᠠᠷᠭᠠᠨᠠ ᠪᠤᠢ︖
14 ᠬᠥᠮᠦᠨ ᠭᠡᠭᠴᠢ ᠶᠠᠭᠤ ᠪᠣᠯᠣᠭᠠᠳ ᠴᠡᠪᠡᠷ ᠪᠠᠢᠵᠤ ᠴᠢᠳᠠᠬᠤ ᠪᠢᠯᠡ︖ ᠡᠮᠡᠭᠲᠡᠢ ᠡᠴᠡ ᠲᠥᠷᠥᠭᠰᠡᠨ ᠨᠢ ᠶᠠᠭᠤ ᠪᠣᠯᠣᠭᠠᠳ ᠵᠥᠪ ᠪᠠᠢᠵᠤ ᠴᠢᠳᠠᠬᠤ ᠪᠢᠯᠡ︖
15 ᠬᠠᠷᠠ᠂ ᠠᠷᠢᠭᠤᠨ ᠲᠦᠮᠡᠨ ᠢᠶᠡᠨ ᠴᠤ ᠪᠤᠷᠬᠠᠨ ᠢᠲᠡᠭᠡᠳᠡᠭ ᠦᠭᠡᠢ ᠲᠩᠷᠢ ᠴᠤ ᠲᠡᠭᠦᠨ ᠦ ᠮᠡᠯᠮᠡᠢ ᠳᠦ ᠴᠡᠪᠡᠷ ᠪᠢᠰᠢ ᠪᠠᠢᠬᠤ ᠳᠤ᠂
16 ᠵᠢᠭᠰᠢᠭᠦᠷᠢᠲᠡᠢ᠂ ᠳᠣᠷᠣᠢᠲᠠᠭᠰᠠᠨ᠂ ᠭᠡᠮ ᠢ ᠤᠰᠤ ᠠᠳᠠᠯᠢ ᠤᠤᠭᠤᠳᠠᠭ ᠬᠥᠮᠦᠨ ᠢ ᠶᠠᠭᠤ ᠭᠡᠯᠲᠡᠢ ᠪᠢᠯᠡ︕
17 ᠪᠢ ᠴᠢᠮᠠ ᠳᠤ ᠬᠡᠯᠡᠶᠡ᠂ ᠮᠢᠨᠦᠬᠢ ᠶᠢ ᠰᠣᠨᠣᠰ ᠪᠢ ᠶᠠᠭᠤ ᠦᠵᠡᠭᠰᠡᠨ ᠢᠶᠡᠨ ᠥᠭᠦᠯᠡᠶᠡ᠂
18 〈ᠡᠴᠢᠭᠡ ᠡᠪᠦᠭᠡᠳ ᠮᠡᠷᠭᠡᠳ ᠦᠨ ᠢᠶᠠᠨ ᠨᠢᠭᠤᠯ ᠦᠭᠡᠢ ᠮᠡᠳᠡᠭᠦᠯᠦᠭᠰᠡᠨ ᠢ ᠥᠭᠦᠯᠡᠶᠡ᠂
19 ᠲᠡᠷᠡ ᠨᠤᠲᠤᠭ ᠲᠡᠳᠡᠨ ᠳᠦ ᠯᠠ ᠰᠣᠶᠣᠷᠬᠠᠭᠳᠠᠭᠰᠠᠨ ᠬᠠᠷᠢ ᠶᠢᠨ ᠬᠢᠨ ᠨᠢ ᠲᠡᠳᠡᠨ ᠦ ᠳᠤᠮᠳᠠᠭᠤᠷ ᠥᠩᠭᠡᠷᠡᠳᠡᠭ ᠦᠭᠡᠢ ᠪᠠᠢᠯᠠ᠃〉
20 ᠬᠣᠷᠣᠨ ᠮᠠᠭᠤ ᠬᠥᠮᠦᠨ ᠪᠦᠬᠦ ᠡᠳᠦᠷ ᠦᠨ ᠢᠶᠠᠨ ᠲᠤᠷᠰᠢ ᠬᠠᠷᠭᠢᠰ ᠬᠥᠮᠦᠨ ᠳᠦ ᠬᠠᠳᠠᠭᠠᠯᠠᠭᠳᠠᠭᠰᠠᠨ ᠪᠦᠬᠦ ᠵᠢᠯ ᠤᠳ ᠢᠶᠠᠷ ᠢᠶᠠᠨ ᠲᠠᠷᠴᠢᠯᠠᠭᠰᠠᠭᠠᠷ ᠪᠠᠢᠵᠤ᠂
21 ᠠᠶᠤᠮᠰᠢᠭᠲᠤ ᠴᠢᠮᠡᠭᠡ ᠴᠢᠬᠢᠨ ᠳᠦᠨᠢ ᠰᠣᠨᠣᠰᠳᠠᠨᠠ᠂ ᠠᠮᠤᠷ ᠲᠠᠢᠪᠤᠩ ᠦᠶᠡ ᠳᠦ ᠴᠤ ᠰᠦᠢᠳᠬᠡᠭᠴᠢᠳ ᠣᠷᠣᠵᠤ ᠢᠷᠡᠨᠡ᠂
22 ᠲᠡᠷᠡ ᠬᠠᠷᠠᠩ᠋ᠭᠤᠢ ᠠᠴᠠ ᠭᠠᠷᠤᠨᠠ ᠭᠡᠳᠡᠭ ᠲᠡᠭᠡᠨ ᠦᠯᠦ ᠢᠲᠡᠭᠡᠨᠡ ᠢᠯᠳᠦ ᠲᠡᠭᠦᠨ ᠢ ᠤᠲᠤᠨᠠ᠂
23 ᠲᠡᠷᠡ 〈ᠬᠠᠮᠢᠭᠠ ᠬᠣᠭᠣᠯᠠ ᠪᠠᠢᠨᠠ ᠪᠤᠢ︖〉 ᠬᠡᠮᠡᠨ ᠲᠡᠨᠦᠭᠦᠴᠢᠯᠡᠭᠰᠡᠭᠡᠷ ᠪᠠᠢᠬᠤ ᠪᠣᠯᠣᠨᠠ᠂ ᠬᠠᠷᠠᠩ᠋ᠭᠤᠢ ᠶᠢᠨ ᠡᠳᠦᠷ ᠬᠠᠶᠠᠭᠠᠨ ᠳᠤᠨᠢ ᠢᠷᠡᠭᠰᠡᠨ ᠪᠠᠢᠭᠠ ᠶᠢ ᠲᠡᠷᠡ ᠮᠡᠳᠡᠨᠡ᠂
24 ᠪᠡᠷᠬᠡ ᠵᠣᠪᠠᠯᠠᠩ ᠲᠡᠭᠦᠨ ᠢ ᠠᠶᠤᠯᠭᠠᠵᠤ ᠪᠠᠢᠯᠳᠤᠬᠤ ᠪᠠᠷ ᠪᠡᠯᠡᠨ ᠪᠤᠢ ᠬᠠᠭᠠᠨ ᠮᠡᠲᠦ ᠲᠡᠭᠦᠨ ᠢ ᠳᠠᠷᠤᠨᠠ᠂
25 ᠤᠴᠢᠷ ᠨᠢ ᠲᠡᠷᠡ ᠪᠡᠷ ᠪᠤᠷᠬᠠᠨ ᠥᠭᠡᠳᠡ ᠭᠠᠷ ᠳᠠᠯᠠᠢᠭᠰᠠᠨ ᠲᠡᠭᠦᠰ ᠬᠦᠴᠦᠲᠡᠨ ᠦ ᠡᠮᠦᠨᠡ ᠣᠩᠭᠢᠷᠠᠨ
26 ᠵᠥᠷᠢᠭᠦᠳᠯᠡᠵᠦ᠂ ᠪᠡᠬᠢ ᠪᠠᠮᠪᠠᠢ ᠲᠠᠢ ᠪᠠᠷ ᠲᠡᠭᠦᠰ ᠬᠦᠴᠦᠲᠡᠨ ᠦ ᠡᠰᠡᠷᠭᠦ ᠳᠠᠭᠠᠷᠢᠭᠰᠠᠨ ᠪᠦᠯᠦᠭᠡ᠃
27 ᠲᠡᠭᠦᠨ ᠦ ᠨᠢᠭᠤᠷ ᠲᠣᠰᠣ ᠳᠠᠭᠠᠭᠠᠵᠤ ᠲᠡᠭᠦᠨ ᠦ ᠪᠡᠯᠬᠡᠭᠦᠰᠦᠨ ᠳᠦ ᠬᠠᠷᠪᠢᠩ ᠰᠠᠭᠤᠭᠰᠠᠨ ᠴᠤ
28 ᠲᠡᠷᠡ ᠵᠡᠯᠢᠭᠦᠳ ᠲᠣᠰᠬᠣᠨ ᠳᠤ ᠬᠡᠨ ᠦ ᠴᠤ ᠣᠷᠣᠩᠨᠠᠬᠤ ᠪᠠᠷ ᠦᠭᠡᠢ ᠰᠠᠭᠤᠴᠠᠨ ᠳᠤ ᠨᠤᠷᠠᠩᠬᠢ ᠪᠣᠯᠬᠤ ᠭᠠᠵᠠᠷ ᠲᠤ ᠣᠷᠣᠰᠢᠬᠤ ᠪᠣᠯᠣᠨᠠ᠃
29 ᠲᠡᠷᠡ ᠪᠠᠶᠠᠵᠢᠬᠤ ᠦᠭᠡᠢ᠂ ᠡᠳ᠋ ᠪᠠᠶᠠᠯᠢᠭ ᠨᠢ ᠦᠯᠡᠳᠡᠬᠦ ᠦᠭᠡᠢ᠂ ᠥᠮᠴᠢ ᠡᠵᠡᠮᠰᠢᠯ ᠨᠢ ᠭᠠᠵᠠᠷ ᠳᠡᠭᠡᠷᠡ ᠲᠡᠯᠡᠬᠦ ᠦᠭᠡᠢ᠂
30 ᠲᠡᠷᠡ ᠬᠠᠷᠠᠩ᠋ᠭᠤᠢ ᠠᠴᠠ ᠮᠤᠯᠲᠤᠷᠠᠬᠤ ᠦᠭᠡᠢ᠂ ᠮᠥᠴᠢᠷ ᠤᠳ ᠢᠶᠠᠨ ᠳᠥᠯᠥ ᠳᠤ ᠬᠤᠢᠬᠠᠯᠠᠭᠤᠯᠵᠤ ᠪᠤᠷᠬᠠᠨ ᠤ ᠠᠮᠢᠰᠬᠤᠯ ᠢᠶᠠᠷ ᠠᠷᠢᠯᠤᠨᠠ᠂
31 ᠲᠡᠷᠡ ᠬᠣᠭᠣᠰᠣᠨ ᠳᠤ ᠨᠠᠢᠳᠠᠭᠠᠳ ᠲᠥᠭᠡᠷᠢᠯᠳᠦᠬᠦ ᠪᠤᠢ᠂ ᠬᠣᠭᠣᠰᠣᠨ ᠢ ᠯᠠ ᠬᠦᠷᠲᠡᠬᠦ ᠪᠤᠢ᠂
32 ᠲᠡᠷᠡ ᠴᠠᠭ ᠨᠢ ᠪᠣᠯᠬᠤ ᠠᠴᠠ ᠡᠮᠦᠨᠡ ᠮᠥᠴᠢᠷ ᠤᠳ ᠨᠢ ᠨᠣᠭᠣᠭᠠᠷᠠᠬᠤ ᠠᠴᠠ ᠡᠮᠦᠨᠡ ᠬᠠᠷᠢᠭᠤ ᠪᠠᠨ ᠭᠦᠢᠴᠡᠳ ᠠᠪᠤᠨᠠ᠂
33 ᠪᠣᠯᠪᠠᠰᠤᠷᠠᠭᠠ ᠦᠭᠡᠢ ᠦᠵᠦᠮ ᠢᠶᠡᠨ ᠪᠤᠯᠢᠶᠠᠯᠭᠠᠭᠰᠠᠨ ᠦᠵᠦᠮ ᠦᠨ ᠮᠣᠳᠣ᠂ ᠴᠡᠴᠡᠭ ᠢᠶᠡᠨ ᠲᠠᠰᠤᠯᠤᠭᠤᠯᠤᠭᠰᠠᠨ ᠴᠢᠳᠦᠨ ᠮᠣᠳᠣ ᠲᠠᠢ ᠠᠳᠠᠯᠢ ᠪᠣᠯᠣᠨᠠ᠂
34 ᠰᠦᠰᠦᠭ ᠦᠭᠡᠢ ᠬᠥᠮᠦᠰ ᠦᠨ ᠪᠦᠯᠦᠭ ᠦᠷᠡ ᠳ᠋ᠦᠩ ᠦᠭᠡᠢ ᠬᠠᠬᠤᠤᠯᠢ ᠳᠤ ᠳᠤᠷᠠᠲᠠᠢ ᠬᠥᠮᠦᠰ ᠦᠨ ᠮᠠᠢᠬᠠᠨ ᠭᠠᠯ ᠳᠤ ᠰᠢᠲᠠᠨᠠ᠂
35 ᠲᠡᠳᠡ ᠭᠠᠰᠠᠯᠠᠩ ᠢ ᠵᠢᠷᠮᠦᠰᠦᠯᠡᠨ᠂ ᠭᠠᠢ ᠶᠢ ᠲᠥᠷᠥᠭᠦᠯᠵᠦ᠂ ᠬᠡᠪᠡᠯᠢ ᠶᠢᠨ ᠬᠠᠭᠤᠷᠮᠠᠭ ᠢ ᠪᠡᠯᠡᠳᠦᠳᠡᠭ》 ᠭᠡᠪᠡ᠃