ᠶᠣᠪ ᠭᠤᠴᠢᠨ ᠳᠣᠯᠣᠭᠠ
1 ᠡᠭᠦᠨ ᠡᠴᠡ ᠪᠣᠯᠵᠤ ᠵᠢᠷᠦᠬᠡ ᠮᠢᠨᠢ ᠳᠡᠯᠡᠰᠴᠦ ᠪᠠᠢᠷᠢᠨ ᠠᠴᠠ ᠪᠠᠨ ᠦᠰᠦᠷᠬᠦ ᠨᠢ ᠡ᠂
2 ᠠᠶᠤᠩ᠋ᠭᠠ ᠶᠢᠨ ᠳᠠᠭᠤ ᠶᠢ᠂ ᠠᠮᠠᠨ ᠠᠴᠠ ᠨᠢ ᠭᠠᠷᠬᠤ ᠨᠢᠵᠢᠭᠢᠨᠡᠭᠡᠨ ᠢ ᠰᠣᠨᠣᠰ᠂ ᠰᠣᠨᠣᠰᠣᠭᠲᠤᠨ᠂
3 ᠲᠡᠷᠡ ᠪᠡᠷ ᠪᠦᠬᠦᠢᠯᠡ ᠲᠩᠷᠢ ᠶᠢᠨ ᠳᠣᠣᠷᠠ ᠳᠡᠯᠡᠬᠡᠢ ᠶᠢᠨ ᠵᠠᠬᠠ ᠬᠢᠵᠠᠭᠠᠷ ᠬᠦᠷᠲᠡᠯᠡ ᠠᠶᠤᠩ᠋ᠭᠠ ᠭᠢᠯᠪᠢᠭᠡᠨ ᠢᠶᠡᠨ ᠲᠠᠷᠬᠠᠭᠠᠵᠤ ᠪᠠᠢᠨᠠ
4 ᠠᠷᠤ ᠠᠴᠠ ᠨᠢ ᠳᠠᠭᠤ ᠬᠦᠩᠭᠢᠨᠡᠵᠦ ᠪᠠᠢᠨᠠ ᠰᠦᠷ ᠵᠢᠪᠬᠤᠯᠠᠩ ᠲᠠᠢ ᠳᠠᠭᠤ ᠪᠠᠷ ᠲᠡᠷᠡ ᠨᠢᠵᠢᠭᠢᠨᠡᠵᠦ ᠪᠠᠢᠨᠠ ᠲᠡᠷᠡ ᠪᠡᠷ ᠳᠠᠭᠤ ᠪᠠᠨ ᠰᠣᠨᠣᠰᠬᠠᠬᠤ ᠳᠠᠭᠠᠨ ᠭᠢᠯᠪᠢᠭᠡᠨ ᠢᠶᠡᠨ ᠬᠣᠷᠢᠬᠤ ᠦᠭᠡᠢ ᠪᠠᠢᠨᠠ
5 ᠪᠤᠷᠬᠠᠨ ᠤ ᠳᠠᠭᠤ ᠭᠠᠢᠬᠠᠮᠰᠢᠭ ᠲᠠᠢ ᠪᠠᠷ ᠨᠢᠵᠢᠭᠢᠨᠡᠵᠦ ᠪᠠᠢᠨᠠ ᠪᠢᠳᠡᠨ ᠦ ᠤᠬᠠᠭᠠᠷᠠᠰᠢ ᠦᠭᠡᠢ ᠠᠭᠤᠤ ᠵᠦᠢᠯᠡᠰ ᠢ ᠲᠡᠷᠡ ᠦᠢᠯᠡᠳᠴᠦ ᠪᠠᠢᠨᠠ᠂
6 ᠲᠡᠷᠡ ᠪᠡᠷ ᠴᠠᠰᠤᠨ ᠳᠤ 〈ᠭᠠᠵᠠᠷ ᠲᠤ ᠪᠠᠭᠤ〉 ᠭᠡᠵᠦ ᠠᠭᠠᠳᠠᠷ ᠪᠣᠷᠣᠭᠠᠨ ᠳᠤ 〈ᠰᠢᠷᠦᠭᠦᠨ ᠢᠶᠡᠷ〉 ᠭᠡᠵᠦ ᠬᠡᠯᠡᠳᠡᠭ᠂
7 ᠡᠢᠨ ᠬᠦ ᠲᠡᠷᠡ ᠪᠦᠬᠦ ᠬᠥᠮᠦᠨ ᠦ ᠠᠵᠢᠯ ᠢ ᠵᠣᠭᠰᠣᠭᠠᠵᠤ ᠪᠦᠲᠦᠭᠡᠭᠰᠡᠨ ᠪᠦᠬᠦ ᠬᠥᠮᠦᠨ ᠳᠡᠭᠡᠨ ᠥᠪᠡᠷ ᠦᠨ ᠢᠶᠠᠨ ᠦᠢᠯᠡ ᠶᠢ ᠲᠠᠨᠢᠭᠤᠯᠵᠤ ᠪᠠᠢᠨᠠ᠂
8 ᠠᠷᠢᠶᠠᠲᠠᠳ ᠨᠦᠬᠡᠨ ᠳᠡᠭᠡᠨ ᠣᠷᠣᠵᠤ ᠡᠭᠦᠷ ᠲᠡᠭᠡᠨ ᠬᠡᠪᠲᠡᠨᠡ᠂
9 ᠲᠩᠷᠢ ᠶᠢᠨ ᠬᠥᠮᠥᠷᠭᠡ ᠡᠴᠡ ᠰᠢᠭᠤᠷᠭᠠ ᠬᠦᠴᠦᠲᠦ ᠰᠠᠯᠬᠢᠨ ᠠᠴᠠ ᠵᠢᠪᠠᠷ ᠢᠷᠡᠵᠦ ᠪᠠᠢᠨᠠ᠂
10 ᠪᠤᠷᠬᠠᠨ ᠤ ᠠᠮᠢᠰᠬᠤᠯ ᠢᠶᠠᠷ ᠮᠥᠰᠥ ᠲᠣᠭᠲᠠᠨᠠ ᠶᠡᠬᠡ ᠤᠰᠤ ᠬᠥᠯᠳᠡᠨᠡ᠂
11 ᠲᠡᠷᠡ ᠪᠡᠷ ᠥᠳᠬᠡᠨ ᠡᠭᠦᠯᠡᠰ ᠲᠦ ᠴᠢᠭᠢᠭ ᠢ ᠠᠴᠢᠵᠤ ᠡᠭᠦᠯᠡᠰ ᠭᠢᠯᠪᠢᠭᠡᠨ ᠢ ᠲᠠᠷᠬᠠᠭᠠᠳᠠᠭ᠂
12 ᠡᠭᠦᠯᠡᠰ ᠭᠠᠵᠠᠷ ᠳᠡᠯᠡᠬᠡᠢ ᠶᠢᠨ ᠭᠠᠳᠠᠷᠭᠤ ᠳᠡᠭᠡᠷᠡ ᠲᠡᠭᠦᠨ ᠦ ᠵᠠᠮᠴᠢᠯᠠᠭᠰᠠᠨ ᠢᠶᠠᠷ ᠲᠣᠭᠣᠷᠢᠨ ᠲᠣᠭᠣᠷᠢᠵᠤ ᠲᠡᠭᠦᠨ ᠦ ᠵᠠᠬᠢᠭᠰᠠᠨ ᠪᠦᠬᠦᠨ ᠢ ᠪᠡᠶᠡᠯᠡᠭᠦᠯᠳᠡᠭ᠂
13 ᠲᠡᠷᠡ ᠪᠡᠷ ᠡᠭᠦᠯᠡᠰ ᠢ ᠠᠪᠴᠢᠷᠠᠵᠤ ᠬᠥᠮᠦᠰ ᠢ ᠰᠢᠳᠬᠡᠳᠡᠭ ᠡᠰᠡᠪᠡᠯ ᠭᠠᠵᠠᠷ ᠢᠶᠠᠨ ᠤᠰᠤᠯᠠᠵᠤ ᠬᠠᠢᠷᠠ ᠪᠠᠨ ᠦᠵᠡᠭᠦᠯᠳᠡᠭ᠃
14 ᠶᠣᠪ ᠡ᠂ ᠡᠭᠦᠨ ᠢ ᠰᠣᠨᠣᠰ ᠴᠢᠮᠡᠭᠡ ᠦᠭᠡᠢ ᠪᠠᠢᠵᠤ᠂ ᠪᠤᠷᠬᠠᠨ ᠤ ᠭᠠᠢᠬᠠᠮᠰᠢᠭ ᠤᠳ ᠢ ᠪᠣᠳᠣᠭᠲᠤᠨ᠂
15 ᠪᠤᠷᠬᠠᠨ ᠡᠭᠦᠯᠡᠰ ᠢᠶᠡᠨ ᠬᠡᠷᠬᠢᠨ ᠬᠢᠨᠠᠵᠤ ᠬᠡᠷᠬᠢᠨ ᠭᠢᠯᠪᠠᠭᠤᠯᠳᠠᠭ ᠢ ᠲᠠ ᠮᠡᠳᠡᠬᠦ ᠤᠤ︖
16 ᠡᠭᠦᠯᠡᠰ ᠠᠭᠠᠷ ᠲᠤ ᠬᠡᠷᠬᠢᠨ ᠬᠥᠪᠴᠦ ᠪᠠᠢᠳᠠᠭ ᠪᠤᠢ︖ ᠲᠡᠭᠦᠰ ᠮᠡᠳᠡᠯᠭᠡᠲᠦ ᠨᠢᠭᠡᠨ ᠦ ᠡᠳᠡᠭᠡᠷ ᠭᠠᠢᠬᠠᠮᠰᠢᠭᠲᠤ ᠦᠢᠯᠡ ᠶᠢ ᠲᠠ ᠮᠡᠳᠡᠬᠦ ᠤᠤ︖
17 ᠡᠮᠦᠨᠡᠲᠦ ᠶᠢᠨ ᠬᠠᠯᠠᠭᠤᠨ ᠰᠠᠯᠬᠢ ᠭᠠᠵᠠᠷ ᠢ ᠲᠠᠢᠪᠤᠰᠢᠷᠠᠭᠤᠯᠬᠤ ᠳᠤ ᠡᠮᠦᠰᠦᠭᠰᠡᠨ ᠬᠤᠪᠴᠠᠰᠤ ᠴᠢᠨᠢ ᠬᠦᠷᠲᠡᠯᠡ ᠴᠢᠮᠠ ᠳᠤ ᠬᠠᠯᠠᠭᠤᠨ ᠪᠣᠯᠳᠠᠭ ᠪᠠᠢᠬᠤ ᠳᠤ᠂
18 ᠴᠢᠳᠬᠤᠮᠠᠯ ᠲᠣᠯᠢ ᠰᠢᠭ᠋ ᠪᠠᠲᠤ ᠪᠥᠬᠡ ᠲᠩᠷᠢ ᠶᠢ ᠴᠢ ᠲᠡᠭᠦᠨ ᠲᠡᠢ ᠬᠠᠮᠲᠤ ᠳᠡᠯᠭᠡᠯᠴᠡᠵᠦ ᠴᠢᠳᠠᠬᠤ ᠤᠤ︖
19 ᠲᠡᠭᠦᠨ ᠳᠦ ᠶᠠᠭᠤ ᠭᠡᠵᠦ ᠬᠡᠯᠡᠬᠦ ᠶᠣᠰᠣᠲᠠᠢ ᠶᠢ ᠪᠢᠳᠡᠨ ᠳᠦ ᠮᠡᠳᠡᠭᠦᠯᠦᠭᠡᠴᠢ ᠬᠠᠷᠠᠩ᠋ᠭᠤᠢ ᠪᠣᠯᠬᠣᠷ ᠪᠢᠳᠡ ᠲᠣᠭᠠᠴᠢᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠨᠠ᠂
20 ᠪᠢ ᠶᠠᠷᠢᠬᠤ ᠳᠤᠷᠠᠲᠠᠢ ᠪᠦᠬᠦᠨ ᠢᠶᠡᠨ ᠲᠡᠭᠦᠨ ᠳᠦ ᠮᠡᠳᠡᠭᠦᠯᠵᠦ ᠪᠣᠯᠣᠨᠠ ᠭᠡᠵᠢ ᠤᠤ︖ ᠶᠠᠷᠢᠭᠠᠳ ᠲᠡᠭᠦᠨ ᠳᠦ ᠵᠠᠯᠭᠢᠭᠳᠠᠬᠤ ᠶᠢ ᠬᠡᠨ ᠬᠦᠰᠡᠬᠦ ᠪᠢᠯᠡ︖
21 ᠣᠳᠣ ᠬᠥᠮᠦᠨ ᠬᠠᠷᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠪᠠᠴᠤ ᠣᠭᠲᠠᠷᠭᠤᠢ ᠳᠤ ᠭᠡᠭᠡᠨ ᠭᠡᠷᠡᠯ ᠪᠤᠢ᠂ ᠰᠠᠯᠬᠢ ᠥᠩᠭᠡᠷᠡᠪᠡᠯ ᠡᠭᠦᠯᠡ ᠠᠷᠢᠯᠳᠠᠭ᠃
22 ᠤᠮᠠᠷᠠᠲᠤ ᠠᠴᠠ ᠠᠯᠲᠠᠨ ᠭᠡᠷᠡᠯ ᠰᠠᠴᠤᠷᠠᠵᠤ ᠠᠶᠤᠮᠰᠢᠭᠲᠤ ᠴᠣᠭ ᠵᠢᠪᠬᠤᠯᠠᠩ ᠲᠠᠢ ᠪᠠᠷ ᠪᠤᠷᠬᠠᠨ ᠢᠷᠡᠨᠡ᠂
23 ᠬᠠᠷᠢᠨ ᠲᠡᠭᠦᠰ ᠬᠦᠴᠦᠲᠡᠨ ᠢ ᠪᠢᠳᠡ ᠣᠯᠵᠤ ᠴᠢᠳᠠᠬᠤ ᠦᠭᠡᠢ᠂ ᠲᠡᠷᠡ ᠪᠡᠷ ᠶᠡᠬᠡ ᠬᠦᠴᠦ ᠲᠠᠢ᠂ ᠶᠡᠬᠡ ᠰᠢᠳᠤᠷᠭᠤ᠂ ᠲᠡᠷᠡ ᠪᠡᠷ ᠵᠥᠪ ᠢᠶᠡᠷ ᠪᠢᠯᠬᠠᠮᠠ᠂ ᠲᠡᠷᠡ ᠶᠡᠷᠦ ᠨᠢᠴᠤᠬᠤ ᠦᠭᠡᠢ᠂
24 ᠡᠢᠮᠦ ᠡᠴᠡ ᠬᠥᠮᠦᠰ ᠲᠡᠭᠦᠨ ᠡᠴᠡ ᠡᠮᠢᠶᠡᠬᠦ ᠤᠴᠢᠷ ᠲᠠᠢ᠂ ᠥᠪᠡᠷ ᠢ ᠪᠠᠨ ᠮᠡᠷᠭᠡᠨ ᠭᠡᠵᠦ ᠪᠣᠳᠣᠳᠠᠭ ᠪᠦᠬᠦᠨ ᠢ ᠲᠡᠷᠡ ᠣᠢᠰᠢᠶᠠᠬᠤ ᠦᠭᠡᠢ》 ᠭᠡᠪᠡ᠃