ᠶᠣᠪ ᠬᠣᠶᠠᠷ
ᠰᠠᠲ᠋ᠠᠨ ᠶᠣᠪ ᠢ ᠬᠣᠶᠠᠳᠠᠬᠢ ᠤᠳᠠᠭᠠ ᠲᠡᠩᠰᠡᠪᠡ
1 ᠨᠢᠭᠡᠨ ᠡᠳᠦᠷ ᠪᠤᠷᠬᠠᠨ ᠤ ᠬᠥᠪᠡᠭᠦᠳ ᠢᠷᠡᠵᠦ ᠶᠣᠬᠣᠸᠠ ᠳᠤ ᠪᠠᠷᠠᠭᠠᠯᠬᠠᠬᠤ ᠳᠤ᠂ ᠰᠠᠲ᠋ᠠᠨ ᠴᠤ ᠲᠡᠳᠡᠨ ᠦ ᠳᠤᠮᠳᠠ ᠢᠷᠡᠪᠡ᠃ 2 ᠶᠣᠬᠣᠸᠠ ᠰᠠᠲ᠋ᠠᠨ ᠳᠤ᠄ 《ᠴᠢ ᠬᠠᠮᠢᠭᠠ ᠠᠴᠠ ᠢᠷᠡᠪᠡ︖》 ᠭᠡᠬᠦ ᠳᠦ᠂ ᠰᠠᠲ᠋ᠠᠨ ᠶᠣᠬᠣᠸᠠ ᠳᠤ ᠬᠠᠷᠢᠭᠤᠯᠤᠨ᠄ 《ᠪᠢ ᠭᠠᠵᠠᠷ ᠢᠶᠠᠷ ᠡᠰᠢ ᠲᠡᠰᠢ ᠡᠨᠡᠭᠦᠷ ᠲᠡᠷᠡᠭᠦᠷ ᠶᠠᠪᠤᠭᠰᠠᠭᠠᠷ ᠢᠷᠡᠯᠡ》 ᠭᠡᠪᠡ᠃ 3 ᠶᠣᠬᠣᠸᠠ ᠰᠠᠲ᠋ᠠᠨ ᠳᠤ᠄ 《ᠴᠢ ᠮᠢᠨᠦ ᠵᠠᠷᠤᠴᠠ ᠶᠣᠪ ᠢ ᠠᠩ᠋ᠬᠠᠷᠪᠠ ᠤᠤ︖ ᠭᠠᠵᠠᠷ ᠳᠡᠭᠡᠷᠡ ᠲᠡᠭᠦᠨ ᠰᠢᠭ ᠥ ᠦᠭᠡᠢ᠂ ᠰᠢᠳᠤᠷᠭᠤ᠂ ᠪᠤᠷᠬᠠᠨ ᠠᠴᠠ ᠡᠮᠢᠶᠡᠵᠦ᠂ ᠪᠤᠵᠠᠷ ᠠᠴᠠ ᠵᠠᠢᠯᠠᠳᠠᠭ ᠬᠥᠮᠦᠨ ᠠᠯᠠᠭᠠ᠃ ᠴᠢ ᠨᠠᠮᠠᠶᠢ ᠥᠳᠥᠭᠡᠨ ᠰᠢᠯᠲᠠᠭᠠᠨ ᠦᠭᠡᠢ ᠪᠠᠷ ᠲᠡᠭᠦᠨ ᠢ ᠵᠠᠯᠭᠢᠬᠤ ᠭᠡᠰᠡᠨ ᠪᠣᠯᠪᠠᠴᠤ ᠲᠡᠷᠡ ᠭᠡᠮ ᠵᠢᠮ ᠦᠭᠡᠢ ᠪᠠᠢᠳᠠᠯ ᠢᠶᠠᠨ ᠪᠠᠷᠢᠮᠲᠠᠯᠠᠭᠰᠠᠭᠠᠷ ᠪᠠᠢᠨᠠ》 ᠭᠡᠪᠡ᠃ 4 ᠰᠠᠲ᠋ᠠᠨ ᠶᠣᠬᠣᠸᠠ ᠳᠤ ᠬᠠᠷᠢᠭᠤᠯᠤᠨ᠄ 《ᠬᠥᠮᠦᠨ ᠠᠷᠠᠰᠤᠨ ᠤ ᠪᠠᠨ ᠲᠥᠯᠥᠭᠡ ᠠᠷᠠᠰᠤ ᠶᠢ᠂ ᠠᠮᠢ ᠶᠢᠨ ᠢᠶᠠᠨ ᠲᠥᠯᠥᠭᠡ ᠥᠪᠡᠷ ᠲᠡᠭᠡᠨ ᠪᠠᠢᠭᠠ ᠪᠦᠬᠦᠨ ᠢ ᠵᠣᠷᠢᠭᠤᠯᠤᠨᠠ᠂ 5 ᠣᠳᠣ ᠲᠠ ᠭᠠᠷ ᠢᠶᠠᠨ ᠰᠤᠩ᠋ᠭᠠᠵᠤ᠂ ᠲᠡᠭᠦᠨ ᠦ ᠶᠠᠰᠤ᠂ ᠮᠢᠬᠠ ᠶᠢ ᠴᠣᠬᠢᠵᠤ ᠦᠵᠡ᠃ ᠲᠡᠷᠡ ᠯᠠᠪᠲᠠᠢ ᠲᠠᠨ ᠢ ᠨᠢᠭᠤᠷ ᠳᠡᠭᠡᠷᠡ ᠴᠢᠨᠢ ᠬᠠᠷᠢᠶᠠᠬᠤ ᠪᠣᠯᠣᠨᠠ》 ᠭᠡᠬᠦ ᠳᠦ᠂ 6 ᠶᠣᠬᠣᠸᠠ ᠰᠠᠲ᠋ᠠᠨ ᠳᠤ᠄ 《ᠵᠠ᠂ ᠲᠡᠭᠦᠨ ᠢ ᠪᠢ ᠴᠢᠨᠦ ᠭᠠᠷ ᠲᠤ ᠲᠤᠰᠢᠶᠠᠶᠠ᠂ ᠬᠠᠷᠢᠨ ᠴᠢ ᠲᠡᠭᠦᠨ ᠦ ᠠᠮᠢᠨ ᠳᠤ ᠬᠦᠷᠴᠦ ᠪᠣᠯᠬᠤ ᠦᠭᠡᠢ》 ᠭᠡᠪᠡ᠃
7 ᠲᠡᠭᠡᠭᠡᠳ ᠰᠠᠲ᠋ᠠᠨ ᠶᠣᠬᠣᠸᠠ ᠶᠢᠨ ᠣᠷᠣᠰᠢᠬᠤᠢ ᠠᠴᠠ ᠭᠠᠷᠴᠤ᠂ ᠶᠣᠪ ᠢ ᠴᠣᠬᠢᠨ ᠬᠥᠯ ᠦᠨ ᠬᠢᠨᠢ ᠤᠯᠠ ᠠᠴᠠ ᠲᠣᠯᠣᠭᠠᠢ ᠶᠢᠨ ᠬᠢᠨᠢ ᠣᠷᠣᠢ ᠬᠦᠷᠲᠡᠯᠡ ᠬᠣᠣᠷᠲᠤ ᠬᠠᠲᠠᠭᠢ ᠪᠠᠷ ᠴᠣᠬᠢᠭᠰᠠᠨ ᠳᠤ᠂ 8 ᠶᠣᠪ ᠦᠨᠡᠰᠦ ᠨᠤᠷᠮᠠᠨ ᠳᠤᠮᠳᠠ ᠰᠠᠭᠤᠨ ᠸᠠᠭᠠᠷ ᠤᠨ ᠬᠡᠯᠲᠡᠷᠬᠡᠢ ᠠᠪᠴᠤ ᠪᠡᠶᠡ ᠪᠡᠨ ᠮᠠᠭᠠᠵᠢᠳᠠᠭ ᠪᠣᠯᠪᠠ᠃
9 ᠲᠡᠭᠦᠨ ᠦ ᠡᠬᠡᠨᠡᠷ᠄ 《ᠴᠢ ᠭᠡᠮ ᠵᠢᠮ ᠦᠭᠡᠢ ᠪᠠᠢᠳᠠᠯ ᠢᠶᠠᠨ ᠪᠠᠷᠢᠮᠲᠠᠯᠠᠭᠰᠠᠭᠠᠷ ᠪᠠᠢᠨᠠ ᠤᠤ︖ ᠪᠤᠷᠬᠠᠨ ᠢ ᠬᠠᠷᠢᠶᠠᠭᠠᠳ ᠦᠬᠦ》 ᠭᠡᠪᠡ᠃ 10 ᠬᠠᠷᠢᠨ ᠶᠣᠪ᠄ 《ᠴᠢ ᠮᠤᠩ᠋ᠬᠠᠭ ᠡᠮᠡ ᠰᠢᠭ ᠶᠠᠷᠢᠵᠤ ᠪᠠᠢᠨᠠ᠂ ᠪᠢᠳᠡ ᠪᠤᠷᠬᠠᠨ ᠠᠴᠠ ᠰᠠᠢᠨ ᠢ ᠯᠠ ᠠᠪᠤᠭᠠᠳ ᠮᠠᠭᠤ ᠶᠢ ᠠᠪᠬᠤ ᠦᠭᠡᠢ ᠭᠡᠵᠢ ᠤᠤ︖》 ᠭᠡᠯᠡ᠃ ᠡᠳᠡᠭᠡᠷ ᠪᠦᠬᠦᠨ ᠳᠦ ᠶᠣᠪ ᠣᠷᠣᠭᠤᠯ ᠢᠶᠠᠷ ᠢᠶᠠᠨ ᠨᠢᠭᠦᠯ ᠬᠢᠭᠰᠡᠨ ᠦᠭᠡᠢ᠃
ᠶᠣᠪ ᠤᠨ ᠭᠤᠷᠪᠠᠨ ᠨᠠᠢᠵᠢ ᠢᠷᠡᠪᠡ
11 ᠶᠣᠪ ᠲᠤ ᠲᠣᠬᠢᠶᠠᠯᠳᠤᠭᠰᠠᠨ ᠡᠨᠡ ᠪᠦᠬᠦ ᠵᠣᠪᠠᠯᠠᠩ ᠤᠨ ᠲᠠᠯᠠ ᠪᠠᠷ ᠲᠡᠭᠦᠨ ᠦ ᠭᠤᠷᠪᠠᠨ ᠨᠠᠢᠵᠢ ᠲᠧᠮᠠᠨ ᠬᠥᠮᠦᠨ ᠡᠯᠢᠹᠠᠽ᠂ ᠱᠦᠾ ᠬᠥᠮᠦᠨ ᠪᠢᠯᠳᠠᠳ᠋᠂ ᠨᠠᠮᠠ ᠬᠥᠮᠦᠨ ᠽᠣᠹᠠᠷ ᠰᠣᠨᠣᠰᠣᠭᠠᠳ ᠥᠪᠡᠷ ᠥᠪᠡᠷ ᠦᠨ ᠭᠠᠵᠠᠷ ᠠᠴᠠ ᠪᠠᠨ ᠢᠷᠡᠪᠡ᠃ ᠲᠡᠳᠡ ᠲᠡᠭᠦᠨ ᠳᠡᠭᠡᠷᠡ ᠣᠴᠢᠵᠤ ᠬᠠᠮᠲᠤ ᠭᠠᠰᠢᠭᠤᠳᠠᠨ᠂ ᠲᠡᠭᠦᠨ ᠢ ᠲᠠᠢᠪᠤᠰᠢᠷᠠᠭᠤᠯᠬᠤ ᠪᠠᠷ ᠬᠣᠭᠣᠷᠣᠨᠳᠣ ᠪᠠᠨ ᠪᠣᠯᠵᠣᠭᠰᠠᠨ ᠪᠠᠢᠪᠠ᠃ 12 ᠲᠡᠳᠡ ᠬᠣᠯᠠ ᠠᠴᠠ ᠨᠢᠳᠦ ᠪᠡᠨ ᠡᠷᠭᠦᠨ ᠬᠠᠷᠠᠬᠤ ᠳᠠᠭᠠᠨ᠂ ᠲᠡᠭᠦᠨ ᠢ ᠲᠠᠨᠢᠵᠤ ᠶᠠᠳᠠᠭᠰᠠᠨ ᠢᠶᠠᠷ ᠳᠠᠭᠤ ᠪᠠᠨ ᠥᠨᠳᠥᠷᠰᠡᠭᠡᠨ ᠤᠬᠢᠯᠠᠯᠳᠤᠪᠠ᠃ ᠲᠡᠳᠡᠨ ᠦ ᠬᠥᠮᠦᠨ ᠪᠦᠷᠢ ᠳᠡᠪᠡᠯ ᠢᠶᠡᠨ ᠤᠷᠠᠨ᠂ ᠲᠣᠯᠣᠭᠠᠢ ᠳᠡᠭᠡᠭᠦᠷ ᠢᠶᠡᠨ ᠲᠩᠷᠢ ᠥᠭᠡᠳᠡ ᠰᠢᠷᠣᠢ ᠰᠠᠴᠤᠪᠠ᠃ 13 ᠲᠡᠳᠡ ᠳᠣᠯᠣᠭᠠᠨ ᠡᠳᠦᠷ ᠳᠣᠯᠣᠭᠠᠨ ᠰᠥᠨᠢ ᠲᠡᠭᠦᠨ ᠲᠡᠢ ᠬᠠᠮᠲᠤ ᠭᠠᠵᠠᠷ ᠲᠤ ᠰᠠᠭᠤᠵᠠᠭᠠᠪᠠ᠃ ᠲᠡᠭᠦᠨ ᠦ ᠵᠣᠪᠠᠯᠠᠩ ᠮᠠᠰᠢ ᠬᠦᠨᠳᠦ ᠪᠠᠢᠭᠠ ᠶᠢ ᠬᠠᠷᠠᠭᠠᠳ ᠬᠡᠨ ᠨᠢ ᠴᠤ ᠲᠡᠭᠦᠨ ᠲᠡᠢ ᠦᠭᠡ ᠶᠠᠷᠢᠭᠰᠠᠨ ᠦᠭᠡᠢ᠃