ᠶᠣᠪ ᠭᠤᠴᠢᠨ ᠨᠠᠢ᠌ᠮᠠ
ᠶᠣᠬᠣᠸᠠ ᠶᠢᠨ ᠶᠠᠷᠢᠶᠠ
1 ᠲᠡᠭᠡᠲᠡᠯᠡ ᠶᠣᠬᠣᠸᠠ ᠰᠢᠭᠤᠷᠭᠠᠨ ᠳᠤᠮᠳᠠ ᠠᠴᠠ ᠶᠣᠪ ᠲᠤ ᠬᠠᠷᠢᠭᠤᠯᠤᠨ᠄
2 《ᠮᠡᠳᠡᠯᠭᠡ ᠦᠭᠡᠢ ᠦᠭᠡᠰ ᠢᠶᠡᠷ ᠢᠶᠠᠨ ᠵᠣᠷᠢᠯᠭᠠ ᠶᠢ ᠮᠢᠨᠢ ᠪᠦᠳᠡᠭᠢᠷᠡᠭᠦᠯᠵᠦ ᠪᠠᠢᠭᠠ ᠡᠨᠡ ᠬᠡᠨ ᠪᠤᠢ︖
3 ᠴᠢ ᠡᠷᠡ ᠬᠥᠮᠦᠨ ᠰᠢᠭ ᠪᠦᠰᠡ ᠪᠡᠨ ᠴᠢᠩ᠋ᠭᠠᠯᠠᠵᠤ ᠠᠰᠠᠭᠤᠯᠲᠠ ᠳᠤ ᠮᠢᠨᠢ ᠬᠠᠷᠢᠭᠤ ᠥᠭ᠂
4 ᠳᠡᠯᠡᠬᠡᠢ ᠶᠢᠨ ᠰᠠᠭᠤᠷᠢ ᠶᠢ ᠲᠠᠯᠪᠢᠬᠤ ᠳᠤ ᠮᠢᠨᠢ ᠴᠢ ᠬᠠᠮᠢᠭᠠ ᠪᠠᠢᠪᠠ︖ ᠮᠡᠳᠡᠳᠡᠭ ᠶᠤᠮ ᠪᠣᠯ ᠨᠠᠳᠠ ᠳᠤ ᠬᠡᠯᠡᠭᠡᠷᠡᠢ᠂
5 ᠬᠡᠮᠵᠢᠶᠡ ᠬᠢᠵᠠᠭᠠᠷ ᠢ ᠨᠢ ᠬᠡᠨ ᠲᠣᠭᠲᠠᠭᠠᠪᠠ︖ ᠴᠢ ᠯᠠᠪ ᠮᠡᠳᠡᠨᠡ︕ ᠬᠡᠨ ᠲᠡᠭᠦᠨ ᠦ ᠳᠡᠭᠡᠷᠡ ᠵᠢᠷᠤᠭᠠᠰᠤ ᠲᠠᠲᠠᠪᠠ︖
6 ᠰᠠᠭᠤᠷᠢ ᠨᠤᠭᠤᠳ ᠨᠢ ᠶᠠᠭᠤᠨ ᠳᠡᠭᠡᠷᠡ ᠲᠣᠭᠲᠠᠪᠠ︖ ᠲᠤᠯᠭᠠᠭᠤᠷᠢ ᠴᠢᠯᠠᠭᠤ ᠶᠢ ᠨᠢ ᠬᠡᠨ ᠲᠠᠯᠪᠢᠪᠠ︖
7 ᠲᠡᠷᠡ ᠦᠶᠡ ᠳᠦ ᠦᠷ ᠦᠨ ᠣᠳᠣᠳ ᠳᠠᠭᠤᠯᠠᠵᠠᠭᠠᠵᠤ ᠪᠤᠷᠬᠠᠨ ᠤ ᠬᠥᠪᠡᠭᠦᠳ ᠪᠦᠭᠦᠳᠡ ᠪᠠᠶᠠᠷᠯᠠᠯᠳᠤᠨ ᠤᠤᠬᠠᠢᠯᠠᠭᠰᠠᠨ᠃
8 ᠳᠠᠯᠠᠢ ᠬᠡᠪᠡᠯᠢ ᠡᠴᠡ ᠪᠡᠨ ᠣᠷᠭᠢᠯᠣᠨ ᠭᠠᠷᠬᠤ ᠳᠤ ᠬᠡᠨ ᠲᠡᠭᠦᠨ ᠢ ᠬᠠᠭᠠᠯᠭᠠ ᠪᠠᠷ ᠬᠠᠭᠠᠪᠠ︖
9 ᠡᠭᠦᠯᠡ ᠶᠢ ᠲᠡᠭᠦᠨ ᠳᠦ ᠨᠥᠮᠥᠷᠭᠡᠵᠦ ᠲᠦᠨᠡᠷ ᠬᠠᠷᠠᠩ᠋ᠭᠤᠢ ᠪᠠᠷ ᠥᠯᠥᠭᠡᠶᠢᠳᠡᠨ
10 ᠲᠡᠭᠦᠨ ᠳᠦ ᠬᠢᠯᠢ ᠲᠣᠭᠲᠠᠭᠠᠨ ᠬᠠᠭᠠᠯᠭᠠ ᠲᠦᠭᠵᠢᠶᠡ ᠶᠢ ᠨᠢ ᠲᠠᠯᠪᠢᠵᠤ
11 〈ᠴᠢ ᠡ᠊ᠨᠳᠡ ᠬᠦᠷᠲᠡᠯᠡ ᠢᠷᠡ ᠡ᠊ᠨᠳᠡ ᠡᠴᠡ ᠴᠢᠨᠠᠭᠰᠢᠯᠠᠵᠤ ᠪᠣᠯᠬᠤ ᠦᠭᠡᠢ ᠣᠮᠣᠭᠯᠠᠩ ᠳᠠᠪᠠᠯᠭᠠᠨ ᠨᠤᠭᠤᠳ ᠴᠢᠨᠢ ᠡ᠊ᠨᠳᠡ ᠵᠣᠭᠰᠣᠭ〉 ᠭᠡᠵᠦ ᠪᠢ ᠠᠢᠯᠠᠳᠤᠭᠰᠠᠨ ᠪᠢᠯᠡ᠃
12 ᠡᠳᠦᠷ ᠤᠳ ᠴᠢᠨᠢ ᠡᠬᠢᠯᠡᠭᠰᠡᠨ ᠡᠴᠡ ᠬᠣᠢᠰᠢ ᠥᠷᠯᠥᠭᠡ ᠳᠦ ᠴᠢ ᠲᠤᠰᠢᠶᠠᠨ ᠦᠷ ᠬᠠᠮᠢᠭᠠ ᠴᠠᠢᠬᠤ ᠶᠢ ᠮᠡᠳᠡᠭᠦᠯᠵᠦ ᠪᠠᠢᠪᠠ ᠤᠤ︖
13 ᠢᠩᠭᠢᠭᠡᠳ ᠭᠡᠷᠡᠯ ᠨᠢ ᠭᠠᠵᠠᠷ ᠤᠨ ᠬᠢᠵᠠᠭᠠᠷ ᠠᠴᠠ ᠵᠢᠭᠤᠷᠠᠵᠤ ᠭᠡᠮᠲᠦ ᠬᠥᠮᠦᠰ ᠢ ᠲᠡᠨᠳᠡ ᠡᠴᠡ ᠰᠡᠭᠰᠦᠷᠴᠦ ᠭᠠᠷᠭᠠᠵᠤ ᠪᠠᠢᠭᠰᠠᠨ ᠤᠤ︖
14 ᠦᠷ ᠴᠠᠢᠬᠤ ᠳᠤ ᠭᠠᠵᠠᠷ ᠨᠢ ᠲᠠᠮᠠᠭᠠ ᠳᠠᠷᠤᠭᠤᠯᠤᠭᠰᠠᠨ ᠰᠢᠪᠠᠷ ᠰᠢᠭ᠋ ᠬᠡᠯᠪᠡᠷᠢᠵᠢᠵᠦ ᠬᠤᠪᠴᠠᠰᠤ ᠮᠡᠲᠦ ᠥᠩᠭᠡ ᠲᠠᠢ ᠪᠣᠯᠣᠨᠠ
15 ᠲᠡᠷᠡ ᠭᠡᠷᠡᠯ ᠢ ᠴᠢ ᠪᠤᠷᠤᠭᠤᠲᠠᠳ ᠠᠴᠠ ᠬᠠᠭᠠᠵᠤ ᠳᠠᠯᠠᠢᠭᠰᠠᠨ ᠭᠠᠷ ᠢ ᠨᠢ ᠨᠢᠴᠠᠯᠵᠤ ᠪᠠᠢᠭᠰᠠᠨ ᠤᠤ︖
16 ᠴᠢ ᠳᠠᠯᠠᠢ ᠶᠢᠨ ᠡᠬᠢ ᠤᠨᠳᠤᠷᠤᠭᠠ ᠳᠤ ᠣᠴᠢᠵᠤ ᠪᠠᠢᠭᠰᠠᠨ ᠤᠤ︖ ᠭᠦᠨ ᠳᠠᠯᠠᠢ ᠶᠢᠨ ᠬᠣᠩ᠋ᠬᠣᠷ ᠤᠳ ᠢᠶᠠᠷ ᠠᠯᠬᠤᠵᠤ ᠪᠠᠢᠭᠰᠠᠨ ᠤᠤ︖
17 ᠦᠬᠦᠯ ᠦᠨ ᠡᠭᠦᠳᠡ ᠨᠦᠭᠦᠳ ᠴᠢᠮᠠ ᠳᠤ ᠢᠯᠡᠷᠡᠵᠦ ᠪᠠᠢᠭᠰᠠᠨ ᠤᠤ︖ ᠦᠬᠦᠭᠰᠡᠳ ᠦᠨ ᠣᠷᠣᠨ ᠤ ᠰᠡᠭᠦᠳᠡᠷᠲᠦ ᠡᠭᠦᠳᠡ ᠶᠢ ᠴᠢ ᠬᠠᠷᠠᠵᠤ ᠪᠠᠢᠪᠠ ᠤᠤ︖
18 ᠶᠢᠷᠲᠢᠨᠴᠦ ᠬᠡᠴᠢᠨᠡᠨ ᠠᠭᠤᠳᠠᠮ ᠭᠡᠳᠡᠭ ᠢ ᠴᠢ ᠮᠡᠳᠡᠬᠦ ᠤᠤ︖ ᠡᠨᠡ ᠪᠦᠭᠦᠳᠡ ᠶᠢ ᠮᠡᠳᠡᠳᠡᠭ ᠪᠣᠯ ᠬᠡᠯᠡᠭᠡᠷᠡᠢ᠃
19 ᠭᠡᠷᠡᠯ ᠦᠨ ᠣᠷᠣᠰᠢᠬᠤ ᠭᠠᠵᠠᠷ ᠲᠤ ᠬᠦᠷᠬᠦ ᠵᠠᠮ ᠬᠠᠮᠢᠭᠠ ᠪᠠᠢᠨᠠ︖ ᠬᠠᠷᠠᠩ᠋ᠭᠤᠢ ᠶᠢᠨ ᠣᠷᠣᠨ ᠬᠠᠮᠢᠭᠠ ᠪᠠᠢᠨᠠ︖
20 ᠲᠡᠳᠡᠭᠡᠷ ᠢ ᠴᠢ ᠣᠷᠣᠨ ᠭᠠᠵᠠᠷ ᠲᠤᠨᠢ ᠠᠪᠠᠴᠢᠵᠤ ᠴᠢᠳᠠᠬᠤ ᠤᠤ︖ ᠲᠡᠳᠡᠨ ᠦ ᠭᠡᠷ ᠲᠦ ᠬᠦᠷᠬᠦ ᠵᠠᠮ ᠢ ᠴᠢ ᠮᠡᠳᠡᠬᠦ ᠤᠤ︖
21 ᠴᠢ ᠬᠡᠳᠦᠢᠨᠡᠢ ᠲᠥᠷᠥᠭᠡᠳ ᠪᠠᠢᠭᠰᠠᠨ ᠶᠤᠮ ᠤᠤ︖ ᠡᠳᠦᠷ ᠤᠳ ᠤᠨ ᠴᠢᠨᠢ ᠲᠣᠭᠠ ᠴᠥᠭᠡᠨ ᠦᠭᠡᠢ ᠤᠴᠢᠷ ᠠᠴᠠ ᠴᠢ ᠮᠡᠳᠡᠬᠦ ᠪᠠᠢᠬᠠ᠂
22 ᠴᠢ ᠴᠠᠰᠤᠨ ᠤ ᠬᠥᠮᠥᠷᠭᠡ ᠳᠦ ᠣᠷᠣᠵᠤ ᠦᠵᠡᠭᠰᠡᠨ ᠤᠤ︖ ᠮᠥᠨᠳᠥᠷ ᠦᠨ ᠬᠥᠮᠥᠷᠭᠡ ᠶᠢ ᠬᠠᠷᠠᠭᠰᠠᠨ ᠤᠤ︖
23 ᠲᠡᠳᠡᠭᠡᠷ ᠢ ᠪᠢ ᠭᠠᠮᠰᠢᠭ ᠤᠨ ᠴᠠᠭ ᠤᠨ ᠲᠥᠯᠥᠭᠡ ᠳᠠᠢᠨ ᠲᠤᠯᠤᠯᠳᠤᠭᠠᠨ ᠤ ᠡᠳᠦᠷ ᠦᠨ ᠲᠥᠯᠥᠭᠡ ᠨᠥᠭᠡᠴᠡᠯᠡᠭᠰᠡᠨ ᠪᠢᠯᠡ᠂
24 ᠶᠠᠮᠠᠷ ᠵᠠᠮ ᠢᠶᠠᠷ ᠭᠡᠷᠡᠯ ᠢ ᠲᠦᠭᠡᠭᠡᠵᠦ ᠳᠣᠷᠣᠨᠠ ᠶᠢᠨ ᠰᠠᠯᠬᠢ ᠶᠢ ᠭᠠᠵᠠᠷ ᠤᠨ ᠬᠠᠮᠢᠭᠠᠭᠤᠷ ᠲᠠᠷᠬᠠᠭᠠᠳᠠᠭ ᠪᠤᠢ︖
25 ᠠᠭᠠᠳᠠᠷ ᠪᠣᠷᠣᠭᠠᠨ ᠤ ᠮᠥᠷ ᠢ ᠠᠶᠤᠩ᠋ᠭᠠ ᠴᠠᠬᠢᠯᠭᠠᠨ ᠤ ᠵᠠᠮ ᠢ ᠬᠡᠨ ᠨᠡᠭᠡᠭᠡᠳᠡᠭ ᠪᠤᠢ︖
26 ᠬᠥᠮᠦᠨ ᠦᠭᠡᠢ ᠭᠠᠵᠠᠷ ᠲᠤ ᠬᠡᠨ ᠴᠤ ᠦᠭᠡᠢ ᠴᠥᠯ ᠳᠤ ᠬᠡᠨ ᠪᠣᠷᠣᠭᠠᠨ ᠣᠷᠣᠭᠤᠯᠤᠨ
27 ᠵᠡᠯᠢᠭᠦᠳ ᠴᠥᠯ ᠭᠠᠵᠠᠷ ᠢ ᠨᠣᠷᠭᠠᠵᠤ ᠵᠥᠭᠡᠯᠡᠨ ᠡᠪᠡᠰᠦ ᠶᠢ ᠤᠷᠭᠤᠭᠤᠯᠳᠠᠭ ᠪᠤᠢ︖
28 ᠪᠣᠷᠣᠭᠠᠨ ᠳᠤ ᠡᠴᠢᠭᠡ ᠪᠤᠢ ᠤᠤ︖ ᠬᠡᠨ ᠰᠢᠭᠦᠳᠡᠷᠢ ᠶᠢᠨ ᠳᠤᠰᠤᠯ ᠤᠳ ᠢ ᠲᠥᠷᠥᠭᠦᠯᠪᠡ︖
29 ᠬᠡᠨ ᠦ ᠬᠡᠪᠡᠯᠢ ᠡᠴᠡ ᠮᠥᠰᠥ ᠭᠠᠷᠤᠭᠰᠠᠨ ᠪᠤᠢ︖ ᠬᠡᠨ ᠲᠩᠷᠢ ᠡᠴᠡ ᠬᠢᠷᠠᠭᠤ ᠲᠥᠷᠥᠭᠦᠯᠦᠭᠡᠳ
30 ᠤᠰᠤ ᠴᠢᠯᠠᠭᠤ ᠰᠢᠭ᠋ ᠬᠠᠲᠠᠭᠤᠷᠠᠵᠤ ᠭᠦᠨ ᠤᠰᠤᠨ ᠤ ᠭᠠᠳᠠᠷᠭᠤ ᠬᠥᠯᠳᠡᠳᠡᠭ ᠪᠣᠯᠪᠠ︖
31 ᠴᠢ ᠮᠡᠴᠢᠳ ᠵᠢᠷᠭᠤᠭᠠ ᠶᠢ ᠤᠶᠠᠵᠤ ᠮᠠᠷᠠᠯ ᠭᠤᠷᠪᠠ ᠶᠢᠨ ᠬᠣᠯᠪᠣᠭᠠ ᠶᠢ ᠰᠠᠯᠭᠠᠵᠤ ᠴᠢᠳᠠᠬᠤ ᠤᠤ︖
32 ᠴᠢ ᠣᠳᠣᠳ ᠤᠨ ᠪᠦᠬᠦ ᠣᠷᠣᠨ ᠢ ᠤᠯᠠᠷᠢᠯ ᠳᠤᠨᠢ ᠠᠪᠴᠢᠷᠠᠵᠤ ᠴᠢᠳᠠᠬᠤ ᠤᠤ︖ ᠳᠣᠬᠢᠭᠤᠷ ᠳᠣᠯᠣᠭᠠ ᠶᠢ ᠳᠠᠭᠠᠭᠤᠯᠢ ᠨᠤᠭᠤᠳ ᠲᠠᠢ ᠨᠢ ᠬᠠᠮᠲᠤ ᠵᠠᠯᠠᠵᠤ ᠴᠢᠳᠠᠬᠤ ᠤᠤ︖
33 ᠴᠢ ᠲᠩᠷᠢ ᠶᠢᠨ ᠵᠢᠮᠡ ᠶᠣᠰᠣ ᠶᠢ ᠮᠡᠳᠡᠬᠦ ᠤᠤ︖ ᠲᠡᠭᠦᠨ ᠦ ᠨᠣᠶᠠᠷᠬᠠᠯ ᠢ ᠭᠠᠵᠠᠷ ᠳᠡᠭᠡᠷᠡ ᠲᠣᠭᠲᠠᠭᠠᠵᠤ ᠴᠢᠳᠠᠬᠤ ᠤᠤ︖
34 ᠡᠭᠦᠯᠡᠨ ᠳᠦ ᠴᠢ ᠳᠠᠭᠤ ᠪᠠᠨ ᠡᠷᠭᠦᠵᠦ ᠥᠪᠡᠷ ᠢ ᠪᠠᠨ ᠶᠡᠬᠡ ᠤᠰᠤ ᠪᠠᠷ ᠪᠦᠷᠬᠦᠭᠦᠯᠵᠦ ᠴᠢᠳᠠᠬᠤ ᠤᠤ︖
35 ᠭᠢᠯᠪᠢᠭᠡᠨ ᠢ ᠴᠢ ᠢᠯᠡᠭᠡᠵᠦ ᠴᠢᠳᠠᠬᠤ ᠤᠤ︖ ᠲᠡᠷᠡ ᠴᠢᠮᠠ ᠳᠤ 〈ᠪᠢ ᠪᠡᠯᠡᠨ ᠪᠠᠢᠨᠠ〉 ᠭᠡᠳ ᠭᠠᠷᠴᠤ ᠶᠠᠪᠤᠵᠤ ᠪᠠᠢᠭᠰᠠᠨ ᠤᠤ︖
36 ᠰᠠᠨᠠᠭᠠᠨ ᠳᠤ ᠬᠡᠨ ᠮᠡᠷᠭᠡᠨ ᠤᠬᠠᠭᠠᠨ ᠢ ᠣᠷᠣᠭᠤᠯᠳᠠᠭ ᠪᠤᠢ︖ ᠰᠡᠳᠬᠢᠯ ᠳᠤ ᠬᠡᠨ ᠤᠬᠠᠭᠠᠷᠠᠯ ᠢ ᠣᠯᠭᠣᠳᠠᠭ ᠪᠤᠢ︖
37 ᠬᠡᠨ ᠮᠡᠷᠭᠡᠨ ᠤᠬᠠᠭᠠᠨ ᠢᠶᠠᠷ ᠡᠭᠦᠯᠡᠰ ᠢ ᠲᠣᠭᠠᠯᠠᠵᠤ ᠴᠢᠳᠠᠬᠤ ᠪᠤᠢ︖ ᠬᠡᠨ ᠲᠩᠷᠢ ᠶᠢᠨ ᠤᠰᠤᠨ ᠤ ᠲᠤᠯᠤᠮ ᠤᠳ ᠢ ᠲᠣᠩ᠋ᠭᠣᠢᠯᠭᠠᠵᠤ᠂
38 ᠰᠢᠷᠣᠢ ᠲᠣᠭᠣᠰᠣ ᠶᠢ ᠰᠢᠪᠠᠷ ᠪᠣᠯᠭᠠᠨ ᠭᠠᠵᠠᠷ ᠤᠨ ᠠᠩ ᠢ ᠪᠥᠭᠯᠡᠵᠦ ᠴᠢᠳᠠᠬᠤ ᠪᠤᠢ︖
39 ᠴᠢ ᠠᠷᠰᠯᠠᠨ ᠤ ᠲᠥᠯᠥᠭᠡ ᠠᠩ ᠠᠩᠨᠠᠵᠤ ᠵᠠᠯᠠᠭᠤ ᠠᠷᠰᠯᠠᠨ ᠤ ᠥᠯ ᠢ ᠳᠠᠷᠤᠵᠤ ᠴᠢᠳᠠᠬᠤ ᠤᠤ︖
40 ᠲᠡᠳᠡ ᠨᠦᠬᠡᠨ ᠳᠡᠭᠡᠨ ᠨᠢᠭᠤᠭᠳᠠᠵᠤ ᠣᠢ ᠳᠤ ᠣᠲᠣᠵᠤ ᠪᠠᠢᠬᠤ ᠳᠤᠨᠢ ᠲᠡᠭᠡᠵᠦ ᠴᠢᠳᠠᠬᠤ ᠤᠤ︖
41 ᠬᠡᠷᠢᠶᠡᠨ ᠦ ᠵᠤᠯᠵᠠᠭᠠ ᠪᠤᠷᠬᠠᠨ ᠤᠷᠤᠭᠤ ᠬᠠᠰᠬᠢᠷᠤᠨ ᠢᠳᠡᠰᠢ ᠦᠭᠡᠢ ᠲᠡᠨᠦᠵᠦ ᠪᠠᠢᠬᠤ ᠳᠤ ᠬᠡᠨ ᠬᠦᠨᠡᠰᠦ ᠬᠣᠭᠣᠯᠠ ᠶᠢ ᠨᠢ ᠬᠠᠩ᠋ᠭᠠᠨᠠ ᠪᠤᠢ︖