ᠶᠣᠪ ᠭᠤᠴᠢᠨ ᠬᠣᠶᠠᠷ
ᠡᠯᠢᠾᠦ᠋ ᠶᠢᠨ ᠠᠭᠤᠷ ᠲᠠᠢ ᠶᠠᠷᠢᠶᠠ
1 ᠶᠣᠪ ᠥᠪᠡᠷ ᠢ ᠪᠠᠨ ᠵᠥᠪᠲᠦ ᠭᠡᠵᠦ ᠦᠵᠡᠳᠡᠭ ᠲᠤᠯᠠ ᠨᠥᠭᠥᠭᠡ ᠭᠤᠷᠪᠠᠨ ᠬᠥᠮᠦᠨ ᠲᠡᠭᠦᠨ ᠳᠦ ᠬᠠᠷᠢᠭᠤ ᠬᠡᠯᠡᠬᠦ ᠪᠡᠨ ᠪᠣᠯᠢᠵᠠᠢ᠃ 2 ᠷᠠᠮ ᠤᠨ ᠠᠢᠮᠠᠭ ᠤᠨ ᠪᠦᠽ ᠬᠥᠮᠦᠨ ᠪᠠᠷᠠᠾᠧᠯ ᠤᠨ ᠬᠦᠦ ᠡᠯᠢᠾᠦ᠋ ᠶᠣᠪ ᠲᠤ ᠠᠭᠤᠷᠯᠠᠪᠠ᠃ ᠤᠴᠢᠷ ᠨᠢ ᠶᠣᠪ ᠪᠤᠷᠬᠠᠨ ᠢ ᠵᠥᠪ ᠭᠡᠬᠦ ᠡᠴᠡ ᠢᠯᠡᠭᠦᠦ ᠪᠡᠷ ᠥᠪᠡᠷ ᠢ ᠪᠠᠨ ᠵᠥᠪ ᠭᠡᠵᠦ ᠪᠠᠢᠯᠠ᠃ 3 ᠡᠯᠢᠾᠦ᠋ ᠶᠣᠪ ᠤᠨ ᠭᠤᠷᠪᠠᠨ ᠨᠠᠢᠵᠢ ᠳᠤ ᠴᠤ ᠠᠭᠤᠷᠯᠠᠪᠠ᠃ ᠤᠴᠢᠷ ᠨᠢ ᠲᠡᠳᠡ ᠨᠢᠴᠤᠭᠠᠬᠤ ᠦᠭᠡ ᠣᠯᠣᠯ ᠦᠭᠡᠢ ᠪᠠᠷ ᠶᠣᠪ ᠢ ᠪᠤᠷᠤᠭᠤᠳᠬᠠᠵᠤ ᠪᠠᠢᠯᠠ᠃ 4 ᠲᠡᠳᠡ ᠥᠪᠡᠷ ᠡᠴᠡ ᠨᠢ ᠨᠠᠰᠤ ᠪᠠᠷ ᠠᠬᠠ ᠪᠣᠯᠬᠣᠷ ᠡᠯᠢᠾᠦ᠋ ᠶᠣᠪ ᠲᠠᠢ ᠶᠠᠷᠢᠯᠴᠠᠬᠤ ᠪᠠᠷ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠢᠶᠠᠨ 5 ᠨᠥᠭᠥᠭᠡ ᠭᠤᠷᠪᠠᠨ ᠬᠥᠮᠦᠨ ᠦ ᠠᠮᠠᠨ ᠳᠤ ᠬᠠᠷᠢᠭᠤ ᠪᠠᠢᠬᠤ ᠦᠭᠡᠢ ᠶᠢ ᠬᠠᠷᠠᠭᠠᠳ ᠠᠭᠤᠷ ᠨᠢ ᠰᠢᠲᠠᠵᠠᠢ᠃
6 ᠪᠦᠽ ᠬᠥᠮᠦᠨ ᠪᠠᠷᠠᠾᠧᠯ ᠤᠨ ᠬᠦᠦ ᠡᠯᠢᠾᠦ᠋ ᠥᠭᠦᠯᠡᠷᠦᠨ᠄ 《ᠪᠢ ᠵᠠᠯᠠᠭᠤ᠂ ᠲᠠ ᠨᠠᠷ ᠠᠬᠠᠮᠠᠳ ᠲᠡᠢᠮᠦ ᠡᠴᠡ ᠪᠢ ᠡᠷᠡᠭᠡᠯᠵᠡᠵᠦ᠂ ᠪᠣᠳᠣᠯ ᠢᠶᠠᠨ ᠲᠠ ᠨᠠᠷ ᠲᠤ ᠬᠡᠯᠡᠬᠦ ᠡᠴᠡ ᠵᠢᠷᠦᠬᠡᠰᠢᠶᠡᠵᠦ ᠪᠠᠢᠭᠰᠠᠨ᠂
7 ᠤᠭ ᠨᠢ ᠪᠢ ᠡᠳᠦᠷ ᠤᠳ ᠦᠭᠡ ᠬᠡᠯᠡᠨᠡ ᠣᠨ ᠵᠢᠯ ᠤᠳ ᠮᠡᠷᠭᠡᠨ ᠤᠬᠠᠭᠠᠨ ᠢ ᠮᠡᠳᠡᠭᠦᠯᠦᠨᠡ ᠭᠡᠵᠦ ᠪᠣᠳᠣᠭᠰᠠᠨ᠂
8 ᠬᠠᠷᠢᠨ ᠤᠬᠠᠭᠠᠷᠠᠯ ᠢ ᠥᠭᠭᠥᠭᠴᠢ ᠨᠢ ᠬᠥᠮᠦᠨ ᠦ ᠳᠣᠲᠣᠷᠠᠬᠢ ᠰᠦᠨᠡᠰᠦ ᠲᠡᠭᠦᠰ ᠬᠦᠴᠦᠲᠡᠨ ᠦ ᠠᠮᠢᠰᠬᠤᠯ ᠪᠠᠢᠨᠠ᠂
9 ᠥᠨᠳᠥᠷ ᠨᠠᠰᠤ ᠲᠠᠢ ᠭᠡᠳ ᠮᠡᠷᠭᠡᠨ ᠪᠠᠢᠳᠠᠭ ᠪᠢᠰᠢ ᠥᠲᠡᠯᠦᠭᠡ ᠪᠣᠯᠣᠭᠰᠠᠨ ᠭᠡᠳ ᠵᠥᠪ ᠢ ᠮᠡᠳᠡᠳᠡᠭ ᠪᠢᠰᠢ ᠶᠤᠮ᠂
10 ᠡᠢᠮᠦ ᠡᠴᠡ ᠪᠢ ᠦᠭᠡ ᠶᠠᠷᠢᠶᠠ ᠮᠢᠨᠦᠬᠢ ᠶᠢ ᠰᠣᠨᠣᠰ᠂ ᠪᠢ ᠴᠤ ᠰᠠᠨᠠᠯ ᠢᠶᠠᠨ ᠬᠡᠯᠡᠶᠡ᠃
11 ᠬᠠᠷᠠ᠂ ᠲᠠ ᠨᠠᠷ ᠶᠠᠷᠢᠬᠤ ᠳᠤ ᠪᠢ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠤᠴᠢᠷᠯᠠᠯ ᠢ ᠲᠠᠨᠢ ᠰᠣᠨᠣᠰᠴᠤ ᠪᠠᠢᠭᠰᠠᠨ ᠲᠠ ᠨᠠᠷ ᠦᠭᠡ ᠬᠠᠢᠵᠤ ᠪᠠᠢᠬᠤ ᠳᠤ
12 ᠪᠢ ᠠᠩ᠋ᠬᠠᠷᠤᠯ ᠲᠠᠯᠪᠢᠵᠤ ᠪᠠᠢᠭᠰᠠᠨ᠂ ᠭᠡᠪᠡᠴᠦ ᠶᠣᠪ ᠢ ᠨᠢᠴᠤᠭᠠᠬᠤ ᠦᠭᠡᠨ ᠳᠦᠨᠢ ᠬᠠᠷᠢᠭᠤᠯᠵᠤ ᠴᠢᠳᠠᠬᠤ ᠬᠥᠮᠦᠨ ᠲᠠ ᠨᠠᠷ ᠤᠨ ᠳᠤᠮᠳᠠ ᠠᠯᠠᠭᠠ ᠪᠠᠢᠨᠠ᠂
13 ᠲᠠ ᠨᠠᠷ᠄ 〈ᠮᠡᠷᠭᠡᠨ ᠤᠬᠠᠭᠠᠨ ᠢ ᠣᠯᠣᠯᠠ ᠬᠥᠮᠦᠨ ᠪᠢᠰᠢ᠂ ᠪᠤᠷᠬᠠᠨ ᠲᠡᠭᠦᠨ ᠢ ᠨᠢᠴᠤᠭᠠᠭ〉 ᠭᠡᠵᠦ ᠪᠦᠦ ᠬᠡᠯᠡ᠂
14 ᠶᠣᠪ ᠦᠭᠡ ᠪᠡᠨ ᠨᠠᠳᠠ ᠳᠤ ᠴᠢᠭᠯᠡᠭᠦᠯᠦᠭᠰᠡᠨ ᠪᠢᠰᠢ ᠤᠴᠢᠷ ᠠᠴᠠ ᠪᠢ ᠲᠡᠭᠦᠨ ᠳᠦ ᠲᠠ ᠨᠠᠷ ᠤᠨ ᠶᠠᠷᠢᠶᠠ ᠪᠠᠷ ᠬᠠᠷᠢᠭᠤᠯᠬᠤ ᠦᠭᠡᠢ᠃
15 ᠲᠡᠳᠡ ᠪᠠᠯᠠᠮᠠᠭᠳᠠᠵᠤ᠂ ᠬᠠᠷᠢᠭᠤᠯᠬᠤ ᠪᠠᠨ ᠪᠣᠯᠢᠪᠠ ᠬᠡᠯᠡᠬᠦ ᠦᠭᠡᠰ ᠨᠢ ᠪᠠᠷᠠᠭᠳᠠᠵᠠᠢ᠂
16 ᠲᠡᠳᠡ ᠶᠠᠷᠢᠬᠤ ᠦᠭᠡᠢ᠂ ᠲᠡᠨᠳᠡ ᠪᠡᠨ ᠵᠣᠭᠰᠣᠭᠠᠳ ᠬᠠᠷᠢᠭᠤᠯᠬᠤ ᠪᠠᠨ ᠪᠣᠯᠢᠵᠠᠢ ᠪᠢ ᠬᠦᠯᠢᠶᠡᠬᠦ ᠶᠣᠰᠣᠲᠠᠢ ᠭᠡᠵᠢ ᠤᠤ︖
17 ᠪᠠᠢᠵᠠ᠂ ᠪᠢ ᠪᠠᠰᠠ ᠦᠭᠡ ᠪᠡᠨ ᠬᠡᠯᠡᠶᠡ ᠪᠢ ᠴᠤ ᠰᠠᠨᠠᠭᠠ ᠪᠠᠨ ᠮᠡᠳᠡᠭᠦᠯᠦᠶᠡ᠂
18 ᠬᠡᠯᠡᠬᠦ ᠦᠭᠡ ᠪᠡᠷ ᠪᠢ ᠳᠦᠭᠦᠷᠡᠩ ᠪᠠᠢᠨᠠ ᠬᠡᠪᠡᠯᠢ ᠳᠣᠲᠣᠷᠠᠬᠢ ᠰᠦᠨᠡᠰᠦ ᠮᠢᠨᠢ ᠨᠠᠮᠠᠶᠢ ᠠᠯᠪᠠᠳᠠᠵᠤ ᠪᠠᠢᠨᠠ
19 ᠬᠠᠷᠠ᠂ ᠵᠢᠷᠦᠬᠡ ᠮᠢᠨᠢ ᠲᠠᠭᠯᠠᠭᠠ ᠲᠠᠢ ᠳᠠᠷᠠᠰᠤ ᠢᠵᠠᠷᠠᠬᠤ ᠭᠡᠵᠦ ᠪᠤᠢ ᠰᠢᠨᠡ ᠲᠤᠯᠤᠮ ᠮᠡᠲᠦ ᠪᠠᠢᠨᠠ᠂
20 ᠠᠮᠠᠷᠠᠯ ᠣᠯᠬᠤ ᠶᠢᠨ ᠲᠤᠯᠠᠳᠠ ᠪᠢ ᠬᠡᠯᠡᠬᠦ ᠶᠣᠰᠣᠲᠠᠢ ᠠᠮᠠ ᠪᠠᠨ ᠨᠡᠭᠡᠭᠡᠨ ᠬᠠᠷᠢᠭᠤᠯᠬᠤ ᠶᠣᠰᠣᠲᠠᠢ᠂
21 ᠬᠠᠷᠢᠨ ᠪᠢ ᠬᠡᠨ ᠦ ᠴᠤ ᠲᠠᠯᠠ ᠳᠤ ᠣᠷᠣᠬᠤ ᠦᠭᠡᠢ ᠬᠥᠮᠦᠨ ᠳᠦ ᠴᠤ ᠲᠠᠯᠠ ᠵᠠᠰᠠᠬᠤ ᠦᠭᠡᠢ᠂
22 ᠲᠠᠯᠠ ᠵᠠᠰᠠᠬᠤ ᠶᠤᠮ ᠪᠣᠯ᠂ ᠪᠦᠲᠦᠭᠡᠭᠴᠢ ᠮᠢᠨᠢ ᠮᠥᠳᠬᠡᠨ ᠨᠠᠮᠠᠶᠢ ᠠᠪᠠᠴᠢᠬᠤ ᠪᠤᠢ᠃