ᠨᠢᠭᠡᠳᠦᠭᠡᠷ ᠶᠣᠬᠠᠨ ᠨᠢᠭᠡ
ᠠᠮᠢ ᠶᠢᠨ ᠦᠭᠡ
1 ᠪᠢᠳᠡ ᠡᠬᠢᠨ ᠡᠴᠡ ᠪᠡᠨ ᠪᠠᠢᠭᠰᠠᠨ ᠠᠮᠢ ᠶᠢᠨ ᠦᠭᠡ ᠶᠢᠨ ᠲᠤᠬᠠᠢ ᠰᠣᠨᠣᠰᠴᠤ᠂ ᠨᠢᠳᠦ ᠪᠡᠷ ᠢᠶᠠᠨ ᠦᠵᠡᠵᠦ᠂ ᠠᠵᠢᠭᠯᠠᠵᠤ᠂ ᠭᠠᠷ ᠢᠶᠠᠷ ᠢᠶᠠᠨ ᠲᠡᠮᠲᠡᠷᠢᠭᠰᠡᠨ ᠢᠶᠡᠨ ᠲᠠ ᠨᠠᠷ ᠲᠤ ᠳᠠᠮᠵᠢᠭᠤᠯᠤᠶᠠ᠃ 2 ᠲᠡᠷᠡ ᠬᠦ ᠠᠮᠢ ᠢᠯᠡᠷᠡᠭᠰᠡᠨ᠃ ᠪᠢᠳᠡ ᠲᠡᠭᠦᠨ ᠢ ᠦᠵᠡᠭᠰᠡᠨ ᠪᠣᠯᠬᠣᠷ ᠲᠡᠷᠡ ᠮᠥᠩᠬᠡ ᠠᠮᠢ ᠶᠢ ᠲᠠ ᠨᠠᠷ ᠲᠤ ᠭᠡᠷᠡᠴᠢᠯᠡᠨ ᠳᠠᠮᠵᠢᠭᠤᠯᠵᠤ ᠪᠠᠢᠨᠠ᠃ ᠲᠡᠷᠡ ᠠᠮᠢ ᠡᠴᠢᠭᠡ ᠲᠠᠢ ᠬᠠᠮᠲᠤ ᠪᠠᠢᠭᠰᠠᠨ ᠪᠥᠭᠡᠳ ᠪᠢᠳᠡᠨ ᠳᠦ ᠢᠯᠡᠷᠬᠡᠶᠢᠯᠡᠭᠳᠡᠭᠰᠡᠨ ᠪᠢᠯᠡ᠃ 3 ᠪᠢᠳᠡ ᠦᠵᠡᠵᠦ ᠰᠣᠨᠣᠰᠣᠭᠰᠠᠨ ᠢᠶᠠᠨ ᠲᠠ ᠨᠠᠷ ᠲᠤ ᠳᠠᠮᠵᠢᠭᠤᠯᠵᠤ ᠪᠠᠢᠨᠠ᠃ ᠢᠩᠭᠢᠭᠰᠡᠨ ᠢᠶᠡᠷ ᠲᠠ ᠨᠠᠷ ᠪᠠᠰᠠ ᠪᠢᠳᠡᠨ ᠲᠡᠢ ᠨᠥᠬᠥᠷᠯᠡᠬᠦ ᠪᠣᠯᠣᠨᠠ᠃ ᠦᠨᠡᠨ ᠳᠡᠭᠡᠨ ᠪᠢᠳᠡ ᠡᠴᠢᠭᠡ ᠪᠠ ᠲᠡᠭᠦᠨ ᠦ ᠬᠦᠦ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠲᠠᠢ ᠨᠥᠬᠥᠷᠯᠡᠵᠦ ᠪᠠᠢᠨᠠ᠃ 4 ᠪᠢᠳᠡ ᠪᠠᠶᠠᠰᠤᠯ ᠢᠶᠠᠨ ᠲᠡᠭᠦᠯᠳᠡᠷ ᠪᠣᠯᠭᠠᠶᠠ ᠭᠡᠵᠦ ᠡᠳᠡᠭᠡᠷ ᠢ ᠪᠢᠴᠢᠵᠦ ᠪᠠᠢᠨᠠ᠃
ᠭᠡᠷᠡᠯ ᠦᠨ ᠳᠣᠲᠣᠷᠠᠬᠢ ᠠᠮᠢᠳᠤᠷᠠᠯ
5 ᠪᠢᠳᠡ ᠡᠵᠡᠨ ᠡᠴᠡ ᠰᠣᠨᠣᠰᠣᠭᠰᠠᠨ ᠮᠡᠳᠡᠭᠡ ᠶᠢ ᠲᠠ ᠨᠠᠷ ᠲᠤ ᠰᠣᠨᠣᠰᠬᠠᠶᠠ᠂ ᠪᠤᠷᠬᠠᠨ ᠪᠣᠯ ᠭᠡᠷᠡᠯ᠂ ᠲᠡᠭᠦᠨ ᠦ ᠳᠣᠲᠣᠷᠠ ᠬᠠᠷᠠᠩ᠋ᠭᠤᠢ ᠣᠭᠲᠣ ᠪᠠᠢᠬᠤ ᠦᠭᠡᠢ᠃ 6 ᠪᠢᠳᠡ ᠪᠤᠷᠬᠠᠨ ᠲᠠᠢ ᠨᠥᠬᠥᠷᠯᠡᠳᠡᠭ ᠭᠡᠰᠡᠨ ᠪᠠᠢᠲᠠᠯᠠ ᠪᠠᠨ ᠬᠠᠷᠠᠩ᠋ᠭᠤᠢ ᠳᠣᠲᠣᠷᠠ ᠶᠠᠪᠤᠳᠠᠭ ᠶᠤᠮ ᠪᠣᠯ ᠬᠤᠳᠠᠯ ᠬᠡᠯᠡᠵᠦ ᠦᠨᠡᠨ ᠢ ᠪᠡᠶᠡᠯᠡᠭᠦᠯᠬᠦ ᠦᠭᠡᠢ ᠪᠠᠢᠭᠠ ᠶᠤᠮ᠃ 7 ᠬᠠᠷᠢᠨ ᠪᠤᠷᠬᠠᠨ ᠭᠡᠷᠡᠯ ᠦᠨ ᠳᠣᠲᠣᠷᠠ ᠪᠠᠢᠳᠠᠭ ᠲᠠᠢ ᠠᠳᠠᠯᠢ᠂ ᠪᠢᠳᠡ ᠭᠡᠷᠡᠯ ᠦᠨ ᠳᠣᠲᠣᠷᠠ ᠶᠠᠪᠤᠪᠠᠯ ᠨᠢᠭᠡ ᠨᠢᠭᠡᠨ ᠲᠡᠢ ᠪᠡᠨ ᠨᠥᠬᠥᠷᠯᠡᠨ᠂ ᠲᠡᠭᠦᠨ ᠦ ᠬᠦᠦ ᠢᠰᠦ᠋ᠰ ᠤᠨ ᠴᠢᠰᠤ ᠪᠢᠳᠡᠨ ᠢ ᠬᠠᠮᠤᠭ ᠨᠢᠭᠦᠯ 1 ᠡᠴᠡ ᠠᠷᠢᠭᠤᠳᠬᠠᠨᠠ᠃
ᠨᠢᠭᠦᠯ ᠢᠶᠡᠨ ᠢᠯᠡᠴᠢᠯᠡᠬᠦ
8 ᠬᠡᠷᠪᠡ ᠪᠢᠳᠡ ᠥᠪᠡᠷ ᠢ ᠪᠠᠨ ᠨᠢᠭᠦᠯ ᠦᠭᠡᠢ ᠭᠡᠵᠦ ᠬᠡᠯᠡᠪᠡᠯ ᠥᠪᠡᠷᠰᠡᠳ ᠢ ᠪᠠᠨ ᠮᠡᠬᠡᠯᠡᠵᠦ ᠪᠠᠢᠭᠠ ᠪᠥᠭᠡᠳ ᠪᠢᠳᠡᠨ ᠦ ᠳᠣᠲᠣᠷᠠ ᠦᠨᠡᠨ ᠠᠯᠠᠭᠠ ᠭᠡᠰᠡᠨ ᠦᠭᠡ᠃ 9 ᠬᠡᠷᠪᠡ ᠪᠢᠳᠡ ᠨᠢᠭᠦᠯ ᠢᠶᠡᠨ ᠬᠦᠯᠢᠶᠡᠨ ᠵᠥᠪᠰᠢᠶᠡᠷᠡᠪᠡᠯ ᠢᠲᠡᠭᠡᠮᠵᠢᠲᠦ᠂ ᠵᠥᠪᠲᠦ ᠪᠤᠷᠬᠠᠨ ᠪᠢᠳᠡᠨ ᠦ ᠨᠢᠭᠦᠯ ᠢ ᠠᠭᠤᠴᠢᠯᠠᠵᠤ᠂ ᠠᠯᠢᠪᠠ ᠵᠥᠪ ᠪᠤᠰᠤ ᠪᠠᠢᠳᠠᠯ ᠠᠴᠠ ᠪᠢᠳᠡᠨ ᠢ ᠠᠷᠢᠭᠤᠳᠬᠠᠨᠠ᠃ 10 ᠬᠡᠷᠪᠡ ᠪᠢᠳᠡ ᠨᠢᠭᠦᠯ ᠦᠢᠯᠡᠳᠦᠭᠡ ᠦᠭᠡᠢ ᠭᠡᠪᠡᠯ ᠪᠤᠷᠬᠠᠨ ᠢ ᠬᠤᠳᠠᠯᠴᠢ ᠪᠣᠯᠭᠠᠵᠤ ᠪᠠᠢᠭᠠ ᠪᠥᠭᠡᠳ ᠲᠡᠭᠦᠨ ᠦ ᠦᠭᠡ ᠪᠢᠳᠡᠨ ᠦ ᠳᠣᠲᠣᠷᠠ ᠠᠯᠠᠭᠠ᠃