ᠨᠢᠭᠡᠳᠦᠭᠡᠷ ᠶᠣᠬᠠᠨ ᠭᠤᠷᠪᠠ
1 ᠶᠠᠭᠤᠲᠠᠢ ᠶᠡᠬᠡ ᠬᠠᠢᠷᠠ ᠶᠢ ᠡᠴᠢᠭᠡ ᠪᠢᠳᠡᠨ ᠳᠦ ᠪᠢᠯᠬᠠᠭᠠᠭᠰᠠᠨ ᠢᠶᠠᠷ ᠪᠢᠳᠡ ᠪᠤᠷᠬᠠᠨ ᠤ ᠬᠡᠦᠬᠡᠳ ᠭᠡᠵᠦ ᠳᠠᠭᠤᠳᠠᠭᠤᠯᠬᠤ ᠪᠣᠯᠣᠭᠰᠠᠨ ᠢ ᠬᠠᠷᠠᠭᠠᠴᠢ᠂ ᠪᠢᠳᠡ ᠶᠠᠭ ᠲᠡᠢᠮᠦ ᠶᠤᠮ᠃ ᠶᠢᠷᠲᠢᠨᠴᠦ ᠲᠡᠭᠦᠨ ᠢ ᠲᠠᠨᠢᠳᠠᠭ ᠦᠭᠡᠢ ᠪᠣᠯᠬᠣᠷ ᠪᠢᠳᠡᠨ ᠢ ᠴᠤ ᠲᠠᠨᠢᠳᠠᠭ ᠦᠭᠡᠢ᠃ 2 ᠬᠠᠢᠷᠠᠲᠤ ᠨᠤᠭᠤᠳ ᠡ᠂ ᠡᠳᠦᠭᠡ ᠪᠢᠳᠡ ᠪᠤᠷᠬᠠᠨ ᠤ ᠬᠡᠦᠬᠡᠳ ᠤᠳ ᠪᠢᠯᠡ᠃ ᠬᠣᠵᠢᠮ ᠪᠢᠳᠡ ᠶᠠᠭᠤ ᠪᠣᠯᠬᠤ ᠨᠢ ᠬᠠᠷᠠᠬᠠᠨ ᠢᠯᠡᠷᠡᠭᠡ ᠦᠭᠡᠢ᠂ ᠬᠠᠷᠢᠨ ᠲᠡᠷᠡ ᠢᠯᠡᠷᠡᠬᠦ ᠦᠶᠡ ᠳᠦ ᠲᠡᠭᠦᠨ ᠲᠡᠢ ᠠᠳᠠᠯᠢ ᠪᠣᠯᠣᠨᠠ ᠭᠡᠳᠡᠭ ᠢᠶᠡᠨ ᠪᠢᠳᠡ ᠮᠡᠳᠡᠨᠡ᠃ ᠤᠴᠢᠷ ᠨᠢ᠂ ᠪᠢᠳᠡ ᠲᠡᠭᠦᠨ ᠢ ᠶᠠᠭ ᠲᠡᠷᠡ ᠬᠡᠪ ᠢᠶᠡᠷ ᠨᠢ ᠬᠠᠷᠠᠬᠤ ᠪᠣᠯᠣᠨᠠ᠃ 3 ᠲᠡᠭᠦᠨ ᠳᠦ ᠡᠢᠮᠦ ᠨᠠᠢᠳᠠᠯᠭᠠ ᠲᠠᠢ ᠬᠥᠮᠦᠨ ᠪᠦᠬᠦᠨ ᠲᠡᠭᠦᠨ ᠤ ᠴᠡᠪᠡᠷ ᠪᠠᠢᠳᠠᠭ ᠤᠨ ᠠᠳᠠᠯᠢ ᠪᠠᠷ ᠥᠪᠡᠷ ᠢ ᠪᠠᠨ ᠴᠡᠪᠡᠷ ᠪᠠᠢᠯᠭᠠᠳᠠᠭ᠃
4 ᠨᠢᠭᠦᠯ ᠦᠢᠯᠡᠳᠦᠭᠴᠢ ᠪᠣᠯᠭᠠᠨ ᠬᠠᠤᠯᠢ ᠪᠤᠰᠤ ᠶᠠᠪᠤᠳᠠᠯ ᠢ ᠦᠢᠯᠡᠳᠴᠦ ᠪᠠᠢᠭᠠ ᠶᠤᠮ᠂ ᠨᠢᠭᠦᠯ ᠪᠣᠯ ᠬᠠᠤᠯᠢ ᠪᠤᠰᠤ ᠶᠤᠮ᠃ 5 ᠬᠠᠷᠢᠨ ᠲᠡᠷᠡ ᠪᠢᠳᠡᠨ ᠦ ᠨᠢᠭᠦᠯ ᠢ ᠵᠠᠢᠯᠠᠭᠤᠯᠬᠤ ᠶᠢᠨ ᠲᠤᠯᠠᠳᠠ ᠢᠯᠡᠷᠡᠭᠰᠡᠨ ᠭᠡᠳᠡᠭ ᠢ ᠲᠠ ᠨᠠᠷ ᠮᠡᠳᠡᠨᠡ᠃ ᠲᠡᠭᠦᠨ ᠳᠦ ᠨᠢᠭᠦᠯ ᠪᠠᠢᠳᠠᠭ ᠦᠭᠡᠢ᠃ 6 ᠲᠡᠭᠦᠨ ᠦ ᠳᠣᠲᠣᠷᠠ ᠪᠠᠢᠭᠴᠢ ᠪᠦᠬᠦᠨ ᠨᠢᠭᠦᠯ ᠦᠢᠯᠡᠳᠦᠭᠡᠳ ᠪᠠᠢᠳᠠᠭ ᠦᠭᠡᠢ᠃ ᠨᠢᠭᠦᠯ ᠦᠢᠯᠡᠳᠦᠭᠡᠳ ᠪᠠᠢᠳᠠᠭ ᠪᠦᠬᠦᠨ ᠲᠡᠭᠦᠨ ᠢ ᠦᠵᠡᠭᠡ ᠴᠤ ᠦᠭᠡᠢ᠂ ᠲᠠᠨᠢᠭᠠ ᠴᠤ ᠦᠭᠡᠢ᠃ 7 ᠬᠡᠦᠬᠡᠳ ᠤᠳ ᠡ᠂ ᠲᠠ ᠨᠠᠷ ᠢ ᠬᠡᠨ ᠴᠤ ᠪᠦᠦ ᠪᠠᠴᠢᠯᠠᠭ᠃ ᠾᠷᠢᠰᠲ᠋ᠣᠰ ᠵᠥᠪᠲᠦ ᠪᠠᠢᠳᠠᠭᠴᠢᠯᠠᠨ ᠵᠥᠪ ᠢ ᠦᠢᠯᠡᠳᠦᠭᠴᠢ ᠨᠢ ᠵᠥᠪᠲᠦ ᠪᠠᠢᠳᠠᠭ᠃ 8 ᠨᠢᠭᠦᠯ ᠦᠢᠯᠡᠳᠦᠭᠴᠢ ᠨᠢ ᠰᠠᠲ᠋ᠠᠨ ᠤ ᠬᠢ᠂ ᠰᠠᠲ᠋ᠠᠨ ᠠᠩ᠋ᠬᠠᠨ ᠠᠴᠠ ᠪᠠᠨ ᠨᠢᠭᠦᠯ ᠦᠢᠯᠡᠳᠦᠭᠰᠡᠭᠡᠷ ᠪᠠᠢᠨᠠ᠃ ᠪᠤᠷᠬᠠᠨ ᠤ ᠬᠦᠦ ᠢᠯᠡᠷᠡᠭᠰᠡᠨ ᠨᠢ ᠰᠠᠲ᠋ᠠᠨ ᠤ ᠠᠵᠢᠯᠯᠠᠭᠠ ᠶᠢ ᠤᠰᠠᠳᠬᠠᠬᠤ ᠶᠢᠨ ᠲᠤᠯᠠᠳᠠ ᠶᠤᠮ᠃ 9 ᠪᠤᠷᠬᠠᠨ ᠠᠴᠠ ᠲᠥᠷᠥᠭᠰᠡᠨ ᠪᠦᠬᠦᠨ ᠨᠢᠭᠦᠯ ᠦᠢᠯᠡᠳᠦᠭᠡᠳ ᠪᠠᠢᠳᠠᠭ ᠦᠭᠡᠢ᠃ ᠤᠴᠢᠷ ᠨᠢ᠂ ᠲᠡᠭᠦᠨ ᠦ ᠳᠣᠲᠣᠷᠠ ᠪᠤᠷᠬᠠᠨ ᠤ ᠦᠷᠡ ᠪᠤᠢ᠃ ᠲᠡᠷᠡ ᠬᠥᠮᠦᠨ ᠪᠤᠷᠬᠠᠨ ᠠᠴᠠ ᠲᠥᠷᠥᠭᠰᠡᠨ ᠲᠤᠯᠠ ᠨᠢᠭᠦᠯ ᠦᠢᠯᠡᠳᠦᠭᠡᠳ ᠪᠠᠢᠵᠤ ᠴᠢᠳᠠᠳᠠᠭ ᠦᠭᠡᠢ᠃ 10 ᠡᠭᠦᠨ ᠢᠶᠡᠷ ᠬᠡᠨ ᠨᠢ ᠪᠤᠷᠬᠠᠨ ᠤ ᠬᠡᠦᠬᠡᠳ᠂ ᠬᠡᠨ ᠨᠢ ᠰᠠᠲ᠋ᠠᠨ ᠤ ᠬᠡᠦᠬᠡᠳ ᠪᠣᠯᠬᠤ ᠨᠢ ᠲᠣᠳᠣᠷᠬᠠᠢᠯᠠᠭᠳᠠᠨᠠ᠃ ᠵᠥᠪ ᠢ ᠦᠯᠦ ᠦᠢᠯᠡᠳᠦᠭᠴᠢ ᠪᠣᠯᠭᠠᠨ᠂ ᠠᠬᠠ ᠳᠡᠭᠦᠦ ᠪᠡᠨ ᠦᠯᠦ ᠬᠠᠢᠷᠠᠯᠠᠭᠴᠢ ᠪᠣᠯᠭᠠᠨ ᠪᠤᠷᠬᠠᠨ ᠤ ᠬᠢ ᠪᠢᠰᠢ᠃
ᠦᠢᠯᠡ ᠶᠠᠪᠤᠳᠠᠯ ᠪᠠ ᠦᠨᠡᠨ ᠢᠶᠡᠷ ᠬᠠᠢᠷᠠᠯᠠ
11 ᠨᠢᠭᠡ ᠨᠢᠭᠡ ᠪᠡᠨ ᠬᠠᠢᠷᠠᠯᠠᠬᠤ ᠶᠣᠰᠣᠲᠠᠢ ᠭᠡᠳᠡᠭ ᠨᠢ ᠲᠠ ᠨᠠᠷ ᠤᠨ ᠠᠩ᠋ᠬᠠᠨ ᠠᠴᠠ ᠪᠠᠨ ᠰᠣᠨᠣᠰᠣᠭᠰᠠᠨ ᠮᠡᠳᠡᠭᠡ ᠪᠢᠯᠡ᠃ 12 ᠪᠢᠲᠡᠭᠡᠢ ᠺᠠᠢᠨ ᠰᠢᠭ᠋ ᠪᠣᠯ᠃ ᠲᠡᠷᠡ ᠪᠣᠯ ᠮᠠᠭᠤ ᠨᠢᠭᠡᠨ ᠦ ᠬᠢ ᠪᠠᠢᠭᠰᠠᠨ᠂ ᠲᠡᠭᠡᠭᠡᠳ ᠳᠡᠭᠦᠦ ᠪᠡᠨ ᠠᠯᠠᠭᠰᠠᠨ ᠶᠤᠮ᠃ ᠶᠠᠭᠤᠨ ᠳᠤ ᠲᠡᠭᠦᠨ ᠢ ᠠᠯᠠᠪᠠ︖ ᠥᠪᠡᠷ ᠦᠨ ᠬᠢᠨᠢ ᠦᠢᠯᠡ ᠶᠠᠪᠤᠳᠠᠯ ᠮᠠᠭᠤ᠂ ᠳᠡᠭᠦᠦ ᠶᠢᠨ ᠬᠢᠨᠢ ᠦᠢᠯᠡ ᠶᠠᠪᠤᠳᠠᠯ ᠵᠥᠪ ᠪᠠᠢᠭᠰᠠᠨ ᠠᠵᠢ᠃ 13 ᠠᠬᠠ ᠳᠡᠭᠦᠦ ᠨᠠᠷ ᠡ᠂ ᠶᠢᠷᠲᠢᠨᠴᠦ ᠲᠠ ᠨᠠᠷ ᠲᠤ ᠬᠣᠷᠣᠰᠪᠠᠯ ᠪᠦᠦ ᠭᠠᠢᠬᠠ᠃ 14 ᠪᠢᠳᠡ ᠠᠬᠠ ᠳᠡᠭᠦᠦ ᠨᠠᠷ ᠢᠶᠠᠨ ᠬᠠᠢᠷᠠᠯᠠᠳᠠᠭ ᠤᠴᠢᠷ ᠠᠴᠠ ᠦᠬᠦᠯ ᠡᠴᠡ ᠠᠮᠢ ᠤᠷᠤᠭᠤ ᠰᠢᠯᠵᠢᠭᠰᠡᠨ ᠢᠶᠡᠨ ᠮᠡᠳᠡᠨᠡ᠃ ᠬᠠᠢᠷᠠᠯᠠᠳᠠᠭ ᠦᠭᠡᠢ ᠨᠢ ᠦᠬᠦᠯ ᠦᠨ ᠳᠣᠲᠣᠷᠠ ᠪᠠᠢᠨᠠ᠃ 15 ᠠᠬᠠ ᠳᠡᠭᠦᠦ ᠪᠡᠨ ᠬᠣᠷᠣᠰᠣᠭᠴᠢ ᠪᠦᠬᠦᠨ ᠶᠠᠷᠭᠠᠴᠢᠨ ᠮᠥᠨ᠃ ᠶᠠᠷᠭᠠᠴᠢᠨ ᠤ ᠳᠣᠲᠣᠷᠠ ᠮᠥᠩᠬᠡ ᠠᠮᠢ ᠪᠠᠢᠳᠠᠭ ᠦᠭᠡᠢ ᠶᠢ ᠲᠠ ᠨᠠᠷ ᠮᠡᠳᠡᠨᠡ᠃ 16 ᠪᠢᠳᠡᠨ ᠦ ᠲᠥᠯᠥᠭᠡ ᠲᠡᠷᠡ ᠠᠮᠢ ᠪᠠᠨ ᠵᠣᠷᠢᠭᠤᠯᠤᠭᠰᠠᠨ᠂ ᠡᠭᠦᠨ ᠢᠶᠡᠷ ᠪᠢᠳᠡ ᠬᠠᠢᠷᠠ ᠶᠢ ᠮᠡᠳᠡᠯᠡ᠃ ᠪᠢᠳᠡ ᠴᠤ ᠠᠬᠠ ᠳᠡᠭᠦᠦ ᠨᠠᠷ ᠤᠨ ᠢᠶᠠᠨ ᠲᠥᠯᠥᠭᠡ ᠠᠮᠢ ᠪᠠᠨ ᠵᠣᠷᠢᠭᠤᠯᠬᠤ ᠶᠣᠰᠣᠲᠠᠢ᠃ 17 ᠡᠨᠡ ᠶᠢᠷᠲᠢᠨᠴᠦ ᠶᠢᠨ ᠡᠳ᠋ ᠬᠥᠷᠥᠩᠭᠡ ᠲᠠᠢ ᠬᠥᠮᠦᠨ ᠠᠬᠠ ᠳᠡᠭᠦᠦ ᠶᠢᠨ ᠢᠶᠠᠨ ᠭᠠᠴᠢᠭᠳᠠᠯ ᠢ ᠬᠠᠷᠠᠭᠠᠳ ᠥᠷᠥᠪᠳᠥᠬᠦ ᠦᠭᠡᠢ ᠪᠣᠯ ᠲᠡᠭᠦᠨ ᠦ ᠳᠣᠲᠣᠷᠠ ᠶᠠᠭᠠᠬᠢᠨ ᠪᠤᠷᠬᠠᠨ ᠤ ᠬᠠᠢᠷᠠ ᠪᠠᠢᠬᠤ ᠪᠢᠯᠡ᠃
18 ᠬᠡᠦᠬᠡᠳ ᠤᠳ ᠡ᠂ ᠪᠢᠳᠡ ᠦᠭᠡ ᠬᠡᠯᠡ ᠪᠡᠷ ᠯᠠ ᠪᠤᠰᠤ᠂ ᠬᠠᠷᠢᠨ ᠦᠢᠯᠡ ᠶᠠᠪᠤᠳᠠᠯ ᠪᠠ ᠦᠨᠡᠨ ᠢᠶᠡᠷ ᠬᠠᠢᠷᠠᠯᠠᠵᠠᠭᠠᠶᠠ᠃ 19 ᠡᠭᠦᠨ ᠢᠶᠡᠷ ᠪᠢᠳᠡ ᠦᠨᠡᠨ ᠦ ᠬᠢ ᠭᠡᠳᠡᠭ ᠢᠶᠡᠨ ᠮᠡᠳᠡᠵᠦ᠂ ᠪᠢᠳᠡᠨ ᠦ ᠰᠡᠳᠬᠢᠯ ᠪᠢᠳᠡᠨ ᠢ ᠪᠤᠷᠤᠭᠤᠳᠬᠠᠬᠤ ᠳᠤ ᠴᠤ ᠪᠤᠷᠬᠠᠨ ᠤ ᠡᠮᠦᠨᠡ ᠵᠢᠷᠦᠬᠡ ᠰᠡᠳᠬᠢᠯ ᠲᠠᠢᠪᠤᠭᠤ ᠪᠠᠢᠬᠤ ᠪᠣᠯᠣᠨᠠ᠃ 20 ᠤᠴᠢᠷ ᠨᠢ᠂ ᠪᠤᠷᠬᠠᠨ ᠪᠢᠳᠡᠨ ᠦ ᠰᠡᠳᠬᠢᠯ ᠡᠴᠡ ᠠᠭᠤᠤ᠂ ᠬᠠᠮᠤᠭ ᠢ ᠮᠡᠳᠡᠳᠡᠭ᠃ 21 ᠬᠠᠢᠷᠠᠲᠤ ᠨᠤᠭᠤᠳ ᠡ᠂ ᠬᠡᠷᠪᠡ ᠰᠡᠳᠬᠢᠯ ᠮᠠᠨᠢ ᠪᠢᠳᠡᠨ ᠢ ᠪᠤᠷᠤᠭᠤᠳᠬᠠᠬᠤ ᠦᠭᠡᠢ ᠪᠣᠯ ᠪᠢᠳᠡ ᠪᠤᠷᠬᠠᠨ ᠤ ᠡᠮᠦᠨᠡ ᠵᠣᠷᠢᠭᠲᠠᠢ ᠪᠠᠢᠵᠤ᠂ 22 ᠭᠤᠶᠤᠭᠰᠠᠨ ᠪᠣᠯᠭᠠᠨ ᠢᠶᠠᠨ ᠲᠡᠭᠦᠨ ᠡᠴᠡ ᠬᠦᠷᠲᠡᠳᠡᠭ᠃ ᠤᠴᠢᠷ ᠨᠢ᠂ ᠪᠢᠳᠡ ᠲᠡᠭᠦᠨ ᠦ ᠵᠠᠷᠯᠢᠭ ᠤᠳ ᠢ ᠰᠠᠬᠢᠵᠤ᠂ ᠲᠡᠭᠦᠨ ᠳᠦ ᠲᠠᠭᠠᠯᠠᠮᠵᠢᠲᠠᠢ ᠵᠦᠢᠯᠡᠰ ᠢ ᠦᠢᠯᠡᠳᠳᠡᠭ ᠪᠢᠯᠡ᠃ 23 ᠲᠡᠭᠦᠨ ᠦ ᠬᠦᠦ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠤᠨ ᠨᠡᠷᠡ ᠳᠦ ᠢᠲᠡᠭᠡᠵᠦ᠂ ᠾᠷᠢᠰᠲ᠋ᠣᠰ ᠤᠨ ᠪᠢᠳᠡᠨ ᠳᠦ ᠵᠠᠬᠢᠭᠰᠠᠨ ᠶᠣᠰᠣᠭᠠᠷ ᠨᠢᠭᠡ ᠨᠢᠭᠡ ᠪᠡᠨ ᠬᠠᠢᠷᠠᠯᠠᠬᠤ ᠨᠢ ᠪᠤᠷᠬᠠᠨ ᠤ ᠵᠠᠷᠯᠢᠭ ᠮᠥᠨ᠃ 24 ᠪᠤᠷᠬᠠᠨ ᠤ ᠵᠠᠷᠯᠢᠭ ᠤᠳ ᠢ ᠰᠠᠬᠢᠭᠴᠢ ᠨᠢ ᠪᠤᠷᠬᠠᠨ ᠤ ᠳᠣᠲᠣᠷᠠ ᠪᠠᠢᠳᠠᠭ ᠪᠥᠭᠡᠳ ᠪᠤᠷᠬᠠᠨ ᠴᠤ ᠲᠡᠭᠦᠨ ᠦ ᠳᠣᠲᠣᠷᠠ ᠪᠠᠢᠳᠠᠭ᠃ ᠡᠵᠡᠨ ᠪᠢᠳᠡᠨ ᠦ ᠳᠣᠲᠣᠷᠠ ᠪᠠᠢᠭᠠ ᠶᠢ ᠲᠡᠭᠦᠨ ᠦ ᠰᠣᠶᠣᠷᠬᠠᠭᠰᠠᠨ ᠠᠷᠢᠭᠤᠨ ᠰᠦᠨᠡᠰᠦ ᠪᠡᠷ ᠪᠢᠳᠡ ᠮᠡᠳᠡᠳᠡᠭ᠃