ᠬᠠᠭᠠᠢ ᠨᠢᠭᠡ
ᠥᠷᠭᠥᠭᠡ ᠶᠢ ᠰᠡᠷᠭᠦᠭᠡ
1 ᠳ᠋ᠠᠷᠢᠶᠦ᠋ ᠬᠠᠭᠠᠨ ᠤ ᠬᠣᠶᠠᠳᠠᠬᠢ ᠵᠢᠯ ᠤᠨ ᠵᠢᠷᠭᠤᠳᠤᠭᠠᠷ ᠰᠠᠷᠠ ᠶᠢᠨ ᠡᠬᠢᠨ ᠤ ᠡᠳᠦᠷ ᠶᠣᠬᠣᠸᠠ ᠶᠢᠨ ᠦᠭᠡ ᠡᠰᠢ ᠦᠵᠡᠭᠦᠯᠦᠭᠴᠢ ᠬᠠᠭᠠᠢ ᠪᠠᠷ ᠳᠠᠮᠵᠢᠭᠤᠯᠤᠨ ᠶᠦᠳᠠ ᠶᠢᠨ ᠵᠠᠬᠢᠷᠤᠭᠴᠢ᠂ ᠱᠠᠯᠲ᠋ᠢᠶᠧᠯ ᠤᠨ ᠬᠥᠪᠡᠭᠦᠨ ᠽᠣᠷᠣᠪᠠᠪᠧᠯ ᠪᠣᠯᠣᠨ ᠲᠡᠷᠢᠭᠦᠨ ᠲᠠᠬᠢᠯᠴᠢ᠂ ᠶᠧᠬᠣᠽᠠᠳᠠᠺ ᠤᠨ ᠬᠥᠪᠡᠭᠦᠨ ᠶᠣᠱᠦ᠋ᠶᠠ ᠨᠠᠷ ᠲᠤ ᠢᠷᠡᠭᠰᠡᠨ ᠨᠢ᠄ 2 《ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ ᠡᠨᠡ ᠠᠷᠠᠳ ᠲᠦᠮᠡᠨ 〈ᠴᠠᠭ ᠪᠣᠯᠣᠭᠠ ᠦᠭᠡᠢ᠂ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡ ᠶᠢ ᠪᠠᠷᠢᠬᠤ ᠴᠠᠭ ᠪᠣᠯᠣᠭᠠ ᠦᠭᠡᠢ〉 ᠭᠡᠳᠡᠭ᠃ 3 ᠲᠡᠷᠡ ᠦᠶᠡ ᠳᠦ ᠶᠣᠬᠣᠸᠠ ᠶᠢᠨ ᠦᠭᠡ ᠡᠰᠢ ᠦᠵᠡᠭᠦᠯᠦᠭᠴᠢ ᠬᠠᠭᠠᠢ ᠪᠠᠷ ᠳᠠᠮᠵᠢᠭᠤᠯᠤᠨ ᠢᠷᠡᠭᠰᠡᠨ ᠨᠢ᠄ 4 〈ᠡᠨᠡ ᠥᠷᠭᠥᠭᠡ ᠨᠤᠷᠠᠩ᠋ᠬᠠᠢ ᠪᠠᠢᠲᠠᠯᠠ ᠲᠠ ᠨᠠᠷ ᠡᠨᠡ ᠴᠠᠭ ᠲᠤ ᠭᠣᠶᠣ ᠬᠠᠪᠲᠠᠰᠤᠨ ᠭᠡᠷ ᠲᠦ ᠰᠠᠭᠤᠬᠤ ᠨᠢ ᠤᠤ︖〉 5 ᠡᠳᠦᠭᠡ ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠲᠠ ᠨᠠᠷ ᠦᠢᠯᠡᠰ ᠮᠥᠷ ᠢᠶᠡᠨ ᠬᠢᠨᠠᠭᠲᠤᠨ︕ 6 ᠲᠠ ᠨᠠᠷ ᠶᠡᠬᠡ ᠲᠠᠷᠢᠶᠠᠯᠠᠭᠰᠠᠨ ᠴᠤ ᠬᠣᠮᠰᠠᠬᠠᠨ ᠬᠤᠷᠢᠶᠠᠪᠠ᠂ ᠬᠣᠭᠣᠯᠠᠯᠠᠭᠰᠠᠨ ᠴᠤ ᠴᠠᠳᠳᠠᠭ ᠦᠭᠡᠢ᠂ ᠤᠤᠭᠤᠭᠰᠠᠨ ᠴᠤ ᠬᠠᠨᠤᠳᠠᠭ ᠦᠭᠡᠢ᠂ ᠡᠮᠦᠰᠦᠭᠰᠡᠨ ᠴᠤ ᠳᠤᠯᠠᠭᠠᠴᠠᠳᠠᠭ ᠦᠭᠡᠢ᠂ ᠬᠥᠯᠥᠰᠥ ᠪᠡᠨ ᠠᠪᠤᠭᠰᠠᠨ ᠴᠤ ᠴᠣᠭᠣᠷᠣᠬᠠᠢ ᠲᠦᠷᠡᠢᠪᠴᠢ ᠳᠤ ᠬᠢᠵᠦ ᠪᠠᠢᠨᠠ᠃〉
7 ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠲᠠ ᠨᠠᠷ ᠦᠢᠯᠡᠰ ᠮᠥᠷ ᠢᠶᠡᠨ ᠬᠢᠨᠠᠭᠲᠤᠨ︕ 8 ᠲᠠ ᠨᠠᠷ ᠠᠭᠤᠯᠠᠨ ᠳᠤ ᠭᠠᠷᠴᠤ᠂ ᠮᠣᠳᠣ ᠠᠪᠴᠢᠷᠠᠨ ᠥᠷᠭᠥᠭᠡ ᠶᠢ ᠮᠢᠨᠢ ᠪᠣᠰᠬᠠᠴᠠᠭᠠ᠃ ᠪᠢ ᠡᠭᠦᠨ ᠢ ᠴᠢᠨᠢ ᠲᠠᠭᠠᠰᠢᠶᠠᠨ᠂ ᠠᠯᠳᠠᠷᠰᠢᠬᠤ ᠪᠣᠯᠣᠨᠠ᠂ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃〉 9 ᠲᠠ ᠨᠠᠷ ᠶᠡᠬᠡ ᠶᠢ ᠬᠦᠰᠡᠭᠰᠡᠨ ᠴᠤ ᠪᠠᠭᠠ ᠶᠢ ᠣᠯᠵᠠᠢ᠃ ᠭᠡᠷ ᠲᠡᠭᠡᠨ ᠠᠪᠴᠢᠷᠠᠭᠰᠠᠨ ᠶᠠᠭᠤᠮᠠ ᠶᠢ ᠴᠢᠨᠢ ᠪᠢ ᠬᠡᠶᠢᠰᠭᠡᠳᠡᠭ᠃ ᠶᠠᠭᠠᠬᠢᠭᠠᠳ ᠪᠤᠢ︖ ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠶᠠᠭᠠᠬᠢᠭᠠᠳ ᠭᠡᠪᠡᠯ᠂ ᠮᠢᠨᠦ ᠭᠡᠷ ᠨᠤᠷᠠᠩ᠋ᠬᠠᠢ ᠪᠠᠢᠲᠠᠯᠠ ᠲᠠ ᠨᠠᠷ ᠭᠡᠷ ᠭᠡᠷ ᠲᠡᠭᠡᠨ ᠯᠠ ᠶᠠᠭᠠᠷᠠᠳᠠᠭ᠃ 10 ᠡᠢᠮᠦ ᠡᠴᠡ ᠲᠠ ᠨᠠᠷ ᠤᠨ ᠳᠡᠭᠡᠷᠡᠬᠢ ᠲᠩᠷᠢ ᠰᠢᠭᠦᠳᠡᠷᠢ ᠪᠠᠨ ᠪᠠᠭᠤᠯᠭᠠᠬᠤ ᠦᠭᠡᠢ᠂ ᠭᠠᠵᠠᠷ ᠦᠷᠡ ᠲᠠᠷᠢᠶᠠ ᠪᠠᠨ ᠭᠠᠷᠭᠠᠬᠤ ᠦᠭᠡᠢ᠂ 11 ᠪᠢ ᠭᠠᠩ ᠭᠠᠴᠢᠭ ᠢ ᠳᠠᠭᠤᠳᠠᠵᠤ᠂ ᠭᠠᠵᠠᠷ ᠳᠡᠭᠡᠷᠡ᠂ ᠠᠭᠤᠯᠠᠰ ᠤᠨ ᠳᠡᠭᠡᠷᠡ᠂ ᠦᠷᠡ ᠲᠠᠷᠢᠶᠠ᠂ ᠰᠢᠨᠡ ᠳᠠᠷᠠᠰᠤ᠂ ᠲᠣᠰᠣ ᠵᠡᠷᠭᠡ ᠭᠠᠵᠠᠷ ᠠᠴᠠ ᠭᠠᠷᠬᠤ ᠪᠦᠬᠦᠨ ᠦ ᠳᠡᠭᠡᠷᠡ᠂ ᠬᠥᠮᠦᠨ ᠠᠮᠢᠲᠠᠨ ᠳᠡᠭᠡᠷᠡ᠂ ᠭᠠᠷ ᠤᠨ ᠴᠢᠨᠢ ᠪᠦᠬᠦᠢᠯᠡ ᠬᠥᠳᠡᠯᠮᠦᠷᠢ ᠳᠡᠭᠡᠷᠡ ᠠᠪᠴᠢᠷᠠᠭᠰᠠᠨ〉》 ᠭᠡᠪᠡ᠃
12 ᠱᠠᠯᠲ᠋ᠢᠶᠧᠯ ᠤᠨ ᠬᠥᠪᠡᠭᠦᠨ ᠽᠣᠷᠣᠪᠠᠪᠧᠯ ᠬᠢᠭᠡᠳ ᠲᠡᠷᠢᠭᠦᠨ ᠲᠠᠬᠢᠯᠴᠢ ᠶᠧᠬᠣᠽᠠᠳᠠᠺ ᠤᠨ ᠬᠥᠪᠡᠭᠦᠨ ᠶᠣᠱᠦ᠋ᠶᠠ ᠨᠠᠷ ᠦᠯᠡᠳᠡᠭᠰᠡᠨ ᠪᠦᠬᠦ ᠠᠷᠠᠳ ᠲᠦᠮᠡᠨ ᠦ ᠪᠠᠨ ᠬᠠᠮᠲᠤ ᠥᠪᠡᠷᠰᠡᠳ ᠦᠨ ᠪᠤᠷᠬᠠᠨ ᠶᠣᠬᠣᠸᠠ ᠶᠢᠨ ᠳᠠᠭᠤ ᠬᠣᠭᠣᠯᠠᠢ ᠪᠠ ᠡᠰᠢ ᠦᠵᠡᠭᠦᠯᠦᠭᠴᠢ ᠬᠠᠭᠠᠢ ᠶᠢᠨ ᠦᠭᠡ ᠶᠢ ᠳᠠᠭᠠᠭᠰᠠᠨ ᠪᠠᠢᠨᠠ᠃ ᠤᠴᠢᠷ ᠨᠢ ᠲᠡᠳᠡᠨ ᠦ ᠪᠤᠷᠬᠠᠨ ᠶᠣᠬᠣᠸᠠ ᠲᠡᠭᠦᠨ ᠢ ᠢᠯᠡᠭᠡᠭᠰᠡᠨ ᠶᠤᠮ᠃ ᠲᠡᠢᠨ ᠬᠦ ᠠᠷᠠᠳ ᠲᠦᠮᠡᠨ ᠶᠣᠬᠣᠸᠠ ᠠᠴᠠ ᠡᠮᠢᠶᠡᠭᠰᠡᠨ ᠳᠦ᠂ 13 ᠶᠣᠬᠣᠸᠠ ᠶᠢᠨ ᠡᠯᠴᠢ ᠬᠠᠭᠠᠢ ᠶᠣᠬᠣᠸᠠ ᠶᠢᠨ ᠦᠭᠡ ᠶᠢ ᠠᠷᠠᠳ ᠲᠦᠮᠡᠨ ᠳᠦ ᠳᠠᠮᠵᠢᠭᠤᠯᠤᠨ᠄ 《〈ᠪᠢ ᠲᠠ ᠨᠠᠷ ᠲᠠᠢ ᠬᠠᠮᠲᠤ ᠪᠠᠢᠨᠠ〉 ᠭᠡᠵᠦ ᠶᠣᠬᠣᠸᠠ ᠠᠢᠯᠠᠳᠤᠯᠠ》 ᠭᠡᠪᠡ᠃ 14 ᠲᠡᠢᠨ ᠬᠦ ᠶᠣᠬᠣᠸᠠ ᠶᠦᠳᠠ ᠶᠢᠨ ᠵᠠᠬᠢᠷᠤᠭᠴᠢ᠂ ᠱᠠᠯᠲ᠋ᠢᠶᠧᠯ ᠤᠨ ᠬᠥᠪᠡᠭᠦᠨ ᠽᠣᠷᠣᠪᠠᠪᠧᠯ ᠤᠨ ᠰᠡᠳᠬᠢᠯ᠂ ᠲᠡᠷᠢᠭᠦᠨ ᠲᠠᠬᠢᠯᠴᠢ ᠶᠧᠬᠣᠽᠠᠳᠠᠺ ᠤᠨ ᠬᠥᠪᠡᠭᠦᠨ ᠶᠣᠱᠦ᠋ᠶᠠ ᠶᠢᠨ ᠰᠡᠳᠬᠢᠯ ᠪᠣᠯᠣᠨ ᠦᠯᠡᠳᠡᠭᠰᠡᠨ ᠪᠦᠬᠦ ᠠᠷᠠᠳ ᠲᠦᠮᠡᠨ ᠦ ᠰᠡᠳᠬᠢᠯ ᠢ ᠬᠥᠳᠡᠯᠭᠡᠭᠰᠡᠨ᠃ ᠲᠡᠳᠡ ᠢᠷᠡᠵᠦ᠂ ᠥᠪᠡᠷᠰᠡᠳ ᠦᠨ ᠪᠤᠷᠬᠠᠨ ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠦ ᠠᠵᠢᠯ ᠢ 15 ᠳ᠋ᠠᠷᠢᠶᠦ᠋ ᠬᠠᠭᠠᠨ ᠤ ᠬᠣᠶᠠᠳᠠᠬᠢ ᠵᠢᠯ ᠤᠨ ᠵᠢᠷᠭᠤᠳᠤᠭᠠᠷ ᠰᠠᠷᠠ ᠶᠢᠨ ᠬᠣᠷᠢᠨ ᠳᠥᠷᠪᠡᠨ ᠳᠦ ᠡᠬᠢᠯᠡᠭᠦᠯᠦᠭᠰᠡᠨ ᠪᠠᠢᠯᠠ᠃