ᠭᠤᠷᠪᠠᠳᠤᠭᠠᠷ ᠶᠣᠬᠠᠨ
1 ᠠᠬᠠᠯᠠᠭᠴᠢ ᠪᠢ ᠬᠠᠢᠷᠠᠲᠤ ᠭᠠᠢᠶᠣ᠋ ᠳᠠᠭᠠᠨ᠄ ᠪᠢ ᠴᠢᠮᠠ ᠳᠤ ᠦᠨᠡᠨ ᠦ ᠳᠣᠲᠣᠷᠠ ᠬᠠᠢᠷᠠᠲᠠᠢ᠃
2 ᠬᠠᠢᠷᠠᠲᠤ ᠮᠢᠨᠢ᠂ ᠰᠦᠨᠡᠰᠦ ᠴᠢᠨᠢ ᠪᠠᠳᠠᠷᠠᠵᠤ ᠪᠠᠢᠭᠠ ᠶᠢᠨ ᠠᠳᠠᠯᠢ᠂ ᠪᠦᠬᠦ ᠲᠠᠯᠠ ᠪᠠᠷ ᠪᠠᠳᠠᠷᠠᠵᠤ᠂ ᠡᠷᠡᠭᠦᠯ ᠮᠡᠨᠳᠦ ᠪᠠᠢᠬᠤ ᠶᠢ ᠴᠢᠨᠢ ᠪᠢ ᠳᠠᠭᠠᠳᠬᠠᠳᠠᠭ᠃ 3 ᠠᠬᠠ ᠳᠡᠭᠦᠦ ᠨᠠᠷ ᠢᠷᠡᠵᠦ ᠴᠢᠨᠦ ᠦᠨᠡᠨᠴᠢ ᠪᠠᠢᠳᠠᠭ ᠤᠨ ᠲᠤᠬᠠᠢ᠂ ᠦᠨᠡᠨ ᠢ ᠳᠠᠭᠠᠵᠤ ᠶᠠᠪᠤᠭᠠ ᠶᠢ ᠴᠢᠨᠢ ᠭᠡᠷᠡᠴᠢᠯᠡᠭᠰᠡᠨ ᠳᠦ ᠪᠢ ᠮᠠᠰᠢᠳᠠ ᠪᠠᠶᠠᠷᠯᠠᠪᠠ᠃ 4 ᠬᠡᠦᠬᠡᠳ ᠤᠳ ᠤᠨ ᠢᠶᠠᠨ ᠦᠨᠡᠨ ᠢ ᠳᠠᠭᠠᠵᠤ ᠶᠠᠪᠤᠭᠠ ᠶᠢ ᠰᠣᠨᠣᠰᠬᠤ ᠠᠴᠠ ᠢᠯᠡᠭᠦᠦ ᠪᠠᠶᠠᠰᠤᠯ ᠨᠠᠳᠠ ᠳᠤ ᠪᠠᠢᠬᠤ ᠦᠭᠡᠢ᠃
ᠪᠠᠶᠠᠷ ᠤᠨ ᠮᠡᠳᠡᠭᠡᠴᠢᠳ ᠢ ᠬᠦᠯᠢᠶᠡᠨ ᠠᠪ᠂ ᠲᠤᠰᠠᠯᠠ
5 ᠬᠠᠢᠷᠠᠲᠤ ᠮᠢᠨᠢ᠂ ᠴᠢ ᠠᠬᠠ ᠳᠡᠭᠦᠦ ᠨᠠᠷ ᠤᠨ ᠲᠥᠯᠥᠭᠡ᠂ ᠢᠯᠠᠩ᠋ᠭᠤᠶᠠ ᠭᠠᠳᠠᠨᠠ ᠶᠢᠨ ᠬᠥᠮᠦᠰ ᠦᠨ ᠲᠥᠯᠥᠭᠡ᠂ ᠶᠠᠭᠤ ᠶᠢ ᠴᠤ ᠦᠨᠡᠨᠴᠢ ᠪᠠᠷ ᠬᠢᠵᠦ ᠪᠠᠢᠭᠠ ᠶᠤᠮ ᠪᠠᠢᠨᠠ᠃ 6 ᠴᠢᠨᠦ ᠬᠠᠢᠷᠠ ᠶᠢᠨ ᠲᠤᠬᠠᠢ ᠲᠡᠳᠡ ᠴᠢᠭᠤᠯᠭᠠᠨ ᠤ ᠡᠮᠦᠨᠡ ᠭᠡᠷᠡᠴᠢᠯᠡᠭᠰᠡᠨ᠃ ᠪᠤᠷᠬᠠᠨ ᠳᠤ ᠲᠠᠭᠠᠯᠠᠭᠳᠠᠬᠤ ᠶᠣᠰᠣᠭᠠᠷ ᠴᠢ ᠲᠡᠳᠡᠨ ᠢ ᠲᠤᠰᠠᠯᠠᠵᠤ ᠮᠣᠷᠳᠠᠭᠤᠯᠪᠠᠯ ᠰᠠᠢᠨ᠃ 7 ᠲᠡᠳᠡ ᠬᠠᠷᠢᠴᠤᠳ ᠠᠴᠠ ᠶᠠᠭᠤ ᠴᠤ ᠠᠪᠤᠯ ᠦᠭᠡᠢ᠂ ᠡᠵᠡᠨ ᠦ ᠨᠡᠷᠡ ᠶᠢᠨ ᠲᠥᠯᠥᠭᠡ ᠶᠠᠪᠤᠵᠠᠭᠠᠭᠰᠠᠨ ᠪᠢᠯᠡ᠃ 8 ᠲᠡᠢᠮᠦ ᠡᠴᠡ ᠲᠡᠳᠡᠭᠡᠷ ᠬᠥᠮᠦᠨ ᠢ ᠪᠢᠳᠡ ᠳᠡᠮᠵᠢᠬᠦ ᠶᠣᠰᠣᠲᠠᠢ᠃ ᠢᠩᠭᠢᠭᠰᠡᠨ ᠢᠶᠡᠷ ᠪᠢᠳᠡ ᠦᠨᠡᠨ ᠦ ᠲᠥᠯᠥᠭᠡ ᠬᠠᠮᠲᠤᠷᠠᠨ ᠠᠵᠢᠯᠯᠠᠭᠴᠢ ᠪᠣᠯᠳᠠᠭ ᠪᠢᠯᠡ᠃
9 ᠪᠢ ᠴᠢᠨᠦ ᠴᠢᠭᠤᠯᠭᠠᠨ ᠳᠤ ᠵᠠᠬᠢᠶᠠ ᠪᠢᠴᠢᠭᠰᠡᠨ᠂ ᠬᠠᠷᠢᠨ ᠲᠡᠷᠢᠭᠦᠨ ᠪᠣᠯᠬᠤ ᠳᠤᠷᠠᠲᠠᠢ ᠳ᠋ᠢᠶᠣᠲ᠋ᠷᠧᠹᠧ ᠪᠢᠳᠡᠨ ᠦ ᠦᠭᠡ ᠶᠢ ᠬᠦᠯᠢᠶᠡᠨ ᠠᠪᠬᠤ ᠦᠭᠡᠢ ᠪᠠᠢᠨᠠ᠃ 10 ᠲᠡᠢᠮᠦ ᠡᠴᠡ ᠪᠢ ᠣᠴᠢᠪᠠᠯ ᠲᠡᠭᠦᠨ ᠦ ᠬᠢᠵᠦ ᠪᠠᠢᠭᠠ ᠦᠢᠯᠡ ᠶᠢ ᠰᠠᠨᠠᠭᠤᠯᠤᠨᠠ᠃ ᠲᠡᠷᠡ ᠪᠢᠳᠡᠨ ᠢ ᠮᠠᠭᠤᠬᠠᠢ ᠪᠠᠷ ᠬᠣᠪᠯᠠᠵᠤ ᠪᠠᠢᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ᠂ ᠠᠬᠠ ᠳᠡᠭᠦᠦ ᠨᠠᠷ ᠢᠶᠠᠨ ᠬᠦᠯᠢᠶᠡᠨ ᠠᠪᠳᠠᠭ ᠦᠭᠡᠢ᠂ ᠬᠦᠯᠢᠶᠡᠨ ᠠᠪᠬᠤ ᠭᠡᠰᠡᠨ ᠬᠥᠮᠦᠰ ᠢ ᠴᠤ ᠬᠣᠷᠢᠭᠯᠠᠨ ᠴᠢᠭᠤᠯᠭᠠᠨ ᠠᠴᠠ ᠬᠥᠭᠡᠭᠡᠵᠦ ᠪᠠᠢᠨᠠ᠃
11 ᠬᠠᠢᠷᠠᠲᠤ ᠮᠢᠨᠢ᠂ ᠮᠠᠭᠤ ᠶᠢ ᠪᠢᠰᠢ᠂ ᠬᠠᠷᠢᠨ ᠰᠠᠢᠨ ᠢ ᠳᠠᠭᠤᠷᠢᠶᠠ᠃ ᠰᠠᠢᠨ ᠢ ᠦᠢᠯᠡᠳᠦᠭᠴᠢ ᠨᠢ ᠪᠤᠷᠬᠠᠨ ᠤ ᠬᠢ ᠪᠣᠯᠪᠠᠴᠤ ᠮᠠᠭᠤ ᠶᠢ ᠦᠢᠯᠡᠳᠦᠭᠴᠢ ᠨᠢ ᠪᠤᠷᠬᠠᠨ ᠢ ᠣᠯᠵᠤ ᠦᠵᠡᠭᠡ ᠦᠭᠡᠢ᠃ 12 ᠳ᠋ᠧᠮᠧᠲ᠋ᠷᠢ ᠬᠠᠮᠤᠭ ᠬᠥᠮᠦᠨ ᠳᠦ ᠴᠤ᠂ ᠦᠨᠡᠨ ᠳᠦ ᠴᠤ ᠰᠠᠢᠰᠢᠶᠠᠭᠳᠠᠵᠤ ᠪᠠᠢᠨᠠ᠂ ᠪᠢᠳᠡ ᠴᠤ ᠲᠡᠭᠦᠨ ᠢ ᠰᠠᠢᠰᠢᠶᠠᠳᠠᠭ ᠪᠥᠭᠡᠳ ᠪᠢᠳᠡᠨ ᠦ ᠰᠠᠢᠰᠢᠶᠠᠯ ᠦᠨᠡᠨ ᠭᠡᠳᠡᠭ ᠢ ᠴᠢ ᠮᠡᠳᠡᠨᠡ᠃
13 ᠴᠢᠮᠠ ᠳᠤ ᠪᠢᠴᠢᠬᠦ ᠦᠭᠡ ᠣᠯᠠᠨ ᠪᠠᠢᠪᠠᠴᠤ ᠦᠵᠦᠭ ᠪᠡᠬᠡ ᠵᠠᠷᠤᠴᠠᠭᠤᠯᠬᠤ ᠰᠠᠨᠠᠭᠠ ᠦᠭᠡᠢ᠂ 14 ᠴᠢᠮᠠ ᠲᠠᠢ ᠲᠦᠷᠭᠡᠬᠡᠨ ᠠᠭᠤᠯᠵᠠᠬᠤ ᠶᠢ ᠬᠦᠰᠡᠵᠦ ᠪᠠᠢᠨᠠ᠃ ᠲᠡᠭᠡᠭᠡᠳ ᠪᠢᠳᠡ ᠨᠢᠭᠤᠷᠲᠠᠨ ᠶᠠᠷᠢᠯᠴᠠᠶᠠ᠃
15 ᠠᠮᠤᠷ ᠠᠮᠤᠭᠤᠯᠠᠩ ᠴᠢᠮᠠ ᠳᠤ ᠪᠠᠢᠬᠤ ᠪᠣᠯᠲᠤᠭᠠᠢ᠃ ᠠᠨᠳᠠ ᠨᠥᠬᠥᠳ ᠴᠢᠨᠢ ᠴᠢᠮᠠ ᠳᠤ ᠮᠡᠨᠳᠦ ᠬᠦᠷᠭᠡᠵᠦ ᠪᠠᠢᠨᠠ᠃ ᠠᠨᠳᠠ ᠨᠥᠬᠥᠳ ᠦᠨ ᠨᠡᠷᠡ ᠨᠡᠷᠡ ᠪᠡᠷ ᠨᠢ ᠮᠡᠨᠳᠦ ᠳᠠᠮᠵᠢᠭᠤᠯᠤᠭᠠᠷᠠᠢ᠃