ᠡᠽᠷᠠ ᠨᠢᠭᠡ
ᠴᠥᠯᠡᠭᠳᠡᠭᠰᠡᠳ ᠢ ᠪᠤᠴᠠᠭᠠᠬᠤ ᠵᠠᠷᠯᠢᠭ
1 ᠶᠣᠬᠣᠸᠠ ᠶᠧᠷᠧᠮᠢᠶᠠ ᠪᠠᠷ ᠬᠡᠯᠡᠭᠦᠯᠦᠭᠰᠡᠨ ᠦᠭᠡ ᠪᠡᠨ ᠪᠡᠶᠡᠯᠡᠭᠦᠯᠬᠦ ᠶᠢᠨ ᠲᠤᠯᠠᠳᠠ ᠫᠧᠷᠰ ᠤᠨ ᠬᠠᠭᠠᠨ ᠺᠦᠷᠣᠰ ᠤᠨ ᠠᠩ᠋ᠬᠠᠳᠤᠭᠠᠷ ᠣᠨ ᠳᠤ ᠫᠧᠷᠰ ᠤᠨ ᠬᠠᠭᠠᠨ ᠺᠦᠷᠣᠰ ᠤᠨ ᠰᠦᠨᠡᠰᠦ ᠶᠢ ᠬᠥᠳᠡᠯᠭᠡᠭᠰᠡᠨ ᠳᠦ᠂ ᠲᠡᠷᠡ ᠵᠠᠷᠯᠢᠭ ᠪᠠᠭᠤᠯᠭᠠᠭᠰᠠᠨ ᠪᠥᠭᠡᠳ ᠡᠨᠡ ᠵᠠᠷᠯᠢᠭ ᠢᠶᠠᠨ ᠪᠢᠴᠢᠭᠦᠯᠦᠨ ᠬᠠᠭᠠᠨᠴᠢᠯᠠᠯ ᠳᠠᠶᠠᠭᠠᠷ ᠢᠶᠠᠨ ᠲᠤᠩ᠋ᠬᠠᠭᠯᠠᠵᠤ᠄
2 《ᠫᠧᠷᠰ ᠤᠨ ᠬᠠᠭᠠᠨ ᠺᠦᠷᠣᠰ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠲᠩᠷᠢ ᠶᠢᠨ ᠪᠤᠷᠬᠠᠨ ᠶᠣᠬᠣᠸᠠ ᠨᠠᠳᠠ ᠳᠤ ᠳᠡᠯᠡᠬᠡᠢ ᠶᠢᠨ ᠪᠦᠬᠦ ᠬᠠᠭᠠᠨᠴᠢᠯᠠᠯ ᠢ ᠰᠣᠶᠣᠷᠬᠠᠭᠰᠠᠨ ᠪᠢᠯᠡ᠃ ᠲᠡᠷᠡ ᠪᠤᠷᠬᠠᠨ ᠶᠦᠳᠠ ᠳᠠᠬᠢ ᠶᠧᠷᠦ᠋ᠰᠠᠯᠧᠮ ᠳᠤ ᠥᠪᠡᠷ ᠦᠨ ᠬᠢᠨᠢ ᠥᠷᠭᠥᠭᠡ ᠶᠢ ᠪᠠᠷᠢᠬᠤ ᠶᠢ ᠨᠠᠳᠠ ᠳᠤ ᠵᠠᠬᠢᠭᠰᠠᠨ ᠶᠤᠮ᠃ 3 ᠲᠠ ᠨᠠᠷ ᠤᠨ ᠳᠤᠮᠳᠠ ᠲᠡᠭᠦᠨ ᠦ ᠠᠷᠠᠳ ᠲᠦᠮᠡᠨ ᠭᠡᠭᠳᠡᠳᠡᠭ ᠬᠥᠮᠦᠨ ᠪᠠᠢᠭᠠ ᠪᠣᠯ᠂ ᠲᠡᠷᠡ ᠪᠤᠷᠬᠠᠨ ᠲᠡᠭᠦᠨ ᠲᠡᠢ ᠬᠠᠮᠲᠤ ᠪᠠᠢᠬᠤ ᠪᠣᠯᠲᠤᠭᠠᠢ︕ ᠲᠡᠷᠡ ᠬᠥᠮᠦᠨ ᠶᠦᠳᠠ ᠳᠠᠬᠢ ᠶᠧᠷᠦ᠋ᠰᠠᠯᠧᠮ ᠥᠭᠡᠳᠡ ᠶᠠᠪᠤᠵᠤ᠂ ᠢᠰᠷᠧᠯ ᠤᠨ ᠪᠤᠷᠬᠠᠨ ᠶᠣᠬᠣᠸᠠ᠂ ᠶᠧᠷᠦ᠋ᠰᠠᠯᠧᠮ ᠳᠠᠬᠢ ᠲᠡᠷᠡ ᠪᠤᠷᠬᠠᠨ ᠤ ᠥᠷᠭᠥᠭᠡ ᠶᠢ ᠪᠠᠷᠢᠯᠴᠠᠵᠤ ᠪᠣᠯᠣᠨᠠ᠃ 4 ᠬᠠᠮᠢᠭᠠ ᠨᠢᠭᠡᠨ ᠭᠠᠵᠠᠷ ᠲᠤ ᠠᠮᠢᠳᠤᠷᠠᠵᠤ ᠪᠠᠢᠭᠠ ᠠᠮᠢᠳᠤ ᠦᠯᠡᠳᠡᠭᠰᠡᠨ ᠪᠦᠬᠦ ᠶᠦᠳᠠ ᠬᠥᠮᠦᠨ ᠢ ᠲᠡᠷᠡ ᠭᠠᠵᠠᠷ ᠤᠨ ᠬᠥᠮᠦᠰ ᠨᠢ ᠶᠧᠷᠦ᠋ᠰᠠᠯᠧᠮ ᠳᠠᠬᠢ ᠪᠤᠷᠬᠠᠨ ᠤ ᠥᠷᠭᠥᠭᠡᠨ ᠦ ᠲᠥᠯᠥᠭᠡ ᠠᠯᠲᠠ᠂ ᠮᠥᠩᠭᠥ᠂ ᠡᠳ᠋ ᠪᠠᠷᠠᠭᠠ᠂ ᠮᠠᠯ ᠰᠦᠷᠦᠭ ᠪᠣᠯᠣᠨ ᠰᠠᠢᠨ ᠳᠤᠷᠠ ᠶᠢᠨ ᠡᠷᠭᠦᠯ ᠢᠶᠡᠷ ᠳᠡᠮᠵᠢᠭᠡᠷᠡᠢ〉》 ᠭᠡᠪᠡ᠃
5 ᠢᠩᠭᠢᠭᠡᠳ ᠶᠦᠳᠠ ᠪᠣᠯᠣᠨ ᠪᠢᠨᠶᠠᠮᠢᠨ ᠤ ᠠᠢᠮᠠᠭ ᠤᠳ ᠤᠨ ᠲᠡᠷᠢᠭᠦᠳ᠂ ᠲᠠᠬᠢᠯᠴᠢᠳ᠂ ᠯᠧᠸᠢᠴᠦᠳ ᠭᠡᠬᠦᠴᠢᠯᠡᠨ ᠰᠦᠨᠡᠰᠦ ᠨᠢ ᠪᠤᠷᠬᠠᠨ ᠳᠤ ᠬᠥᠳᠡᠯᠭᠡᠭᠳᠡᠭᠰᠡᠨ ᠬᠥᠮᠦᠰ ᠪᠦᠭᠦᠳᠡᠭᠡᠷ ᠢᠶᠡᠨ ᠪᠣᠰᠴᠠᠭᠠᠵᠤ᠂ ᠶᠧᠷᠦ᠋ᠰᠠᠯᠧᠮ ᠳᠠᠬᠢ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡ ᠶᠢ ᠪᠠᠷᠢᠬᠤ ᠪᠠᠷ ᠶᠠᠪᠤᠬᠤ ᠪᠣᠯᠪᠠ᠃ 6 ᠲᠡᠳᠡᠨ ᠦ ᠪᠦᠬᠦ ᠬᠥᠷᠰᠢ ᠠᠯᠲᠠ ᠮᠥᠩᠭᠥᠨ ᠬᠡᠷᠡᠭᠰᠡᠯ᠂ ᠡᠳ᠋ ᠪᠠᠷᠠᠭᠠ᠂ ᠮᠠᠯ ᠰᠦᠷᠦᠭ᠂ ᠦᠨᠡᠲᠦ ᠵᠦᠢᠯᠡᠰ ᠬᠢᠭᠡᠳ ᠰᠠᠢᠨ ᠳᠤᠷᠠ ᠶᠢᠨ ᠡᠷᠭᠦᠯ ᠢᠶᠡᠷ ᠲᠡᠳᠡᠨ ᠢ ᠤᠷᠮᠠᠰᠢᠭᠤᠯᠵᠠᠢ᠃ 7 ᠮᠥᠨ ᠺᠦᠷᠣᠰ ᠬᠠᠭᠠᠨ ᠪᠡᠷ ᠨᠧᠪᠦ᠋ᠺᠠᠨᠧᠽᠠᠷ ᠤᠨ ᠶᠧᠷᠦ᠋ᠰᠠᠯᠧᠮ ᠳᠠᠬᠢ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠡᠴᠡ ᠠᠪᠴᠤ ᠭᠠᠷᠭᠠᠨ᠂ ᠥᠪᠡᠷ ᠦᠨ ᠢᠶᠠᠨ ᠪᠤᠷᠬᠠᠳ ᠤᠨ ᠳᠤᠭᠠᠩ ᠳᠤ ᠲᠠᠯᠪᠢᠵᠤ ᠪᠠᠢᠭᠰᠠᠨ ᠬᠡᠷᠡᠭᠰᠡᠯ ᠤᠳ ᠢ ᠭᠠᠷᠭᠠᠵᠤ ᠥᠭᠪᠡ᠃ 8 ᠫᠧᠷᠰ ᠤᠨ ᠬᠠᠭᠠᠨ ᠺᠦᠷᠣᠰ ᠲᠡᠳᠡᠭᠡᠷ ᠬᠡᠷᠡᠭᠰᠡᠯ ᠢ ᠰᠠᠩ ᠤᠨ ᠨᠢᠷᠪᠠ ᠮᠢᠲ᠋ᠷᠧᠳᠠᠲ ᠢᠶᠠᠷ ᠭᠠᠷᠭᠠᠭᠤᠯᠵᠤ ᠲᠣᠭᠠᠯᠠᠭᠤᠯᠤᠭᠠᠳ ᠶᠦᠳᠠ ᠶᠢᠨ ᠨᠣᠶᠠᠨ ᠱᠧᠱᠪᠠᠽᠠᠷ ᠲᠤ ᠥᠭᠪᠡ᠃ 9 ᠲᠡᠳᠡᠭᠡᠷ ᠢ ᠲᠣᠭᠠᠯᠠᠬᠤ ᠳᠤ ᠠᠯᠲᠠᠨ ᠲᠠᠪᠠᠭ ᠭᠤᠴᠢ᠂ ᠮᠥᠩᠭᠥᠨ ᠲᠠᠪᠠᠭ ᠮᠢᠩ᠋ᠭᠠ᠂ ᠬᠢᠲᠤᠭᠠ ᠬᠣᠷᠢ ᠶᠢᠰᠦ᠂ 10 ᠠᠯᠲᠠᠨ ᠠᠶᠠᠭᠠ ᠭᠤᠴᠢ᠂ ᠶᠠᠩᠵᠤ ᠪᠦᠷᠢ ᠶᠢᠨ ᠮᠥᠩᠭᠥᠨ ᠠᠶᠠᠭᠠ ᠳᠥᠷᠪᠡᠨ ᠵᠠᠭᠤ ᠠᠷᠪᠠ᠂ ᠪᠤᠰᠤᠳ ᠬᠡᠷᠡᠭᠰᠡᠯ ᠮᠢᠩ᠋ᠭᠠ᠂ 11 ᠨᠡᠢᠲᠡ ᠲᠠᠪᠤᠨ ᠮᠢᠩ᠋ᠭᠠ ᠳᠥᠷᠪᠡᠨ ᠵᠠᠭᠤᠨ ᠠᠯᠲᠠ ᠮᠥᠩᠭᠥᠨ ᠬᠡᠷᠡᠭᠰᠡᠯ ᠪᠠᠢᠪᠠ᠃ ᠴᠥᠯᠡᠭᠳᠡᠭᠰᠡᠳ ᠪᠠᠪᠢᠯᠣᠨ ᠠᠴᠠ ᠶᠧᠷᠦ᠋ᠰᠠᠯᠧᠮ ᠤᠷᠤᠭᠤ ᠣᠴᠢᠬᠤ ᠳᠤ᠂ ᠱᠧᠱᠪᠠᠽᠠᠷ ᠡᠨᠡ ᠪᠦᠭᠦᠳᠡ ᠶᠢ ᠠᠪᠴᠤ ᠶᠠᠪᠤᠭᠰᠠᠨ ᠪᠠᠢᠨᠠ᠃