ᠡᠽᠷᠠ ᠳᠥᠷᠪᠡ
ᠳᠠᠢᠰᠤᠨ ᠨᠤᠭᠤᠳ ᠤᠨ ᠡᠰᠡᠷᠭᠦᠴᠡᠯ
1 ᠴᠥᠯᠡᠯᠭᠡ ᠡᠴᠡ ᠢᠷᠡᠭᠰᠡᠨ ᠬᠥᠮᠦᠰ ᠢᠰᠷᠧᠯ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠳᠤ ᠣᠷᠳᠣᠨ ᠪᠠᠷᠢᠵᠤ ᠪᠠᠢᠭᠠ ᠶᠢ ᠶᠦᠳᠠ᠂ ᠪᠢᠨᠶᠠᠮᠢᠨ ᠤ ᠳᠠᠢᠰᠤᠨ ᠨᠤᠭᠤᠳ ᠰᠣᠨᠣᠰᠣᠭᠠᠳ 2 ᠽᠣᠷᠣᠪᠠᠪᠧᠯ ᠪᠣᠯᠣᠨ ᠠᠢᠮᠠᠭ ᠤᠳ ᠤᠨ ᠲᠡᠷᠢᠭᠦᠳ ᠲᠦ᠄ 《ᠪᠢᠳᠡ ᠲᠠ ᠨᠠᠷ ᠲᠠᠢ ᠬᠠᠮᠲᠤ ᠪᠠᠷᠢᠶᠠ᠃ ᠪᠢᠳᠡ ᠴᠤ ᠲᠠ ᠨᠠᠷ ᠲᠠᠢ ᠠᠳᠠᠯᠢ ᠲᠠᠨ ᠤ ᠪᠤᠷᠬᠠᠨ ᠢ ᠬᠠᠢᠳᠠᠭ ᠶᠤᠮ᠃ ᠠᠰᠢᠷᠢᠶᠠ ᠶᠢᠨ ᠬᠠᠭᠠᠨ ᠡᠰᠠᠷᠬᠠᠳᠣᠨ ᠪᠢᠳᠡᠨ ᠢ ᠡ᠊ᠨᠳᠡ ᠨᠡᠭᠦᠯᠭᠡᠭᠰᠡᠨ ᠡᠳᠦᠷ ᠡᠴᠡ ᠬᠣᠢᠰᠢ ᠪᠢᠳᠡ ᠪᠤᠷᠬᠠᠨ ᠳᠤ ᠲᠠᠬᠢᠯ ᠡᠷᠭᠦᠭᠰᠡᠭᠡᠷ ᠢᠷᠡᠭᠰᠡᠨ》 ᠭᠡᠪᠡ᠃ 3 ᠽᠣᠷᠣᠪᠠᠪᠧᠯ᠂ ᠶᠧᠱᠦ᠋ᠶᠠ ᠪᠣᠯᠣᠨ ᠢᠰᠷᠧᠯ ᠤᠨ ᠠᠢᠮᠠᠭ ᠤᠳ ᠤᠨ ᠪᠤᠰᠤᠳ ᠲᠡᠷᠢᠭᠦᠳ᠄ 《ᠪᠢᠳᠡᠨ ᠦ ᠪᠤᠷᠬᠠᠨ ᠤ ᠪᠠᠨ ᠥᠷᠭᠥᠭᠡ ᠶᠢ ᠪᠠᠷᠢᠬᠤ ᠨᠢ ᠲᠠ ᠨᠠᠷ ᠲᠠᠢ ᠬᠠᠮᠢᠶᠠ ᠦᠭᠡᠢ︕ ᠪᠢᠳᠡ ᠥᠪᠡᠷᠰᠡᠳ ᠢᠶᠡᠨ ᠯᠠ ᠫᠧᠷᠰ ᠤᠨ ᠬᠠᠭᠠᠨ ᠺᠦᠷᠣᠰ ᠤᠨ ᠲᠤᠰᠢᠶᠠᠭᠰᠠᠨ ᠶᠣᠰᠣᠭᠠᠷ ᠢᠰᠷᠧᠯ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠳᠤ ᠵᠣᠷᠢᠭᠤᠯᠤᠨ ᠪᠣᠰᠬᠠᠨᠠ》 ᠭᠡᠪᠡ᠃
4 ᠡᠷᠭᠢᠨ ᠲᠣᠭᠣᠷᠢᠨ ᠤ ᠬᠢᠨᠢ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠶᠦᠳᠠ ᠶᠢᠨ ᠠᠷᠠᠳ ᠲᠦᠮᠡᠨ ᠢ ᠠᠶᠤᠯᠭᠠᠨ᠂ ᠪᠠᠷᠢᠬᠤ ᠵᠣᠷᠢᠭ ᠢ ᠨᠢ ᠮᠣᠬᠣᠭᠠᠬᠤ ᠭᠡᠵᠦ 5 ᠲᠦᠰᠢᠮᠡᠳ ᠢ ᠬᠠᠬᠤᠤᠯᠢᠳᠠᠵᠤ ᠪᠠᠢᠭᠠᠳ ᠫᠧᠷᠰ ᠤᠨ ᠬᠠᠭᠠᠨ ᠺᠦᠷᠣᠰ ᠤᠨ ᠪᠦᠬᠦ ᠡᠳᠦᠷ ᠤᠳ ᠠᠴᠠ ᠫᠧᠷᠰ ᠤᠨ ᠬᠠᠭᠠᠨ ᠳ᠋ᠠᠷᠢᠶᠦ᠋ ᠬᠠᠭᠠᠨᠴᠢᠯᠠᠬᠤ ᠬᠦᠷᠲᠡᠯᠡ ᠶᠦᠳᠠ ᠶᠢᠨ ᠠᠷᠠᠳ ᠲᠦᠮᠡᠨ ᠦ ᠲᠥᠯᠥᠪᠯᠡᠭᠡ ᠳᠦ ᠰᠠᠭᠠᠳ ᠬᠢᠭᠰᠡᠨ ᠪᠠᠢᠨᠠ᠃
6 ᠠᠬᠠᠰᠦ᠋ᠶᠧᠷᠦ᠋ ᠶᠢᠨ ᠬᠠᠭᠠᠨᠴᠢᠯᠠᠯ ᠤᠨ ᠡᠬᠢᠨ ᠤ ᠦᠶᠡ ᠳᠦ᠂ ᠲᠡᠳᠡ ᠶᠧᠷᠦ᠋ᠰᠠᠯᠧᠮ ᠪᠠ ᠶᠦᠳᠠ ᠶᠢᠨ ᠰᠠᠭᠤᠭᠠᠯᠢᠴᠢᠳ ᠢ ᠵᠠᠭᠠᠯᠳᠤᠬᠤ ᠪᠢᠴᠢᠭ ᠪᠢᠴᠢᠪᠡ᠃
7 ᠮᠥᠨ ᠠᠷᠲ᠋ᠠᠱᠠᠰᠲ᠋ᠠ ᠶᠢᠨ ᠡᠳᠦᠷ ᠤᠳ ᠲᠤ ᠪᠢᠱᠯᠠᠮ᠂ ᠮᠢᠲ᠋ᠷᠧᠳᠠᠲ᠂ ᠲᠠᠪᠧᠯ ᠨᠠᠷ ᠬᠠᠮᠲᠤᠷᠠᠭᠴᠢᠳ ᠲᠠᠢ ᠪᠠᠨ ᠫᠧᠷᠰ ᠤᠨ ᠬᠠᠭᠠᠨ ᠠᠷᠲ᠋ᠠᠱᠠᠰᠲ᠋ᠠ ᠳᠤ ᠵᠠᠬᠢᠳᠠᠯ ᠪᠢᠴᠢᠵᠡᠢ᠃ ᠲᠡᠷᠡ ᠵᠠᠬᠢᠳᠠᠯ ᠨᠢ ᠠᠷᠠᠮ ᠦᠰᠦᠭ᠂ ᠠᠷᠠᠮ ᠬᠡᠯᠡ ᠪᠡᠷ ᠪᠢᠴᠢᠭᠳᠡᠭᠰᠡᠨ ᠪᠠᠢᠯᠠ᠃ 8 ᠵᠠᠬᠢᠷᠤᠭᠴᠢ ᠷᠧᠾᠦ᠋ᠮ ᠪᠣᠯᠣᠨ ᠪᠢᠴᠢᠭᠡᠴᠢ ᠰᠢᠮᠱᠠᠢ ᠨᠠᠷ ᠴᠤ ᠠᠷᠲ᠋ᠠᠱᠠᠰᠲ᠋ᠠ ᠬᠠᠭᠠᠨ ᠳᠤ ᠶᠧᠷᠦ᠋ᠰᠠᠯᠧᠮᠴᠤᠳ ᠢ ᠵᠠᠭᠠᠯᠳᠤᠬᠤ ᠵᠠᠬᠢᠳᠠᠯ ᠪᠢᠴᠢᠪᠡ᠃ 9 ᠮᠥᠨ ᠵᠠᠬᠢᠷᠤᠭᠴᠢ ᠷᠧᠾᠦ᠋ᠮ᠂ ᠪᠢᠴᠢᠭᠡᠴᠢ ᠰᠢᠮᠱᠠᠢ ᠠᠴᠠ ᠭᠠᠳᠠᠨᠠ ᠲᠡᠳᠡᠨ ᠦ ᠪᠤᠰᠤᠳ ᠬᠠᠮᠲᠤᠷᠠᠭᠴᠢᠳ᠂ ᠲᠤᠬᠠᠢᠯᠠᠪᠠᠯ ᠰᠢᠭᠦᠭᠴᠢᠳ᠂ ᠵᠠᠬᠢᠷᠤᠭᠴᠢᠳ᠂ ᠲᠦᠰᠢᠮᠡᠳ᠂ ᠫᠧᠷᠰᠴᠤᠳ᠂ ᠡᠷᠧᠺᠴᠤᠳ᠂ ᠪᠠᠪᠢᠯᠣᠨᠴᠤᠳ᠂ ᠰᠦᠰᠠ ᠳᠠᠬᠢ ᠡᠯᠠᠮᠴᠤᠳ ᠬᠢᠭᠡᠳ 10 ᠠᠭᠤᠤ ᠬᠦᠨᠳᠦᠲᠦ ᠣᠰᠨᠠᠫᠠᠷ ᠤᠨ ᠰᠠᠮᠠᠷᠢᠶᠠ ᠬᠣᠲᠠ ᠵᠡᠷᠭᠡ ᠡᠶᠦ᠋ᠹᠷᠠᠲ᠋ᠧᠰ ᠮᠥᠷᠡᠨ ᠦ ᠥᠷᠥᠨᠡ ᠲᠠᠯᠠ ᠶᠢᠨ ᠨᠤᠲᠤᠭ ᠲᠤ ᠰᠢᠯᠵᠢᠭᠦᠯᠦᠨ ᠰᠠᠭᠤᠷᠢᠰᠢᠭᠤᠯᠤᠭᠰᠠᠨ ᠪᠤᠰᠤᠳ ᠦᠨᠳᠦᠰᠦᠲᠠ ᠨᠦᠭᠦᠳ ᠴᠤ ᠨᠡᠷᠡ ᠬᠣᠯᠪᠣᠨ ᠪᠢᠴᠢᠵᠡᠢ᠃ 11 ᠲᠡᠳᠡᠨ ᠦ ᠢᠯᠡᠭᠡᠭᠰᠡᠨ ᠵᠠᠬᠢᠳᠠᠯ ᠤᠨ ᠬᠠᠭᠤᠯᠪᠤᠷᠢ ᠡᠨᠡ ᠪᠠᠢᠨᠠ᠄ 《ᠠᠷᠲ᠋ᠠᠱᠠᠰᠲ᠋ᠠ ᠬᠠᠭᠠᠨ ᠳᠤ᠄ ᠡᠶᠦ᠋ᠹᠷᠠᠲ᠋ᠧᠰ ᠮᠥᠷᠡᠨ ᠦ ᠥᠷᠥᠨᠡ ᠲᠠᠯᠠ ᠳᠤ ᠪᠤᠢ ᠵᠠᠷᠤᠴᠠ ᠠᠴᠠ ᠲᠠᠨᠢ᠂ 12 ᠲᠠᠨ ᠤ ᠲᠡᠨᠳᠡ ᠡᠴᠡ ᠮᠠᠨ ᠤ ᠡ᠊ᠨᠳᠡ ᠢᠷᠡᠭᠰᠡᠨ ᠶᠦᠳᠠᠢᠴᠤᠳ ᠶᠧᠷᠦ᠋ᠰᠠᠯᠧᠮ ᠳᠤ ᠣᠴᠢᠵᠤ᠂ ᠨᠥᠭᠥᠭᠡ ᠮᠠᠭᠤ ᠲᠡᠷᠰᠯᠡᠭᠦᠦ ᠬᠣᠲᠠ ᠶᠢ ᠰᠡᠷᠭᠦᠭᠡᠵᠦ ᠪᠠᠢᠬᠤ ᠶᠢ ᠬᠠᠭᠠᠨ ᠳᠤ ᠮᠡᠳᠡᠭᠦᠯᠦᠶᠡ︕ ᠲᠡᠳᠡ ᠬᠡᠷᠡᠮ ᠢ ᠨᠢ ᠪᠠᠷᠢᠵᠤ ᠳᠠᠭᠤᠰᠬᠠᠭᠠᠳ ᠰᠠᠭᠤᠷᠢ ᠶᠢ ᠨᠢ ᠵᠠᠰᠠᠵᠤ ᠪᠠᠢᠨᠠ︕ 13 ᠲᠡᠷᠡ ᠬᠣᠲᠠ ᠶᠢ ᠳᠠᠬᠢᠨ ᠪᠣᠰᠬᠠᠵᠤ᠂ ᠬᠡᠷᠡᠮ ᠤᠳ ᠢ ᠨᠢ ᠪᠠᠷᠢᠵᠤ ᠳᠠᠭᠤᠰᠬᠠᠬᠤ ᠶᠤᠮ ᠪᠣᠯ ᠲᠡᠳᠡ ᠠᠯᠪᠠ ᠭᠤᠪᠴᠢᠭᠤᠷ᠂ ᠭᠠᠢᠯᠢ᠂ ᠲᠠᠲᠠᠪᠤᠷᠢ ᠲᠥᠯᠥᠬᠦ ᠦᠭᠡᠢ ᠪᠣᠯᠣᠨᠠ ᠭᠡᠳᠡᠭ ᠢ ᠬᠠᠭᠠᠨ ᠳᠤ ᠮᠡᠳᠡᠭᠦᠯᠦᠶᠡ︕ ᠲᠡᠭᠡᠪᠡᠯ ᠬᠠᠭᠠᠳ ᠤᠨ ᠣᠷᠣᠯᠭᠠ ᠴᠤ ᠬᠠᠰᠤᠭᠳᠠᠬᠤ ᠪᠣᠯᠣᠨᠠ︕ 14 ᠪᠢᠳᠡ ᠬᠠᠭᠠᠨ ᠤ ᠣᠷᠳᠣᠨ ᠤ ᠳᠠᠪᠤᠰᠤ ᠶᠢ ᠬᠦᠷᠲᠡᠳᠡᠭ ᠤᠴᠢᠷ ᠠᠴᠠ ᠬᠠᠭᠠᠨ ᠤ ᠳᠣᠷᠣᠮᠵᠢᠯᠠᠭᠳᠠᠬᠤ ᠶᠢ ᠦᠵᠡᠵᠦ ᠲᠦᠪᠳᠡᠬᠦ ᠦᠭᠡᠢ ᠡᠨᠡ ᠵᠠᠬᠢᠳᠠᠯ ᠢ ᠢᠯᠡᠭᠡᠨ ᠬᠠᠭᠠᠨ ᠳᠤ ᠮᠡᠳᠡᠭᠳᠡᠵᠦ ᠪᠠᠢᠨᠠ᠃ 15 ᠬᠡᠷᠪᠡ ᠲᠠ ᠡᠴᠢᠭᠡ ᠡᠪᠦᠭᠡᠳ ᠦᠨ ᠢᠶᠠᠨ ᠪᠢᠴᠢᠮᠡᠯ ᠬᠠᠳᠠᠭᠠᠯᠠᠬᠤ ᠭᠠᠵᠠᠷ ᠠᠴᠠ ᠯᠠᠪᠯᠠᠭᠤᠯᠪᠠᠯ ᠲᠡᠷᠡ ᠬᠣᠲᠠ ᠲᠡᠷᠰᠯᠡᠭᠦᠦ ᠪᠣᠯᠬᠣᠷ ᠬᠠᠭᠠᠳ ᠪᠣᠯᠣᠨ ᠨᠤᠲᠤᠭ ᠣᠷᠣᠨ ᠳᠤ ᠬᠣᠬᠢᠷᠠᠯ ᠤᠴᠠᠷᠠᠭᠤᠯᠵᠤ ᠪᠠᠢᠭᠰᠠᠨ ᠢ ᠣᠯᠵᠤ ᠮᠡᠳᠡᠬᠦ ᠪᠣᠯᠣᠨᠠ᠃ ᠲᠡᠳᠡ ᠡᠷᠲᠡ ᠴᠠᠭ ᠠᠴᠠ ᠬᠣᠲᠠ ᠳᠣᠲᠣᠷᠠ ᠪᠠᠨ ᠤᠷᠪᠠᠯᠭᠠᠨ ᠳᠡᠭᠳᠡᠭᠡᠵᠦ ᠪᠠᠢᠭᠰᠠᠨ ᠢᠶᠠᠷ ᠲᠡᠷᠡ ᠬᠣᠲᠠ ᠤᠰᠠᠳᠬᠤ ᠳᠤ ᠬᠦᠷᠦᠭᠰᠡᠨ ᠶᠤᠮ᠃ 16 ᠬᠡᠷᠪᠡ ᠲᠡᠷᠡ ᠬᠣᠲᠠ ᠶᠢ ᠳᠠᠬᠢᠨ ᠪᠣᠰᠬᠠᠵᠤ᠂ ᠬᠡᠷᠡᠮ ᠢ ᠨᠢ ᠪᠠᠷᠢᠵᠤ ᠳᠠᠭᠤᠰᠪᠠᠯ᠂ ᠲᠠ ᠡᠶᠦ᠋ᠹᠷᠠᠲ᠋ᠧᠰ ᠮᠥᠷᠡᠨ ᠦ ᠥᠷᠥᠨᠡ ᠵᠦᠭ ᠲᠦ ᠶᠠᠮᠠᠷ ᠴᠤ ᠡᠵᠡᠮᠰᠢᠯ ᠦᠭᠡᠢ ᠪᠣᠯᠣᠨᠠ ᠭᠡᠳᠡᠭ ᠢ ᠪᠢᠳᠡ ᠬᠠᠭᠠᠨ ᠲᠠᠨ ᠳᠤ ᠮᠡᠳᠡᠭᠳᠡᠶᠡ》 ᠭᠡᠪᠡ᠃
17 ᠬᠠᠭᠠᠨ ᠬᠠᠷᠢᠭᠤ ᠢᠯᠡᠭᠡᠪᠡ᠄ 《ᠵᠠᠬᠢᠷᠤᠭᠴᠢ ᠷᠧᠾᠦ᠋ᠮ᠂ ᠪᠢᠴᠢᠭᠡᠴᠢ ᠰᠢᠮᠱᠠᠢ᠂ ᠮᠥᠨ ᠰᠠᠮᠠᠷᠢᠶᠠ ᠬᠢᠭᠡᠳ ᠡᠶᠦ᠋ᠹᠷᠠᠲ᠋ᠧᠰ ᠮᠥᠷᠡᠨ ᠦ ᠥᠷᠥᠨᠡ ᠲᠠᠯᠠ ᠳᠤ ᠰᠠᠭᠤᠳᠠᠭ ᠲᠡᠳᠡᠨ ᠦ ᠪᠤᠰᠤᠳ ᠬᠠᠮᠲᠤᠷᠠᠭᠴᠢᠳ ᠲᠤ ᠠᠮᠤᠷ ᠲᠠᠢᠪᠤᠩ ᠪᠠᠢᠬᠤ ᠪᠣᠯᠲᠤᠭᠠᠢ︕ 18 ᠲᠠ ᠨᠠᠷ ᠤᠨ ᠢᠯᠡᠭᠡᠭᠰᠡᠨ ᠵᠠᠬᠢᠳᠠᠯ ᠮᠢᠨᠦ ᠡᠮᠦᠨᠡ ᠣᠷᠴᠢᠭᠤᠯᠤᠭᠳᠠᠵᠤ ᠤᠩ᠋ᠰᠢᠭᠳᠠᠭᠰᠠᠨ ᠪᠢᠯᠡ᠃ 19 ᠪᠢ ᠵᠠᠷᠯᠢᠭ ᠭᠠᠷᠭᠠᠵᠤ ᠯᠠᠪᠯᠠᠭᠤᠯᠤᠭᠰᠠᠨ ᠳᠤ᠂ ᠲᠡᠷᠡ ᠬᠣᠲᠠ ᠡᠷᠲᠡ ᠴᠠᠭ ᠠᠴᠠ ᠬᠠᠭᠠᠳ ᠤᠨ ᠡᠰᠡᠷᠭᠦ ᠪᠣᠰᠴᠤ ᠪᠠᠢᠭᠰᠠᠨ ᠪᠥᠭᠡᠳ ᠲᠡᠷᠡ ᠬᠣᠲᠠ ᠶᠢᠨ ᠳᠣᠲᠣᠷᠠ ᠤᠷᠪᠠᠯᠭᠠᠨ ᠪᠣᠰᠣᠯᠭᠠ ᠳᠡᠭᠳᠡᠵᠦ ᠪᠠᠢᠭᠰᠠᠨ ᠭᠡᠳᠡᠭ ᠢ᠂ 20 ᠮᠥᠨ ᠳᠡᠭᠡᠷᠡ ᠦᠶᠡ ᠳᠦ ᠶᠧᠷᠦ᠋ᠰᠠᠯᠧᠮ ᠤᠨ ᠬᠦᠴᠦᠷᠬᠡᠭ ᠬᠠᠭᠠᠳ ᠡᠶᠦ᠋ᠹᠷᠠᠲ᠋ᠧᠰ ᠮᠥᠷᠡᠨ ᠦ ᠥᠷᠥᠨᠡ ᠳᠠᠬᠢ ᠪᠦᠬᠦ ᠭᠠᠵᠠᠷ ᠢ ᠵᠠᠬᠢᠷᠴᠤ᠂ ᠥᠪᠡᠷᠰᠡᠳ ᠲᠡᠭᠡᠨ ᠠᠯᠪᠠ ᠭᠤᠪᠴᠢᠭᠤᠷ᠂ ᠭᠠᠢᠯᠢ ᠪᠠ ᠲᠠᠲᠠᠪᠤᠷᠢ ᠲᠥᠯᠥᠭᠦᠯᠵᠦ ᠪᠠᠢᠭᠰᠠᠨ ᠭᠡᠳᠡᠭ ᠢ ᠣᠯᠵᠤ ᠮᠡᠳᠡᠯᠡ᠃ 21 ᠣᠳᠣ ᠲᠠ ᠨᠠᠷ ᠵᠠᠷᠯᠢᠭ ᠪᠠᠭᠤᠯᠭᠠᠵᠤ ᠲᠡᠷᠡ ᠬᠥᠮᠦᠰ ᠦᠨ ᠠᠵᠢᠯ ᠢ ᠵᠣᠭᠰᠣᠭᠠ᠂ ᠮᠢᠨᠦ ᠵᠠᠷᠯᠢᠭ ᠭᠠᠷᠬᠤ ᠠᠴᠠ ᠨᠠᠰᠢ ᠲᠡᠷᠡ ᠬᠣᠲᠠ ᠶᠢ ᠪᠣᠰᠬᠠᠵᠤ ᠪᠣᠯᠬᠤ ᠦᠭᠡᠢ᠃ 22 ᠡᠨᠡ ᠬᠡᠷᠡᠭ ᠲᠦ ᠬᠠᠢᠩ᠋ᠭᠤ ᠬᠠᠨᠳᠤᠬᠤ ᠠᠴᠠ ᠪᠣᠯᠭᠣᠮᠵᠢᠯᠠ᠃ ᠡᠨᠡ ᠬᠣᠣᠷ ᠬᠥᠨᠥᠭᠡᠯ ᠢ ᠶᠡᠬᠡᠰᠭᠡᠵᠦ ᠬᠠᠭᠠᠳ ᠲᠤ ᠬᠣᠬᠢᠷᠠᠯ ᠤᠴᠠᠷᠠᠭᠤᠯᠵᠤ ᠶᠠᠭᠠᠬᠢᠬᠤ ᠪᠤᠢ︖》 ᠭᠡᠵᠡᠢ᠃
23 ᠠᠷᠲ᠋ᠠᠱᠠᠰᠲ᠋ᠠ ᠬᠠᠭᠠᠨ ᠤ ᠪᠢᠴᠢᠭ ᠤᠨ ᠬᠠᠭᠤᠯᠪᠤᠷᠢ ᠶᠢ ᠷᠧᠾᠦ᠋ᠮ᠂ ᠪᠢᠴᠢᠭᠡᠴᠢ ᠰᠢᠮᠱᠠᠢ ᠪᠣᠯᠣᠨ ᠲᠡᠳᠡᠨ ᠦ ᠬᠠᠮᠲᠤᠷᠠᠭᠴᠢᠳ ᠤᠨ ᠡᠮᠦᠨᠡ ᠤᠩ᠋ᠰᠢᠮᠠᠭᠴᠠ ᠲᠡᠳᠡ ᠶᠧᠷᠦ᠋ᠰᠠᠯᠧᠮ ᠳᠠᠬᠢ ᠶᠦᠳᠠᠢᠴᠤᠳ ᠤᠷᠤᠭᠤ ᠲᠦᠷᠭᠡᠨ ᠣᠴᠢᠵᠤ᠂ ᠵᠡᠪᠰᠡᠭ ᠦᠨ ᠬᠦᠴᠦ ᠪᠡᠷ ᠠᠵᠢᠯ ᠢ ᠨᠢ ᠵᠣᠭᠰᠣᠭᠠᠪᠠ᠃ 24 ᠲᠡᠢᠨ ᠬᠦ ᠶᠧᠷᠦ᠋ᠰᠠᠯᠧᠮ ᠳᠠᠬᠢ ᠪᠤᠷᠬᠠᠨ ᠤ ᠥᠷᠭᠥᠭᠡᠨ ᠦ ᠠᠵᠢᠯ ᠫᠧᠷᠰ ᠤᠨ ᠬᠠᠭᠠᠨ ᠳ᠋ᠠᠷᠢᠶᠦ᠋ ᠶᠢᠨ ᠬᠠᠭᠠᠨᠴᠢᠯᠠᠯ ᠤᠨ ᠬᠣᠶᠠᠳᠤᠭᠠᠷ ᠣᠨ ᠬᠦᠷᠲᠡᠯᠡ ᠵᠣᠭᠰᠣᠭᠰᠠᠨ ᠪᠠᠢᠪᠠ᠃