ᠡᠽᠷᠠ ᠠᠷᠪᠠ
ᠠᠷᠠᠳ ᠲᠦᠮᠡᠨ ᠨᠢᠭᠦᠯ ᠢᠶᠡᠨ ᠤᠯᠠᠢᠪᠠ
1 ᠡᠽᠷᠠ ᠪᠤᠷᠬᠠᠨ ᠤ ᠥᠷᠭᠥᠭᠡᠨ ᠦ ᠡᠮᠦᠨᠡ ᠰᠤᠨᠤᠨ ᠮᠥᠷᠭᠥᠵᠦ ᠤᠬᠢᠯᠠᠭᠰᠠᠭᠠᠷ ᠨᠢᠭᠦᠯ ᠢᠶᠡᠨ ᠥᠴᠢᠨ ᠳᠠᠭᠠᠳᠬᠠᠵᠤ ᠪᠠᠢᠬᠤ ᠳᠤ᠂ ᠡᠷᠡᠭᠲᠡᠢᠴᠦᠳ᠂ ᠡᠮᠡᠭᠲᠡᠢᠴᠦᠳ᠂ ᠬᠡᠦᠬᠡᠳ ᠤᠳ ᠪᠣᠯᠣᠨ ᠢᠰᠷᠧᠯ ᠤᠨ ᠦᠢ ᠣᠯᠠᠨ ᠲᠡᠭᠦᠨ ᠤᠷᠤᠭᠤ ᠴᠤᠭᠯᠠᠷᠠᠵᠠᠢ᠃ ᠲᠡᠳᠡ ᠴᠤ ᠭᠠᠰᠢᠭᠤᠨ ᠢᠶᠠᠷ ᠤᠬᠢᠯᠠᠵᠠᠭᠠᠪᠠ᠃ 2 ᠡᠯᠠᠮ ᠤᠨ ᠦᠷᠡ ᠤᠳᠤᠮ ᠤᠨ ᠨᠢᠭᠡ᠂ ᠶᠧᠾᠢᠶᠧᠯ ᠤᠨ ᠬᠦᠦ ᠱᠧᠺᠠᠨᠢᠶᠠ ᠡᠽᠷᠠ ᠳᠤ᠄ 《ᠡᠨᠡ ᠭᠠᠵᠠᠷ ᠤᠨ ᠬᠠᠷᠢ ᠦᠨᠳᠦᠰᠦᠲᠡᠨ ᠦ ᠡᠮᠡᠭᠲᠡᠢᠴᠦᠳ ᠲᠡᠢ ᠭᠡᠷᠯᠡᠭᠰᠡᠨ ᠢᠶᠡᠷ ᠢᠶᠠᠨ ᠪᠢᠳᠡ ᠪᠤᠷᠬᠠᠨ ᠳᠠᠭᠠᠨ ᠢᠲᠡᠭᠡᠮᠵᠢ ᠦᠭᠡᠢ ᠬᠠᠨᠳᠤᠭᠰᠠᠨ ᠶᠤᠮ᠂ ᠭᠡᠪᠡᠴᠦ ᠢᠰᠷᠧᠯ ᠳᠤ ᠣᠳᠣ ᠨᠠᠢᠳᠠᠪᠤᠷᠢ ᠪᠠᠢᠨᠠ᠃ 3 ᠣᠳᠣ ᠮᠢᠨᠦ ᠡᠵᠡᠨ᠂ ᠪᠢᠳᠡᠨ ᠦ ᠪᠤᠷᠬᠠᠨ ᠤ ᠲᠤᠰᠢᠶᠠᠯ ᠠᠴᠠ ᠡᠮᠢᠶᠡᠨ ᠴᠡᠴᠡᠷᠡᠳᠡᠭ ᠬᠥᠮᠦᠰ ᠦᠨ ᠵᠥᠪᠯᠡᠯᠭᠡ ᠶᠢ ᠳᠠᠭᠠᠵᠤ᠂ ᠲᠡᠳᠡᠭᠡᠷ ᠡᠬᠡᠨᠡᠷ ᠪᠣᠯᠣᠨ ᠲᠡᠳᠡᠨ ᠦ ᠦᠷᠡ ᠬᠡᠦᠬᠡᠳ ᠢ ᠪᠦᠭᠦᠳᠡ ᠶᠢ ᠬᠥᠭᠡᠭᠡᠨ ᠭᠠᠷᠭᠠᠬᠤ ᠪᠠᠷ ᠪᠤᠷᠬᠠᠨ ᠲᠠᠢ ᠪᠠᠨ ᠭᠡᠷᠡ ᠬᠢᠵᠡᠭᠡᠶᠡ᠂ ᠬᠠᠤᠯᠢ ᠶᠢᠨ ᠳᠠᠭᠠᠤ ᠬᠢᠵᠡᠭᠡᠶᠡ︕ 4 ᠪᠣᠰᠣᠭᠲᠤᠨ︕ ᠡᠨᠡ ᠬᠡᠷᠡᠭ ᠲᠠᠨ ᠤ ᠭᠠᠷ ᠲᠤ ᠪᠠᠢᠨᠠ᠂ ᠪᠢᠳᠡ ᠲᠠᠨ ᠢ ᠳᠡᠮᠵᠢᠶᠡ᠃ ᠵᠣᠷᠢᠭᠲᠠᠢ ᠪᠠᠢᠵᠤ᠂ ᠦᠢᠯᠡᠳᠦᠭᠲᠦᠨ︕》 ᠭᠡᠪᠡ᠃ 5 ᠡᠽᠷᠠ ᠪᠣᠰᠴᠤ᠂ ᠤᠳᠤᠷᠢᠳᠬᠤ ᠲᠠᠬᠢᠯᠴᠢᠳ᠂ ᠯᠧᠸᠢᠴᠦᠳ ᠪᠣᠯᠣᠨ ᠪᠦᠬᠦ ᠢᠰᠷᠧᠯ ᠢᠶᠠᠷ ᠲᠡᠷᠡ ᠦᠭᠡ ᠶᠢᠨ ᠳᠠᠭᠠᠤ ᠦᠢᠯᠡᠳᠬᠦ ᠶᠢ ᠲᠠᠩ᠋ᠭᠠᠷᠢᠭᠯᠠᠭᠤᠯᠬᠤ ᠳᠤ᠂ ᠲᠡᠳᠡ ᠲᠠᠩ᠋ᠭᠠᠷᠢᠭᠯᠠᠪᠠ᠃
6 ᠡᠽᠷᠠ ᠪᠤᠷᠬᠠᠨ ᠤ ᠥᠷᠭᠥᠭᠡᠨ ᠦ ᠡᠮᠦᠨᠡ ᠡᠴᠡ ᠠᠶᠠᠷᠯᠠᠵᠤ᠂ ᠡᠯᠢᠶᠠᠱᠢᠪ ᠤᠨ ᠬᠦᠦ ᠶᠧᠬᠣᠬᠠᠨᠠᠨ ᠤ ᠲᠠᠩᠬᠢᠮ ᠳᠤ ᠣᠷᠣᠵᠤ ᠲᠡᠨᠳᠡ ᠬᠣᠨᠣᠪᠠ᠃ ᠲᠡᠷᠡ ᠪᠡᠷ ᠴᠥᠯᠡᠭᠳᠡᠭᠰᠡᠳ ᠦᠨ ᠢᠲᠡᠭᠡᠯ ᠦᠭᠡᠢ ᠶᠠᠪᠤᠳᠠᠯ ᠠᠴᠠ ᠪᠣᠯᠵᠤ ᠭᠠᠰᠢᠭᠤᠳᠠᠨ ᠪᠣᠣᠪᠣ ᠴᠤ ᠢᠳᠡᠭᠰᠡᠨ ᠦᠭᠡᠢ᠂ ᠤᠰᠤ ᠴᠤ ᠤᠤᠭᠤᠭᠰᠠᠨ ᠦᠭᠡᠢ᠃ 7 ᠴᠥᠯᠡᠯᠭᠡ ᠡᠴᠡ ᠢᠷᠡᠭᠰᠡᠳ ᠪᠦᠭᠦᠳᠡ ᠶᠢᠨ ᠶᠧᠷᠦ᠋ᠰᠠᠯᠧᠮ ᠳᠤ ᠴᠤᠭᠯᠠᠬᠤ ᠶᠣᠰᠣᠲᠠᠢ ᠶᠢ ᠶᠦᠳᠠ ᠪᠠ ᠶᠧᠷᠦ᠋ᠰᠠᠯᠧᠮ ᠳᠠᠶᠠᠭᠠᠷ ᠵᠠᠷᠯᠠᠭᠰᠠᠨ ᠪᠥᠭᠡᠳ 8 ᠭᠤᠷᠪᠠ ᠬᠣᠨᠣᠭ ᠤᠨ ᠳᠣᠲᠣᠷᠠ ᠢᠷᠡᠭᠡ ᠦᠭᠡᠢ ᠬᠥᠮᠦᠨ ᠪᠣᠯᠭᠠᠨ ᠢ ᠤᠳᠤᠷᠢᠳᠤᠭᠴᠢᠳ ᠪᠠ ᠠᠬᠠᠮᠠᠳ ᠤᠳ ᠤᠨ ᠰᠢᠢᠳᠦᠭᠰᠡᠨ ᠶᠣᠰᠣᠭᠠᠷ ᠪᠦᠬᠦ ᠬᠥᠷᠥᠩᠭᠡ ᠶᠢ ᠨᠢ ᠬᠤᠷᠢᠶᠠᠵᠤ᠂ ᠴᠥᠯᠡᠯᠭᠡ ᠡᠴᠡ ᠢᠷᠡᠭᠰᠡᠳ ᠦᠨ ᠴᠢᠭᠤᠯᠭᠠᠨ ᠠᠴᠠ ᠬᠥᠭᠡᠭᠡᠬᠦ ᠪᠡᠷ ᠪᠣᠯᠪᠠ᠃
9 ᠶᠦᠳᠠ ᠪᠣᠯᠣᠨ ᠪᠢᠨᠶᠠᠮᠢᠨ ᠤ ᠡᠷᠡᠴᠦᠳ ᠪᠦᠭᠦᠳᠡᠭᠡᠷ ᠭᠤᠷᠪᠠ ᠬᠣᠨᠣᠭ ᠤᠨ ᠳᠣᠲᠣᠷᠠ ᠶᠧᠷᠦ᠋ᠰᠠᠯᠧᠮ ᠳᠤ ᠴᠤᠭᠯᠠᠪᠠ᠃ ᠶᠢᠰᠦᠳᠦᠭᠡᠷ ᠰᠠᠷᠠ ᠶᠢᠨ ᠬᠣᠷᠢᠨ ᠪᠣᠯᠬᠤ ᠳᠤ᠂ ᠦᠢ ᠣᠯᠠᠨ ᠬᠥᠮᠦᠨ ᠪᠦᠭᠦᠳᠡ ᠡᠨᠡ ᠶᠠᠪᠤᠳᠠᠯ ᠪᠣᠯᠣᠨ ᠪᠣᠷᠣᠭᠠᠨ ᠠᠴᠠ ᠪᠣᠯᠵᠤ ᠴᠡᠴᠡᠷᠡᠭᠰᠡᠭᠡᠷ ᠪᠤᠷᠬᠠᠨ ᠤ ᠥᠷᠭᠥᠭᠡᠨ ᠦ ᠡᠮᠦᠨᠡᠬᠢ ᠲᠠᠯᠠᠪᠠᠢ ᠳᠤ ᠰᠠᠭᠤᠵᠤ ᠪᠠᠢᠯᠠ᠃ 10 ᠲᠠᠬᠢᠯᠴᠢ ᠡᠽᠷᠠ ᠪᠣᠰᠴᠤ᠂ ᠲᠡᠳᠡᠨ ᠳᠦ᠄ 《ᠲᠠ ᠨᠠᠷ ᠢᠲᠡᠭᠡᠮᠵᠢ ᠦᠭᠡᠢ ᠪᠠᠢᠵᠤ᠂ ᠬᠠᠷᠢ ᠡᠮᠡᠭᠲᠡᠢ ᠲᠡᠢ ᠭᠡᠷᠯᠡᠭᠰᠡᠨ ᠢᠶᠡᠷ ᠢᠶᠠᠨ ᠢᠰᠷᠧᠯ ᠤᠨ ᠭᠡᠮ ᠪᠤᠷᠤᠭᠤ ᠶᠢ ᠨᠡᠮᠡᠭᠳᠡᠭᠦᠯᠦᠭᠰᠡᠨ ᠶᠤᠮ᠃ 11 ᠣᠳᠣ ᠡᠴᠢᠭᠡ ᠡᠪᠦᠭᠡᠳ ᠦᠨ ᠢᠶᠠᠨ ᠪᠤᠷᠬᠠᠨ ᠶᠣᠬᠣᠸᠠ ᠳᠤ ᠨᠢᠭᠦᠯ ᠢᠶᠡᠨ ᠥᠴᠢᠵᠦ᠂ ᠲᠡᠭᠦᠨ ᠦ ᠰᠠᠨᠠᠭᠠ ᠶᠢ ᠳᠠᠭᠠᠨ᠂ ᠡᠨᠡ ᠭᠠᠵᠠᠷ ᠤᠨ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠡᠴᠡ᠂ ᠮᠥᠨ ᠬᠠᠷᠢ ᠡᠬᠡᠨᠡᠷ ᠤᠳ ᠠᠴᠠ ᠪᠠᠨ ᠰᠠᠯ》 ᠭᠡᠬᠦ ᠳᠦ᠂ 12 ᠪᠦᠬᠦ ᠴᠢᠭᠤᠯᠭᠠᠨ ᠴᠢᠩᠭ᠍ᠠ ᠳᠠᠭᠤ ᠪᠠᠷ ᠬᠠᠷᠢᠭᠤᠯᠤᠨ᠄ 《ᠲᠡᠭᠡᠶᠡ︕ ᠪᠢᠳᠡ ᠲᠠᠨ ᠤ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠬᠢᠶᠡ᠃ 13 ᠭᠡᠪᠡᠴᠦ ᠡ᠊ᠨᠳᠡ ᠬᠥᠮᠦᠨ ᠣᠯᠠᠨ ᠪᠠᠢᠨᠠ᠂ ᠣᠳᠣ ᠪᠣᠷᠣᠭᠠᠨ ᠤ ᠤᠯᠠᠷᠢᠯ ᠲᠤᠯᠠ ᠪᠢᠳᠡ ᠵᠠᠳᠠᠭᠠᠢ ᠭᠠᠵᠠᠷ ᠲᠤ ᠵᠣᠭᠰᠣᠭᠠᠳ ᠪᠠᠢᠵᠤ ᠴᠢᠳᠠᠬᠤ ᠦᠭᠡᠢ ᠨᠢ᠃ ᠪᠠᠰᠠ ᠪᠢᠳᠡᠨ ᠦ ᠣᠯᠠᠩᠬᠢ ᠨᠢ ᠡᠨᠡ ᠲᠠᠯᠠ ᠪᠠᠷ ᠪᠤᠷᠤᠭᠤ ᠲᠠᠢ ᠪᠣᠯᠬᠣᠷ ᠡᠨᠡ ᠠᠰᠠᠭᠤᠳᠠᠯ ᠨᠢᠭᠡ ᠪᠤᠶᠤ ᠬᠣᠶᠠᠷ ᠡᠳᠦᠷ ᠦᠨ ᠳᠣᠲᠣᠷᠠ ᠢᠯᠭᠠᠭᠤᠷᠢ ᠭᠠᠷᠬᠤ ᠦᠭᠡᠢ᠃ 14 ᠮᠠᠨ ᠤ ᠲᠦᠰᠢᠮᠡᠳ ᠢ ᠪᠦᠬᠦ ᠴᠢᠭᠤᠯᠭᠠᠨ ᠤ ᠲᠥᠯᠥᠭᠡᠯᠡᠭᠴᠢ ᠪᠣᠯᠭᠠᠶᠠ᠃ ᠬᠠᠷᠢ ᠡᠮᠡᠭᠲᠡᠢ ᠲᠡᠢ ᠭᠡᠷᠯᠡᠭᠰᠡᠨ ᠮᠠᠨ ᠤ ᠬᠣᠲᠠ ᠶᠢᠨ ᠬᠢᠨ ᠪᠣᠯᠭᠠᠨ ᠢ ᠲᠣᠪᠯᠠᠭᠰᠠᠨ ᠴᠠᠭ ᠲᠤ ᠬᠣᠲᠠ ᠪᠦᠷᠢ ᠶᠢᠨ ᠠᠬᠠᠯᠠᠭᠴᠢᠳ ᠪᠣᠯᠣᠨ ᠰᠢᠭᠦᠭᠴᠢᠳ ᠲᠠᠢ ᠬᠠᠮᠲᠤ ᠡ᠊ᠨᠳᠡ ᠢᠷᠡᠭᠦᠯᠬᠦ ᠬᠡᠷᠡᠭᠲᠡᠢ᠃ ᠡᠢᠨ ᠬᠦ ᠡᠨᠡ ᠬᠡᠷᠡᠭ ᠡᠴᠡ ᠪᠣᠯᠣᠭᠰᠠᠨ ᠪᠢᠳᠡᠨ ᠦ ᠪᠤᠷᠬᠠᠨ ᠤ ᠰᠢᠷᠦᠭᠦᠨ ᠬᠢᠯᠢᠩ ᠪᠢᠳᠡᠨ ᠡᠴᠡ ᠵᠠᠢᠯᠠᠬᠤ ᠪᠣᠯᠣᠭᠠᠰᠠᠢ》 ᠭᠡᠪᠡ᠃ 15 ᠵᠥᠪᠬᠡᠨ ᠠᠰᠠᠾᠧᠯ ᠤᠨ ᠬᠦᠦ ᠶᠣᠨᠠᠲ᠋ᠠᠨ᠂ ᠲᠢᠺᠸᠠ ᠶᠢᠨ ᠬᠦᠦ ᠶᠠᠬᠠᠽᠢᠶᠧᠯ ᠨᠠᠷ ᠡᠭᠦᠨ ᠢ ᠡᠰᠡᠷᠭᠦᠴᠡᠵᠦ᠂ ᠮᠧᠱᠦ᠋ᠯᠠᠮ ᠬᠢᠭᠡᠳ ᠯᠧᠸᠢ ᠬᠥᠮᠦᠨ ᠱᠠᠪᠧᠲ᠋ᠠᠢ ᠨᠠᠷ ᠲᠡᠳᠡᠨ ᠢ ᠳᠡᠮᠵᠢᠭᠰᠡᠨ ᠪᠠᠢᠨᠠ᠃
16 ᠭᠡᠪᠡᠴᠦ ᠪᠤᠰᠤᠳ ᠴᠥᠯᠡᠭᠳᠡᠭᠰᠡᠳ ᠨᠥᠭᠥᠭᠡ ᠰᠠᠨᠠᠯ ᠤᠨ ᠳᠠᠭᠠᠤ ᠭᠦᠢᠴᠡᠳᠬᠡᠪᠡ᠃ ᠲᠠᠬᠢᠯᠴᠢ ᠡᠽᠷᠠ ᠠᠢᠮᠠᠭ ᠤᠨ ᠲᠡᠷᠢᠭᠦᠳ ᠡᠴᠡ ᠬᠥᠮᠦᠰ ᠢ ᠰᠢᠯᠢᠵᠦ ᠠᠪᠤᠭᠠᠳ ᠨᠡᠷᠡ ᠶᠢ ᠨᠢ ᠵᠢᠭᠰᠠᠭᠠᠭᠰᠠᠨ ᠳᠤ᠂ ᠲᠡᠳᠡ ᠠᠷᠪᠠᠳᠤᠭᠠᠷ ᠰᠠᠷᠠ ᠶᠢᠨ ᠡᠬᠢᠨ ᠤ ᠡᠳᠦᠷ ᠲᠡᠷᠡ ᠬᠡᠷᠡᠭ ᠢ ᠨᠠᠷᠢᠪᠴᠢᠯᠠᠬᠤ ᠪᠠᠷ ᠰᠠᠭᠤᠵᠠᠭᠠᠪᠠ᠃ 17 ᠨᠢᠭᠡᠳᠦᠭᠡᠷ ᠰᠠᠷᠠ ᠶᠢᠨ ᠡᠬᠢᠨ ᠤ ᠡᠳᠦᠷ ᠪᠣᠯᠬᠤ ᠳᠤ᠂ ᠬᠠᠷᠢ ᠡᠮᠡᠭᠲᠡᠢ ᠲᠡᠢ ᠭᠡᠷᠯᠡᠭᠰᠡᠨ ᠪᠦᠬᠦ ᠬᠥᠮᠦᠨ ᠢ ᠪᠦᠷᠢᠳᠬᠡᠵᠦ ᠳᠠᠭᠤᠰᠴᠠᠢ᠃
ᠬᠠᠷᠢᠴᠤᠳ ᠲᠠᠢ ᠭᠡᠷᠯᠡᠭᠰᠡᠨ ᠡᠷᠡᠴᠦᠳ ᠦᠨ ᠨᠡᠷᠡᠰ
18 ᠬᠠᠷᠢ ᠡᠮᠡᠭᠲᠡᠢ ᠲᠡᠢ ᠭᠡᠷᠯᠡᠭᠰᠡᠨ ᠲᠠᠬᠢᠯᠴᠢᠳ ᠨᠢ ᠶᠣᠽᠠᠳᠠᠺ ᠤᠨ ᠬᠦᠦ ᠶᠧᠱᠦ᠋ᠶᠠ ᠪᠣᠯᠣᠨ ᠲᠡᠭᠦᠨ ᠦ ᠠᠬᠠ ᠳᠡᠭᠦᠦᠰ ᠦᠨ ᠦᠷᠡ ᠤᠳᠤᠮ ᠠᠴᠠ ᠮᠠᠶᠠᠰᠧᠶᠠ᠂ ᠡᠯᠢᠶᠧᠽᠧᠷ᠂ ᠶᠠᠷᠢᠪ᠂ ᠭᠧᠳᠠᠯᠢᠶᠠ ᠨᠠᠷ᠂ 19 (ᠲᠡᠳᠡ ᠡᠬᠡᠨᠡᠷ ᠤᠳ ᠢᠶᠠᠨ ᠬᠥᠭᠡᠭᠡᠬᠦ ᠢᠶᠠᠷ ᠠᠮᠠᠯᠠᠭᠰᠠᠨ ᠪᠥᠭᠡᠳ ᠡᠨᠡ ᠬᠦ ᠭᠡᠮ ᠦᠨ ᠢᠶᠠᠨ ᠤᠴᠢᠷ ᠢᠶᠠᠷ ᠰᠦᠷᠦᠭ ᠡᠴᠡ ᠪᠡᠨ ᠬᠤᠴᠠ ᠶᠢ ᠭᠡᠮ ᠦᠨ ᠲᠠᠬᠢᠯ ᠳᠤ ᠡᠷᠭᠦᠪᠡ᠃) 20 ᠢᠮᠧᠷ ᠤᠨ ᠦᠷᠡ ᠤᠳᠤᠮ ᠠᠴᠠ ᠬᠠᠨᠠᠨᠢ᠂ ᠽᠧᠪᠠᠳᠢᠶᠠ᠂ 21 ᠬᠠᠷᠢᠮ ᠤᠨ ᠦᠷᠡ ᠤᠳᠤᠮ ᠠᠴᠠ ᠮᠠᠶᠠᠰᠧᠶᠠ᠂ ᠧᠯᠢᠶᠠ᠂ ᠱᠧᠮᠠᠢᠶᠠ᠂ ᠶᠧᠾᠢᠶᠧᠯ ᠪᠣᠯᠣᠨ ᠦᠽᠢᠶᠠ᠂ 22 ᠫᠠᠱᠦ᠋ᠷ ᠤᠨ ᠦᠷᠡ ᠤᠳᠤᠮ ᠠᠴᠠ ᠡᠯᠢᠶᠣᠶᠧᠨᠠᠢ᠂ ᠮᠠᠶᠠᠰᠧᠶᠠ᠂ ᠢᠱᠮᠠᠶᠧᠯ᠂ ᠨᠧᠲ᠋ᠠᠨᠧᠯ᠂ ᠶᠣᠽᠠᠪᠠᠳ᠋ ᠪᠣᠯᠣᠨ ᠡᠯᠠᠰᠠ ᠨᠠᠷ ᠪᠠᠢᠪᠠ᠃
23 ᠯᠧᠸᠢᠴᠦᠳ ᠡᠴᠡ ᠶᠣᠽᠠᠪᠠᠳ᠋᠂ ᠱᠢᠮᠧᠶᠢ᠂ ᠺᠧᠯᠶᠢᠶᠠ (ᠺᠧᠯᠢᠲ᠋ᠠ)᠂ ᠫᠧᠲ᠋ᠠᠾᠢᠶᠠ᠂ ᠶᠦᠳᠠ ᠪᠣᠯᠣᠨ ᠡᠯᠢᠶᠧᠽᠧᠷ ᠨᠠᠷ ᠪᠠᠢᠪᠠ᠃ 24 ᠳᠠᠭᠤᠴᠢᠳ ᠠᠴᠠ ᠧᠯᠢᠶᠠᠱᠢᠪ᠂ ᠬᠠᠭᠠᠯᠭᠠᠴᠢᠳ ᠠᠴᠠ ᠱᠠᠯᠦ᠋ᠮ᠂ ᠲᠧᠯᠧᠮ ᠪᠣᠯᠣᠨ ᠦᠷᠢ ᠨᠠᠷ ᠪᠠᠢᠪᠠ᠃
25 ᠪᠤᠰᠤᠳ ᠢᠰᠷᠧᠯᠴᠦᠳ ᠦᠨ ᠳᠤᠮᠳᠠ᠂ ᠫᠠᠷᠣᠱ ᠶᠢᠨ ᠦᠷᠡ ᠤᠳᠤᠮ ᠠᠴᠠ ᠷᠠᠮᠢᠶᠠ᠂ ᠢᠽᠢᠶᠠ᠂ ᠮᠠᠯᠺᠢᠶᠠ᠂ ᠮᠢᠶᠠᠮᠢᠨ᠂ ᠡᠯᠧᠶᠠᠽᠠᠷ᠂ ᠮᠠᠯᠺᠢᠶᠠ ᠪᠣᠯᠣᠨ ᠪᠧᠨᠠᠢᠶᠠ᠂ 26 ᠡᠯᠠᠮ ᠤᠨ ᠦᠷᠡ ᠤᠳᠤᠮ ᠠᠴᠠ ᠮᠠᠲ᠋ᠠᠨᠢᠶᠠ᠂ ᠽᠧᠺᠠᠷᠢᠶᠠ᠂ ᠶᠧᠾᠢᠶᠧᠯ᠂ ᠠᠪᠳᠢ᠂ ᠶᠧᠷᠧᠮᠣᠲ ᠪᠣᠯᠣᠨ ᠧᠯᠢᠶᠠ᠂ 27 ᠽᠠᠲ᠋ᠦ᠋ ᠶᠢᠨ ᠦᠷᠡ ᠤᠳᠤᠮ ᠠᠴᠠ ᠡᠯᠢᠶᠣᠶᠧᠨᠠᠢ᠂ ᠧᠯᠢᠶᠠᠱᠢᠪ᠂ ᠮᠠᠲ᠋ᠠᠨᠢᠶᠠ᠂ ᠶᠧᠷᠧᠮᠣᠲ᠂ ᠽᠠᠪᠠᠳ᠋ ᠪᠣᠯᠣᠨ ᠠᠽᠢᠽᠠ᠂ 28 ᠪᠧᠪᠠᠢ ᠶᠢᠨ ᠦᠷᠡ ᠤᠳᠤᠮ ᠠᠴᠠ ᠶᠧᠬᠣᠬᠠᠨᠠᠨ᠂ ᠬᠠᠨᠠᠨᠢᠶᠠ᠂ ᠽᠠᠪᠠᠢ ᠪᠣᠯᠣᠨ ᠠᠲ᠋ᠯᠠᠢ᠂ 29 ᠪᠠᠨᠢ ᠶᠢᠨ ᠦᠷᠡ ᠤᠳᠤᠮ ᠠᠴᠠ ᠮᠧᠱᠦ᠋ᠯᠠᠮ᠂ ᠮᠠᠯᠦ᠋ᠺ᠂ ᠠᠳᠠᠢᠶᠠ᠂ ᠶᠠᠱᠦ᠋ᠪ᠂ ᠱᠧᠶᠠᠯ ᠪᠣᠯᠣᠨ ᠶᠧᠷᠧᠮᠣᠲ᠂ 30 ᠫᠠᠬᠠᠲ ᠮᠣᠶᠠᠪ ᠤᠨ ᠦᠷᠡ ᠤᠳᠤᠮ ᠠᠴᠠ ᠠᠳ᠋ᠨᠠ᠂ ᠺᠧᠯᠠᠯ᠂ ᠪᠧᠨᠠᠢᠶᠠ᠂ ᠮᠠᠶᠠᠰᠧᠶᠠ᠂ ᠮᠠᠲ᠋ᠠᠨᠢᠶᠠ᠂ ᠪᠧᠽᠠᠯᠧᠯ᠂ ᠪᠢᠨᠣᠢ᠂ ᠪᠣᠯᠣᠨ ᠮᠠᠨᠠᠰᠧ᠂ 31 ᠬᠠᠷᠢᠮ ᠤᠨ ᠦᠷᠡ ᠤᠳᠤᠮ ᠠᠴᠠ ᠡᠯᠢᠶᠧᠽᠧᠷ᠂ ᠢᠱᠢᠶᠠ᠂ ᠮᠠᠯᠺᠢᠶᠠ᠂ ᠱᠧᠮᠠᠢᠶᠠ᠂ ᠰᠢᠮᠧᠶᠣᠨ᠂ 32 ᠪᠢᠨᠶᠠᠮᠢᠨ᠂ ᠮᠠᠯᠦ᠋ᠺ᠂ ᠱᠧᠮᠠᠷᠢᠶᠠ᠂ 33 ᠬᠠᠱᠦ᠋ᠮ ᠤᠨ ᠦᠷᠡ ᠤᠳᠤᠮ ᠠᠴᠠ ᠮᠠᠲ᠋ᠧᠨᠠᠢ᠂ ᠮᠠᠲ᠋ᠠᠲ᠋ᠠ᠂ ᠽᠠᠪᠠᠳ᠋᠂ ᠡᠯᠢᠹᠧᠯᠧᠲ᠂ ᠶᠧᠷᠧᠮᠠᠢ᠂ ᠮᠠᠨᠠᠰᠧ ᠪᠣᠯᠣᠨ ᠱᠢᠮᠧᠶᠢ᠂ 34 ᠪᠠᠨᠢ ᠶᠢᠨ ᠦᠷᠡ ᠤᠳᠤᠮ ᠠᠴᠠ ᠮᠠᠶᠠᠳᠠᠢ᠂ ᠠᠮᠷᠠᠮ᠂ ᠦᠶᠧᠯ᠂ 35 ᠪᠧᠨᠠᠢᠶᠠ᠂ ᠪᠧᠳᠧᠶᠠ᠂ ᠺᠧᠯᠦ᠋ᠾᠢ᠂ 36 ᠸᠠᠨᠢᠶᠠ᠂ ᠮᠧᠷᠧᠮᠣᠲ᠂ ᠧᠯᠢᠶᠠᠱᠢᠪ᠂ 37 ᠮᠠᠲ᠋ᠠᠨᠢᠶᠠ᠂ ᠮᠠᠲ᠋ᠧᠨᠠᠢ᠂ ᠶᠠᠰᠦ᠋᠂ 38 ᠪᠠᠨᠢ᠂ ᠪᠢᠨᠣᠢ᠂ ᠱᠢᠮᠧᠶᠢ᠂ 39 ᠱᠧᠯᠧᠮᠢᠶᠠ᠂ ᠨᠠᠲ᠋ᠠᠨ᠂ ᠠᠳᠠᠢᠶᠠ᠂ 40 ᠮᠠᠺᠨᠠᠳᠧᠪᠠᠢ᠂ ᠱᠠᠱᠠᠢ᠂ ᠱᠠᠷᠠᠢ᠂ 41 ᠠᠽᠠᠽᠧᠯ᠂ ᠱᠧᠯᠧᠮᠢᠶᠠ᠂ ᠱᠧᠮᠠᠷᠢᠶᠠ᠂ 42 ᠱᠠᠯᠦ᠋ᠮ᠂ ᠠᠮᠠᠷᠢᠶᠠ ᠪᠣᠯᠣᠨ ᠶᠣᠰᠧᠹ᠂ 43 ᠨᠧᠪᠣ ᠶᠢᠨ ᠦᠷᠡ ᠤᠳᠤᠮ ᠠᠴᠠ ᠶᠧᠶᠧᠯ᠂ ᠮᠠᠲ᠋ᠢᠲ᠋ᠢᠶᠠ᠂ ᠽᠠᠪᠠᠳ᠋᠂ ᠽᠧᠪᠢᠨᠠ᠂ ᠶᠠᠳᠠᠢ᠂ ᠶᠣᠶᠧᠯ ᠪᠣᠯᠣᠨ ᠪᠧᠨᠠᠢᠶᠠ ᠨᠠᠷ ᠪᠠᠢᠪᠠ᠃ 44 ᠡᠳᠡ ᠪᠦᠭᠦᠳᠡ ᠬᠠᠷᠢ ᠡᠮᠡᠭᠲᠡᠢ ᠲᠡᠢ ᠭᠡᠷᠯᠡᠭᠰᠡᠨ ᠪᠥᠭᠡᠳ ᠲᠡᠳᠡᠭᠡᠷ ᠡᠮᠡᠭᠲᠡᠢ ᠶᠢᠨ ᠵᠠᠷᠢᠮ ᠨᠢ ᠡᠳᠡ ᠨᠠᠷ ᠤᠨ ᠬᠡᠦᠬᠡᠳ ᠢ ᠲᠥᠷᠥᠭᠦᠯᠦᠭᠰᠡᠨ ᠪᠠᠢᠪᠠ᠃