ᠮᠠᠯᠠᠺᠢ ᠨᠢᠭᠡ
ᠢᠰᠷᠧᠯ ᠬᠠᠢᠷᠠᠯᠠᠭᠳᠠᠵᠤ ᠡᠳᠣᠮ ᠵᠢᠭ᠍ᠰᠢᠭᠳᠡᠪᠡ
1 ᠨᠢᠭᠡᠨ ᠰᠡᠷᠡᠮᠵᠢᠯᠡᠭᠦᠯᠦᠯᠭᠡ᠄ ᠮᠠᠯᠠᠺᠢ ᠪᠠᠷ ᠳᠠᠮᠵᠢᠭᠤᠯᠤᠨ ᠢᠰᠷᠧᠯ ᠳᠤ ᠠᠢᠯᠠᠳᠤᠭᠰᠠᠨ ᠶᠣᠬᠣᠸᠠ ᠶᠢᠨ ᠦᠭᠡ᠄ 2 《ᠪᠢ ᠲᠠ ᠨᠠᠷ ᠢ ᠬᠠᠢᠷᠠᠯᠠᠳᠠᠭ᠂》 ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃ ᠭᠡᠪᠡᠴᠦ ᠲᠠ ᠨᠠᠷ᠄ 《ᠲᠠ ᠪᠢᠳᠡᠨ ᠢ ᠶᠠᠭᠠᠬᠢᠵᠤ ᠬᠠᠢᠷᠠᠯᠠᠳᠠᠭ ᠶᠤᠮ ᠪᠤᠢ︖》 ᠭᠡᠨᠡ᠃ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠂ 《ᠡᠰᠡᠦ᠋ ᠶᠠᠺᠣᠪ ᠤᠨ ᠠᠬᠠ ᠨᠢ ᠪᠢᠰᠢ ᠤᠤ︖ ᠭᠡᠪᠡᠴᠦ ᠪᠢ ᠶᠠᠺᠣᠪ ᠢ ᠬᠠᠢᠷᠠᠯᠠᠵᠤ᠂ 3 ᠡᠰᠡᠦ᠋ ᠶᠢ ᠦᠵᠡᠨ ᠶᠠᠳᠠᠭᠰᠠᠨ᠃ ᠪᠢ ᠲᠡᠭᠦᠨ ᠦ ᠠᠭᠤᠯᠠᠰ ᠢ ᠬᠣᠭᠣᠰᠣᠷᠠᠭᠤᠯᠵᠤ᠂ ᠲᠡᠭᠦᠨ ᠦ ᠥᠪ ᠢ ᠴᠥᠯ ᠦᠨ ᠰᠢᠷᠠᠨᠤᠳ ᠤᠳ ᠲᠤ ᠲᠤᠰᠢᠶᠠᠭᠰᠠᠨ᠃》 4 ᠡᠳᠣᠮ᠄ 《ᠪᠢᠳᠡ ᠰᠦᠢᠷᠡᠭᠰᠡᠨ᠂ ᠭᠡᠪᠡᠴᠦ ᠪᠢᠳᠡ ᠪᠠᠯᠭᠠᠰᠤ ᠶᠢ ᠳᠠᠬᠢᠨ ᠪᠣᠰᠬᠠᠨᠠ》 ᠭᠡᠳᠡᠭ᠂ ᠬᠠᠷᠢᠨ ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠂ 《ᠲᠡᠳᠡ ᠪᠣᠰᠬᠠᠭ᠂ ᠪᠢ ᠨᠤᠷᠠᠭᠠᠨᠠ᠃ ᠲᠡᠳᠡ 〈ᠬᠣᠷᠣᠨ ᠮᠠᠭᠤ ᠨᠤᠲᠤᠭ〉᠂ 〈ᠶᠣᠬᠣᠸᠠ ᠶᠢᠨ ᠮᠥᠩᠬᠡ ᠶᠢᠨ ᠬᠢᠯᠢᠩ ᠳᠣᠣᠷᠠᠬᠢ ᠠᠷᠠᠳ ᠲᠦᠮᠡᠨ〉 ᠭᠡᠭᠳᠡᠬᠦ ᠪᠣᠯᠣᠨᠠ᠃》 5 ᠲᠠ ᠨᠠᠷ ᠡᠭᠦᠨ ᠢ ᠨᠢᠳᠦ ᠪᠡᠷ ᠢᠶᠠᠨ ᠦᠵᠡᠵᠦ᠄ 《ᠶᠣᠬᠣᠸᠠ ᠢᠰᠷᠧᠯ ᠤᠨ ᠬᠢᠯᠢ ᠶᠢᠨ ᠴᠢᠨᠠᠳᠤ 1 ᠳᠤ ᠠᠭᠤᠤ ᠪᠠᠢᠨᠠ》 ᠭᠡᠵᠦ ᠬᠡᠯᠡᠨᠡ᠃
ᠥ ᠰᠡᠪ ᠲᠡᠢ ᠲᠠᠬᠢᠯ
6 《〈ᠬᠦᠦ ᠨᠢ ᠡᠴᠢᠭᠡ ᠪᠡᠨ᠂ ᠵᠠᠷᠤᠴᠠ ᠨᠢ ᠡᠵᠡᠨ ᠢᠶᠡᠨ ᠬᠦᠨᠳᠦᠳᠬᠡᠳᠡᠭ᠃ ᠪᠢ ᠡᠴᠢᠭᠡ ᠶᠤᠮ ᠪᠣᠯ᠂ ᠨᠠᠮᠠᠶᠢ ᠬᠦᠨᠳᠦᠳᠬᠡᠭᠰᠡᠨ ᠨᠢ ᠬᠠᠮᠢᠭᠠ ᠪᠠᠢᠨᠠ︖ ᠪᠢ ᠡᠵᠡᠨ ᠶᠤᠮ ᠪᠣᠯ ᠨᠠᠳᠠ ᠠᠴᠠ ᠡᠮᠢᠶᠡᠭᠴᠢ ᠨᠢ ᠬᠠᠮᠢᠭᠠ ᠪᠠᠢᠨᠠ︖〉 ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠂ 〈ᠮᠢᠨᠦ ᠨᠡᠷᠡ ᠶᠢ ᠪᠠᠰᠤᠮᠵᠢᠯᠠᠳᠠᠭ ᠲᠠᠬᠢᠯᠴᠢᠳ ᠡ᠂〉 ᠬᠠᠷᠢᠨ ᠲᠠ ᠨᠠᠷ᠄ 〈ᠪᠢᠳᠡ ᠲᠠᠨ ᠤ ᠨᠡᠷᠡ ᠶᠢ ᠶᠠᠭᠠᠬᠢᠵᠤ ᠪᠠᠰᠤᠮᠵᠢᠯᠠᠳᠠᠭ ᠪᠤᠢ︖〉 ᠭᠡᠨᠡ᠂ 7 ᠲᠠ ᠨᠠᠷ ᠪᠤᠵᠠᠷᠲᠤᠭᠰᠠᠨ ᠪᠣᠣᠪᠣ ᠶᠢ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠮᠢᠨᠢ ᠡᠷᠭᠦᠭᠰᠡᠭᠡᠷ ᠪᠠᠢᠭᠠ ᠬᠢᠷᠢ ᠨᠢ᠄ 〈ᠪᠢᠳᠡ ᠲᠠᠨ ᠤ ᠬᠢ ᠶᠢ ᠶᠠᠭᠠᠬᠢᠵᠤ ᠪᠤᠵᠠᠷᠯᠠᠭᠰᠠᠨ ᠪᠤᠢ︖〉 ᠭᠡᠨᠡ᠂ 〈ᠶᠣᠬᠣᠸᠠ ᠶᠢᠨ ᠰᠢᠷᠡᠭᠡ ᠭᠡᠳᠡᠭ ᠴᠢᠨᠢ ᠵᠢᠭ᠍ᠰᠢᠯ ᠲᠠᠢ〉 ᠭᠡᠵᠦ ᠶᠠᠷᠢᠳᠠᠭ ᠢᠶᠠᠷ ᠢᠶᠠᠨ ᠶᠤᠮ᠃ 8 ᠲᠠ ᠨᠠᠷ ᠰᠣᠬᠣᠷ ᠮᠠᠯ ᠢ ᠲᠠᠬᠢᠯ ᠪᠣᠯᠭᠠᠨ ᠠᠪᠴᠢᠷᠠᠳᠠᠭ ᠨᠢ ᠮᠠᠭᠤ ᠪᠢᠰᠢ ᠭᠡᠵᠢ ᠤᠤ︖ ᠳᠣᠭᠣᠯᠠᠩ ᠪᠤᠶᠤ ᠡᠪᠡᠳᠴᠢᠨ ᠲᠡᠢ ᠶᠢ ᠠᠪᠴᠢᠷᠠᠳᠠᠭ ᠨᠢ ᠮᠠᠭᠤ ᠪᠢᠰᠢ ᠭᠡᠵᠢ ᠤᠤ︖ ᠲᠡᠳᠡᠭᠡᠷ ᠢ ᠵᠠᠬᠢᠷᠤᠭᠴᠢ ᠳᠠᠭᠠᠨ ᠡᠷᠭᠦᠵᠦ ᠦᠵᠡ᠃ ᠲᠡᠷᠡ ᠴᠢᠮᠠᠶᠢ ᠲᠠᠭᠠᠯᠠᠬᠤ ᠤᠤ︖ ᠴᠢᠨᠦᠬᠢ ᠶᠢ ᠬᠦᠯᠢᠶᠡᠨ ᠠᠪᠬᠤ ᠤᠤ︖》 ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃ 9 《ᠡᠳᠦᠭᠡ ᠲᠠ ᠨᠠᠷ ᠪᠤᠷᠬᠠᠨ ᠤ ᠲᠠᠭᠠᠯᠠᠯ ᠢ ᠬᠦᠰᠡᠨ᠂ ᠲᠡᠭᠦᠨ ᠡᠴᠡ ᠭᠤᠶᠤᠵᠤ ᠦᠵᠡ᠂ ᠲᠠ ᠨᠠᠷ ᠤᠨ ᠭᠠᠷ ᠠᠴᠠ ᠲᠡᠢᠮᠦ ᠵᠦᠢᠯ ᠭᠠᠷᠤᠭᠰᠠᠨ ᠪᠠᠢᠬᠤ ᠳᠤ᠂ ᠲᠡᠷᠡ ᠲᠠ ᠨᠠᠷ ᠢ ᠬᠦᠯᠢᠶᠡᠨ ᠠᠪᠬᠤ ᠤᠤ︖》 ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠠᠢᠯᠠᠳᠤᠯᠠ᠃ 10 《ᠮᠢᠨᠦ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠭᠠᠯ ᠢ ᠳᠡᠮᠡᠢ ᠠᠰᠠᠭᠠᠵᠤ ᠪᠣᠯᠬᠤ ᠦᠭᠡᠢ᠃ ᠲᠠ ᠨᠠᠷ ᠤᠨ ᠬᠡᠨ ᠨᠢᠭᠡᠨ ᠨᠢ ᠬᠠᠭᠠᠯᠭᠠ ᠨᠤᠭᠤᠳ ᠢ ᠬᠠᠭᠠᠭᠰᠠᠨ ᠴᠤ ᠪᠣᠯᠣᠭᠠᠰᠠᠢ︕ ᠪᠢ ᠲᠠ ᠨᠠᠷ ᠢ ᠲᠠᠭᠠᠯᠠᠳᠠᠭ ᠦᠭᠡᠢ᠂》 ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠠᠢᠯᠠᠳᠤᠯᠠ᠃ 《ᠪᠢ ᠲᠠ ᠨᠠᠷ ᠤᠨ ᠭᠠᠷ ᠠᠴᠠ ᠡᠷᠭᠦᠯ ᠢ ᠬᠦᠯᠢᠶᠡᠨ ᠠᠪᠬᠤ ᠦᠭᠡᠢ᠃》 11 《ᠤᠴᠢᠷ ᠨᠢ ᠨᠠᠷᠠ ᠮᠠᠨᠳᠤᠬᠤ ᠠᠴᠠ ᠵᠢᠷᠭᠠᠬᠤ ᠬᠦᠷᠲᠡᠯᠡ ᠮᠢᠨᠦ ᠨᠡᠷᠡ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠳᠤᠮᠳᠠ ᠠᠭᠤᠤ ᠪᠠᠢᠬᠤ ᠪᠣᠯᠣᠨᠠ᠃ ᠮᠢᠨᠦ ᠨᠡᠷᠡ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠳᠤᠮᠳᠠ ᠠᠭᠤᠤ ᠪᠣᠯᠬᠣᠷ ᠲᠡᠳᠡ ᠮᠢᠨᠦ ᠨᠡᠷᠡ ᠳᠦ ᠵᠣᠷᠢᠭᠤᠯᠤᠨ ᠤᠲᠤᠯᠭᠠ ᠪᠣᠯᠣᠨ ᠴᠡᠪᠡᠷ ᠡᠷᠭᠦᠯ ᠤᠳ ᠢ ᠭᠠᠵᠠᠷ ᠰᠠᠢ ᠦᠭᠡᠢ ᠡᠷᠭᠦᠬᠦ ᠪᠣᠯᠣᠨᠠ᠂》 ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠠᠢᠯᠠᠳᠤᠯᠠ᠃ 12 《ᠭᠡᠪᠡᠴᠦ ᠲᠠ ᠨᠠᠷ 〈ᠡᠵᠡᠨ ᠦ ᠰᠢᠷᠡᠭᠡ ᠭᠡᠳᠡᠭ ᠴᠢᠨᠢ ᠪᠤᠵᠠᠷ᠂ ᠦᠷᠡ ᠵᠢᠮᠢᠰ᠂ ᠢᠳᠡᠭᠡᠨ ᠭᠡᠳᠡᠭ ᠴᠢᠨᠢ ᠵᠢᠭ᠍ᠰᠢᠯ ᠲᠠᠢ〉 ᠭᠡᠵᠦ ᠶᠠᠷᠢᠳᠠᠭ ᠢᠶᠠᠷ ᠨᠡᠷᠡ ᠶᠢ ᠮᠢᠨᠢ ᠭᠤᠲᠤᠭᠠᠵᠤ ᠪᠠᠢᠨᠠ᠃ 13 ᠲᠠ ᠨᠠᠷ ᠪᠠᠰᠠ᠄ 〈ᠥ᠂ ᠶᠠᠷᠰᠢᠭ〉 ᠭᠡᠳ ᠬᠥᠬᠡ ᠢᠨᠢᠶᠡᠳᠦ ᠠᠯᠳᠠᠳᠠᠭ᠂》 ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃ 《ᠲᠠ ᠨᠠᠷ ᠬᠤᠯᠠᠭᠠᠢᠯᠠᠭᠰᠠᠨ 2 ᠂ ᠡᠰᠡᠪᠡᠯ ᠳᠣᠭᠣᠯᠠᠩ᠂ ᠡᠰᠡᠪᠡᠯ ᠡᠪᠡᠳᠴᠢᠨ ᠲᠡᠢ ᠠᠮᠢᠲᠠᠨ ᠢ ᠠᠪᠴᠢᠷᠠᠵᠤ᠂ ᠲᠠᠬᠢᠯ ᠪᠣᠯᠭᠠᠨ ᠡᠷᠭᠦᠳᠡᠭ᠃ ᠲᠡᠳᠡᠭᠡᠷ ᠢ ᠴᠢᠨᠢ ᠪᠢ ᠲᠠ ᠨᠠᠷ ᠤᠨ ᠭᠠᠷ ᠠᠴᠠ ᠠᠪᠬᠤ ᠶᠣᠰᠣᠲᠠᠢ ᠤᠤ︖》 ᠶᠣᠬᠣᠸᠠ ᠠᠢᠯᠠᠳᠤᠯᠠ᠃ 14 《ᠥᠪᠡᠷ ᠦᠨ ᠬᠢᠨᠢ ᠰᠦᠷᠦᠭ ᠲᠦ ᠡᠷᠡ ᠬᠣᠨᠢ ᠪᠠᠢᠵᠤ᠂ ᠲᠡᠭᠦᠨ ᠢ ᠪᠠᠨ ᠡᠷᠭᠦᠬᠦ ᠪᠡᠷ ᠲᠠᠩ᠋ᠭᠠᠷᠢᠭᠯᠠᠭᠰᠠᠨ ᠠᠲᠠᠯᠠ ᠭᠡᠮ ᠰᠣᠭᠣᠭ ᠲᠠᠢ ᠶᠢ ᠡᠵᠡᠨ ᠳᠦ ᠲᠠᠬᠢᠯ ᠪᠣᠯᠭᠠᠨ ᠡᠷᠭᠦᠳᠡᠭ ᠯᠤᠢᠪᠠᠷᠴᠢᠨ ᠬᠠᠷᠢᠶᠠᠭᠳᠠᠨᠠ᠃ ᠤᠴᠢᠷ ᠨᠢ ᠪᠢ ᠪᠣᠯ ᠠᠤᠭᠠ ᠬᠠᠭᠠᠨ ᠶᠤᠮ᠂ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠮᠢᠨᠦ ᠨᠡᠷᠡ ᠡᠴᠡ ᠡᠮᠢᠶᠡᠬᠦ ᠶᠣᠰᠣᠲᠠᠢ᠂》 ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃