ᠨᠧᠾᠧᠮᠢᠶᠠ ᠨᠢᠭᠡ
ᠠᠷᠠᠳ ᠲᠦᠮᠡᠨ ᠦ ᠲᠥᠯᠥᠭᠡᠬᠢ ᠳᠠᠭᠠᠳᠬᠠᠯ
1 ᠬᠠᠺᠠᠯᠢᠶᠠ ᠶᠢᠨ ᠬᠦᠦ ᠨᠧᠾᠧᠮᠢᠶᠠ ᠶᠢᠨ ᠦᠭᠡᠰ᠄ ᠠᠷᠲ᠋ᠠᠱᠠᠰᠲ᠋ᠠ ᠬᠠᠭᠠᠨ ᠤ ᠬᠣᠷᠢᠳᠤᠭᠠᠷ ᠣᠨ ᠤ ᠺᠢᠰᠯᠧᠸ ᠰᠠᠷ 1 ᠳᠤ᠂ ᠪᠢ ᠰᠦᠰᠠ ᠰᠢᠯᠲᠦᠭᠡᠨ ᠳᠦ ᠪᠠᠢᠭᠰᠠᠨ ᠪᠢᠯᠡ᠃ 2 ᠮᠢᠨᠦ ᠠᠬᠠᠨ ᠳᠡᠭᠦᠦᠰ ᠦᠨ ᠨᠢᠭᠡ ᠪᠣᠯᠬᠤ ᠬᠠᠨᠠᠨᠢ ᠬᠡᠳᠦᠨ ᠬᠥᠮᠦᠨ ᠲᠡᠢ ᠬᠠᠮᠲᠤ ᠶᠦᠳᠠ ᠠᠴᠠ ᠢᠷᠡᠬᠦ ᠳᠦ᠂ ᠪᠢ ᠴᠥᠯᠡᠭᠳᠡᠭᠡ ᠦᠭᠡᠢ ᠲᠡᠨᠳᠡ ᠦᠯᠡᠳᠡᠭᠰᠡᠨ ᠶᠦᠳᠠᠢᠴᠤᠳ ᠤᠨ ᠲᠤᠬᠠᠢ᠂ ᠮᠥᠨ ᠶᠧᠷᠦ᠋ᠰᠠᠯᠧᠮ ᠤᠨ ᠲᠤᠬᠠᠢ ᠲᠡᠳᠡᠨ ᠡᠴᠡ ᠠᠰᠠᠭᠤᠯᠠ᠃ 3 ᠲᠡᠳᠡ ᠨᠠᠳᠠ ᠳᠤ᠄ 《ᠮᠤᠵᠢ ᠳᠠᠭᠠᠨ ᠦᠯᠡᠳᠡᠭᠰᠡᠨ ᠴᠥᠯᠡᠭᠳᠡᠭᠡ ᠦᠭᠡᠢ ᠬᠥᠮᠦᠰ ᠮᠠᠰᠢ ᠶᠡᠬᠡ ᠵᠣᠪᠠᠯᠠᠩ ᠳᠣᠷᠣᠮᠵᠢᠯᠠᠯ ᠤᠨ ᠳᠣᠣᠷᠠ ᠪᠠᠢᠭᠠ ᠪᠥᠭᠡᠳ ᠶᠧᠷᠦ᠋ᠰᠠᠯᠧᠮ ᠤᠨ ᠬᠡᠷᠡᠮ ᠨᠤᠷᠠᠵᠤ᠂ ᠬᠠᠭᠠᠯᠭᠠ ᠨᠤᠭᠤᠳ ᠨᠢ ᠭᠠᠯ ᠳᠤ ᠰᠢᠲᠠᠭᠰᠠᠨ ᠪᠠᠢᠨᠠ》 ᠭᠡᠪᠡ᠃
4 ᠪᠢ ᠡᠳᠡᠭᠡᠷ ᠦᠭᠡ ᠶᠢ ᠰᠣᠨᠣᠰᠣᠮᠠᠭᠴᠠ ᠳᠣᠷᠣᠭᠰᠢ ᠰᠠᠭᠤᠭᠠᠳ ᠤᠬᠢᠯᠠᠪᠠ᠃ ᠬᠡᠳᠦᠨ ᠡᠳᠦᠷ ᠦᠨ ᠲᠤᠷᠰᠢ ᠪᠢ ᠭᠠᠰᠢᠭᠤᠳᠠᠵᠤ ᠪᠠᠴᠠᠭ ᠪᠠᠷᠢᠨ᠂ ᠲᠩᠷᠢ ᠶᠢᠨ ᠪᠤᠷᠬᠠᠨ ᠤ ᠡᠮᠦᠨᠡ ᠳᠠᠭᠠᠳᠬᠠᠵᠤ᠄ 5 《ᠲᠩᠷᠢ ᠶᠢᠨ ᠪᠤᠷᠬᠠᠨ ᠶᠣᠬᠣᠸᠠ᠂ ᠠᠤᠭᠠ ᠰᠦᠷᠳᠡᠮᠡᠷ ᠪᠤᠷᠬᠠᠨ᠂ ᠲᠠᠨ ᠳᠤ ᠬᠠᠢᠷᠠᠲᠠᠢ᠂ ᠲᠠᠨ ᠤ ᠲᠤᠰᠢᠶᠠᠯ ᠤᠳ ᠢ ᠰᠠᠬᠢᠳᠠᠭ ᠬᠥᠮᠦᠰ ᠲᠦ ᠬᠠᠢᠷᠠ ᠡᠨᠡᠷᠢᠯ ᠤᠨ ᠭᠡᠷᠡ ᠪᠡᠨ ᠰᠠᠬᠢᠳᠠᠭ ᠪᠤᠷᠬᠠᠨ ᠮᠢᠨᠢ᠂ 6 ᠲᠠᠨ ᠤ ᠴᠢᠬᠢ ᠰᠣᠨᠣᠷ᠂ ᠲᠠᠨ ᠤ ᠮᠡᠯᠮᠡᠢ ᠨᠡᠭᠡᠭᠡᠯᠲᠡ ᠲᠠᠢ ᠪᠠᠢᠵᠤ᠂ ᠵᠠᠷᠤᠴᠠ ᠶᠢᠨ ᠢᠶᠠᠨ ᠳᠠᠭᠠᠳᠬᠠᠯ ᠢ ᠰᠣᠨᠣᠰᠣᠨᠠ ᠤᠤ︖ ᠲᠠᠨ ᠤ ᠵᠠᠷᠤᠴᠠ ᠨᠠᠷ ᠢᠰᠷᠧᠯᠴᠦᠳ ᠦᠨ ᠲᠥᠯᠥᠭᠡ ᠪᠢ ᠲᠠᠨ ᠤ ᠡᠮᠦᠨᠡ ᠡᠳᠦᠷ ᠰᠥᠨᠢ ᠦᠭᠡᠢ ᠳᠠᠭᠠᠳᠬᠠᠵᠤ᠂ ᠢᠰᠷᠧᠯᠴᠦᠳ ᠦᠨ ᠨᠢᠭᠦᠯ ᠢ ᠤᠯᠠᠢᠵᠤ ᠪᠠᠢᠨᠠ᠃ ᠪᠢ ᠴᠤ᠂ ᠮᠢᠨᠦ ᠡᠴᠢᠭᠡ ᠶᠢᠨ ᠭᠡᠷ ᠪᠦᠯᠢ ᠴᠤ ᠲᠠᠨ ᠳᠤ ᠨᠢᠭᠦᠯ ᠦᠢᠯᠡᠳᠦᠭᠰᠡᠨ ᠶᠤᠮ᠃ 7 ᠪᠢᠳᠡ ᠲᠠᠨ ᠢ ᠦᠨᠡᠬᠡᠷ ᠭᠣᠮᠣᠳᠠᠭᠠᠵᠤ᠂ ᠵᠠᠷᠤᠴᠠ ᠮᠣᠰᠧ ᠳᠡᠭᠡᠨ ᠰᠣᠶᠣᠷᠬᠠᠭᠰᠠᠨ ᠲᠤᠰᠢᠶᠠᠯ᠂ ᠲᠣᠭᠲᠠᠭᠠᠯ᠂ ᠵᠢᠷᠤᠮ ᠤᠳ ᠢ ᠲᠠᠨᠢ ᠰᠠᠬᠢᠭᠰᠠᠨ ᠦᠭᠡᠢ᠃ 8 ᠣᠳᠣ ᠲᠠ ᠵᠠᠷᠤᠴᠠ ᠮᠣᠰᠧ ᠳᠡᠭᠡᠨ ᠲᠤᠰᠢᠶᠠᠭᠰᠠᠨ ᠦᠭᠡ ᠪᠡᠨ ᠰᠠᠨᠠᠭᠠᠴᠢ᠃ ᠲᠠ᠄ 〈ᠬᠡᠷᠪᠡ ᠲᠠ ᠨᠠᠷ ᠢᠲᠡᠭᠡᠮᠵᠢ ᠦᠭᠡᠢ ᠪᠣᠯᠪᠠᠯ ᠪᠢ ᠲᠠ ᠨᠠᠷ ᠢ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠳᠤᠮᠳᠠ ᠲᠠᠷᠬᠠᠭᠠᠨᠠ᠃ 9 ᠬᠠᠷᠢᠨ ᠨᠠᠳᠠ ᠤᠷᠤᠭᠤ ᠡᠷᠭᠢᠵᠦ ᠮᠢᠨᠦ ᠲᠤᠰᠢᠶᠠᠯ ᠤᠳ ᠢ ᠰᠠᠬᠢᠨ ᠪᠡᠶᠡᠯᠡᠭᠦᠯᠪᠡᠯ᠂ ᠲᠠ ᠨᠠᠷ ᠲᠩᠷᠢ ᠶᠢᠨ ᠬᠢᠵᠠᠭᠠᠷ ᠲᠤ ᠴᠥᠯᠡᠭᠳᠡᠭᠰᠡᠨ ᠪᠠᠢᠪᠠᠴᠤ ᠪᠢ ᠲᠠ ᠨᠠᠷ ᠢ ᠲᠡᠨᠳᠡ ᠡᠴᠡ ᠴᠤᠭᠯᠠᠭᠤᠯᠵᠤ᠂ ᠥᠪᠡᠷ ᠦᠨ ᠢᠶᠠᠨ ᠨᠡᠷᠡ ᠶᠢ ᠪᠠᠢᠯᠭᠠᠬᠤ ᠪᠠᠷ ᠰᠣᠩ᠋ᠭᠣᠭᠰᠠᠨ ᠭᠠᠵᠠᠷ ᠲᠠᠭᠠᠨ ᠠᠪᠴᠢᠷᠠᠨᠠ〉 ᠭᠡᠰᠡᠨ ᠪᠢᠯᠡ᠃ 10 ᠲᠡᠳᠡ ᠪᠣᠯ ᠲᠠᠨ ᠤ ᠵᠠᠷᠤᠴᠠ᠂ ᠲᠠᠨ ᠤ ᠠᠷᠠᠳ ᠲᠦᠮᠡᠨ᠃ ᠲᠡᠳᠡᠨ ᠢ ᠲᠠ ᠠᠤᠭᠠ ᠬᠦᠴᠦ ᠪᠣᠯᠣᠨ ᠬᠦᠴᠦᠷᠬᠡᠭ ᠮᠤᠲᠤᠷ ᠢᠶᠠᠷ ᠢᠶᠠᠨ ᠵᠣᠯᠢᠨ ᠠᠪᠤᠷᠠᠭᠰᠠᠨ ᠶᠤᠮ᠃ 11 ᠶᠣᠬᠣᠸᠠ ᠮᠢᠨᠢ᠂ ᠲᠠᠨ ᠤ ᠴᠢᠬᠢ ᠵᠠᠷᠤᠴᠠ ᠶᠢᠨ ᠢᠶᠠᠨ ᠳᠠᠭᠠᠳᠬᠠᠯ ᠳᠤ᠂ ᠮᠥᠨ ᠨᠡᠷᠡ ᠶᠢ ᠲᠠᠨᠢ ᠬᠦᠨᠳᠦᠯᠡᠬᠦ ᠶᠢ ᠬᠦᠰᠡᠳᠡᠭ ᠵᠠᠷᠤᠴᠠ ᠨᠠᠷ ᠤᠨ ᠢᠶᠠᠨ ᠳᠠᠭᠠᠳᠬᠠᠯ ᠳᠤ ᠰᠣᠨᠣᠷ ᠪᠠᠢᠵᠤ᠂ ᠥᠨᠥᠳᠥᠷ ᠵᠠᠷᠤᠴᠠ ᠪᠠᠨ ᠠᠮᠵᠢᠯᠲᠠ ᠲᠠᠢ ᠪᠣᠯᠭᠠᠨ᠂ ᠡᠨᠡ ᠬᠥᠮᠦᠨ ᠦ ᠡᠮᠦᠨᠡ ᠥᠷᠥᠰᠢᠶᠡᠯ ᠰᠣᠶᠣᠷᠬᠠᠭᠠᠴᠢ》 ᠭᠡᠪᠡ᠃ ᠲᠡᠷᠡ ᠦᠶᠡ ᠳᠦ ᠪᠢ ᠬᠠᠭᠠᠨ ᠤ ᠰᠥᠩ ᠪᠠᠷᠢᠭᠴᠢ ᠪᠠᠢᠭᠰᠠᠨ ᠶᠤᠮ᠃