ᠨᠧᠾᠧᠮᠢᠶᠠ ᠬᠣᠶᠠᠷ
ᠨᠧᠾᠧᠮᠢᠶᠠ ᠶᠦᠳᠠ ᠳᠤ ᠢᠯᠡᠭᠡᠭᠳᠡᠪᠡ
1 ᠠᠷᠲ᠋ᠠᠱᠠᠰᠲ᠋ᠠ ᠬᠠᠭᠠᠨ ᠤ ᠬᠣᠷᠢᠳᠤᠭᠠᠷ ᠣᠨ ᠤ ᠨᠢᠰᠠᠨ ᠰᠠᠷᠠ 2 ᠪᠠᠢᠪᠠ᠃ ᠬᠠᠭᠠᠨ ᠤ ᠡᠮᠦᠨᠡ ᠳᠠᠷᠠᠰᠤ ᠪᠠᠢᠭᠰᠠᠨ ᠪᠥᠭᠡᠳ ᠪᠢ ᠲᠡᠷᠡ ᠳᠠᠷᠠᠰᠤ ᠶᠢ ᠠᠪᠴᠤ ᠬᠠᠭᠠᠨ ᠳᠤ ᠪᠠᠷᠢᠪᠠ᠃ ᠪᠢ ᠤᠷᠢᠳᠤ ᠨᠢ ᠲᠡᠭᠦᠨ ᠦ ᠡᠮᠦᠨᠡ ᠭᠤᠨᠢᠭᠯᠠᠩ᠋ᠭᠤᠢ ᠪᠠᠢᠵᠤ ᠥᠩᠭᠡᠷᠡᠭᠡ ᠦᠭᠡᠢ᠃ 2 ᠲᠡᠢᠮᠦ ᠪᠣᠯᠬᠣᠷ ᠬᠠᠭᠠᠨ ᠨᠠᠳᠠ ᠠᠴᠠ᠄ 《ᠴᠢ ᠡᠪᠡᠳᠴᠢᠨ ᠲᠤᠰᠤᠭᠠ ᠦᠭᠡᠢ ᠠᠲᠠᠯᠠ ᠪᠠᠨ ᠴᠢᠷᠠᠢ ᠴᠢᠨᠢ ᠶᠠᠭᠠᠬᠢᠭᠠᠳ ᠭᠤᠨᠢᠭ ᠲᠠᠢ ᠪᠠᠢᠨᠠ ᠪᠤᠢ︖ ᠴᠢ ᠰᠡᠳᠬᠢᠯ ᠳᠡᠭᠡᠨ ᠭᠠᠷᠴᠠᠭᠠ ᠦᠭᠡᠢ ᠭᠤᠨᠢᠭ ᠲᠠᠢ ᠪᠠᠢᠨᠠ》 ᠭᠡᠰᠡᠨ ᠳᠦ᠂ ᠪᠢ ᠮᠠᠰᠢ ᠶᠡᠬᠡ ᠠᠶᠤᠪᠠ᠃ 3 ᠪᠢ ᠬᠠᠭᠠᠨ ᠳᠤ᠄ 《ᠬᠠᠭᠠᠨ ᠮᠥᠩᠬᠡ ᠨᠠᠰᠤᠯᠠᠬᠤ ᠪᠣᠯᠲᠤᠭᠠᠢ᠂ ᠡᠴᠢᠭᠡ ᠡᠪᠦᠭᠡᠳ ᠦᠨ ᠮᠢᠨᠢ ᠪᠤᠯᠠᠰᠢ ᠪᠠᠢᠭᠠ ᠬᠣᠲᠠ ᠡᠵᠡᠭᠦᠢᠷᠡᠵᠦ᠂ ᠬᠠᠭᠠᠯᠭᠠ ᠨᠤᠭᠤᠳ ᠨᠢ ᠭᠠᠯ ᠳᠤ ᠰᠢᠲᠠᠭᠳᠠᠭᠰᠠᠨ ᠪᠠᠢᠬᠤ ᠳᠤ ᠮᠢᠨᠦ ᠴᠢᠷᠠᠢ ᠬᠡᠷᠬᠢᠨ ᠭᠤᠨᠢᠭ ᠦᠭᠡᠢ ᠪᠠᠢᠬᠤ ᠪᠢᠯᠡ︖》 ᠭᠡᠬᠦ ᠳᠦ᠂ 4 ᠬᠠᠭᠠᠨ ᠨᠠᠳᠠ ᠳᠤ᠄ 《ᠴᠢ ᠶᠠᠭᠤ ᠬᠦᠰᠡᠵᠦ ᠪᠠᠢᠭᠠ ᠪᠤᠢ︖》 ᠭᠡᠯᠡ᠃ ᠪᠢ ᠲᠩᠷᠢ ᠶᠢᠨ ᠪᠤᠷᠬᠠᠨ ᠳᠤ ᠲᠦᠷ ᠳᠠᠭᠠᠳᠬᠠᠭᠠᠳ 5 ᠬᠠᠭᠠᠨ ᠳᠤ᠄ 《ᠬᠡᠷᠪᠡ ᠬᠠᠭᠠᠨ ᠲᠠᠭᠠᠯᠠᠵᠤ᠂ ᠮᠥᠨ ᠲᠠᠨ ᠤ ᠵᠠᠷᠤᠴᠠ ᠲᠠᠭᠠᠯᠠᠯ ᠢ ᠲᠠᠨᠢ ᠣᠯᠣᠭᠰᠠᠨ ᠪᠣᠯ᠂ ᠨᠠᠮᠠᠶᠢ ᠶᠦᠳᠠ ᠤᠷᠤᠭᠤ ᠢᠯᠡᠭᠡᠵᠦ᠂ ᠡᠴᠢᠭᠡ ᠡᠪᠦᠭᠡᠳ ᠦᠨ ᠮᠢᠨᠢ ᠪᠤᠯᠠᠰᠢ ᠪᠠᠢᠭᠠ ᠬᠣᠲᠠ ᠶᠢ ᠳᠠᠬᠢᠨ ᠪᠣᠰᠬᠠᠬᠤ ᠶᠢ ᠵᠥᠪᠰᠢᠶᠡᠷᠡᠨᠡ ᠤᠤ︖》 ᠭᠡᠪᠡ᠃ 6 ᠬᠠᠲᠤᠨ ᠨᠢ ᠳᠡᠷᠭᠡᠳᠡ ᠨᠢ ᠰᠠᠭᠤᠵᠤ ᠪᠠᠢᠭᠰᠠᠨ ᠪᠥᠭᠡᠳ ᠬᠠᠭᠠᠨ ᠨᠠᠳᠠ ᠠᠴᠠ᠄ 《ᠴᠢ ᠶᠠᠪᠤᠪᠠᠯ ᠬᠡᠳᠦᠢ ᠤᠳᠠᠬᠤ ᠪᠤᠢ︖ ᠬᠡᠳᠦᠢ ᠳᠦ ᠪᠤᠴᠠᠵᠤ ᠢᠷᠡᠬᠦ ᠪᠤᠢ︖》 ᠭᠡᠵᠦ ᠠᠰᠠᠭᠤᠪᠠ᠃ ᠨᠠᠮᠠᠶᠢ ᠢᠯᠡᠭᠡᠬᠦ ᠶᠢ ᠬᠠᠭᠠᠨ ᠲᠠᠭᠠᠯᠠᠭᠰᠠᠨ ᠲᠤᠯᠠ ᠪᠢ ᠴᠠᠭ ᠢ ᠲᠣᠪᠯᠠᠨ ᠬᠡᠯᠡᠭᠡᠳ 7 ᠬᠠᠭᠠᠨ ᠳᠤ᠄ 《ᠬᠡᠷᠪᠡ ᠬᠠᠭᠠᠨ ᠲᠠᠭᠠᠯᠠᠪᠠᠯ᠂ ᠨᠠᠮᠠᠶᠢ ᠶᠦᠳᠠ ᠬᠦᠷᠲᠡᠯᠡ ᠨᠡᠪᠲᠡᠷᠡᠭᠦᠯᠬᠦ ᠶᠢᠨ ᠲᠤᠯᠠᠳᠠ ᠡᠶᠦ᠋ᠹᠷᠠᠲ᠋ᠧᠰ ᠮᠥᠷᠡᠨ ᠦ ᠥᠷᠥᠨᠡ ᠲᠠᠯᠠ ᠶᠢᠨ ᠮᠤᠵᠢ ᠶᠢᠨ ᠵᠠᠬᠢᠷᠤᠭᠴᠢᠳ ᠲᠤ ᠢᠯᠡᠭᠡᠬᠦ ᠵᠥᠪᠰᠢᠶᠡᠷᠡᠯ ᠦᠨ ᠪᠢᠴᠢᠭ ᠢᠶᠠᠨ ᠨᠠᠳᠠ ᠳᠤ ᠥᠭᠭᠥᠨᠡ ᠤᠤ︖ 8 ᠪᠠᠰᠠ ᠬᠠᠭᠠᠨ ᠤ ᠣᠢ ᠶᠢ ᠰᠠᠬᠢᠭᠴᠢ ᠠᠰᠠᠹ ᠲᠤ ᠵᠠᠬᠢᠳᠠᠯ ᠪᠢᠴᠢᠵᠦ᠂ ᠠᠷᠢᠭᠤᠨ ᠥᠷᠭᠥᠭᠡᠨ ᠦ ᠳᠡᠷᠭᠡᠳᠡᠬᠢ ᠰᠢᠯᠲᠦᠭᠡᠨ ᠦ ᠬᠠᠭᠠᠯᠭᠠ ᠨᠤᠭᠤᠳ᠂ ᠬᠣᠲᠠ ᠶᠢᠨ ᠬᠡᠷᠡᠮ ᠪᠣᠯᠣᠨ ᠮᠢᠨᠦ ᠣᠴᠢᠵᠤ ᠰᠠᠭᠤᠬᠤ ᠪᠠᠢᠰᠢᠩ ᠢ ᠪᠠᠷᠢᠬᠤ ᠮᠣᠳᠣ ᠶᠢ ᠨᠠᠳᠠ ᠳᠤ ᠬᠠᠩ᠋ᠭᠠᠯᠭᠠᠨᠠ ᠤᠤ︖》 ᠭᠡᠬᠦ ᠳᠦ᠂ ᠪᠤᠷᠬᠠᠨ ᠤ ᠮᠢᠨᠢ ᠢᠪᠡᠭᠡᠯᠲᠦ ᠮᠤᠲᠤᠷ ᠮᠢᠨᠦ ᠳᠡᠭᠡᠷᠡ ᠪᠠᠢᠭᠰᠠᠨ ᠲᠤᠯᠠ ᠬᠠᠭᠠᠨ ᠲᠡᠳᠡᠭᠡᠷ ᠢ ᠵᠥᠪᠰᠢᠶᠡᠷᠡᠭᠰᠡᠨ ᠪᠠᠢᠯᠠ᠃
9 ᠬᠠᠭᠠᠨ ᠨᠠᠳᠠ ᠲᠠᠢ ᠬᠠᠮᠲᠤ ᠴᠡᠷᠢᠭ ᠤᠨ ᠨᠣᠶᠠᠳ ᠪᠣᠯᠣᠨ ᠮᠣᠷᠢᠲᠠᠳ ᠢᠯᠡᠭᠡᠭᠰᠡᠨ ᠶᠤᠮ᠃ ᠪᠢ ᠡᠶᠦ᠋ᠹᠷᠠᠲ᠋ᠧᠰ ᠮᠥᠷᠡᠨ ᠦ ᠥᠷᠥᠨᠡ ᠲᠠᠯᠠ ᠶᠢᠨ ᠮᠤᠵᠢ ᠶᠢᠨ ᠵᠠᠬᠢᠷᠤᠭᠴᠢᠳ ᠤᠷᠤᠭᠤ ᠣᠴᠢᠵᠤ᠂ ᠬᠠᠭᠠᠨ ᠤ ᠵᠠᠬᠢᠳᠠᠯ ᠢ ᠲᠡᠳᠡᠨ ᠳᠦ ᠭᠠᠷᠳᠠᠭᠤᠯᠪᠠ᠃ 10 ᠲᠡᠢᠨ ᠬᠦ ᠢᠰᠷᠧᠯᠴᠦᠳ ᠦᠨ ᠰᠠᠢᠨ ᠰᠠᠢᠬᠠᠨ ᠢ ᠬᠠᠢᠬᠤ ᠪᠠᠷ ᠨᠢᠭᠡᠨ ᠬᠥᠮᠦᠨ ᠢᠷᠡᠭᠰᠡᠨ ᠢ ᠰᠣᠨᠣᠰᠣᠭᠠᠳ ᠾᠣᠷᠣᠨ ᠬᠥᠮᠦᠨ ᠰᠠᠨᠪᠠᠯᠠᠲ ᠪᠠ ᠠᠮᠣᠨ ᠬᠥᠮᠦᠨ᠂ ᠲᠦᠰᠢᠮᠡᠯ ᠲᠣᠪᠢᠶᠠ ᠨᠠᠷ ᠮᠠᠰᠢ ᠶᠡᠬᠡ ᠳᠤᠷᠠ ᠦᠭᠡᠶᠢᠴᠡᠪᠡ᠃
ᠶᠧᠷᠦ᠋ᠰᠠᠯᠧᠮ ᠤᠨ ᠬᠡᠷᠡᠮ ᠢ ᠪᠠᠢᠴᠠᠭᠠᠪᠠ
11 ᠪᠢ ᠶᠧᠷᠦ᠋ᠰᠠᠯᠧᠮ ᠳᠤ ᠬᠦᠷᠴᠦ᠂ ᠲᠡᠨᠳᠡ ᠭᠤᠷᠪᠠ ᠬᠣᠨᠣᠭᠰᠠᠨ ᠤ ᠳᠠᠷᠠᠭᠠ᠂ 12 ᠴᠥᠭᠡᠬᠡᠨ ᠬᠥᠮᠦᠨ ᠲᠡᠢ ᠬᠠᠮᠲᠤ ᠰᠥᠨᠢ ᠪᠠᠷ ᠭᠠᠷᠪᠠ᠃ ᠪᠤᠷᠬᠠᠨ ᠨᠠᠮᠠᠶᠢ ᠶᠧᠷᠦ᠋ᠰᠠᠯᠧᠮ ᠤᠨ ᠲᠥᠯᠥᠭᠡ ᠠᠵᠢᠯᠯᠠᠭᠤᠯᠬᠤ ᠪᠠᠷ ᠰᠡᠳᠬᠢᠯ ᠳᠤ ᠮᠢᠨᠢ ᠶᠠᠭᠤ ᠬᠢᠭᠰᠡᠨ ᠢ ᠪᠢ ᠬᠡᠨ ᠳᠦ ᠴᠤ ᠬᠡᠯᠡᠭᠡ ᠦᠭᠡᠢ ᠪᠥᠭᠡᠳ ᠤᠨᠤᠵᠤ ᠶᠠᠪᠤᠭᠰᠠᠨ ᠤᠨᠤᠭᠠ ᠠᠴᠠ ᠮᠢᠨᠢ ᠥᠭᠡᠷᠡ ᠠᠮᠢᠲᠠᠨ ᠲᠡᠨᠳᠡ ᠪᠠᠢᠭᠰᠠᠨ ᠦᠭᠡᠢ᠃ 13 ᠰᠥᠨᠢ ᠪᠠᠷ ᠪᠢ ᠬᠥᠨᠳᠡᠢ ᠶᠢᠨ ᠬᠠᠭᠠᠯᠭᠠ ᠪᠠᠷ ᠭᠠᠷᠴᠤ᠂ ᠯᠤᠤᠲᠤ ᠬᠤᠳᠳᠤᠭ ᠢᠶᠠᠷ ᠳᠠᠮᠵᠢᠨ ᠪᠠᠭᠠᠰᠤᠨ ᠬᠠᠭᠠᠯᠭᠠ ᠬᠦᠷᠲᠡᠯᠡ ᠶᠠᠪᠤᠵᠤ ᠦᠵᠡᠬᠦ ᠳᠦ᠂ ᠶᠧᠷᠦ᠋ᠰᠠᠯᠧᠮ ᠤᠨ ᠬᠠᠨᠠ ᠬᠡᠷᠡᠮ ᠤᠳ ᠨᠤᠷᠠᠭᠠᠭᠳᠠᠵᠤ᠂ ᠬᠠᠭᠠᠯᠭᠠ ᠨᠤᠭᠤᠳ ᠨᠢ ᠭᠠᠯ ᠳᠤ ᠰᠢᠲᠠᠭᠳᠠᠭᠰᠠᠨ ᠪᠠᠢᠯᠠ᠃ 14 ᠲᠡᠭᠡᠭᠡᠳ ᠪᠢ ᠣᠷᠭᠢᠯᠤᠭᠤᠷ ᠤᠨ ᠬᠠᠭᠠᠯᠭᠠ ᠪᠠᠷ ᠳᠠᠮᠵᠢᠨ ᠬᠠᠭᠠᠨ ᠤ ᠴᠥᠭᠥᠷᠥᠮ ᠬᠦᠷᠬᠦ ᠳᠦ᠂ ᠴᠠᠰᠢ ᠨᠢ ᠤᠨᠤᠭᠠ ᠲᠠᠢ ᠨᠡᠪᠲᠡᠷᠡᠬᠦ ᠠᠷᠭᠠ ᠦᠭᠡᠢ ᠪᠣᠯᠵᠠᠢ᠃ 15 ᠲᠡᠢᠮᠦ ᠡᠴᠡ ᠪᠢ ᠰᠥᠨᠢ ᠪᠠᠷ ᠵᠢᠯᠠᠭᠠ ᠳᠠᠭᠠᠨ ᠶᠠᠪᠤᠵᠤ ᠬᠡᠷᠡᠮ ᠢ ᠰᠢᠨᠵᠢᠭᠰᠡᠨ ᠦ ᠳᠠᠷᠠᠭᠠ᠂ ᠡᠷᠭᠢᠭᠡᠳ ᠬᠥᠨᠳᠡᠢ ᠶᠢᠨ ᠬᠠᠭᠠᠯᠭᠠ ᠪᠠᠷ ᠳᠠᠮᠵᠢᠨ ᠪᠤᠴᠠᠪᠠ᠃ 16 ᠭᠡᠪᠡᠴᠦ ᠲᠦᠰᠢᠮᠡᠳ ᠮᠢᠨᠦ ᠬᠠᠮᠢᠭᠠᠰᠢ ᠪᠠᠨ ᠶᠠᠪᠤᠵᠤ᠂ ᠶᠠᠭᠤ ᠬᠢᠭᠰᠡᠨ ᠢ ᠠᠩᠵᠠᠭᠠᠷᠠᠭᠰᠠᠨ ᠦᠭᠡᠢ᠃ ᠪᠢ ᠶᠦᠳᠠᠢᠴᠤᠳ ᠲᠤ᠂ ᠲᠠᠬᠢᠯᠴᠢᠳ ᠲᠤᠨᠢ ᠴᠤ᠂ ᠨᠣᠶᠠᠳ ᠲᠤᠨᠢ ᠴᠤ᠂ ᠲᠦᠰᠢᠮᠡᠳ ᠲᠤᠨᠢ ᠴᠤ᠂ ᠠᠵᠢᠯ ᠬᠢᠬᠦ ᠬᠥᠮᠦᠰ ᠲᠤᠨᠢ ᠴᠤ ᠶᠠᠭᠤ ᠴᠤ ᠬᠡᠯᠡᠭᠡ ᠦᠭᠡᠢ ᠪᠠᠢᠪᠠ᠃
17 ᠳᠠᠷᠠᠭᠠ ᠨᠢ ᠪᠢ ᠲᠡᠳᠡᠨ ᠳᠦ᠄ 《ᠲᠠ ᠨᠠᠷ ᠪᠢᠳᠡᠨ ᠦ ᠬᠦᠨᠳᠦ ᠪᠠᠢᠳᠠᠯ ᠢ ᠬᠠᠷᠠᠵᠤ ᠪᠠᠢᠭᠠ ᠪᠢᠵᠡ ᠳᠠ᠂ ᠶᠧᠷᠦ᠋ᠰᠠᠯᠧᠮ ᠡᠵᠡᠭᠦᠢᠷᠡᠵᠦ᠂ ᠬᠠᠭᠠᠯᠭᠠ ᠨᠤᠭᠤᠳ ᠨᠢ ᠭᠠᠯ ᠳᠤ ᠰᠢᠲᠠᠭᠠᠭᠳᠠᠭᠰᠠᠨ ᠪᠠᠢᠨᠠ᠃ ᠶᠠᠪᠤᠵᠠᠭᠠᠶᠠ᠂ ᠣᠳᠣ ᠪᠢᠳᠡ ᠶᠧᠷᠦ᠋ᠰᠠᠯᠧᠮ ᠤᠨ ᠬᠡᠷᠡᠮ ᠢ ᠳᠠᠬᠢᠨ ᠪᠣᠰᠬᠠᠴᠠᠭᠠᠶᠠ᠃ ᠪᠢᠳᠡ ᠭᠤᠲᠤᠮᠰᠢᠭ ᠪᠣᠯᠣᠭᠠᠳ ᠪᠠᠢᠵᠤ ᠪᠣᠯᠬᠤ ᠦᠭᠡᠢ》 ᠭᠡᠳ 18 ᠪᠤᠷᠬᠠᠨ ᠤ ᠮᠢᠨᠢ ᠮᠤᠲᠤᠷ ᠨᠠᠮᠠᠶᠢ ᠢᠪᠡᠭᠡᠭᠰᠡᠨ ᠢᠶᠡᠷ ᠬᠠᠭᠠᠨ ᠨᠠᠳᠠ ᠳᠤ ᠶᠠᠭᠤ ᠠᠢᠯᠠᠳᠤᠭᠰᠠᠨ ᠢ ᠲᠡᠳᠡᠨ ᠳᠦ ᠬᠡᠯᠡᠬᠦ ᠳᠦ᠂ ᠲᠡᠳᠡ᠄ 《ᠲᠡᠭᠡᠶᠡ᠂ ᠳᠠᠬᠢᠨ ᠪᠠᠷᠢᠵᠠᠭᠠᠶᠠ》 ᠭᠡᠪᠡ᠃ ᠡᠢᠨ ᠬᠦ ᠲᠡᠳᠡ ᠡᠨᠡ ᠰᠠᠢᠨ ᠠᠵᠢᠯ ᠳᠤ ᠭᠠᠷ ᠣᠷᠣᠯᠴᠠᠪᠠ᠃ 19 ᠭᠡᠪᠡᠴᠦ ᠾᠣᠷᠣᠨ ᠬᠥᠮᠦᠨ ᠰᠠᠨᠪᠠᠯᠠᠲ᠂ ᠠᠮᠣᠨ ᠬᠥᠮᠦᠨ ᠲᠦᠰᠢᠮᠡᠯ ᠲᠣᠪᠢᠶᠠ ᠬᠢᠭᠡᠳ ᠠᠷᠠᠪ ᠬᠥᠮᠦᠨ ᠭᠧᠱᠧᠮ ᠡᠭᠦᠨ ᠢ ᠰᠣᠨᠣᠰᠣᠭᠠᠳ ᠪᠢᠳᠡᠨ ᠢ ᠱᠣᠣᠯᠠᠨ ᠪᠠᠰᠤᠮᠵᠢᠯᠠᠵᠤ᠄ 《ᠲᠠ ᠨᠠᠷ ᠶᠠᠭᠤ ᠬᠢᠵᠦ ᠪᠠᠢᠭᠠ ᠨᠢ ᠡᠨᠡ ᠪᠤᠢ︖ ᠲᠠ ᠨᠠᠷ ᠬᠠᠭᠠᠨ ᠠᠴᠠ ᠲᠡᠷᠰᠯᠡᠬᠦ ᠭᠡᠵᠦ ᠪᠠᠢᠨᠠ ᠤᠤ︖》 ᠭᠡᠬᠦ ᠳᠦ᠂ 20 ᠪᠢ ᠬᠠᠷᠢᠭᠤᠯᠤᠨ᠄ 《ᠲᠩᠷᠢ ᠶᠢᠨ ᠪᠤᠷᠬᠠᠨ ᠪᠢᠳᠡᠨ ᠢ ᠠᠮᠵᠢᠯᠲᠠ ᠲᠠᠢ ᠪᠣᠯᠭᠠᠨᠠ᠃ ᠲᠡᠭᠦᠨ ᠦ ᠵᠠᠷᠤᠴᠠ ᠪᠢᠳᠡ ᠪᠣᠰᠴᠠᠭᠠᠵᠤ ᠪᠠᠷᠢᠨᠠ᠂ ᠬᠠᠷᠢᠨ ᠲᠠ ᠨᠠᠷ ᠶᠧᠷᠦ᠋ᠰᠠᠯᠧᠮ ᠳᠤ ᠶᠠᠮᠠᠷ ᠴᠤ ᠬᠤᠪᠢ᠂ ᠡᠷᠬᠡ᠂ ᠳᠤᠷᠠᠰᠬᠠᠯ ᠪᠠᠢᠬᠤ ᠦᠭᠡᠢ》 ᠭᠡᠵᠦ ᠬᠡᠯᠡᠪᠡ᠃