ᠨᠧᠾᠧᠮᠢᠶᠠ ᠠᠷᠪᠠᠨ ᠨᠢᠭᠡ
ᠶᠧᠷᠦ᠋ᠰᠠᠯᠧᠮ ᠤᠨ ᠰᠢᠨᠡ ᠰᠠᠭᠤᠭᠠᠯᠢ
1 ᠠᠷᠠᠳ ᠲᠦᠮᠡᠨ ᠦ ᠤᠳᠤᠷᠢᠳᠤᠭᠴᠢᠳ ᠶᠧᠷᠦ᠋ᠰᠠᠯᠧᠮ ᠳᠤ ᠰᠠᠭᠤᠷᠢᠰᠢᠭᠰᠠᠨ ᠪᠠᠢᠨᠠ᠃ ᠪᠤᠰᠤᠳ ᠠᠷᠠᠳ ᠣᠯᠠᠨ ᠰᠢᠪᠠᠭᠠ ᠬᠠᠶᠠᠵᠤ᠂ ᠠᠷᠪᠠ ᠠᠴᠠ ᠨᠢᠭᠡ ᠨᠢ ᠠᠷᠢᠭᠤᠨ ᠬᠣᠲᠠ ᠶᠧᠷᠦ᠋ᠰᠠᠯᠧᠮ ᠳᠤ ᠰᠠᠭᠤᠷᠢᠰᠢᠵᠤ᠂ ᠶᠢᠰᠦ ᠨᠢ ᠥᠭᠡᠷᠡ ᠬᠣᠲᠠ ᠨᠤᠭᠤᠳ ᠲᠠᠭᠠᠨ ᠦᠯᠡᠳᠡᠬᠦ ᠪᠡᠷ ᠪᠣᠯᠵᠠᠢ᠃ 2 ᠬᠠᠷᠢᠨ ᠰᠠᠢᠨ ᠳᠤᠷᠠ ᠠᠴᠠ ᠪᠠᠨ ᠶᠧᠷᠦ᠋ᠰᠠᠯᠧᠮ ᠳᠤ ᠰᠠᠭᠤᠷᠢᠰᠢᠬᠤ ᠭᠡᠰᠡᠨ ᠬᠥᠮᠦᠰ ᠴᠤ ᠪᠠᠢᠭᠰᠠᠨ ᠪᠥᠭᠡᠳ ᠠᠷᠠᠳ ᠲᠦᠮᠡᠨ ᠲᠡᠷᠡ ᠪᠦᠬᠦ ᠬᠥᠮᠦᠰ ᠢ ᠢᠷᠥᠭᠡᠪᠡ᠃
3 ᠶᠧᠷᠦ᠋ᠰᠠᠯᠧᠮ ᠳᠤ ᠰᠠᠭᠤᠷᠢᠰᠢᠭᠰᠠᠨ ᠮᠤᠵᠢ ᠶᠢᠨ ᠲᠡᠷᠢᠭᠦᠳ ᠭᠡᠪᠡᠯ᠄ (ᠲᠠᠬᠢᠯᠴᠢᠳ᠂ ᠯᠧᠸᠢᠴᠦᠳ᠂ ᠠᠷᠢᠭᠤᠨ ᠥᠷᠭᠥᠭᠡᠨ ᠦ ᠦᠢᠯᠡᠴᠢᠯᠡᠭᠴᠢᠳ᠂ ᠰᠣᠯᠣᠮᠣᠨ ᠤ ᠲᠦᠰᠢᠮᠡᠳ ᠦᠨ ᠦᠷᠡ ᠤᠳᠤᠮ ᠵᠡᠷᠭᠡ ᠢᠰᠷᠧᠯᠴᠦᠳ ᠶᠦᠳᠠ ᠶᠢᠨ ᠬᠣᠲᠠ ᠲᠣᠰᠬᠣᠨ ᠳᠤ ᠥᠪᠡᠷ ᠥᠪᠡᠷ ᠦᠨ ᠢᠶᠠᠨ ᠡᠵᠡᠮᠰᠢᠯ ᠭᠠᠵᠠᠷ ᠲᠤ ᠰᠠᠭᠤᠷᠢᠰᠢᠭᠰᠠᠨ ᠪᠠᠢᠬᠤ ᠳᠤ᠂ 4 ᠶᠦᠳᠠᠴᠤᠳ ᠪᠣᠯᠣᠨ ᠪᠢᠨᠶᠠᠮᠢᠨᠴᠤᠳ ᠤᠨ ᠵᠠᠷᠢᠮ ᠨᠢ ᠶᠧᠷᠦ᠋ᠰᠠᠯᠧᠮ ᠳᠤ ᠰᠠᠭᠤᠷᠢᠰᠢᠪᠠ᠃) ᠶᠦᠳᠠ ᠶᠢᠨ ᠦᠷᠡ ᠤᠳᠤᠮ ᠠᠴᠠ ᠫᠧᠷᠧᠽ ᠤᠨ ᠬᠣᠢᠴᠢ ᠠᠲ᠋ᠠᠢᠶᠠ (ᠮᠠᠬᠠᠯᠠᠯᠧᠯ ᠤᠨ ᠳᠥᠴᠢ᠂ ᠱᠧᠹᠠᠲ᠋ᠢᠶᠠ ᠶᠢᠨ ᠭᠤᠴᠢ᠂ ᠠᠮᠠᠷᠢᠶᠠ ᠶᠢᠨ ᠵᠢᠴᠢ᠂ ᠽᠧᠺᠠᠷᠢᠶᠠ ᠶᠢᠨ ᠠᠴᠢ᠂ ᠦᠽᠢᠶᠠ ᠶᠢᠨ ᠬᠦᠦ) ᠨᠠᠷ᠂ 5 ᠮᠠᠶᠠᠰᠧᠶᠠ (ᠰᠢᠯᠣᠨᠣᠲ ᠤᠨ ᠬᠦᠦ ᠪᠣᠯᠬᠤ ᠽᠧᠺᠠᠷᠢᠶᠠ ᠶᠢᠨ ᠲᠠᠴᠢ᠂ ᠶᠣᠶᠠᠷᠢᠪ ᠤᠨ ᠳᠥᠴᠢ᠂ ᠠᠳᠠᠢᠶᠠ ᠶᠢᠨ ᠭᠤᠴᠢ᠂ ᠬᠠᠽᠠᠢᠶᠠ ᠶᠢᠨ ᠵᠢᠴᠢ᠂ ᠺᠣᠯ ᠬᠣᠽᠧ ᠶᠢᠨ ᠠᠴᠢ᠂ ᠪᠠᠷᠦ᠋ᠺ ᠤᠨ ᠬᠦᠦ) ᠨᠠᠷ ᠪᠠᠢᠪᠠ᠃ 6 ᠶᠧᠷᠦ᠋ᠰᠠᠯᠧᠮ ᠳᠤ ᠰᠠᠭᠤᠷᠢᠰᠢᠭᠰᠠᠨ ᠫᠧᠷᠧᠽ ᠤᠨ ᠦᠷᠡ ᠤᠳᠤᠮ ᠳᠥᠷᠪᠡᠨ ᠵᠠᠭᠤ ᠵᠢᠷᠠᠨ ᠨᠠᠢ᠌ᠮᠠᠨ ᠬᠥᠮᠦᠨ ᠪᠠᠢᠭᠰᠠᠨ ᠪᠥᠭᠡᠳ ᠲᠡᠳᠡ ᠪᠦᠭᠦᠳᠡ ᠴᠢᠳᠠᠪᠤᠷᠢᠯᠢᠭ᠋ ᠬᠥᠮᠦᠰ ᠪᠠᠢᠪᠠ᠃
7 ᠪᠢᠨᠶᠠᠮᠢᠨ ᠤ ᠦᠷᠡ ᠤᠳᠤᠮ ᠠᠴᠠ ᠰᠠᠯᠦ᠋ (ᠶᠧᠱᠠᠢᠶᠠ ᠶᠢᠨ ᠬᠦᠦ ᠢᠲ᠋ᠢᠶᠧᠯ ᠤᠨ ᠲᠠᠴᠢ᠂ ᠮᠠᠶᠠᠰᠧᠶᠠ ᠶᠢᠨ ᠳᠥᠴᠢ᠂ ᠺᠣᠯᠠᠢᠶᠠ ᠶᠢᠨ ᠭᠤᠴᠢ᠂ ᠫᠧᠳᠠᠶᠠ ᠶᠢᠨ ᠵᠢᠴᠢ᠂ ᠶᠣᠶᠧᠳ᠋ ᠤᠨ ᠠᠴᠢ᠂ ᠮᠧᠱᠦ᠋ᠯᠠᠮ ᠤᠨ ᠬᠦᠦ) ᠨᠠᠷ ᠠᠴᠠ ᠭᠠᠳᠠᠨᠠ 8 ᠭᠠᠪᠠᠢ ᠪᠠ ᠰᠠᠯᠠᠢ ᠨᠠᠷ ᠴᠤ ᠪᠤᠢ᠂ ᠲᠡᠳᠡ ᠪᠦᠭᠦᠳᠡ ᠶᠢᠰᠦᠨ ᠵᠠᠭᠤ ᠬᠣᠷᠢᠨ ᠨᠠᠢ᠌ᠮᠠᠨ ᠬᠥᠮᠦᠨ ᠪᠠᠢᠪᠠ᠃ 9 ᠲᠡᠳᠡᠨ ᠦ ᠵᠠᠬᠢᠷᠤᠭᠴᠢ ᠪᠣᠯ ᠽᠢᠺᠷᠢ ᠶᠢᠨ ᠬᠦᠦ ᠶᠣᠶᠧᠯ᠂ ᠲᠡᠷᠡ ᠬᠣᠲᠠ ᠶᠢᠨ ᠣᠷᠣᠯᠠᠭᠴᠢ ᠵᠠᠬᠢᠷᠤᠭᠴᠢ ᠨᠢ ᠬᠠᠰᠧᠨᠦ᠋ᠶᠠ ᠶᠢᠨ ᠬᠦᠦ ᠶᠦᠳᠠ ᠪᠠᠢᠯᠠ᠃
10 ᠲᠠᠬᠢᠯᠴᠢᠳ ᠤᠨ ᠳᠤᠮᠳᠠ ᠠᠴᠠ ᠶᠣᠶᠠᠷᠢᠪ ᠤᠨ ᠬᠦᠦ ᠶᠧᠳᠠᠢᠶᠠ᠂ ᠶᠠᠺᠢᠨ᠂ 11 ᠰᠧᠷᠠᠢᠶᠠ (ᠪᠤᠷᠬᠠᠨ ᠤ ᠥᠷᠭᠥᠭᠡᠨ ᠦ ᠬᠠᠮᠢᠶᠠᠷᠤᠭᠴᠢ ᠠᠾᠢᠲ᠋ᠦ᠋ᠪ ᠤᠨ ᠳᠥᠴᠢ᠂ ᠮᠧᠷᠠᠶᠣᠲ ᠤᠨ ᠭᠤᠴᠢ᠂ ᠽᠠᠳᠣᠺ ᠤᠨ ᠵᠢᠴᠢ᠂ ᠮᠧᠱᠦ᠋ᠯᠠᠮ ᠤᠨ ᠠᠴᠢ᠂ ᠾᠢᠯᠺᠢᠶᠠ ᠶᠢᠨ ᠬᠦᠦ) ᠨᠠᠷ᠂ 12 ᠪᠠᠰᠠ ᠲᠡᠳᠡᠨ ᠲᠡᠢ ᠬᠠᠮᠲᠤ ᠠᠷᠢᠭᠤᠨ ᠥᠷᠭᠥᠭᠡᠨ ᠦ ᠠᠵᠢᠯ ᠢ ᠭᠦᠢᠴᠡᠳᠬᠡᠳᠡᠭ ᠨᠠᠢ᠌ᠮᠠᠨ ᠵᠠᠭᠤ ᠬᠣᠷᠢᠨ ᠬᠣᠶᠠᠷ ᠬᠠᠮᠲᠤᠷᠠᠭᠴᠢ ᠪᠠᠢᠭᠰᠠᠨ ᠪᠠ ᠠᠳᠠᠢᠶᠠ (ᠮᠠᠯᠺᠢᠶᠠ ᠶᠢᠨ ᠲᠠᠴᠢ᠂ ᠫᠠᠱᠦ᠋ᠷ ᠤᠨ ᠳᠥᠴᠢ᠂ ᠽᠧᠺᠠᠷᠢᠶᠠ ᠶᠢᠨ ᠭᠤᠴᠢ᠂ ᠠᠮᠽᠢ ᠶᠢᠨ ᠵᠢᠴᠢ᠂ ᠫᠧᠯᠠᠶᠠ ᠶᠢᠨ ᠠᠴᠢ᠂ ᠶᠧᠷᠣᠬᠠᠮ ᠤᠨ ᠬᠦᠦ) ᠨᠠᠷ᠂ 13 ᠲᠡᠭᠦᠨ ᠦ ᠬᠠᠮᠲᠤᠷᠠᠭᠴᠢ᠂ ᠬᠣᠶᠠᠷ ᠵᠠᠭᠤ ᠳᠥᠴᠢᠨ ᠬᠣᠶᠠᠷ ᠠᠢᠮᠠᠭ ᠤᠨ ᠲᠡᠷᠢᠭᠦᠨ᠂ ᠠᠮᠠᠱᠰᠠᠢ (ᠢᠮᠧᠷ ᠤᠨ ᠭᠤᠴᠢ᠂ ᠮᠧᠱᠢᠯᠧᠮᠣᠲ ᠤᠨ ᠵᠢᠴᠢ᠂ ᠠᠽᠠᠢ ᠶᠢᠨ ᠠᠴᠢ᠂ ᠠᠽᠠᠷᠧᠯ ᠤᠨ ᠬᠦᠦ) ᠨᠠᠷ᠂ 14 ᠪᠠᠰᠠ ᠲᠡᠳᠡᠨ ᠦ ᠬᠠᠮᠲᠤᠷᠠᠭᠴᠢ᠂ ᠵᠠᠭᠤ ᠬᠣᠷᠢᠨ ᠨᠠᠢ᠌ᠮᠠᠨ ᠴᠢᠳᠠᠪᠤᠷᠢᠯᠢᠭ᠋ ᠬᠥᠮᠦᠨ ᠪᠠᠢᠭᠰᠠᠨ ᠪᠥᠭᠡᠳ ᠡᠳᠡᠨ ᠦ ᠵᠠᠬᠢᠷᠤᠭᠴᠢ ᠨᠢ ᠬᠠᠭᠧᠳᠣᠯᠢᠮ ᠤᠨ ᠬᠦᠦ ᠽᠠᠪᠳᠢᠶᠧᠯ ᠪᠠᠢᠪᠠ᠃
15 ᠯᠧᠸᠢᠴᠦᠳ ᠡᠴᠡ ᠱᠧᠮᠠᠢᠶᠠ (ᠪᠦᠨᠢ ᠶᠢᠨ ᠭᠤᠴᠢ᠂ ᠬᠠᠱᠠᠪᠢᠶᠠ ᠶᠢᠨ ᠵᠢᠴᠢ᠂ ᠠᠽᠷᠢᠺᠠᠮ ᠤᠨ ᠠᠴᠢ᠂ ᠬᠠᠱᠦ᠋ᠪ ᠤᠨ ᠬᠦᠦ) ᠨᠠᠷ᠂ 16 ᠪᠤᠷᠬᠠᠨ ᠤ ᠥᠷᠭᠥᠭᠡᠨ ᠦ ᠭᠠᠳᠠᠨᠠᠬᠢ ᠠᠵᠢᠯ ᠢ ᠬᠠᠷᠢᠭᠤᠴᠠᠭᠰᠠᠨ ᠯᠧᠸᠢᠴᠦᠳ ᠦᠨ ᠤᠳᠤᠷᠢᠳᠤᠭᠴᠢ ᠱᠠᠪᠧᠲ᠋ᠠᠢ᠂ ᠶᠣᠽᠠᠪᠠᠳ᠋ ᠨᠠᠷ᠂ 17 ᠮᠥᠨ ᠮᠠᠲ᠋ᠠᠨᠢᠶᠠ (ᠮᠠᠭᠲᠠᠭᠠᠯ ᠪᠠ ᠳᠠᠭᠠᠳᠬᠠᠯ ᠤᠨ ᠤᠳᠤᠷᠢᠳᠤᠭᠴᠢ ᠠᠰᠠᠹ ᠤᠨ ᠵᠢᠴᠢ᠂ ᠽᠠᠪᠳᠢ ᠶᠢᠨ ᠠᠴᠢ᠂ ᠮᠢᠺᠠ ᠶᠢᠨ ᠬᠦᠦ) ᠨᠠᠷ᠂ ᠲᠡᠳᠡᠨ ᠦ ᠬᠠᠮᠲᠤᠷᠠᠭᠴᠢᠳ ᠤᠨ ᠳᠣᠲᠣᠷᠠᠬᠢ ᠣᠷᠣᠯᠠᠭᠴᠢ ᠪᠠᠺᠪᠦ᠋ᠺᠢᠶᠠ ᠬᠢᠭᠡᠳ ᠠᠪᠳᠠ (ᠶᠧᠳᠦ᠋ᠲ᠋ᠦ᠋ᠨ ᠤ ᠵᠢᠴᠢ᠂ ᠭᠠᠯᠠᠯ ᠤᠨ ᠠᠴᠢ᠂ ᠱᠠᠮᠦ᠋ᠶᠠ ᠶᠢᠨ ᠬᠦᠦ) ᠨᠠᠷ ᠪᠠᠢᠵᠤ᠂ 18 ᠠᠷᠢᠭᠤᠨ ᠬᠣᠲᠠ ᠳᠠᠬᠢ ᠯᠧᠸᠢᠴᠦᠳ ᠨᠢ ᠨᠡᠢᠲᠡ ᠬᠣᠶᠠᠷ ᠵᠠᠭᠤ ᠨᠠᠶᠠᠨ ᠳᠥᠷᠪᠡᠨ ᠬᠥᠮᠦᠨ ᠪᠠᠢᠪᠠ᠃
19 ᠬᠠᠭᠠᠯᠭᠠᠴᠢᠳ ᠠᠴᠠ ᠠᠺᠦ᠋ᠪ᠂ ᠲᠠᠯᠮᠣᠨ ᠪᠣᠯᠣᠨ ᠲᠡᠳᠡᠨ ᠦ ᠬᠠᠮᠲᠤ ᠬᠠᠭᠠᠯᠭᠠ ᠮᠠᠨᠠᠳᠠᠭ ᠵᠠᠭᠤ ᠳᠠᠯᠠᠨ ᠬᠣᠶᠠᠷ ᠬᠥᠮᠦᠨ ᠪᠠᠢᠪᠠ᠃ 20 ᠪᠤᠰᠤᠳ ᠲᠠᠬᠢᠯᠴᠢᠳ᠂ ᠯᠧᠸᠢᠴᠦᠳ ᠪᠣᠯᠣᠨ ᠢᠰᠷᠧᠯᠴᠦᠳ ᠨᠢ ᠶᠦᠳᠠ ᠶᠢᠨ ᠪᠦᠬᠦ ᠬᠣᠲᠠ ᠲᠣᠰᠬᠣᠨ ᠳᠤ᠂ ᠡᠵᠡᠮᠰᠢᠯ ᠭᠠᠵᠠᠷ ᠲᠠᠭᠠᠨ ᠰᠠᠭᠤᠷᠢᠰᠢᠭᠰᠠᠨ ᠪᠠᠢᠪᠠ᠃ 21 ᠠᠷᠢᠭᠤᠨ ᠥᠷᠭᠥᠭᠡᠨ ᠦ ᠦᠢᠯᠡᠴᠢᠯᠡᠭᠴᠢᠳ ᠣᠹᠧᠯ ᠳᠤ ᠰᠠᠭᠤᠷᠢᠰᠢᠵᠤ᠂ ᠲᠡᠳᠡᠨ ᠦ ᠬᠠᠮᠢᠶᠠᠷᠤᠭᠴᠢ ᠨᠢ ᠽᠢᠬᠠ᠂ ᠬᠢᠱᠫᠠ ᠨᠠᠷ ᠪᠠᠢᠪᠠ᠃
22 ᠶᠧᠷᠦ᠋ᠰᠠᠯᠧᠮ ᠳᠠᠬᠢ ᠯᠧᠸᠢᠴᠦᠳ ᠦᠨ ᠬᠠᠷᠠᠭᠠᠯᠵᠠᠭᠴᠢ ᠨᠢ ᠮᠢᠺᠠ ᠶᠢᠨ ᠭᠤᠴᠢ᠂ ᠮᠠᠲ᠋ᠠᠨᠢᠶᠠ ᠶᠢᠨ ᠵᠢᠴᠢ᠂ ᠬᠠᠱᠠᠪᠢᠶᠠ ᠶᠢᠨ ᠠᠴᠢ᠂ ᠪᠠᠨᠢ ᠶᠢᠨ ᠬᠦᠦ ᠦᠽᠢ ᠪᠠᠢᠪᠠ᠃ ᠲᠡᠷᠡ ᠪᠣᠯ ᠪᠤᠷᠬᠠᠨ ᠤ ᠥᠷᠭᠥᠭᠡᠨ ᠦ ᠮᠥᠷᠭᠥᠯ ᠦᠨ ᠳᠠᠭᠤᠤ ᠶᠢ ᠳᠠᠭᠤᠯᠠᠳᠠᠭ ᠪᠠᠢᠭᠰᠠᠨ ᠠᠰᠠᠹ ᠤᠨ ᠦᠷᠡ ᠤᠳᠤᠮ ᠶᠤᠮ᠃ 23 ᠳᠠᠭᠤᠴᠢᠳ ᠤᠨ ᠡᠳᠦᠷ ᠲᠤᠲᠤᠮ ᠤᠨ ᠬᠢᠬᠦ ᠦᠢᠯᠡᠴᠢᠯᠡᠯ ᠨᠢ ᠬᠠᠭᠠᠨ ᠤ ᠵᠠᠷᠯᠢᠭ ᠤᠨ ᠳᠠᠭᠠᠤ ᠲᠣᠭᠲᠠᠭᠠᠭᠳᠠᠭᠰᠠᠨ ᠪᠠᠢᠪᠠ᠃ 24 ᠶᠦᠳᠠ ᠶᠢᠨ ᠬᠥᠪᠡᠭᠦᠨ ᠽᠧᠷᠠ ᠶᠢᠨ ᠦᠷᠡ ᠤᠳᠤᠮ ᠮᠧᠱᠧᠽᠠᠪᠧᠯ ᠤᠨ ᠬᠦᠦ ᠫᠧᠲ᠋ᠠᠾᠢᠶᠠ ᠬᠠᠭᠠᠨ ᠢ ᠲᠥᠯᠥᠭᠡᠯᠡᠨ ᠠᠷᠠᠳ ᠲᠦᠮᠡᠨ ᠦ ᠪᠦᠬᠦ ᠠᠳᠠᠯ ᠶᠠᠪᠤᠳᠠᠯ ᠢ ᠬᠠᠮᠢᠶᠠᠷᠳᠠᠭ ᠪᠠᠢᠪᠠ᠃
25 ᠶᠦᠳᠠᠴᠤᠳ ᠤᠨ ᠵᠠᠷᠢᠮ ᠨᠢ ᠲᠠᠷᠢᠶᠠᠨ ᠲᠠᠯᠠᠪᠠᠢ ᠲᠠᠢ ᠲᠣᠰᠬᠣᠳ ᠲᠤ ᠰᠠᠭᠤᠷᠢᠰᠢᠪᠠ᠃ ᠵᠠᠷᠢᠮ ᠨᠢ ᠺᠢᠷᠢᠶᠠᠲ ᠠᠷᠪᠠ ᠪᠣᠯᠣᠨ ᠡᠷᠭᠢᠨ ᠲᠣᠭᠣᠷᠢᠨ ᠤ ᠬᠢᠨᠢ ᠲᠣᠰᠬᠣᠳ ᠲᠤ᠂ ᠵᠠᠷᠢᠮ ᠨᠢ ᠳ᠋ᠢᠪᠣᠨ ᠪᠣᠯᠣᠨ ᠡᠷᠭᠢᠨ ᠲᠣᠭᠣᠷᠢᠨ ᠤ ᠬᠢᠨᠢ ᠲᠣᠰᠬᠣᠳ ᠲᠤ᠂ ᠶᠧᠺᠠᠪᠽᠧᠯ ᠪᠣᠯᠣᠨ ᠡᠷᠭᠢᠨ ᠲᠣᠭᠣᠷᠢᠨ ᠤ ᠬᠢᠨᠢ ᠲᠣᠰᠬᠣᠳ ᠲᠤ ᠰᠠᠭᠤᠷᠢᠰᠢᠵᠤ᠂ 26 ᠪᠠᠰᠠ ᠵᠠᠷᠢᠮ ᠨᠢ ᠶᠧᠱᠦ᠋ᠶᠠ ᠳᠤ᠂ ᠮᠣᠯᠠᠳᠠ ᠳᠤ᠂ ᠪᠧᠲ ᠫᠧᠯᠧᠲ ᠲᠤ᠂ 27 ᠬᠠᠽᠠᠷ ᠱᠦᠶᠠ ᠳᠤ᠂ ᠪᠧᠷ ᠱᠧᠪᠠ ᠪᠣᠯᠣᠨ ᠡᠷᠭᠢᠨ ᠲᠣᠭᠣᠷᠢᠨ ᠤ ᠬᠢᠨᠢ ᠲᠣᠰᠬᠣᠳ ᠲᠤ᠂ 28 ᠽᠢᠺᠯᠠᠭ ᠲᠤ᠂ ᠮᠧᠺᠣᠨᠠ ᠪᠣᠯᠣᠨ ᠡᠷᠭᠢᠨ ᠲᠣᠭᠣᠷᠢᠨ ᠤ ᠬᠢᠨᠢ ᠲᠣᠰᠬᠣᠳ ᠲᠤ᠂ 29 ᠧᠨ ᠷᠢᠮᠣᠨ ᠳᠤ᠂ ᠽᠣᠷᠠ ᠳᠤ᠂ ᠶᠠᠷᠮᠦ᠋ᠲ ᠲᠤ᠂ 30 ᠽᠠᠨᠣᠶᠠ᠂ ᠠᠳᠦ᠋ᠯᠠᠮ ᠪᠣᠯᠣᠨ ᠡᠷᠭᠢᠨ ᠲᠣᠭᠣᠷᠢᠨ ᠤ ᠬᠢᠨᠢ ᠲᠣᠰᠬᠣᠳ ᠲᠤ᠂ ᠯᠠᠺᠢᠱ ᠪᠣᠯᠣᠨ ᠲᠡᠭᠦᠨ ᠦ ᠲᠠᠯᠠᠪᠠᠢ ᠨᠤᠭᠤᠳ᠂ ᠠᠽᠧᠺᠠ ᠪᠣᠯᠣᠨ ᠡᠷᠭᠢᠨ ᠲᠣᠭᠣᠷᠢᠨ ᠤ ᠬᠢᠨᠢ ᠲᠣᠰᠬᠣᠳ ᠲᠤ ᠰᠠᠭᠤᠷᠢᠰᠢᠪᠠ᠃ ᠲᠡᠢᠨ ᠬᠦ ᠲᠡᠳᠡ ᠪᠧᠷ ᠱᠧᠪᠠ ᠠᠴᠠ ᠾᠢᠨᠣᠮ ᠤᠨ ᠬᠥᠨᠳᠡᠢ ᠬᠦᠷᠲᠡᠯᠡ ᠰᠠᠭᠤᠷᠢᠰᠢᠵᠠᠢ᠃ 31 ᠪᠢᠨᠶᠠᠮᠢᠨᠴᠤᠳ ᠭᠧᠪᠠ ᠠᠴᠠ ᠴᠢᠨᠠᠭᠰᠢ᠂ ᠮᠢᠺᠮᠠᠰ᠂ ᠠᠶᠠ᠂ ᠪᠧᠲ᠋ᠧᠯ ᠪᠣᠯᠣᠨ ᠡᠷᠭᠢᠨ ᠲᠣᠭᠣᠷᠢᠨ ᠤ ᠬᠢᠨᠢ ᠲᠣᠰᠬᠣᠳ ᠲᠤ᠂ 32 ᠮᠥᠨ ᠠᠨᠠᠲ᠋ᠣᠲ᠂ ᠨᠣᠪ᠂ ᠠᠨᠠᠨᠢᠶᠠ᠂ 33 ᠬᠠᠽᠣᠷ᠂ ᠷᠠᠮᠠ᠂ ᠬᠢᠲ᠋ᠠᠢᠮ᠂ 34 ᠬᠠᠳᠢᠳ᠋᠂ ᠽᠧᠪᠣᠢᠮ᠂ ᠨᠧᠪᠠᠯᠠᠲ᠂ 35 ᠯᠣᠳ᠋᠂ ᠣᠨᠣ᠋ ᠬᠢᠭᠡᠳ ᠤᠷᠠᠨ ᠳᠠᠷᠬᠠᠳ ᠤᠨ ᠬᠥᠨᠳᠡᠢ ᠳᠦ ᠰᠠᠭᠤᠷᠢᠰᠢᠪᠠ᠃ 36 ᠮᠥᠨ ᠶᠦᠳᠠ ᠳᠤ ᠪᠠᠢᠭᠰᠠᠨ ᠯᠧᠸᠢᠴᠦᠳ ᠦᠨ ᠵᠠᠷᠢᠮ ᠪᠦᠯᠦᠭ ᠤᠳ ᠨᠢ ᠪᠢᠨᠶᠠᠮᠢᠨ ᠤ ᠨᠤᠲᠤᠭ ᠲᠤ ᠰᠠᠭᠤᠷᠢᠰᠢᠪᠠ᠃