ᠨᠧᠾᠧᠮᠢᠶᠠ ᠶᠢᠰᠦ
ᠢᠰᠷᠧᠯᠴᠦᠳ ᠨᠢᠭᠦᠯ ᠢᠶᠡᠨ ᠤᠯᠠᠢᠪᠠ
1 ᠲᠤᠰ ᠰᠠᠷᠠ ᠶᠢᠨ ᠬᠣᠷᠢᠨ ᠳᠥᠷᠪᠡᠨ ᠳᠦ ᠢᠰᠷᠧᠯᠴᠦᠳ ᠳᠠᠬᠢᠨ ᠴᠤᠭᠯᠠᠷᠠᠪᠠ᠃ ᠡᠨᠡ ᠤᠳᠠᠭᠠ ᠲᠡᠳᠡ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠡᠨ ᠰᠢᠷᠣᠢ ᠰᠠᠴᠤᠨ᠂ ᠲᠠᠭᠠᠷ ᠤᠭᠯᠠᠵᠤ᠂ ᠪᠠᠴᠠᠭ ᠪᠠᠷᠢᠵᠠᠭᠠᠪᠠ᠃ 2 ᠢᠰᠷᠧᠯ ᠤᠨ ᠦᠷᠡ ᠬᠣᠢᠴᠢ ᠥᠪᠡᠷᠰᠡᠳ ᠢ ᠪᠠᠨ ᠪᠦᠬᠦ ᠬᠠᠷᠢ ᠶᠢᠨ ᠬᠢᠨ ᠡᠴᠡ ᠲᠤᠰᠠᠭᠠᠷᠯᠠᠭᠰᠠᠨ ᠪᠠᠢᠪᠠ᠃ ᠲᠡᠳᠡ ᠪᠣᠰᠴᠤ ᠥᠪᠡᠷᠰᠡᠳ ᠦᠨ ᠢᠶᠠᠨ ᠨᠢᠭᠦᠯ ᠪᠣᠯᠣᠨ ᠡᠴᠢᠭᠡ ᠡᠪᠦᠭᠡᠳ ᠦᠨ ᠢᠶᠠᠨ ᠭᠡᠮ ᠪᠤᠷᠤᠭᠤ ᠶᠢ ᠤᠯᠠᠢᠪᠠ᠃ 3 ᠲᠡᠳᠡ ᠪᠠᠢᠷᠢᠨ ᠳᠠᠭᠠᠨ ᠵᠣᠭᠰᠣᠨ᠂ ᠡᠳᠦᠷ ᠦᠨ ᠳᠥᠷᠪᠡᠨ ᠦ ᠨᠢᠭᠡ ᠳᠦᠨᠢ ᠶᠣᠬᠣᠸᠠ ᠪᠤᠷᠬᠠᠨ ᠤ ᠪᠠᠨ ᠬᠠᠤᠯᠢ ᠶᠢᠨ ᠨᠣᠮ ᠠᠴᠠ ᠤᠩ᠋ᠰᠢᠭᠰᠠᠨ ᠪᠥᠭᠡᠳ ᠳᠥᠷᠪᠡᠨ ᠦ ᠨᠢᠭᠡ ᠳᠦᠨᠢ ᠨᠢᠭᠦᠯ ᠢᠶᠡᠨ ᠤᠯᠠᠢᠨ᠂ ᠶᠣᠬᠣᠸᠠ ᠪᠤᠷᠬᠠᠨ ᠳᠠᠭᠠᠨ ᠮᠥᠷᠭᠥᠵᠦ ᠪᠠᠢᠯᠠ᠃ 4 ᠲᠠᠪᠴᠠᠩ ᠳᠡᠭᠡᠷᠡ ᠶᠧᠱᠦ᠋ᠶᠠ᠂ ᠪᠠᠨᠢ᠂ ᠺᠠᠳ᠋ᠮᠢᠶᠧᠯ᠂ ᠱᠧᠪᠠᠨᠢᠶᠠ᠂ ᠪᠦᠨᠢ᠂ ᠱᠧᠷᠧᠪᠢᠶᠠ᠂ ᠪᠠᠨᠢ ᠪᠣᠯᠣᠨ ᠺᠧᠨᠠᠨᠢ ᠵᠡᠷᠭᠡ ᠯᠧᠸᠢᠴᠦᠳ ᠵᠣᠭᠰᠣᠭᠠᠳ ᠪᠤᠷᠬᠠᠨ ᠶᠣᠬᠣᠸᠠ ᠤᠷᠤᠭᠤ ᠪᠠᠨ ᠴᠢᠩᠭ᠍ᠠ ᠳᠠᠭᠤ ᠪᠠᠷ ᠬᠠᠰᠬᠢᠷᠴᠤ ᠪᠠᠢᠯᠠ᠃ 5 ᠶᠧᠱᠦ᠋ᠶᠠ᠂ ᠺᠠᠳ᠋ᠮᠢᠶᠧᠯ᠂ ᠪᠠᠨᠢ᠂ ᠬᠠᠱᠠᠪᠨᠧᠶᠠ᠂ ᠱᠧᠷᠧᠪᠢᠶᠠ᠂ ᠬᠣᠳᠢᠶᠠ᠂ ᠱᠧᠪᠠᠨᠢᠶᠠ ᠪᠣᠯᠣᠨ ᠫᠧᠲ᠋ᠠᠾᠢᠶᠠ ᠵᠡᠷᠭᠡ ᠯᠧᠸᠢᠴᠦᠳ᠄ 《ᠪᠣᠰᠴᠠᠭᠠ᠂ ᠶᠣᠬᠣᠸᠠ ᠪᠤᠷᠬᠠᠨ ᠢᠶᠠᠨ ᠮᠥᠩᠬᠡ ᠶᠢᠨ ᠮᠥᠩᠬᠡᠳᠡ ᠮᠠᠭᠲᠠ︕》 ᠭᠡᠳ᠄ 《ᠲᠠᠨ ᠤ ᠠᠯᠳᠠᠷ ᠨᠡᠷᠡ ᠬᠦᠨᠳᠦᠳᠬᠡᠭᠳᠡᠵᠦ ᠬᠠᠮᠤᠭ ᠬᠦᠨᠳᠦᠳᠬᠡᠯ ᠪᠠ ᠮᠠᠭᠲᠠᠭᠠᠯ ᠤᠨ ᠳᠡᠭᠡᠷᠡ ᠡᠷᠭᠦᠮᠵᠢᠯᠡᠭᠳᠡᠬᠦ ᠪᠣᠯᠲᠤᠭᠠᠢ︕
6 ᠶᠣᠬᠣᠸᠠ ᠲᠠ᠂ ᠵᠥᠪᠬᠡᠨ ᠲᠠ ᠯᠠ ᠲᠩᠷᠢ᠂ ᠬᠠᠮᠤᠭ ᠤᠨ ᠳᠡᠭᠡᠳᠦ ᠲᠩᠷᠢ ᠶᠢ ᠪᠦᠬᠦ ᠡᠷᠬᠡᠰ ᠲᠡᠢ ᠨᠢ ᠬᠠᠮᠲᠤ ᠭᠠᠵᠠᠷ ᠢ ᠲᠡᠭᠦᠨ ᠦ ᠳᠡᠭᠡᠷᠡᠬᠢ ᠪᠦᠬᠦᠨ ᠲᠡᠢ ᠬᠠᠮᠲᠤ ᠲᠠᠩᠭᠢᠰ ᠢ ᠲᠡᠭᠦᠨ ᠳᠣᠲᠣᠷᠠᠬᠢ ᠪᠦᠬᠦᠨ ᠲᠡᠢ ᠨᠢ ᠪᠦᠲᠦᠭᠡᠭᠰᠡᠨ ᠲᠠ ᠯᠠ ᠡᠨᠡ ᠪᠦᠬᠦᠨ ᠳᠦ ᠠᠮᠢ ᠥᠭᠭᠥᠭᠰᠡᠨ ᠲᠩᠷᠢ ᠶᠢᠨ ᠲᠦᠮᠡᠨ ᠣᠯᠠᠨ ᠲᠠᠨ ᠳᠤ ᠪᠥᠬᠥᠢᠳᠡᠭ᠃
7 ᠲᠠ ᠪᠣᠯ ᠶᠣᠬᠣᠸᠠ ᠪᠤᠷᠬᠠᠨ ᠲᠠ ᠠᠪᠷᠠᠮ ᠢ ᠰᠣᠩ᠋ᠭᠣᠵᠤ ᠺᠠᠯᠳᠧᠶᠠᠴᠤᠳ ᠤᠨ ᠦᠦᠷ ᠡᠴᠡ ᠭᠠᠷᠭᠠᠵᠤ ᠲᠡᠭᠦᠨ ᠳᠦ ᠠᠪᠷᠠᠬᠠᠮ ᠨᠡᠷᠡ ᠶᠢ ᠥᠭᠭᠥᠭᠰᠡᠨ᠂
8 ᠲᠡᠭᠦᠨ ᠦ ᠵᠢᠷᠦᠬᠡ ᠥᠪᠡᠷ ᠦᠨ ᠲᠠᠨᠢ ᠡᠮᠦᠨᠡ ᠦᠨᠡᠨᠴᠢ ᠪᠠᠢᠬᠤ ᠶᠢ ᠬᠠᠷᠠᠭᠠᠳ ᠲᠡᠭᠦᠨ ᠦ ᠦᠷᠡ ᠤᠳᠤᠮ ᠳᠤ ᠺᠠᠨᠠᠨᠴᠤᠳ᠂ ᠾᠢᠲ᠋ᠴᠦᠳ᠂ ᠠᠮᠣᠷᠢᠴᠤᠳ ᠫᠧᠷᠢᠽᠴᠦᠳ᠂ ᠶᠧᠪᠦ᠋ᠰᠴᠦᠳ᠂ ᠭᠢᠷᠭᠠᠱᠴᠤᠳ ᠤᠨ ᠭᠠᠵᠠᠷ ᠢ ᠥᠭᠬᠦ ᠪᠡᠷ ᠲᠡᠭᠦᠨ ᠲᠡᠢ ᠭᠡᠷᠡ ᠪᠠᠢᠭᠤᠯᠵᠤ ᠠᠮᠠᠯᠠᠭᠰᠠᠨ ᠢᠶᠠᠨ ᠪᠡᠶᠡᠯᠡᠭᠦᠯᠦᠭᠰᠡᠨ ᠪᠢᠯᠡ᠂ ᠤᠴᠢᠷ ᠨᠢ ᠲᠠ ᠵᠥᠪᠲᠦ᠂ ᠦᠨᠡᠨ ᠶᠤᠮ᠃
9 ᠲᠠ ᠡᠴᠢᠭᠡ ᠡᠪᠦᠭᠡᠳ ᠦᠨ ᠮᠠᠨᠢ ᠶᠧᠵᠢᠫᠲ ᠲᠤ ᠵᠣᠪᠠᠯᠠᠩ ᠠᠮᠰᠠᠬᠤ ᠶᠢ ᠬᠠᠷᠠᠭᠰᠠᠨ ᠤᠯᠠᠭᠠᠨ ᠲᠠᠩᠭᠢᠰ ᠤᠨ ᠳᠡᠷᠭᠡᠳᠡᠬᠢ ᠣᠷᠢᠯᠠᠭᠠᠨ ᠢ ᠨᠢ ᠰᠣᠨᠣᠰᠣᠭᠰᠠᠨ
10 ᠲᠡᠭᠡᠭᠡᠳ ᠲᠡᠮᠳᠡᠭ ᠪᠠ ᠭᠠᠢᠬᠠᠮᠰᠢᠭ ᠢ ᠦᠢᠯᠡᠳᠦᠨ ᠹᠠᠷᠠᠣ᠋ ᠪᠣᠯᠣᠨ ᠪᠦᠬᠦ ᠲᠦᠰᠢᠮᠡᠳ ᠢ ᠨᠢ ᠭᠠᠵᠠᠷ ᠤᠨ ᠪᠦᠬᠦ ᠠᠷᠠᠳ ᠲᠦᠮᠡᠨ ᠲᠡᠢ ᠨᠢ ᠬᠠᠮᠲᠤ ᠴᠣᠬᠢᠭᠰᠠᠨ ᠤᠴᠢᠷ ᠨᠢ ᠡᠴᠢᠭᠡ ᠡᠪᠦᠭᠡᠳ ᠲᠦ ᠮᠢᠨᠢ ᠲᠡᠳᠡᠨ ᠦ ᠣᠮᠣᠷᠬᠠᠭᠰᠠᠨ ᠢ ᠲᠠ ᠮᠡᠳᠡᠭᠰᠡᠨ ᠲᠡᠢᠨ ᠬᠦ ᠲᠠᠨ ᠤ ᠨᠡᠷᠡ ᠠᠯᠳᠠᠷᠰᠢᠵᠤ ᠥᠨᠥᠳᠥᠷ ᠲᠦ ᠬᠦᠷᠦᠭᠰᠡᠨ ᠪᠢᠯᠡ᠃
11 ᠲᠡᠳᠡᠨ ᠦ ᠡᠮᠦᠨᠡ ᠲᠠ ᠲᠠᠩᠭᠢᠰ ᠢ ᠬᠤᠪᠢᠶᠠᠵᠤ ᠲᠡᠭᠦᠨ ᠦ ᠳᠤᠮᠳᠠᠭᠤᠷ ᠬᠠᠭᠤᠷᠠᠢ ᠭᠠᠵᠠᠷ ᠢᠶᠠᠷ ᠥᠩᠭᠡᠷᠡᠭᠦᠯᠵᠦ ᠨᠡᠬᠡᠭᠴᠢᠳ ᠢ ᠨᠢ ᠲᠠ ᠬᠦᠴᠦᠲᠦ ᠳᠠᠪᠠᠯᠭᠠᠨ ᠢᠶᠠᠷ ᠭᠦᠨ ᠤᠷᠤᠭᠤ ᠴᠢᠯᠠᠭᠤ ᠮᠡᠲᠦ ᠰᠢᠳᠡᠭᠰᠡᠨ᠃
12 ᠡᠳᠦᠷ ᠨᠢ ᠡᠭᠦᠯᠡᠨ ᠪᠠᠭᠠᠨᠠ ᠪᠠᠷ ᠲᠡᠳᠡᠨ ᠢ ᠬᠥᠲᠥᠯᠥᠨ ᠰᠥᠨᠢ ᠨᠢ ᠭᠠᠯ ᠪᠠᠭᠠᠨᠠ ᠪᠠᠷ ᠵᠠᠮ ᠢ ᠨᠢ ᠭᠡᠷᠡᠯᠲᠦᠭᠦᠯᠦᠭᠰᠡᠨ᠃
13 ᠲᠠ ᠰᠢᠨᠠᠢ ᠠᠭᠤᠯᠠᠨ ᠳᠡᠭᠡᠷᠡ ᠪᠠᠭᠤᠵᠤ ᠢᠷᠡᠨ ᠲᠩᠷᠢ ᠡᠴᠡ ᠲᠡᠳᠡᠨ ᠳᠦ ᠶᠠᠷᠢᠭᠰᠠᠨ ᠵᠥᠪ ᠭᠣᠣᠯᠴᠢ ᠬᠠᠤᠯᠢ ᠶᠣᠰᠣ ᠬᠢᠭᠡᠳ ᠰᠠᠢᠨ ᠰᠠᠢᠬᠠᠨ ᠲᠣᠭᠲᠠᠭᠠᠯ ᠲᠤᠰᠢᠶᠠᠯ ᠢ ᠰᠣᠶᠣᠷᠬᠠᠭᠰᠠᠨ᠃
14 ᠠᠷᠢᠭᠤᠨ ᠠᠮᠠᠷᠠᠯ ᠤᠨ ᠡᠳᠦᠷ ᠢᠶᠡᠨ ᠲᠠ ᠲᠡᠳᠡᠨ ᠳᠦ ᠮᠡᠳᠡᠭᠦᠯᠵᠦ ᠵᠠᠷᠤᠴᠠ ᠮᠣᠰᠧ ᠪᠠᠷ ᠢᠶᠠᠨ ᠳᠠᠮᠵᠢᠭᠤᠯᠤᠨ ᠵᠢᠭᠠᠪᠤᠷᠢ ᠪᠠ ᠬᠠᠤᠯᠢ ᠨᠤᠭᠤᠳ ᠢ ᠥᠭᠭᠥᠭᠰᠡᠨ᠃
15 ᠥᠯᠥᠰᠬᠦ ᠳᠦᠨᠢ ᠲᠠ ᠲᠩᠷᠢ ᠶᠢᠨ ᠬᠦᠨᠡᠰᠦ ᠪᠡᠷ ᠬᠠᠩ᠋ᠭᠠᠵᠤ ᠤᠮᠳᠠᠭᠠᠰᠬᠤ ᠳᠤᠨᠢ ᠲᠠ ᠬᠠᠳᠠᠨ ᠤ ᠤᠰᠤ ᠪᠠᠷ ᠤᠮᠳᠠᠯᠠᠵᠤ ᠥᠪᠡᠷᠰᠡᠳ ᠲᠤᠨᠢ ᠥᠭᠭᠥᠨᠡ ᠭᠡᠵᠦ ᠲᠠᠩ᠋ᠭᠠᠷᠢᠭᠯᠠᠭᠰᠠᠨ ᠭᠠᠵᠠᠷ ᠢ 〈ᠡᠵᠡᠮᠰᠢᠬᠦ ᠪᠡᠷ ᠶᠠᠪᠤ〉 ᠭᠡᠵᠦ ᠲᠠ ᠲᠡᠳᠡᠨ ᠳᠦ ᠠᠢᠯᠠᠳᠬᠤ ᠳᠤ
16 ᠡᠴᠢᠭᠡ ᠡᠪᠦᠭᠡᠳ ᠮᠠᠨᠢ ᠶᠡᠬᠡᠷᠬᠡᠭ ᠪᠠᠢᠳᠠᠯ ᠭᠠᠷᠭᠠᠵᠤ ᠲᠠᠨ ᠤ ᠲᠤᠰᠢᠶᠠᠯ ᠤᠳ ᠢ ᠦᠯᠦ ᠰᠣᠨᠣᠰᠣᠨ ᠵᠥᠷᠢᠭᠦᠳᠯᠡᠪᠡ᠃
17 ᠲᠡᠳᠡ ᠰᠣᠨᠣᠰᠬᠤ ᠶᠢ ᠦᠯᠦ ᠬᠦᠰᠡᠵᠦ ᠲᠡᠳᠡᠨ ᠦ ᠳᠤᠮᠳᠠ ᠦᠢᠯᠡᠳᠦᠭᠰᠡᠨ ᠭᠠᠢᠬᠠᠮᠰᠢᠭᠲᠤ ᠦᠢᠯᠡᠰ ᠢ ᠲᠠᠨᠢ ᠤᠮᠠᠷᠲᠠᠵᠤ ᠤᠷᠪᠠᠯᠭᠠ ᠪᠣᠰᠣᠯᠭᠠ ᠭᠠᠷᠭᠠᠵᠤ ᠵᠥᠷᠢᠭᠦᠳᠯᠡᠭᠡᠳ ᠥᠪᠡᠷᠰᠡᠳ ᠢᠶᠡᠨ ᠤᠳᠤᠷᠢᠳᠤᠭᠴᠢ ᠲᠣᠮᠢᠯᠠᠵᠤ ᠪᠣᠭᠣᠯᠴᠢᠯᠠᠯ ᠤᠷᠤᠭᠤ ᠪᠠᠨ ᠪᠤᠴᠠᠬᠤ ᠭᠡᠪᠡ ᠬᠠᠷᠢᠨ ᠲᠠ ᠪᠣᠯ ᠥᠷᠥᠰᠢᠶᠡᠯ ᠦᠨ ᠪᠤᠷᠬᠠᠨ ᠡᠨᠡᠷᠢᠩᠭᠦᠢ ᠪᠥᠭᠡᠳ ᠥᠷᠥᠪᠴᠢ ᠠᠭᠤᠷᠯᠠᠬᠤ ᠳᠠᠭᠠᠨ ᠤᠳᠠᠭᠠᠨ ᠬᠠᠢᠷᠠ ᠡᠨᠡᠷᠢᠯ ᠢᠶᠠᠷ ᠪᠢᠯᠬᠠᠮᠠ ᠪᠣᠯᠬᠣᠷ ᠲᠡᠳᠡᠨ ᠢ ᠲᠠ ᠣᠷᠬᠢᠭᠰᠠᠨ ᠦᠭᠡᠢ᠃
18 ᠲᠡᠳᠡ ᠴᠢᠳᠬᠤᠮᠠᠯ ᠲᠤᠭᠤᠯ ᠪᠦᠲᠦᠭᠡᠵᠦ 〈ᠴᠢᠨᠦ ᠪᠤᠷᠬᠠᠨ ᠡᠨᠡ ᠪᠠᠢᠨᠠ ᠴᠢᠮᠠᠶᠢ ᠶᠧᠵᠢᠫᠲ ᠡᠴᠡ ᠭᠠᠷᠭᠠᠭᠰᠠᠨ〉 ᠭᠡᠵᠦ ᠥᠪᠡᠷ ᠬᠣᠭᠣᠷᠣᠨᠳᠣ ᠪᠠᠨ ᠶᠠᠷᠢᠯᠴᠠᠵᠤ ᠲᠠᠨ ᠢ ᠶᠡᠬᠡᠳᠡ ᠳᠣᠷᠣᠮᠵᠢᠯᠠᠬᠤ ᠳᠤ ᠴᠤ
19 ᠲᠠᠨ ᠤ ᠥᠷᠥᠪᠳᠥᠯ ᠠᠭᠤᠤ ᠤᠴᠢᠷ ᠴᠥᠯ ᠳᠤ ᠲᠡᠳᠡᠨ ᠢ ᠣᠷᠬᠢᠭᠠ ᠦᠭᠡᠢ ᠡᠳᠦᠷ ᠨᠢ ᠡᠭᠦᠯᠡᠨ ᠪᠠᠭᠠᠨᠠ ᠪᠠᠷ ᠵᠠᠮ ᠢ ᠨᠢ ᠬᠥᠲᠥᠯᠥᠨ ᠰᠥᠨᠢ ᠨᠢ ᠭᠠᠯ ᠪᠠᠭᠠᠨᠠ ᠪᠠᠷ ᠶᠠᠪᠤᠬᠤ ᠵᠠᠮ ᠢ ᠨᠢ ᠭᠡᠷᠡᠯᠲᠦᠭᠦᠯᠵᠦ ᠲᠡᠳᠡᠨ ᠡᠴᠡ ᠶᠡᠷᠦ ᠰᠠᠯᠤᠭᠰᠠᠨ ᠦᠭᠡᠢ᠃
20 ᠰᠠᠢᠨ ᠰᠦᠨᠡᠰᠦ ᠪᠡᠨ ᠰᠣᠶᠣᠷᠬᠠᠵᠤ ᠲᠡᠳᠡᠨ ᠳᠦ ᠲᠠ ᠵᠢᠭᠠᠪᠤᠷᠢᠯᠠᠪᠠ ᠠᠩ᠋ᠭᠠᠬᠤ ᠳᠤᠨᠢ ᠲᠠ ᠤᠰᠤ ᠬᠠᠩ᠋ᠭᠠᠵᠤ ᠠᠮᠠᠨ ᠠᠴᠠ ᠨᠢ ᠲᠠ ᠮᠠᠨᠨᠠ ᠪᠠᠨ ᠬᠠᠷᠠᠮᠨᠠᠭᠠ ᠦᠭᠡᠢ᠂
21 ᠲᠠ ᠳᠥᠴᠢᠨ ᠵᠢᠯ ᠲᠡᠳᠬᠦᠭᠰᠡᠨ ᠢᠶᠡᠷ ᠴᠥᠯ ᠳᠤ ᠲᠡᠳᠡ ᠭᠠᠴᠢᠭᠳᠠᠭᠠ ᠦᠭᠡᠢ ᠬᠤᠪᠴᠠᠰᠤ ᠨᠢ ᠡᠯᠡᠭᠳᠡᠭᠡ ᠦᠭᠡᠢ ᠬᠥᠯ ᠨᠢ ᠬᠣᠯᠭᠣᠭᠠ ᠦᠭᠡᠢ᠃
22 ᠲᠠ ᠬᠠᠭᠠᠨᠴᠢᠯᠠᠯ ᠪᠠ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠢ ᠥᠭᠴᠦ ᠬᠢᠯᠢ ᠬᠢᠵᠠᠭᠠᠷ ᠢ ᠨᠢ ᠬᠤᠪᠢ ᠪᠣᠯᠭᠠᠨ ᠰᠣᠶᠣᠷᠬᠠᠬᠤ ᠳᠤ ᠲᠡᠳᠡ ᠬᠧᠰᠢᠪᠣᠨ ᠤ ᠬᠠᠭᠠᠨ ᠰᠢᠬᠣᠨ ᠤ ᠭᠠᠵᠠᠷ ᠢ᠂ ᠪᠠᠱᠠᠨ ᠤ ᠬᠠᠭᠠᠨ ᠣᠭ ᠤᠨ ᠭᠠᠵᠠᠷ ᠢ ᠡᠵᠡᠯᠡᠪᠡ᠃
23 ᠮᠥᠨ ᠲᠡᠳᠡᠨ ᠦ ᠬᠥᠪᠡᠭᠦᠳ ᠢ ᠲᠩᠷᠢ ᠶᠢᠨ ᠣᠳᠣᠳ ᠮᠡᠲᠦ ᠣᠯᠠᠨ ᠪᠣᠯᠭᠠᠵᠤ ᠡᠴᠢᠭᠡ ᠡᠪᠦᠭᠡᠳ ᠲᠤᠨᠢ ᠣᠴᠢᠵᠤ ᠡᠵᠡᠮᠰᠢᠬᠦ ᠶᠢ ᠵᠠᠬᠢᠭᠰᠠᠨ ᠡᠵᠡᠮᠰᠢᠯ ᠭᠠᠵᠠᠷ ᠲᠠᠭᠠᠨ ᠲᠡᠳᠡᠨ ᠢ ᠣᠷᠣᠭᠤᠯᠪᠠ᠃
24 ᠲᠡᠷᠡ ᠡᠵᠡᠮᠰᠢᠯ ᠭᠠᠵᠠᠷ ᠲᠤ ᠬᠥᠪᠡᠭᠦᠳ ᠢ ᠨᠢ ᠲᠠ ᠣᠷᠣᠭᠤᠯᠵᠤ ᠲᠡᠳᠡᠨ ᠦ ᠡᠮᠦᠨᠡ ᠲᠠ ᠤᠤᠭᠠᠯ ᠺᠠᠨᠠᠨᠴᠤᠳ ᠢ ᠳᠣᠷᠣᠢᠲᠠᠭᠤᠯᠵᠠᠢ ᠺᠠᠨᠠᠨᠴᠤᠳ ᠢ ᠲᠠ ᠬᠠᠭᠠᠳ ᠲᠠᠢ ᠨᠢ ᠬᠠᠮᠲᠤ ᠭᠠᠵᠠᠷ ᠤᠨ ᠣᠯᠠᠨ ᠦᠨᠳᠦᠰᠦᠲᠡᠨ ᠲᠡᠢ ᠨᠢ ᠬᠠᠮᠲᠤ ᠭᠠᠷ ᠲᠤᠨᠢ ᠲᠡᠳᠡᠨ ᠳᠦ ᠲᠤᠰᠢᠶᠠᠭᠰᠠᠨ ᠳᠤ ᠬᠦᠰᠡᠭᠰᠡᠨ ᠢᠶᠡᠨ ᠲᠡᠳᠡ ᠦᠢᠯᠡᠳᠴᠦ
25 ᠪᠡᠬᠢᠯᠡᠯᠲᠡ ᠲᠠᠢ ᠬᠣᠲᠠ ᠨᠤᠭᠤᠳ ᠢ ᠨᠢ ᠪᠡᠯᠴᠢᠭᠡᠷ ᠰᠢᠮᠡ ᠲᠠᠢ ᠭᠠᠵᠠᠷ ᠢ ᠨᠢ ᠣᠯᠵᠤ ᠪᠠᠶᠠᠯᠢᠭ ᠳᠦᠭᠦᠷᠡᠩ ᠭᠡᠷ ᠢ ᠨᠢ ᠪᠠᠰᠠ ᠮᠠᠯᠲᠠᠭᠰᠠᠨ ᠬᠤᠳᠳᠤᠭ ᠢ ᠨᠢ ᠦᠵᠦᠮ᠂ ᠴᠢᠳᠦᠨ ᠦ ᠬᠦᠷᠢᠶᠡᠯᠡᠩ ᠢ ᠨᠢ ᠣᠯᠠᠨ ᠵᠢᠮᠢᠰ ᠤᠨ ᠮᠣᠳᠣ ᠶᠢ ᠨᠢ ᠡᠵᠡᠮᠰᠢᠨ ᠲᠠᠪᠠᠲᠠᠢ ᠲᠠᠭᠠᠲᠠᠢ ᠢᠳᠡᠵᠡᠭᠡᠵᠦ ᠲᠠᠨ ᠤ ᠠᠭᠤᠤ ᠰᠠᠢᠨ ᠰᠠᠢᠬᠠᠨ ᠳᠤ ᠪᠠᠶᠠᠰᠴᠠᠢ᠃
26 ᠭᠡᠪᠡᠴᠦ ᠲᠡᠳᠡ ᠳᠤᠭᠤᠯᠭᠠᠪᠤᠷᠢ ᠦᠭᠡᠢ ᠪᠣᠯᠵᠤ ᠭᠡᠳᠡᠷᠭᠦ ᠪᠡᠨ ᠲᠠᠨ ᠠᠴᠠ ᠲᠡᠷᠰᠯᠡᠵᠦ ᠲᠠᠨ ᠤ ᠬᠠᠤᠯᠢ ᠵᠢᠷᠤᠮ ᠢ ᠨᠢᠷᠤᠭᠤᠨ ᠠᠷᠤ ᠳᠠᠭᠠᠨ ᠣᠷᠬᠢᠨ ᠡᠷᠭᠢᠭᠦᠯᠵᠦ ᠠᠪᠴᠢᠷᠠᠬᠤ ᠪᠠᠷ ᠢᠳᠬᠠᠭᠰᠠᠨ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠢ ᠲᠠᠨᠢ ᠠᠯᠠᠵᠤ ᠦᠨᠡᠬᠡᠷ ᠲᠠᠨ ᠢ ᠳᠣᠷᠣᠮᠵᠢᠯᠠᠭᠰᠠᠨ ᠪᠢᠯᠡ᠃
27 ᠲᠡᠭᠡᠬᠦ ᠳᠦ ᠲᠠ ᠲᠡᠳᠡᠨ ᠢ ᠳᠠᠢᠰᠤᠨ ᠤ ᠬᠢᠨᠢ ᠭᠠᠷ ᠲᠤ ᠥᠭᠴᠦ ᠳᠠᠢᠰᠤᠨ ᠨᠤᠭᠤᠳ ᠨᠢ ᠲᠡᠳᠡᠨ ᠢ ᠳᠠᠷᠤᠯᠠᠨ ᠵᠣᠪᠠᠭᠠᠵᠤ ᠪᠠᠢᠪᠠ ᠵᠣᠪᠠᠯᠠᠩ ᠳᠤ ᠪᠠᠢᠬᠤ ᠳᠠᠭᠠᠨ ᠲᠡᠳᠡ ᠲᠠᠨ ᠳᠤ ᠬᠠᠨᠳᠤᠨ ᠬᠠᠰᠬᠢᠷᠪᠠᠯ ᠲᠩᠷᠢ ᠡᠴᠡ ᠲᠠ ᠰᠣᠨᠣᠰᠣᠭᠠᠳ ᠠᠭᠤᠤ ᠥᠷᠥᠪᠳᠥᠯ ᠦᠨ ᠢᠶᠠᠨ ᠤᠯᠠᠮ ᠢᠶᠠᠷ ᠠᠪᠤᠷᠠᠭᠴᠢᠳ ᠢ ᠢᠯᠡᠭᠡᠵᠦ ᠳᠠᠢᠰᠤᠨ ᠤ ᠬᠢᠨᠢ ᠭᠠᠷ ᠠᠴᠠ ᠠᠪᠤᠷᠠᠳᠠᠭ
28 ᠠᠮᠤᠰᠬᠢᠮᠠᠭᠴᠠ ᠪᠠᠨ ᠯᠠ ᠲᠡᠳᠡ ᠲᠠᠨ ᠤ ᠡᠮᠦᠨᠡ ᠠᠬᠢᠭᠠᠳ ᠮᠠᠭᠤ ᠶᠢ ᠦᠢᠯᠡᠳᠴᠡᠢ ᠲᠡᠭᠡᠬᠦ ᠳᠦ ᠲᠠ ᠲᠡᠳᠡᠨ ᠢ ᠳᠠᠢᠰᠤᠨ ᠤ ᠬᠢᠨᠢ ᠭᠠᠷ ᠲᠤ ᠣᠷᠬᠢᠵᠤ ᠳᠠᠢᠰᠤᠨ ᠨᠤᠭᠤᠳ ᠨᠢ ᠲᠡᠳᠡᠨ ᠢ ᠨᠣᠶᠠᠷᠬᠠᠵᠤ ᠪᠠᠢᠪᠠ᠂ ᠬᠠᠷᠢᠨ ᠲᠠᠨ ᠤᠷᠤᠭᠤ ᠡᠷᠭᠢᠨ ᠬᠠᠰᠬᠢᠷᠬᠤ ᠳᠤᠨᠢ ᠲᠩᠷᠢ ᠡᠴᠡ ᠲᠠ ᠰᠣᠨᠣᠰᠣᠭᠠᠳ ᠥᠷᠥᠪᠳᠥᠯ ᠦᠨ ᠢᠶᠠᠨ ᠤᠯᠠᠮ ᠢᠶᠠᠷ ᠡᠷᠭᠢᠨ ᠡᠷᠭᠢᠨ ᠠᠪᠤᠷᠠᠵᠠᠢ᠃
29 ᠬᠠᠤᠯᠢ ᠤᠷᠤᠭᠤ ᠪᠠᠨ ᠡᠷᠭᠢᠭᠦᠯᠬᠦ ᠪᠡᠷ ᠲᠡᠳᠡᠨ ᠢ ᠲᠠ ᠢᠳᠬᠠᠵᠠᠢ ᠬᠠᠷᠢᠨ ᠲᠡᠳᠡ ᠪᠠᠷᠳᠠᠮᠨᠠᠵᠤ ᠲᠤᠰᠢᠶᠠᠯ ᠢ ᠲᠠᠨᠢ ᠡᠰᠡ ᠰᠣᠨᠣᠰᠴᠤ ᠵᠢᠷᠤᠮ ᠤᠳ ᠢ ᠲᠠᠨᠢ ᠵᠥᠷᠢᠴᠡᠵᠡᠢ ᠡᠳᠡᠭᠡᠷ ᠢᠶᠡᠷ ᠬᠥᠮᠦᠨ ᠠᠮᠢᠳᠤᠷᠠᠳᠠᠭ᠂ ᠬᠠᠷᠢᠨ ᠲᠡᠳᠡ ᠮᠥᠷᠥ ᠪᠡᠨ ᠰᠢᠯᠭᠡᠭᠡᠵᠦ ᠬᠦᠵᠦᠭᠦᠦ ᠪᠡᠨ ᠭᠦᠵᠦᠭᠦᠳᠯᠡᠨ ᠲᠠᠨ ᠤ ᠬᠢ ᠶᠢ ᠡᠰᠡ ᠰᠣᠨᠣᠰᠪᠠ᠃
30 ᠣᠯᠠᠨ ᠵᠢᠯ ᠢᠶᠠᠷ ᠲᠠ ᠲᠡᠳᠡᠨ ᠢ ᠬᠦᠯᠢᠴᠡᠵᠡᠢ ᠥᠪᠡᠷ ᠦᠨ ᠢᠶᠠᠨ ᠰᠦᠨᠡᠰᠦ ᠪᠠ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠢᠶᠠᠷ ᠳᠠᠮᠵᠢᠭᠤᠯᠤᠨ ᠢᠳᠬᠠᠵᠠᠢ ᠬᠠᠷᠢᠨ ᠲᠡᠳᠡ ᠪᠠᠰᠠ ᠠᠩ᠋ᠬᠠᠷᠤᠯ ᠲᠠᠯᠪᠢᠭᠠ ᠦᠭᠡᠢ ᠤᠴᠢᠷ ᠠᠴᠠ ᠬᠠᠷᠢ ᠬᠥᠮᠦᠰ ᠦᠨ ᠭᠠᠷ ᠲᠤ ᠲᠠ ᠲᠡᠳᠡᠨ ᠢ ᠥᠭᠴᠡᠢ
31 ᠲᠡᠭᠡᠭᠰᠡᠨ ᠪᠣᠯᠪᠠᠴᠤ ᠠᠭᠤᠤ ᠥᠷᠥᠪᠳᠥᠯ ᠦᠨ ᠢᠶᠠᠨ ᠤᠯᠠᠮ ᠢᠶᠠᠷ ᠲᠡᠳᠡᠨ ᠢ ᠲᠠ ᠡᠴᠦᠰᠯᠡᠭᠦᠯᠦᠭᠡ ᠦᠭᠡᠢ᠂ ᠣᠷᠬᠢᠭᠠ ᠴᠤ ᠦᠭᠡᠢ ᠤᠴᠢᠷ ᠨᠢ ᠲᠠ ᠪᠣᠯ ᠡᠨᠡᠷᠢᠩᠭᠦᠢ ᠪᠥᠭᠡᠳ ᠥᠷᠥᠪᠴᠢ ᠪᠤᠷᠬᠠᠨ ᠪᠢᠯᠡ᠃
32 ᠣᠳᠣ ᠪᠢᠳᠡᠨ ᠦ ᠪᠤᠷᠬᠠᠨ ᠠᠤᠭᠠ ᠬᠦᠴᠦᠲᠡᠢ᠂ ᠰᠦᠷᠳᠡᠮᠡᠷ ᠪᠥᠭᠡᠳ ᠬᠠᠢᠷᠠ ᠶᠢᠨ ᠭᠡᠷᠡ ᠪᠡᠨ ᠰᠠᠬᠢᠭᠴᠢ ᠪᠤᠷᠬᠠᠨ ᠮᠢᠨᠢ ᠠᠰᠢᠷᠢᠶᠠ ᠶᠢᠨ ᠬᠠᠭᠠᠳ ᠤᠨ ᠡᠳᠦᠷ ᠤᠳ ᠠᠴᠠ ᠥᠨᠥᠳᠥᠷ ᠬᠦᠷᠲᠡᠯᠡ ᠥᠪᠡᠷᠰᠡᠳ ᠲᠦ ᠮᠢᠨᠢ᠂ ᠬᠠᠭᠠᠳ ᠨᠣᠶᠠᠳ ᠲᠤ ᠮᠢᠨᠢ ᠪᠠᠰᠠ ᠲᠠᠬᠢᠯᠴᠢ ᠬᠢᠭᠡᠳ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠲᠤ ᠮᠠᠨᠢ ᠡᠴᠢᠭᠡ ᠡᠪᠦᠭᠡᠳ ᠲᠦ ᠮᠢᠨᠢ ᠬᠢᠭᠡᠳ ᠠᠷᠠᠳ ᠲᠦᠮᠡᠨ ᠳᠡᠭᠡᠨ ᠤᠴᠠᠷᠠᠭᠰᠠᠨ ᠡᠨᠡ ᠪᠦᠬᠦᠨ ᠢ ᠥᠴᠦᠬᠡᠨ ᠬᠡᠮᠡᠨ ᠪᠦᠦ ᠦᠵᠡᠭᠡᠴᠢ︕
33 ᠪᠦᠬᠦᠢᠯᠡ ᠤᠴᠠᠷᠠᠭᠰᠠᠨ ᠵᠦᠢᠯ ᠳᠡᠭᠡᠷᠡ ᠮᠢᠨᠢ ᠪᠦᠷ ᠲᠠ ᠯᠠ ᠵᠥᠪ ᠪᠠᠢᠭᠰᠠᠨ ᠲᠠ ᠢᠲᠡᠭᠡᠮᠵᠢᠲᠠᠢ ᠪᠠᠷ ᠬᠢᠵᠦ ᠪᠢᠳᠡ ᠪᠤᠷᠤᠭᠤ ᠶᠢ ᠦᠢᠯᠡᠳᠴᠡᠢ
34 ᠬᠠᠭᠠᠳ᠂ ᠵᠠᠬᠢᠷᠤᠭᠴᠢᠳ᠂ ᠲᠠᠬᠢᠯᠴᠢᠳ ᠬᠢᠭᠡᠳ ᠡᠴᠢᠭᠡ ᠡᠪᠦᠭᠡᠳ ᠮᠠᠨᠢ ᠪᠦᠷ ᠲᠠᠨ ᠤ ᠰᠤᠷᠭᠠᠯ ᠢ ᠳᠠᠭᠠᠭᠠ ᠦᠭᠡᠢ ᠲᠤᠰᠢᠶᠠᠯ ᠬᠢᠭᠡᠳ ᠰᠠᠨᠠᠭᠤᠯᠭᠠ ᠪᠠᠨ ᠥᠭᠬᠦ ᠳᠦ ᠲᠠᠨᠢ ᠲᠡᠳᠡ ᠠᠩ᠋ᠬᠠᠷᠤᠯ ᠲᠠᠯᠪᠢᠭᠠ ᠦᠭᠡᠢ
35 ᠥᠪᠡᠷᠰᠡᠳ ᠳᠤᠨᠢ ᠲᠠᠨ ᠤ ᠰᠣᠶᠣᠷᠬᠠᠭᠰᠠᠨ ᠠᠭᠤᠵᠢᠮ ᠰᠢᠮᠡ ᠲᠠᠢ ᠨᠤᠲᠤᠭ ᠲᠤ ᠲᠡᠳᠡ ᠦᠯᠡᠮᠵᠢ ᠰᠠᠢᠨ ᠰᠠᠢᠬᠠᠨ ᠢᠶᠠᠷ ᠲᠠᠨᠢ ᠪᠠᠶᠠᠰᠴᠤ ᠬᠠᠭᠠᠨᠴᠢᠯᠠᠯ ᠤᠨ ᠢᠶᠠᠨ ᠳᠣᠲᠣᠷᠠ ᠪᠠᠢᠬᠤ ᠳᠠᠭᠠᠨ ᠮᠥᠨ ᠲᠠᠨ ᠳᠤ ᠦᠢᠯᠡᠴᠢᠯᠡᠭᠡ ᠦᠭᠡᠢ ᠮᠠᠭᠤ ᠦᠢᠯᠡ ᠡᠴᠡ ᠪᠡᠨ ᠴᠤ ᠡᠷᠭᠢᠭᠡ ᠦᠭᠡᠢ᠃
36 ᠬᠠᠷᠠᠭᠠᠴᠢ᠂ ᠥᠨᠥᠳᠥᠷ ᠪᠢᠳᠡ ᠪᠣᠭᠣᠯ ᠪᠣᠯᠵᠠᠢ ᠠᠯᠢᠮᠠ ᠵᠢᠮᠢᠰ ᠢ ᠨᠢ ᠢᠳᠡᠭᠦᠯᠵᠦ ᠰᠠᠢᠨ ᠢ ᠨᠢ ᠠᠮᠰᠠᠭᠤᠯᠬᠤ ᠪᠠᠷ ᠡᠴᠢᠭᠡ ᠡᠪᠦᠭᠡᠳ ᠲᠦ ᠮᠠᠨᠢ ᠲᠠᠨ ᠤ ᠥᠭᠭᠥᠭᠰᠡᠨ ᠡᠨᠡ ᠨᠤᠲᠤᠭ ᠳᠡᠭᠡᠷᠡ ᠪᠢᠳᠡ ᠪᠣᠭᠣᠯ ᠪᠣᠯᠵᠠᠢ᠃
37 ᠥᠪᠡᠷᠰᠡᠳ ᠦᠨ ᠮᠢᠨᠢ ᠭᠡᠮ ᠨᠢᠭᠦᠯ ᠦᠨ ᠤᠯᠠᠮ ᠢᠶᠠᠷ ᠡᠯᠪᠡᠭ ᠦᠷᠡ ᠵᠢᠮᠢᠰ ᠨᠢ ᠴᠤ ᠥᠪᠡᠷᠰᠡᠳ ᠦᠨ ᠮᠢᠨᠢ ᠳᠡᠭᠡᠷᠡ ᠲᠠᠨ ᠤ ᠲᠠᠯᠪᠢᠭᠰᠠᠨ ᠥᠨᠥᠬᠢ ᠬᠠᠭᠠᠳ ᠤᠨ ᠬᠢ ᠪᠣᠯᠵᠠᠢ ᠮᠢᠬᠠᠨ ᠪᠡᠶᠡ ᠮᠢᠨᠢ ᠴᠤ ᠮᠠᠯ ᠰᠦᠷᠦᠭ ᠮᠢᠨᠢ ᠴᠤ ᠲᠡᠳᠡᠨ ᠦ ᠮᠡᠳᠡᠯ ᠳᠦ ᠣᠷᠣᠵᠤ ᠮᠠᠨ ᠤ ᠵᠣᠪᠠᠯᠠᠩ ᠮᠠᠰᠢ ᠶᠡᠬᠡ ᠪᠣᠯᠵᠠᠢ》 ᠭᠡᠪᠡ᠃
ᠬᠠᠤᠯᠢ ᠶᠢ ᠰᠠᠬᠢᠬᠤ ᠭᠡᠷᠡ
38 ᠪᠢᠳᠡ ᠡᠨᠡ ᠪᠦᠬᠦᠨ ᠢ ᠦᠵᠡᠭᠡᠳ ᠪᠠᠲᠤ ᠭᠡᠷᠡ ᠪᠠᠢᠭᠤᠯᠤᠨ᠂ ᠡᠭᠦᠨ ᠢ ᠪᠢᠴᠢᠭᠰᠡᠨ ᠪᠥᠭᠡᠳ ᠡᠭᠦᠨ ᠦ ᠳᠡᠭᠡᠷᠡ ᠮᠠᠨ ᠤ ᠨᠣᠶᠠᠳ᠂ ᠯᠧᠸᠢᠴᠦᠳ ᠪᠣᠯᠣᠨ ᠲᠠᠬᠢᠯᠴᠢᠳ ᠲᠠᠮᠠᠭᠠ ᠪᠠᠨ ᠳᠠᠷᠤᠵᠤ ᠪᠠᠢᠯᠠ᠃