ᠨᠧᠾᠧᠮᠢᠶᠠ ᠨᠠᠢ᠌ᠮᠠ
ᠬᠠᠤᠯᠢ ᠶᠢᠨ ᠨᠣᠮ ᠠᠴᠠ ᠤᠩ᠋ᠰᠢᠪᠠ
1 ᠪᠦᠬᠦ ᠠᠷᠠᠳ ᠲᠦᠮᠡᠨ ᠤᠰᠤᠨ ᠬᠠᠭᠠᠯᠭᠠᠨ ᠤ ᠡᠮᠦᠨᠡᠬᠢ ᠲᠠᠯᠠᠪᠠᠢ ᠳᠤ ᠨᠢᠭᠡ ᠬᠥᠮᠦᠨ ᠮᠡᠲᠦ ᠴᠤᠭᠯᠠᠷᠠᠵᠤ᠂ ᠶᠣᠬᠣᠸᠠ ᠶᠢᠨ ᠢᠰᠷᠧᠯ ᠳᠤ ᠥᠭᠭᠥᠭᠰᠡᠨ ᠮᠣᠰᠧ ᠶᠢᠨ ᠬᠠᠤᠯᠢ ᠶᠢᠨ ᠨᠣᠮ ᠢ ᠠᠪᠴᠢᠷᠠᠬᠤ ᠶᠢ ᠬᠠᠤᠯᠢ ᠶᠢᠨ ᠪᠠᠭᠰᠢ ᠡᠽᠷᠠ ᠠᠴᠠ ᠭᠤᠶᠤᠵᠠᠢ᠃ 2 ᠲᠡᠢᠮᠦ ᠡᠴᠡ ᠳᠣᠯᠣᠳᠤᠭᠠᠷ ᠰᠠᠷᠠ ᠶᠢᠨ ᠠᠩ᠋ᠬᠠᠨ ᠤ ᠡᠳᠦᠷ ᠲᠠᠬᠢᠯᠴᠢ ᠡᠽᠷᠠ ᠴᠢᠭᠤᠯᠭᠠᠨ ᠤ ᠡᠮᠦᠨᠡ᠂ ᠡᠷᠡᠭᠲᠡᠢᠴᠦᠳ ᠡᠮᠡᠭᠲᠡᠢᠴᠦᠳ ᠪᠣᠯᠣᠨ ᠰᠣᠨᠣᠰᠣᠨ ᠣᠢᠯᠠᠭᠠᠵᠤ ᠴᠢᠳᠠᠬᠤ ᠪᠦᠭᠦᠳᠡ ᠶᠢᠨ ᠡᠮᠦᠨᠡ ᠬᠠᠤᠯᠢ ᠶᠢ ᠠᠪᠴᠢᠷᠠᠯᠠ᠃ 3 ᠲᠡᠷᠡ ᠪᠡᠷ ᠥᠷᠯᠥᠭᠡ ᠡᠷᠲᠡ ᠡᠴᠡ ᠦᠳᠡ ᠳᠤᠮᠳᠠ ᠬᠦᠷᠲᠡᠯᠡ ᠤᠰᠤᠨ ᠬᠠᠭᠠᠯᠭᠠᠨ ᠤ ᠡᠮᠦᠨᠡᠬᠢ ᠲᠠᠯᠠᠪᠠᠢ ᠳᠤ ᠡᠷᠡᠭᠲᠡᠢ ᠡᠮᠡᠭᠲᠡᠢ ᠢᠯᠭᠠᠯ ᠦᠭᠡᠢ ᠣᠢᠯᠠᠭᠠᠬᠤ ᠴᠢᠳᠠᠪᠤᠷᠢ ᠲᠠᠢ ᠬᠥᠮᠦᠰ ᠦᠨ ᠡᠮᠦᠨᠡ ᠬᠠᠤᠯᠢ ᠶᠢᠨ ᠨᠣᠮ ᠢ ᠤᠩ᠋ᠰᠢᠬᠤ ᠳᠤ᠂ ᠪᠦᠬᠦ ᠠᠷᠠᠳ ᠲᠦᠮᠡᠨ ᠴᠢᠬᠢ ᠲᠠᠯᠪᠢᠨ ᠰᠣᠨᠣᠰᠴᠠᠢ᠃ 4 ᠬᠠᠤᠯᠢ ᠶᠢᠨ ᠪᠠᠭᠰᠢ ᠡᠽᠷᠠ ᠡᠨᠡ ᠶᠠᠪᠤᠳᠠᠯ ᠳᠤ ᠵᠣᠷᠢᠭᠤᠯᠵᠤ ᠪᠠᠷᠢᠭᠰᠠᠨ ᠮᠣᠳᠣᠨ ᠲᠠᠪᠴᠠᠩ ᠳᠡᠭᠡᠷᠡ ᠵᠣᠭᠰᠣᠪᠠ᠃ ᠪᠠᠷᠠᠭᠤᠨ ᠭᠠᠷ ᠲᠠᠯᠠ ᠳᠤᠨᠢ ᠮᠠᠲ᠋ᠢᠲ᠋ᠢᠶᠠ᠂ ᠱᠧᠮᠠ᠂ ᠠᠨᠠᠢᠶᠠ᠂ ᠦᠦᠷᠢᠶᠠ᠂ ᠾᠢᠯᠺᠢᠶᠠ ᠪᠣᠯᠣᠨ ᠮᠠᠶᠠᠰᠧᠶᠠ᠂ ᠵᠡᠭᠦᠨ ᠭᠠᠷ ᠲᠠᠯᠠ ᠳᠤᠨᠢ ᠫᠧᠳᠠᠶᠠ᠂ ᠮᠢᠱᠠᠶᠧᠯ᠂ ᠮᠠᠯᠺᠢᠶᠠ᠂ ᠬᠠᠱᠦ᠋ᠮ᠂ ᠬᠠᠱᠪᠠᠳᠠᠨᠠ᠂ ᠽᠧᠺᠠᠷᠢᠶᠠ ᠪᠣᠯᠣᠨ ᠮᠧᠱᠦ᠋ᠯᠠᠮ ᠵᠣᠭᠰᠣᠵᠤ ᠪᠠᠢᠪᠠ᠃ 5 ᠡᠽᠷᠠ ᠲᠡᠷᠡ ᠨᠣᠮ ᠢ ᠳᠡᠯᠭᠡᠯᠡ᠃ ᠲᠡᠷᠡ ᠪᠡᠷ ᠥᠨᠳᠥᠷ ᠲᠦ ᠵᠣᠭᠰᠣᠭᠰᠠᠨ ᠤᠴᠢᠷ ᠠᠴᠠ ᠠᠷᠠᠳ ᠣᠯᠠᠨ ᠪᠦᠭᠦᠳᠡᠭᠡᠷ ᠲᠡᠭᠦᠨ ᠢ ᠣᠯᠵᠤ ᠬᠠᠷᠠᠪᠠ᠃ ᠲᠡᠷᠡ ᠪᠡᠷ ᠨᠣᠮ ᠢ ᠳᠡᠯᠭᠡᠬᠦ ᠳᠦ᠂ ᠠᠷᠠᠳ ᠣᠯᠠᠨ ᠪᠦᠭᠦᠳᠡᠭᠡᠷ ᠪᠣᠰᠴᠠᠭᠠᠪᠠ᠃ 6 ᠡᠽᠷᠠ ᠠᠤᠭᠠ ᠪᠤᠷᠬᠠᠨ ᠶᠣᠬᠣᠸᠠ ᠶᠢ ᠮᠠᠭᠲᠠᠬᠤ ᠳᠤ᠂ ᠪᠦᠬᠦ ᠠᠷᠠᠳ ᠲᠦᠮᠡᠨ ᠭᠠᠷ ᠢᠶᠠᠨ ᠡᠷᠭᠦᠨ᠂ 《ᠠᠮᠧᠨ᠂ ᠠᠮᠧᠨ︕》 ᠭᠡᠵᠦ ᠬᠠᠷᠢᠭᠤᠯᠤᠭᠰᠠᠨ ᠢᠶᠠᠨ ᠪᠥᠬᠥᠢᠵᠦ ᠨᠢᠭᠤᠷ ᠢᠶᠠᠨ ᠭᠠᠵᠠᠷ ᠲᠤ ᠬᠦᠷᠭᠡᠨ ᠶᠣᠬᠣᠸᠠ ᠳᠤ ᠮᠥᠷᠭᠥᠪᠡ᠃ 7 ᠬᠥᠮᠦᠰ ᠪᠠᠢᠷᠢ ᠪᠠᠢᠷᠢᠨ ᠳᠠᠭᠠᠨ ᠵᠣᠭᠰᠣᠬᠤ ᠳᠤ᠂ ᠶᠧᠱᠦ᠋ᠶᠠ᠂ ᠪᠠᠨᠢ᠂ ᠱᠧᠷᠧᠪᠢᠶᠠ᠂ ᠶᠠᠮᠢᠨ᠂ ᠠᠺᠦ᠋ᠪ᠂ ᠱᠠᠪᠧᠲ᠋ᠠᠢ᠂ ᠬᠣᠳᠢᠶᠠ᠂ ᠮᠠᠶᠠᠰᠧᠶᠠ᠂ ᠺᠧᠯᠢᠲ᠋ᠠ᠂ ᠠᠽᠠᠷᠢᠶᠠ᠂ ᠶᠣᠽᠠᠪᠠᠳ᠋᠂ ᠬᠠᠨᠠᠨ᠂ ᠫᠧᠯᠠᠶᠠ ᠵᠡᠷᠭᠡ ᠯᠧᠸᠢᠴᠦᠳ ᠠᠷᠠᠳ ᠲᠦᠮᠡᠨ ᠳᠦ ᠬᠠᠤᠯᠢ ᠶᠢ ᠣᠢᠯᠠᠭᠠᠭᠤᠯᠵᠤ ᠪᠠᠢᠪᠠ᠃ 8 ᠲᠡᠳᠡ ᠪᠤᠷᠬᠠᠨ ᠤ ᠬᠠᠤᠯᠢ ᠶᠢᠨ ᠨᠣᠮ ᠠᠴᠠ ᠤᠩ᠋ᠰᠢᠵᠤ᠂ ᠤᠳᠬᠠ ᠶᠢ ᠨᠢ ᠲᠣᠳᠣᠷᠬᠠᠢᠯᠠᠨ ᠲᠠᠢᠯᠪᠤᠷᠢᠯᠠᠵᠤ ᠪᠠᠢᠯᠠ᠃ ᠲᠡᠢᠨ ᠬᠦ ᠬᠥᠮᠦᠰ ᠤᠩ᠋ᠰᠢᠭᠰᠠᠨ ᠢ ᠨᠢ ᠣᠢᠯᠠᠭᠠᠵᠤ ᠪᠠᠢᠪᠠ᠃
9 ᠠᠷᠠᠳ ᠲᠦᠮᠡᠨ ᠪᠦᠭᠦᠳᠡ ᠪᠡᠷ ᠬᠠᠤᠯᠢ ᠶᠢᠨ ᠦᠭᠡᠰ ᠢ ᠰᠣᠨᠣᠰᠣᠭᠠᠳ ᠤᠬᠢᠯᠠᠵᠤ ᠪᠠᠢᠪᠠ᠃ ᠵᠠᠬᠢᠷᠤᠭᠴᠢ ᠨᠧᠾᠧᠮᠢᠶᠠ᠂ ᠲᠠᠬᠢᠯᠴᠢ ᠪᠠ ᠬᠠᠤᠯᠢ ᠶᠢᠨ ᠪᠠᠭᠰᠢ ᠡᠽᠷᠠ᠂ ᠮᠥᠨ ᠠᠷᠠᠳ ᠲᠦᠮᠡᠨ ᠳᠦ ᠬᠠᠤᠯᠢ ᠵᠢᠭᠠᠵᠤ ᠪᠠᠢᠭᠰᠠᠨ ᠯᠧᠸᠢᠴᠦᠳ ᠪᠦᠬᠦ ᠠᠷᠠᠳ ᠲᠦᠮᠡᠨ ᠳᠦ᠄ 《ᠥᠨᠥᠳᠥᠷ ᠪᠣᠯ ᠲᠠ ᠨᠠᠷ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠶᠢᠨ ᠠᠷᠢᠭᠤᠨ ᠡᠳᠦᠷ ᠶᠤᠮ᠃ ᠪᠦᠦ ᠭᠠᠰᠢᠭᠤᠳᠠ᠂ ᠪᠦᠦ ᠤᠬᠢᠯᠠ》 ᠭᠡᠪᠡ᠃ 10 ᠲᠡᠷᠡ᠄ 《ᠲᠠ ᠨᠠᠷ ᠬᠠᠷᠢᠭᠠᠳ ᠲᠠᠷᠭᠤᠨ ᠢ ᠢᠳᠡ᠂ ᠠᠮᠲᠠᠲᠠᠨ ᠢ ᠤᠤᠭᠤ᠂ ᠪᠡᠯᠡᠳᠬᠡᠬᠦ ᠶᠠᠭᠤᠮᠠ ᠦᠭᠡᠢ ᠨᠢᠭᠡᠨ ᠳᠡᠭᠡᠨ ᠬᠤᠪᠢ ᠲᠦᠭᠡᠭᠡ᠃ ᠥᠨᠥᠳᠥᠷ ᠪᠣᠯ ᠪᠢᠳᠡᠨ ᠦ ᠡᠵᠡᠨ ᠦ ᠠᠷᠢᠭᠤᠨ ᠡᠳᠦᠷ ᠶᠤᠮ᠂ ᠪᠦᠦ ᠭᠠᠰᠢᠭᠤᠳᠠ᠃ ᠶᠣᠬᠣᠸᠠ ᠶᠢᠨ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠨᠢ ᠲᠠ ᠨᠠᠷ ᠤᠨ ᠬᠦᠴᠦ ᠴᠢᠳᠠᠯ ᠶᠤᠮ》 ᠭᠡᠪᠡ᠃ 11 ᠯᠧᠸᠢᠴᠦᠳ ᠴᠤ ᠪᠦᠬᠦ ᠠᠷᠠᠳ ᠣᠯᠠᠨ ᠢ ᠨᠠᠮᠵᠢᠭᠠᠨ᠄ 《ᠲᠠᠢᠪᠤᠰᠢᠷᠠ᠂ ᠥᠨᠥᠳᠥᠷ ᠪᠣᠯ ᠠᠷᠢᠭᠤᠨ ᠡᠳᠦᠷ᠃ ᠪᠦᠦ ᠭᠠᠰᠢᠭᠤᠳᠠ》 ᠭᠡᠵᠦ ᠬᠡᠯᠡᠪᠡ᠃ 12 ᠪᠦᠬᠦ ᠠᠷᠠᠳ ᠲᠦᠮᠡᠨ ᠥᠪᠡᠷᠰᠡᠳ ᠲᠤᠨᠢ ᠲᠤᠩ᠋ᠬᠠᠭᠯᠠᠭᠰᠠᠨ ᠦᠭᠡᠰ ᠢ ᠣᠢᠯᠠᠭᠠᠭᠰᠠᠨ ᠪᠠᠢᠯᠠ᠃ ᠲᠡᠳᠡ ᠢᠳᠡᠵᠦ ᠤᠤᠭᠤᠨ᠂ ᠬᠤᠪᠢ ᠲᠦᠭᠡᠭᠡᠵᠦ᠂ ᠶᠡᠬᠡ ᠪᠠᠶᠠᠷ ᠨᠠᠢᠷ ᠬᠢᠬᠦ ᠪᠡᠷ ᠶᠠᠪᠤᠵᠠᠭᠠᠪᠠ᠃
13 ᠬᠣᠶᠠᠳᠠᠬᠢ ᠡᠳᠦᠷ ᠨᠢ ᠪᠦᠬᠦ ᠠᠢᠮᠠᠭ ᠤᠨ ᠲᠡᠷᠢᠭᠦᠨ᠂ ᠲᠠᠬᠢᠯᠴᠢᠳ ᠪᠠ ᠯᠧᠸᠢᠴᠦᠳ ᠬᠠᠮᠲᠤ ᠪᠠᠷ ᠬᠠᠤᠯᠢ ᠶᠢᠨ ᠪᠠᠭᠰᠢ ᠡᠽᠷᠠ ᠳᠡᠭᠡᠷᠡ ᠴᠤᠭᠯᠠᠷᠠᠵᠤ᠂ ᠬᠠᠤᠯᠢ ᠶᠢᠨ ᠦᠭᠡᠰ ᠢ ᠰᠤᠳᠤᠯᠵᠤ ᠪᠠᠢᠬᠤ ᠳᠠᠭᠠᠨ 14 ᠶᠣᠬᠣᠸᠠ ᠶᠢᠨ ᠮᠣᠰᠧ ᠪᠠᠷ ᠳᠠᠮᠵᠢᠭᠤᠯᠤᠨ ᠢᠰᠷᠧᠯᠴᠦᠳ ᠲᠦ ᠥᠭᠭᠥᠭᠰᠡᠨ ᠬᠠᠤᠯᠢ ᠶᠢᠨ ᠨᠣᠮ ᠳᠤ 《ᠳᠣᠯᠣᠳᠤᠭᠠᠷ ᠰᠠᠷᠠ ᠶᠢᠨ ᠪᠠᠶᠠᠷ ᠢᠶᠠᠷ ᠮᠠᠢᠬᠠᠨ ᠳᠤ ᠰᠠᠭᠤᠵᠠᠭᠠ》 ᠭᠡᠰᠡᠨ ᠵᠠᠷᠯᠢᠭ ᠪᠢᠴᠢᠭᠳᠡᠭᠰᠡᠨ ᠪᠠᠢᠭᠠ ᠶᠢ ᠣᠯᠪᠠ᠃ 15 ᠡᠨᠡ ᠵᠠᠷᠯᠢᠭ ᠲᠤ ᠪᠢᠴᠢᠭᠳᠡᠭᠰᠡᠨ ᠦ ᠳᠠᠭᠠᠤ ᠪᠦᠬᠦ ᠬᠣᠲᠠ ᠲᠣᠰᠬᠣᠨ ᠬᠢᠭᠡᠳ ᠶᠧᠷᠦ᠋ᠰᠠᠯᠧᠮ ᠳᠠᠶᠠᠭᠠᠷ ᠲᠤ 《ᠲᠣᠯᠣᠭᠠᠳ ᠢᠶᠠᠷ ᠶᠠᠪᠤᠵᠤ᠂ ᠴᠢᠳᠦᠨ᠂ ᠵᠡᠷᠯᠢᠭ ᠴᠢᠳᠦᠨ᠂ ᠰᠢᠷᠠᠰᠤᠨ ᠮᠣᠳᠣ᠂ ᠳᠠᠯᠳᠠᠤ ᠮᠣᠳᠣ ᠵᠡᠷᠭᠡ ᠨᠠᠪᠴᠢᠲᠤ ᠮᠣᠳᠣᠨ ᠤ ᠮᠥᠴᠢᠷ ᠤᠳ ᠢ ᠠᠪᠴᠢᠷᠠᠵᠤ ᠣᠷᠣᠮᠵᠢ ᠪᠠᠷᠢ》 ᠭᠡᠵᠦ ᠵᠠᠷᠯᠠᠬᠤ ᠶᠣᠰᠣᠲᠠᠢ ᠪᠠᠢᠯᠠ᠃ 16 ᠲᠡᠢᠮᠦ ᠡᠴᠡ ᠠᠷᠠᠳ ᠣᠯᠠᠨ ᠭᠠᠷᠴᠤ ᠶᠠᠪᠤᠭᠠᠳ ᠮᠥᠴᠢᠷ ᠤᠳ ᠠᠪᠴᠢᠷᠠᠨ᠂ ᠥᠪᠡᠷᠰᠡᠳ ᠦᠨ ᠢᠶᠠᠨ ᠳᠡᠭᠡᠪᠦᠷ᠂ ᠬᠠᠰᠢᠶᠠ ᠪᠣᠯᠣᠨ ᠪᠤᠷᠬᠠᠨ ᠤ ᠥᠷᠭᠥᠭᠡᠨ ᠦ ᠬᠠᠰᠢᠶᠠᠨ ᠳᠤ᠂ ᠤᠰᠤᠨ ᠬᠠᠭᠠᠯᠭᠠᠨ ᠳᠠᠬᠢ ᠲᠠᠯᠠᠪᠠᠢ ᠳᠤ᠂ ᠮᠥᠨ ᠡᠹᠷᠠᠢᠮ ᠤᠨ ᠬᠠᠭᠠᠯᠭᠠᠨ ᠳᠠᠬᠢ ᠲᠠᠯᠠᠪᠠᠢ ᠳᠤ ᠣᠷᠣᠮᠵᠢ ᠨᠤᠭᠤᠳ ᠪᠠᠷᠢᠵᠠᠢ᠃ 17 ᠴᠥᠯᠡᠯᠭᠡ ᠡᠴᠡ ᠢᠷᠡᠭᠰᠡᠳ ᠦᠨ ᠪᠦᠬᠦᠢᠯᠡ ᠴᠢᠭᠤᠯᠭᠠᠨ ᠣᠷᠣᠮᠵᠢ ᠪᠠᠷᠢᠵᠤ᠂ ᠲᠡᠨᠳᠡ ᠪᠡᠨ ᠰᠠᠭᠤᠪᠠ᠃ ᠦᠨᠡᠬᠡᠷ ᠢᠰᠷᠧᠯᠴᠦᠳ ᠨᠦᠨ ᠦ ᠬᠦᠦ ᠶᠣᠱᠦ᠋ᠶᠠ ᠶᠢᠨ ᠡᠳᠦᠷ ᠤᠳ ᠠᠴᠠ ᠲᠡᠷᠡ ᠡᠳᠦᠷ ᠬᠦᠷᠲᠡᠯᠡ ᠡᠢᠨ ᠬᠦ ᠬᠢᠵᠦ ᠪᠠᠢᠭᠠ ᠦᠭᠡᠢ ᠠᠵᠢ᠃ ᠲᠡᠨᠳᠡ ᠦᠯᠡᠮᠵᠢ ᠪᠠᠶᠠᠷ ᠬᠥᠷ ᠪᠣᠯᠵᠠᠢ᠃ 18 ᠡᠽᠷᠠ ᠡᠬᠢᠨ ᠤ ᠡᠳᠦᠷ ᠡᠴᠡ ᠡᠬᠢᠯᠡᠨ ᠡᠴᠦᠰ ᠦᠨ ᠡᠳᠦᠷ ᠬᠦᠷᠲᠡᠯᠡ ᠡᠳᠦᠷ ᠪᠦᠷᠢ ᠪᠤᠷᠬᠠᠨ ᠤ ᠬᠠᠤᠯᠢ ᠶᠢᠨ ᠨᠣᠮ ᠠᠴᠠ ᠤᠩ᠋ᠰᠢᠵᠤ ᠥᠭᠪᠡ᠃ ᠲᠡᠳᠡ ᠳᠣᠯᠣᠭᠠᠨ ᠬᠣᠨᠣᠭ ᠪᠠᠶᠠᠷ ᠬᠢᠵᠦ᠂ ᠨᠠᠢ᠌ᠮᠠᠳᠠᠬᠢ ᠡᠳᠦᠷ ᠨᠢ ᠵᠢᠭᠠᠪᠤᠷᠢ ᠶᠣᠰᠣᠭᠠᠷ ᠴᠤᠭᠯᠠᠭᠠᠨ ᠬᠢᠵᠡᠢ᠃