ᠬᠣᠶᠠᠳᠤᠭᠠᠷ ᠰᠠᠮᠦ᠋ᠶᠧᠯ ᠨᠢᠭᠡ
ᠰᠠᠦ᠋ᠯ ᠥᠭᠡᠳᠡ ᠪᠣᠯᠣᠭᠰᠠᠨ ᠴᠢᠮᠡᠭᠡ
1 ᠰᠠᠦ᠋ᠯ ᠥᠭᠡᠳᠡ ᠪᠣᠯᠣᠭᠰᠠᠨ ᠤ ᠳᠠᠷᠠᠭᠠ᠂ ᠳ᠋ᠠᠸᠢᠳ᠋ ᠠᠮᠠᠯᠧᠺᠴᠤᠳ ᠢ ᠪᠤᠲᠠ ᠴᠣᠬᠢᠨ ᠽᠢᠺᠯᠠᠭ ᠲᠤ ᠪᠤᠴᠠᠵᠤ ᠢᠷᠡᠭᠡᠳ ᠬᠣᠶᠠᠷ ᠬᠣᠨᠣᠵᠤ ᠪᠠᠢᠪᠠ᠃ 2 ᠭᠤᠷᠪᠠᠳᠠᠬᠢ ᠡᠳᠦᠷ ᠨᠢ ᠨᠢᠭᠡᠨ ᠬᠥᠮᠦᠨ ᠰᠠᠦ᠋ᠯ ᠤᠨ ᠬᠤᠸᠠᠷᠠᠨ ᠠᠴᠠ ᠢᠷᠡᠵᠡᠢ᠃ ᠲᠡᠭᠦᠨ ᠦ ᠬᠤᠪᠴᠠᠰᠤ ᠤᠷᠠᠭᠳᠠᠵᠤ᠂ ᠲᠣᠯᠣᠭᠠᠢ ᠳᠡᠭᠡᠷᠡ ᠨᠢ ᠲᠣᠭᠣᠰᠣ ᠰᠢᠷᠣᠢ ᠨᠠᠭᠠᠯᠳᠤᠭᠰᠠᠨ ᠪᠠᠢᠪᠠ᠃ ᠲᠡᠷᠡ ᠳ᠋ᠠᠸᠢᠳ᠋ ᠤᠷᠤᠭᠤ ᠢᠷᠡᠭᠡᠳ ᠲᠡᠭᠦᠨ ᠦ ᠡᠮᠦᠨᠡ ᠭᠠᠵᠠᠷ ᠲᠤ ᠪᠥᠬᠥᠢᠪᠡ᠃ 3 ᠳ᠋ᠠᠸᠢᠳ᠋᠄ 《ᠴᠢ ᠬᠠᠮᠢᠭᠠ ᠠᠴᠠ ᠢᠷᠡᠪᠡ︖》 ᠭᠡᠵᠦ ᠠᠰᠠᠭᠤᠭᠰᠠᠨ ᠳᠤ᠂ ᠲᠡᠷᠡ᠄ 《ᠪᠢ ᠢᠰᠷᠧᠯ ᠤᠨ ᠬᠤᠸᠠᠷᠠᠨ ᠠᠴᠠ ᠵᠢᠭᠤᠲᠠᠵᠤ ᠢᠷᠡᠯᠡ》 ᠭᠡᠪᠡ᠃ 4 ᠳ᠋ᠠᠸᠢᠳ᠋ ᠲᠡᠭᠦᠨ ᠳᠦ᠄ 《ᠶᠠᠭᠤ ᠪᠣᠯᠣᠭᠰᠠᠨ ᠪᠤᠢ︖ ᠨᠠᠳᠠ ᠳᠤ ᠬᠡᠯᠡ》 ᠭᠡᠬᠦ ᠳᠦ᠂ ᠲᠡᠷᠡ᠄ 《ᠢᠰᠷᠧᠯ ᠤᠨ ᠴᠡᠷᠢᠭ ᠲᠤᠯᠤᠯᠳᠤᠭᠠᠨ ᠤ ᠲᠠᠯᠠᠪᠤᠷ ᠠᠴᠠ ᠵᠢᠭᠤᠲᠠᠯᠠ᠃ ᠣᠯᠠᠨ ᠬᠥᠮᠦᠨ ᠤᠨᠠᠭᠰᠠᠨ᠂ ᠰᠠᠦ᠋ᠯ ᠪᠣᠯᠣᠨ ᠲᠡᠭᠦᠨ ᠦ ᠬᠥᠪᠡᠭᠦᠨ ᠶᠣᠨᠠᠲ᠋ᠠᠨ ᠴᠤ ᠡᠷᠡᠰᠳᠡᠪᠡ》 ᠭᠡᠯᠡ᠃ 5 ᠳ᠋ᠠᠸᠢᠳ᠋ ᠴᠢᠮᠡᠭᠡ ᠠᠪᠴᠢᠷᠠᠭᠰᠠᠨ ᠲᠡᠷᠡ ᠵᠠᠯᠠᠭᠤ ᠠᠴᠠ᠄ 《ᠰᠠᠦ᠋ᠯ ᠪᠣᠯᠣᠨ ᠲᠡᠭᠦᠨ ᠦ ᠬᠥᠪᠡᠭᠦᠨ ᠶᠣᠨᠠᠲ᠋ᠠᠨ ᠤ ᠡᠷᠡᠰᠳᠡᠭᠰᠡᠨ ᠢ ᠴᠢ ᠶᠠᠭᠠᠬᠢᠵᠤ ᠮᠡᠳᠡᠭᠰᠡᠨ ᠪᠤᠢ︖》 ᠭᠡᠵᠦ ᠠᠰᠠᠭᠤᠭᠰᠠᠨ ᠳᠤ᠂ 6 ᠲᠡᠷᠡ ᠵᠠᠯᠠᠭᠤ᠄ 《ᠲᠡᠷᠡ ᠦᠶᠡ ᠳᠦ ᠪᠢ ᠶᠠᠭ ᠭᠢᠯᠪᠣᠶᠠ ᠠᠭᠤᠯᠠᠨ ᠳᠤ ᠪᠠᠢᠬᠤ ᠲᠠᠭᠠᠷᠠᠭᠰᠠᠨ᠃ ᠪᠢ ᠬᠠᠷᠠᠬᠤ ᠳᠤ᠂ ᠰᠠᠦ᠋ᠯ ᠵᠢᠳᠠ ᠪᠠᠨ ᠲᠦᠰᠢᠵᠦ ᠪᠠᠢᠭᠰᠠᠨ ᠪᠥᠭᠡᠳ ᠲᠡᠷᠭᠡᠲᠦ ᠴᠡᠷᠢᠭ ᠪᠣᠯᠣᠨ ᠮᠣᠷᠢᠲᠤ ᠴᠡᠷᠢᠭ ᠤᠳ ᠲᠡᠭᠦᠨ ᠤᠷᠤᠭᠤ ᠳᠠᠭᠠᠷᠢᠨ ᠣᠴᠢᠵᠤ ᠪᠠᠢᠯᠠ︕ 7 ᠰᠠᠦ᠋ᠯ ᠠᠷᠤᠨᠰᠢ ᠪᠠᠨ ᠡᠷᠭᠢᠵᠦ᠂ ᠨᠠᠮᠠᠶᠢ ᠬᠠᠷᠠᠭᠠᠳ ᠳᠠᠭᠤᠳᠠᠭᠰᠠᠨ ᠶᠤᠮ᠃ 〈ᠪᠢ ᠡ᠊ᠨᠳᠡ ᠪᠠᠢᠨᠠ〉 ᠭᠡᠵᠦ ᠬᠠᠷᠢᠭᠤᠯᠤᠭᠰᠠᠨ ᠳᠤ᠂ 8 ᠲᠡᠷᠡ᠄ 〈ᠴᠢ ᠬᠡᠨ ᠪᠤᠢ︖〉 ᠭᠡᠵᠦ ᠠᠰᠠᠭᠤᠪᠠ᠂ ᠪᠢ᠄ 〈ᠠᠮᠠᠯᠧᠺ ᠬᠥᠮᠦᠨ ᠪᠠᠢᠨᠠ〉 ᠭᠡᠰᠡᠨ ᠪᠢᠯᠡ᠃ 9 ᠲᠡᠷᠡ ᠨᠠᠳᠠ ᠳᠤ᠄ 〈ᠨᠠᠰᠢ ᠢᠷᠡᠵᠦ᠂ ᠨᠠᠮᠠᠶᠢ ᠡᠴᠦᠰᠯᠡᠭᠦᠯᠦᠭᠡᠴᠢ᠃ ᠦᠬᠦᠲᠡᠯᠡ ᠡᠪᠡᠳᠴᠦ ᠪᠠᠢᠭᠠ ᠪᠣᠯᠪᠠᠴᠤ ᠠᠮᠢ ᠮᠢᠨᠢ ᠲᠠᠰᠤᠷᠠᠬᠤ ᠦᠭᠡᠢ ᠪᠠᠢᠨᠠ〉 ᠬᠡᠮᠡᠨ ᠥᠭᠦᠯᠡᠪᠡ᠃ 10 ᠲᠡᠷᠡ ᠨᠢᠭᠡᠨᠲᠡ ᠤᠨᠠᠭᠰᠠᠨ ᠬᠣᠢᠨᠠ ᠠᠮᠢᠳᠤ ᠦᠯᠡᠳᠡᠵᠦ ᠴᠢᠳᠠᠬᠤ ᠦᠭᠡᠢ ᠭᠡᠵᠦ ᠪᠢ ᠪᠣᠳᠣᠭᠠᠳ ᠲᠡᠭᠦᠨ ᠦ ᠳᠡᠷᠭᠡᠳᠡ ᠣᠴᠢᠵᠤ ᠲᠡᠭᠦᠨ ᠢ ᠡᠴᠦᠰᠯᠡᠭᠦᠯᠪᠡ᠃ ᠲᠡᠭᠡᠭᠡᠳ ᠪᠢ ᠲᠡᠭᠦᠨ ᠦ ᠲᠣᠯᠣᠭᠠᠢ ᠶᠢᠨ ᠲᠢᠲᠢᠮ᠂ ᠭᠠᠷ ᠤᠨ ᠪᠠᠭᠤᠪᠴᠢ ᠶᠢ ᠨᠠᠰᠢ ᠪᠠᠨ ᠡᠵᠡᠨ ᠲᠠᠨ ᠳᠠᠭᠠᠨ ᠠᠪᠴᠢᠷᠠᠯᠠ》 ᠭᠡᠪᠡ᠃
11 ᠳ᠋ᠠᠸᠢᠳ᠋ ᠬᠤᠪᠴᠠᠰᠤ ᠪᠠᠨ ᠬᠠᠤ ᠲᠠᠲᠠᠨ ᠤᠷᠠᠭᠰᠠᠨ ᠳᠤ᠂ ᠲᠡᠭᠦᠨ ᠲᠡᠢ ᠬᠠᠮᠲᠤ ᠪᠠᠢᠭᠰᠠᠨ ᠪᠦᠬᠦ ᠬᠥᠮᠦᠨ ᠲᠡᠭᠡᠭᠰᠡᠨ ᠪᠥᠭᠡᠳ 12 ᠢᠯᠳᠦᠨ ᠳᠦ ᠴᠣᠬᠢᠭᠳᠠᠨ ᠤᠨᠠᠭᠰᠠᠨ ᠰᠠᠦ᠋ᠯ᠂ ᠲᠡᠭᠦᠨ ᠦ ᠬᠥᠪᠡᠭᠦᠨ ᠶᠣᠨᠠᠲ᠋ᠠᠨ᠂ ᠶᠣᠬᠣᠸᠠ ᠶᠢᠨ ᠠᠷᠠᠳ ᠲᠦᠮᠡᠨ᠂ ᠮᠥᠨ ᠢᠰᠷᠧᠯ ᠤᠨ ᠭᠡᠷ ᠦᠨ ᠬᠢᠨ ᠤ ᠲᠥᠯᠥᠭᠡ ᠭᠠᠰᠢᠭᠤᠳᠠᠨ ᠤᠬᠢᠯᠠᠵᠤ᠂ ᠦᠳᠡᠰᠢ ᠪᠣᠯᠲᠠᠯᠠ ᠪᠠᠴᠠᠭ ᠪᠠᠷᠢᠪᠠ᠃ 13 ᠳ᠋ᠠᠸᠢᠳ᠋ ᠮᠡᠳᠡᠭᠡ ᠠᠪᠴᠢᠷᠠᠭᠰᠠᠨ ᠵᠠᠯᠠᠭᠤ ᠳᠤ᠄ 《ᠴᠢ ᠬᠠᠮᠢᠭᠠᠬᠢ ᠶᠢᠨ ᠬᠥᠮᠦᠨ ᠪᠤᠢ︖》 ᠭᠡᠬᠦ ᠳᠦ᠂ ᠲᠡᠷᠡ᠄ 《ᠪᠢ ᠪᠣᠯ ᠲᠠ ᠨᠠᠷ ᠤᠨ ᠳᠤᠮᠳᠠ ᠠᠮᠢᠳᠤᠷᠠᠳᠠᠭ ᠠᠮᠠᠯᠧᠺ ᠬᠥᠮᠦᠨ ᠦ ᠬᠦᠦ》 ᠭᠡᠵᠦ ᠬᠠᠷᠢᠭᠤᠯᠪᠠ᠃ 14 ᠳ᠋ᠠᠸᠢᠳ᠋᠄ 《ᠴᠢ ᠶᠠᠭᠤᠨ ᠳᠤ ᠠᠶᠤᠮᠰᠢᠭ ᠦᠭᠡᠢ ᠪᠠᠷ ᠭᠠᠷ ᠰᠤᠩ᠋ᠭᠠᠨ ᠶᠣᠬᠣᠸᠠ ᠶᠢᠨ ᠲᠣᠰᠣᠯᠠᠭᠰᠠᠨ ᠬᠥᠮᠦᠨ ᠢ ᠠᠯᠠᠬᠤ ᠨᠢ ᠪᠤᠢ︖》 ᠭᠡᠳ᠂ 15 ᠨᠢᠭᠡ ᠵᠠᠯᠠᠭᠤ ᠶᠢ ᠳᠠᠭᠤᠳᠠᠨ᠄ 《ᠲᠡᠰᠢ ᠣᠴᠢᠵᠤ ᠲᠡᠭᠦᠨ ᠢ ᠠᠯᠠ》 ᠭᠡᠰᠡᠨ ᠳᠦ᠂ ᠲᠡᠷᠡ ᠴᠣᠬᠢᠵᠤ ᠠᠯᠠᠪᠠ᠃ 16 ᠳ᠋ᠠᠸᠢᠳ᠋ ᠲᠡᠭᠦᠨ ᠳᠦ᠄ 《ᠴᠢᠨᠦ ᠴᠢᠰᠤ ᠲᠣᠯᠣᠭᠠᠢ ᠳᠡᠭᠡᠷᠡ ᠴᠢᠨᠢ ᠪᠠᠭᠤᠬᠤ ᠪᠣᠯᠣᠨᠠ᠃ ᠴᠢ᠄ 〈ᠶᠣᠬᠣᠸᠠ ᠶᠢᠨ ᠲᠣᠰᠣᠯᠠᠭᠰᠠᠨ ᠬᠥᠮᠦᠨ ᠢ ᠪᠢ ᠠᠯᠠᠪᠠ〉 ᠭᠡᠵᠦ ᠥᠪᠡᠷ ᠦᠨ ᠢᠶᠠᠨ ᠡᠰᠡᠷᠭᠦ ᠭᠡᠷᠡᠴᠢᠯᠡᠭᠰᠡᠨ ᠶᠤᠮ》 ᠭᠡᠵᠦ ᠬᠡᠯᠡᠭᠰᠡᠨ ᠪᠠᠢᠨᠠ᠃
17 ᠳ᠋ᠠᠸᠢᠳ᠋ ᠰᠠᠦ᠋ᠯ ᠪᠣᠯᠣᠨ ᠲᠡᠭᠦᠨ ᠦ ᠬᠥᠪᠡᠭᠦᠨ ᠶᠣᠨᠠᠲ᠋ᠠᠨ ᠤ ᠲᠥᠯᠥᠭᠡ ᠭᠠᠰᠢᠭᠤᠳᠠᠯ ᠤᠨ ᠳᠠᠭᠤᠤ ᠵᠣᠬᠢᠶᠠᠵᠤ᠂ 18 ᠶᠦᠳᠠᠴᠤᠳ ᠲᠤ ᠰᠤᠷᠭᠠᠬᠤ ᠶᠢ ᠵᠠᠬᠢᠪᠠ᠃ ᠡᠨᠡ ᠳᠠᠭᠤᠤ ᠶᠢ 《ᠨᠤᠮᠤ》 ᠭᠡᠳᠡᠭ ᠪᠥᠭᠡᠳ ᠶᠠᠱᠠᠷ ᠤᠨ ᠨᠣᠮ ᠳᠤ ᠪᠢᠴᠢᠭᠳᠡᠭᠰᠡᠨ ᠠᠵᠢ᠃
19 《ᠥ᠂ ᠢᠰᠷᠧᠯ ᠡ᠂ ᠠᠯᠳᠠᠷᠲᠠᠳ ᠴᠢᠨᠢ ᠲᠣᠯᠣᠭᠠᠳ ᠳᠡᠭᠡᠷᠡ ᠠᠯᠠᠭᠤᠯᠤᠭᠰᠠᠨ ᠡᠷᠡᠯᠬᠡᠭ ᠪᠠᠭᠠᠲᠤᠷ ᠤᠳ ᠮᠠᠨᠢ ᠲᠡᠨᠳᠡ ᠤᠨᠠᠭᠰᠠᠨ︕
20 ᠡᠨᠡ ᠬᠦ ᠶᠠᠪᠤᠳᠠᠯ ᠢ ᠭᠠᠲ ᠲᠤ ᠪᠦᠦ ᠲᠤᠭᠤᠯᠭᠠ ᠠᠱᠺᠧᠯᠣᠨ ᠤ ᠭᠤᠳᠤᠮᠵᠢᠨ ᠳᠤ ᠴᠤ ᠪᠦᠦ ᠲᠤᠩ᠋ᠬᠠᠭᠯᠠ ᠡᠰᠡ ᠪᠥᠭᠡᠰᠦ ᠹᠢᠯᠢᠰᠲ᠋ᠴᠦᠳ ᠦᠨ ᠥᠬᠢᠳ ᠪᠠᠶᠠᠷᠯᠠᠵᠤ ᠬᠥᠪᠴᠢᠷᠬᠡᠢ ᠬᠥᠨᠳᠡᠭᠦᠯᠦᠭᠡ ᠦᠭᠡᠢ ᠬᠥᠮᠦᠨ ᠦ ᠥᠬᠢᠳ ᠬᠥᠭᠡᠷᠬᠦ ᠪᠤᠢ᠃
21 ᠥ᠂ ᠭᠢᠯᠪᠣᠶᠠ ᠶᠢᠨ ᠠᠭᠤᠯᠠᠰ ᠡ ᠲᠠ ᠨᠠᠷ ᠤᠨ ᠳᠡᠭᠡᠷᠡ ᠰᠢᠭᠦᠳᠡᠷᠢ ᠦᠭᠡᠢ᠂ ᠪᠣᠷᠣᠭᠠᠨ ᠦᠭᠡᠢ ᠲᠠᠯᠠᠪᠠᠢ ᠳᠡᠭᠡᠷᠡ ᠴᠢᠨᠢ ᠲᠠᠬᠢᠯ ᠪᠣᠯᠬᠤ ᠲᠠᠷᠢᠶᠠ ᠦᠭᠡᠢ᠃ ᠲᠠᠨ ᠤ ᠲᠡᠨᠳᠡ ᠪᠠᠭᠠᠲᠤᠷ ᠤᠳ ᠤᠨ ᠪᠠᠮᠪᠠᠢ ᠪᠤᠵᠠᠷᠲᠤᠪᠠ ᠰᠠᠦ᠋ᠯ ᠤᠨ ᠪᠠᠮᠪᠠᠢ ᠴᠤ ᠡᠰᠡ ᠲᠣᠰᠣᠯᠠᠭᠳᠠᠪᠠ᠃
22 ᠨᠡᠪᠲᠡ ᠬᠠᠷᠪᠤᠭᠳᠠᠭᠰᠠᠳ ᠤᠨ ᠴᠢᠰᠤ ᠦᠭᠡᠢ ᠪᠠᠷ ᠶᠣᠨᠠᠲ᠋ᠠᠨ ᠤ ᠨᠤᠮᠤ ᠬᠠᠷᠢᠳᠠᠭ ᠦᠭᠡᠢ ᠪᠠᠭᠠᠲᠤᠷ ᠤᠳ ᠤᠨ ᠥᠭᠡᠬᠦ ᠦᠭᠡᠢ ᠪᠠᠷ ᠰᠠᠦ᠋ᠯ ᠤᠨ ᠢᠯᠳᠦ ᠬᠣᠭᠣᠰᠣᠨ ᠪᠤᠴᠠᠳᠠᠭ ᠦᠭᠡᠢ ᠪᠠᠢᠪᠠ᠃
23 ᠡᠪ ᠲᠡᠢ᠂ ᠬᠠᠢᠷᠠᠲᠠᠢ ᠶᠠᠪᠤᠭᠰᠠᠨ ᠰᠠᠦ᠋ᠯ᠂ ᠶᠣᠨᠠᠲ᠋ᠠᠨ ᠬᠣᠶᠠᠷ ᠠᠮᠢᠳᠤ ᠳᠠᠭᠠᠨ ᠴᠤ᠂ ᠦᠬᠦᠬᠦ ᠳᠡᠭᠡᠨ ᠴᠤ ᠰᠠᠯᠤᠰᠢ ᠦᠭᠡᠢ ᠡ ᠲᠡᠳᠡ ᠪᠦᠷᠭᠦᠳ ᠡᠴᠡ ᠴᠤ ᠬᠤᠷᠳᠤᠨ ᠠᠷᠰᠯᠠᠨ ᠠᠴᠠ ᠴᠤ ᠬᠦᠴᠦᠲᠡᠢ ᠡ᠃
24 ᠥ᠂ ᠢᠰᠷᠧᠯ ᠤᠨ ᠥᠬᠢᠳ ᠡ ᠲᠠ ᠨᠠᠷ ᠢ ᠴᠢᠰ ᠤᠯᠠᠭᠠᠨ ᠲᠠᠩᠰᠤᠭ ᠬᠤᠪᠴᠠᠰᠤ ᠪᠠᠷ ᠭᠣᠶᠣᠵᠤ ᠡᠮᠦᠰᠬᠡᠯ ᠦᠨ ᠴᠢᠨᠢ ᠳᠡᠭᠡᠷᠡ ᠠᠯᠲᠠᠨ ᠴᠢᠮᠡᠭ ᠢ ᠵᠡᠭᠦᠵᠦ ᠥᠭᠭᠥᠭᠰᠡᠨ ᠰᠠᠦ᠋ᠯ ᠤᠨ ᠲᠥᠯᠥᠭᠡ ᠤᠬᠢᠯᠠᠭᠲᠤᠨ᠃
25 ᠲᠤᠯᠤᠯᠳᠤᠭᠠᠨ ᠤ ᠳᠤᠮᠳᠠ ᠪᠠᠭᠠᠲᠤᠷ ᠤᠳ ᠤᠨᠠᠭᠰᠠᠨ ᠠᠵᠢ ᠲᠣᠯᠣᠭᠠᠳ ᠳᠡᠭᠡᠷᠡ ᠶᠣᠨᠠᠲ᠋ᠠᠨ ᠠᠯᠠᠭᠳᠠᠵᠠᠢ᠃
26 ᠠᠬᠠ ᠶᠣᠨᠠᠲ᠋ᠠᠨ ᠮᠢᠨᠢ ᠴᠢᠨᠦ ᠲᠥᠯᠥᠭᠡ ᠮᠢᠨᠦ ᠵᠢᠷᠦᠬᠡ ᠰᠢᠨᠠᠯᠵᠤ ᠪᠠᠢᠨᠠ ᠴᠢ ᠨᠠᠳᠠ ᠳᠤ ᠦᠨᠡᠬᠡᠷ ᠰᠠᠢᠨ ᠪᠠᠢᠯᠠ ᠴᠢᠨᠦ ᠬᠠᠢᠷᠠ ᠪᠦᠰᠡᠭᠦᠢ ᠶᠢᠨ ᠬᠠᠢᠷᠠ ᠠᠴᠠ ᠢᠯᠡᠭᠦᠦ ᠭᠠᠢᠬᠠᠮᠰᠢᠭ ᠲᠠᠢ ᠪᠠᠢᠯᠠ᠃
27 ᠭᠡᠪᠡᠴᠦ ᠪᠠᠭᠠᠲᠤᠷ ᠨᠢ ᠤᠨᠠᠵᠤ᠂ ᠵᠡᠪᠰᠡᠭ ᠨᠢ ᠰᠦᠢᠷᠡᠵᠡᠢ᠃》