ᠬᠣᠶᠠᠳᠤᠭᠠᠷ ᠰᠠᠮᠦ᠋ᠶᠧᠯ ᠳᠥᠷᠪᠡ
ᠢᠱ ᠪᠣᠱᠧᠲ ᠬᠣᠣᠷᠯᠠᠭᠳᠠᠪᠠ
1 ᠰᠠᠦ᠋ᠯ ᠤᠨ ᠬᠦᠦ ᠢᠱ ᠪᠣᠱᠧᠲ ᠠᠪᠨᠧᠷ ᠤᠨ ᠾᠧᠪᠷᠣᠨ ᠳᠤ ᠨᠠᠰᠤ ᠨᠥᠭᠴᠢᠭᠰᠡᠨ ᠢ ᠰᠣᠨᠣᠰᠣᠭᠠᠳ᠂ ᠵᠣᠷᠢᠭ ᠠᠯᠳᠠᠭᠰᠠᠨ ᠪᠥᠭᠡᠳ ᠬᠠᠮᠤᠭ ᠢᠰᠷᠧᠯ ᠴᠤ ᠰᠠᠨᠳᠤᠷᠪᠠ᠃ 2 ᠰᠠᠦ᠋ᠯ ᠤᠨ ᠬᠦᠦ ᠢᠱ ᠪᠣᠱᠧᠲ ᠤᠨ ᠳᠣᠣᠷᠠ ᠬᠣᠶᠠᠷ ᠴᠡᠷᠢᠭ ᠤᠨ ᠳᠠᠷᠤᠭᠠ ᠪᠠᠢᠵᠠᠢ᠃ ᠨᠢᠭᠡ ᠶᠢ ᠨᠢ ᠪᠠᠨᠠ᠂ ᠨᠥᠭᠥᠭᠡ ᠶᠢ ᠨᠢ ᠷᠧᠺᠠᠪ ᠭᠡᠳᠡᠭ ᠪᠥᠭᠡᠳ ᠬᠣᠶᠠᠭᠤᠯᠠ ᠪᠠᠨ ᠪᠢᠨᠶᠠᠮᠢᠨ ᠣᠪᠣᠭ ᠤᠨ ᠪᠧᠷᠣᠲ ᠬᠥᠮᠦᠨ ᠷᠢᠮᠣᠨ ᠤ ᠬᠥᠪᠡᠭᠦᠳ ᠪᠠᠢᠪᠠ᠃ ᠪᠧᠷᠣᠲ ᠴᠤ ᠪᠢᠨᠶᠠᠮᠢᠨ ᠤ ᠨᠢᠭᠡᠨ ᠬᠡᠰᠡᠭ ᠭᠡᠭᠳᠡᠳᠡᠭ ᠨᠢ 3 ᠪᠧᠷᠣᠲ᠋ᠴᠤᠳ ᠬᠢᠲ᠋ᠠᠢᠮ ᠤᠷᠤᠭᠤ ᠵᠢᠭᠤᠲᠠᠨ ᠢᠷᠡᠵᠦ᠂ ᠥᠨᠥᠳᠥᠷ ᠬᠦᠷᠲᠡᠯᠡ ᠲᠡᠨᠳᠡ ᠰᠠᠭᠤᠵᠤ ᠪᠤᠢ ᠶᠢᠨ ᠤᠴᠢᠷ ᠶᠤᠮ᠃
4 ᠰᠠᠦ᠋ᠯ ᠤᠨ ᠬᠦᠦ ᠶᠣᠨᠠᠲ᠋ᠠᠨ ᠳᠤ ᠨᠢᠭᠡᠨ ᠳᠣᠭᠣᠯᠠᠩ ᠬᠥᠪᠡᠭᠦᠨ ᠪᠠᠢᠪᠠ᠃ ᠲᠡᠷᠡ ᠲᠠᠪᠤᠨ ᠨᠠᠰᠤᠲᠠᠢ ᠪᠠᠢᠬᠤ ᠳᠤ᠂ ᠰᠠᠦ᠋ᠯ ᠪᠣᠯᠣᠨ ᠶᠣᠨᠠᠲ᠋ᠠᠨ ᠤ ᠠᠯᠠᠭᠳᠠᠭᠰᠠᠨ ᠮᠡᠳᠡᠭᠡ ᠶᠧᠽᠷᠧᠯ ᠡᠴᠡ ᠢᠷᠡᠭᠰᠡᠨ ᠪᠠᠢᠯᠠ᠃ ᠠᠰᠠᠷᠠᠭᠴᠢ ᠨᠢ ᠬᠦᠦ ᠶᠢ ᠲᠡᠪᠡᠷᠢᠵᠦ᠂ ᠶᠠᠭᠠᠷᠠᠨ ᠵᠢᠭᠤᠲᠠᠵᠤ ᠪᠠᠢᠭᠠᠳ ᠲᠡᠭᠦᠨ ᠢ ᠤᠨᠠᠭᠠᠭᠰᠠᠨ ᠢᠶᠠᠷ ᠬᠦᠦ ᠳᠣᠭᠣᠯᠠᠩ ᠪᠣᠯᠵᠠᠢ᠃ ᠲᠡᠷᠡ ᠬᠦᠦ ᠶᠢ ᠮᠧᠹᠢᠪᠣᠱᠧᠲ ᠭᠡᠳᠡᠭ᠃
5 ᠨᠢᠭᠡᠨ ᠡᠳᠦᠷ ᠪᠧᠷᠣᠲ ᠬᠥᠮᠦᠨ ᠷᠢᠮᠣᠨ ᠤ ᠬᠦᠦ ᠷᠧᠺᠠᠪ᠂ ᠪᠠᠨᠠ ᠬᠣᠶᠠᠷ ᠢᠱ ᠪᠣᠱᠧᠲ ᠤᠨ ᠭᠡᠷ ᠤᠷᠤᠭᠤ ᠶᠠᠪᠤᠵᠤ᠂ ᠦᠳᠡ ᠶᠢᠨ ᠬᠠᠯᠠᠭᠤᠨ ᠳᠤ ᠲᠡᠨᠳᠡ ᠬᠦᠷᠦᠯᠡ᠃ ᠲᠡᠷᠡ ᠦᠶᠡ ᠳᠦ ᠢᠱ ᠪᠣᠱᠧᠲ ᠵᠡᠭᠦᠷᠮᠡᠭᠯᠡᠵᠦ ᠪᠠᠢᠪᠠ᠃ 6 ᠲᠡᠳᠡ ᠪᠤᠭᠤᠳᠠᠢ ᠠᠪᠬᠤ ᠮᠠᠶ᠋ᠢᠭ ᠭᠠᠷᠭᠠᠨ ᠭᠡᠷ ᠳᠣᠲᠣᠷᠠ ᠣᠷᠣᠭᠠᠳ ᠲᠡᠭᠦᠨ ᠦ ᠬᠡᠪᠡᠯᠢ ᠤᠷᠤᠭᠤ ᠪᠦᠯᠢᠪᠡ᠃ ᠲᠡᠭᠡᠭᠡᠳ ᠷᠧᠺᠠᠪ ᠪᠣᠯᠣᠨ ᠲᠡᠭᠦᠨ ᠦ ᠳᠡᠭᠦᠦ ᠪᠠᠨᠠ ᠵᠢᠭᠤᠲᠠᠭᠰᠠᠨ ᠪᠠᠢᠯᠠ᠃ 7 ᠶᠠᠭᠠᠬᠢᠭᠠᠳ ᠭᠡᠪᠡᠯ᠂ ᠲᠡᠳᠡᠨ ᠢ ᠭᠡᠷ ᠲᠦ ᠣᠷᠣᠬᠤ ᠦᠶᠡ ᠳᠦ᠂ ᠢᠱ ᠪᠣᠱᠧᠲ ᠤᠨᠲᠠᠯᠭᠠ ᠶᠢᠨ ᠥᠷᠥᠭᠡᠨ ᠳᠡᠭᠡᠨ ᠣᠷᠣ ᠳᠡᠭᠡᠷᠡ ᠪᠡᠨ ᠤᠨᠲᠠᠵᠤ ᠪᠠᠢᠵᠠᠢ᠃ ᠲᠡᠳᠡ ᠲᠡᠭᠦᠨ ᠢ ᠴᠢᠴᠢᠵᠦ ᠠᠯᠠᠭᠠᠳ ᠲᠣᠯᠣᠭᠠᠢ ᠶᠢ ᠨᠢ ᠣᠭᠲᠣᠯᠵᠤ ᠠᠪᠤᠭᠠᠳ᠂ ᠰᠥᠨᠢᠵᠢᠨ ᠢᠶᠠᠨ ᠶᠣᠷᠳᠠᠨ ᠤ ᠬᠥᠨᠳᠡᠢ ᠶᠢ ᠳᠤᠭᠤᠯᠵᠤ᠂ 8 ᠾᠧᠪᠷᠣᠨ ᠳᠤ ᠣᠴᠢᠪᠠ᠃ ᠲᠡᠳᠡ ᠢᠱ ᠪᠣᠱᠧᠲ ᠤᠨ ᠲᠣᠯᠣᠭᠠᠢ ᠶᠢ ᠳ᠋ᠠᠸᠢᠳ᠋ ᠬᠠᠭᠠᠨ ᠳᠤ ᠠᠪᠴᠢᠷᠠᠭᠠᠳ᠄ 《ᠬᠠᠷᠠᠭᠠᠴᠢ᠂ ᠠᠮᠢ ᠶᠢ ᠲᠠᠨᠢ ᠬᠥᠨᠥᠭᠡᠬᠦ ᠭᠡᠵᠦ ᠪᠠᠢᠭᠰᠠᠨ ᠲᠠᠨ ᠤ ᠳᠠᠢᠰᠤᠨ ᠰᠠᠦ᠋ᠯ ᠤᠨ ᠬᠦᠦ ᠢᠱ ᠪᠣᠱᠧᠲ ᠤᠨ ᠲᠣᠯᠣᠭᠠᠢ ᠡᠨᠡ ᠪᠠᠢᠨᠠ᠃ ᠡᠢᠨ ᠬᠦ ᠶᠣᠬᠣᠸᠠ ᠥᠨᠥᠳᠥᠷ ᠮᠢᠨᠦ ᠡᠵᠡᠨ ᠬᠠᠭᠠᠨ ᠤ ᠲᠥᠯᠥᠭᠡ ᠰᠠᠦ᠋ᠯ ᠪᠣᠯᠣᠨ ᠲᠡᠭᠦᠨ ᠦ ᠦᠷᠡ ᠤᠳᠤᠮ ᠠᠴᠠ ᠥᠰᠢᠶᠡ ᠠᠪᠤᠭᠤᠯᠤᠭᠰᠠᠨ ᠪᠠᠢᠨᠠ》 ᠭᠡᠵᠡᠢ᠃
9 ᠬᠠᠷᠢᠨ ᠳ᠋ᠠᠸᠢᠳ᠋ ᠪᠧᠷᠣᠲ ᠬᠥᠮᠦᠨ ᠷᠢᠮᠣᠨ ᠤ ᠬᠥᠪᠡᠭᠦᠳ ᠪᠣᠯᠬᠤ ᠷᠧᠺᠠᠪ ᠪᠣᠯᠣᠨ ᠲᠡᠭᠦᠨ ᠦ ᠠᠬᠠ ᠪᠠᠨᠠ ᠶᠢᠨ ᠬᠠᠷᠢᠭᠤ ᠳᠤ᠄ 《ᠮᠢᠨᠦ ᠠᠮᠢ ᠶᠢ ᠠᠯᠢᠪᠠ ᠭᠠᠴᠢᠭᠳᠠᠯ ᠠᠴᠠ ᠠᠪᠤᠷᠠᠭᠰᠠᠨ ᠠᠮᠢᠳᠤ ᠶᠣᠬᠣᠸᠠ ᠮᠢᠨᠦ ᠭᠡᠷᠡᠴᠢ ᠪᠣᠯᠣᠨᠠ᠃ 10 ᠤᠷᠢᠳᠤ ᠨᠢ 〈ᠰᠠᠦ᠋ᠯ ᠦᠬᠦᠭᠰᠡᠨ ᠰᠢᠦ〉 ᠭᠡᠵᠦ ᠨᠠᠳᠠ ᠳᠤ ᠮᠡᠳᠡᠭᠳᠡᠭᠰᠡᠨ ᠬᠥᠮᠦᠨ ᠪᠠᠢᠭᠰᠠᠨ᠂ ᠲᠡᠷᠡ ᠥᠪᠡᠷ ᠢ ᠪᠠᠨ ᠰᠠᠢᠨ ᠮᠡᠳᠡᠭᠡ ᠠᠪᠴᠢᠷᠠᠯᠠ ᠭᠡᠵᠦ ᠪᠣᠳᠣᠭᠰᠠᠨ ᠪᠣᠯᠪᠠᠴᠤ ᠪᠢ ᠲᠡᠭᠦᠨ ᠢ ᠪᠠᠷᠢᠵᠤ᠂ ᠽᠢᠺᠯᠠᠭ ᠲᠤ ᠴᠠᠭᠠᠵᠠᠯᠠᠭᠤᠯᠤᠭᠰᠠᠨ ᠪᠢᠯᠡ᠃ ᠮᠡᠳᠡᠭᠡ ᠠᠪᠴᠢᠷᠠᠭᠰᠠᠨ ᠬᠥᠮᠦᠨ ᠳᠦ ᠥᠭᠭᠥᠭᠰᠡᠨ ᠱᠠᠩᠨᠠᠯ ᠨᠢ ᠲᠡᠢᠮᠦ ᠪᠠᠢᠬᠤ ᠳᠤ᠂ 11 ᠭᠡᠮ ᠦᠭᠡᠢ ᠬᠥᠮᠦᠨ ᠢ ᠥᠪᠡᠷ ᠦᠨ ᠬᠢᠨᠢ ᠭᠡᠷ ᠲᠦ᠂ ᠥᠪᠡᠷ ᠦᠨ ᠬᠢᠨᠢ ᠣᠷᠣ ᠳᠡᠭᠡᠷᠡ ᠠᠯᠠᠭᠰᠠᠨ ᠭᠡᠮ ᠲᠡᠢ ᠲᠠ ᠨᠠᠷ ᠲᠤ ᠢᠯᠡᠭᠦᠦ ᠶᠢ ᠣᠨᠣᠭᠠᠵᠤ᠂ ᠲᠠ ᠨᠠᠷ ᠤᠨ ᠭᠠᠷ ᠠᠴᠠ ᠴᠢᠰᠤ ᠶᠢ ᠨᠢ ᠨᠡᠬᠡᠵᠦ ᠲᠠ ᠨᠠᠷ ᠢ ᠭᠠᠵᠠᠷ ᠠᠴᠠ ᠠᠷᠴᠢᠨ ᠬᠠᠶᠠᠬᠤ ᠦᠭᠡᠢ ᠭᠡᠵᠢ ᠤᠤ︖》 ᠭᠡᠪᠡ᠃ 12 ᠲᠡᠭᠡᠭᠡᠳ ᠳ᠋ᠠᠸᠢᠳ᠋ ᠵᠠᠯᠠᠭᠤᠰ ᠲᠠᠭᠠᠨ ᠲᠤᠰᠢᠶᠠᠵᠤ ᠲᠡᠷᠡ ᠬᠣᠶᠠᠷ ᠢ ᠴᠠᠭᠠᠵᠠᠯᠠᠭᠤᠯᠪᠠ᠃ ᠵᠠᠯᠠᠭᠤᠰ ᠲᠡᠳᠡᠨ ᠦ ᠭᠠᠷ ᠬᠥᠯ ᠢ ᠴᠠᠪᠴᠢᠭᠠᠳ᠂ ᠾᠧᠪᠷᠣᠨ ᠳᠤ ᠴᠥᠭᠥᠷᠥᠮ ᠦᠨ ᠳᠡᠷᠭᠡᠳᠡ ᠳᠡᠭᠦᠵᠢᠯᠡᠭᠰᠡᠨ ᠪᠠ ᠢᠱ ᠪᠣᠱᠧᠲ ᠤᠨ ᠲᠣᠯᠣᠭᠠᠢ ᠶᠢ ᠾᠧᠪᠷᠣᠨ ᠳᠠᠬᠢ ᠠᠪᠨᠧᠷ ᠤᠨ ᠪᠤᠯᠠᠰᠢᠨ ᠳᠤ ᠣᠷᠣᠰᠢᠭᠤᠯᠤᠭᠰᠠᠨ ᠪᠠᠢᠨᠠ᠃