ᠬᠣᠶᠠᠳᠤᠭᠠᠷ ᠰᠠᠮᠦ᠋ᠶᠧᠯ ᠠᠷᠪᠠᠨ ᠳᠣᠯᠣᠭᠠ
1 ᠠᠾᠢᠲ᠋ᠣᠹᠧᠯ ᠠᠪᠰᠠᠯᠣᠮ ᠳᠤ᠄ 《ᠲᠦᠮᠡ ᠬᠣᠶᠠᠷ ᠮᠢᠩ᠋ᠭᠠᠨ ᠬᠥᠮᠦᠨ ᠢ ᠰᠢᠯᠢᠵᠦ ᠠᠪᠤᠭᠠᠳ ᠡᠨᠡ ᠰᠥᠨᠢ ᠳ᠋ᠠᠸᠢᠳ᠋ ᠢ ᠨᠡᠬᠡᠨ ᠬᠥᠭᠡᠭᠡᠬᠦ ᠶᠢ ᠮᠢᠨᠢ ᠵᠥᠪᠰᠢᠶᠡᠷᠡᠭᠡᠴᠢ᠃ 2 ᠲᠡᠭᠦᠨ ᠢ ᠶᠠᠳᠠᠷᠠᠵᠤ ᠭᠠᠷ ᠰᠤᠯᠠᠷᠠᠭᠰᠠᠨ ᠦᠶᠡ ᠳᠦᠨᠢ ᠲᠡᠭᠦᠨ ᠤᠷᠤᠭᠤ ᠳᠠᠭᠠᠷᠢᠬᠤ ᠶᠣᠰᠣᠲᠠᠢ᠃ ᠲᠡᠭᠦᠨ ᠢ ᠠᠶᠤᠯᠭᠠᠪᠠᠯ ᠲᠡᠭᠦᠨ ᠲᠡᠢ ᠬᠠᠮᠲᠤ ᠪᠠᠢᠭᠠ ᠪᠦᠬᠦ ᠬᠥᠮᠦᠰ ᠵᠢᠭᠤᠲᠠᠬᠤ ᠪᠣᠯᠣᠨᠠ᠂ ᠲᠡᠭᠡᠪᠡᠯ ᠪᠢ ᠬᠠᠭᠠᠨ ᠢ ᠯᠠ ᠠᠯᠠᠭᠠᠳ 3 ᠪᠤᠰᠤᠳ ᠪᠦᠬᠦ ᠬᠥᠮᠦᠨ ᠢ ᠲᠠᠨ ᠳᠡᠭᠡᠷᠡ ᠪᠤᠴᠠᠭᠠᠵᠤ ᠠᠪᠴᠢᠷᠠᠶᠠ᠃ ᠲᠠᠨ ᠤ ᠬᠠᠢᠵᠤ ᠪᠠᠢᠭᠠ ᠬᠥᠮᠦᠨ ᠯᠠ ᠠᠯᠠᠭᠠ ᠪᠣᠯᠴᠢᠬᠠᠪᠠᠯ ᠪᠦᠬᠦ ᠬᠥᠮᠦᠨ ᠪᠤᠴᠠᠵᠤ ᠢᠷᠡᠬᠦ ᠪᠥᠭᠡᠳ ᠬᠥᠮᠦᠨ ᠪᠦᠬᠦᠨ ᠠᠮᠤᠷ ᠲᠠᠢᠪᠤᠩ ᠪᠣᠯᠬᠤ ᠪᠣᠯᠣᠨᠠ》 ᠭᠡᠵᠦ ᠬᠡᠯᠡᠪᠡ᠃ 4 ᠡᠨᠡ ᠦᠭᠡ ᠠᠪᠰᠠᠯᠣᠮ ᠪᠣᠯᠣᠨ ᠢᠰᠷᠧᠯ ᠤᠨ ᠪᠦᠬᠦ ᠠᠬᠠᠮᠠᠳ ᠲᠤ ᠲᠠᠭᠠᠯᠠᠭᠳᠠᠪᠠ᠃
5 ᠭᠡᠪᠡᠴᠦ ᠠᠪᠰᠠᠯᠣᠮ᠄ 《ᠠᠷᠺ ᠬᠥᠮᠦᠨ ᠾᠦᠱᠠᠢ ᠶᠢ ᠪᠠᠰᠠ ᠳᠠᠭᠤᠳᠠ᠃ ᠲᠡᠭᠦᠨ ᠦ ᠶᠠᠭᠤ ᠬᠡᠯᠡᠬᠦ ᠶᠢ ᠰᠣᠨᠣᠰᠴᠠᠭᠠᠶᠠ》 ᠭᠡᠪᠡ᠃ 6 ᠾᠦᠱᠠᠢ ᠠᠪᠰᠠᠯᠣᠮ ᠳᠡᠭᠡᠷᠡ ᠣᠴᠢᠬᠤ ᠳᠤ᠂ ᠠᠪᠰᠠᠯᠣᠮ ᠲᠡᠭᠦᠨ ᠳᠦ ᠠᠾᠢᠲ᠋ᠣᠹᠧᠯ ᠤᠨ ᠶᠠᠷᠢᠭᠰᠠᠨ ᠢ ᠬᠡᠯᠡᠭᠰᠡᠨ ᠦ ᠳᠠᠷᠠᠭᠠ᠄ 《ᠪᠢᠳᠡ ᠲᠡᠭᠦᠨ ᠦ ᠦᠭᠡ ᠪᠡᠷ ᠪᠣᠯᠬᠤ ᠤᠤ᠂ ᠦᠭᠡᠢ ᠤᠤ︖ ᠬᠡᠷᠪᠡ ᠦᠭᠡᠢ ᠪᠣᠯ᠂ ᠲᠠ ᠰᠠᠨᠠᠯ ᠢᠶᠠᠨ ᠬᠡᠯᠡᠨᠡ ᠤᠤ︖》 ᠭᠡᠰᠡᠨ ᠳᠦ᠂ 7 ᠾᠦᠱᠠᠢ ᠠᠪᠰᠠᠯᠣᠮ ᠳᠤ᠄ 《ᠡᠨᠡ ᠤᠳᠠᠭᠠ ᠠᠾᠢᠲ᠋ᠣᠹᠧᠯ ᠤᠨ ᠵᠥᠪᠯᠡᠯᠭᠡ ᠰᠠᠢᠨ ᠪᠢᠰᠢ》 ᠭᠡᠪᠡ᠃ 8 ᠾᠦᠱᠠᠢ ᠴᠢᠨᠠᠭᠰᠢ ᠨᠢ᠄ 《ᠲᠠ ᠥᠪᠡᠷ ᠦᠨ ᠢᠶᠠᠨ ᠡᠴᠢᠭᠡ ᠪᠣᠯᠣᠨ ᠲᠡᠭᠦᠨ ᠦ ᠴᠡᠷᠢᠭ ᠢ ᠰᠠᠢᠨ ᠮᠡᠳᠡᠨᠡ᠃ ᠲᠡᠳᠡ ᠳᠠᠢᠴᠢᠳ ᠪᠥᠭᠡᠳ ᠪᠠᠮᠪᠤᠷᠠᠰᠢ ᠪᠠᠨ ᠪᠤᠯᠢᠶᠠᠯᠭᠠᠭᠰᠠᠨ ᠵᠡᠷᠯᠢᠭ ᠡᠪᠰᠢ ᠶᠢᠨ ᠠᠳᠠᠯᠢ ᠬᠢᠯᠢᠩᠨᠡᠵᠦ ᠪᠠᠢᠨᠠ᠃ ᠲᠠᠨ ᠤ ᠡᠴᠢᠭᠡ ᠪᠠᠢᠯᠳᠤᠭᠠᠨ ᠳᠤ ᠮᠡᠷᠭᠡᠰᠢᠭᠰᠡᠨ ᠬᠥᠮᠦᠨ᠂ ᠲᠡᠷᠡ ᠴᠡᠷᠢᠭ ᠲᠠᠢ ᠪᠠᠨ ᠬᠠᠮᠲᠤ ᠰᠥᠨᠢ ᠶᠢ ᠥᠩᠭᠡᠷᠡᠭᠦᠯᠬᠦ ᠦᠭᠡᠢ᠂ 9 ᠡᠨᠡ ᠴᠠᠭ ᠢᠶᠠᠷ ᠲᠡᠷᠡ ᠠᠭᠤᠢ ᠬᠠᠪᠴᠢᠯ ᠭᠠᠵᠠᠷ ᠢᠶᠠᠷ ᠨᠢᠭᠤᠭᠳᠠᠵᠤ ᠪᠠᠢᠭᠠ ᠪᠠᠢᠬᠠ᠃ ᠬᠡᠷᠪᠡ ᠮᠠᠨ ᠤ ᠴᠡᠷᠢᠭ ᠤᠨ ᠬᠡᠳᠦᠨ ᠬᠥᠮᠦᠨ ᠠᠩ᠋ᠬᠠᠨ ᠤ ᠳᠣᠪᠲᠣᠯᠣᠭᠠᠨ ᠢᠶᠠᠷ ᠨᠢ ᠤᠨᠠᠬᠤ ᠶᠤᠮ ᠪᠣᠯ᠂ ᠡᠭᠦᠨ ᠢ ᠰᠣᠨᠣᠰᠣᠭᠰᠠᠨ ᠬᠥᠮᠦᠨ ᠪᠦᠷᠢ᠄ 〈ᠠᠪᠰᠠᠯᠣᠮ ᠢ ᠳᠠᠭᠠᠭᠰᠠᠨ ᠬᠥᠮᠦᠰ ᠠᠯᠠᠭᠳᠠᠵᠤ ᠪᠠᠢᠨᠠ〉 ᠭᠡᠵᠦ ᠬᠡᠯᠡᠬᠦ ᠪᠥᠭᠡᠳ 10 ᠠᠷᠰᠯᠠᠨ ᠠᠳᠠᠯᠢ ᠵᠣᠷᠢᠭ ᠲᠠᠢ ᠬᠥᠮᠦᠨ ᠪᠣᠯᠪᠠᠴᠤ ᠵᠢᠷᠦᠬᠡ ᠦᠬᠦᠬᠦ ᠪᠣᠯᠣᠨᠠ᠃ ᠲᠠᠨ ᠤ ᠡᠴᠢᠭᠡ ᠪᠠᠭᠠᠲᠤᠷ ᠪᠥᠭᠡᠳ ᠲᠡᠭᠦᠨ ᠢ ᠳᠠᠭᠠᠭᠰᠠᠳ ᠴᠤ ᠡᠷᠡᠯᠬᠡᠭ ᠬᠥᠮᠦᠰ ᠭᠡᠳᠡᠭ ᠢ ᠢᠰᠷᠧᠯ ᠳᠠᠶᠠᠭᠠᠷ ᠮᠡᠳᠡᠨᠡ᠃ 11 ᠡᠢᠮᠦ ᠡᠴᠡ ᠪᠢ ᠲᠠᠨ ᠳᠤ ᠢᠩᠭᠢᠵᠦ ᠵᠥᠪᠯᠡᠵᠦ ᠪᠠᠢᠨᠠ᠄ ᠳ᠋ᠠᠨ ᠠᠴᠠ ᠪᠧᠷᠣᠲ ᠱᠧᠪᠠ ᠬᠦᠷᠲᠡᠯᠡᠬᠢ ᠢᠰᠷᠧᠯ ᠳᠠᠶᠠᠭᠠᠷ ᠤᠨ ᠳᠠᠯᠠᠢ ᠶᠢᠨ ᠬᠥᠪᠡᠭᠡᠨ ᠦ ᠡᠯᠡᠰᠦ ᠮᠡᠲᠦ ᠦᠢ ᠣᠯᠠᠨ ᠢ ᠪᠦᠭᠦᠳᠡ ᠶᠢ ᠴᠤᠭᠯᠠᠭᠤᠯᠵᠤ᠂ ᠲᠠ ᠥᠪᠡᠷ ᠢᠶᠡᠨ ᠲᠤᠯᠤᠯᠳᠤᠭᠠᠨ ᠳᠤ ᠭᠠᠷᠬᠤ ᠶᠣᠰᠣᠲᠠᠢ᠃ 12 ᠲᠡᠭᠡᠭᠡᠳ ᠪᠢᠳᠡ ᠲᠡᠭᠦᠨ ᠢ ᠬᠠᠮᠢᠭᠠ ᠠᠴᠠ ᠣᠯᠪᠠᠯ ᠭᠠᠵᠠᠷ ᠲᠤ ᠪᠠᠭᠤᠬᠤ ᠰᠢᠭᠦᠳᠡᠷᠢ ᠮᠡᠲᠦ ᠪᠡᠷ ᠲᠡᠭᠦᠨ ᠤᠷᠤᠭᠤ ᠳᠠᠭᠠᠷᠢᠨ ᠪᠠᠭᠤᠬᠤ ᠪᠥᠭᠡᠳ ᠲᠡᠷᠡ ᠪᠣᠯᠣᠨ ᠲᠡᠭᠦᠨ ᠲᠡᠢ ᠬᠠᠮᠲᠤ ᠪᠠᠢᠬᠤ ᠴᠡᠷᠢᠭ ᠤᠳ ᠠᠴᠠ ᠨᠢᠭᠡ ᠶᠢ ᠴᠤ ᠦᠯᠡᠳᠡᠭᠡᠬᠦ ᠦᠭᠡᠢ᠃ 13 ᠬᠡᠷᠪᠡ ᠲᠡᠷᠡ ᠠᠯᠢ ᠨᠢᠭᠡᠨ ᠬᠣᠲᠠ ᠳᠤ ᠤᠬᠤᠷᠢᠪᠠᠯ᠂ ᠪᠦᠬᠦ ᠢᠰᠷᠧᠯ ᠣᠯᠣᠰᠣ ᠠᠪᠴᠢᠷᠠᠵᠤ ᠲᠡᠷᠡ ᠬᠣᠲᠠ ᠶᠢ ᠬᠥᠨᠳᠡᠢ ᠳᠦ ᠴᠢᠷᠴᠦ ᠣᠷᠣᠭᠤᠯᠤᠭᠠᠳ ᠭᠠᠭᠴᠠ ᠴᠢᠯᠠᠭᠤ ᠴᠤ ᠦᠯᠡᠳᠡᠭᠡᠬᠦ ᠦᠭᠡᠢ ᠪᠠᠢᠵᠤ ᠴᠢᠳᠠᠨᠠ》 ᠭᠡᠪᠡ᠃ 14 ᠠᠪᠰᠠᠯᠣᠮ ᠪᠣᠯᠣᠨ ᠢᠰᠷᠧᠯ ᠤᠨ ᠬᠠᠮᠤᠭ ᠬᠥᠮᠦᠨ᠄ 《ᠠᠷᠺ ᠬᠥᠮᠦᠨ ᠾᠦᠱᠠᠢ ᠶᠢᠨ ᠵᠥᠪᠯᠡᠯᠭᠡ ᠠᠾᠢᠲ᠋ᠣᠹᠧᠯ ᠤᠨ ᠵᠥᠪᠯᠡᠯᠭᠡ ᠡᠴᠡ ᠳᠡᠭᠡᠷᠡ》 ᠭᠡᠯᠴᠡᠪᠡ᠃ ᠤᠴᠢᠷ ᠨᠢ ᠶᠣᠬᠣᠸᠠ ᠠᠪᠰᠠᠯᠣᠮ ᠳᠤ ᠭᠠᠢ ᠤᠴᠠᠷᠠᠭᠤᠯᠬᠤ ᠶᠢᠨ ᠲᠤᠯᠠᠳᠠ ᠠᠾᠢᠲ᠋ᠣᠹᠧᠯ ᠤᠨ ᠰᠠᠢᠨ ᠵᠥᠪᠯᠡᠯᠭᠡ ᠶᠢ ᠪᠦᠲᠦᠯ ᠦᠭᠡᠢ ᠪᠣᠯᠭᠠᠬᠤ ᠪᠠᠷ ᠰᠢᠢᠳᠦᠭᠰᠡᠨ ᠠᠵᠢ᠃
ᠠᠪᠰᠠᠯᠣᠮ ᠤᠨ ᠲᠥᠯᠥᠪᠯᠡᠭᠡ ᠯᠡᠪᠡᠷᠡᠪᠡ
15 ᠾᠦᠱᠠᠢ ᠲᠠᠬᠢᠯᠴᠢ ᠽᠠᠳᠣᠺ ᠪᠣᠯᠣᠨ ᠠᠪᠢᠶᠠᠲ᠋ᠠᠷ ᠲᠤ ᠮᠡᠳᠡᠭᠦᠯᠦᠨ᠄ 《ᠠᠾᠢᠲ᠋ᠣᠹᠧᠯ ᠠᠪᠰᠠᠯᠣᠮ ᠪᠣᠯᠣᠨ ᠢᠰᠷᠧᠯ ᠤᠨ ᠠᠬᠠᠮᠠᠳ ᠤᠳ ᠲᠤ ᠲᠡᠭᠡᠵᠦ ᠵᠥᠪᠯᠡᠬᠦ ᠳᠦ᠂ ᠪᠢ ᠢᠩᠭᠢᠵᠦ ᠵᠥᠪᠯᠡᠯᠡ᠃ 16 ᠲᠡᠢᠮᠦ ᠡᠴᠡ ᠣᠳᠣ ᠬᠤᠷᠳᠤᠨ ᠬᠥᠮᠦᠨ ᠶᠠᠪᠤᠭᠤᠯᠵᠤ᠂ ᠳ᠋ᠠᠸᠢᠳ᠋ ᠲᠤ᠄ 〈ᠡᠨᠡ ᠰᠥᠨᠢ ᠴᠥᠯ ᠳᠤ ᠬᠦᠷᠬᠦ ᠭᠠᠷᠠᠮ ᠳᠤ ᠪᠦᠦ ᠬᠣᠨᠣᠭᠯᠠ︕ ᠵᠠᠪᠠᠯ ᠭᠠᠲᠤᠯᠤᠨ ᠶᠠᠪᠤ᠃ ᠡᠰᠡ ᠲᠡᠭᠡᠪᠡᠯ ᠬᠠᠭᠠᠨ ᠪᠣᠯᠣᠨ ᠬᠠᠮᠲᠤ ᠪᠤᠢ ᠬᠠᠮᠤᠭ ᠬᠥᠮᠦᠨ ᠠᠯᠠᠭᠳᠠᠬᠤ ᠪᠣᠯᠣᠨᠠ〉 ᠭᠡᠵᠦ ᠬᠡᠯᠡ》 ᠭᠡᠪᠡ᠃ 17 ᠲᠡᠷᠡ ᠦᠶᠡ ᠳᠦ ᠶᠣᠨᠠᠲ᠋ᠠᠨ᠂ ᠠᠾᠢᠮᠠᠽ ᠬᠣᠶᠠᠷ ᠷᠣᠭᠧᠯ ᠤᠨ ᠪᠤᠯᠠᠭ ᠲᠤ ᠬᠦᠯᠢᠶᠡᠵᠦ ᠪᠠᠢᠪᠠ᠃ ᠲᠡᠳᠡ ᠬᠥᠮᠦᠨ ᠳᠦ ᠬᠠᠷᠠᠭᠳᠠᠬᠤ ᠦᠭᠡᠢ ᠶᠢᠨ ᠲᠤᠯᠠᠳᠠ ᠬᠣᠲᠠ ᠳᠤ ᠣᠷᠣᠯ ᠦᠭᠡᠢ ᠪᠠᠷ ᠨᠢᠭᠡᠨ ᠰᠢᠪᠡᠭᠴᠢᠨ ᠤ ᠲᠡᠳᠡᠨ ᠳᠦ ᠬᠦᠷᠭᠡᠵᠦ ᠢᠷᠡᠬᠦ ᠮᠡᠳᠡᠭᠡ ᠶᠢ ᠳ᠋ᠠᠸᠢᠳ᠋ ᠬᠠᠭᠠᠨ ᠳᠤ ᠬᠦᠷᠭᠡᠵᠦ ᠣᠴᠢᠬᠤ ᠪᠠᠷ ᠪᠣᠯᠪᠠ᠃ 18 ᠬᠠᠷᠢᠨ ᠨᠢᠭᠡ ᠵᠠᠯᠠᠭᠤ ᠲᠡᠳᠡᠨ ᠢ ᠠᠩᠵᠠᠭᠠᠷᠠᠭᠠᠳ ᠠᠪᠰᠠᠯᠣᠮ ᠳᠤ ᠮᠡᠳᠡᠭᠦᠯᠪᠡ᠃ ᠭᠡᠪᠡᠴᠦ ᠲᠡᠷᠡ ᠬᠣᠶᠠᠷ ᠶᠠᠭᠠᠷᠠᠪᠴᠢᠯᠠᠨ ᠶᠠᠪᠤᠭᠰᠠᠭᠠᠷ᠂ ᠪᠠᠾᠦᠷᠢᠮ ᠳᠤ ᠬᠦᠷᠴᠦ ᠨᠢᠭᠡᠨ ᠬᠥᠮᠦᠨ ᠦ ᠭᠡᠷ ᠲᠦ ᠣᠷᠣᠪᠠ᠃ ᠲᠡᠷᠡ ᠬᠥᠮᠦᠨ ᠬᠠᠰᠢᠶᠠᠨ ᠳᠠᠭᠠᠨ ᠬᠤᠳᠳᠤᠭ ᠲᠠᠢ ᠪᠠᠢᠭᠰᠠᠨ ᠪᠥᠭᠡᠳ ᠲᠡᠷᠡ ᠬᠣᠶᠠᠷ ᠲᠡᠭᠦᠨ ᠳᠣᠲᠣᠷᠠ ᠨᠢ ᠣᠷᠣᠪᠠ᠃ 19 ᠭᠡᠷ ᠦᠨ ᠡᠵᠡᠭᠲᠡᠢ ᠪᠦᠲᠡᠭᠡᠯᠭᠡ ᠠᠪᠴᠢᠷᠠᠨ ᠬᠤᠳᠳᠤᠭ ᠤᠨ ᠠᠮᠠᠰᠠᠷ ᠢ ᠪᠦᠲᠡᠭᠡᠭᠡᠳ᠂ ᠳᠡᠭᠡᠷᠡ ᠨᠢ ᠪᠤᠭᠤᠳᠠᠢ ᠳᠡᠯᠭᠡᠨ ᠶᠠᠭᠤ ᠴᠤ ᠮᠡᠳᠡᠭᠳᠡᠬᠦ ᠦᠭᠡᠢ ᠪᠣᠯᠭᠠᠪᠠ᠃ 20 ᠠᠪᠰᠠᠯᠣᠮ ᠤᠨ ᠵᠠᠷᠤᠴᠠ ᠨᠠᠷ ᠲᠡᠷᠡ ᠡᠮᠡᠭᠲᠡᠢ ᠶᠢᠨ ᠭᠡᠷ ᠲᠦ ᠢᠷᠡᠵᠦ᠄ 《ᠠᠾᠢᠮᠠᠽ᠂ ᠶᠣᠨᠠᠲ᠋ᠠᠨ ᠬᠣᠶᠠᠷ ᠬᠠᠮᠢᠭᠠ ᠪᠠᠢᠨᠠ ᠪᠤᠢ︖》 ᠭᠡᠬᠦ ᠳᠦ᠂ ᠡᠮᠡᠭᠲᠡᠢ᠄ 《ᠲᠡᠳᠡ ᠭᠣᠷᠣᠬᠠ ᠭᠠᠲᠤᠯᠤᠭᠰᠠᠨ》 ᠭᠡᠪᠡ᠃ ᠲᠡᠳᠡ ᠡᠷᠢᠭᠰᠡᠨ ᠪᠣᠯᠪᠠᠴᠤ ᠣᠯᠣᠭᠰᠠᠨ ᠦᠭᠡᠢ ᠶᠧᠷᠦ᠋ᠰᠠᠯᠧᠮ ᠤᠷᠤᠭᠤ ᠪᠤᠴᠠᠭᠰᠠᠨ ᠪᠠᠢᠨᠠ᠃
21 ᠲᠡᠳᠡ ᠶᠠᠪᠤᠭᠰᠠᠨ ᠤ ᠬᠣᠢᠨᠠ᠂ ᠲᠡᠷᠡ ᠬᠣᠶᠠᠷ ᠬᠤᠳᠳᠤᠭ ᠠᠴᠠ ᠭᠠᠷᠴᠤ ᠢᠷᠡᠭᠡᠳ ᠳ᠋ᠠᠸᠢᠳ᠋ ᠬᠠᠭᠠᠨ ᠳᠤ ᠬᠡᠯᠡ ᠬᠦᠷᠭᠡᠬᠦ ᠪᠡᠷ ᠶᠠᠪᠤᠪᠠ᠃ ᠲᠡᠳᠡ ᠳ᠋ᠠᠸᠢᠳ᠋ ᠲᠤ᠄ 《ᠭᠣᠣᠯ ᠢ ᠬᠤᠷᠳᠤᠬᠠᠨ ᠭᠠᠲᠤᠯᠤᠭᠠᠷᠠᠢ᠃ ᠠᠾᠢᠲ᠋ᠣᠹᠧᠯ ᠲᠠ ᠨᠠᠷ ᠢ ᠬᠣᠣᠷᠯᠠᠬᠤ ᠪᠠᠷ ᠢᠩᠭᠢᠵᠦ ᠢᠩᠭᠢᠵᠦ ᠵᠥᠪᠯᠡᠭᠰᠡᠨ ᠪᠠᠢᠨᠠ》 ᠭᠡᠰᠡᠨ ᠳᠦ᠂ 22 ᠳ᠋ᠠᠸᠢᠳ᠋ ᠪᠣᠯᠣᠨ ᠲᠡᠭᠦᠨ ᠲᠡᠢ ᠬᠠᠮᠲᠤ ᠪᠠᠢᠭᠰᠠᠨ ᠬᠥᠮᠦᠰ ᠪᠦᠭᠦᠳᠡᠭᠡᠷ ᠬᠥᠳᠡᠯᠦᠨ᠂ ᠶᠣᠷᠳᠠᠨ ᠭᠣᠣᠯ ᠢ ᠭᠠᠲᠤᠯᠪᠠ᠃ ᠦᠷ ᠴᠠᠢᠲᠠᠯᠠ ᠶᠣᠷᠳᠠᠨ ᠭᠣᠣᠯ ᠢ ᠭᠠᠲᠤᠯᠤᠭᠠ ᠦᠭᠡᠢ ᠬᠥᠮᠦᠨ ᠨᠢᠭᠡ ᠴᠤ ᠪᠠᠢᠭᠰᠠᠨ ᠦᠭᠡᠢ᠃
23 ᠬᠠᠷᠢᠨ ᠠᠾᠢᠲ᠋ᠣᠹᠧᠯ ᠵᠥᠪᠯᠡᠯᠭᠡ ᠶᠣᠰᠣᠭᠠᠷ ᠨᠢ ᠬᠢᠭᠰᠡᠨ ᠦᠭᠡᠢ ᠶᠢ ᠬᠠᠷᠠᠭᠠᠳ ᠡᠯᠵᠢᠭᠡ ᠪᠡᠨ ᠡᠮᠡᠭᠡᠯᠯᠡᠨ᠂ ᠲᠥᠷᠥᠭᠰᠡᠨ ᠨᠤᠲᠤᠭ ᠤᠷᠤᠭᠤ ᠪᠠᠨ ᠪᠤᠴᠠᠵᠤ᠂ ᠭᠡᠷ ᠲᠡᠭᠡᠨ ᠣᠴᠢᠭᠠᠳ ᠭᠡᠷ ᠦᠨ ᠬᠢᠨ ᠳᠡᠭᠡᠨ ᠭᠡᠷᠢᠶᠡᠰ ᠦᠯᠡᠳᠡᠭᠡᠨ ᠪᠣᠭᠣᠮᠢᠯᠠᠵᠤ ᠦᠬᠦᠭᠰᠡᠨ ᠪᠠᠢᠨᠠ᠃ ᠲᠡᠭᠦᠨ ᠢ ᠡᠴᠢᠭᠡ ᠶᠢᠨ ᠬᠢᠨᠢ ᠪᠤᠯᠠᠰᠢᠨ ᠳᠤ ᠣᠷᠣᠰᠢᠭᠤᠯᠵᠠᠢ᠃
24 ᠳ᠋ᠠᠸᠢᠳ᠋ ᠮᠠᠬᠠᠨᠠᠢᠮ ᠳᠤ ᠬᠦᠷᠦᠭᠰᠡᠨ ᠦᠶᠡ ᠳᠦ ᠠᠪᠰᠠᠯᠣᠮ ᠪᠣᠯᠣᠨ ᠲᠡᠭᠦᠨ ᠲᠡᠢ ᠬᠠᠮᠲᠤ ᠪᠤᠢ ᠢᠰᠷᠧᠯ ᠤᠨ ᠴᠡᠷᠢᠭ ᠤᠳ ᠪᠦᠭᠦᠳᠡᠭᠡᠷ ᠶᠣᠷᠳᠠᠨ ᠭᠣᠣᠯ ᠢ ᠭᠠᠲᠤᠯᠪᠠ᠃ 25 ᠠᠪᠰᠠᠯᠣᠮ ᠶᠣᠶᠠᠪ ᠤᠨ ᠣᠷᠣᠨ ᠳᠤ ᠠᠮᠠᠰᠠ ᠶᠢ ᠴᠡᠷᠢᠭ ᠤᠨ ᠵᠠᠩᠵᠤᠨ ᠢᠶᠠᠷ ᠲᠣᠮᠢᠯᠠᠭᠰᠠᠨ ᠪᠠᠢᠯᠠ᠃ ᠠᠮᠠᠰᠠ ᠪᠣᠯ ᠶᠧᠲ᠋ᠧᠷ ᠭᠡᠳᠡᠭ ᠢᠰᠷᠧᠯ ᠬᠥᠮᠦᠨ ᠦ ᠬᠥᠪᠡᠭᠦᠨ ᠪᠢᠯᠡ᠃ ᠶᠧᠲ᠋ᠧᠷ ᠤᠨ ᠡᠬᠡᠨᠡᠷ ᠪᠣᠯ ᠨᠠᠬᠠᠱ ᠤᠨ ᠥᠬᠢᠨ ᠠᠪᠢᠭᠠᠢᠯ ᠪᠥᠭᠡᠳ ᠶᠣᠶᠠᠪ ᠤᠨ ᠡᠬᠡ ᠽᠧᠷᠣᠢᠶᠠ ᠶᠢᠨ ᠥᠬᠢᠨ ᠳᠡᠭᠦᠦ ᠪᠠᠢᠯᠠ᠃ 26 ᠢᠰᠷᠧᠯᠴᠦᠳ ᠪᠣᠯᠣᠨ ᠠᠪᠰᠠᠯᠣᠮ ᠭᠢᠯᠧᠶᠠᠳ᠋ ᠤᠨ ᠨᠤᠲᠤᠭ ᠲᠤ ᠬᠤᠸᠠᠷᠠᠩᠨᠠᠪᠠ᠃
27 ᠳ᠋ᠠᠸᠢᠳ᠋ ᠮᠠᠬᠠᠨᠠᠢᠮ ᠳᠤ ᠬᠦᠷᠦᠭᠰᠡᠨ ᠦᠶᠡ ᠳᠦ᠂ ᠷᠠᠪᠠ ᠶᠢᠨ ᠠᠮᠣᠨ ᠬᠥᠮᠦᠨ ᠨᠠᠬᠠᠱ ᠤᠨ ᠬᠥᠪᠡᠭᠦᠨ ᠱᠣᠪᠢ ᠪᠣᠯᠣᠨ ᠯᠣᠳᠧᠪᠠᠷ ᠬᠥᠮᠦᠨ ᠠᠮᠢᠶᠧᠯ ᠤᠨ ᠬᠥᠪᠡᠭᠦᠨ ᠮᠠᠺᠢᠷ᠂ ᠷᠣᠭᠧᠯᠢᠮ ᠤᠨ ᠭᠢᠯᠧᠶᠠᠳ᠋ ᠬᠥᠮᠦᠨ ᠪᠠᠷᠽᠢᠯᠠᠢ ᠨᠠᠷ ᠢᠷᠡᠪᠡ᠃ 28 ᠲᠡᠳᠡ ᠣᠷᠣ ᠳᠡᠪᠢᠰᠬᠡᠷ᠂ ᠨᠢᠭᠤᠷ ᠤᠬᠢᠶᠠᠬᠤ ᠰᠠᠪᠠ᠂ ᠠᠶᠠᠭᠠ᠂ ᠪᠤᠭᠤᠳᠠᠢ᠂ ᠠᠷᠪᠠᠢ᠂ ᠭᠤᠯᠢᠷ᠂ ᠬᠠᠭᠤᠷᠤᠭᠰᠠᠨ ᠲᠠᠷᠢᠶᠠ᠂ ᠪᠤᠷᠴᠠᠭ᠂ ᠤᠯᠠᠭᠠᠨ ᠪᠤᠷᠴᠠᠭ᠂ ᠬᠠᠲᠠᠭᠠᠭᠰᠠᠨ ᠦᠷᠡ᠂ 29 ᠪᠠᠯ᠂ ᠴᠥᠴᠥᠭᠡᠢ᠂ ᠬᠣᠨᠢ᠂ ᠪᠢᠰᠢᠯᠠᠭ ᠵᠡᠷᠭᠡ ᠶᠢ ᠳ᠋ᠠᠸᠢᠳ᠋ ᠪᠣᠯᠣᠨ ᠲᠡᠭᠦᠨ ᠦ ᠬᠠᠷᠢᠶᠠ ᠬᠥᠮᠦᠰ ᠦᠨ ᠬᠦᠨᠡᠰᠦᠨ ᠳᠦ ᠠᠪᠴᠢᠷᠠᠪᠠ᠃ ᠲᠡᠳᠡᠨ ᠢ ᠴᠥᠯ ᠳᠤ ᠥᠯᠥᠰᠴᠦ ᠶᠠᠳᠠᠷᠠᠵᠤ ᠴᠠᠩ᠋ᠭᠠᠭᠰᠠᠨ ᠪᠠᠢᠬᠠ ᠬᠡᠮᠡᠨ ᠪᠣᠳᠣᠵᠠᠢ᠃